სალომე ზურაბიშვილი სადაც არის იქ არ უქნია ღმერთს და რა პრემიერობაზე მელაპარაკებით? – ამის შესახებ პარტია „ქართული ოცნება – დემოკრატიული საქართველოს“ გენერალურმა მდივანმა კახა კალაძემ ჟურნალისტებს განუცხადა.

როგორც კალაძემ აღნიშნა, საქართველოს პრეზიდენტსა და ოპოზიციის წარმომადგენლებს შორის მოლაპარაკებები სასაცილოა.

„სალომე ზურაბიშვილი სადაც არის იქ არ უქნია ღმერთს და რა პრემიერობაზე მელაპარაკებით? სამპროცენტიანმა პარტიებმა რა მოლაპარაკებები უნდა აწარმოონ? უბრალოდ, სასაცილოა ეს ყველაფერი. ილაპარაკონ ერთმანეთში და იყო. არ გინახავთ ასეთი მოლაპარაკებები? შალიკოს ფანჩატურში შეიკრიბებოდნენ, მერე გამოდიოდნენ და ხელებს უწევდნენ ერთმანეთს, ვითომ ვიღაცამ რაღაცაში გაიმარჯვა. იგივე ხდება დღეს და ხვალ და ზეგაც იგივე მოხდება. ეს არის მოცემულობა“, – განაცხადა კალაძემ.

ოპოზიციამ და მიკერძოებულმა ადგილობრივმა დამკვირვებლებმა, რაც არ უნდა სცადონ, რომ გაზვიადებულად წარმოაჩინონ საკითხები, ეუთო/ოდირის დასკვნაში აისახა, რომ წინასაარჩევნო კამპანია მიმდინარეობს მშვიდ გარემოში, – ამის შესახებ საქართველოს პარლამენტის თავმდჯომარე შალვა პაპუაშვილმა ჟურნალისტებს გურჯაანში განუცხადა.

მისი თქმით, ეუთო/ოდირის შუალედურ დასკვნაში მმართველი პარტიის მხრიდან არც ადმინისტრაციული რესურსების გამოყენებაზე, ძალადობასა, თუ სხვა პრეტენზიებზე არ არის საუბარი, რომლებიც კლასიკურად აქვს ხოლმე ოპოზიციას, არამედ პირიქით, აღნიშნულია, რომ საარჩევნო პროცესი მშვიდ გარემოში მიდის.

„მნიშვნელოვანია ეუთო/ოდირის მიერ გამოქვეყნებული შუალედური დასკვნა. ფაქტია და ყველამ ნახა, რომ რაც არ უნდა სცადონ ოპოზიციამ და მიკერძოებულმა ადგილობრივმა დამკვირვებლებმა, რომ წარმოაჩინონ გაზვიადებულად საკითხები, ეუთო/ოდირის დასკვნაში ყველაფერი ეს აისახა. აისახა, რომ წინასაარჩევნო კამპანია არის მშვიდ გარემოში, რომ შეიძლება, არის მხოლოდ ცალკეული ექსცესები; სხვათა შორის, ესეც აღნიშნული აქვს ეუთო/ოდირს, როდესაც საუბარია დარღვევებზე, მაგალითად, პლაკატების ჩამოხევა და ა.შ, რომ „ქართული ოცნების“ წინააღმდეგაც იყო ეს დარღვევები. აღნიშნული აქვს მთავარ პრობლემად პოლარიზაცია და განსაკუთრებით პოლარიზაცია მედიაში, მათ შორის, იქ საუბარი არის სარეკლამო რგოლებთან დაკავშირებით, ხედავთ რთული მდგომარეობაა. ჩვენ მივაწოდეთ დათვლილი დეტალური ინფორმაცია, რამდენი წამი მოგვპარა „მთავარმა”, „ტვ პირველმა”, „ფორმულამ” „ქართულ ოცნებას“ და ჩაგვაყენა არათანაბარ მდგომარეობაში. სხვა პარტიებთან შედარებით, ჯამში ხუთ საათზე მეტი. ხუთ საათზე მეტი სარეკლამო დრო მოიპარა ამ სამმა ტელევიზიამ საკუთარი პარტიული ბოსების სასარგებლოდ. ჩვენ მივაწოდეთ ეს დეტალური ინფორმაცია და იმედი გვაქვს, რომ უკვე შემდეგ ანგარიშში ასახული იქნება ეს დეტალები. ორი კვირა დარჩა არჩევნებამდე, ორ კვირამდე პერიოდი შეჯამებულია. დაჯამებულია, რომ მშვიდი გარემოა, სადაც არც ადმინისტრაციული რესურსების გამოყენება, ძალადობა, თუ სხვა პრეტენზიები არ არის, რომლებიც კლასიკურად აქვს ხოლმე ოპოზიციას, ამ მხრივ არანაირი განსაკუთრებული მდგომარეობა არ არის. პირიქით, აღნიშნულია, რომ მშვიდ გარემოში მიდის მთელი ეს პროცესი“, – განაცხადა შალვა პაპუაშვილმა.

ეუთო-ს დემოკრატიული ინსტიტუტებისა და ადამიანის უფლებათა ოფისმა (ODIHR) საქართველოში წინასაარჩევნო გარემოსთან დაკავშირებით შუალედურ ანგარიში გამოაქვეყნა, რომელშიც 11 სექტემბრიდან 9 ოქტომბრამდე პერიოდია მიმოხილული.

გივი თარგამაძის მკვლელობის მცდელობის საქმეზე მსჯავრდებულ დარჩო ხეჩუაშვილის ჩვენებას და პროკურატურის განცხადებას საქართველოს ყოფილი პრეზიდენტი, მიხეილ სააკაშვილი სოციალურ ქსელში ეხმაურება.

სააკაშვილი პროკურატურის ინფორმაციას, რომლის მიხედვითაც, თარგამაძის კონტროლის და თვალთვალის ბრძანება ყოფილმა პრეზიდენტმა გასცა, ამაზრზენს უწოდებს.

„ვაი, თქვენს პატრონს! მორიგი ამაზრზენი ტყუილი ივანიშვილის რუსული „პროკურატურისგან“. აი, ამ აბსურდულმა და ამორალურმა ბრალდებამ უნდა დაგანახოთ, რომ ყველა სხვა საქმე ჩემს მიმართ, შეთითხნილი და თითიდანაა გამოწოვილი და რომ საპატიმროში აბსოლუტურად ტყუილად მამყოფებენ”, – წერს სააკაშვილი.

„ნაციონალური მოძრაობის“ წევრის, გივი თარგამაძის დამამძიმებელ გარემოებებში მკვლელობის მცდელობის ფაქტზე ძებნილმა პირმა, რომელიც სამართალდამცავებმა 20 სექტემბერს დააკავეს, გამოძიებას ჩვენება მისცა, რომლის მიხედვითაც, გივი თარგამაძის კონტროლისა და თვალთვალის დავალება მიხეილ სააკაშვილმა გასცა. ის ყოფილ პრეზიდენტთან ერთად ასახელებს ამჟამად უკრაინაში მყოფი, საქართველოს შინაგან საქმეთა მინისტრის ყოფილი მოადგილის, გია ლორთქიფანიძის სახელსა და გვარსაც.

დარჩო ხერჩუაშვილს 18 წლით თავისუფლების აღკვეთა აქვს მისჯილი.

საერთაშორისო დამკვირვებლებმა ყურადღება უნდა მიაქციონ იმ ფაქტს, რომ სალომე ზურაბიშვილის ჩართულობა წინასაარჩევნო პროცესებში კონკრეტული პოლიტიკური ძალის, კოლექტიური „ნაცმოძრაობის“ სასარგებლოდ პირდაპირ და უხეშად ეწინააღმდეგება დემოკრატიული არჩევნების პრინციპებს, – ამის შესახებ „ქართული ოცნების“ საარჩევნო შტაბის ხელმძღვანელმა, პრემიერ-მინისტრმა ირაკლი კობახიძემ პარტიის ცენტრალურ ოფისში გამართულ ბრიფინგზე განაცხადა.

მისი თქმით, სალომე ზურაბიშვილი არის ერთ-ერთი პატარა რგოლი იმ პოლიტიკურ ძალაში, რასაც ჰქვია კოლექტიური „ნაცმოძრაობა.“

როგორც კობახიძემ აღნიშნა, როგორც საქართველოს კონსტიტუციის, ისე ზოგადად, საპარლამენტო სისტემებში, პრეზიდენტი უნდა იყოს ზეპარტიული.

„ამ ადამიანებს ჰყავთ ერთი პატრონი, სალომე ზურაბიშვილი არის ერთ-ერთი პატარა რგოლი იმ პოლიტიკურ ძალაში, რასაც ჰქვია კოლექტიური „ნაცმოძრაობა.“ რა თქმა უნდა, მის ჩართულობას ვერავითარი გავლენა ვერ ექნება არჩევნების შედეგებზე, მაგრამ აუცილებლად საერთაშორისო დამკვირვებლებმა ყურადღება უნდა მიაქციონ იმ ფაქტს, რომ სალომე ზურაბიშვილის ჩართულობა წინასაარჩევნო პროცესებში კონკრეტული პოლიტიკური ძალის, კოლექტიური „ნაცმოძრაობის“ სასარგებლოდ პირდაპირ და უხეშად ეწინააღმდეგება დემოკრატიული არჩევნების პრინციპებს. ჩვენი კონსტიტუციის თანახმად, ზოგადად, საპარლამენტო სისტემაშიც, პრეზიდენტი უნდა იყოს ზეპარტიული, არის ეუთო/ოდირის არაერთი დასკვნა, სადაც გაკრიტიკებულია პრეზიდენტის ჩართულობა საარჩევნო პროცესებში კონკრეტული პოლიტიკური ძალების სასარგებლოდ, სხვა ქვეყნების მაგალითებზე მაქვს საუბარი. ძალიან მნიშვნელოვანი იქნება, თუ ამაზეც გამახვილდება ყურადღება, მით უმეტეს, რომ სალომე ზურაბიშვილმა დააანონსა 26 ოქტომბერს რადიკალური ოპოზიციის, კოლექტიური „ნაცმოძრაობის“ საარჩევნო შტაბის გახსნა საქართველოს პრეზიდენტის ოფისში. წარმოიდგინეთ, სახელმწიფო ინსტიტუტის შენობას იყენებს, რათა გაიხსნას კოლექტიური „ნაცმოძრაობის“ საარჩევნო შტაბი; ერთად ვიზეიმოთ გამარჯვებაო – ასეთი განცხადება გააკეთა, სინამდვილეში, ერთად მოუწევთ, იზეიმონ ძალიან მძიმე, მორიგი მეცხრე მარცხი, რასაც განიცდის აუცილებლად კოლექტიური „ნაცმოძრაობა“ და წინასწარ ვულოცავ ამ მორიგ მარცხს სალომე ზურაბიშვილს და მის მეგობარ პარტიას“, – განაცხადა კობახიძემ.

„ერთიანი ნეიტრალური საქართველოს“ წევრი ლევან ნიკოლეიშვილი NDI-ის ყოფილი ხელმძღვანელის და მაკკეინის ინსტიტუტის გლობალური დემოკრატიის პროგრამების დირექტორის, ლორა თორნტონის ანგარიშს ეხმიანება, სადაც აღნიშნავს, რომ რამდენიმე ქართული არასამთავრობო ორგანიზაცია ქართველი ხალხისთვის უვიზო რეჟიმის შეჩერების მომხრეა.

როგორც ნიკოლეიშვილი აღნიშნავს, არასამთავრობოების აზრით, თუ უვიზო მიმოსვლა შეჩერდება, ეს ყველაფერი ხელისუფლებას დაჰბრალდება, შემდეგ აღშფოთებული ხალხი გარეთ გამოვა და მათ შეუერთდება რევოლუციისა განხორციელების „დიად“ საქმეში. იმაზე არავის უფიქრია, აღშფოთებულმა ხალხმა რომ ჯერ ის იკითხოს, ვისი ინიციატივით შეჩერდა ვიზალიბერალიზაცია?

„მითხარით, სხვას რას ჰქვია მტრობა საკუთარი ხალხის მიმართ? შეიძლება სიტყვები „საკუთარი ხალხი“, ცოტა გადაჭარბებულად მოგეჩვენოთ, როდესაც არასამთავრობო სექტორის იმ წარმომადგენლებზე ვსაუბრობთ, რომლებიც ქართველი ხალხისთვის, ევროკავშირის ქვეყნებში უვიზო რეჟიმის შეჩერებას ითხოვენ. არასამთავროებმა, თითქოს მარტივი, მაგრამ უკიდურესად მუხანათური გეგმა მოიფიქრეს, რომელიც აგერ მათმა მეგობარმა ლორა თორტონმა გაამჟღავნა. ე.ი. მათი აზრით, თუ უვიზო მიმოსვლა შეჩერდება, ეს ყველაფერი ხელისუფლებას დაჰბრალდება, შემდეგ აღშფოთებული ხალხი გარეთ გამოვა და მათ შეუერთდება რევოლუციისა განხორციელების „დიად“ საქმეში. იმაზე არავის უფიქრია, რომ აღშფოთებულმა ხალხმა, რომ ჯერ ის იკითხოს ვისი ინიციატივით შეჩერდა ვიზალიბერალიზაცია? მანამდეც, ხომ იგივე ხალხი დარბოდა ევროსტრუქტურების კაბინეტებსა თუ კორიდორებში და საქართველოსათვის კანდიდატის სტატუსის არ მინიჭებას იხვეწებოდა?! ხალხს, რომ მტრობენ ეგ ხომ ისედაც ვიცოდით, უბრალოდ უკვე ძალიან მალ-მალე უსკდებათ ბოროტი საქმეები“, – წერს ლევან ნიკოლეიშვილი Facebook-ზე.

საარჩევნო ადმინისტრაციის თანამშრომლებზე ზეწოლა ხორციელდება, – აღნიშნულთან დაკავშირებით დღეს ცესკო-ში გამართულ ბრიფინგზე ცესკო-ს თავმჯდომარემ, გიორგი კალანდარიშვილმა განაცხადა.

როგორც ცესკო-ს თავმჯდომარემ განაცხადა, ადმინისტრაციის ზოგიერთმა თანამშრომელმა მიიღო სატელეფონო შეტყობინებები, რომლითაც მათ მოუწოდებენ, უარი თქვან არჩევნების ორგანიზებაში მონაწილეობაზე, დატოვონ სამსახური და ამის შესახებ საჯარო განცხადება გააკეთონ.

„სატელეფონო შეტყობინება თანამშრომლებმა ერთი და იმავე ნომრიდან მიიღეს. აქვე უნდა აღინიშნოს, რომ ყველა შეტყობინებაში მითითებულია ადრესატის სახელი, რაც ადასტურებს, რომ შეტყობინების ავტორისთვის ცნობილია ჩვენი კოლეგების შესახებ პერსონალური ინფორმაცია და მათი ვინაობა ხაზგასმით ვაცხადებთ, რომ ჩვენთვის კატეგორიულად მიუღებელია თანამშრომლებზე მსგავსი ტიპის ზეწოლა, მაშინ, როდესაც საარჩევნო ადმინისტრაციის მოხელეები თავდაუზოგავად მუშაობენ არჩევნების მაღალპროფესიულ დონეზე ჩასატარებლად. ჩვენ აუცილებლად დავიცავთ მათ ინტერესებს და გამოვიყენებთ ყველა სამართლებრივ გზას მათი კანონიერი უფლებების დასაცავად. შეტყობინების ადრესატი ჩვენი კოლეგები საარჩევნო ადმინისტრაციის გუნდთან ერთად აგრძელებენ მუშაობას და მსგავსი ზეწოლა ხელს ვერ შეუშლის ინსტიტუციის გამართულ ფუნქციონირებას“, – განაცხადა კალანდარაშვილმა.

მისივე თქმით, სამწუხაროდ, აქამდეც იყო მსგავსი ფაქტები, როდესაც ადგილი ჰქონდა საარჩევნო ადმინისტრაციის თანამშრომლების მოსყიდვის, მათ მიმართ მუქარის თუ ზემოქმედების სხვა ფორმების გამოყენების მცდელობებს.

„არ გამოვრიცხავთ, რომ ზემოთ ხსენებული ფაქტიც წარმოადგენს ადმინისტრაციაზე ზეწოლისა და მისი დისკრედიტაციის კამპანიების ნაწილს, რომლებიც წლებია, მიზანმიმართულად ხორციელდება და საზოგადოებას ამის შესახებ კარგად მოეხსენება. ბუნებრივია, ასეთი ტენდენციები, უკვე არსებულ პოლარიზებულ გარემოს მეტად ამძიმებს, უფრო რთულს ხდის და არჩევნების მთლიანობას აზიანებს.

მინდა, მოვუწოდო საარჩევნო ადმინისტრაციის – საოლქო და საუბნო საარჩევნო კომისიის თანამშრომლებს, არ აჰყვეთ მსგავს პროვოკაციებს. ჩვენ არავის მივცემთ საშუალებას, ხელი შეუშალონ თქვენს პროფესიულ საქმიანობას. აქვე, მივმართავ იმ პირებს თუ ჯგუფებს, ვინც გეგმავს და ახორციელებს მსგავს პროვოკაციებს. პროცესის დაზიანება არცერთი დაინტერესებული მხარისთვის არ იქნება სასარგებლო და შედეგის მომტანი“, – განაცხადა კალანდარიშვილმა.

მისივე თქმით, მიუხედავად ნებისმიერი დესტრუქციული მცდელობებისა, საარჩევნო ადმინისტრაცია საქმიანობას წარმართავს მაღალპროფესიულ დონეზე, კანონმდებლობასთან სრულ შესაბამისობაში და უზრუნველყოფს არჩევნების საერთაშორისო სტანდარტით ჩატარებას.

„ჩვენი მხრივ კი, კიდევ ერთხელ გვინდა დავადასტუროთ, რომ მიუხედავად ნებისმიერი დესტრუქციული მცდელობებისა, საარჩევნო ადმინისტრაცია საქმიანობას წარმართავს მაღალპროფესიულ დონეზე, კანონმდებლობასთან სრულ შესაბამისობაში და უზრუნველყოფს არჩევნების საერთაშორისო სტანდარტით ჩატარებას. საარჩევნო ადმინისტრაცია ტრადიციულად იქნება თავისი თანამშრომლების კანონიერი ინტერესების დამცველი და არ დაუშვებს თანამშრომლებზე ზეწოლას მათთვის პროფესიულ საქმიანობაში ხელის შეშლისა ან სხვაგვარი ზემოქმედების მოხდენის მიზნით. ამ ინტერესების შელახვის ყოველ ფაქტთან დაკავშირებით კი მიღებული იქნება კანონით გათვალისწინებული ყველა ზომა, მათ შორის ინფორმირებული იქნება ყველა საერთაშორისო პარტნიორი“, – განაცხადა გიორგი კალანდარიშვილმა.

მაკკეინის ინსტიტუტის ანგარიშის თანახმად, „ქართული ოცნების“ განცხადება, რომ ოპოზიცია საქართველოს კონფლიქტში ჩაითრევს, პრაქტიკულად ყველა გამოკითხულის აზრით, მძლავრი გზავნილია.

„მაკკეინის ინსტიტუტის“ გლობალური დემოკრატიის პროგრამების დირექტორის, საქართველოში NDI-ის ოფისის ყოფილი ხელმძღვანელის, ლორა თორნტონის მიერ 26 ოქტომბრის საპარლამენტო არჩევნების წინ მომზადებული ანგარიში მაკკეინის ინსტიტუტის ვებგვერდზე 17 სექტემბერს გამოქვეყნდა.

ანგარიშის თანახმად, ეს დოკუმენტი ეფუძნება „საქართველოს მეგობრების“ მისიას თბილისში, რომელიც 2-8 სექტემბერს შედგა.

„„ქართულ ოცნებას“ აქვს რამდენიმე საარჩევნო ტაქტიკა და ნარატივი, რომელთაგან ბევრი მხარდაჭერილია ან გაძლიერებულია რუსეთის მიერ. უპირველეს ყოვლისა, „ქართული ოცნება“ არჩევნებს წარმოადგენს როგორც არჩევანს ომსა და მშვიდობას შორის. ისინი ამტკიცებენ, რომ ოპოზიცია (რომელსაც ისინი აღნიშნავენ როგორც „კოლექტიური ერთიანი ნაციონალური მოძრაობა“) საქართვლოს კონფლიქტში ჩაითრევს. შიშზე დაფუძნებული ეს გზავნილი, პრაქტიკულად ყველა გამოკითხულის აზრით, მძლავრია. რამდენიმე სამოქალაქო ლიდერმა განმარტა, რომ ქართველები მართებულად იყვნენ შეშფოთებული კონფლიქტით, რადგან მათ დასავლეთისგან უსაფრთხოების გარანტიები არ უნახავთ“, – ნათქვამია ანგარიშში.

როგორც ამავე ანგარიშშია ნათქვამი, „ქართული ოცნების“ საარჩევნო კამპანია ასევე ცდილობს, გაყიდოს გზავნილი, რომ პარტია კვლავ პროევროპულია, „ევროკავშირის მიმართ პარტიის მხრიდან კრიტიკული და შეურაცხმყოფელი რიტორიკისა და კანდიდატობის სტატუსისთვის გათვალისწინებული რეფორმების გაგრძელებაზე უარის თქმით მიუხედავად.“ დოკუმენტის თანახმად, ამის ნაწილია მათ ბილბორდებზე ევროკავშირის დროშის გამოსახულებები.

„„ქართული ოცნების“ ლიდერები ამტკიცებენ, რომ მათ შეუძლიათ, ევროკავშირში „საკუთარი პირობებით“ და „ღირსებით“ შესვლა, რაშიც გულისხმობენ, რომ მათ შეუძლიათ, გვერდი აუარონ ევროკავშირის მოთხოვნებს და გაიტანონ ადამიანის უფლებების შემზღუდავი კანონმდებლობა, რომელიც ევროკავშირის ღირებულებებს ეწინააღმდეგება. „ქართული ოცნების“ ლიდერები მიუთითებენ, რომ ევროკავშირში არიან სხვა არალიბერალი წევრები და საქართველოს შეუძლია, უნგრეთის რიგს შეუერთდეს. ამიტომ, ევროკავშირის ზომების დაკმაყოფილების ნაცვლად, „ქართული ოცნება“ ატარებს „ტრადიციული ღირებულებების“ მხარდამჭერ კამპანიას, იღებს ანტი-LGBTQ კანონმდებლობას, რომელიც არამხოლოდ შეზღუდავს უფლებებს, არამედ შეზღუდავს სიტყვისა და შეკრების თავისუფლებას და წარადგენს ზომებს, რაც ქართული მართლმადიდებელი ეკლესიას სახელმწიფო რელიგიად განსაზღვრავს. როგორც ბიძინა ივანიშვილმა შეაჯამა, ეს არჩევნები არის არჩევანი „ომსა და მშვიდობას“, „მონობას და დამოუკიდებლობას“ და „მორალურ დეგრადაციასა და ქრისტიანულ ღირებულებებს“ შორის“, – ნათქვამია ლორა თორნტონის ანგარიშში.