სებ-ი ივანიშვილის არაფორმალური მმართველობის ეკონომიკური განყოფილება გახდა – ზურაბიშვილს კანდიდატურები რომ არ წარედგინა, სებ-ის ფუნქციონირება ფაქტობრივად ჩერდებოდა, დაიწყებოდა კონსულტაციები და კონსენსუსის საფუძველზე შესაძლებელი იქნებოდა მეტ-ნაკლებად ჯანსაღი საბჭოს მიღება,- ამის შესახებ პარლამენტში, პოლიტიკური ჯგუფის „ევროოპტიმისტების“ თავმჯდომარემ რომან გოცირიძემ განაცხადა.

როგორც მან აღნიშნა, პრეზიდენტის არგუმენტი, რომ თურმე ყეინიშვილის და ხომერიკის კანდიდატურა საცდელად შემოაგდო, რომ ხელისუფლების მავნებლობა ეჩვენებინა, ძალიან არასერიოზულია, რადგან მან საფუძველი ჩაუყარა საბანკო სისტემაში „ქართული ოცნების“ გავლენების იურიდიულად დაკანონებას.

„ეროვნული ბანკის საბჭოში დღეს არის 6 წევრი, ერთს 2 თვეში ვადა გასდის, ამერიკის მოქალაქეა და რჩება 5 წევრი. ხუთივე სალომე ზურაბიშვილის წარდგენილია, ხუთივე – „ქართული ოცნების“ ყურმოჭრილი და მორჩილი ადამიანია. ეროვნული ბანკი ფაქტობრივად, გაუქმებულია, ივანიშვილის არაფორმალური მმართველობის ეკონომიკური განყოფილება გახდა ეროვნული ბანკი. თურნავამ 30 წლის განმავლობაში ეროვნული ბანკის ნაშენები ნდობა და რეპუტაცია 30 წამში ჩამოშალა. თუმცა, ეს თურნავას ხელით „ქართული ოცნების“ მიერ გაკეთდა. დღეს ქვეყანაში მნიშვნელოვანი ამოცანაა, რომ ეროვნული ბანკის დარჩენილი 4 წევრიდან მაინც შეირჩეს ეროვნული ბანკის პრეზიდენტი. ამ ხელისუფლების ამოცანაა, რომ სანამ სალომე ზურაბიშვილია პრეზიდენტი, დარჩეს მოვალეობის შემსრულებლად თურნავა. გარემოებათა გამო, როცა სამმა ვიცე- პრეზიდენტმა დატოვა თანამდებობა, ზურაბიშვილს ეს 2 კანდიდატურა რომ არ წარედგინა, ეროვნული ბანკის ფუნქციონირება ფაქტობრივად ჩერდებოდა და დაიწყებოდა მართლაც სერიოზული კონსულტაციები და კონსენსუსი საფუძველზე შესაძლებელი იქნებოდა მეტ-ნაკლებად ჯანსაღი ეროვნული ბანკის საბჭოს მიღება. ყველაფერი გააფუჭა სალომე ზურაბიშვილმა. ეგონა საკუთარი კანდიდატურები წარადგინა – ერთი ოდიოზური ქალბატონი მევენახეობა-მებოსტნეობის სპეციალისტი აღმოჩნდა, მეორე კი კობახიძის ახლო მეგობარი. ამიტომ ზურაბიშვილმა შეცდომები დაუშვა, დაემორჩილა ივანიშვილის და “ქართული ოცნების” ზემოქმედებას, ყველა სამთავრობო კანდიდატურა მის მიერ არის წარდგენილი. მან კარგად უნდა გააცნობიეროს ეს და თავის მართლება და უცნაური არგუმენტები, რომ თურმე საცდელად შემოაგდო (ყეინიშვილის და ხომერიკის კანდიდატურა), რომ ხელისუფლების მავნებლობა ეჩვენებინა, ძალიან არასერიოზულია, ამ 2 კანდიდატის დამტკიცებით მან საფუძველი ჩაუყარა საბანკო სისტემაში “ქართული ოცნების” გავლენების იურიდიულად დაკანონებას”,- განაცხადა გოცირიძემ.

„ნაციონალური მოძრაობა“ არის კრიმინალების პარტია და კრიმინალური სინდიკატი. ფაქტობრივად, მათი ლიდერი არ არის დარჩენილი, რომელიც ნასამართლევი არ იყოს, – ამის შესახებ ფრაქცია „ქართული ოცნების“ თავმჯდომარის მოადგილე რატი იონათამიშვილი აცხადებს.

„ნაციონალური მოძრაობა“ არის კრიმინალების პარტია და კრიმინალური სინდიკატი. ფაქტობრივად, მათი ლიდერი არ არის დარჩენილი, რომელიც ნასამართლევი არ იყოს. მძიმე ვერდიქტები არსებობს მათ წინააღმდეგ არა მხოლოდ ეროვნულ დონეზე, არამედ ევროპულ სასამართლოშიც, რომელსაც 100-მდე საქმეზე ჰყავს გასამართლებული „ნაციონალური მოძრაობა“. ამ ადამიანებს თუ სურთ, რომ ხელი გამოიშვირონ სხვისკენ, კრიმინალური ბუნება და კრიმინალური საქმიანობა საკუთარ თავში და ბუდეში მოიკითხონ პირველ რიგში“, – აღნიშნა იონათამიშვილმა.

გლდანში „ერთიანი ნაციონალური მოძრაობის“ საკრებულოს წევრს, ირაკლი ეძგვერაძეს თავს დაესხნენ და ფიზიკურად გაუსწორდნენ. თბილისის საკრებულოს ოპოზიცია გლდანში მომხდარ ინციდენტს პოლიტიკურ ანგარიშსწორებას უკავშირებს და პასუხისმგებლობას „ქართულ ოცნებას“ აკისრებს.

შსს-მ გლდანში მომხდარი ძალადობის ფაქტზე, ორი ან მეტი პირის მიმართ ჯგუფურად ჩადენილი ძალადობის ბრალდებით 6 პირი დააკავა.

ჩვენ კანდიდატის სტატუსს ვიმსახურებთ, მივიწევთ წინ და „გლობალური ომის პარტია“ პროცესს ხელს ვერ შეუშლის, – ამის შესახებ საპარლამენტო უმრავლესობის წევრმა, რატი იონათამიშვილმა საქართველოს პირველ არხს განუცხადა.

მისივე თქმით, მსგავსი მცდელობები უშედეგო იქნება.

„ვინმეს თუ კიდევ ეჭვი ეპარებოდა, რომ სალომე ზურაბიშვილი საერთაშორისო ვიზიტებს გეგმავს არა იმისთვის, რომ მხარი დაუჭიროს საქართველოს, არამედ პირიქით, ხელი შეუშალოს ევროინტეგრაციას, ეს ეჭვები საბოლოოდ გაქარწყლდა, განსაკუთრებით, იმ ლექსიკის შემდეგ, რომელიც თუნდაც ბოლო წერილში ჰქონდა პრეზიდენტს, ასევე, ურთიერთგამომრიცხავი განცხადებების შემდეგ. შესაბამისად, როგორც არ უნდა ეცადოს „გლობალური ომის პარტია“ ამ პროცესის დაზიანებას, რასაც აქამდეც არაერთგზის აკეთებდა ყველაზე მნიშვნელოვან მომენტებში, მსგავსი მცდელობები ახლაც უშედეგო იქნება. ჩვენ კანდიდატის სტატუსს ვიმსახურებთ, მივიწევთ წინ და ისინი ამ პროცესს ხელს ვერ შეუშლიან“, – განაცხადა რატი იონათამიშვილმა.

საქართველოს პარლამენტის თავმჯდომარე შალვა პაპუაშვილმა და რუმინეთის სენატის პრეზიდენტმა ნიკოლაე ჩუკამ ერთობლივ დეკლარაციას მოაწერეს ხელი.

დეკლარაცია, საქართველოს პარლამენტსა და რუმინეთის სენატს შორის საერთო ინტერესების სფეროებში დიალოგისა და გამოცდილების გაზიარების ხელშეწყობას ისახავს მიზნად.

დეკლარაციით გათვალისწინებულია საპარლამენტო თანამშრომლობის გაღრმავება არაერთი მიმართულებით, მათ შორის, რეგულარული ორმხრივი ვიზიტების განხორციელება, მეგობრობის ჯგუფებსა და სექტორულ კომიტეტებს შორის კავშირების გააქტიურება, პარლამენტების თანამშრომლებისთვის პროფესიული განვითარების პროგრამების შეთავაზება და სხვა.

დეკლარაციაში დადასტურებულია საქართველოს ტერიტორიული მთლიანობისა და ნატოსა და ევროკავშირში გაწევრიანებისადმი რუმინეთის მხარდაჭერა და საქართველოს დახმარების მზაობა.

ინფორმაციას საქართველოს პარლამენტი ავრცელებს.

მგონი, პრეზიდენტს თავისი პოზიციები იმდენად აემღვრა და აიხლართა ყველაფერში, რომ უჭირს საზოგადოებას ესაუბროს და მისი განცხადებები სულ უფრო ნაკლებად სანდო ხდება, – ამის შესახებ ადამიანის უფლებების კომიტეტის თავმჯდომარე მიხეილ სარჯველაძემ განაცხადა.

მისივე თქმით, პრეზიდენტი როგორ უნდა მოიქცეს ასეთ შემთხვევაში, ამაზე პასუხს იძლევა კანონმდებლობა, რომელიც ამბობს, რომ სხვა ქვეყნის მოქალაქეობის მიღება წარმოადგენს მოქალაქეობის შეწყვეტის საფუძველს.

„იმას, რაც ოპოზიციამ დაგეგმა, რომ ყალბი იარლიყი მიეკერებინა ხელისუფლებისთვის და საზოგადოება დაერწმუნებინა არარსებული ბრალდებების ნამდვილობაში, მხარში ამოუდგა პრეზიდენტიც იმხანად, როცა ხმამაღალი განცხადებები აკეთა, დაპირდა საზოგადოებას, რომ რაწამს წარედგინებოდა დასკვნა მოქალაქეობის შეწყვეტაზე, ის მიიღებდა ამ გადაწყვეტილებას. ამ განცხადებით პრეზიდენტი ცდილობდა წარმოეჩინა, თითქოს ასეთი გადაწყვეტილება „ქართული ოცნების“ პირობებში არ იქნებოდა მიღებული. როცა საპირისპიროში დარწმუნდა მოსახლეობა ხელისუფლების გადაწყვეტილებით, ასეთ დროს უხერხულობა შეიქმნა და ახალი გამოსავლის მოძებნა მოუწია პრეზიდენტს.

შედეგის თვალსაზრისით არაფერი იცვლება, ჩვენ მივყვებით იმას, რაც არის სწორი ნაბიჯების გადადგმა, რაც დიამეტრალურად განსხვავდება იმისგან, რასაც პრეზიდენტი და ოპოზიცია სთავაზობს საზოგადოებას ამ საკითხის ირგვლივ,“ – განაცხადა სარჯველაძემ.

“ქართული ოცნების” წევრის, ბექა ოდიშარიას განცხადებით, ოპოზიცია პრეზიდენტს მხოლოდ მაშინ ემადლიერება, როცა ის მათ სასარგებლო ნაბიჯებს დგამს, დანარჩენ შემთხვევებში კი მას “ბრიყვსა და არაკვალიფიციურს” უწოდებს.

ჩვენი ვარაუდით, არის მიზანი, ფარცხალაძის თემა დარჩეს დღის წესრიგში და რადიკალურ ოპოზიციას მიეცემა რყევის საშუალება ადამიანზე, რომელთან დაკავშირებითაც მარტივად შეიძლება, იყოს გადაწყვეტილება მიღებული, – აცხადებს„ქართული ოცნების“ წევრი, ბექა ოდიშარია.

მისივე თქმით, მას შემდეგ, რაც უსაფრთხოების სამსახური მოკვლევას დაასრულებს და დასკვნები გაკეთდება, ქართული სასამართლოს გადაწყვეტილების საფუძველზე მისი დასანქცირება ან მოხდება, ან – არა.

„ჩვენ პოლიტიკურ პროცესს და იმ განცხადებებს მივყვებით, რომელსაც პრეზიდენტი აკეთებდა. საკითხს თუ ქრონოლოგიურად და ობიექტურად გავყვებით, სალომე ზურაბიშვილმა განაცხადა, რომ ის ელოდებოდა დაუყოვნებლივ იუსტიციის სამინისტროსგან შესაბამის დასკვნას, რის საფუძველზეც მოახდენდა ფარცხალაძისთვის მოქალაქეობის გაუქმებას. იუსტიციის სამინისტრომ აღასრულა პრეზიდენტის მოწოდება და მას უმოკლეს ვადაში, პრაქტიკულად, მეორე დღეს მიაწოდა შესაბამისი დოკუმენტაცია. ამის შემდეგ პაუზამ საზოგადოებაში აზრთა სხვადასხვაობა გამოიწვია.

ამ პაუზამ მოახერხა ის, რომ „ქართული ოცნება“ და რადიკალური ოპოზიცია ამ პოზიციაში ერთმანეთს დაემთხვნენ. ჩვენ კორექტულად ვსაუბრობთ და ობიექტური მიზეზები გვაინტერესებს, რადიკალური ოპოზიცია კი, მას ბრიყვს, არაკვალიფიციურს უწოდებს, შეურაცხყოფებს აყენებს, როგორც ამას აკეთებდნენ მისი არჩევნების დროს. როდესაც სჭირდებათ, ქალბატონ სალომესთან დაძუნძულობენ, როდესაც ხვდებიან, რომ მათთვის რაღაც სასარგებლოდ არ ხდება, იმ წუთას დედის გინებაზე გადადიან.

სამართლებრივი საკითხი განიმარტა, ერთი მეორეს ხელს არ უშლის არავითარ შემთხვევაში. ნებისმიერი ქვეყნის მოქალაქე, თუ ის სისხლის სამართლის დანაშაულს ჩაიდენს, პასუხს აგებს კიდეც სრული სიმკაცრით მართლმსაჯულების წინაშე. ახლა ჩვენ ვარაუდი გვაქვს, რომ მიზანი არის მხოლოდ ის, რომ ეს თემა დღის წესრიგში დარჩეს და რადიკალურ ოპოზიციას კვლავ მიეცემა რყევის საშუალება ადამიანზე, რომელთან დაკავშირებითაც ძალიან მარტივად შეიძლება, გადაწყვეტილება იყოს მიღებული. მას შემდეგ, რაც უსაფრთხოების სამსახური მოკვლევას დაასრულებს და დასკვნები გაკეთდება, ქართული სასამართლოს გადაწყვეტილების საფუძველზე მისი დასანქცირება ან მოხდება, ან არა“, – განაცხადა ბექა ოდიშარიამ.