შავაძის დაღუპვის ამბის ერთი ვერსიაა, რომ 2008 წელს მოკლეს, მეორეა, რომ ქართველთა პოზიციები გასცა, ოღონდ სტრასბურგს ამას ვერ აუხსნი, – ამის შესახებ დავით დარჩიაშვილი სოციალურ ქსელში წერს.

დარჩიაშვილის თქმით, სტრასბურგის გადმოსახედიდან მკვლელობაა მთავარი და ყორღანაშვილსაც დაიცავდა.

„შავაძის დაღუპვის ამბავზე: ერთი ვერსიაა/თემაა, რომ იგი მოკლეს 2008 წელს და მკვლელები უნდა დაისაჯონ; მეორე ვერსიაა, რომ მან 2008 წელს ქართველთა პოზიციები გასცა. ეს ორი ვერსია ერთმანეთს ერწყმის, ოღონდ სტრასბურგის სასამართლოს ამას ვერ აუხსნი: მისი გადმოსახედიდან, მკვლელობაა მთავარი. სტრასბურგი მართალია. თუმცა, მე არ ვიცი, ქართველებმა რა უნდა ვქნათ ამ შემთხვევაში? ყორღანაშვილსაც დაიცავდა სტრასბურგი და მართალიც იქნებოდა თავისი გადმოსახედიდან. ჩვენ რა გვინდა?“, – წერს დარჩიაშვილი.

თავდაცვის სამინისტროს ბრიგადის სერჟანტის, როინ შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტების საქმეზე ათ პირს პატიმრობა შეეფარდა. სასამართლო სხდომას რვა ბრალდებული ესწრებოდა, ორზე კი ძებნაა გამოცხადებული.

პროკურატურამ თავდაცვის სამინისტროს ბრიგადის სერჟანტის, 2008 წლის აგვისტოს ომის მონაწილის როინ შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტების ბრალდებით სისხლისსამართლებრივი დევნა 10 პირის მიმართ გუშინ დაიწყო.

ცალი კალოშით მოსკოვში ჩარჩენილი „პოლიტიკოსი“ გახარია ქართველ ხალხს, ჩვენ შვილებს, მათ შორის იმ შვილებს, რომლებსაც თვალებს უთხრიდა დეპუტატ გავრილოვის უკანალის შეურაცხყოფისთვის, დღეს რუსეთით აშინებს, ოღონდ „ჩერეზ ჩინეთის გავლით“ რუსეთით, – ამის შესახებ, სოციალურ ქსელში „ხალხის ძალის“ წევრი, ანალიტიკოსი დავით ქართველიშვილი წერს, რომელიც მედიაში გავრცელებულ გიორგი გახარიას განცხადებას ეხმაურება, სადაც გახარია „ქართულ ოცნებას“, რუსეთთან საქართველოს პირისპირ მარტო დატოვებაში ადანაშაულებს.

როგორც ქართველიშვილი აღნიშნავს, გიორგი გახარიას ახალი ბრძანება აქვს მიღებული და ამ ბრძანებას ასრულებს.

„ველორბოლიდან მახსოვს, ამა თუ იმ ეტაპზე გამოვლენილ ლიდერს „ყვითელ მაისურს“ აცმევენ, რათა შემდგომ ეტაპებზე ყველამ გაარჩიოს თავისი ძირითადი კონკურენტი და სწორება მასზე ჰქონდეს. მაგრამ, როდესაც ამ მაისურს რაიმე დამსახურების გარეშე გაცმევენ, ამ შემთხვევაში პოლიტიკურ ლუზერს – ეს უკვე გაუგებარია. როგორც ჩანს, აგენტოკრატების რეზიდენტურამ გახარიაზე და მის გუნდის წევრებზე გააკეთა ფსონი.

ბრძანება „FAS!“ შესასრულებლად მეორე დღეა სწორედ მათ ერგოთ. ცალი კალოშით მოსკოვში ჩარჩენილი „პოლიტიკოსი“ გახარია ქართველ ხალხს, ჩვენ შვილებს, მათ შორის იმ შვილებს, რომლებსაც თვალებს უთხრიდა დეპუტატ გავრილოვის უკანალის შეურაცხყოფისთვის, დღეს რუსეთით აშინებს, ოღონდ „ჩერეზ ჩინეთის გავლით“ რუსეთით.

როგორ უნდა გაუჭირდეს რეზიდენტურას, რომ დღეს თავის „ჯოკერად“ პირნათლად წაგებულ ბანქოს პარტიაში აგურის “шестёрка” გამოიყენოს. „ალამუთის ციხის“ გუშინდელი უიღბლო დამცველები, რეზიდენტმა დღეს „დიდი ჩინური კედლის“ ასაღებად გაუშვა. მე ამ ლუზერებს ერთი უბრალო ტესტის გავლას შევთავაზებ პეკინის „აღებამდე“ მოდით, გორი „დაიბრუნეთ“.

თქვენივე გუნდის ყოფილმა წევრმა და „ქართული ოცნების“ სახელით გორში „გამაჟორიტარულმა“ დეპუტატმა დატოვა საპარლამენტო მანდატი. აბა თუ რომელიმე თქვენგანი, თუნდაც გახარიას „ჩინური“ ვერსია, გაბედავს და თავისივე ყოფილი კოლეგის ჩასანაცვლებლად ოქტომბერში დანიშნულ შუალედურ არჩევნებში მიიღებს მონაწილეობას. ჯერ გორი „დაიბრუნეთ“ და პეკინით მერე შეგვაშინეთ“, – წერს ქართველიშვილი.

საქართველოს ექსპრეზიდენტის მიხეილ სააკაშვილის განცხადებით, სოფო ჭყონიასთან ერთად, შეიქმნება უკრაინის ოკუპირებულ ტერიტორიებზე დაკარგული და დარჩენილი ბავშვების, აბდუქციის მსხვერპლი, დაღუპული ჯარისკაცების შვილების, სამედიცინო და ჰუმანიტარული დახმარების საერთაშორისო პროგრამა.

„გადავწყვიტეთ, სოფო ჭყონიასთან ერთად ჩამოვაყალიბოთ უკრაინის ოკუპირებულ ტერიტორიებზე დაკარგული და დარჩენილი ბავშვების, აბდუქციის მსხვერპლი, დაღუპული ჯარისკაცების შვილების, სამედიცინო და ჰუმანიტარული დახმარების საერთაშორისო პროგრამა/ინიციატივა.

მინიმუმ 15 ათასი ასეთი უკრაინელი ბავშვია გატაცებული უკრაინის ოკუპირებული ტერიტორიებიდან, არის იძულებით გაშვილებული ოკუპანტი ქვეყნის ოჯახებში და განთავსებული ბავშვთა სახლებში, ამ ომს უკვე 535 ბავშვი ემსხვერპლა, ბევრ ბავშვს დაუხოცეს მშობლები, მაგრამ მათ ეძებენ ნათესავები და უკრაინის სახელმწიფო.
ჩემი ჯანმრთელობის მძიმე მდგომარეობის პირობებშიც კი, განსაკუთრებით განვიცდი ბავშვების ტრაგედიას, როგორც მშობელი და როგორც უკრაინის ქართველი მოქალაქე.

სოფო ჭყონიას აქვს ჰუმანიტარული საქმიანობის დიდი გამოცდილება, ვთხოვ ყველა ჩემს მომხრეს რუსეთში, უკრაინაში, საქართველოში – ჩაერთონ ამ საქმეში, მოგვეხმარონ ინფორმაციის შეგროვებაში და ბავშვების გაყვანაში.

ჩვენ გვექნება საკუთარი Youtube არხი, სადაც ოპერატიულად მოგაწვდით უახლეს ინფორმაციას, ინიციატივა ამუშავდება 2 აგვისტოს, გთხოვთ, მომაწოდოთ სრული ინფორმაცია მისამართზე: Forhelp114@gmail.com“ – წერს მიხეილ სააკაშვილი სოციალურ ქსელში.