ჩვენ გვინდა, განვაახლოთ სუფთა ფურცლიდან აშშ-თან სტრატეგიული პარტნიორობა და ამასთან, განვაახლოთ ეს პარტნიორობა კონკრეტული გზამკვლევით, სადაც იქნება ასახული ორმხრივი სარგებელი, ორივე სახელმწიფოსთვის. ეს არის ძალიან ღია, მკაფიო გზავნილი და ამ გზავნილზე დადებით პასუხს არ აქვს ალტერნატივა, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს ბუდაპეშტში განუცხადა.

კობახიძემ იმედი გამოთქვა, რომ „დიფ სთეითზე“ გაიმარჯვებს ტრამპის ადმინისტრაცია, რაც აუცილებელია, რათა რეალურად გადაიტვირთოს ქართულ-ამერიკული ურთიერთობები“.

„ორმა მისალოცმა წერილმა ყველაზე კარგად წარმოაჩინა დაპირისპირება ტრამპის ადმინისტრაციასა და „დიფ სთეითს“ შორის. აშკარად ჩანს სხვადასხვა დინება. პირველი წერილი, რომელიც რუბიოს სახელით იყო გამოგზავნილი, აშკარად იყო შედგენილი „დიფ სთეითის“ გავლენით და ამის შემდეგ გავრცელდა უკვე პრეზიდენტ ტრამპის წერილი, რომელიც პროტოკოლის სრული დაცვით იყო შედგენილი. ეს დაპირისპირება გრძელდება, ეს არ არის მარტივი დაპირისპირება, გამომდინარე იქიდან, რომ „დიფ სთეითს“ აქვს ძალიან დიდი რესურსები. ჩვენ იმედი უნდა დავიტოვოთ, რომ გაიმარჯვებს ტრამპის ადმინისტრაცია, რაც აუცილებელია, რათა რეალურად გადაიტვირთოს ქართულ-ამერიკული ურთიერთობები. ჩვენი გზავნილი საზოგადოებისთვის და ამერიკული მხარისთვის ცნობილია – ჩვენ გვინდა, განვაახლოთ სუფთა ფურცლიდან სტრატეგიული პარტნიორობა და ამასთან, განვაახლოთ პარტნიორობა კონკრეტული გზამკვლევით, სადაც იქნება ასახული ორმხრივი სარგებელი ორივე სახელმწიფოსთვის. ეს არის ძალიან ღია, მკაფიო გზავნილი და ამ გზავნილზე დადებით პასუხს არ აქვს ალტერნატივა. ჩვენ მოთმინებით დაველოდებით ამერიკულ პოზიციას. იმედი გვაქვს, რეალურად მოხერხდება ამ პარტნიორობის განახლება“, – განაცხადა პრემიერმა.

საფრანგეთის საელჩო საკუთარ მოქალაქეებს მიმართავს, საქართველოში გამგზავრებამდე შეამოწმონ ის ფაქტორები, რომლებიც შესაძლოა, მათთვის საქართველოში შესვლაზე უარის თქმის რისკს ქმნიდეს, მათ შორის საქართველოში დემონსტრაციებში მონაწილეობა ან აქტივობა სოციალურ ქსელებში.

„საქართველოს ტერიტორიაზე შესვლა, შეიძლება, აეკრძალოს საქართველოს ბინადრობის მოქმედი ნებართვის მფლობელსაც კი. მოგზაურებს ვთხოვთ, მოგზაურობის წინ შეამოწმონ ის ფაქტორები, რომლებიც მათთვის საქართველოს ტერიტორიაზე შესვლაზე უარის თქმის რისკს ქმნის, მათ შორის საქართველოში დემონსტრაციებში მონაწილეობა ან სოციალურ მედიაში აქტივობა. საქართველოს ტერიტორიაზე ხელახალი შემოსვლა, შესაძლოა, განპირობებული იყოს ამგვარ დემონსტრაციებში სავარაუდო მონაწილეობისთვის მსხვილი ჯარიმების დაუყოვნებლივ გადახდით“, – ნათქვამია საფრანგეთის საელჩოს განცხადებაში.

მანამდე მსგავსი გაფრთხილება გაავრცელა საქართველოში პოლონეთის საელჩომ.

კანონს როცა უხეშად არღვევ და გირაოს არ იხდი, მზად უნდა იყო, რომ პასუხისმგებლობა აიღო, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა.

მახაშვილის თქმით, „ნიკა მელია კარგად აცნობიერებს იმ ფასს, რაც შეიძლება, მოჰყვეს მის პოლიტიკურ თამაშებს“.

„პროკურატურა რას მოითხოვს და სასამართლოს როგორი გადაწყვეტილება ექნება, ამის თქმა წინასწარ გამიჭირდება, როგორც პოლიტიკოსს, მაგრამ წინა გამოცდილებების გათვალისწინებით, იგივე მოლოდინი მაქვს, რაც ჯაფარიძესთან დაკავშირებით დადგა. იგივე მოლოდინი აქვს მასაც. ნიკა მელია კარგად აცნობიერებს იმ ფასს, რაც ამ პოლიტიკურ თამაშებს შეიძლება, მოჰყვეს. შესაბამისად, ეს ადამიანი პოლიტიკურ თამაშს თამაშობს“, – განაცხადა ლევან მახაშვილმა.

მოხარული ვარ, რომ მქონდა პატივი, მიმემართა კონსერვატიული პოლიტიკური მოქმედების კონფერენციის მონაწილეებისთვის ბუდაპეშტში, სადაც საქართველოს სახელით გამოვედი. ვისაუბრე იმ ქვეყნის სახელით, რომელიც მტკიცედ დგას აღმოსავლეთისა და დასავლეთის გზაჯვარედინზე, – ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ X-ში წერს.

მთავრობის მეთაური აღნიშნავს, რომ გლობალური გამოწვევების ფონზე უმნიშვნელოვანესია, ერებს ჰქონდეთ უფლება, თავად განსაზღვრონ საკუთარი მომავალი და შეინარჩუნონ თავიანთი ფასეულობები.

„საქართველო ერთგულია ძლიერი საერთაშორისო პარტნიორობის მშენებლობის იდეისადმი და ამასთან ერთად, იცავს საკუთარ უნიკალურ მემკვიდრეობას. ჩვენ განვაგრძობთ სუვერენიტეტის, მშვიდობისა და დემოკრატიის პრინციპების მხარდაჭერას ამ ცვლებად სამყაროში“, – წერს ირაკლი კობახიძე.

https://x.com/PM_Kobakhidze/status/1928034028935860365?ref_src=twsrc%5Etfw%7Ctwcamp%5Etweetembed%7Ctwterm%5E1928034028935860365%7Ctwgr%5E7470e70cf8b7c4727aeed34278dc906411440a95%7Ctwcon%5Es1_&ref_url=https%3A%2F%2F1tv.ge%2Fnews%2Firakli-kobakhidze-umnishvnelovanesia-erebs-hqondet-ufleba-tavad-gansazghvron-sakutari-momavali-saqartvelo-ertgulia-dzlieri-saertashoriso-partniorobis-ideis-amastan-icavs-sakutar-unikalur-memkvi%2F

საქართველოში აქციებში, რომელიც რადიკალების მიერ იმართებოდა, უცხო ქვეყნის მოქალაქეებიც მონაწილეობდნენ. შესაბამისად, პოლონეთის საელჩოს მხრიდან გაკეთებული განცხადება ერთგვარი აღიარებაა, რომ ადამიანები აქციებში მონაწილეობას ამ ქვეყნიდანაც იღებდნენ, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.

მათიკაშვილი აღნიშნული კომენტარით პოლონეთის საელჩოს განცხადებას გამოეხმაურა.

„ადამიანს სამართალდარღვევა თუ არ ჩაუდენია, საქართველოში შემოსვლაზე არანაირი პრობლემა არ ექნება. პირიქით, ჩვენი ქვეყანა ტურისტისთვის აბსოლუტურად ღიაა. იცით საქართველოში ტურიზმის მზარდი ტემპის შესახებ. კონკრეტული ქვეყნის საელჩო მსგავს განცხადებას როცა აკეთებს, შეგვიძლია, დავასკვნათ, რომ მას საკუთარი მოქალაქეების მიერ საქართველოში მოწყობილ რადიკალურ აქციებზე მონაწილეობის შესახებ სათანადო ინფორმაცია აქვს. გარკვეულწილად, ეს აღიარებაა, რომ პოლონეთის მოქალაქეები რადიკალების მიერ მოწყობილ ომის ინსცენირებაში მონაწილეობდნენ. ეს პარალელია, უბრალოდ ფაქტი, რომელიც შეგვიძლია, პოლონეთის საელჩოს განცხადებიდან გამომდინარე ვთქვათ. დანარჩენი, ცხადია, სამართალდამცავი ორგანოების საქმეა“, – განაცხადა დავით მათიკაშვილმა.

პოლონეთის საელჩომ საკუთარ მოქალაქეებს მიმართა, საქართველოში გამგზავრებამდე შეაფასონ ფაქტორები, რომლებიც შესაძლოა, ქვეყანაში შესვლაზე უარის თქმის საფუძველი გახდეს. „საქართველოს ხელისუფლებას აქვს სუვერენული უფლება, შეაფასოს უცხო ქვეყნის მოქალაქის შესვლის რისკფაქტორები. ასევე, ქვეყანაში შესვლაზე უარის თქმის გადაწყვეტილება, შეიძლება, საქართველოში ბინადრობის ნებართვის მფლობელებზეც გავრცელდეს. ასევე, გვსურს, თქვენი ყურადღება გავამახვილოთ იმაზე, რომ დემონსტრაციებში მონაწილეობისთვის, თუნდაც სავარაუდო მონაწილეობისთვის, უცხო ქვეყნის მოქალაქეებს, შესაძლოა, მაღალი ჯარიმები დაუწესდეთ, ხოლო საქართველოში ხელახლა შესვლის დროს, შესაძლოა, ეს ჯარიმები დაუყოვნებლივ გადაგახდევინონ„, – აღნიშნულია პოლონეთის საელჩოს განცხადებაში.

ჩვენ ვართ ევროპული ერი. ჩვენი ისტორია, ჩვენი კულტურა, ჩვენი იდენტობა ყოველმხრივ ევროპულია, მაგრამ ევროპულმა ბიუროკრატიამ უნდა აღიაროს ჩვენი უფლება სუვერენიტეტზე და დემოკრატიაზე, – ამის შესახებ საქართველოს პრემიერ-მინისტრმა ირაკლი კობახიძემ კონსერვატიული პოლიტიკური მოქმედების კონფერენციაზე სიტყვით გამოსვლისას განაცხადა.

მთავრობის მეთაურის თქმით, იყო პროევროპული, არ ნიშნავს იყო ანტიქართული.

„დღეს დასავლეთი დგას გზაჯვარედინზე, არა მხოლოდ პოლიტიკური, არამედ ცივილიზაციური დასავლეთიც, რომელიც ეფუძნება ქრისტიანულ და დემოკრატიულ ღირებულებებს. ჩვენ აქ იმისათვის შევიკრიბეთ, რომ დავიცვათ ჩვენი იდენტობა და ღვთისგან მონიჭებული უფლება ვიყოთ ის, ვინც ვართ. ჩვენ არ ვკამათობთ დასავლეთთან, რადგან თავად ვართ დასავლეთის ნაწილი — ჭეშმარიტი დასავლეთის, თავისუფლების, რწმენისა და ოჯახური ღირებულებების დასავლეთის და არა იმ Deep State-ის, რომელიც ცდილობს, მსოფლიო არაფრად აქციოს და თავი ყველაფრის მმართველად ჩათვალოს. ჭეშმარიტი, ღირებულებებზე დაფუძნებული დასავლეთი, ჩვენი დასავლეთი, ჯერ კიდევ ცოცხალია. ის ცოცხალია ისეთ ქვეყნებში, როგორიცაა უნგრეთი და ის ცოცხალია მილიონობით ადამიანის გულში მთელს ევროპაში და მის მიღმაც, ყველას გულში ვინც დაიღალა იმის მოსმენით, რომ საკუთარი სამშობლოს სიყვარული დანაშაულია.
ჩვენ ვართ ევროპული ერი. ჩვენი ისტორია, ჩვენი კულტურა, ჩვენი იდენტობა ყოველმხრივ ევროპულია, მაგრამ ევროპულმა ბიუროკრატიამ უნდა აღიაროს ჩვენი უფლება სუვერენიტეტზე და დემოკრატიაზე. იყო პროევროპული, არ ნიშნავს იყო ანტიქართული. ჩვენ გვწამს ერებისგან შემდგარი ევროპის, თავისი ძლიერი იდენტობით და სიამაყით ვდგავართ მათ გვერდით, უნგრეთში და მის მიღმაც, ვინც ჯერ კიდევ მიიჩნევს, რომ პატრიოტიზმი არის ღირსება და არა ცოდვა“, – განაცხადა პრემიერ-მინისტრმა.