ევროპარლამენტშიც, ევროსაბჭოს საპარლამენტო ასამბლეაშიც, ევროპის დედაქალაქებშიც – ყველამ ყველაფერი იცის, თუ რა ხდება საქართველოში: ყველამ იცის, რომ საქართველოში არჩევნები არ გაყალბებულა; რომ მათმა ფავორიტმა პოლიტიკურმა ძალამ – კოლექტიურმა ნაცმოძრაობამ – არჩევნები სამარცხვინოდ წააგო, მაგრამ მაინც ისეთ განცხადებებს აკეთებენ და ისეთ გადაწყვეტილებებს იღებენ, რაც მათ პოლიტიკურ დღის წესრიგს აწყობს, – განაცხადა მედიასთან „ხალხის ძალის“ თავმჯდომარემ და პარლამენტის ვიცე-სპიკერმა სოზარ სუბარმა.

„ბევრი ჩვენი მხარდამჭერი ხშირად გვეუბნება, რომ უფრო მეტი უნდა ვიმუშაოთ უცხოეთში, უფრო მეტად უნდა გავაგებინოთ დასავლელ პოლიტიკოსებს, რომ რასაც კოლექტიური ნაცმოძრაობისა თუ ენჯეოების წარმომადგენლები ეუბნებიან, ეს არის ტყუილი. სინამდვილეში, ყველაფერი პირიქითაა – „ნაცმოძრაობას“ და ენჯეოებს კი არ ჩაჰქონდათ და ჩააქვთ საზღვარგარეთ რაიმე ამბავი, არამედ, პირიქით, იქიდან იღებდნენ და იღებენ დავალებებს და იმას ასრულებენ. ეს კი იმიტომ ხდება, რომ დღეს საქართველოში უცხოური აგენტურა კი არაა ხელისუფლებაში, არამედ ის ძალა, რომლისთვისაც სამშობლო და სუვერენიტეტი ყველაფერზე მაღლა დგას, რაც არ მოსწონს იმ ძალებს, რომლებიც ყველა ქვეყანაში იბრძვიან სუვერენიტეტის წინააღმდეგ.

ამის ნათელი მაგალითია, რაც ამ დღეებში ევროსაბჭოს საპარლამენტო ასამბლეაში ხდება: რა თქმა უნდა, ჩვენი დელეგაცია თეა წულუკიანის ხელმძღვანელობით ყველაფერს აკეთებს, რომ ჩვენი სიმართლე დაამტკიცოს, მაგრამ, სამწუხაროდ, ეს იქ არავის აინტერესებს. სინამდვილეში ასამბლეაში ყველამ ძალიან კარგად იცის, რომ ჩვენს ქვეყანაში არჩევნები არ გაყალბებულა; რომ ადამიანები, რომლებიც პოლიციელებს ესროდნენ და 150-ამდე პოლიციელს ძალიან მძიმე დაზიანებები მიაყენეს, კრიმინალები არიან და არა – მშვიდობიანი მანიფესტანტები; რომ გამორიცხულია საქართველოში სასამართლომ პოლიტიკური გადაწყვეტილებები მიიღოს, რაც არაერთხელ დაადასტურა ადამიანის უფლებათა ევროპულმა სასამართლომ, მაგრამ, კიდევ ერთხელ – ისინი აკეთებენ ისეთ განცხადებებს და იღებენ ისეთ გადაწყვეტილებებს, როგორიც მათ პოლიტიკურ დღის წესრიგს აწყობს და არა ისეთს, რაც რეალობას ასახავს“, – აღნიშნა სოზარ სუბარმა.

„რადიო თავისუფლების“ ევროპის ბიუროს რედაქტორი რიკარდ იოზვიაკი სტატიას აქვეყნებს, სადაც ევროკავშირსა და საქართველოს შორის ბოლოდროინდელ ურთიერთობას განიხილავს.

„საქართველოსთან მიმართებით, ევროკავშირი დიპლომატიურად უკაცრიელ ადგილასაა“, – წერს იოზვიაკი.

როგორც რიკარდ იოზვიაკი აღნიშნავს, 26 ოქტომბრის საპარლამენტო არჩევნებიდან სამი თვის შემდეგ, ევროკავშირი და უფრო ნაკლებად, თუმცა ნატო-ც, ვერ წყვეტენ, როგორ წარმართონ ურთიერთობები საქართველოსთან.

„ყაველაშვილის პრეზიდენტობას ეჭვქვეშ აყენებს ქვეყნის ოპოზიცია, სალომე ზურაბიშვილი, რომელიც კვლავ აცხადებს პრეტენზიას პრეზიდენტობაზე ლეგიტიმური შემცვლელის არჩევამდე და საერთაშორისო საზოგადოების ნაწილი. ევროპარლამენტმა 2024 წლის ნოემბრის ბოლოს მიიღო რეზოლუცია, რომელიც მოითხოვს ახალ არჩევნებს და უარყოფს პარლამენტს, რომელმაც შემდგომში აირჩია ყაველაშვილი“, – აღნიშნულია რიკარდ იოზვიაკი სტატიაში.

სტატიაში წერია, რომ ევროკავშირის საბჭოში, რომელიც ბლოკის ყველაზე გავლენიანი ორგანოა, სიტუაცია არ არის მარტივი. საგარეო პოლიტიკის საკითხებზე, სადაც საჭიროა ყველა წევრის თანხმობა, ქვეყნები ორ ბანაკად არიან გაყოფილნი – უნგრეთი და სლოვაკეთი, რომლებმაც „ქართულ ოცნებას“ გამარჯვება მალევე მიულოცეს და მკაცრი პოზიციის მქონე ქვეყნები, როგორებიცაა ესტონეთი და ლიეტუვა.

როგორც იოზვიაკი სტატიაში აღნიშნავს, ევროკავშირის რამდენიმე ოფიციალურ პირთან საუბრისას გაირკვა, რომ მათ ურჩევნიათ ყაველაშვილის საკითხი გადადონ და ამ ეტაპზე საქართველოსთან საერთოდ არ ჰქონდეთ საქმე.

„როგორც ერთ-ერთმა მაღალჩინოსანმა აღნიშნა – „ამაზე არანაირი შეთანხმება არ არსებობს – ეს ევროკავშირის ჩვეული გაურკვევლობაა. არავის სურს რაიმეს თქმა, არავის სურს ამ საკითხს შეეხოს და მით უმეტეს, არავის სურს რაიმეს ქაღალდზე გადატანა“, – ციტირებს  რესპოდენტს იოზვიაკი.

„მეორე დიპლომატი, რომელთანაც ვისაუბრე, კიდევ უფრო პირდაპირი იყო: „ჩვენ ამ ეტაპზე არ ვდგამთ ნაბიჯებს, მაგრამ ადრე თუ გვიან მოგვიწევს ამ საკითხზე პასუხის გაცემა“, – წერს იოზვიაკი.

იოსვიაკის თქმით, საქართველოს ხელისუფლების მიმართ კრიტიკულად განწყობილი ქვეყნის წარმომადგენელი კი მომავლის პროგნოზირებისას პესიმისტურად იყო განწყობილი: „შეუძლებელია ერთსულოვნების მიღწევა ქართული ხელისუფლების არაღიარების პოლიტიკაზე. ჩვენ შევეცდებით ხაზის შენარჩუნებას – კონტაქტების შეზღუდვას პრეზიდენტთან და ახალ მთავრობასთან რამდენადაც ეს შესაძლებელია, თუმცა ვშიშობ, დროთა განმავლობაში ეს შეუძლებელი იქნება“.

ევროკავშირის მრავალი ოფიციალური პირი აღნიშნავს, რომ ამჟამად ბლოკი საქართველოსთან მხოლოდ ტექნიკურ დონეზე თანამშრომლობს სიტუაციის „დეპოლიტიზების“ მიზნით, თუმცა არავინ იცის, რამდენ ხანს გაგრძელდება ეს მდგომარეობა“, – წერს იოზვიაკი.

რიკარდ იოზვიაკი ევროკავშირის უმოქმედობის ორ მიზეზს გამოყოფს:

„პირველი ეს არის ეუთო/ოდირის სრული ანგარიში არჩევნების შესახებ, რომელიც 2024 წლის დეკემბერში გამოქვეყნდა, საკითხს ვერ აგვარებს. „ჩვენ ვერ ვამბობთ, რომ არჩევნები უკანონო ან არალეგიტიმური იყო. ჯერ კიდევ დარღვევებზე ვსაუბრობთ და ამ წერტილს ვერ გავცდით“, – განაცხადა ევროკავშირის ერთ-ერთმა ოფიციალურმა პირმა.

მეორე მიზეზი არის ის, რომ ევროკავშირს ბევრი სხვა საკითხი აქვს მოსაგვარებელი. 27 იანვარს ბრიუსელში საგარეო საქმეთა მინისტრების პირველ შეხვედრაზე განიხილეს უკრაინა, ახლო აღმოსავლეთის სიტუაცია და ახალ ამერიკულ ადმინისტრაციასთან ურთიერთობა. საქართველოს საკითხი მხოლოდ შეხვედრის ბოლოს, „მიმდინარე საკითხებში“ განიხილეს“, – წერს იოზვიაკი.

რაც შეეხება ნატო-ს, როგორც რიკარდ იოზვიაკი წერს, აქ სიტუაცია უფრო მარტივია.

„ალიანსის ერთ-ერთი მოხელე, რომელმაც ანონიმურობის დაცვა ითხოვა, აცხადებს: „მოკლე პასუხია – დიახ, ჩვენ ყაველაშვილს საქართველოს პრეზიდენტად ვაღიარებთ, თუმცა სიტუაცია რთულია. ოფიციალურად ბევრს არაფერს ვამბობთ, მაგრამ თუ საჭირო გახდება მისი მოწვევა რომელიმე ღონისძიებაზე, მოვიწვევთ. თუმცა, წელს ნატო-ს მინისტერიალებზე, ივნისში ჰააგის სამიტზე არც ქართველი მინისტრები იქნებიან მოწვეული და არც ქართველი ლიდერები“, – წერია სტატიაში.

საქართველოს მთავრობას მოვუწოდებთ, მიიღოს კონკრეტული ზომები შემდგომი ძალადობის პრევენციისთვის და გამოიძიოს სამართალდამცველების მხრიდან ძალის გადამეტების, წამებისა და არასათანადო მოპყრობის, ასევე, მშვიდობიანი დემონსტრანტებისა და მედიის წარმომადგენლების თვითნებური დაკავების ფაქტები, რომლებიც 2024 წლის ნოემბერ-დეკემბერში გამართული საპროტესტო აქციების დროს დაფიქსირდა, – ამის შესახებ აღნიშნულია გაერო-ს ადამიანის უფლებების საკითხებში უმაღლესი კომისრის ოფისის მიერ გავრცელებულ განცხადებაში, რომელიც, მათივე ინფორმაციით, ადამიანის უფლებების საკითხებში დამოუკიდებელი ექსპერტების მიერაა მომზადებული.

„ჩვენ მივიღეთ ინფორმაცია საქართველოში სამართალდამცავი ორგანოების წარმომადგენლების, ასევე სხვა პირების მხრიდან, რომლებსაც არ ეცვათ ფორმა და არ ჰქონდათ მაიდენტიფიცირებელი ნიშნები, მშვიდობიანი დემონსტრანტების, უფლებადამცველებისა და ჟურნალისტების მიმართ განზრახ ფიზიკური ძალადობის, მუქარის, დაშინებისა და შურისძიების შესახებ“, – აღნიშნავენ გაერო-ს ექსპერტები.

გაერო-ს ექსპერტები აცხადებენ, რომ ბრალდებების მასშტაბები და ზიანის სიმძიმე, რომელიც, გავრცელებული ინფორმაციით, მიაყენეს მომიტინგეებს და, მოგვიანებით, დაკავებულებს, შეიძლება კვალიფიცირდეს, როგორც წამება და სხვა სასტიკი, არაადამიანური ან დამამცირებელი მოპყრობა ან დასჯა.

განცხადებაში აღნიშნულია, რომ, ცნობების მიხედვით, პოლიცია დემონსტრანტების წინააღმდეგ განურჩევლად იყენებდა რეზინის ტყვიებს, წყლის ჭავლს, წიწაკის გაზს და სხვა ქიმიურ საშუალებებს, ასევე, ასობით ადამიანი დაშავდა, უჩვეულოდ მაღალმა პროცენტმა კი თავისა და სახის სერიოზული დაზიანებები მიიღო.

„ჩვენ მივიღეთ შემაშფოთებელი ინფორმაცია, რომ ბევრ დაკავებულს მიაყენეს სიტყვიერი შეურაცხყოფა, ხანგრძლივად და განმეორებით სცემეს, გაუპატიურებით ან სხეულის ნაწილების დაზიანებით დაემუქრნენ და მათ უარი ეთქვათ სამედიცინო დახმარებაზე“, – აღნიშნულია ექსპერტების განცხადებაში.

განცხადებაში ასევე ნათქვამია, რომ საქართველოს სპეციალურმა საგამოძიებო სამსახურმა დაიწყო ბოლო თვეების განმავლობაში მომხდარი მოვლენების გამოძიება.

„დღემდე ამ გამოძიებას არ ჰქონია რაიმე შედეგი, მაშინ როცა მრავალი დემონსტრანტი კვლავ პატიმრობაში რჩება“, – აცხადებენ გაერო-ს ექსპერტები.

მათივე განმარტებით, „ამ მოვლენების სიმძიმის გათვალისწინებით, საქართველოს ოფიციალური პირებისგან ელოდებიან საერთაშორისო სტანდარტების შესაბამისად დამოუკიდებელი, მიუკერძოებელი, გამჭვირვალე და ეფექტური გამოძიების დაწყებას“.

„ყველა თვითნებურად დაკავებული პირი უნდა გათავისუფლდეს და ვისაც სამედიცინო დახმარება სჭირდება, უნდა გაეწიოს“, – აცხადებენ გაერო-ს ექსპერტები.

ექსპერტები ასევე ამბობენ, რომ უსაფრთხოების ძალების მიერ ძალის ნებისმიერი გამოყენება უნდა შეესაბამებოდეს კანონიერების, აუცილებლობის, პროპორციულობის, სიფრთხილისა და არადისკრიმინაციულობის პრინციპებს და მკაცრად უნდა რეგულირდებოდეს მოქმედი საერთაშორისო სტანდარტების შესაბამისად.

ამასთან, გაერო-ს ადამიანის უფლებების საკითხებში უმაღლესი კომისრის ოფისის ინფორმაციით, ექსპერტებმა წერილობით მიმართეს საქართველოს მთავრობას ამ საკითხთან დაკავშირებით და განაგრძობენ ვითარების მჭიდრო მონიტორინგს.