უკრაინის უსაფრთხოების სამსახურმა დააკავა უკრაინის შეიარაღებული ძალების მთავარი ფსიქიატრი ოლეგ დრუზი კორუფციის ბრალდებით.

უწყების პრესსამსახურის მიერ გავრცელებულ განცხადებაში ნათქვამია, რომ დაკავებული ექიმი არის “ცენტრალური სამხედრო სამედიცინო კომისიის თავმჯდომარის მოადგილე და წყვეტს სამხედრო პერსონალის ვარგისიანობის საკითხს სამხედრო სამსახურისთვის”.

“საქმის მასალების მიხედვით, დაკავებულმა, უკრაინაში რუსეთის შემოჭრის შემდეგ, 1 მილიონ დოლარზე მეტი ღირებულების დაუსაბუთებელი ქონება შეიძინა. ამასთან, მან ეს ქონება არ ასახა დეკლარაციაში და ის მეუღლის, შვილებისა და სხვა მესამე პირების სახელზე დაარეგისტრირა”, – ნათქვამია პრესრელიზში.

გამოძიების თანახმად, დაკავებულმა 2022-2024 წლებში შეიძინა, სახლი კიევის ოლქში, ორი ბინა დედაქალაქ კიევში, ერთი ბინა ოდესაში, 4 BMW-ის მარკის ავტომობილი და სხვა ქონება.

გარდა ამისა, მისი ბინის ჩხრეკისას გამომძიებლებმა 152 ათასი დოლარი და 34 ათასი ევრო აღმოაჩინეს.

უკანონო გამდიდრებისა და ცრუ ინფორმაციის გამოცხადებისთვის მას შესაძლოა 10 წლამდე პატიმრობა ემუქრებოდეს.

2023 წლის დეკემბერში უკრაინის უსაფრთხოების სამსახურმა უკრაინის თავდაცვის სამინისტროს ერთ-ერთი მთავარი განყოფილების უფროსი, რომელიც ეჭვმიტანილია 1,5 მილიარდი გრივნას (იმ დროს დაახლოებით 36 მილიონი ევრო) მითვისების მცდელობაში, რომელიც განკუთვნილი იყო უკრაინის ძალებისთვის საარტილერიო ჭურვების შესაძენად.

2023 წლის აგვისტოში უკრაინის პრეზიდენტმა ვოლოდიმირ ზელენსკიმ განაცხადა, რომ აპირებდა კანონპროექტის შემუშავებას, რომელიც ომის დროს კორუფციას ღალატთან გააიგივებდა, რაც 15 წლამდე თავისუფლების აღკვეთას ითვალისწინებს.

აშშ-ის პრეზიდენტის, დონალდ ტრამპის განკარგულების საფუძველზე, 2021 წლის 6 იანვარს კაპიტოლიუმის მოვლენებში მონაწილე ორი პირი ციხიდან გაათავისუფლეს, – ამის შესახებ „ბიბისი“ წერს.

გათავისუფლებული მჯავრდებულები არიან სტიუარტ როდსი და ენრიკე ტარიო. სტიუარდ როდსს – 18, ხოლო ენრიკე ტარიოს 22 წელი ჰქონდა მისჯილი.

შეგახსენებთ, აშშ-ის პრეზიდენტმა, დონალდ ტრამპმა პრეზიდენტობის პირველივე დღეს ასამდე მნიშვნელოვან აღმასრულებელ განკარგულებას მოაწერა ხელი, მათ შორის კაპიტოლიუმის მოვლენებში მონაწილე დაახლოებით 1 600-მდე პირის შეწყალებას.

მოველი, რომ დედამიწაზე ყველა ერი თავის ეროვნულ ინტერესებს წინ წაწევს, – განაცხადა აშშ-ის სახელმწიფო მდივანმა, მარკო რუბიომ სახელმწიფო დეპარტამენტის თანამშრონლების წინაშე სიტყვით გამოსვლისას.

„ჩვენი მისიაა, რომ საგარეო პოლიტიკა ფოკუსირებული იყოს ჩვენი ეროვნული ინტერესების წინ წაწევაზე. ეს იქნება ჩვენი მისია, რომ ჩვენ გვქონდეს საგარეო პოლიტიკა, რომელიც უზრუნველყოფს ჩვენს ეროვნულ ინტერესებს. მე მოველი, რომ დედამიწაზე ყველა ერი თავის ეროვნულ ინტერესებს წინ წაწევს. და როდესაც ჩვენი ინტერესები ერთმანეთის თანხვედრაში იქნება, მე თანამშრომლობას მოველი“, – აღნიშნა სახელმწიფო მდივანმა.

მარკო რუბიომ ასევე ისაუბრა დონალდ ტრამპის მიერ გლობალური მშვიდობის უზრუნველყოფასა და კონფლიქტების თავიდან აცილებაზე.

„მსოფლიოში მშვიდობის უზრუნველყოფა ჩვენი ეროვნული ინტერესია. მშვიდობის გარეშე რთულია იყო ძლიერი და აყვავებული ქვეყანა“, – დასძინა მან.

აშშ-ის პრეზიდენტის, დონალდ ტრამპის გარემოცვაში არიან ადამიანები, რომლებიც მას უკრაინის შესახებ დეზინფორმაციას და პრორუსულ პოზიციას აწვდიან.

უკრაინული მედიის ცნობით, ამის შესახებ უკრაინის პრეზიდენტმა, ვოლოდიმირ ზელენსკიმ დავოსის ეკონომიკურ ფორუმზე განაცხადა.

ზელენსკის თქმით, უკრაინას დონალდ ტრამპთან ნამდვილად კარგი ურთიერთობები აქვს დამყარებული.

„ზედმეტი ხმები, რომლებიც ზოგჯერ ტრამპის გარშემო არიან, დეზინფორმაციულ ან პრორუსულ პოზიციას აწვდიან. ჩვენთვის ძალიან მნიშვნელოვანია, რომ ევროპა იყოს ხმამაღალი, რომ მისი ხმა ისმოდეს, რომ დონალდ ტრამპის გარშემო იყოს მეტი ხმა იმისთვის, რომ მან მკაფიოდ გააცნობიეროს დეტალები და რისკები, რომლებიც შესაძლოა, იყოს მომავალში, თანაც ძალიან მალე. ტრამპმა მითხრა მე და შემდეგ საჯაროდ თქვა, რომ ის ყველაფერს გააკეთებს, რათა ომი ამ წელს დაამთავროს. მე მას ვუთხარი, რომ ჩვენ მისი პარტნიორი ვართ. ომი ჩვენს ტერიტორიაზეა, ჩვენ ვიცით ყველა მტკივნეული ადგილი. ჩვენ გვესმის, რამდენად მტკივნეულია ეს ჩვენთვის. ჩვენ ვკარგავდით ჩვენს ხალხს. ეს ჩვენთვის ყველაზე დიდი დანაკარგია. ჩვენ ამ ომის მიმდინარე წელს დასრულება გვინდა, თუმცა არა მხოლოდ სიტყვით „სწრაფად“, არამედ, უპირველეს ყოვლისა, სამართლიანად, საიმედოდ ჩვენთვის, უკრაინელებისთვის, რომ მათ შეძლონ სახლებში დაბრუნება, უსაფრთხოდ ცხოვრება და მუშაობა. ვფიქრობ, ეს არის ყველაზე მნიშვნელოვანი. ყოველ შემთხვევაში, ჩვენ ყველაფერს გავაკეთებთ ამისთვის“, – აღნიშნა ზელენსკიმ.

ტრამპის ინაუგურაციიდან მეორე დღეს, სი ძინ პინსა და ვლადიმერ პუტინს შორის სატელეფონო ვიდეო-ზარის საუბარი გაიმართა. ორი ქვეყნის ლიდერმა გასული წლის თანამშრომლობის შედეგები და ბრიქსის განვითარების პრიორიტეტები განიხილეს. საკითხი შეეხებოდა ასევე ეკონომიკურ-პოლიტიკურ სამომავლო თანამშრომლობას. უცნობია, ისაუბრეს თუ არა ტრამპის მიერ გაჟღერებული წინადადებების ირგვლივ მსოფლიოს ორი ქვეყნის ლიდერმა.

კრემლის პრესსამსახურის ცნობით, ვლადიმერ პუტინმა და სი ძინპინმა ვიდეოკონფერენციის ფორმატში მოლაპარაკებებისას, მუშაობის შედეგები შეაჯამეს და ურთიერთობების განვითარების გეგმები განიხილეს

„ჩვენ ერთობლივად გამოვდივართ უფრო სამართლიანი მრავალპოლარული მსოფლიო წესრიგის შენებისთვის, ვაწარმოებთ სამუშაოს ევრაზიის სივრცეში და მთელ მსოფლიოში განუყოფელი უსაფრთხოების უზრუნველყოფის ინტერესებში. დარწმუნებით შეიძლება ითქვას, რომ რუსეთისა და ჩინეთის საგარეო პოლიტიკური კავშირი, ერთობლივი სამუშაო ობიექტურად მნიშვნელოვან სტაბილიზაციურ როლს ასრულებს საერთაშორისო საქმეებში“, – განაცხადა პუტინმა სი ძინპინთან საუბრისას.

ამავდროულად, პუტინმა აღნიშნა: „არ შეიძლება, ფაშიზმის, ნაციზმისა და მილიტარიზმის იდეოლოგიამ კვლავ თავი ასწიოს. მნიშვნელოვანია, ჩვენს სხვა თანამოაზრეებთან ერთად, ერთობლივად შევინარჩუნოთ და დავიცვათ ისტორიული სიმართლე“.

კრემლის პრესსამსახურის ინფორმაციით, მხარეებმა ასევე განიხილეს სავაჭრო ურთიერთობები და ენერგეტიკის სფეროში თანამშრომლობა. რუსეთის პრეზიდენტმა აღნიშნა, რომ ჩინეთი რუსეთის ენერგორესურსების უმსხვილესი მომხმარებელია. რუსული მხარის თარგმანის მიხედვით, თავის მხრივ, სი ძინპინმა გამოთქვა მზადყოფნა, ახალ წელს რუსეთ-ჩინეთის ურთიერთობები ახალ სიმაღლეზე აიყვანოს და წინააღმდეგობა გაუწიოს საგარეო გაურკვევლობას ჩინეთ-რუსეთის ურთიერთობებში სტაბილურობის შენარჩუნების საფუძველზე, ყველა ქვეყნის განვითარებისთვის და საერთაშორისო სამართლიანობისა და თანასწორობისთვის.

ჯანდაცვის მსოფლიო ორგანიზაცია (WHO) წუხს აშშ-ის მიერ ორგანიზაციის დატოვების გეგმაზე. ამის შესახებ განცხადებას ჯანდაცვის მსოფლიო ორგანიზაცია ოფიციალურ ვებ-გვერდზე ავრცელებს.

„ჯანდაცვის მსოფლიო ორგანიზაცია წუხს განცხადებაზე, რომ შეერთებული შტატები ორგანიზაციიდან გასვლას გეგმავს…

შეერთებული შტატებისა და სხვა წევრი სახელმწიფოების მონაწილეობით, ჯანდაცვის მსოფლიო ორგანიზაციამ ბოლო 7 წლის განმავლობაში რეფორმების უდიდესი კომპლექტი მიიღო ისტორიაში, რათა მოგვეხდინა ჩვენი ანგარიშვალდებულების, ხარჯების მხრივ ეფექტურობისა და ქვეყნებში გავლენის ტრანსფორმირება. ეს მუშაობა გრძელდება.

ვიმედოვნებთ, რომ შეერთებული შტატები გადახედავს [გადაწყვეტილებას] და ველით კონსტრუქციულ დიალოგში ჩართვას აშშ-სა და მსოფლიო ჯანდაცვის ორგანიზაციას შორის პარტნიორობის შესანარჩუნებლად, მსოფლიოს მასშტაბით მილიონობით ადამიანის ჯანმრთელობისა და კეთილდღეობის სასარგებლოდ,” – ნათქვამია განცხადებაში.

ცნობისთვის, აშშ-ის პრეზიდენტის, დონალდ ტრამპის განცხადებით, შეერთებული შტატები ჯანდაცვის მსოფლიო ორგანიზაციას დატოვებს.

დონალდ ტრამპის მიერ ხელმოწერილ აღმასრულებელი ბრძანების ტექსტში დასახელებულია ორგანიზაციიდან აშშ-ის გასვლის მიზეზები, მათ შორის ორგანიზაციის მიერ COVID-19 პანდემიის არასწორი მართვა, სასწრაფოდ საჭირო რეფორმების გატარების კუთხით წარუმატებლობა და ჯანმო-ს წევრი ქვეყნების არასათანადო პოლიტიკური გავლენისგან დამოუკიდებლობის დემონსტრირების უუნარობა.

აღმასრულებელ ბრძანებაში ასევე აღნიშნულია, რომ ჯანმო აგრძელებს უსამართლოდ მძიმე გადახდების მოთხოვნას აშშ-სგან.