პარლამენტთან “ნაციონალური მოძრაობის” აქცია – “ერთად ევროპაში” დასრულდა.

აქციის მონაწილეებს სიტყვით მიმართეს ოპოზიციური პარტიების წარმომადგენლებმა, რომლებმაც ისაუბრეს 9 აპრილის მნიშვნელობაზე, საქართველოს ევროინტეგრაციის აუცილებლობაზე.

ცნობილი გახდა რამდენიმე მოთხოვნა.

“პირველი მოთხოვნაა – ლაზარეს თავისუფლება, მეორე მოთხოვნაა – დასანქცირებული მოსამართლეების დაუყოვნებლივ გადადგომა, მესამე მოთხოვნაა – მიხეილ სააკაშვილის და ნიკა გვარამიას თავისუფლება, მეოთხე მოთხოვნაა – დეოლიგარქიზაციის კანონი, სასამართლო რეფორმა და ცენტრალური საარჩევნო კომისიის რეფორმა”,- განაცხადა აქციაზე სიტყვით გამოსვლის დროს, „ნაციონალური მოძრაობის“ თავმჯდომარემ, ლევან ხაბეიშვილმა.

აქციაზე შესრულდა საქართველოს, უკრაინისა და ევროკავშირის ჰიმნები.

რუსთაველის გამზირზე საავტომობილო მოძრაობა გაიხსნა.

„ქართველები სწორედ იმიტომ გავჩნდით, რომ ვიბრძოლოთ და არ შევეგუოთ განგებას. სწორედ ეს გვასწავლა ჩვენ ზვიადმა. [გამსახურდიამ] როცა მე მისი დისერტაცია წავიკითხე, გავოგნდი, რას ლაპარაკობდა ეს კაცი, მე ვიცოდი, რომ დიდ ადამიანს ვეხებოდი. მერე ეს სული თითქოს გადმოვიდა მიხეილ სააკაშვილში“, – ამის შესახებ მხატვარმა გია ბუღაძემ პარლამენტთან მიმდინარე აქციაზე განაცხადა.

„მარადიული, ქართველური სული, რომელიც დღეს ამათ ხელში მძიმედ არის, მაგრამ როგორი ძლიერია ამჩნევთ? ჩვენ როგორ გვამაგრებს, ცეცხლივით, სანთელივით ანთია, სანთელივით იწვის მისი მარადიული სული იმიტომ, რომ მასთან არის საქართველოს მარადისობა. ამიტომ გვჭირდება ჩვენ მიხეილ სააკაშვილი“, – განაცხადა ბუღაძემ.

9 აპრილს აქ იდგა ჩემი და ჩემზე უფროსი თაობა. სამწუხაროდ, დღეს იმ პერიოდთან გვაერთიანებს ის, რომ მაშინაც მთავრობის სახლში იჯდა რუსეთიდან მართული კომუნისტური რეჟიმი და დღესაც საქართველოს მთავრობაში არის მოსკოვიდან მართული პუტინისტური ხელისუფლება. სამწუხაროდ, ეს არის ერთიანობა დღევანდელ დღესა და 1989 წლის 9 აპრილს შორის“, – ამის შესახებ საქართველოს მე-5 პრეზიდენტმა გიორგი მარგველაშვილმა პარლამენტთან მიმდინარე აქციაზე განაცხადა.

მისივე თქმით, მოქალაქეებმა, განსხვავებული პოლიტიკური შეხედულებების მიუხედავად, ევროპული მომავლისთვის ერთად უნდა იბრძოლონ.

„დღესაც დგას ჩვენს წინაშე ვალდებულება, რომ სამშობლო რუსებისგან ვიხსნათ. ჩვენ დღეს გვაერთიანებს ერთიანი მიზანი მიუხედავად ჩვენი განსხვავებულობისა – ეს არის საქართველოს დაბრუნება იმ ისტორიულ ერთა ოჯახში, რომელიც ავირჩიეთ მე-4 საუკუნეში, როდესაც ჩვენ ვთქვით, რომ ვართ ქრისტიანები. დღეს არ უნდა დავუშვათ ამის შებრუნება. ის ღვაწლი, რომელიც 9 აპრილს გაიღეს, არ უნდა იყოს გაფანტული და გაბნეული. უნდა ვიბრძოლოთ იმისთვის, რომ არ გვყავდეს პოლიტპატიმრები, უნდა ვიბრძოლოთ იმისთვის, რომ საქართველოს მეოთხე პრეზიდენტს ციხეში არ აწამებდნენ და ამას რუსებს არ აჩვენებდნენ, ვიბრძოლოთ, რომ არ მივიღოთ შეტრიალება რუსეთისკენ და შევთანხმდეთ იმაზე, რომ სანამ ესენი იქნებიან ხელისუფლებაში, ყოველი დღე არის საფრთხე ჩვენი სამშობლოსათვის. ყველანი ვართ ერთ მხარეს – პუტინის რუსეთის საწინააღმდეგოდ და გავიმარჯვებთ“, – განაცხადა მარგველაშვილმა.

„ნაციონალური მოძრაობის“ ლიდერმა ლევან ხაბეიშვილმა პარლამენტთან მიმდინარე აქციაზე სიტყვით გამოსვლისას 4 მოთხოვნა გააჟღერა, რომლის გარშემოც, მისი თქმით, ამ შეკრების შემდეგ უნდა გაერთიანდნენ.

ხაბეიშვილის განცხადებით, ერთ-ერთი მთავარი მოთხოვნა ექსპრეზიდენტ მიხეილ სააკაშვილისა და „მთავარი არხის“ დირექტორის, ნიკა გვარამიას გათავისუფლებაა, რის გარეშეც დეპოლარიზაცია „არ გამოვა“.

„არის 4 მთავარი მოთხოვნა, რომელთა გარშემოც უნდა გავერთიანდეთ ამ შეკრების შემდეგ. პირველი მოთხოვნა არის ლაზარეს თავისუფლება, მეორე მოთხოვნა – თქვენ ნახეთ აშშ-ის პოზიცია, რომელმაც თქვა, რომ კორუმპირებული, ქრთამისტი მოსამართლეები ჰყავს საქართველოს, დასანქცირებული მოსამართლეების დაუყოვნებლივ გადადგომა უნდა მოვითხოვოთ. რაც შეეხება მესამე მოთხოვნას, თქვენ იცით, რომ ევროკავშირის 12 პუნქტში არის ერთ-ერთი მთავარი საკითხი – დეპოლარიზაცია, რომელიც ცხადია, რომ სააკაშვილისა და გვარამიას გათავისუფლების გარეშე არ გამოვა. მეოთხე მოთხოვნაც უკავშირდება 12 პუნქტის შესრულებას და გვინდა გამოვყოთ რამდენიმე პრიორიტეტი: ეს არის დეოლიგარქიზაციის კანონი, სასამართლო რეფორმა და ცესკოს რეფორმა. დეოლიგარქიზაცია ჰქვია იმას ,რომ ბიძინას პირადი ბანკირები, მცველები, „შნირები“ და მოურავები არ უნდა იყვნენ მთავრობაში, რომლებიც ქართველ ხალხს არ აურჩევია. ამ ოთხი მოთხოვნის გარშემო გთავაზობთ დისკუსიას, ერთობას, საერთო ბრძოლის ხაზს. მოვუწოდებ ყველა პოლიტიკური პარტიის ლიდერს, გადადეთ თქვენი პირადი და პარტიული ინტერესები გვერდზე და შემოგვიერთდით. ბრძოლა გაგრძელდება და ბრძოლა იქნება გამარჯვებამდე“, – განაცხადა ხაბეიშვილმა.

ცდილობენ 9 აპრილთან დაკავშირებული ემოციები საკუთარ სამსახურში ჩაიყენონ – 12 პუნქტის შესრულებას არ სჭირდება სისხლიან რევოლუციებზე საუბარი და ქუჩაში გასვლა, არამედ კაბინეტებში დაჯდომა და კონკრეტულ საქმეზე საუბარი, ხელის შეშლის მეტი ოპოზიციის მხრიდან არაფერი გვინახავს , – ამის შესახებ პარლამენტის ადამიანის უფლებათა დაცვისა და სამოქალაქო კომიტეტის თავმჯდომარემ მიხეილ სარჯველაძემ ჟურნალისტებთან განაცხადა, რითაც „ნაციონალური მოძრაობის“ მიერ 9 აპრილს დაანონსებულ აქციას გამოეხმაურა.

სარჯველაძის შეფასებით, ამ აქციის მიზანია სიმრავლით მანიპულირება მოახდინონ.

“ამ აქციას ერთადერთი მიზანი აქვს, სამარცხვინო წარუმატებლობა – დაანონსებული დიდი აქციების ნაცვლად რამდენიმე ათეულზე მეტს, რომ ვერ გაცდნენ მხარდამჭერთა მობილიზებაში, ახლა ცდილობენ 9 აპრილთან დაკავშირებული ემოციები საკუთარ სამსახურში ჩაიყენონ. ამ აქციის მიზანია რაღაც სიმრავლით მანიპულირება მოახდინონ. სხვა სათქმელი არაფერი აქვთ. რაც შეეხება თავდაპირველ ანონსს, რომ 12 პუნქტის შესრულებას უკავშირდებოდა, მორიგი ფარსია. 12 პუნქტის შესრულებას არ სჭირდება სისხლიან რევოლუციებზე საუბარი და ქუჩაში გასვლა, არამედ კაბინეტებში დასხდომა და კონკრეტულ საქმეზე საუბარი, რასაც ხელისუფლება აკეთებს. ხელის შეშლის მეტი ოპოზიციის მხრიდან არაფერი გვინახავს“ , – აღნიშნავს სარჯველაძე.

გარდა ამისა, მან ტელეკომპანია „იმედის“ მიერ გავრცელებულ ჩანაწერებზეც ისაუბრა, სადაც მათივე მტკიცებით ჩანს, რომ „გირჩი – მეტი თავისუფლების“ ლიდერი, ზურა გირჩი ჯაფარიძე ერთ-ერთ შეკრებაზე „ახალგაზრდებს ხელისუფლების ცვლილებაზე, სისხლიან რევოლუციასა და დესტრუქციაზე ესაუბრება“.

„სამწუხაროდ, სისხლიანი რევოლუციების შემოქმედების გარდა, იმის იქით აღარც ტვინი უმუშავებთ, აღარც ფანტაზია აქვთ. მათი წარმოდგენით, როგორ ჩანს, ვიდრე სისხლი არ დაიღვრება და უბედურება არ მოხდება, იქამდე ისინი საკუთარ შანსებს ხელისუფლებაში მოსასვლელად და პოლიტიკური წარმატების მისაღწევად ვერ აღიქვამენ. ამიტომ აქვთ პოლიტიკური ბრძოლის ინსტრუმენტად სისხლიანი რევოლუციების სცენარები. ეს არის დასანანი. ამას საზოგადოება უნდა გაემიჯნოს და ემიჯნება კიდევ“, – აღნიშნავს სარჯველაძე.

პარლამენტის წინ რუსთაველის გამზირზე საავტომობილო გზა გადაიკეტა. საკანონმდებლო ორგანოსთან იკრიბებიან აქციის მონაწილეები. „ნაციონალური მოძრაობის“ დაგეგმილი აქცია სლოგანით – „ერთად ევროპაში“ 18:00 საათზე დაიწყება.

პარლამენტის წინ მოწყობილია სცენა. იგეგმება სიტყვით გამოსვლები.

ამასთან, როგორც ცნობილია რუსთაველის მეტროსთან იკრიბებიან „ნაციონალური მოძრაობის“ ახალგაზრდული ფრთის წარმომადგენლები, რომლებიც აქციას მსვლელობით შეუერთდებიან.

ადგილზე მობილიზებულია პოლიცია.

9 აპრილი იყო ძველი და ახალი თაობის ერთობლივი გამარჯვების ზეიმი. იმ დღეს ყველა გმირი იყო, ვინც დაიღუპა, ვინც დაშავდა და ვინც საბჭოეთის ბასრ ნიჩაბს გადაურჩა. იმ დღეს ქართველმა ხალხმა 70-წლიანი ბრძოლა საკუთარი სისხლის ფასად, გამარჯვებით დაასრულა, – აცხადებს „ხალხის ძალის“ წევრი, თამარ ჩიბურდანიძე.

მისივე თქმით, დღეს, 9 აპრილის მოვლენებიდან 34 წლის შემდეგაც, სწორი ხედვები და პრინციპული გადაწყვეტილებები აუცილებელია.

„დღეს, როდესაც ახალგაზრდა თაობა ჩვენ, 9 აპრილის თაობას თავისუფლებისთვის ბრძოლისკენ მოგვიწოდებს, კარგია იმით, რომ მათში ეს სულისკვეთება არის, ოღონდ, სამწუხაროა ის ფაქტი, რომ მათ სულისკვეთებას ოპოზიციური პარტიები მხოლოდ საკუთარი მიზნებისთვის იყენებენ და არა ქვეყნისთვის. არადა, საქართველოს დღეს ნამდვილად სჭირდება ახალგაზრდული, მებრძოლი სული გონებით, განათლებით და არა ძალადობით. სჭირდება სწორი ხედვები და პრინციპული გადაწყვეტილებები, რაც აგვარიდებს იგივე მორჩილებასა და მონობას, რისგან გამოსახსნელადაც 34 წლის წინ სისხლი დაიღვარა რუსთაველზე.

დღეს სხვა რეალობის წინაშეა ჩვენი ქვეყანა. ამ პერიოდის განმავლობაში მოხდა ჩვენი არჩევანის შეფასება და არა ღირებულებების გადაფასება. ეროვნული ფასეულობები ხელშეუხებელია, იცვლება მხოლოდ ბრძოლის გზა ამ ფასეულობების შესანარჩუნებლად.

დღეს ყველანი ვრწმუნდებით იმაში, რომ დამოუკიდებლობისათვის ბრძოლა გრძელდება ახლა უკვე სხვა რეალობიდან. გვჯერა, ამ ბრძოლასაც მოვიგებთ, ოღონდ უსისხლოდ“, – აცხადებს თამარ ჩიბურდანიძე.