საქართველოს მთავრობას მოვუწოდებთ, მიიღოს კონკრეტული ზომები შემდგომი ძალადობის პრევენციისთვის და გამოიძიოს სამართალდამცველების მხრიდან ძალის გადამეტების, წამებისა და არასათანადო მოპყრობის, ასევე, მშვიდობიანი დემონსტრანტებისა და მედიის წარმომადგენლების თვითნებური დაკავების ფაქტები, რომლებიც 2024 წლის ნოემბერ-დეკემბერში გამართული საპროტესტო აქციების დროს დაფიქსირდა, – ამის შესახებ აღნიშნულია გაერო-ს ადამიანის უფლებების საკითხებში უმაღლესი კომისრის ოფისის მიერ გავრცელებულ განცხადებაში, რომელიც, მათივე ინფორმაციით, ადამიანის უფლებების საკითხებში დამოუკიდებელი ექსპერტების მიერაა მომზადებული.

„ჩვენ მივიღეთ ინფორმაცია საქართველოში სამართალდამცავი ორგანოების წარმომადგენლების, ასევე სხვა პირების მხრიდან, რომლებსაც არ ეცვათ ფორმა და არ ჰქონდათ მაიდენტიფიცირებელი ნიშნები, მშვიდობიანი დემონსტრანტების, უფლებადამცველებისა და ჟურნალისტების მიმართ განზრახ ფიზიკური ძალადობის, მუქარის, დაშინებისა და შურისძიების შესახებ“, – აღნიშნავენ გაერო-ს ექსპერტები.

გაერო-ს ექსპერტები აცხადებენ, რომ ბრალდებების მასშტაბები და ზიანის სიმძიმე, რომელიც, გავრცელებული ინფორმაციით, მიაყენეს მომიტინგეებს და, მოგვიანებით, დაკავებულებს, შეიძლება კვალიფიცირდეს, როგორც წამება და სხვა სასტიკი, არაადამიანური ან დამამცირებელი მოპყრობა ან დასჯა.

განცხადებაში აღნიშნულია, რომ, ცნობების მიხედვით, პოლიცია დემონსტრანტების წინააღმდეგ განურჩევლად იყენებდა რეზინის ტყვიებს, წყლის ჭავლს, წიწაკის გაზს და სხვა ქიმიურ საშუალებებს, ასევე, ასობით ადამიანი დაშავდა, უჩვეულოდ მაღალმა პროცენტმა კი თავისა და სახის სერიოზული დაზიანებები მიიღო.

„ჩვენ მივიღეთ შემაშფოთებელი ინფორმაცია, რომ ბევრ დაკავებულს მიაყენეს სიტყვიერი შეურაცხყოფა, ხანგრძლივად და განმეორებით სცემეს, გაუპატიურებით ან სხეულის ნაწილების დაზიანებით დაემუქრნენ და მათ უარი ეთქვათ სამედიცინო დახმარებაზე“, – აღნიშნულია ექსპერტების განცხადებაში.

განცხადებაში ასევე ნათქვამია, რომ საქართველოს სპეციალურმა საგამოძიებო სამსახურმა დაიწყო ბოლო თვეების განმავლობაში მომხდარი მოვლენების გამოძიება.

„დღემდე ამ გამოძიებას არ ჰქონია რაიმე შედეგი, მაშინ როცა მრავალი დემონსტრანტი კვლავ პატიმრობაში რჩება“, – აცხადებენ გაერო-ს ექსპერტები.

მათივე განმარტებით, „ამ მოვლენების სიმძიმის გათვალისწინებით, საქართველოს ოფიციალური პირებისგან ელოდებიან საერთაშორისო სტანდარტების შესაბამისად დამოუკიდებელი, მიუკერძოებელი, გამჭვირვალე და ეფექტური გამოძიების დაწყებას“.

„ყველა თვითნებურად დაკავებული პირი უნდა გათავისუფლდეს და ვისაც სამედიცინო დახმარება სჭირდება, უნდა გაეწიოს“, – აცხადებენ გაერო-ს ექსპერტები.

ექსპერტები ასევე ამბობენ, რომ უსაფრთხოების ძალების მიერ ძალის ნებისმიერი გამოყენება უნდა შეესაბამებოდეს კანონიერების, აუცილებლობის, პროპორციულობის, სიფრთხილისა და არადისკრიმინაციულობის პრინციპებს და მკაცრად უნდა რეგულირდებოდეს მოქმედი საერთაშორისო სტანდარტების შესაბამისად.

ამასთან, გაერო-ს ადამიანის უფლებების საკითხებში უმაღლესი კომისრის ოფისის ინფორმაციით, ექსპერტებმა წერილობით მიმართეს საქართველოს მთავრობას ამ საკითხთან დაკავშირებით და განაგრძობენ ვითარების მჭიდრო მონიტორინგს.

სალომე ზურაბიშვილი ისტორიაში დარჩება, როგორც საქართველოს ყველაზე მოღალატე პრეზიდენტი, – განაცხადა პარტია „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა „The Hill-ის“ სტატიის ჩასწორებაზე საუბრისას.

„ზურაბიშვილმა რაც არ უნდა ჩაასწორ-ჩამოასწოროს განცხადებები, ის ისტორიაში მაინც დარჩება, როგორც საქართველოს ყველაზე მოღალატე პრეზიდენტი. განცხადებებში პირდაპირ ამბობდა და ამბობს, რომ მისი პატრონები არიან უცხოეთში და მას ლეგიტიმაცია აქვს უცხოეთიდან“, – აღნიშნა მაჭარაშვილმა.

გამოცემა „ჰილმა“ გამოქვეყნებულ სტატიაში საქართველოს ყოფილი პრეზიდენტის, სალომე ზურაბიშვილის ციტატა ჩაასწორა.

თავდაპირველ ტექსტში ნათქვამი იყო, რომ ზურაბიშვილის გზავნილია, „აშშ-მა რუსეთს უკან უნდა დაახევინოს და საქართველო „სათამაშო მოედნად“ გამოიყენოს“.

ჩასწორებულ ტექსტში კი აღნიშნულია, რომ ზურაბიშვილის „გზავნილია, რომ აშშ-მა უნდა გამოაცხადოს პოლიტიკა, რომ კავკასია არ არის კრემლის „სათამაშო მოედანი““.

სალომე ზურაბიშვილი ისტორიაში დარჩება, როგორც საქართველოს ყველაზე მოღალატე პრეზიდენტი, – განაცხადა პარტია „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა „The Hill-ის“ სტატიის ჩასწორებაზე საუბრისას.

„ზურაბიშვილმა რაც არ უნდა ჩაასწორ-ჩამოასწოროს განცხადებები, ის ისტორიაში მაინც დარჩება, როგორც საქართველოს ყველაზე მოღალატე პრეზიდენტი. განცხადებებში პირდაპირ ამბობდა და ამბობს, რომ მისი პატრონები არიან უცხოეთში და მას ლეგიტიმაცია აქვს უცხოეთიდან“, – აღნიშნა მაჭარაშვილმა.

გამოცემა „ჰილმა“ გამოქვეყნებულ სტატიაში საქართველოს ყოფილი პრეზიდენტის, სალომე ზურაბიშვილის ციტატა ჩაასწორა.

თავდაპირველ ტექსტში ნათქვამი იყო, რომ ზურაბიშვილის გზავნილია, „აშშ-მა რუსეთს უკან უნდა დაახევინოს და საქართველო „სათამაშო მოედნად“ გამოიყენოს“.

ჩასწორებულ ტექსტში კი აღნიშნულია, რომ ზურაბიშვილის „გზავნილია, რომ აშშ-მა უნდა გამოაცხადოს პოლიტიკა, რომ კავკასია არ არის კრემლის „სათამაშო მოედანი““.

ევროსაბჭოს საპარლამენტო ასამბლეის მონიტორინგის კომიტეტის პროექტის მიხედვით, ასამბლეაში საქართველოს დელეგაციის უფლებამოსილება გარკვეული დათქმებით, დროებით უნდა დამტკიცდეს.

კომიტეტი მიიჩნევს, რომ „დიალოგის შენარჩუნებისადმი მზაობის ნიშნად, ასამბლეამ, 2025 წლის აპრილის სესიაზე ხელახალ განხილვამდე, მიმდინარე სესიაზე უნდა დაამტკიცოს საქართველოს დელეგაციის უფლებამოსილება იმ პირობით, რომ საქართველოს ხელისუფლება დაუყოვნებლივ შეასრულებს რიგ პირობებს“.

„მონიტორინგის კომიტეტი მიიჩნევს, რომ 2024 წლის 26 ოქტომბრის საპარლამენტო არჩევნების შემდგომი მოვლენები, მათ შორის შეკრებისა და გამოხატვის თავისუფლების დარღვევები და ოპოზიციისა და სამოქალაქო საზოგადოების წინააღმდეგ განხორციელებული რეპრესიები, ეწინააღმდეგება საქართველოს წევრობის ვალდებულებებსა და ევროპის საბჭოში გაწევრიანების პირობებს.

შესაბამისად, კომიტეტს სურს, ხელისუფლებისგან მიიღოს მკაფიო გარანტიები, რომ ისინი ნამდვილად მზად არიან, შეაჩერონ დემოკრატიული უკუსვლა და შეასრულონ წევრობის ვალდებულებები. თუმცა კომიტეტი მიიჩნევს, რომ, დიალოგის შენარჩუნებისადმი მზაობის ნიშნად, ასამბლეამ, 2025 წლის აპრილის სესიაზე ხელახალ განხილვამდე, ამ სესიაზე უნდა დაამტკიცოს საქართველოს დელეგაციის უფლებამოსილება იმ პირობით, რომ საქართველოს ხელისუფლება დაუყოვნებლივ შეასრულებს რიგ პირობებს, მათ შორის:

წამოიწყებს ინკლუზიურ პროცესს; დაუყოვნებლივ აღმოფხვრის ბოლო საპარლამენტო არჩევნების დროს გამოვლენილ ნაკლოვანებებსა და ხარვეზებს და შექმნის საარჩევნო გარემოს, რომელიც ხელს შეუწყობს მომდევნო თვეებში გამოცხადებულ ნამდვილად დემოკრატიული ახალი არჩევნების ჩატარებას;

დაუყოვნებლივ შეწყვეტს პოლიციის მხრიდან ძალადობასა და ადამიანის უფლებების დარღვევებს;

ეფექტურად გამოიძიებს ამ პრაქტიკას და შეწყვეტს სამართლებრივი დევნის ბოროტად გამოყენებას, როგორც დემონსტრანტების, ჟურნალისტებისა და სამოქალაქო ლიდერების დაშინებისა და მათზე შურისძიების საშუალებას;

სრულად დაიცავს გამოხატვისა და შეკრების თავისუფლებას და 2025 წლის აპრილის სესიამდე გაათავისუფლებს ყველა პოლიტპატიმარს.

ამავდროულად, კომიტეტი მიიჩნევს, რომ, პოლიციის მხრიდან ძალადობისა და ადამიანის სხვა უფლებების დარღვევების მკაფიო დაგმობის ნიშნად, რომელიც აქამდე არ აღმოუფხვრია ხელისუფლებას, ასამბლეამ უნდა შეაჩეროს საქართველოს დელეგაციის რამდენიმე უფლება“, – ნათქვამია კომიტეტის მიერ მომზადებულ პროექტში.

ამავე პროექტის მიხედვით, „ასამბლეის აზრით, საქართველოს პოლიტიკური ჩიხი და ნდობის დარღვევა ხელისუფლებასა და სამოქალაქო საზოგადოებას შორის შეიძლება დაიძლიოს მხოლოდ: საქართველოს ხელისუფლების ევროპის საბჭოს ღირებულებებისა და სტანდარტებისადმი მკაფიო ვალდებულებით და შემდგომი ევროპული ინტეგრაციით ქართველი ხალხის უმრავლესობის ევროპული მისწრაფებების შესაბამისად;

ევროსაბჭოსთან ურთიერთქმედების გაძლიერებული პროცესით, საქართველოს ხელისუფლებისა და ასევე სხვა ქართველი დაინტერესებული მხარეების ჩართულობით;

საქართველოში ინკლუზიური პოლიტიკური პროცესით, რომელშიც ჩართული იქნება ყველა დაინტერესებული მხარე და აქტორი, მათ შორის ოპოზიცია და სამოქალაქო საზოგადოება, რათა სასწრაფოდ აღმოიფხვრას ბოლო საპარლამენტო არჩევნების დროს გამოვლენილი ხარვეზები და გადაცდომები;

იმ სამართალდამცველთა ანგარიშვალდებულების უზრუნველყოფით, რომლებიც მონაწილეობდნენ მშვიდობიანი საპროტესტო აქციის მონაწილეთა ძალადობრივ დარბევაში, ცემაში, სასტიკ მოპყრობაში, წამებასა და უკანონო დაკავებაში; ყველა პოლიტიკური პატიმრის გაშვებით“.

რეზოლუციის პროექტში ასევე ნათქვამია, რომ „აღნიშნულთან დაკავშირებით, ასამბლეა იხსენებს ევროპის საბჭოს გენერალური მდივნის ვიზიტს თბილისში 2024 წლის დეკემბერში, რის შემდეგაც რამდენიმე ინიციატივა იქნა წამოწყებული.

ანალოგიურად, ასამბლეა იხსენებს, რომ ევროპის საბჭოს წევრი სახელმწიფოების ვალდებულებებისა და დაკისრებული მოვალეობების შესრულების კომიტეტის (მონიტორინგის კომიტეტი) თანამომხსენებლებმა 2025 წლის იანვარში მოინახულეს საქართველო და შეხვდნენ წარმომადგენლებს ქართული ინსტიტუტებიდან, ასევე ყველა პოლიტიკურ ძალას, არასამთავრობო ორგანიზაციებსა და სამოქალაქო საზოგადოებას.

2024 წლის 26 ოქტომბრის საპარლამენტო არჩევნების შემდგომი მოვლენები, მათ შორის შეკრებისა და გამოხატვის თავისუფლების დარღვევები და ოპოზიციისა და სამოქალაქო საზოგადოების წინააღმდეგ განხორციელებული ზეწოლა, ეწინააღმდეგება საქართველოს, როგორც წევრი ქვეყნის ვალდებულებებს და ევროპის საბჭოში გაწევრიანებისას აღებულ ვალდებულებებს. შესაბამისად, ასამბლეას სჭირდება მკაფიო გარანტიები ხელისუფლებისგან, რომ ისინი ნამდვილად არიან ვალდებულნი, შეაჩერონ დემოკრატიული უკუსვლა და შეასრულონ წევრობის ვალდებულებები.

ამ მოსაზრებების გათვალისწინებით და დიალოგის შენარჩუნების მზაობის ნიშნად, ასამბლეა, საქართველოს დელეგაციის უფლებამოსილების და ქვეყანაში არსებული სიტუაციის საერთო გადაფასების მოლოდინში 2025 წლის აპრილის სესიაზე, გადაწყვეტს, დაამტკიცოს ამ სესიაზე საქართველოს დელეგაციის უფლებამოსილება, ამავდროულად, მოითხოვს საქართველოს ხელისუფლებისგან:

დაუყოვნებლივ დაიწყოს ინკლუზიური პროცესი ყველა დაინტერესებული მხარისა და სოციალური აქტორის, მათ შორის მმართველი უმრავლესობის, ოპოზიციისა და სამოქალაქო საზოგადოების ჩართულობით, რათა სასწრაფოდ გამოასწოროს ბოლო საპარლამენტო არჩევნების დროს დაფიქსირებული ხარვეზები და ნაკლოვანებები და შექმნას საარჩევნო გარემო, რომელიც ხელს შეუწყობს ნამდვილად დემოკრატიული ახალი არჩევნების ჩატარებას მომდევნო თვეების განმავლობაში;

გადადგას დაუყოვნებელი და ეფექტური ნაბიჯები, რათა საქართველომ განაახლოს ევროპული ინტეგრაციის პროცესი, ხალხის ევროპული მისწრაფებების შესაბამისად და დაჩქარებულად განახორციელოს აუცილებელი რეფორმები;

დაუყოვნებლივ შეწყვიტოს პოლიციის მხრიდან ძალადობა და ადამიანის უფლებების დარღვევები, ეფექტურად გამოიძიოს ეს პრაქტიკა და შეწყვიტოს სამართლებრივი პროცედურების ბოროტად გამოყენება პროტესტის მონაწილეების, ჟურნალისტებისა და სამოქალაქო ლიდერების შეკავების ან შურისძიების საშუალებად, სრულად სცეს პატივი გამოხატვისა და შეკრების თავისუფლება;

გააძლიეროს თანამშრომლობა ევროსაბჭოსთან და კეთილსინდისიერად ჩაერთოს ევროსაბჭოს გენერალური მდივნის მიერ ინიცირებულ პროცესში;

დაუყოვნებლივ უპასუხოს ასამბლეის მიერ რეზოლუცია 2438 (2022) და რეზოლუცია 2561 (2024)-ში გამოთქმულ შეშფოთებებსა და რეკომენდაციებს, მათ შორის რეკომენდაციას უცხოური გავლენის გამჭვირვალობის შესახებ კანონის გაუქმების თაობაზე და შეშფოთებებს ადმინისტრაციულ სამართალდარღვევათა კოდექსთან დაკავშირებით, რაც უნდა გადაიჭრას ვენეციის კომისიის დასკვნების გათვალისწინებით;

გაათავისუფლოს ყველა პოლიტპატიმარი ასამბლეის 2025 წლის აპრილის სესიამდე;

განაგრძოს სრული ჩართულობა ასამბლეის მონიტორინგის პროცედურაში“.

პროექტის თანახმად, ამავდროულად, პოლიციის მხრიდან ძალადობისა და ადამიანის უფლებების სხვა დარღვევების მკაფიო დაგმობის ნიშნად, რომლებიც ჯერჯერობით არ გამოუსწორებია ხელისუფლებას, ასამბლეა გადაწყვეტს, შეუჩეროს საქართველოს დელეგაციის წევრებს შემდეგი უფლებები:

„უფლება, იყვნენ სრულუფლებიანი წევრები ან შემცვლელები შემდეგ კომიტეტებში: პოლიტიკურ საქმეთა და დემოკრატიის კომიტეტი, მონიტორინგის კომიტეტი, იურიდიულ საქმეთა და ადამიანის უფლებათა კომიტეტი, ადამიანის უფლებათა ევროპულ სასამართლოში მოსამართლეთა არჩევის კომიტეტი და პროცედურის წესებისა და ინსტიტუციურ საქმეთა კომიტეტი;

უფლება, იყვნენ არჩევნების სადამკვირვებლო კომიტეტების წევრები; უფლება, დაინიშნონ მომხსენებლად; უფლება, იყვნენ კანდიდატები ასამბლეის პრეზიდენტის, კომიტეტის ან ქვეკომიტეტის თავმჯდომარის ან მოადგილის თანამდებობაზე; უფლება, წარმოადგინონ ასამბლეა ევროსაბჭოს ორგანოებში ბიუროს გადაწყვეტილებით და უფლება, წარმოადგინონ ასამბლეა ერთჯერადად (ბიუროს ან კომიტეტის გადაწყვეტილებით) ღონისძიებებზე, შეხვედრებზე, კონფერენციებზე, რომლებსაც აწყობენ ევროსაბჭოს ორგანოები, საერთაშორისო ორგანიზაციები ან საპარლამენტთაშორისო ასამბლეები.

ასამბლეამ ასევე გადაწყვიტოს, გამოიკვლიოს გზები საქართველოს არასაპარლამენტო ოპოზიციისა და სამოქალაქო საზოგადოების მონაწილეობის გასაძლიერებლად მის საქართველოსთან დაკავშირებულ ქმედებებში, მათ შორის მონიტორინგის კომიტეტის ფარგლებში.

ასამბლეას ექნება შესაძლებლობა, ხელახლა განიხილოს საქართველოს დელეგაციის უფლებამოსილება, მათ შორის ზემოხსენებული უფლებების შეჩერება, 2025 წლის აპრილის სესიაზე, მე-11 პუნქტში ნახსენებ საკითხებთან დაკავშირებით მიღწეული პროგრესის გათვალისწინებით, მისი პროცედურის წესების მე-9 მუხლით გათვალისწინებული პირობების შესაბამისად“.

როგორც პროექტშია აღნიშნული, საპარლამენტო ასამბლეა შეახსენებს, რომ საქართველომ ევროსაბჭოში 1999 წლის 27 იანვარს გაწევრიანებით აიღო ვალდებულება, შეესრულებინა რამდენიმე კონკრეტული პირობა, რომლებიც ჩამოთვლილია ასამბლეის 209 (1999) დასკვნაში, ასევე ევროპის საბჭოს წესდების (STE No. 1) მე-3 მუხლით გათვალისწინებული ვალდებულებები, რომლებიც ეხება ყველა წევრ სახელმწიფოს: პლურალისტური დემოკრატიისა და კანონის უზენაესობის პრინციპების დაცვა, ასევე მისი იურისდიქციის ქვეშ მყოფი ყველა პირის ადამიანის უფლებებისა და ძირითადი თავისუფლებების პატივისცემა“.

„თავის რეზოლუციაში 2561 (2024) „დემოკრატიის გამოწვევები საქართველოში“, ასამბლეამ უკვე გამოხატა ღრმა შეშფოთება საქართველოში დემოკრატიის მდგომარეობის განგრძობადი და სწრაფი გაუარესების გამო. აღნიშნა რა, რომ 2024 წლის 26 ოქტომბრის საპარლამენტო არჩევნები იქნებოდა დე ფაქტო რეფერენდუმი საქართველოს დემოკრატიული გზისა და საგარეო ორიენტაციის შესახებ, ასამბლეამ კვლავ დაადასტურა თავისი ერთგულება საქართველოს ყველა ძალასთან და სამოქალაქო საზოგადოებასთან თანამშრომლობისა და დიალოგისადმი „ბოლოდროინდელი უკუსვლის შესაჩერებლად და საქართველოს მიერ ევროსაბჭოს წინაშე აღებული წევრობის ვალდებულებებისა და პირობების შესრულების უზრუნველსაყოფად“.

ბოლოდროინდელი მოვლენები ადასტურებს ასამბლეის შეშფოთებას. ასამბლეის საარჩევნო სადამკვირვებლო დელეგაციის დასკვნები „აჩენს შეშფოთებას არჩევნების შედეგების სისწორის შესახებ, კერძოდ, ასახავს თუ არა არჩევნების შედეგები ამომრჩეველთა ნამდვილ ნებას. გარდა ამისა, სერიოზული ეჭვები რჩება იმის თაობაზე, უზრუნველყოფდა თუ არა საარჩევნო გარემო სამართლიანი არჩევნებისთვის საჭირო პირობებს, რაც ამომრჩევლებს მისცემდა დაშინებისა და არასათანადო ზეწოლისგან თავისუფალი ინფორმირებული არჩევანის გაკეთების საშუალებას. ეს აისახება ოპოზიციისა და სამოქალაქო საზოგადოების რეაქციაში, რომლებიც გამოხატავენ ღრმა უნდობლობას როგორც შედეგების, ისე ინსტიტუტების მიმართ და განაგრძობენ არჩევნების შედეგების გასაჩივრებას“.

არჩევნების შემდეგ საქართველოში დაიწყო მასშტაბური დემონსტრაციები, ოპოზიციურმა პარტიებმა პარლამენტის ბოიკოტი გამოაცხადეს და არჩევნების ხელახლა ჩატარება მოითხოვეს.

საპროტესტო აქციებმა კიდევ უფრო დიდი მასშტაბი მიიღო მას შემდეგ, რაც მთავრობამ განაცხადა საქართველოს ევროკავშირში გაწევრიანების პროცესის შეჩერების შესახებ. ამ გადაწყვეტილებამ, რომელიც ეწინააღმდეგება მმართველი პარტიის საარჩევნო დაპირებებს, გამოიწვია სოციალური კრიზისი, რომელიც ხასიათდება ქართული საზოგადოების მხრიდან ქვეყნის პოლიტიკური ინსტიტუტებისადმი ნდობის სრული დაკარგვით, რაც ეჭვქვეშ აყენებს მათ ლეგიტიმურობას. ეს ასევე აუცილებლად გავლენას იქონიებს აუცილებელი რეფორმების განხორციელებაზე, რომლებიც დაეხმარებოდა საქართველოში დემოკრატიის უკუსვლის დაძლევას.

ასამბლეა გმობს პოლიციის მიერ ადამიანის უფლებების დარღვევებს, მათ შორის დემონსტრანტების წინააღმდეგ ძალის სასტიკ გამოყენებას, რაც არღვევს შეკრების თავისუფლებას, ძირითადი უფლებებისა და თავისუფლებების პროგრესული შეზღუდვის, დემოკრატიული გარანტიების რღვევის, სამოქალაქო საზოგადოების შევიწროებისა და სახელმწიფო ინსტიტუტების პოლიტიზირების კონტექსტში, რაც ამ არჩევნებამდე დიდი ხნით ადრე დაიწყო. ასამბლეა ასევე გმობს სასამართლო სისტემის ბოროტად გამოყენებას დემონსტრანტების, ჟურნალისტებისა და ოპოზიციის წარმომადგენლების წინააღმდეგ, პრობლემები, რომლებიც ხელისუფლების ყურადღების მიღმა რჩება.

ამ მხრივ, ასამბლეა მოუწოდებს საქართველოს ხელისუფლებას, გაითვალისწინოს ვენეციის კომისიის რეკომენდაციები, რომლებიც წარმოდგენილი იქნება ადმინისტრაციულ სამართალდარღვევათა კოდექსის შესახებ სასწრაფო დასკვნაში, რომელიც ასამბლეის პრეზიდენტმა მოითხოვა. ასევე, ასამბლეა კვლავ მოუწოდებს ხელისუფლებას, უკან გაიწვიოს უცხოური გავლენის გამჭვირვალობის შესახებ კანონი მისი ამჟამინდელი ფორმით, დაიცვას შეკრებისა და გამოხატვის თავისუფლება, უზრუნველყოს პასუხისმგებლობა ადამიანის უფლებათა დარღვევებზე და შეწყვიტოს არასამთავრობო ორგანიზაციების სტიგმატიზაცია, რაზეც ასევე ყურადღება გაამახვილა ევროპის საბჭოს ადამიანის უფლებათა კომისარმა საქართველოში 2025 წლის იანვარში ვიზიტისას“, – ნათქვამია მომზადებულ პროექტში.

მინდა, ექსტრემისტ ოპოზიციას და ვითომ არასამთავრობო ორგანიზაციებს მივუსამძიმრო, რომ ევროპის საბჭოს საპარლამენტო ასამბლეიდან ჩვენი გაშვების პროექტი ჩაუვარდათ -თეა წულუკიანი

მინდა, ჩვენს ექსტრემისტ ოპოზიციას და ყველა ვითომ არასამთავრობო ორგანიზაციას მივუსამძიმრო, რომ ჩვენი ხვალ აქედან ყველანაირი მიზეზის გარეშე გაშვების პროექტი ჩაუვარდათ, – ამის შესახებ საპარლამენტო უმრავლესობის წევრმა, ევროპის საბჭოს საპარლამენტო ასამბლეაში საქართველოს საპარლამენტო დელეგაციის ხელმძღვანელმა, თეა წულუკიანმა განაცხადა.

წულუკიანმა კომენტარი გააკეთა ევროსაბჭოს საპარლამენტო ასამბლეის მონიტორინგის კომიტეტის პროექტთან დაკავშირებით, რომლის მიხედვითაც, ასამბლეაში საქართველოს დელეგაციის უფლებამოსილება გარკვეული დათქმებით, დროებით უნდა დამტკიცდეს.

წულუკიანის თქმით, საქართველოს დელეგაცია დღესვე დაარეგისტრირებს პროექტზე ცვლილებას, რომელიც ხვალ პლენარულ სხდომაზე განიხილება.

„დასრულდა დღევანდელი დღე. მონიტორინგის კომიტეტმაც უკვე გამოაქვეყნა ის დოკუმენტი, რომლის შემუშავებაც ჰქონდა დავალებული. შესაბამისად, ახლა უკვე ღიად მინდა გითხრათ, რომ კომიტეტზე იყო ორი ვარიანტი განხილული: ერთი – რომ ჩვენ უკვე ხვალვე ახალი მოწვევის პარლამენტის დელეგაცია გავეშვით ასამბლეიდან, როგორც იყო ეს ჩვენი ექსტრემისტი ოპოზიციის და მათი ექსტრემისტი მოკავშირეების სურვილი; მეორე ვერსია იყო ის, რომ რატიფიცირებული ყოფილიყო ჩვენი უფლებამოსილებები დროებით და სერიოზული დათქმებით. ამ სერიოზულ დათქმებში არ არის არავითარი „სააკაშვილის განთავისუფლება“ ან „სალომე ზურაბიშვილი აღიარეთ ლეგიტიმურ პრეზიდენტად“, მაგრამ არის სერიოზული სხვა დათქმებით, რაზეც მე კომიტეტს ცალსახად ვუთხარი, რომ ეს არ მოხდება, არ ჩატარდება 2028 წლამდე ახალი საპარლამენტო არჩევნები, ეს არ არის დაგეგმილი. მე ვუთხარი ეს, მათ იციან და ჩემი ეს განცხადება მათთვის სიურპრიზი ვერ იქნება. მათ ეს არ მოეწონათ, მაგრამ ასეთია ჩვენი საერთო პოზიცია, „ქართული ოცნების“ და ქართველი ამომრჩევლის უმრავლესობის პოზიცია, რომ არჩევნები ჩატარდა უკვე და გაიმარჯვა იმან, ვინც გაიმარჯვა. შესაბამისად, პროცედურა იქნება ახლა შემდეგი; მე მინდა, პირველ რიგში ჩვენს ექსტრემისტ ოპოზიციას მივუსამძიმრო, რომ ჩვენი ხვალ აქედან ყველანაირი მიზეზის გარეშე გაშვების პროექტი ჩაუვარდათ, ყველა იმ ვითომ არასამთავრობო ორგანიზაციას, რომლებიც, დერეფანი ათია და ყველგან რამდენიმე არიან, მათაც მივუსამძიმრო. ახლა ჩვენ ვიღებთ დროს, განვიხილავთ ამ დათქმებს და უკვე ხვალ შევძლებ, როგორც დელეგაციის ხელმძღვანელმა, გითხრათ, რა იქნება პლენარულ სხდომაზე თითოეულ ამ დათქმასთან ჩვენი პოზიცია. დღევანდელი დღე ჩვენ მოვახმარეთ იმას, რომ კომიტეტის მიერ დღეს გამოქვეყნებულ ამ შესაძლო რეკომენდაციაზე ჩვენ გვქონოდა სხვადასხვა ქვეყნის მხარდაჭერა და არაერთი ქვეყნის დელეგაციისგან გვაქვს მხარდაჭერა. ჩვენ უკვე დღესვე დავარეგისტრირებთ პროექტზე ცვლილებას და ისინი ამ ცვლილებას მხარს დაუჭერენ. შესაბამისად, ხვალ პლენარულ სხდომაზე განიხილება ეს ტექსტი და ჩვენ მიერ ინიცირებული ცვლილება, შედგება მწვავე დებატები და შემდეგ უკვე გამოჩნდება, კენჭისყრის შემდეგ რა იქნება საბოლოო შედეგი“, – განაცხადა თეა წულუკიანმა.

ევროსაბჭოს საპარლამენტო ასამბლეის მონიტორინგის კომიტეტმა საქართველოსთან დაკავშირებით პროექტი დღეს გამოაქვეყნა.

6-მილიარდიანი ინვესტიცია ძალიან ძლიერი სიგნალი იქნება სხვადასხვა ინვესტორისთვის და ველოდებით, რომ ძალიან სწრაფად ვიხილავთ მნიშვნელოვან გადაწყვეტილებებს უკვე სხვადასხვა დარგში, – განაცხადა პირველმა ვიცე-სპიკერმა, ეკონომიკის მინისტრმა ლევან დავითაშვილმა

მანვე აღნიშნა, რომ საამიროებში ვიზიტის ფარგლებში უკვე გამოითქვა ინტერესები ენერგეტიკული, ლოგისტიკური, სატრანსპორტო და სხვა სექტორებში ინვესტიციაზეც.

„ეს კომპანია არის ყველაზე ცნობით, რაც კი არსებობს სპარსეთის ყურეში. კომპანია ფლობს „ბურჯ-ხალიფას“, ეს არის ყველაზე დიდი ღირსშესანიშნაობა დუბაიში. არ მეგულება ადამიანი, ვისთვისაც ეს ცნობილი არ არის. რა თქმა უნდა, საამიროებში მას გამორჩეული ცნობადობა გააჩნია, საემიროების გარდა მთლიანად სპარსეთის ყურის ქვეყნებში. ასე, რომ ეს იქნება ძალიან დადებითი სიგნალი ზოგადად ამ რეგიონიდან ინვესტორებისთვის და ველოდებით ინვესტიციების ზრდას.

გეტყვით, რომ ვიზიტის ფარგლებში უკვე შევეხეთ სხვადასხვა სექტორს. ეს იყო ენერგეტიკული, ლოგისტიკური, სატრანსპორტო და ა.შ. სადაც, ასევე დიდია დაინტერესება საამიროებიდან საქართველოში ინვესტიციების განხორციელებაზე. ეს არის მხოლოდ დასაწყისი.

უდავოდ, ეს ინვესტიცია ძალიან ძლიერი სიგნალი იქნება სხვადასხვა ინვესტორისთვის და ველოდებით, რომ ძალიან სწრაფად ვიხილავთ მნიშვნელოვან გადაწყვეტილებებს უკვე სხვადასხვა დარგში. როგორც არაბთა გაერთიანებული საამიროებიდან ისე, ზოგადად, სპარსეთის ყურის ქვეყნებიდან. ჩვენთვის რა თქმა უნდა, ეს ერთ-ერთი ყველაზე უფრო პრიორიტეტული საინვესტიციო ბაზარია“,- აღნიშნა დავითაშვილმა.

საქართველოს ისტორიაში უმსხვილესი ინვესტიცია – დეველოპერული კომპანია Emaar Properties/Eagle Hills-ი საქართველოში 6 მილიარდი აშშ დოლარის მოცულობის ინვესტიციას განახორციელებს, – თანამშრომლობის მემორანდუმი კომპანიასა და ქართულ მხარეს შორის აბუ-დაბიში საქართველოს პრემიერ-მინისტრ ირაკლი კობახიძის ვიზიტის ფარგლებში გაფორმდა.

თვითორგანიზებული პროტესტიაო; ნაცები რა შუაშია, ჩვენც გვეზიზღებიანო; ამასობაში დეკანოიძე „ტოპ კონტრიბუტორი” გამხდარა ამ ნაცთმოძულე ჯგუფში,- წერს „ქართული ოცნების“ აღმასრულებელი მდივანი, საპარლამენტო უმრავლესობის ლიდერი მამუკა მდინარაძე სოციალურ ქსელში.

„თვითორგანიზებული პროტესტიაო; ნაცები რა შუაშია, ჩვენც გვეზიზღებიანო;
ამასობაში დეკანოიძე „ტოპ კონტრიბუტორი” გამხდარა ამ ნაცთმოძულე ჯგუფში
მაგრამ შეიძლება სხვა სახელით და გვარით იყო აქამდე, ასპროცენტიანი გამოაგდებენ“,- წერს მდინარაძე.

თუ ევროპაში ოდნავი გულწრფელობა მაინც არის საქართველოსთან და ზოგადად, ქართულ პოლიტიკასთან დაკავშირებით, მაშინ ცალსახად უნდა აღიარონ საქართველოს დელეგაციის უფლებამოსილება ევროსაბჭოს საპარლამენტო ასამბლეაში,- განაცხადა რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა ირაკლი ქადაგიშვილმა

მანევე აღნიშნა, რომ საქართველოში მიმდინარე მოვლენების საბაბად მოყვანა კიდევ ერთხელ დაგვანახებს, ევროკავშირისგან არაკეთილსინდისიერ დამოკიდებულებას თვითონ ევროკავშირის პოლიტიკის განხორციელების კუთხით.

„ევროპას აქვს გადასაწყვეტი, მას რეალურად სურს საქართველოსთან, როგორც სახელმწიფოსთან ურთიერთობის შემდგომი გაღრმავება, გაგრძელება თუ თვითონ ევროპას არ აქვს დანახული გაფართოების გზა და ხედვა. ამიტომ შეეცდებიან, რომ რამენაირად ისეთი გადაწყვეტილებები მიიღონ, რომელიც შენიღბავს მათ ამ მოუმზადებლობას და გადააბრალონ ეს ყველაფერი ქართულ მხარეს. თუ მათში ოდნავი გულწრფელობა მაინც არის საქართველოსთან და ზოგადად, ქართულ პოლიტიკასთან დაკავშირებით, მაშინ ცალსახად უნდა აღიარონ საქართველოს დელეგაციის უფლებამოსილება ევროსაბჭოს საპარლამენტო ასამბლეაში.

საქართველოში მიმდინარე მოვლენების საბაბად მოყვანა და ამ თემის ხელზე დახვევა, კიდევ ერთხელ დაგვანახებს, რომ არ გვაქვს საქმე ევროკავშირისგან კეთილსინდისიერ დამოკიდებულებასთან თვითონ ევროკავშირის პოლიტიკის განხორციელების კუთხით. აქ არავითარ შემთხვევაში არ უნდა დავინახოთ საქართველოს ბრალეულობა, რადგან, საბაბის მოძებნა ნებისმიერი ქვეყნისათვის ყოველთვის შესაძლებელია“,- აღნიშნა ქადაგიშვილმა.

27-31 იანვარს, საფრანგეთის რესპუბლიკის ქალაქ სტრასბურგში ევროპის საბჭოს საპარლამენტო ასამბლეის პირველი ზამთრის სესია მიმდინარეობს.

აღნიშნულ ღონისძიებაში მონაწილეობას იღებს საქართველოს პარლამენტის მუდმივმოქმედი დელეგაცია პარლამენტის ვიცე-სპიკერის, თეა წულუკიანის ხელმძღვანელობით.

„მნიშვნელოვანია ჩვენმა საზოგადოებამ იცოდეს, რომ ამ ორმა მონიტორმა, მომხსენებელმა საქართველოდან ჩამოიტანა ამბავი, რომ „ქართული ოცნების“ ხელისუფლება მას ბოლომდე ეთანამშრომლა. ამ ნაწილში მაღალი დონის პატიოსნება გამოიჩინეს და თქვეს სიმართლე, მათ დღეს ეს ყველა ფორმატში აღნიშნეს და არიან კმაყოფილნი, რომ ყველასთან და ყველგან დაშვება ჰქონდათ. ამიტომ, მე დიდი მადლობა მინდა გადავუხადო პარლამენტს, მთავრობას, სხვადასხვა სამინისტროსა და საქვეუწყებო დაწესებულებას, ვინც ჩვენთან ერთად მუშაობდა ამ ვიზიტის სწორად ორგანიზებაზე. ეს ძალიან მნიშვნელოვანი იყო, რომ მომხსენებლებმა თქვეს, „ქართული ოცნების“ ხელისუფლება ყველაფერს აკეთებს, რათა მონიტორინგის კომისიას შეუქმნას მუშაობის კარგი პირობებიო. ეს რომ სხვანაირად ეთქვათ, რა თქმა უნდა, ჩვენი საქმე იქნებოდა უფრო რთულად.

რაც შეეხება დანარჩენს, მათ თავიანთ პოლიტიკურ მოკავშირეებს გარკვეული კოჭები უგორეს, სალაპარაკო ენაზე რომ ვთქვა და უფრო ნაკლებად გამოიყენეს ის მტკიცებულებები, რაც ჩვენმა ძალოვანმა სტრუქტურებმა მათ მიაწოდეს, რის გამოც მე მქონდა საპასუხო პოზიცია დახურულ სხდომაზე. მინდა ჩვენ თითოეულ პოლიციელს ვუთხრა, რომ მე თითოეული თქვენგანის დაზიანების ფოტო-ილუსტრაცია გავაცანი ევროპელ დეპუტატებს, ვაჩვენე ყველა ის მტკიცებულება, რომელიც ძალოვან სტრუქტურებზე თავდასხმას და მათი უფლებების ხელყოფას თვალსაჩინოს ხდიდა და ამ მხრივ, ეს რაღაცნაირად გამოვასწორეთ, მაგრამ მომხსენებლებმა ეს მორიდებულად ახსენეს, სამწუხაროდ, მხოლოდ თავიანთ მოხსენებაში. უფრო მეტი დრო დაუთმეს იმას, რომ დემონსტრანტები არიან დაზიანებულები, რაც, რა თქმა უნდა, ასეა, მაგრამ სამართლიანობას უნდა ჰქონდეს თავისი ფასი“, – აღნიშნა თეა წულუკიანმა.

27-31 იანვარს, საფრანგეთის რესპუბლიკის ქალაქ სტრასბურგში ევროპის საბჭოს საპარლამენტო ასამბლეის პირველი ზამთრის სესია მიმდინარეობს.

USAID-თან დაკავშირებით ვისურვებდი, რომ არა მხოლოდ დაფინანსების მხრივ იყოს გადახედვა, არამედ გამოძიებულ იქნას საქართველოში USAID-ის წარმომადგენლობის როლი 2020 წელს პარალელური დათვლის ყალბი შედეგების გავრცელებაში, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

როგორც პარლამენტის თავმჯდომარემ გააცხადა ისინი მზად არიან, ამერიკის შესაბამის დაწესებულებებთან ითანამშრომლონ.

„იცით, რომ USAID-ის ადგილობრივი ოფისი ჩართული იყო 2020 წლის პარალელური დათვლის ყალბი შედეგების გავრცელებაში. პირდაპირ მათი მონაწილეობა იყო ამ ყველაფერში. ვისურვებდი, არა მხოლოდ დაფინანსების მხრივ იყოს გადახედვა, არამედ, გამოძიებულ იქნას USAID-ის მაშინდელი ხელმძღვანელობის ჩართულობა 2020 წლის პარალელური დათვლის გაყალბებული შედეგების გავრცელების სკანდალში, რომელმაც საზოგადოება არეულობამდე კინაღამ მიიყვანა. საერთო ჯამში, ესეც არის საფუძველი, რატომაც ხდება გადახედვა დაფინანსებისა. სასიამოვნოდ გამიკვირდა კიდეც, როცა ტრამპის აღმასრულებელ განკარგულებაში საფუძვლად აღებული იყო ის, რომ საერთაშორისო დახმარება, რიგ შემთხვევაში, ადგილზე გარკვეული, ასე ვთქვათ, არეულობის შეტანაში გამოიყენება, მათ შორის აზიანებს აშშ-ის ინტერესს. ეს არის ზუსტად ის მიდგომა, ხედვა, რომელიც ჩვენ გვაქვს გარკვეული ასეთი სახის ღონისძიებებთან თუ აქტივობებთან დაკავშირებით. არა მხოლოდ დაფინანსების საკითხი, ვისურვებდი, რომ გამოძიებულ იქნას საქართველოში USAID-ის წარმომადგენლობის როლი 2020 წელს პარალელური დათვლის ყალბი შედეგების გავრცელებაში. მათ შორის, მზად ვართ, ვითანამშრომლოთ ამერიკის შესაბამის დაწესებულებებთან, ვინაიდან პირადად მე და ჩვენ USAID-ის მაშინდელი ხელმძღვანელობა გვატყუებდა, თითქოს პარალელური დათვლის შედეგები იყო სწორი. შემდეგ აღმოჩნდა, რომ ზუსტად ამ ხელმძღვანელობამ, მათ შორის უცხოელმა ხელმძღვანელმა ზუსტად იცოდნენ, რომ ყალბი შედეგები იყო, რომელსაც ავრცელებდა „ისფედი“ და უბრალოდ, გვატყუებდნენ ხელისუფლებას, ქართველ ხალხს, ხელს აფარებდნენ „ისფედის“ მაშინდელ თანამშრომლებს“, – განაცხადა შალვა პაპუაშვილმა.

საქართველოს პარლამენტის თავმჯდომარე შალვა პაპუაშვილი უნგრეთის პრეზიდენტ ტამაშ შუიოკს შეხვდა.

შეხვედრაზე მხარეები მიესალმნენ პოზიტიურ დინამიკას საქართველო-უნგრეთის ურთიერთობებში.

უნგრეთის პრეზიდენტის თქმით, საქართველო უნგრეთისთვის სამხრეთ კავკასიის რეგიონში მნიშვნელოვანი სტრატეგიული პარტნიორია. მან აღნიშნა, რომ ორივე ქვეყანამ რთულ გეოპოლიტიკურ ვითარებაში შეძლო ეროვნული იდენტობის, კულტურისა და ენის შენარჩუნება და ხაზი გაუსვა საქართველოსა და უნგრეთს შორის ძლიერ ისტორიულ და რელიგიურ კავშირებს, რაც ხელს უწყობს ერებს შორის ურთიერთგაგებას.

მხარეებმა მიმოიხილეს საქართველო-უნგრეთის ურთიერთობები ვაჭრობისა და ეკონომიკის, ენერგეტიკის, განათლების, კულტურისა და ტურიზმის მიმართულებებით. შალვა პაპუაშვილმა ხაზი გაუსვა ნაყოფიერ საპარლამენტო თანამშრომლობას.

საუბარი, აგრეთვე, შეეხო საქართველოს გეგმებს ევროკავშირში გაწევრიანების გზაზე. შალვა პაპუაშვილმა განაცხადა, რომ 2030 წლისთვის საქართველო მზად იქნება ევროკავშირის წევრობისთვის.

უნგრეთის პრეზიდენტმა საქართველოს ტერიტორიული მთლიანობისადმი და ევროპული მომავლისადმი მტკიცე მხარდაჭერა გამოხატა.

შეხვედრა შედგა შალვა პაპუაშვილისა და მისი თანმხლები საპარლამენტო დელეგაციის უნგრეთში განხორციელებული ოფიციალური ვიზიტის ფარგლებში. თანმხლები დელეგაციის წევრები არიან: პარლამენტის საგარეო საქმეთა კომიტეტის თავმჯდომარე ნიკოლოზ სამხარაძე, ევროპასთან ინტეგრაციის კომიტეტის თავმჯდომარე ლევან მახაშვილი, დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველი მოადგილე ირაკლი მეზურნიშვილი და “ქართული ოცნების” ფრაქციის თავმჯდომარის მოადგილე გენრიეტა წიწავა.

ინფორმაციას საქართველოს პარლამენტის პრესსამსახური ავრცელებს.