ონის მერის, სერგო ხიდეშელის განცხადებით, სტიქიის ზონაში სამძებრო სამუშაოები აქტიურად გრძელდება. მისი თქმით, ამ ეტაპზე ორი ადამიანის სამძებრო სამუშაოები მიმდინარეობს.

ამასთან, როგორც მერმა აღნიშნა, ამ დროისთვის ნაპოვნი 31 გარდაცვლილიდან 29 იდენტიფიცირებულია.

„ამ დროისთვის არსებული ინფორმაციით, შოვში სტიქიის შედეგად გარდაცვლილი 31 მოქალაქე არის ნაპოვნი, 29 არის იდენტიფიცირებული და ორი ადამიანის საძიებო სამუშაოები კვლავ აქტიურ რეჟიმში მიმდინარეობს. მოგეხსენებათ, ჩართული არის ყველა შესაბამისი უწყება. რეგიონული განვითარებისა და ინფრასტრუქტურის სამინისტრო, შსს, თავდაცვის ძალები, წითელი ჯვარი. 24-საათიან რეჟიმში მუშაობენ და მინდა, ყველას, თითოეულ მათგანს თავდაუზოგავი შრომისთვის მადლობა გადავუხადო.

სამძებრო სამუშაოები ამ დროისთვის მიმდინარეობს, როგორც უშუალოდ სტიქიის ლოკაციაზე, ასევე მდინარეებზე. მოგეხსენებათ, ჩართული არის შსს შესაბამისი უწყების მცურავი საშუალებები, სამაშველო სამსახური, სამაშველო სამსახურის მიერ მობილიზებული მცურავი საშუალებები და სამძებრო სამუშაოები მიმდინარეობს როგორც მდინარის კალაპოტებში, როგორც ონის მუნიციპალიტეტის ტერიტორიაზე, ასევე ამბროლაურის მუნიციპალიტეტის ტერიტორიაზე და შესაბამისად, გაზრდილია არეალი“, – აცხადებს ონის მერი.

საქართველოს თხილის მწარმოებელთა ასოციაციის აღმასრულებელი დირექტორის, გიორგი თოდუას განცხადებით, ფერმერებმა, ვინც სახელმწიფო სუბსიდირების პროგრამით ისარგებლა და თხილის მოვლა-შეწამვლა შესაბამისი აგრო ვადებით ჩაატარა, წელს საუკეთესო ხარისხი მოსავალი მიიღეს, ხოლო მათ ვისაც, შესაბამისი სამუშაოები არ განუხორციელებია, შედარებით ცუდი მოსავალი აქვთ. ინფორმაციას გარემოს დაცვის და სოფლის მეურნეობის სამინისტრო ავრცელებს.

„წინა წლებში ასე იყო და დღესაც ასეა – თუ უმაღლესი ხარისხის თხილი აწარმოვა ფერმერმა, სარეალიზაციო ფასიც ექნება მისაღები და ვინც, სხვადასხვა მიზეზის გამო, ვერ აწარმოვა კარგი ხარისხის თხილი, ბუნებრივია, ექნებათ უფრო დაბალი შემოსავალი“, – განაცხადა გიორგი თოდუამ.

თხილის მწარმოებელთა ასოციაციის აღმასრულებელი დირექტორი მიიჩნევს, რომ ფერმერთა ნაწილმა სახელმწიფო სუბსიდია მიიღო, თუმცა აგრო სამუშაოები არ ჩაატარა.

,,ფერმერების ნაწილმა, რომლებმაც იმის მიუხედავად, რომ მიიღეს სახელმწიფო სუბსიდია და თხილნარი ვერ შეწამლეს, თუნდაც უამინდობის ან დროის უქონლობის გამო, თხილის ხარისხი, ცხადია, კარგი არ იქნება. ამიტომაც, ამ შემთხვევაში არის ფასის განსხვავებაც, სხვაობა ხშირად ორი ლარი და მეტია. დღეის მდგომარეობით, შესაძლოა, რეალიზაცია მოხდეს 6-7 ლარადაც“, – აღნიშნა გიორგი თოდუამ.

იმისათვის, რომ ფერმერებმა თხილის რეალიზაციით მაღალი ფასი მიიღონ, თხილის მწარმოებელთა ასოციაციაში განმარტავენ, რომ საჭიროა მიმართოთ საშრობებს. საშრობებში მოქმედ ლაბორატორიებში გამოკვლევით დადგინდება რა ხარისხის თხილი გვაქვს და რა იქნება სარეალიზაციო ფასი.

კაპროვანში, ზღვაში 30 წლამდე კაცი დაიხრჩო. გავრცელებული ინფორმაციით, ის რუსეთის მოქალაქეა.

საგანგებო სიტუაციების მართვის სამსახურის ცნობით, კაცი ზღვაში გუშინ გაუჩინარდა. მისი ცხედარი მაშველებმა წყლიდან დღეს ამოიყვანეს.

,,თავისუფალი გადაადგილების სოციალური სერვისი – საჭიროების მქონე პირთა ინდივიდუალური მობილურობა“ – ეს არის ზუგდიდის მერიის ექსკლუზიური პროექტი, რომლის ფარგლებშიც, ამერიკის შეერთებული შტატების ევროპულმა სარდლობამ ქალაქს სპეციალიზებული მიკროავტობუსები გადასცა.

ზუგდიდი პირველი ქალაქია ქვეყნის მასშტაბით, სადაც პროექტი ხორციელდება. მუნიციპალიტეტი ზუგდიდში კიდევ არაერთ მნიშვნელოვან პროექტზე მუშაობს.

ჭაბუა ამირეჯიბის გზატკეცილზე 10 სექტემბრის ჩათვლით, მოძრაობა გარკვეული დროით შეიზღუდება, – ამის შესახებ ინფორმაციას თბილისის მერია ავრცელებს.

მათივე ცნობით, ჭაბუა ამირეჯიბის გზატკეცილზე მდებარე კლდოვან ფერდზე, პრევენციის მიზნით, ქვათაცვენის საწინააღმდეგო დამცავი ბადის მოწყობა და კლდის გაწმენდა გრძელდება.

„მიმდინარე სამუშაოების გამო, 26 აგვისტოდან 10 სექტემბრის ჩათვლით, 06:00-დან 12:00 საათამდე, ჭაბუა ამირეჯიბის გზატკეცილზე – ამირეჯიბისა და ქაქუცა ჩოლოყაშვილის გზატკეცილების კვეთიდან მიხეილ თამარაშვილის ქუჩამდე არსებულ საგზაო მონაკვეთში ავტომობილების გადაადგილება შეიზღუდება.

შეზღუდვის პერიოდში ავტომობილები გადაადგილებას შეძლებენ ქაქუცა ჩოლოყაშვილის გზატკეცილის, სულხან ცინცაძისა და მიხეილ თამარაშვილის ქუჩის გამოყენებით.

გარდა ამისა, 26 აგვისტოდან 10 სექტემბრის ჩათვლით, 06:00-დან 08:00 საათამდე, მოძრაობა შეიზღუდება თამარაშვილის ქუჩიდან ჭაბუა ამირეჯიბისა და ქაქუცა ჩოლოყაშვილის გზატკეცილების კვეთამდე არსებულ საგზაო მონაკვეთში.

აღნიშნულ საათებში ავტომობილები გადაადგილებას შეძლებენ თამარაშვილისა და ცინცაძის ქუჩების, ასევე, ჩოლოყაშვილის გზატკეცილის საშუალებით“, – აღნიშნულია მერიის მიერ გავრცელებულ ინფორმაციაში.

„ფიროსმანის გამოფენის დამთვალიერებელთა რიცხვმა ჩვენს დიდ მოლოდინს გადააჭარბა“, – ასე ეხმიანება დანიის ლუიზიანას მუზეუმის დირექტორი საქართველოს კულტურის, სპორტისა და ახალგაზრდობის სამინისტროსთვის გამოგზავნილ წერილში გენიალური ქართველი მხატვრის ექსპოზიციას.

წერილში აღნიშნულია, რომ ფიროსმანის სივრცეს 260 ათასი სტუმარი ეწვია. გამოფენა, რომელიც მხატვრის 48 ნამუშევარს მოიცავს, ევროპაში მოგზაურობას განაგრძობს. დანიის შემდეგ ფიროსმანს შვეიცარიაში, ბეილერის ფონდში გაიცნობენ.