პატარა ქვეყანა ვართ და საქართველოს სულ სჭირდებოდა, ყველა დროში, რომ თავი გადაერჩინა. ცოტა წინ რომ წავიდეთ, თუ ვინმე ამბობს, რომ ომი არ უნდოდა [საქართველოში], სისულელეს ლაპარაკობს, რადგან დასავლეთის ქვეყნებს რუსეთის დასუსტების ინტერესი ყოველთვის ჰქონდათ და ომი რომ არ ნდომოდა ვიღაცას, ეს იქნებოდა გასაკვირი, – ამის შესახებ „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ გადაცემაში „იმედი LIVE“ განაცხადა.

მისი თქმით, ამ გარემოების გარდა, საქართველოს ომში ჩართვის ინტერესი რომ რეალური იყო, ამას ალექსეი დანილოვის განცხადებაც ადასტურებდა, რომელიც ამბობდა, რომ ქართველების საომარ მოქმედებებში ჩართვა უკრაინას დაეხმარებოდა.

როგორც მდინარაძემ აღნიშნა, მართალია, საქართველოში ომი უკრაინას დაეხმარებოდა, თუმცა თავად ქართული სახელმწიფო ვერ გადარჩებოდა.

„რატომაც არა, მე თუ რომელიღაც ქვეყნის ზედმეტი აქტიურობის ხარჯზე დავასუსტებ რუსეთს, როცა მე მას დასავლეთიდან ვებრძვი, საქართველო რაში მაინტერესებს? იმ [დასავლეთის] გადასახედიდან, რატომ არ უნდა იბრძოლოს საქართველომ და რატომ არ მიღირს, რომ 50-60 ათასი ჯარისკაცი დავაკავო საქართველოში? ისევე როგორც პირდაპირ, გაჭრილად თქვა დანილოვმა, ეს წამოცდენა ხომ არ იყო და შემთხვევითი კაცი ხომ არ იყო, თუ ქართველები დაკავდებიან ამ საქმით, ძალიან დაგვეხმარებაო. მართალი თქვა იმ კაცმა, ძალიან დაეხმარებოდა, უბრალოდ, ჩვენ ვერ გადავრჩებოდით, იმიტომ, რომ 10-ჯერ ნაკლები ქვეყანა ვართ ყველა გაგებით – ტერიტორიულად, მოსახლეობით და რუსეთს დასჭირდებოდა 10-ჯერ ნაკლები ძალისხმევა საქართველოს გასანადგურებლად, სამწუხაროდ“ – აღნიშნა მამუკა მდინარაძემ.

მისი განცხადებით, რუსეთ-უკრაინის ომში ზოგმა ქვეყანამ რაღაც მოიგო, ზოგმა კი – წააგო, თუმცა ერთადერთი ქვეყანა, რომელმაც იოტისოდენა სარგებელიც კი ვერ ნახა, ეს სწორედ უკრაინაა, რომელიც განადგურდა.

საქართველო, მდინარაძის თქმით, შესაძლოა, ასჯერ მეტად გაწირულიყო.

„რაც არ უნდა ვიკამათოთ, ვის აწყობდა, ვის არ აწყობდა – გასაგებია, იქითა მხრიდან ხელშეწყობა ჰქონდათ უკრაინელებს საიმისოდ, რომ რუსეთის წინააღმდეგ ებრძოლათ. საბოლოო ჯამში, ეს რუსეთის იძულებითი სვლა იქნებოდა თუ არ იქნებოდა იძულებითი სვლა, კიდევ რომ ვინმემ რაღაც არ დაგვაბრალოს და პრორუსობაზე არ ილაპარაკოს, რუსეთმა, დღეის სამწუხარო მდგომარეობით, ნატო-ს ქვეყნებსა და თავის ქვეყანას შორის გარკვეული ბუფერი გაიკეთა უკრაინის ხარჯზე. უკრაინა განადგურდა. იმ ადამიანებმა, იმ პოლიტიკურმა თუ გავლენიანმა ჯგუფებმა დასავლეთიდან, ვინც უკრაინის ქმედებებს ხელს უწყობდა, ტრამპის დღევანდელი ნარატივის საწინააღმდეგოდ მოქმედებდა და აქეზებდა, გახსოვთ, თურქეთში ფაქტობრივად შემდგარი მოლაპარაკებების ჩაშლა ბრიტანელების, ჯონსონის მხრიდან. სიტუაცია შუაში არის გაჭედილი, ვიღაცამ რაღაც მოიგო, ვიღაცამ რაღაც წააგო და ერთადერთი ქვეყანა, რომელმაც აპრიორი ვერაფერი მოიგო საერთოდ – რაც უნდა ვიკამათოთ, რუსეთმა რა მოიგო, რა წააგო, დასავლეთის, ნატო-ს ქვეყნებმა რა მოიგეს ან წააგეს – ბოლოს, ფინალი ეს არის, რომ ერთადერთი ქვეყანა, რომელიც განადგურდა და არანაირი სარგებელი იოტისოდენა არ მიუღია, ეს არის უკრაინა. ასჯერ მეტად შეიძლებოდა, გაწირულიყო საქართველო. ჩვენი ბუნებრივი რეფლექსია, რომ გადავრჩეთ“, – განაცხადა მამუკა მდინარაძემ.

2030 წლისთვის საქართველოს ევროკავშირში გაწევრიანება მიღწევადია, – ამის შესახებ საქართველოს პრემიერ-მინისტრი ირაკლი კობახიძე „ევრონიუსთან“ ექსკლუზიურ ინტერვიუში აცხადებს.

პრემიერი ევროკავშირში გაწევრიანებაზე მოლაპარაკებების პროცესში ბრიუსელის მეტი მოქნილობის საჭიროებაზე საუბრობს.

როგორც ირაკლი კობახიძე ინტერვიუში აღნიშნავს, ბურთი ახლა ბრიუსელის მოედანზეა და გაერთიანებას ახალი წევრებისადმი მიდგომებში მეტი მოქნილობა სჭირდება. მისივე თქმით, საქართველოს ევროპულ ბიუროკრატიასთან აქვს საკმაოდ მნიშვნელოვანი გამოწვევები, თუმცა ის საკმაოდ ოპტიმისტურად არის განწყობილი, რომ ქვეყანა 2030 წელს ევროკავშირის წევრი გახდება.

„ჩვენ განუხრელად ვივლით ამ მიზნისკენ და ვიმედოვნებთ, რომ მომდევნო წლებში საქართველოსადმი მიდგომა უფრო სამართლიანი იქნება”, – აცხადებს პრემიერ-მინისტრი.

როგორც „ევრონიუსი“ წერს, ირაკლი კობახიძის შეფასებით, დღეს რომ საქართველოსა და ევროკავშირს შორის ჯანსაღი ურთიერთობები არ არის, ამის მიზეზია არა საქართველოს პოლიტიკა, არამედ ევროპული ბიუროკრატიული პოლიტიკა საქართველოს მიმართ და თუკი ეს პოლიტიკა შეიცვლება, ყველაფერი გამოსწორდება.

„ჩვენი ურთიერთობების ამჟამინდელი მდგომარეობა ჩვენთვის მიუღებელია. ჩვენ დაინტერესებული ვართ ევროკავშირთან ჯანსაღი ურთიერთობებით, რასაც ამ ეტაპზე ვერ ვხედავთ. მაგრამ ჩვენ დარწმუნებული ვართ, რომ ამის მიზეზია არა საქართველოს პოლიტიკა, არამედ ევროპული ბიუროკრატიული პოლიტიკა საქართველოს მიმართ. ასე რომ, თუკი ეს პოლიტიკა შეიცვლება, ყველაფერი გამოსწორდება“, – აცხადებს ირაკლი კობახიძე.

პარტია „ხალხის ძალის“ წევრი თამარ ჩიბურდანიძე სოციალურ ქსელში ეხმიანება საპარლამენტო უმრავლესობის ლიდერის ინიციატივას – პარლამენტმა ქართული გამჭვირვალობის კანონის ნაცვლად, ამერიკული FARA მიიღოს.

„ეს არის ის, რაც სჭირდება ჩვენს ქვეყანას! ამ კანონის ამოქმედების შემდეგ სავარაუდოდ, საერთაშორისო ორგანიზაციები, რომლებიც მთელი ამ წლების განმავლობაში ირიბად ქართული პოლიტიკის მართვით იყვნენ დაკავებულნი, ფუნქციონირებას შეწყვეტენ საქართველოში“- წერს ექსპერტი და აღნიშნავს, რომ ქართული გამჭვირვალობის კანონი მსუბუქი იყო იმისთვის, რომ მდიდარი ენჯეო სექტორისთვის პოლიტიკური პროცესების მართვა შეეზღუდა, ამერიკული FARA კი ამას ნამდვილად შეძლებს. თამარ ჩიბურდანიძემ აღნიშნა, რომ ვერავინ გაბედავს ამერიკულ FARA-ს რუსული კანონი უწოდოს, მათ შორის, ვერ აშშ-ს მოქმედი ელჩი საქართველოში ვერ მიბაძავს თავის წინამორბედს და ვერც მიაყენებს შეურაცხყოფას საკუთარ სახელმწიფოს.

“ორი წლის წინ, როდესაც “ხალხის ძალამ” წარადგინა კანონი გამჭვირვალობის შესახებ, მაშინვე იყო საუბარი, რომ ეს ძალიან მსუბუქი კანონია და შესაბამის შედეგს ვერ მოგვცემდა, რომელიც დაიცავდა სახელმწიფო უსაფრთხოებას უცხო ქვეყნის ფინანსების გავლენებისგან. თუმცა, ყველას კარგად გვახსოვს, თუ რა მოჰყვა იმ მსუბუქ კანონსაც და რამხელა ბულინგი წამოვიდა ჩვენზე, როგორ მოატყუეს საზოგადოება და გამოიყვანეს ქუჩაში.

მიუხედავად იმისა, რომ შარშან პარლამენტმა მაინც მიიღო “გამჭვირვალობის შესახებ კანონი”, ეს კანონი ვერ მოგვცემდა სათანადო შედეგს, რადგან იყო მსუბუქი და ნებაყოფლობითი. ჩვენს მილიონერ ენჯეო სექტორს, რომელიც უცხო ფულით ქართულ პოლიტიკას მართავდა, ეს მსუბუქი კანონი ვერ შეაჩერებდა.

ამიტომ, მივესალმებით საპარლამენტო უმრავლესობის ლიდერის მიერ გაცხადებულ ინიციატივას ამერიკული FARA-ს ასლი კანონის მიღების თაობაზე. ეს არის ის, რაც სჭირდება ჩვენს ქვეყანას! ამ კანონის ამოქმედების შემდეგ სავარაუდოდ, საერთაშორისო ორგანიზაციები, რომლებიც მთელი ამ წლების განმავლობაში ირიბად ქართული პოლიტიკის მართვით იყვნენ დაკავებულნი, ფუნქციონირებას შეწყვეტენ საქართველოში, რადგან მათ აღარ მიეცემათ ამის საშუალება.

აბა, ვინ გაბედავს დღეს და ეტყვის დონალდ ტრამპს, რომ ამერიკული კანონი რუსულია? აბა, ვინ ჩადგება რიგში კიდევ ერთხელ ჩვენი ბულინგისთვის? ვინ დააპირებს ამ საკითხზე კიდევ ერთხელ ახალგაზრდების გაბრიყვებას? აბა, გაბედოს ამერიკის ელჩმა და კელი დეგნანის მსგავსად, შეურაცხყოფა მიაყენოს საკუთარ ქვეყანას და “რუსულად” მონათლოს ამერიკული კანონი?! დღეს მსოფლიოში ახალი ეპოქა დაიწყო და ვინც ამ წესებს არ მიჰყვება, დროის მანქანა გადაუვლის.

ჩვენ კი, სულ მალე, სიხარულით ვიტყვით იმ სიტყვებს, რაც გვსურდა 2 წლის წინ გვეთქვა: -Welcome to Georgia FARA!“- წერს თამარ ჩიბურდანიძე სოციალურ ქსელში.

პარლამენტმა მესამე მოსმენით განიხილა და მიიღო „ადმინისტრაციულ სამართალდარღვევათა კოდექსში“ ცვლილების შესახებ კანონპროექტი, თანმდევ კანონპროექტებთან ერთად. ინფორმაციას ამის შესახებ პარლამენტი ავრცელებს.

როგორც უწყება წერს, ცვლილებების თანახმად, იზრდება ადმინისტრაციული პატიმრობის ვადები.

„ადმინისტრაციული სამართალდარღვევისთვის პასუხისმგებლობის დამამძიმებელ გარემოებებს ემატება ახალი გარემოებები; ზუსტდება ვადა, რომლის გასვლის შემდეგ პირი ითვლება ადმინისტრაციულ სახდელდაუდებლად; „ზუსტდება წვრილმანი ხულიგნობის ქმედების შემადგენლობა და სახდელთა ზომები; იცვლება ვანდალიზმთან დაკავშირებული სახდელთა ზომები; ადმინისტრაციულ სამართალდარღვევად განისაზღვრება სახელმწიფო პოლიტიკური თანამდებობის პირის, პოლიტიკური თანამდებობის პირის, სახელმწიფო მოსამსახურის, სახელმწიფო მოსამსახურესთან გათანაბრებული პირის ან/და საჯარო მოსამსახურის სიტყვიერი შეურაცხყოფა ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან დაკავშირებით; ზუსტდება შეკრების ან მანიფესტაციის ორგანიზებისა და ჩატარების წესის დარღვევისათვის ქმედების შემადგენლობები და იცვლება მათთვის განსაზღვრული სახდელთა ზომები.

ამასთანავე: განისაზღვრება სპონტანური შეკრება/მანიფესტაციის ცნება; რეგულირდება დროებითი კონსტრუქციის დემონტაჟის საკითხები; იკრძალება შეკრების ან მანიფესტაციის ჩატარება დახურულ სივრცეში/შენობაში, მესაკუთრის წინასწარი წერილობითი თანხმობის გარეშე; იკრძალება შეკრების ან მანიფესტაციის ჩატარებისას შენობების შესასვლელების, ავტომაგისტრალების, ხიდების, გვირაბების, ესტაკადების, მუნიციპალიტეტის მიერ განსაზღვრული სატრანსპორტო კვანძებისა და რკინიგზის ბლოკირება“, – ნათქვამია პარლამენტის მიერ გავრცელებულ ინფორმაციაში.

პარლამენტმა პლენარულ სხდომაზე, „საჯარო სამსახურის შესახებ“ კანონში ცვლილების თაობაზე კანონპროექტი მესამე მოსმენით მიიღო. ცვლილების თანახმად, ზუსტდება საჯარო დაწესებულებაში ადმინისტრაციული ხელშეკრულებით დასაქმებულ პირთან, საჯარო დაწესებულებაში საქართველოს სახელმწიფო ენის ცოდნასთან და 18 წლის ასაკის ქონის მოთხოვნებთან დაკავშირებული ცალკეული საკითხები, – ინფორმაციას საქართველოს პარლამენტი ავრცელებს.

„საკითხი პლენარულ სხდომაზე იურიდიულ საკითხთა კომიტეტის თავმჯდომარე არჩილ გორდულაძემ წარადგინა.

მისი განმარტებით, „საჯარო სამსახურის შესახებ“ კანონის მოქმედი ნორმების თანახმად, საჯარო დაწესებულების პირველადი სტრუქტურული ერთეულის ხელმძღვანელსა და მის მოადგილესთან დადებული ადმინისტრაციული ხელშეკრულებები წყდება შესაბამისი დაწესებულების ხელმძღვანელის უფლებამოსილების შეწყვეტისას. წარმოდგენილი კანონპროექტით კი ზუსტდება, რომ აღნიშნული ადმინისტრაციული ხელშეკრულებები შეწყდება შესაბამისი დაწესებულების ხელმძღვანელის უფლებამოსილების შეწყვეტის შემდეგ ამ დაწესებულების ხელმძღვანელის თანამდებობაზე განწესებული პირის უფლებამოსილების დაწყებისთანავე.

წარმოდგენილი ცვლილებებით, კანონში პირდაპირ მიეთითება, რომ ერთადერთი თანამდებობა, რომელზეც ქართული ენის ცოდნის მოთხოვნა პირდაპირ არ გავრცელდება, არიან მრჩევლები, გამომდინარე იქიდან, რომ უნდა არსებობდეს შესაძლებლობა სახელმწიფო პოლიტიკური თანამდებობის პირს ჰყავდეს უცხოენოვანი მრჩეველი.

გარდა ამისა, კანონპროექტი შეიცავს გარდამავალ დებულებას, რომლითაც წესრიგდება გარდამავალ პერიოდში არსებული რიგი სამართლებრივი ურთიერთობები“, – აღნიშნულია გავრცელებულ ინფორმაციაში.