საქართველოს პრემიერ-მინისტრმა, ირაკლი კობახიძემ ევროპის პოლიტიკური გაერთიანების მეხუთე სამიტის ფარგლებში მონაწილეობა მიიღო პანელურ დისკუსიაში, თემაზე „ეკონომიკური უსაფრთხოება და დაკავშირებადობა“. ინფორმაციას ამის შესახებ მთავრობის ადმინისტრაცია ავრცელებს.

უწყების ცნობით, დახურული ფორმატის დისკუსიაზე სიტყვით გამოსვლისას მთავრობის მეთაურმა ყურადღება გაამახვილა ეკონომიკური დივერსიფიკაციის მნიშვნელობაზე, რაც ხელს უწყობს ეკონომიკის მდგრად განვითარებას.

„ირაკლი კობახიძემ ასევე ხაზი გაუსვა საქართველოს როლს ევროკავშირთან დაკავშირებადობის გაუმჯობესების კუთხით და ისაუბრა სატრანსპორტო სფეროში მიმდინარე და დაგეგმილი მსხვილი ინფრასტრუქტურული პროექტების შესახებ, რომელთა შორისაა აღმოსავლეთ-დასავლეთის ჩქაროსნული ავტომაგისტრალის დასრულება, რკინიგზის მოდერნიზაცია და ანაკლიის ღრმაწყლოვანი პორტის მშენებლობა.

პრემიერ-მინისტრმა სიტყვით გამოსვლისას ასევე ყურადღება დაუთმო ენერგოუსაფრთხოების მნიშვნელობას და შავი ზღვის წყალქვეშა კაბელის პროექტის როლს. ასევე ისაუბრა სატრანზიტო პოტენციალზე და აღნიშნა, რომ საქართველო რჩება ევროკავშირის სანდო და საიმედო პარტნიორად ფართო რეგიონში. დახურული ფორმატის დისკუსიაში, რომელსაც ლატვიის პრემიერ-მინისტრი თავმჯდომარეობდა, ესტონეთის, პორტუგალიის, სერბეთის, თურქეთის, სომხეთის, ბოსნია-ჰერცოგოვინის, უკრაინის, მოლდოვის და სხვა ქვეყნების ლიდერები მონაწილეობდნენ“, – ნათქვამია მთავრობის მიერ გავრცელებულ ინფორმაციაში.

მივმართავ პრემიერ-მინისტრს, რომელიც ჩვენთანაა, მტკიცედ ვიმედოვნებ, რომ საქართველო დაადასტურებს ევროპულ არჩევანს, ასევე დემოკრატიული მოდელის არჩევანს, – ამის შესახებ საფრანგეთის პრეზიდენტმა, ემანუელ მაკრონმა ევროპის პოლიტიკური გაერთიანების სამიტზე განაცხადა.

როგორც მაკრონმა აღნიშნა, „მიაჩნია, რომ ევროპული დემოკრატიული მოდელიც საფრთხეშია“.

„მიმაჩნია, რომ ბოლო კვირების განვითარება აჩვენებს, რომ ევროპული დემოკრატიული მოდელიც საფრთხეშია. საქართველოსა და მოლდოვაში იყო რამდენიმე თავდასხმა, კიბერთავდასხმები, ხმის მოსყიდვა, მანიპულაციები. ყველა დამკვირვებელი ამაზე მიუთითებს. აქვე მინდა, მივულოცო მაია სანდუს ხელახლა არჩევა. მივმართავ პრემიერ-მინისტრს, რომელიც ჩვენთანაა, მტკიცედ ვიმედოვნებ, რომ საქართველო დაადასტურებს თავის ევროპულ არჩევანს, ასევე დემოკრატიული მოდელის არჩევანს“, – განაცხადა ემანუელ მაკრონმა.

უნგრეთის დედაქალაქ ბუდაპეშტში ევროპის პოლიტიკური გაერთიანების სამიტი იმართება. სამიტში მონაწილეობს 40-მდე სახელმწიფოს ლიდერები, მათ შორის საქართველოს პრემიერ-მინისტრი ირაკლი კობახიძე.

პოლონეთის სეიმის საგარეო საქმეთა კომიტეტის თავმჯდომარე და უკრაინასთან თანამშრომლობის საბჭოს ხელმძღვანელი პაველ კოვალი უკრაინულ ტელევიზიასთან საუბარში აშშ-ში, საქართველოსა და მოლდოვაში ჩატარებულ არჩევნებს აფასებს და აცხადებს, რომ საკითხი ასე არ დგას, რომ ხალხმა არჩევნებზე რუსეთს დაუჭირა მხარი, რადგან მათ ხმა ივანიშვილს მისცეს, რომელიც მოსახლეობას ევროპულ გარანტიებს ჰპირდება.

კოვალი აღნიშნავს, რომ ქართველებისთვის ევროპელობა იდენტობის არსია; საქართველო ერთ-ერთი ყველაზე პროევროპული ქვეყანაა საზოგადოებრივი აზრის მიხედვით და მუდამ ასე იყო, ის ევროპული თანამეგობრობის ნაწილია და შეუძლებელია ევროპის ისტორიის ნორმალური გაგება, პოლიტიკური ევროპის სადღაც უკიდურესად აღმოსავლეთით მდებარე საქართველოს გარეშე.

„საჭიროა პრაგმატული მიდგომა საქართველოს ახალ მთავრობასთან; მტკიცე და გადამწყვეტი ქმედებები მაშინ, თუ ცუდს გააკეთებენ; პოზიტიური რეაგირება იმაზე, როცა რეალურ რეფორმებს განახორციელებენ და რაც ყველაზე მთავარია, არ უნდა დავტოვოთ საქართველოს საზოგადოება, ის ხალხი, რომელიც მობილიზდა და რომელსაც ევროპული საქართველო უნდათ. უნდა გვახსოვდეს, რომ საქართველო ერთ-ერთი ყველაზე პროევროპული ქვეყანაა საზოგადოებრივი აზრის მიხედვით და მუდამ ასე იყო. ქართველებისთვის ევროპელობა იდენტობის არსია. ორი რამე აქვთ: ევროპელობა და ღვინო. ქართველები მონახავენ ევროპულ გზას. საქართველო ევროპული თანამეგობრობის ნაწილია. შეუძლებელია ევროპის ისტორიის ნორმალური გაგება, პოლიტიკური ევროპის სადღაც უკიდურესად აღმოსავლეთით მდებარე საქართველოს გარეშე“,- აცხადებს პაველ კოვალი.

მისი შეფასებით, ხალხმა არჩევნებზე მხარი ბიძინა ივანიშვილს დაუჭირა მხარი.

„აქ ძირითადი როლი ომის შიშმა ითამაშა. აშკარაა, რომ რუსები ქართველების მეგობრები არ არიან. ასე არ იყო, რომ ხალხმა რუსეთს დაუჭირა მხარი. ქართველები ხმას ივანიშვილს აძლევდნენ, რომელიც ბოლო გამოსვლების დროს იძახდა, რომ ჩვენ ვიძლევით ევროპულ გარანტიებს. შორეულ პროვინციებში, რეგიონებში, მაგალითად კახეთში, ასე არ არის, რომ უბრალო ხალხს პოლიტიკა კარგად ესმის, მათთვის დიდად მნიშვნელოვანია ლოზუნგი „მივდივართ ევროპისკენ“. ივანიშვილი ამ ლოზუნგს მოუბრუნდა წინასაარჩევნო პერიოდის გამოსვლებში, როდესაც დამატებითი ხმების მოპოვებას ცდილობდა.

„ადვილია იმის თქმა, რომ ყველა ხმა პრორუსულია, რაც პუტინის დიდი პროვოკაციაა, არადა არავინ აყენებს ეჭვქვეშ, რომ თბილისშიც კი, „ქართული ოცნების“ მხარდაჭერა, დაახლოებით 40%-ის ირგვლივ იყო, ქალაქების გარეთ ნამდვილად გაცილებით მეტი იყო. ამ არჩევნების შეფასებისას, ეს უნდა გვახსოვდეს, იმიტომ, რომ ცუდი დიაგნოზი შესაძლოა ცუდი პოლიტიკური ქმედებების გამომწვევი იყოს. ასე რომ, მე ვთვლი, რომ ქართული საზოგადოება არ უნდა მოექცეს იზოლაციაში, საჭიროა დიდი ყურადღებით მოვექცეთ, მოვახდინოთ ხელისუფლების ყველა შეცდომაზე და ყველა არადემოკრატიულ ქმედებაზე მითითება. უსაფრთხოების საკითხზე ძალიან პრაგმატული მიდგომაა საჭირო. ანუ ისეთ თემებთან, როგორიცაა უსაფრთხოება, სამხედრო თანამშრომლობა, თუკი ეს შესაძლებელია, ვინაიდან ზემოაღნიშნული ყოველთვის შესაძლებელი არ არის. თუ შესაძლებელია ეს თანამშრომლობა უნდა შენარჩუნდეს. მე ასეთი მიდგომა მაქვს იმასთან, იქ რაც ხდებოდა, რადგან ვხედავ, რომ „ქართული ოცნების“ მხარდაჭერა ძალიან მაღალია“,- აცხადებს კოვალი.

პაველ კოვალის შეფასებით, საარჩევნო კამპანია სუსტი იყო საქართველოს ძირითადი ცენტრების გარეთ.

„საქართველოში ფაქტორები ცოტა უფრო მეტია, ვიდრე რუსეთი. რა თქმა უნდა არის რუსეთი, ამასთან ოპოზიციის საარჩევნო კამპანია მწირე იყო მთავარ ცენტრებს მიღმა. ოპოზიცია დანაწევრებული იყო, თუმცა ამას არ ჰქონდა პირდაპირი გავლენა, რადგან არჩევნები პროპორციული გზით ჩატარდა, ანუ ხმებს არ კარგავდნენ. ისეთი შთაბეჭდილება რჩებოდა, რომ ოპოზიცია ძალიან დაყოფილი იყო, 4 ბლოკად, რომელთაც ცალ-ცალკე, შეიძლება ითქვას რომ კარგი, დაახლოებით 10%-იანი შედეგი მიიღეს, თუმცა საარჩევნო კამპანია სუსტი იყო, საქართველოს ძირითადი ცენტრების გარეთ. საქართველოში რამდენჯერმე ვიყავი და დავინახე, რომ მათი საარჩევნო კამპანია კონცენტრირებული იყო მხოლოდ თბილისის ირგვლივ და მიმდებარედ. ეჭვის ქვეშ არავინ აყენებს, რომ „ქართულ ოცნებას“ თბილისსა და მის გარშემო დაახლოებით 40%-იანი მხარდაჭერა ჰქონდა, პროვინციებში მეტიც ექნებოდათ. საქართველოს არჩევნებში გასაკვირი არის ის, რომ არსებობს ერთგვარი შეუსაბამობა საზოგადოებრივი აზრის კვლევებსა და პირველად ეგზიტპოლებს შორის. ანუ ხალხი, რომელმაც ხმა მისცა, გამოდიოდა და ხმამაღლა სხვა რამეს ამბობდა. ანუ შეიძლება მათ რცხვენოდათ თქმა, რომ ხმა „ქართულ ოცნებას“ მისცეს. საქართველოში ასეთი რამ მოხდა, ქართული ოცნების საარჩევნო კამპანია ძალიან ინტენსიური იყო, ძალიან ძლიერ მესიჯზე დაფუძნებული, რომ თუ საქართველოში ხელისუფლება შეიცვლება, ომი დაიწყება. ქართველებს 2008 წლიდან ომის ტრავმა აქვთ. პრაქტიკულად ყველა ქუჩაზე იყო ტრანსპარანტები, ბილბორდები, ინფორმაცია, რომელიც დანგრეულ უკრაინულ ქალაქებსა და ეკლესიებთან დაუნგრეველი საქართველოს შედარებას გამოხატავდა. ვფიქრობ, რომ შიშით თამაშმა, აგრეთვე პუტინის მიერ წარმოებულმა თამაშმა და თუ სპეციალურ ოპერაციაზე ვსაუბრობთ, ვამბობთ რომ ეს იყო საინფორმაციო ოპერაცია, და რომ ამან ითამაშა დიდი როლი კენჭისყრის საბოლოო შედეგზე“,- აცხადებს კოვალი.

მისივე შეფასებით, საპარლამენტო არჩევნებზე ოპოზიციის შედეგი არ არის ცუდი, ერთობლივად მათ აქვთ დაახლოებით 40%-იანი მხარდაჭერა და პარლამენტში შევა ახალგაზრდა თაობა, რომელსაც შანსი უნდა მიეცეს.
„4 პარტიიდან თითოეულმა, სადღაც 10%-იანი მხარდაჭერა მიიღო. საარჩევნო კამპანიისთვის, მათ ყველაფერი გააკეთეს, რაც შეეძლოთ, არსებულ პირობებში. არჩევნები მომავალშიც ჩატარდება, ამით არ მთავრდება ყველაფერი, შიგნით უნდა იმუშაონ და იქ, სადაც შეიძლება, უნდა დავეხმაროთ ქართველებს. ოპოზიციის გაერთიანება არსებითი არ იყო, ვინაიდან სისტემა პროპორციული იყო. ანუ, ტექნიკური თვალსაზრისით გაერთიანება არაფერს იძლეოდა. მაგრამ, ხალხი ამას უყურებდა და ეძებდა ლიდერს, რომელიც ვერ იპოვეს. აქედანაც დასკვნის გამოტანა შეიძლება. ტექნიკურად არაა საჭირო გაერთიანება, ხმები ისედაც ითვლება პროპორციული სისტემის შესაბამისად, 10%-ი თუ გაქვს პარლამენტში 10%-ს იღებ, პრობლემა არ არის. თუმცა, უნდა ითქვას, რომ ოპოზიციას ერთი გამოკვეთილი ლიდერი დააკლდა. ნაკლოვანება იყო, ასევე რა თქმა უნდა პროგრამა… იმ თვალსაზრისით, რომ ოპოზიციამ მიიჩნია, რომ საკმარისი იყო მხოლოდ იმის თქმა, რომ ჩვენ ევროკავშირის გარანტიას ვიძლევით, არადა იგივე თქვა მმართველი პარტიიდან ივანიშვილმაც. მე მგონია, რომ ბევრმა ქართველმა არ იცოდა რა განსხვავება იყო მათ შორის, ისინი დიდად განსხვავებულს არაფერს ამბობდნენ, ხალხი ფიქრობდა რომ ევროკავშირის გზა გარანტირებული იყო იმისდა მიუხედავად თუ ვის მისცემდა ხმას“,- აცხადებს პაველ კოვალი.

კითხვაზე, როგორ ხედავს სააკაშვილის როლს ყველაფერ იმაში, რაც დღეს საქართველოში ხდება, პაველ კოვალი პასუხობს, რომ სააკაშვილს გათავისუფლება ეკუთვნის. მან არ დაიმსახურა ციხეში ჯდომა, თუმცა ქართული ოპოზიციური პოლიტიკა ახალი თაობის ხელში მოექცა.

„როგორც ყველა ქარიზმატულ ლიდერს, მას მიაჩნდა, რომ მას ხალხი, ბრბო გაჰყვებოდა… რომ ციხესთან დადგებოდნენ და რევოლუცია მოხდებოდა. შეიძლება საქართველოში ბევრი რამ შეიცვალოს, მაგრამ ვერ ვხედავ სააკაშვილის როლს იმაში, რომ ის რევოლუციას სათავეში ჩაუდგეს. თუმცა, პოლიტიკაში დროს ძალიან დიდი მნიშვნელობა აქვს. ხანდახან გამაოგნებელი რამეები ხდება. მათ ვისაც სჯერა, რომ სააკაშვილი ვეღარ ითამაშებს როლს, ალბათ უნდა დაიტოვონ სხვადასხვა სცენარის განვითარების შესაძლებლობები“,- აცხადებს პაველ კოვალი.

პაველ კოვალი საქართველოში უნგრეთის პრემიერ-მინისტრ ვიქტორ ორბანის ვიზიტსაც აფასებს და ამბობს, რომ დღეს არჩევნებს არ უყურებენ მხოლოდ მიღებული ხმების რაოდენობით, არამედ საარჩევნო კამპანიის, მიღებული ხმების და შემდეგ ხმების დათვლის თვალსაზრისით და ორბანი ჩაერია, რომ თავიდან აეცილებინა საქართველოში შემდგომი პროტესტი.

„ორბანი საქართველოს ხელისუფლებას კლასიკურ „დათვურ სამსახურს“ უწევს, რადგან, თუ ეს ხელისუფლება ზოგადად სერიოზულად უდგება ევროკავშირთან ურთიერთობას, კონტაქტი უნდა აწარმოოს რეალურად ევროკავშირის ქვეყნებთან, რომლებიც გადაწყვეტილების მიმღებნი არიან და არა მხოლოდ ერთ ორბანთან“,- აცხადებს კოვალი.

პაველ კოვალის თქმით, არ იქნება მართებული, იმას თუ ვიტყვით, რომ საქართველოში და მოლდოვაში ასეთი შედეგები მხოლოდ რუსეთის ფაქტორით არის განპირობებული.

„საქართველოში და მოლდოვაში ჩატარებული არჩევნების შედეგები პუტინისთვის ხელსაყრელია. რა თქმა უნდა არ იქნება მართებული, იმას თუ ვიტყვით, რომ საქართველოში და მოლდოვაში ასეთი შედეგები მხოლოდ რუსეთის ფაქტორით მივიღეთ. ასეთ დიაგნოზებს თუ დავსვამთ, ვერაფერს ვერ შევცვლით. ზემოაღნიშნულს სხვა ფაქტორებიც განაპირობებს. მოლდოვაში ქალბატონმა პრეზიდენტმა, რომელსაც ვგულშემატკივრობთ, მაია სანდუმ (მას პირადად ვიცნობ და დიდად ვგულშემატკივრობ) რისკის შემცველი ოპერაცია ჩაატარა, არჩევნების ევროპულ რეფერენდუმთან თანხვედრის თვალსაზრისით. ამან გაამართლა, თუმცა ძლივს (ბეწვზე)“, – აცხადებს პაველ კოვალი.

საქართველოს პრემიერ-მინისტრი ირაკლი კობახიძე ევროპის პოლიტიკური გაერთიანების მეხუთე შეხვედრის გახსნით სესიას დაესწრო, რომელიც ბუდაპეშტში იმართება.

სამიტი მასპინძელი ქვეყნის, ევროკავშირის საბჭოს თავმჯდომარე უნგრეთის პრემიერ-მინისტრმა ვიქტორ ორბანმა გახსნა.

საქართველოს პრემიერ-მინისტრი, ევროპის პოლიტიკური გაერთიანების მეხუთე სამიტის ფარგლებში მონაწილეობას მიიღებს თემატურ დისკუსიაში, რომლის მთავარი თემაა ეკონომიკური უსაფრთხოება და დაკავშირებადობა.
ასევე დაგეგმილია ირაკლი კობახიძის სიტყვით გამოსვლა სამიტის დასკვნით პლენარულ სესიაზე

დეზინფორმაცია ვრცელდებოდა, მათ შორის, არასამთავრობო ორგანიზაციების პირით, რომლებიც დამკვირვებლების სახით იყვნენ წარმოდგენილი. ამ დღეებში სხვადასხვა უცხოელ პარტნიორთან ურთიერთობაში გვიწევს ახსნა, რომ ტექნიკურად რაღაც არის შეუძლებელი, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, რიგ ინფორმაციებზე პასუხისმგებლობა სწორედ ამა თუ იმ „ენჯეოს“ დამფინასებელს ეკისრება.

„პასუხისმგებლობა ეკისრებათ არა ამ „ენჯეოებს“, არა „ისფედს“,  „გამჭვირალობას“, „საიას“, არამედ პასუხისმგებლები არიან მათი დონორები, რომლებიც ამ დეზინფორმაციულ ნარატივებს საქართველოს წინააღმდეგ აფინანსებენ. გასულ დღეებში „საერთაშორისო გამჭვირვალობამ“ გაავრცელა დეზინფორმაცია, თითქოს საქართველოს პარლამენტი პრეზიდენტის მოწვევის გარეშე ვერ შეიკრიბება. ან „საერთაშორისო გამჭვირვალობამ“ თავად უარყოს ეს დეზინფორმაცია, ან მისი დონორი შვედეთის საელჩო გამოვიდეს და უარყოს. ზუსტად ასეთი დეზინფორმაციები ჯდება საზღვარგარეთ მათსავე სამინისტროებში და აქეთ გვეკითხებიან შემდეგ, რა არის სიმართლე და რა არის ტყუილი. ახლა შეუძლია შვედეთის საელჩოს, მოიქცეს პასუხისმგებლიანი დონორის სახით და არა ისე უპასუხისმგებლოდ, როგორც აქამდე იქცეოდა, მოუწოდოს „საერთაშორისო გამჭვირვალობას“, რომ ან თავად „საერთაშორისო გამჭვირვალობამ“ უარყოს ეს დეზინფორმაცია, თითქოს პარლამენტი პრეზიდენტის მოწვევის გარეშე ვერ შეიკრიბება, ან თავად გამოვიდეს შვედეთის საელჩოს წარმომადგენელი, ვინაიდან მათმა ფულმა და დაფინანსებამ გახადა შესაძლებელი, რომ ეს ტყუილი ვრცელდება საქართველოში თუ მის საზღვრებს გარეთ“, – განაცხადა პაპუაშვილმა.

ამერიკულმა კომპანია Pro V&V-მ პარლამენტის არჩევნებზე ჩატარებული შესაბამისობის აუდიტის მესამე, ბოლო ეტაპის საბოლოო დასკვნა გამოაქვეყნა. დასკვნაში აღნიშნულია, რომ 2024 წლის საპარლამენტო არჩევნებზე ჩატარებული დაკვირვება წარმატებით დასრულდა და Pro V&V-ს პრობლემები არ გამოუვლენია, – ამის შესახებ ცენტრალურ საარჩევნო კომისიაში გამართულ ბრიფინგზე ცესკო-ს პრესსპიკერმა, ნათია იოსელიანმა განაცხადა.

იოსელიანის თქმით, კომპანია Pro V&V-მ პარლამენტის არჩევნების შესაბამისობის აუდიტი სამ ეტაპად განახორციელა და აუდიტის სამივე ეტაპის შესახებ დასკვნა  ცესკო-ს ვებგვერდზეა განთავსებული.

დასკვნაში ნათქვამია – „ცენტრალურმა საარჩევნო კომისიამ წარმატებით განახორციელა პროცედურები, რომლებიც ადრე ჩატარებული რვა პილოტის ფარგლებში გამოიყენებოდა და მოახდინა მათი ქვეყნის მასშტაბით გამოყენება, პირველ ელექტრონულ არჩევნებში. Pro V&V-მ დაადგინა, რომ არჩევნების ჩატარების პროცესები და პროცედურები იყო შესაფერისი და პერსონალი კარგად იყო მომზადებული. ქვეყნის მასშტაბით ხმის მიცემის ახალი ელექტრონული სისტემის პირველად დანერგვისთვის, პერსონალი კარგად იყო მომზადებული და სწორად წარმართა პროცესები, რომლებსაც Pro V&V დააკვირდა. ამომრჩევლებს მიეცათ შესაძლებლობა წარმატებით დაეფიქსირებინათ თავიანთი არჩევანი.

დოკუმენტში აღნიშნულია, რომ აუდიტის მიმდინარეობისას შემოწმდა ამომრჩეველთა ვერიფიკაციის აპარატები (VIU Desktop 818-100), ხმების დათვლის სპეციალური ელექტრონული მოწყობილობები (PCOS SAES- 1800Plus) და ტაბლეტ-კომპიუტერები (Lenovo Tab K11). Pro V&V დააკვირდა არჩევნების ჩატარების პროცესს, კერძოდ უბნების კომისიის წევრებს, უბნის ტექნიკურ პერსონალს (რომლებიც პასუხისმგებელნი იყვნენ აპარატების ტექნიკურ მხარდაჭერაზე), ასევე თავად ამომრჩევლებს. ცენტრალური საარჩევნო კომისიის პერსონალთან დაკავშირებით, აუდიტი ფოკუსირებული იყო არჩევნების დღისთვის მათი მზადყოფნის შეფასებაზე, ხოლო ამომრჩევლების შემთხვევაში ყურადღება გამახვილდა ხმის მიცემის აპარატებით სარგებლობაზე. ამასთან, შეფასდა შედეგების გადაცემა, სიზუსტისა და ეფექტურობის დასადგენად.

კომპანია Pro V&V-მ  პარლამენტის არჩევნების შესაბამისობის აუდიტი სამ ეტაპად განახორციელა. Pro V&V-მ პროექტის პირველი ეტაპის (პროგრამული განახლებები) ფარგლებში ჩაატარა საწყისი კოდის შემოწმება (ფუნქციური რეგრესიული ტესტირება), მეორე ეტაპზე კი (არჩევნების კონფიგურაცია) Pro V&V-მ ჩაატარა კონფიგურაციის აუდიტი და შეამოწმა ყველა საჭირო ფაილი პროცესის სერტიფიცირების მიზნით.

საწყისი კოდის რევიზიისა და კონფიგურაციის აუდიტის შედეგად დადგინდა, რომ:

ცესკო-ს სერვერებზე არსებული ამომრჩეველთა სიები შესაბამისობაშია აპარატში ჩატვირთულ სიებთან; ამომრჩეველთა სიაში ამომრჩევლის დუბლირება არის შეუძლებელი და ერთი ამომრჩეველი მხოლოდ ერთხელაა სიაში შეყვანილი; ვერიფიკაციის აპარატიდან ამობეჭდილი ამომრჩეველთა სია არის ზუსტად ის სია, რომელიც ჩაწერილია ვერიფიკაციის აპარატში; ერთი ამომრჩევლის ხმა არის ერთი ხმა და ტექნოლოგიურად შეუძლებელია მისი არჩევანის მოდიფიცირება ან შეცვლა; აპარატიდან ამობეჭდილი წინასწარი შედეგების ამონაწერი (ქვითარი) შეიცავს მხოლოდ იმ მონაცემებს, რომლის გენერირებასაც ახდენს ტექნოლოგია.

ჩატარებული აუდიტის სამივე ეტაპის შესახებ მომზადებული დასკვნა საჯაროა და განთავსებულია ცესკო-ს ვებგვერდზე. ყველა დაინტერსებულ პირს საშუალება აქვს, გაეცნოს მას და მიიღოს პასუხი ყველა კითხვაზე, რომელიც პროცესთან მიმართებაში დაისვა“, – აღნიშნა ნათია იოსელიანმა.

ამერიკულმა აუდიტორულმა კომპანიამ Pro V&V საქართველოს საპარლამენტო არჩევნებთან დაკავშირებით ანგარიში მოამზადა. კომპანიამ დამოუკიდებელი აუდიტორული მომსახურება საქართველოს ცენტრალური საარჩევნო კომისიისთვის (ცესკო) ჩაატარა. ამერიკული კომპანიის ანგარიშის თანახმად, „პირველმა და მეორე შემოწმებამ დაადასტურა ამომრჩეველთა ერთი და იგივე რაოდენობა, მესამე შემოწმებამ აჩვენა „ნული“, რაც ნიშნავს, რომ დუბლირების შემთხვევები არ გამოვლენილა“.

უცხოელი მფარველები დღემდე ცდილობენ, გაათეთრონ ყვავივით შავი „ნაცმოძრაობის“ პოლიტიკოსები, ამ ხალხს გრამი ძალაუფლება რომ მისცე, ყველას სათითაოდ მიგვაყენებენ კედელთან, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

პაპუაშვილის თქმით, 2007 წლის 7 ნოემბერი ახსენებს ხალხს, სინამდვილეში, ვისთან აქვთ საქმე.

„თავის დროზე, როდესაც 2012 წელს ქართველმა ხალხმა განაჩენი გამოუტანა „ნაციონალურ მოძრაობას“ და მთლიანად ამ იდეოლოგიას, რასაც „ნაცობა“ ჰქვია, მაშინ და დღემდე ხელს აფარებენ უცხოელი მფარველები, რომ მათ მართლმსაჯულების ხელი არ შეეხოთ. ჩვენ ვნახეთ, რომ რამდენიმე ათეული მაღალჩინოსანი, პრეზიდენტი, პრემიერ-მინისტრი, მინისტრები გასამართლებული იქნენ, თუმცა ხედავთ, დღემდე როგორ ცდილობენ, გაათეთრონ ყვავივით შავი „ნაცმოძრაობის“ პოლიტიკოსები, რათა რაღაცნაირად ლეგიტიმაცია მისცენ, მაგრამ ზუსტად ასეთი დღეები გვახსენებს, სინამდვილეში, ვისთან გვაქვს საქმე.

ეს ისეთივე იდეოლოგიაა, ვინაიდან არ არის დაკავშირებული დროსთან და პარტიასთან, ეს არის იდეოლოგია, „ნაცობა“, როგორც იდეოლოგია და ვინც ამ იდეოლოგიის ქვეშაა, ყველა არის ისეთი ჯგუფი, რომელიც ყველანაირ ძალადობაზეა წამსვლელი. ამ ხალხს ერთი გრამი ძალაუფლება რომ მისცე, ყველას სათითაოდ მიგვაყენებენ კედელთან. ვინც მათ არ ეთანხმება, ყველას მიაყენებენ კედელთან, როგორც 7 ნოემბერს მოუწყვეს ეგზეკუცია ქართველ ხალხს. ეს ხალხი ახლა გაფანტულია, ზოგი პოლიტიკაშია, ზოგი არასამთავრობო სექტორში, მაგრამ სოცქსელებში ვხედავთ ხოლმე მათი ბოღმის ამოხეთქვას, ერთი სული აქვთ, ხელში ჰქონდეთ ცოტა ძალაუფლება და მთლიან საქართველოს გადაუვლიან“, – განაცხადა შალვა პაპუაშვილმა.

ოპოზიცია გამოუშვებს რაღაც ზეპირ ბრალდებებს, ქვეყანას მიაყენებენ რეპუტაციულ ზიანს და შემდეგ ფეხს ფეხზე გადაიდებენ. კეთილი ინებონ და მტკიცებულებები წარადგინონ შესაბამის ორგანოებში, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, ოპოზიციას მტკიცებულებები თუ არ აქვს, „მაშინ საზოგადოება შეაფასებს მათ, როგორც ჭორიკანა პოლიტიკოსებს“.

„ოპოზიცია შეჩვეულია, რომ გამოუშვებს რაღაც ზეპირ ბრალდებებს, ცდილობენ, ძირი გამოუთხარონ არჩევნებს, ქვეყანას მიაყენებენ რეპუტაციულ ზიანს და შემდეგ ფეხს ფეხზე გადაიდებენ, ხარობენ, ხალისობენ იმით, როგორ ვისმენთ სხვადასხვა განცხადებას ერთი თუ მეორე ქვეყნიდან. კეთილი ინებონ და რაიმე საფუძველი თუ აქვთ ბრალდების, რომელსაც უყენებენ საკუთარ ქვეყანას, მტკიცებულებები წარადგინონ შესაბამის ორგანოებში. ხომ უნდოდათ გამოძიება? აი, ბატონო, მიიღეს გამოძიება და წარადგინონ რაიმე მტკიცებულება. თუ არ აქვთ, მაშინ საზოგადოება კიდევ ერთხელ შეაფასებს მათ, როგორც ჭორიკანა პოლიტიკოსებს. მათი უფლებაა, აირჩიონ, რა ფორმით იქნებიან გამოკითხული, მაგრამ გამოკითხვის დროს ან წარადგინონ მტკიცებულებები, ან თქვან, რომ ჩვეულებრივი ჭორიკნები არიან“, – განაცხადა შალვა პაპუაშვილმა.