ეს რეზოლუცია მიანიშნებს იმაზე, თუ რა მძიმე მდგომარეობაა ევროპულ ბიუროკრატიაში. პირდაპირ ტყუილები იწერება ამხელა ქვეყნის პარლამენტის რეზოლუციის პროექტში, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს საფრანგეთის პარლამენტის მიერ მიღებულ რეზოლუციასთან დაკავშირებით განუცხადა.

მთავრობის მეთაურს დაუსვეს კითხვა საფრანგეთის სენატის მიერ განხილული რეზოლუციის შესახებ, რომ ყოფილი პრეზიდენტი მიხეილ სააკაშვილი კვლავ მძიმე და შეუფერებელ პირობებში რჩება, რასაც საერთაშორისო ორგანიზაციები გმობენ, რაზეც ირაკლი კობახიძემ უპასუხა, რომ ტრაგიკული მოვლენაა, რაც ხდება ევროპულ ბიუროკრატიაში.

„ეს რეზოლუცია მიანიშნებს იმაზე, თუ რა მძიმე მდგომარეობაა ევროპულ ბიუროკრატიაში. პირდაპირ ტყუილები იწერება ამხელა ქვეყნის პარლამენტის რეზოლუციის პროექტში. ტრაგიკული მოვლენაა, რასაც ვხედავთ ჩვენ ევროპულ ბიუროკრატიაში. იმედი მაქვს, ეს მდგომარეობა შეიცვლება “, – განაცხადა პრემიერმა.

საფრანგეთის სენატის მიერ განხილული რეზოლუცია იმის შესახებ, ყოფილი პრეზიდენტი მიხეილ სააკაშვილი კვლავ მძიმე და შეუფერებელ პირობებში რჩება, რასაც საერთაშორისო ორგანიზაციები გმობენ.

საფრანგეთის ეროვნულ ასამბლეაში საქართველოში მიმდინარე მოვლენებთან დაკავშირებით რეზოლუციის წინადადება დარეგისტრირდა.

დოკუმენტში აღნიშნულია, რომ რეზოლუცია მიზნად ისახავს „საქართველოს მთავრობის არალიბერალური და ავტორიტარული მიმართულების დაგმობას და საქართველოს ევროპული მომავლისადმი მხარდაჭერის დადასტურებას“.

რეზოლუცია ექვსმა ფრანგმა დეპუტატმა დაარეგისტრირა – კონსტანს ლე გრიპმა, ლორან მაზორიმ, ფრედერიკ პეტიმ, იზაბელ რაუხმა, ლილიანა ტანგიმ და ბენუა ბიტომ.

„ჯერ კიდევ 2024 წლის ზაფხულში ევროპულმა ინსტიტუტებმა გამოთქვეს შეშფოთება: ევროპულმა საბჭომ ივნისში გასცა მოწოდება თავისუფალი და სამართლიანი არჩევნების ჩატარებისკენ, დაგმო ოპონენტებსა და ჟურნალისტებზე განხორციელებული ზეწოლა. 2024 წლის 26 ოქტომბრის არჩევნებმა, რომელიც უსამართლო პირობებში ჩატარდა, მხოლოდ დაადასტურა ეს გაფრთხილებები. დემოკრატიული ინსტიტუტებისა და ადამიანის უფლებათა ოფისის ანგარიშის თანახმად, რომელიც ევროპაში უშიშროებისა და თანამშრომლობის ორგანიზაციის მიერ შექმნილი ორგანოა, საარჩევნო კამპანია სახელმწიფო რესურსების ბოროტად გამოყენებით დაახასიათა, მედიაში მიკერძოებული გაშუქებით და ამომრჩევლებზე ზეწოლით“, – ნათქვამია დოკუმენტში.

რეზოლუციაში აღნიშნულია, რომ 2024 წლის დეკემბერში ევროკავშირის საგარეო საქმეთა მინისტრებმა გააკრიტიკეს საქართველოში დემოკრატიის გაუარესება და მშვიდობიანი საპროტესტო აქციების ჩახშობა.

დოკუმენტის თანახმად, ამ პოზიციას მხარი დაუჭირა „ვაიმარის სამკუთხედმა“, შემდეგ კი ევროპელებმა განაცხადეს, რომ რეპრესიული პოლიტიკა და დემოკრატიული უკუსვლა გამოიწვევდა ევროპული ურთიერთობების გაუარესებას, რაც პრაქტიკაშიც გამოიხატა დიპლომატიური პასპორტების მფლობელთათვის უვიზო რეჟიმის შეწყვეტაში.

რეზოლუციაში საუბარია საქართველოს ყოფილ პრეზიდენტზე მიხეილ სააკაშვილზე.

„ყოფილი პრეზიდენტი მიხეილ სააკაშვილი კვლავ საშინელ პირობებში რჩება პატიმრობაში, რასაც საერთაშორისო ორგანიზაციები გმობენ. რამდენიმე ოპოზიციონერი, მათ შორის ნიკა მელია და ზურაბ ჯაფარიძე, სადავო სამართალწარმოების შედეგად სისხლის სამართლის პასუხისგება ეკისრებათ ან დაკავებულები არიან. ათობით მშვიდობიანი მომიტინგე, მათ შორის ბევრი სტუდენტი, უკანონოდ დააკავეს, მიუსაჯეს ადმინისტრაციული პატიმრობა ან ჯარიმა“, – აღნიშნულია რეზოლუციაში.

დოკუმენტის თანახმად, საქართველოში მიმდინარე პროცესები ვერ განიხილება რეგიონული გეოპოლიტიკური კონტექსტისგან განცალკევებულად, რადგან მოსკოვი მზარდ იდეოლოგიურ და სტრატეგიულ ზეგავლენას ახორციელებს პოლიტიკური, ეკონომიკური და მედია არხების მეშვეობით.

„ეს ზეგავლენა განსაკუთრებით კარგად ჩანს ბიძინა ივანიშვილის, მმართველი პარტიის, „ქართული ოცნების“ დამფუძნებლისა და პრორუსი ოლიგარქის როლში, რომლის ჩარევა პოლიტიკურ, ეკონომიკურ და სასამართლო საქმეებში ევროპარლამენტმა მიიჩნია დემოკრატიული განვითარების მთავარ ბარიერად. პარალელურად, ხელისუფლება ახორციელებს ისტორიისა და ეროვნული რიტორიკის მანიპულირებას: მიუხედავად იმისა, რომ ადამიანის უფლებათა ევროპულმა სასამართლომ 2021 წელს დაადგინა რუსეთის პასუხისმგებლობა 2008 წლის აგრესიისთვის და დაადასტურა „მშვიდობიანი მოქალაქეების მკვლელობის, თვითნებური დაკავებისა და წამების აქტების“ ფაქტები, 2025 წლის სექტემბერში „ქართული ოცნების“ არჩეული წარმომადგენლებისგან შემდგარმა საპარლამენტო კომიტეტმა კონფლიქტის წარმოშობაში დაადანაშაულა ყოფილი პრეზიდენტის, სააკაშვილის პარტიის, „ერთიანი ნაციონალური მოძრაობის“ ადმინისტრაცია, რომელიც მთავარ ოპოზიციურ პარტიად იქცა, რითაც გაიმეორა კრემლის რიტორიკა და ოპოზიციის დელეგიტიმაცია მოახდინა“, – აღნიშნულია დოკუმენტში.

რეზოლუციაში ასევე საუბარია 2025 წლის საპროტესტო აქციებზე.

„ანტისამთავრობო აქციებში მონაწილეობისთვის 20 მომიტინგეს თავისუფლების აღკვეთა მიუსაჯეს, მათ შორის აქტივისტ საბა სხვიტარიძეს და მსახიობ ანდრო ჭიჭინაძეს. მრავალი ჩვენების თანახმად, ეს სასამართლო პროცესები ადამიანის უფლებების სერიოზული დარღვევებით იყო დატვირთული“, – ნათქვამია დოკუმენტში.

რეზოლუცია მოუწოდებს საფრანგეთის მთავრობას, „აქტიურად დაუჭიროს მხარი საქართველოში დემოკრატიულად მოქმედ პირებს, მათ შორის არასამთავრობო ორგანიზაციებს, დამოუკიდებელ მედიას და აკადემიურ ინსტიტუტებს. საჯაროდ დგმოს გარე ჩარევა, კერძოდ, რუსული რეჟიმის მიერ საქართველოს პოლიტიკურ ინსტიტუტებზე და ოლიგარქ ბიძინა ივანიშვილზე განხორციელებული ზეგავლენა“.

რეზოლუცია მოუწოდებს საფრანგეთის მთავრობას, რომ ევროპელი პარტნიორებთან კოორდინაციით მხარი დაუჭიროს „მიზნობრივი ინდივიდუალური სანქციების დაწესებას ევროპარლამენტის 2025 წლის 13 თებერვლის რეზოლუციაში მოხსენიებული პირების წინააღმდეგ, კერძოდ ბიძინა ივანიშვილისა და მისი ახლო მოკავშირეების წინააღმდეგ. შეისწავლოს პირობები, რომლის საფუძველზეც ბიძინა ივანიშვილს მიენიჭა ლეგიონის ორდენი და განიხილოს ამ ორდენის ჩამორთმევა, მისი ქმედებების გათვალისწინებით, რომლებიც ეწინააღმდეგება რესპუბლიკის მიერ დაცულ ღირებულებებს. მოარგოს თავისი დახმარების მექანიზმები საქართველოს სამოქალაქო საზოგადოებისთვის“.

საპარლამენტო უმრავლესობამ და „ქართულმა ოცნებამ“ მიიღო გადაწყვეტილება, საგამოძიებო კომისიის დასკვნა გახდეს საფუძველი საკონსტიტუციო სასამართლოში შესაბამისი სამართლებრივი პროცედურების წამოწყებისა, რომლის მიზანიც იქნება „ნაციონალური მოძრაობის“ და მისი წევრების პოლიტიკური საქმიანობის აკრძალვა, – განაცხადა საპარლამენტო უმრავლესობის წევრმა, დროებითი საგამოძიებო კომისიის თავმჯდომარე, თეა წულუკიანმა საქართველოს პირველი არხის ეთერში.

„ჩვენ ძალიან ინტენსიურად ვიმუშავეთ. იცით, რომ კომისიას დასჭირდა და პარლამენტის თანხმობით გამოვიყენეთ ის მაქსიმალური ვადა, ექვსი თვე, რასაც კანონი ითვალისწინებს. უფრო მეტი დრო მუშაობისთვის არ გვქონდა, რადგან კანონი ამგვარი გაგრძელების შესაძლებლობას არ იცნობს. დოკუმენტი ბევრმა ნახა, უმრავლესობამ შორიდან, რადგან ახლა კორექტურა კეთდება და დაიბეჭდება წიგნის სახით ოქტომბრის ბოლომდე. ეს დოკუმენტი ყველას გაქვთ ნანახი, რადგან ელექტრონულად ხელმისაწვდომია. ეს არის 500-მდე გვერდი და რამდენიმე ათასი გვერდისგან შემდგარი დანართები. აღარ ჩამოვთვლი მოცულობებს, რასაც შეადგენს დასკვნის დანართების სახით აუდიო და ვიდეომასალა, რომელიც შეიძლება, წლები გავიდეს და გაქრეს. ამიტომ, მათ შორის თქვენს არხთან დიდი და აქტიური თანამშრომლობის შედეგად, შევქმნით ამ დასკვნის შესაბამისი დოკუმენტური აუდიო და ვიდეოარქივი. მადლობა თქვენ ამისთვის. დოკუმენტში, რომელიც სექტემბრის პირველ კვირაში პარლამენტმა შესაბამისი დადგენილებით დაამტკიცა, რამდენიმე მნიშვნელოვანი რამ დავადასტურეთ.

ეს არ არის უბრალოდ ტექსტი, სადაც მოთხრობილია სხვადასხვა ამბავი და ტრაგედიები, რომელიც სააკაშვილის რეჟიმმა ჩვენი მოქალაქეების და ქვეყნის თავს დაატრიალა. აქ არის მოცემული მტკიცებულებები და ფაქტები. კერძოდ, ამ დასკვნით დასტურდება, რომ ძალას, რომელიც 9 წელი მართავდა ჩვენს ქვეყანას და დღეს ოპოზიციაშია, არ აქვს თავის თავში რესურსი, შეიცვალოს. არც ნება აქვს ამის, არც უნარი. შესაბამისად, ეს ერთი და იგივე ძალაა, რომელიც ხელისუფლებაში დაბრუნების შემთხვევაში, გვიქადის, სულ მცირე, იმავეს, რაც აკეთეს 9 წლის განმავლობაში, სავარაუდოდ უარესსაც კი.

სწორედ ამიტომ, საპარლამენტო უმრავლესობამ და „ქართულმა ოცნებამ“, როგორც პარტიამ, მიიღო გადაწყვეტილება, ეს დასკვნა გახდეს საფუძველი საკონსტიტუციო სასამართლოში შესაბამისი სამართლებრივი პროცედურების წამოწყებისა, რომლის მიზანიც იქნება „ნაციონალური მოძრაობის“ და მისი წევრების პოლიტიკური საქმიანობის აკრძალვა. ეს არის მიზანი, ვინაიდან, მიგვაჩნია, რომ ამის გარეშე ქვეყანას არ უწერია განვითარების პერსპექტივა. „ქართული ოცნება“ მუდმივად ვერ იქნება ხელისუფლებაში და ჩვენი ვალი, ჩვენი გასაკეთებელი საქმე და მისიაა, რომ ხელისუფლებიდან წასვლა როცა მოგვიწევს, არა 5 ოქტომბერს და დამხობის გზით, არამედ არჩევნების გზით, ამისი დრო დადგება ოდესღაც, მორიგი არჩევნების დროს, გამორიცხული გვქონდეს იმ დროისთვის შანსი და რისკი, რომ დასკვნაში აღწერილი ფაქტების ჩამდენი პირები დაბრუნდნენ ხელისუფლებაში“, – აღნიშნა თეა წულუკიანმა.

სახალხო დამცველი ეხმიანება არასრულწლოვანის შესახებ მედიაში გავრცელებულ გადაუმოწმებელ, მაიდენტიფიცირებელ ინფორმაციას და ხაზგასმით აღნიშნავს, რომ არასრულწლოვანთა თაობაზე ინფორმაციის გავრცელება მოითხოვს განსაკუთრებულ სიფრთხილესა და პასუხისმგებლობას, რათა არ შეილახოს არასრულწლოვანის პირადი ცხოვრება, ღირსება და იგი არ გახდეს საზოგადოებრივი გაკიცხვის ობიექტი, – ამის შესახებ ნათქვამია სახალხო დამცველი განცხადებაში.

„სახალხო დამცველი მოუწოდებს მედიასაშუალებებს ინფორმაციის გავრცელებისას იხელმძღვანელონ განსაკუთრებული წინდახედულობით, რათა არ მოხდეს არასრულწლოვანის პერსონალური ინფორმაციის გამჟღავნება, მისი იდენტიფიცირება და დაცული იყოს ბავშვის საუკეთესო ინტერესი ეროვნული და საერთაშორისო სტანდარტების შესაბამისად“, – ნათქვამია სახალხო დამცველი განცხადებაში.

შეგახსენებთ, „რუსთავი 2“-მა გაავრცელა ინფორმაცია, რომ ტელეწამყვან ნანუკა ჟორჟოლიანის შვილი, ს.კ. იარაღის უკანონო ტარებისთვის დააკავეს.

აღნიშნულთან დაკავშირებით განმარტება გააკეთა შსს-მ. უწყების ცნობით, ს.კ-ს ავტომობილი საპატრულო პოლიციის დეპარტამენტის თანამშრომლებმა გადამოწმების მიზნით დაათვალიერეს.

მედიაომბუდსმენის ინფორმაციით, „სტრასბურგის სასამართლომ წარმოებაში მიიღო ე.წ. „რუსული კანონის“ საქმეზე 19 ჟურნალისტისა და ოპერატორის საჩივარი“.

„26 სექტემბერს ადამიანის უფლებათა ევროპულმა სასამართლომ მედიაომბუდსმენს წერილობით აცნობა, რომ დაიწყო წარმოება ე.წ. “რუსული კანონის” საქმეზე. საქმე „კოკაია და სხვები საქართველოს წინააღმდეგ” დეტალურად აღწერს 2023 წლის მარტში, არაერთი კრიტიკული მედიის ჟურნალისტისა და ოპერატორის დევნას. ისინი სამიზნედ ე.წ. „რუსული კანონის” (კანონი „უცხოური გავლენის გამჭვირვალობის შესახებ”) წინააღმდეგ, მოქალაქეთა მასშტაბური საპროტესტო აქციების გაშუქების გამო იქცნენ. მედიის მუშაობაში ხელშეშლით ძალოვანები ცდილობდნენ არ გასაჯაროვებულიყო მშვიდობიან მოქალაქეთა დარბევის და ძალის გადამეტების შემთხვევები საქმის მასალებს თან ერთვის მედიაომბუდსმენის მიერ მომზადებული ვიდეორეპორტაჟი: https://youtu.be/yng9m7viumU?si=VxHRues9XSbew9bw მედიაომბუდსმენი აგრძელებს კრიტიკული მედიის სამართლებრივ დახმარებას. გვჯერა, ადამიანის უფლებათა ევროპული სასამართლოს შეფასებებს განსაკუთრებული გავლენა ექნება საქართველოში დემოკრატიული ღირებულებების გადასარჩენად“, – ნათქვამია განცხადებაში.

იხილეთ სრულად: