საქართველოს პარლამენტის თავმჯდომარე შალვა პაპუაშვილი დონალდ ტრამპს აშშ-ის პრეზიდენტად არჩევას სოციალურ ქსელში X ულოცავს.

როგორც პარლამენტის თავმჯდომარე აღნიშნავს ამ არჩევანმა უნდა დააბრუნოს საღი აზრი მსოფლიო პოლიტიკაში და წერტილი დაუსვას აღქმების ბატონობას რეალობაზე.

„ვულოცავ დონალდ ტრამპს პრეზიდენტად არჩევას. ამ არჩევანმა უნდა დააბრუნოს საღი აზრი მსოფლიო პოლიტიკაში და წერტილი დაუსვას აღქმების ბატონობას რეალობაზე, რაც ბოლო წლებში საქართველოს მიმართ დასავლეთის პოლიტიკის მახასიათებელი გახდა. მჯერა, რომ ამერიკულ-ქართული ურთიერთობების გადატვირთვა უნდა მოხდეს ურთიერთპატივისცემის, საერთო ინტერესებისა და, რაც მთავარია, ნამდვილი საკაცობრიო ღირებულებების საფუძველზე“, – წერს პაპუაშვილი.

https://x.com/shpapuashvili/status/1854116939192238346

ელისაშვილს „ცოტა „გაექცა“, ეს შეთანხმებული გადაწყვეტილება, რომელიც პირველად მოსამართლეს უნდა გაეჟღერებინა, ალეკო ელისაშვილმა გააცნო საზოგადოებას. ყველაფერი ცხადი და ნათელია, ვინ როგორ მოქმედებს და როგორ ხდება გადაწყვეტილებების მიღება თუნდაც ამ კონკრეტულ საქმეში, ამ კონკრეტული მოსამართლის შემთხვევაში, – ამის შესახებ დედაქალაქის მერმა, კახა კალაძემ ჟურნალისტებთან ალეკო ელისაშვილის მიერ მოსამართლე ვლადიმერ ხუჭუას გადაწყვეტილების წინასწარ გაჟღერების თაობაზე დასმული კითხვის საპასუხოდ განაცხადა.

თბილისის მერის თქმით, დღეს ოპოზიცია სასოწარკვეთილ მდგომარეობაში იმყოფება და პოლიტიკური შოუების მოწყობით არის დაკავებული.

„ეს არის პოლიტიკური შოუს ნაწილი, რასაც ვხედავთ. ამ ადამიანებს როგორმე უნდათ, რომ სახე შეინარჩუნონ თავიანთ ამომრჩევლებთან. ჯერ ხომ მთელი საარჩევნო კამპანიის განმავლობაში ატყუებდნენ, ცრუ კამპანია ჰქონდათ – ვიგებთ, ვიგებთო, აზეიმეს ამ ხალხს გამარჯვება და რეალურად ჩვენ როდიდან მოყოლებული ვამბობდით, რომ „ქართული ოცნება“ გაიმარჯვებდა დამაჯერებლად და ამის თქმის საფუძველს ქმნიდა ხალხის განწყობა. მე ასეთი განწყობა არ მახსოვს 2012 წლიდან მოყოლებული, როგორიც იყო ამ არჩევნებზე. შესაბამისად, ის განცხადებები და ქმედებები, რასაც ვხედავთ, გამოწვეულია იმით, რომ არიან სასოწარკვეთილები და იმ რეალურ მდგომარეობაში, რასაც იმსახურებენ და რაც მათი ბუნებრივი მოცემულობაა“, – განაცხადა კახა კალაძემ.

თბილისის მერის, კახა კალაძის განცხადებით, მოსამართლე როდესაც ისეთ მნიშვნელოვან გადაწყვეტილებას იღებს, როგორიც საზოგადოებამ რამდენიმე დღის წინ თეთრიწყაროს რაიონულ სასამართლოში იხილა, ის მყარ მტკიცებულებებზე უნდა იყოს დაფუძნებული, რათა ყველა ინსტანციას გაუძლოს.

ამის შესახებ კახა კალაძემ ჟურნალისტებს თეთრიწყაროს რაიონული სასამართლოს თავმჯდომარის, ვლადიმერ ხუჭუას მიერ მიღებული იმ გადაწყვეტილების შეფასებისას განუცხადა, რომელსაც სააპელაციო სასამართლო განიხილავს.

„ასეთ მნიშვნელოვან გადაწყვეტილებას როდესაც იღებ, ყველაფერი დაფუძნებული უნდა იყოს ფაქტებსა და მტკიცებულებებზე. შემდეგ, ყველამ ვიხილეთ ცენტრალური საარჩევნო კომისიის განცხადება და როდესაც დეტალებში შევედით, არანაირი ფაქტი, არანაირი მტკიცებულება არ არსებობს. პოლიტიკური გადაწყვეტილება იყო, დავალებით გაკეთებული. თუკი ადამიანებმა ნახეს ამ კონკრეტული მოსამართლის ოჯახის წევრების ვიდეოები, ყველაფერი ცხადი და ნათელია, აღნიშნულ საკითხთან დაკავშირებით. ასეთ მნიშვნელოვან გადაწყვეტილებას როდესაც იღებ, ისეთი მყარი მტკიცებულებები უნდა გქონდეს, რომ ყველაფერმა ყველა ინსტანციას გაუძლოს, როგორც ვიცით, გასაჩივრებულია და დაველოდოთ, როგორი იქნება შემდეგი ინსტანციების გადაწყვეტილება“, – განაცხადა კახა კალაძემ.

რაც შეეხება მის მოლოდინებს საია-ს, ISFED-ის და სხვა ორგანიზაციების სარჩელებზე, თბილისის მერმა გამოთქვა მზადყოფნა, რომ ყველაფერი განიხილონ, რათა არსებულ კითხვებს პასუხი გაეცეს.

„თუ დააკვირდებით საჩივრების რაოდენობასაც და სტატისტიკასაც, 2020 წელს უფრო მეტი საჩივარი იყო, ვიდრე 2024 წელს, თუმცა ამას არსებითი მნიშვნელობა არ აქვს, იმიტომ, რომ შინაარსობრივად არაფრისმთქმელია. მაგალითად, ერთ-ერთ საჩივარში წერია, რომ ერთმა დამკვირვებელმა მეორე გადაკოცნა და ამაზე დაიწერა საჩივარი. ამ ტიპის საჩივარი ბევრია. რა თქმა უნდა, ყველაფრის განხილვა მოხდება. ჩვენ ასევე მზადყოფნა გამოვთქვით იმასთან დაკავშირებით, რომ როგორც 2020 წელს, ახლაც, თუ ვინმეს რაიმე სურვილი აქვს გადათვლის, თუ რაიმე კითხვები არსებობს, მზად ვართ თანამშრომლობისთვის, რათა ყველა კითხვას გაეცეს პასუხი“, – განაცხადა კახა კალაძემ.

რადიკალური ოპოზიცია, სალომე ზურაბიშვილის ხელმძღვანელობით, ცდილობს, ქვეყანაში ჩატარებულ თავისუფალ არჩევნებს ჩრდილი მიაყენოს, – ამის შესახებ დედაქალაქის მერმა, კახა კალაძემ მედიასთან განაცხადა.

კახა კალაძე კიდევ ერთხელ გამოეხმაურა ოპოზიციის ბრალდებებს, რომ  საპარლამენტო არჩევნები გაყალბდა. მისი თქმით, ოპოზიციის წარმომადგენლები ავრცელებენ სიცრუეს და ცდილობენ, თავისუფალ გარემოში ჩატარებულ არჩევნებს ჩრდილი მიაყენონ.

„არჩევნებთან დაკავშირებით ვისმენთ სიცრუეს, არასწორ განცხადებებს. რეალურად გაყალბების ფაქტები და მტკიცებულებები არ არსებობს. მათ აქვთ მცდელობა, რომ ქვეყანაში ჩატარებულ თავისუფალ არჩევნებს რაიმე ჩრდილი მიაყენონ. ამაში ჩართულია რადიკალური ოპოზიცია, სალომე ზურაბიშვილის ხელმძღვანელობით. ვისმენთ სიბინძურეს და სიცრუეს, თუმცა, ერთი ადამიანი არ გამოჩნდა, რომ კონკრეტული ფაქტი წარედგინა პროკურატურისთვის ან საზოგადოებისთვის. ასეთი რამ ბუნებაში არ არსებობს. ბოლო დღეებში რადიკალების „პოლიტიკურ კინტაურს“ ვისმენთ. კონკრეტული როლები აქვთ გადანაწილებული. მათ აქვთ ერთადერთი მცდელობა, როგორმე სახე შეინარჩუნონ საკუთარი ამომრჩევლის წინაშე. ამ ადამიანებს მთელი საარჩევნო კამპანიის დროს ატყუებდნენ, არჩევნებს ჩვენ ვიგებთო. საზოგადოებამ მათ მიანიჭა შესაბამისი ადგილი, რასაც იმსახურებენ. დღეს კი, მცდელობა აქვთ, ისევ თავიანთ ამომრჩეველს მოატყუონ. არჩევნები ჩატარდა მშვიდ გარემოში, იყო მრავალპარტიული, ყველას ჰქონდა შესაძლებლობა, რომ საარჩევნო კამპანია ეწარმოებინა, მოსახლეობას კი შეეძლო, საკუთარი არჩევანი თავისუფლად გაეკეთებინა“, – აღნიშნა კახა კალაძემ.

რაც შეეხება მმართველი პარტიის ლიდერების განცხადებებს მტკიცებულებებთან დაკავშირებით, თბილისის მერის თქმით, ნამდვილად არსებობს ზეწოლისა და ბულინგის ფაქტები, რომლებსაც საგამოძიებო უწყება შეისწავლის.

„არსებობს ზეწოლისა და ბულინგის კონკრეტული ფაქტები, როგორც ამომრჩეველზე, ასევე დამკვირვებლებზე. როდესაც უკვე საარჩევნო უბნები იხურებოდა, ხმების დათვლა მიმდინარეობდა, იყო კონკრეტული მუქარები, შეურაცხყოფები. რა თქმა უნდა, ამ ყველაფერს პასუხის გაცემა სჭირდება“, – განაცხადა კახა კალაძემ.

თბილისის მერი კახა კალაძე დონალდ ტრამპს ამერიკის შეერთებული შტატების საპრეზიდენტო არჩევნებში გამარჯვებას ულოცავს. მისი თქმით, ის ურთიერთობები, რაც აშშ-საქართველოს შორის არსებობს, გადატვირთვას საჭიროებს, თუმცა ქართველმა ხალხმა თავისი გასაკეთებელი თავად უნდა გააკეთოს.

„ვულოცავ დონალდ ტრამპს საპრეზიდენტო არჩევნებში გამარჯვებას. ეს ამერიკელი ხალხის არჩევანია და ჩვენ მას პატივს ვცემთ, ისევე, როგორც საქართველოში, ჩვენი ქვეყნის მოსახლეობამ გააკეთა არჩევანი და მხარი დაუჭირა მშვიდობას, განვითარებას, კეთილდღეობას, ღირსეულ, ევროპულ მომავალს. აშშ-სთან ურთიერთობები ჩვენთვის მნიშვნელოვანია. არაერთხელ გვითქვამს, რომ ის განცხადებები, რაც ბოლოს კეთდებოდა, არავისთვის იყო მისაღები. არსებული ურთიერთობები საჭიროებს გადატვირთვას, თუმცა ყველაზე მთავარი და მნიშვნელოვანი მაინც ისაა, რომ ჩვენს გასაკეთებელს ვერც ამერიკა გააკეთებს, ვერც ევროპა, ქართველმა ხალხმა უნდა ვიზრუნოთ ჩვენს ქვეყანაზე, მის ეროვნულ ინტერესებზე“, – განაცხადა კახა კალაძემ.

მისივე განმარტებით, საქართველოს ხელისუფლებამ პირველ რიგში ქართველი ხალხის ინტერესები უნდა გაატაროს და ქვეყნის სუვერენიტეტი დაიცვას.

„რა თქმა უნდა, ყველას თავისი ინტერესი აქვს, ამერიკას თავისი, ჩვენს მეზობელ ქვეყნებს თავისი. ევროპასაც აქვს თავისი ინტერესი საქართველოსთან მიმართებით. საქართველოს ხელისუფლებამ უნდა გაატაროს ქართველი ხალხის ინტერესი და ჩვენი გასაკეთებელი ჩვენ, ქართველმა ხალხმა უნდა გავაკეთოთ. არც ამერიკელი ჩამოვა აქ და გააკეთებს ჩვენს გასაკეთებელს, არც ევროპელი. ქართველმა ხალხმა უნდა ვიზრუნოთ მშვიდობის შენარჩუნებაზეც, ქვეყნის განვითარებაზეც და არავის დავუთმოთ ქვეყნის სუვერენიტეტი და ინტერესი“, – აღნიშნა დედაქალაქის მერმა.

ერთი გასვენება ხალხი ვერ შეუკრებიათ. დადიან აღმა-დაღმა, რას მიედებიან თვითონაც არ იციან – დაიმახსოვრეთ ჩემი სიტყვები – ხვალ ან ზეგ ყველა პარლამენტში შემოლაგდება,- ასე გამოეხმაურა დედაქალაქის მერი, „ქართული ოცნების“ გენერალური მდივანი, კახა კალაძე ოპოზიციონერი ლიდერების და მოქალაქეების მიერ ორგანიზებულ აქციებს.

როგორც კალაძემ განმარტა, ამ აქციებს ფასი არ აქვს.

„მთელი სოცმედია მიაქვს

ხუმრობებს ამ აქციებთან დაკავშირებით, ერთი გასვენება ხალხი ვერ შეუკრებიათ. დადიან აღმა-დაღმა, რას მიედ-მოედებიან თვითონაც არ იციან. მცდელობაა, საკუთარ ამომრჩეველს ანახონ, რომ თითქოს იბრძვიან. დაიმახსოვრეთ ჩემი სიტყვები – ხვალ, ზეგ ყველა პარლამენტში შემოლაგდება!” – აღნიშნა კალაძემ.

არჩევნებში არა თუ ტრამპის გამარჯვების შემთხვევაში, კამალა ჰარისის გამარჯვების შემთხვევაშიც კი, ომის დასრულების პირობებში ურთიერთობების გადატვირთვის პოლიტიკის პოზიტიური მოლოდინი გვქონდა – ამ შემთხვევაში მითუმეტეს! – ამის შესახებ ჟურნალისტებს „ქართული ოცნების“ ერთ-ერთმა ლიდერმა მამუკა მდინარაძემ განუცხადა.

კითხვაზე, რა უნდა გააკეთოს აშშ-მა გადატვირთვის ნაწილში, მდინარაძემ განაცხადა, რომ ჰელსინკის კომისიამ არ უნდა დაუწყოს ჩხუბი პრეზიდენტის ადმინისტრაციას, თუ რატომ ცნეს ლეგიტიმურად საქართველოს არჩევნები.

როგორც მდინარაძემ აღნიშნა, ტრამპის კამპანია მთლიანად აგებული იყო მშვიდობის, კეთილდღეობის, ეკონომიკური წინსვლის, ტრადიციული ოჯახური ღირებულებების ნარატივზე.

„ქართველი ფსევდოლიბერალების აზრით ამერიკელი ხალხი ჩელიაბინსკში გაიღვიძებს! მათ რომ ჰკითხო, ამერიკელები დღეს ჩელისბინკში გაიღვიძებენ, რადგან არჩევნებში ტრამპი იმარჯვებს. ახლა წარმოიდგინეთ კამალა ჰარისმა რომ დაიწყოს, რომ ჩელიაბინსკში ვიღვიძებთ – დაახლოებით ამ დონის კამპანია აქვთ საქართველოში.

ტრამპის კამპანია მთლიანად აგებული იყო მშვიდობის, კეთილდღეობის, ეკონომიკური წინსვლის, ტრადიციული ოჯახური ღირებულებების ნარატივზე. ტრამპი ღიად აცხადებდა, რომ კაცი კაცია და ქალი ქალია. აქ რომ ქილიკობდნენ: ეგ რა სალაპარაკოაო, აშშ-ს პრეზიდენტი ამ საკითხებზე ღიად საუბრობდა, თურმე ეს ქართული ნარატივი კი არ ყოფილა, არამედ მსოფლიოში არიან ლიდერები, მათ შორის აშშ-ში აწ უკვე არჩეული პრეზიდენტი, რომელიც ამ თემაზე ღიად ლაპარაკობდა და საქილიკო არაფერი ყოფილა.

თურმე ტრადიციებსა და ფასეულობებზე მხოლოდ 4 მილიონიან ქვეყანაში კი არ საუბრობენ, არამედ ამ ნარატივის გამო – რომ ქალი ქალია და კაცი კაცია, აშშ-ს მოსახლეობა მხარს უფრო მეტად იმ ლიდერს უჭერს, ვინც ამ კამპანიას მიყვება.

ამიტომაც არ უხარია ჩვენს ოპოზიციას არჩევნებში ტრამპის გამარჯვება“, – განაცხადა მამუკა მდინარაძემ.

„ქართული ოცნების“ აღმასრულებელი მდივნის, მამუკა მდინარაძის განცხადებით, თეთრიწყაროს მოსამართლე ვლადიმერ ხუჭუას გადაწყვეტილება, 30 საარჩევნო უბნის შედეგების ბათილად ცნობასთან დაკავშირებით, არა სამართლებრივი, არამედ პოლიტიკური გემოვნებითაა ნაკარნახევი.

როგორც მან ჟურნალისტებს პარტიის ოფისში გამართულ ბრიფინგზე განუცხადა, ვლადიმერ ხუჭუა აბსოლუტურად გასულია სამოსამართლეო ეთიკის ჩარჩოებიდან.

„ასეთი ცნობილი ფრაზა არსებობს „თამაში გაყიდა“. ელისაშვილმა „თამაში გაყიდა“, რადგან მოსამართლის გადაწყვეტილებამდე ერთი საათით ადრე გამოაცხადა მისი გადაწყვეტილების შესახებ. ჩემი საქმე ნამდვილად არაა, მაგრამ მე რომ მოსამართლე ვიყო, ნამდვილად შემრცხვებოდა იმის შემდეგ საუბარი, რაც პოლიტიკოსი, აქციაზე, ტრიბუნიდან, ერთი საათით ადრე, გადაწყვეტილებას ჩემ მაგივრად გამოაცხადებდა. მოსამართლე ხუჭუას ასეთი საუბარი ნიშნავს იმას, რომ მისი გადაწყვეტილება არა სამართლებრივი, არამედ პოლიტიკური გემოვნებით არის ნაკარნახევი.

მას არავინ უკრძალავს პოლიტიკური გემოვნების ქონას, პირიქით, ამ ქვეყანაში როგორც არასდროს ისეა დაცული აზრის, გამოხატვის თავისუფლება, მაგრამ სამოსამართლეო სტანდარტი მას ამის საშუალებას არ აძლევს, რომ ის წავიდეს, პოლიტიკური განცხადებები აკეთოს, აზრი გამოთქვას, ანგარიში აბაროს „ნაცმოძრაობის“ მედიასა თუ რომელიმე მედიას. ამიტომ ის აბსოლუტურად გასულია სამოსამართლეო ეთიკის ჩარჩოებიდან, მე როგორც იურისტი ვამბობ ამას და არა მხოლოდ როგორც პოლიტიკოსი. მისი ქცევა არ ჯდება არც მოსამართლის და არც იმ ეთიკურ ნორმებში, რა ეთიკური ნორმებიც მოსამართლეებს აქვთ დაწესებული და რა ეთიკაც მათ საკუთარი თვისთვის თავად აქვთ დაწესებული. ეს არის დაუწერელი და დაწერილი ნორმების ერთობლიობა, რომელსაც მოსამართლეები, როგორც წესი, არ ცდებიან ხოლმე. ჩვენ ვიცით სასამართლოშიც კი მოსამართლეები, რომლებიც აშკარად უჭერენ მხარს „ნაცმოძრაობის“ და მისი კლასტერის წარმომადგენლებს, მაგრამ ისინიც კი ცდილობენ, რომ რაღაც სტანდარტებს არ გასცდნენ. ამ შემთხვევაში აბსოლუტურად განსხვავებულ შემთხვევასთან გვქონდა საქმე, როცა ეს ადამიანი „ნაცმოძრაობის“ ტელევიზიის ეთერში დაჯდა და პოლიტიკური განცხადებები აკეთა. ამ გადაწყვეტილების მოტივაცია უკვე ყველასთვის ნათელია, ის არის არა სამართლებრივი, არამედ პოლიტიკური“, – განაცხადა მდინარაძემ.

ცნობისთვის, თეთრიწყაროს რაიონული სასამართლოს გადაწყვეტილებით, წალკისა და თეთრიწყაროს მუნიციპალიტეტებში, 30 უბნის საარჩევნო შედეგები გაუქმდა. შესაბამისი გადაწყვეტილება მოსამართლე ვლადიმერ ხუჭუამ მიიღო.