საქართველოს საგარეო საქმეთა მინისტრი მაკა ბოჭორიშვილი მარკო რუბიოს აშშ-ის სახელმწიფო მდივნად დანიშვნას ულოცავს.

„გულითადად ვულოცავ მარკო რუბიოს აშშ-ის სახელმწიფო მდივნის თანამდებობაზე დანიშვნას. მოუთმენლად ველი ჩვენს ორ ქვეყანას შორის თანამშრომლობის განვითარებასა და კავშირების გაძლიერებას. ღრმად მწამს, რომ საქართველო-აშშ-ის ურთიერთობებში საუკეთესო ჯერ კიდევ წინ არის“, – დაწერა ბოჭორიშვილმა სოციალურ ქსელ X-ში.

აშშ-ის სენატმა დღეს ხმათა უმრავლესობით რუბიო სახელმწიფო მდივნის თანამდებობაზე დაამტკიცა.

აზერბაიჯანის მილი მეჯლისის [პარლამენტის] წევრი მაზაჰირ ეფენდიევი რამდენიმე დღის წინ საქართველოს პრემიერ-მინისტრის ირაკლი კობახიძის მიერ ბაქოში განხორციელებულ ოფიციალურ ვიზიტს ეხმიანება და აცხადებს, რომ ორი ქვეყანა ერთად რეგიონში მშვიდობასა და უსაფრთხოებას იცავს.

„დღეს საქართველო არის ქვეყანა, რომელთანაც აზერბაიჯანი, როგორც რეგიონის ლოკომოტივი სახელმწიფო სამხრეთ კავკასიაში, სხვადასხვა სფეროში კავშირებს ამყარებს. კერძოდ, საქართველოს გეოპოლიტიკური მნიშვნელობა რეგიონში გაიზარდა სომხეთთან თითქმის 30-წლიანი ომის შემდეგ. აზერბაიჯანელ და ქართველ ხალხებს შორის, რომლებიც სამხრეთ კავკასიაში საუკუნეების მანძილზე მშვიდობიანად ცხოვრობენ, მჭიდრო ისტორიული კავშირები, ურთიერთობები უსაფრთხოების, თავდაცვის, ეკონომიკის, ვაჭრობის, ენერგეტიკის, ტრანსპორტისა და ლოგისტიკის, ტურიზმის, კულტურისა და სხვა სფეროებში ემყარება ურთიერთპატივისცემასა და თანასწორ მეგობრობას“, – წერს დეპუტატი.

ეფენდიევი აღნიშნავს, რომ აზერბაიჯანისა და საქართველოს ურთიერთობამ დინამიკურად განვითარება საბჭოთა კავშირის დაშლისთანავე დაიწყო. განსაკუთრებით, ეს მოხდა მაშინ, როცა აზერბაიჯანის პრეზიდენტი იყო ჰეიდარ ალიევი, ხოლო საქართველოს ედუარდ შევარდნაძე ხელმძღვანელობდა.

„როცა 1993 წელს დიდმა ლიდერმა ჰეიდარ ალიევმა ქვეყნის საგარეო პოლიტიკის პრიორიტეტები გამოაცხადა, მან, საკუთარ გამოცდილებაზე დაყრდნობითა და არსებული შესაძლებლობების ხეირიანად გამოყენებით, კიდევ უფრო გააღრმავა კეთილმეზობლური ურთიერთობები საქართველოსა და აზერბაიჯანს შორის საქართველოს პრეზიდენტთან ედუარდ შევარდნაძესთან მეგობრობის წყალობით, რომელიც ჯერ კიდევ საბჭოთა პერიოდში დაიწყო“, – ამბობს აზერბაიჯანის პარლამენტის წევრი.

ავტორი თავის სტატიაში აღნიშნავს, რომ აზერბაიჯანი საქართველოს განვითარების, აყვავებისა და სტაბილურობის მომხრე იყო ყოველთვის. მისი თქმით, ირაკლი კობახიძის საქართველოს პრემიერ-მინისტრად დამტკიცების შემდეგ, 2025 წლის 17 იანვარს აზერბაიჯანში განხორციელებული პირველი ვიზიტი ცხადყოფს, რომ ორ ქვეყანას შორის კავშირები მაღალ დონეზეა.

„მეგობრული ურთიერთობები, ტრადიციული შეხვედრები, რომელსაც თვალყურს ვადევნებთ დღეს, სამხრეთ კავკასიის რეგიონში ახალ ჰორიზონტებს ხსნის და აგრეთვე ხელს უწყობს ხალხების საკეთილდღეოდ დიდი სამუშაოს გაგრძელებას”, – წერს დეპუტატი.

ამერიკის შეერთებული შტატები არის ზესახელმწიფო და ამიტომ ლოგიკურია ძალიან დიდი ინტერესი, რა საშინაო და საგარეო პოლიტიკა ექნება ახალ პრეზიდენტს. ამ ეტაპზე ჯერ ყველა კონტური ნათელი არ არის, მაგრამ შეგვიძლია, რამდენიმე ძირითადი დასკვნა გამოვიტანოთ, – ამის შესახებ „ქართული ოცნების“ წევრმა, ლევან მახაშვილმა განაცხადა.

მისი თქმით, დონალდ ტრამპის ადმინისტრაციის საშინაო და საგარეო პოლიტიკა მთლიანად აგებული იქნება ამერიკის ინტერესებზე.

„ის მთლიანად მორგებული იქნება იმაზე, რომ ამერიკამ მაქსიმალურად მეტი სარგებელი მიიღოს ამ პოლიტიკისგან. ლოგიკურია, ამის გამო ჩვენ სერიოზული დასკვნები უნდა გამოვიტანოთ. მეორე დასკვნა რაც შეიძლება გავაკეთოთ ეს არის, რომ ტრამპი როგორც ჩანს, აპირებს ლიბერალური იდეოლოგიის დემონტაჟს ან გადაფასებას, მნიშვნელოვნად შეზღუდვას. ეს უკვე მისი არსებული გადაწყვეტილებებით რამდენიმე მიმართულებით გამოიხატა. პირველი გენდერის საკითხია. იგი მკაფიოდ აცხადებს, რომ ქალი და კაცი არის მხოლოდ ის ორი გენდერი, რომელიც არსებობს და ის არ აღიარებს სხვა გენდერს. მეორე, ეს არის ოჯახური, ტრადიციული და კონსერვატიული ღირებულებების პატივისცემა. მესამე, რაზეც გუშინ გადაწყვეტილება მიიღო ეს არის „დიფ სთეითის“ დემონტაჟი. ამერიკის ადმინისტრაციის და ბიუროკრატიის „დიფ სთეითისგან“ და არაფორმალური გავლენებისგან გაწმენდა. კიდევ რასაც ვხედავთ ეს არის ძალიან გამკაცრებული საემიგრაციო პოლიტიკა“, – განაცხადა მახაშვილმა.

ლევან მახაშვილის განცხადებით, მმართველი პარტია ადასტურებს მზაობას, რომ საქართველოს და აშშ-ის შორის ურთიერთობები ნორმალურ კალაპოტს დაუბრუნდეს.

„ჩვენ რაც უნდა გავაკეთოთ და რა დასკვნებიც უნდა გამოვიტანოთ არის, რომ გვქონდეს საერთო ინტერესები, საერთო ხედვა და საერთო მიდგომა ბევრ საგარეო პოლიტიკურ საკითხთან დაკავშირებით. ჩვენ დავიწყებთ მოქმედებას იმაზე, რომ ჩვენი ინტერესები გადაიკვეთოს. ჩვენ კიდევ ერთხელ ვადასტურებთ მზაობას ამ ურთიერთობების ნორმალურ და ცივილურ კალაპოტში დასაბრუნებლად. გუშინ დონალდ ტრამპმა 42 აღმასრულებელი გადაწყვეტილებები მიიღო. ერთ-ერთში პირდაპირ წერია „დიფ სთეითის“ დემონტაჟი. ეს არის ერთ-ერთი დიდი მიმართულება, სადაც ჩვენი ხედვები ერთმანეთს ემთხვევა. მეორე დიდი მიდგომა, რაშიც ჩვენს პოზიციებს შორის თანხვედრა არსებობს, ოჯახური ღირებულებებია. კიდევ ერთი – ეს არის საგარეო პოლიტიკური საკითხი. ჩვენი ხედვა არის ის, რომ ყველა ქვეყნის ეროვნულმა ხელისუფლებამ უპირველეს ყოვლისა საკუთარ საზოგადოებასა და საკუთარ სახელმწიფოზე უნდა იზრუნოს. ასეთია როგორც დონალდ ტრამპის, ასევე ჩვენი მიდგომაც. ფუნდამენტურ საკითხებზე თანხვედრა გვაძლევს იმის იმედს, რომ საქართველოსა და აშშ-ის ურთიერთობები აღდგება. ჩვენგან ამის სრული მზადყოფნაა“,- განაცხადა მახაშვილმა.