“ერთიანობა ნაციონალური მოძრაობის” თავმჯდომარე თინა ბოკუჩავა წინა ხელისუფლების ქმედებების გამოსაძიებლად დაანონსებულ საგამოძიებო კომისიას საცირკო წარმოდგენას უწოდებს და ამბობს, რომ ამით, ბიძინა ივანიშვილი დანაშაულების გადაფარვას ცდილობს.

როგორც ბოკუჩავამ ჟურნალისტებს განუცხადა, “ქართული ოცნება” აღნიშნული “სანახაობით” მისი არალეგიტიმურობის ფაქტს ვერ გადაფარავს და მოუწევს, ძალაუფლების დათმობას შეეგუოს.

“მეცამეტე წელია, არჩევნების მიტაცების და 26 ოქტომბერს ჩატარებული სპეცოპერაციის შედეგად, ივანიშვილის რუსული რეჟიმი პოზირებს საქართველოს ხელისუფლებად და მეცამეტე წელს კვლავ საუბრობს იმ პოლიტიკური ძალის გასამართლებაზე, რომელიც 13 წელია ხელისუფლებაში არ ყოფილა და რომელსაც მე ამაყად წარმოვადგენ. ეს, რა თქმა უნდა, მორიგი რუსული პროპაგანდისტული მცდელობაა იმისთვის, რომ ივანიშვილმა ამ სანახაობით და მორიგი საცირკო წარმოდგენით, რომლის დადგმასაც ახლა არალეგიტიმურ, დე-ფაქტო პარლამენტში გეგმავს, გადაფაროს საკუთარი დანაშაულები; ის, რომ მას ცივილიზებული სამყარო ლეგიტიმურ ხელისუფლებად არ აღიარებს; ის, რომ სანქციების გამო ეკონომიკა ინგრევა; ის, რომ მას ლეგიტიმაცია აღარ გააჩნია არც ქვეყნის გარეთ, არც შიგნით. ამ საცირკო წარმოდგენით, სანახაობით ვერ გადაფარავს მისი არალეგიტიმურობის ფაქტს და მაინც მოუწევს, შეეგუოს ძალაუფლების დათმობას, რამეთუ ქვეყანაში უნდა ჩატარდეს ახალი, სამართლიანი არჩევნები, გამოვიდეთ ამ ქაოსიდან და მუდმივად წარსულში კი არ ვუყუროთ და პროპაგანდისტულ ტყუილებში ვიცხოვროთ, არამედ გავიხედოთ წინ, ევროპისკენ, კეთილდღეობისკენ, წარმატებისკენ და ხელისუფლებამ ხალხის ინტერესებისთვის იმუშაოს და არ იყოს დაკავებული საცირკო წარმოდგენების დადგმით”,- განაცხადა ბოკუჩავამ.

ოთხი ოპოზიციური გაერთიანება სირიის ლიდერს, აჰმედ ალ-შარაას რუსეთის მიერ საქართველოს დროებით ოკუპირებული ტერიტორიების აღიარების გაუქმების თხოვნით მიმართავს.

ამის შესახებ ნიკა გვარამიას, ბადრი ჯაფარიძის და თინა ბოკუჩავას ერთობლივ ბრიფინგზე გახდა ცნობილი.

„მის აღმატებულებას, სირიის სახელმწიფოს მეთაურსა და სირიის დიად ხალხს,

თქვენო აღმატებულებავ,

ჩვენ, საქართველოს დემოკრატიული პოლიტიკური ძალები, ვულოცავთ სირიის ხალხს ბაშარ ალ-ასადის სასტიკი დიქტატურის თქვენი ხელმძღვანელობით დამხობას. ვიმედოვნებთ, რომ თქვენს ქვეყანაში განხორციელებული ცვლილებები ჩვენს სახელმწიფოებს შორის თანამშრომლობისთვის ახალ პერსპექტივებს გახსნის.

ქართველი ხალხი მშვიდობიანად იბრძვის კრემლის მიერ მხარდაჭერილი არალეგიტიმური, ავტორიტარული რეჟიმის წინააღმდეგ. შესაბამისად, ჩვენ, ოთხი ძირითადი დემოკრატიული ძალა საქართველოში, რომლებიც წარმოვადგენთ საქართველოს მოქალაქეების ნებასა და მათ მისწრაფებებს თავისუფალი და დემოკრატიული სახელმწიფოებრიობისკენ, მოგმართავთ თხოვნით, თქვენი ძალისხმევით გაუქმდეს სირიის მხრიდან რუსეთის მიერ ოკუპირებული საქართველოს რეგიონების, აფხაზეთისა და ცხინვალის რეგიონის/სამხრეთ ოსეთის დამოუკიდებელ სახელმწიფოებად აღიარება.

როგორც მოგეხსენებათ, საქართველოს რეგიონები – აფხაზეთი და ცხინვალის რეგიონი/სამხრეთ ოსეთი, დამოუკიდებელ სახელმწიფოებად აღიარებულია მხოლოდ რუსეთის მოკავშირე დიქტატურული რეჟიმების მიერ, როგორებიცაა ვენესუელა და ნიკარაგუა. 2018 წელს დიქტატორმა ბაშარ ალ-ასადმაც, რუსეთის მიერ მისი სასტიკი რეჟიმის მხარდაჭერის საპასუხოდ, აღიარა რუსეთის მიერ ოკუპირებული საქართველოს აღნიშნული რეგიონები.

სირიელ და ქართველ ხალხს ურთიერთთანამშრომლობისა და მეგობრობის ათასწლოვანი ისტორია აკავშირებს. ჩვენს ერებს აქვთ ყველა საშუალება, რათა განავითარონ მართლაც ძმური და ნაყოფიერი ურთიერთობები ორივე ქვეყნის საკეთილდღეოდ. ამ კონტექსტში, სირიის მიერ საქართველოს რეგიონების აღიარების გაუქმება გადამწყვეტ როლს ითამაშებდა. თქვენო აღმატებულებავ, გვსურს, დაგიდასტუროთ ჩვენი გულწრფელი პატივისცემა“, – ნათქვამია წერილში, რომელსაც ხელს აწერენ ზურაბ გირჩი ჯაფარიძე – „კოალიცია ცვლილებისთვის“; თინათინ ბოკუჩავა – „ერთიანობა – ნაციონალური მოძრაობა“,; ირაკლი კუპრაძე – „ძლიერი საქართველო“; ბერდია სიჭინავა – „გახარია – საქართველოსათვის“.

ჩვენ გვაქვს ძალიან დიდი იმედი, რომ „დიფ სთეითი“ საბოლოოდ დამარცხდება აშშ-ში და ასეთ შემთხვევაში, თავიდან ბოლომდე შეიცვლება მიდგომა საქართველოს მიმართ, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

როგორც პრემიერმა აღნიშნა, არავის უნდა იმის გასაჯაროება, რომ აშშ-ის ყოფილი ხელისუფლება აფინანსებდა საქართველოში რევოლუციურ პროცესებს და არეულობას.

„არავის მოუნდება ისეთი ღონისძიებების შესახებ ინფორმაციის გასაჯაროება, როგორიც იყო კანვასის ტრენინგი. გახსოვთ, მაშინ განსაკუთრებით შემოქმედებითი სფეროს წარმომადგენლებს უტარებდნენ ტრენინგებს USAID-ის დაფინანსებით, კონკრეტულად რევოლუციურ პროცესებთან დაკავშირებით, როგორ უნდა მიეყენებინათ ბულდოზერი სამთავრობო შენობებზე, ასეთ დეტალებზე იყო იქ საუბარი. რა თქმა უნდა, არავის უნდა ასეთი დეტალების გასაჯაროება, არავის არ უნდა იმის გასაჯაროება, რომ აშშ-ის ყოფილი ხელისუფლება აფინანსებდა ჩვენს ქვეყანაში რევოლუციურ პროცესებს და არეულობას. რეალურად იყო რევოლუციის ოთხი მცდელობა ამ ოთხი წლის განმავლობაში. ჩვენ გვაქვს ძალიან დიდი იმედი, რომ „დიფ სთეითი“ საბოლოოდ დამარცხდება აშშ-ში და ასეთ შემთხვევაში თავიდან ბოლომდე შეიცვლება მიდგომა საქართველოს მიმართ. ჩვენ კიდევ ერთხელ შეგვიძლია, განვაცხადოთ, რომ ძალიან გვინდა მჭიდრო თანამშრომლობა ახალ ადმინისტრაციასთან, უფრო მეტიც, ჩვენ გვინდა სტრატეგიული პარტნიორობის სუფთა ფურცლიდან განახლება კონკრეტული გზამკვლევით, სადაც იქნება ასახული კონკრეტული შედეგები, როგორც ერთი, ასევე მეორე მხარისთვის, ამისათვის ჩვენ აქტიურად ვიმუშავებთ“, – განაცხადა პრემიერ-მინისტრმა.

„ახალი არჩევნები დაგვინიშნე“ კი არა, უნდა ვითხოვდეთ, „მთავრობა გადადგეს“, – ამის შესახებ „ერთიანობა – ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

ცისკარიშვილის თქმით, უნდა მოსუფთავდეს ველი, ახალი ცესკო, ახალი სუს-ი, რომელიც საზოგადოების მხრიდან ნდობით აღჭურვილი პირით დაკომპლექტდება – ასეთ გარემოცვაში ჩატარდეს ახალი არჩევნები.

„ჩატარდება, რა თქმა უნდა, როდესაც ესენი წავლენ, ბუნებრივად ჩატარდება. გულწრფელი პასუხი თუ გაინტერესებთ, თვე-ნახევრის წინაც ვამბობდი, „მოდი, ბიძინა, ჩანიშნე არჩევნები და კიდევ ერთხელ ჩაგვიტარე არჩევნები“ – ეს აბსურდული მოთხოვნაა“, – განაცხადა პეტრე ცისკარიშვილმა „პალიტრანიუსის“ გადაცემა „დღის ნიუსრუმში“.

ცისკარიშვილმა „ნაციონალური მოძრაობის“ ხელისუფლების საქმიანობის შესასწავლად პარლამენტში დროებითი საგამოძიებო კომისიის შექმნის საკითხზეც ისაუბრა და აღნიშნა: „ამაზე წავა თუ არა „ქართული ოცნება“, ეს გამოჩნდება – წავა და წავიდეს, პირიქით, მეტი პოლიტიკური რეკლამა, ჩვენი საქმის მეტი წარმოჩენა, რეალურად, ვინ ებრძვის ამ რეჟიმს, ბოლო 12 წელია, ეს ყველაფერი გამოკრისტალდება, ვინ არის მათი მთავარი ოპოზიცია, ესეც უკეთესად გამოჩნდება. ჩვენ გაგვიხარდება, თუ ამ საქმეს მოკიდებენ ხელს, როგორც იმუქრებიან“.

რაც შეეხება საპროტესტო აქციებს და სააკაშვილის განცხადებას, რომ „ყველაფერი დასრულებული იქნებოდა მშვიდობიანად, თავად რომ გარეთ იყოს“, ცისკარიშვილის თქმით, ყველაფერი კარგად მიდის, დემონსტრაციებმა მუხტი შეინარჩუნა და ივანიშვილის სისტემის წევრობიდან ადამიანების გამოყვანის ამოცანა უნდა ამოძრავებდეს ახლა ყველას. ცისკარიშვილი ამბობს, რომ ამ ამოცანის შესრულებაში სააკაშვილს ბადალი არ ჰყავს.

„ყველაფერი კარგად და ლოგიკურად მიდის. მეტიც, განცვიფრებული ვარ, ორ თვეზე მეტია, ამ აქციებმა, დემონსტრაციებმა მუხტი შეინარჩუნა, ყოველდღიურად ქუჩა იკეტება და რუსთაველზე ათასობით ადამიანი დგას. საჯარო რიტორიკაში ცდილობენ, ეს გააუბრალონ და ხან 500 კაცს ახსენებენ, ხან – ფულს უხდიანო და ზღაპრებს უყვებიან მხარდამჭერებს. ის ადამიანებიც, რომლებმაც არჩევნებამდე დაიჯერეს, რომ ბიძინა ივანიშვილი მართლაც ღირსებით, მშვიდობით და კეთილდღეობით ევროპისკენ მიდის, უკვე იმედგაცრუებულები არიან. იმ ვერტიკალის თვალსაზრისით, ვინც ჯერ კიდევ ირიცხება ბიძინა ივანიშვილის რეჟიმის წევრად, ამ ადამიანების შემოცლა, შემოფრცქვნა და გამოყვანა ბიძინა ივანიშვილის სისტემის წევრობიდან, არის ის ამოცანა, რომელიც, ჩემი აზრით, დღეს ოპოზიციას, ქუჩაში მდგომ ხალხს, ოპოზიციურად და ანტიქოცურად განწყობილ ყველა ადამიანს ახლა უნდა ამოძრავებდეს. ამ ამოცანის შესრულებაში, მე ვფიქრობ, მიშას ბადალი არ ჰყავს. სწორედ ის მოახერხებდა ამ მიზნის მიღწევას ყველაზე სწრაფად, ეფექტურად, უკეთესად. შეიძლება, ასიდან ასივე ვერ გადმოიყვანო აქეთ მხარეს, მაგრამ ივანიშვილის, მისი ვიწრო გარემოცვის მარტო დატოვების საქმეში მიშას წვლილი იქნებოდა განუზომლად დიდი. მან თქვა, „დავტოვებდი მეფეს მარტოს და შიშველს“, ანუ ბიძინა ივანიშვილს. შეიძლება, საჯაროდ არ აღიარონ და ვერ დამეთანხმონ ჩვენი სხვა კოლეგა ოპოზიციონერები, მაგრამ გულის სიღრმეში მათაც იციან, რომ ივანიშვილის ძალაუფლებიდან გაშვების საქმეში მიშა სააკაშვილის როლი იქნებოდა განუზომლად დიდი“, – განაცხადა პეტრე ცისკარიშვილმა.

მიუხედავად იმისა, რომ ყველაფერი დევს ხელისგულზე, საჭიროა ყველაფრის ზედმიწევნით შესწავლა, რომ მტკიცებულებების დონეზე ვაჩვენოთ ხალხს, კიდევ ერთხელ შევახსენოთ, რა უმძიმესი დანაშაულები აქვთ ჩადენილი იმ ადამიანებს, რომლებსაც სურდათ ხელისუფლებაში დაბრუნება, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს საპარლამენტო საგამოძიებო კომისიასთან დაკავშირებით კითხვის საპასუხოდ განუცხადა.

როგორც მთავრობის მეთაურმა აღნიშნა, ყველას კარგად ახსოვს, რა ხდებოდა 2004-2012 წლებში საქართველოში.

„რეალურად, მათი დანაშაულები დევს ხელისგულზე. გახსოვთ, რა ხდებოდა საქართველოს 2004-2012 წლებში, ეს იყო ადამიანების მკვლელობა, 150 ადამიანი, ახალგაზრდა მარტო ქუჩაში მოკლეს, ეს იყო ადამიანების წამება, ციხეებში რა ხდებოდა, ყველას კარგად გახსოვთ და ყველამ ძალიან კარგად იცით ეს ყველაფერი, ტოტალური ფორმა ჰქონდა მიღებული ბიზნესის რეკეტს. ტელევიზიების მიტაცება. გახსოვთ, რა მოხდა „რუსთავი 2“-თან, „იმედთან“ დაკავშირებით, სხვა კერძო ტელევიზიებთან დაკავშირებით, ტოტალური მონოპოლია დაამყარეს მედიის სფეროში. ეს ხომ ხელისგულზე არსებული დანაშაულებია და მთავარი დანაშაული მაინც არის, რა თქმა უნდა, 2008 წლის ომი, რის შედეგადაც საქართველომ დაკარგა ტერიტორიების 20 პროცენტი, მოხდა ე.წ. აღიარება აფხაზეთის და ე.წ. სამხრეთ ოსეთის, 30 ათასი ადამიანი იქცა დევნილად და 400-ზე მეტი ჩვენი სამოქალაქო და სამხედრო პირი დაიღუპა. ეს არის უმძიმესი დანაშაული, რისთვისაც უნდა დადგეს პასუხისმგებლობა. მიუხედავად იმისა, რომ ყველაფერი დევს ხელისგულზე, საჭიროა ყველაფრის ზედმიწევნით შესწავლა, რათა მტკიცებულებების დონეზე ვაჩვენოთ ხალხს და კიდევ ერთხელ შევახსენოთ ის, თუ რა უმძიმესი დანაშაულები აქვთ ჩადენილი იმ ადამიანებს, რომლებსაც სურდათ ხელისუფლებაში დაბრუნება“, – განაცხადა პრემიერმა.

მისივე თქმით, ევროკავშირის ელჩი ქართველ ხალხს უმტკიცებდა, რომ მწამებლები, მკვლელები, ომის გამჩაღებლები, ბიზნესის რეკეტიორები, მედიის მიმტაცებლები თუ არ დაბრუნდებოდნენ ხელისუფლებაში, ამ შემთხვევაში ქვეყანას არ ეღირსებოდა ევროინტეგრაცია.

„რა შუაშია ევროინტეგრაცია და მკვლელები, ყაჩაღები და ა.შ. საზოგადოებამ გამოიტანა დასკვნა და ამის გამო ის გაჰყვა არა ევროკავშირის მოწოდებას, არამედ გაჰყვა სიმართლეს და სწორედ ამიტომ მიიღო „ქართულმა ოცნებამ“ ხმათა 54 პროცენტი, ხოლო ეს მწამებლები, მკვლელები და ა.შ. ვერ დაბრუნდნენ ხელისუფლებაში და ვერც ვერასდროს დაბრუნდებიან ხელისუფლებაში, ამაზე ვართ ჩვენ პასუხისმგებელი“, – განაცხადა ირაკლი კობახიძემ.

როდესაც ევროპის საბჭოს საპარლამენტო ასამბლეის ერთ-ერთი სახე არის გონჩარენკო, აბსოლუტურად ლოგიკურია ის შეუსაბამობები, რასაც ვხედავთ ჩვენ ზოგადად ასამბლეის საქმიანობაში და კონკრეტულად მის რეზოლუციებში, – განაცხადა საქართველოს პრემიერ-მინისტრმა ირაკლი კობახიძემ ჟურნალისტებთან.

მთავრობის მეთაურის თქმით, ძალიან ტრაგიკული მოვლენაა, რომ ევროპის საბჭოს საპარლამენტო ასამბლეის ერთ-ერთი სახე არის ეს უკრაინელი დეპუტატი, რომელიც პირდაპირ მოუწოდებდა საქართველოს მეორე ფრონტის გახსნისკენ.

„რეალურად, ეს იყო კოლექტიური გონჩარენკოების გადაწყვეტილება. ზოგადად, ძალიან ტრაგიკული მოვლენაა ის, რომ ევროპის საბჭოს საპარლამენტო ასამბლეის ერთ-ერთი სახე არის ეს უკრაინელი დეპუტატი, რომელიც პირდაპირ მოგვიწოდებდა ჩვენ მეორე ფრონტის გახსნისკენ. თქვენ გახსოვთ მისი განცხადება იმასთან დაკავშირებით, რომ ჩვენ უნდა განგვეხორციელებინა სამხედრო შეტევა სოხუმზე და ცხინვალზე. ის პირდაპირ მოგვიწოდებდა მეორე ფრონტის გახსნისკენ, ამას ვერ მიაღწია და ახლა ცდილობს, რომ რაიმენაირად ამის გამო „დაგვსაჯოს“. რა თქმა უნდა, ჩვენი ქვეყანა არ არის გონჩარენკოს და გონჩარენკოების დასასჯელი. როდესაც ევროპის საბჭოს საპარლამენტო ასამბლეის ერთ-ერთი სახე არის გონჩარენკო, აბსოლუტურად ლოგიკურია ის შეუსაბამობები, რასაც ვხედავთ ჩვენ ზოგადად ასამბლეის საქმიანობაში და ასევე, კონკრეტულად მის რეზოლუციებში“, – განაცხადა პრემიერ-მინისტრმა.