ჩვენ მოხარული ვართ, რომ საქართველო ჩვენი სომეხი მეგობრებისთვის რჩება ტურისტულად მიმზიდველ ადგილად, ყოველ წელიწადს საქართველოს მილიონამდე სომეხი ტურისტი სტუმრობს და ჩვენნაირი პატარა ქვეყნებისთვის არის შთამბეჭდავი რაოდენობა, – ამის შესახებ საქართველოს პრემიერ-მინისტრმა ირაკლი კობახიძემ სომხეთის რესპუბლიკასა და საქართველოს შორის ეკონომიკური თანამშრომლობის ერთობლივი მთავრობათაშორისი კომისიის მე-14 სხდომაზე განაცხადა.

როგორც მთავრობის მეთაურმა აღნიშნა, ორივე მხარე აქტიურად მუშაობს რეგიონში უცხოელი ტურისტების მოსაზიდად.

„ტურიზმს აქვს განსაკუთრებული მნიშვნელობა ჩვენი ქვეყნისთვის არა მხოლოდ ეკონომიკური თვალსაზრისით, არამედ ტურიზმი არის კიდევ ერთი მნიშვნელოვანი ინსტრუმენტი იმისათვის, რომ კიდევ უფრო მეტად გაღრმავდეს ხალხთა შორის ურთიერთობები, რასაც ისედაც აქვს მყარი ისტორიული საფუძველი. აქედან გამომდინარე, მზად ვართ, რომ მაქსიმალურად შევუწყოთ ხელი ტურისტული კავშირების გამყარებას საქართველოსა და სომხეთს შორის.

სასიხარულოა, რომ ჩვენი ორივე მხარე აქტიურად ვმუშაობთ უცხოელი ტურისტების მოსაზიდად რეგიონში. ჩვენ უცხოელ ტურისტებს ვთავაზობთ ერთობლივ პაკეტებს და ტურებს, ამ მიმართულებითაც თანამშრომლობის გაღრმავება არის მნიშვნელოვანი ორივე ქვეყნისთვის. ასეთი ინიციატივები კიდევ უფრო მეტად შეუწყობს ხელს ჩვენი ქვეყნების საზღვარგარეთ ცნობადობის გაზრდას და მეტ ერთობლივ ეკონომიკურ აქტივობას.

მთლიანობაში კიდევ ერთხელ მინდა, გამოვხატო, დავადასტურო ჩვენი მზაობა, რომ მაქსიმალურად ვიზრუნოთ ჩვენს ქვეყნებს შორის ურთიერთობების კიდევ უფრო მეტად გაღრმავებისთვის, მათ შორის სავაჭრო-ეკონომიკური ურთიერთობების კიდევ უფრო მეტად გაღრმავებისთვის, ამისთვის არის მოწოდებული მთელი ჩვენი გუნდი და გვაქვს ძალიან მჭიდრო თანამშრომლობის იმედი მომავალშიც”, – განაცხადა ირაკლი კობახიძემ.

ჩვენთვის ძალიან მნიშვნელოვანია მჭიდრო თანამშრომლობა, იმისათვის, რომ ერთად დავიცვათ ჩვენი ქვეყნების ეროვნული ინტერესები, – ამის შესახებ საქართველოს პრემიერ-მინისტრმა ირაკლი კობახიძემ სომხეთის რესპუბლიკასა და საქართველოს შორის ეკონომიკური თანამშრომლობის ერთობლივი მთავრობათაშორისი კომისიის მე-14 სხდომაზე განაცხადა.

პრემიერის თქმით, საქართველოსა და სომხეთის ურთიერთობას, პარტნიორობას და მეგობრობას აქვს ძალიან მყარი ისტორიული საფუძველი.

„ჩემთვის ძალიან დიდი პატივია, რომ პირველად ვმონაწილეობ როგორც თანათავმჯდომარე სომხეთ-საქართველოს მთავრობათაშორისი ეკონომიკური თანამშრომლობის კომისიის სხდომაში, რომელიც უკვე მეთოთხმეტედ იმართება. რა თქმა უნდა, ეს ციფრებიც ხაზს უსვამს იმ მჭიდრო თანამშრომლობას, რომელიც არის ჩამოყალიბებული ჩვენ ორ ქვეყანას შორის. მინდა აღვნიშნო, რომ მქონდა ძალიან საინტერესო ორმხრივი შეხვედრა ბატონ პრემიერ-მინისტრთან, სადაც ვისაუბრეთ ბევრ საკითხზე, რომელიც უკავშირდება ჩვენს ქვეყნებს, ჩვენი ქვეყნების ურთიერთობას და ასევე მსოფლიოში და რეგიონში მიმდინარე პროცესებს.

ჩვენთვის ძალიან მნიშვნელოვანია მჭიდრო თანამშრომლობა, იმისათვის, რომ ერთად დავიცვათ ჩვენი ქვეყნების ეროვნული ინტერესები. უნდა აღინიშნოს, რომ ჩვენს ქვეყნებს შორის არსებული მაღალი და უმაღლესი დონის რეგულარული დიალოგი სხვადასხვა ფორმატებში და მჭიდრო თანამშრომლობა ყველა სფეროში სათანადოდ აისახება ჩვენს გამორჩეულად წარმატებულ თანამშრომლობაზე და მოხარული ვართ, რომ ამ თანამშრომლობას აქვს კონკრეტული ხელშესახები შედეგები. ჩვენი ქვეყნების განსაკუთრებული ურთიერთობა არ გამომდინარეობს მხოლოდ ჩვენი გეოგრაფიული სიახლოვიდან, ჩვენი მეზობლობიდან. ჩვენს ურთიერთობას, პარტნიორობას და მეგობრობას აქვს ძალიან მყარი ისტორიული საფუძველი. ეს არის გამორჩეული მეგობრობა, რომელიც ერთმანეთს აკავშირებს ქართველ და სომეხ ხალხებს. ეს არის მრავალ ათასწლიანი კავშირები და სწორედ ამ კავშირებს, ამ მეგობრობას ეფუძნება ის მეგობრობა, რომელიც მთავრობებს შორის ურთიერთობებშიც არის გამოხატული. ეს ურთიერთობები პოლიტიკური თვალსაზრისით გადაითარგმნა სტრატეგიული პარტნიორობის დეკლარაციის ხელმოწერაში, რაც ახალ ნიშნულზე აიყვანს საქართველოს და სომხეთის თანამშრომლობას და ეს არის ძალიან კარგი საფუძველი იმისათვის, რომ ჩვენ კიდევ უფრო მეტად გავაღრმაოთ ჩვენი პოლიტიკური ურთიერთობები და ეკონომიკური კავშირები ორ ქვეყანას შორის. მე დარწმუნებული ვარ, რომ დღევანდელ პლატფორმას, ამ კომისიის სხდომას მაქსიმალურად გამოვიყენებთ იმისათვის, რომ კიდევ უფრო მეტად განვამტკიცოთ და დავტვირთოთ არსებული თანამშრომლობის სხვადასხვა ფორმატები, გავაღრმაოთ ჩვენი მრავალგანზომილებიანი თანამშრომლობა და გამოვკვეთოთ თანამშრომლობის შესაძლო ახალი მიმართულებები”, – განაცხადა საქართველოს პრემიერ-მინისტრმა.

დარწმუნებული ვარ, რომ 2025 წელი ყველა ჩვენი ძალისხმევის და ერთობლივი ინიციატივების შედეგად იქნება ახალი ამბიციური პროექტების დასაწყისი, – ამის შესახებ სომხეთის რესპუბლიკის პრემიერ-მინისტრმა ნიკოლ ფაშინიანმა სომხეთის რესპუბლიკასა და საქართველოს შორის ეკონომიკური თანამშრომლობის ერთობლივი მთავრობათაშორისი კომისიის მე-14 სხდომაზე განაცხადა.

მისი თქმით, 2024 წელი წარმატებული და ეფექტური წელი იყო როგორც საქართველოსთვის, ისე სომხეთისთვის.

„მიმაჩნია, რომ სომხეთს და საქართველოს ახალი მიღწევები აქვთ. 2024 წელი დავხურეთ, რომელიც წარმატებული და ეფექტური წელი იყო როგორც საქართველოსთვის, ისე სომხეთისთვის. ჩვენი თბილი ურთიერთობების ხასიათი მოითხოვს, რომ არ დავკმაყოფილდეთ არსებული დონით და ერთობლივად გამოვავლინოთ ახალი ჰორიზონტები. აი ამ სულისკვეთებით, დარწმუნებული ვარ, რომ 2025 წელი ყველა ჩვენი ძალისხმევის და ერთობლივი ინიციატივების შედეგად იქნება ახალი ამბიციური პროექტების დასაწყისი. ჩვენ სხვადასხვა სექტორში, იქნება ეს კომუნიკაცია, ენერგეტიკა, ინფორმაციული ტექნოლოგიები, უსაფრთხოება, ჯანდაცვა, განათლება, კულტურა და ხალხთაშორის კონტაქტები. ჩვენ შეგვიძლია, ერთობლივი ნაბიჯები გადავდგათ იმისათვის, რომ კიდევ უფრო გავამარტივოთ დელიმიტაცია-დემარკაციის პროცესი, რაც გაზრდის როგორც მგზავრების მიმოსვლას, ასევე საქონელბრუნვას და ჩვენ გვექნება საშუალება, რომ იურიდიული და საკანონმდებლო ურთიერთობები დავხვეწოთ ჩვენს ქვეყნებს შორის, რაც შექმნის უფრო გამარტივებულ შესაძლებლობებს, ბიზნესტრანზაქციების და ოპერაციების განსახორციელებლად. ეს არის მნიშვნელოვანი მაჩვენებელი ბიზნესსაქმიანობისთვის და ეს ორმხრივი სავაჭრო ურთიერთობებისთვის და სავაჭრო ბრუნვის ხელშეწყობისთვის გაკეთდება”, – განაცხადა ნიკოლ ფაშინიანმა.

ეს იყო ღირსეული ნაბიჯი, ყოველთვის დავიცავთ ჩვენი ქვეყნის სუვერენიტეტს და დამოუკიდებლობას – ჩვენ ბოლო თვეებისა და წლების განმავლობაში ვხედავთ – ყველგან ბრიუსელის ბიუროკრატია, არსად სამართალი, – ასე შეაფასა „ქართული ოცნების“ გენერალურმა მდივანმა, კახა კალაძემ „ქართული ოცნების“ მიერ ევროპის საბჭოს საპარლამენტო ასამბლეის დატოვების შესახებ მიღებული გადაწყვეტილება.

მისი თქმით, ისინი თავისუფლების მოყვარული ხალხი არიან და არავის მისცემენ შესაძლებლობას, მიაყენოს შეურაცხყოფა, ყოველთვის აშანტაჟოს და გაკეთდეს ისეთი განცხადებები, რომელიც დაფუძნებულია ტყუილზე და სიცრუეზე.

„ეს არის ღირსეული ნაბიჯი. ჩვენ კიდევ ერთხელ ვაჩვენებთ ყველას რომ ვართ დამოუკიდებელი, თავისუფალი და სუვერენული სახელმწიფო. თავისუფლების მოყვარული ხალხი ვართ და არავის მივცემთ შესაძლებლობას, შეურაცხყოფა მოგვაყენოს, ყოველთვის გვაშანტაჟოს და გაკეთდეს ისეთი განცხადებები, რომელიც დაფუძნებულია ტყუილზე და სიცრუეზე. ჩვენ ბოლო თვეებისა და წლების განმავლობაში ვხედავთ – ყველგან ბრიუსელის ბიუროკრატია, არსად სამართალი. ეს არის დღევანდელი მოცემულობა და არავის მიეცემა საშუალება ჩვენი სამშობლო სხვადასხვა მიზეზებით და მიზნებით აშანტაჟოს და შეურაცხყოფა მიაყენოს. ეს იყო ღირსეული ნაბიჯი და ყოველთვის დავიცავთ ჩვენი ქვეყნის სუვერენიტეტს და დამოუკიდებლობას. კეთილი უნდა ინებოს ყველამ – არ აქვს მნიშვნელობა იქნება ეს ბრიუსელი თუ ნებისმიერი სხვა ქვეყანა, პატივი უნდა სცეს საქართველოს სახელმწიფოს და ქართველ ხალხს“, – განაცხადა კალაძემ.

კალაძის განმარტებით, ევროპელი პარტნიორების მხრიდან ბოლო დროს გაკეთებული განცხადებები მეგობრობას და პარტნიორობას აცდენილია.

„ჩვენ არაერთხელ გავაკეთეთ განცხადებები, რომ მზად ვართ მეგობრობისთვის, პარტნიორობისთვის. საქართველო ბევრჯერ გამოიცადა, რომ არის ღირსეული პარტნიორი ქვეყანა. ამის მაგალითისთვის კონკრეტული პროექტები არსებობს, მაგრამ რასაც ბოლო წლების განმავლობაში ვხედავთ, რა განცხადებებიც კეთდება, ეს ყველაფერს – მეგობრობასაც და პარტნიორობასაც აცდენილია. ეს პირდაპირ უსამართლობაა“, – განაცხადა კალაძემ.

კალაძის განმარტებით, დელეგაციის გამოსვლა არ ნიშნავს იმ გზის გადახვევას, რომელიც „ქართული ოცნებას“ ევროპულ მომავალთან დაკავშირებით აქვს გაცხადებული.

„ბოლო თვეებისა და წლების განმავლობაში ბრიუსელის მხრიდან ვხედავთ იმ კორუმპირებული ბიუროკრატიის მხრიდან უსამართლო გადაწყვეტილებებს და განცხადებებს. დიდი იმედი მაქვს, რომ ბევრი რამ შეიცვლება დღევანდელ მსოფლიოში ტრამპის გაპრეზიდენტებით. შეიცვლება ეს ბიუროკრატია, რომელსაც უდიდესი პრობლემები აქვს“, – განაცხადა კალაძემ.

ცნობისთვის, ევროპის საბჭოს საპარლამენტო ასამბლეა საქართველოს მომდევნო თვეებში ახალი არჩევნების ჩატარებისკენ, პოლიტპატიმრების გათავისუფლებისა და ევროინტეგრაციის გზის გაგრძელებისკენ მოუწოდებს.

134 დეპუტატიდან რეზოლუციას 114-მა დაუჭირა მხარი, 13 წინააღმდეგ წავიდა, ხოლო 7-მა თავი შეიკავა.

აღნიშნული რეზოლუციის მიღების შემდეგ „ქართულმა ოცნებამ“ განაცხადა, რომ ევროპის საბჭოს საპარლამენტო ასამბლეაში მუშაობას წყვეტს.

როგორც თეა წულუკიანმა გადაწყვეტილების გაჟღერებისას განმარტა, დოკუმენტის „არაერთი დათქმა მიუღებელია, რადგან უსამართლო და საფუძველს მოკლებულია“.

თბილისის მერის განცხადებით, უკრაინელი ჟურნალისტებიც ადასტურებენ, რომ ევროსაბჭოს საპარლამენტო ასამბლეის რეზოლუციაზე „ქართველ მოღალატეებთან და ქვეყნის მტრებთან ერთად“ უკრაინის დელეგაციის წარმომადგენლებიც მუშაობდნენ.

როგორც კახა კალაძემ ჟურნალისტებს შესაბამისი თემის კომენტირებისას განუცხადა, ეს კიდევ ერთხელ მეტყველებს, რომ პროცესები გარედან იმართება.

„არაერთი განცხადება ვიხილეთ, თავად უკრაინელი ჟურნალისტებიც ადასტურებენ ამას, რომ ქართველ მოღალატეებთან და ქვეყნის მტრებთან ერთად უკრაინის დელეგაციის წარმომადგენლებიც მუშაობდნენ. ეს კიდევ ერთხელ მეტყველებს იმაზე, რომ პროცესები იმართება გარედან. ამ წვრილფეხა რადიკალებს ქვეყნის შიგნით ჰყავთ პატრონები. ისინი ამ ქვეყანას არ ეკუთვნიან, არ ემსახურებიან საქართველოს ინტერესებს. ყოველთვის შემოიფარგლებოდნენ იმით, როგორ დაეზიანებინათ ქვეყანა, ჩვენი სამშობლო და ქართველი ხალხი. ასეთი არაერთი ქმედითი ნაბიჯი გვახსოვს, როდესაც კაბინეტებში დარბოდნენ, რათა ვიზალიბერალიზაცია შეეჩერებინათ, ასოცირების ხელშეკრულებაზე ხელმოწერა არ მომხდარიყო და ასე შემდეგ. მოღალატეებს ყოველთვის გაეცემათ შესაბამისი პასუხი“, – განაცხადა კახა კალაძემ.

მისივე თქმით, ოპოზიცია გარე ინტერესებს ემსახურება.

„ოპოზიცია, ეს არის მოღალატეობრივი, რადიკალური დაჯგუფება ქვეყანაში, რომელიც ემსახურება გარე ინტერესებს. ისინი იღებენ დავალებებს ქვეყნის წინააღმდეგ. თქვენ წარმოიდგინეთ, ამ რადიკალური დაჯგუფების ერთ-ერთმა წარმომადგენელმა ისიც კი აკადრა ქვეყანას, რომ როგორც სათამაშო, ისე მოიხსენია საქართველო. რას ვიზამთ, ამ ადამიანებთან გვიწევს თანაცხოვრება, თუმცა ეს რადიკალიზმი და ფაშიზმი აუცილებლად უნდა დავამთავროთ“, – აღნიშნა კახა კალაძემ.

„ქართული ოცნების“ გამო ჩვენი ქვეყანა სრულად იზოლირებულია და ცრუ დევიზის, „ღირსებით ევროპისკენ“ ნაცვლად, „ოცნებამ“ დააყენა რეალობა – „კუდამოძუებული ევროპიდან“, – ამის შესახებ კოალიცია „ძლიერი საქართველოს“ ერთ-ერთმა ლიდერმა, ბადრი ჯაფარიძემ განაცხადა.

ჯაფარიძის თქმით, ევროპის საბჭოს საპარლამენტო ასამბლეამ მხარი დაუჭირა ქართველი ხალხის ბრძოლას სამართლიანობისა და ევროპული მომავლისთვის.

„სტრასბურგში მიღებული იქნა ისტორიული გადაწყვეტილება ევროპის საბჭოს საპარლამენტო ასამბლეის მიერ. ევროპის საბჭო აერთიანებს 46 ქვეყანას და, ამავდროულად, გაერთიანებული არიან შეერთებული შტატები, კანადა და იაპონია. ასამბლეამ სრულად მხარი დაუჭირა ქართველი ხალხის ბრძოლას სამართლიანობისთვის, ევროპული მომავლისთვის, კანონის უზენაესობის დამკვიდრებისთვის საქართველოში. საპარლამენტო ასამბლეამ მიიღო რეზოლუცია, რომლის თანახმადაც, „ქართულ ოცნების“ დელეგაციას შეეზღუდა უფლებამოსილება და ამავდროულად განისაზღვრა ის აუცილებელი პირობები, რომლებიც უნდა განხორციელდეს ქვეყანაში. ეს პირობებია, უპირველესად, ახალი, თავისუფალი და სამართლიანი არჩევნები; პოლიტპატიმრების გათავისუფლება და, ამავდროულად, ყველა ძალადობრივი ფაქტის გამოძიება, რომელსაც ადგილი ჰქონდა ბოლო თვეების განმავლობაში მშვიდობიანი დემონსტრანტებისა და ჟურნალისტების მიმართ. ამ რეზოლუციას აქვს უდიდესი მნიშვნელობა იმის ხაზგასასმელად, რომ მთელი ცივილიზებული სამყარო მხარს უჭერს ქართველ ხალხის ბრძოლას და ეს რეზოლუცია იქნა ერთხმად მიღებული.

ნაცვლად იმისა, რომ „ქართულ ოცნებას“ გაეთვალისწინებინა ეს უმნიშვნელოვანესი გადაწყვეტილება, „ოცნების“ დელეგაციამ განაცხადა, რომ მონაწილეობას აღარ მიიღებს საპარლამენტო ასამბლეის მუშაობაში. ესაა ჩვენი ქვეყნის წინაშე მდგარი რეალობა, როდესაც „ოცნების“ გამო სრულად იზოლირებულია ჩვენი ქვეყანა და ცრუ დევიზის, „ღირსებით ევროპისკენ“ ნაცვლად, „ოცნებამ“ დააყენა რეალობა – „კუდამოძუებული ევროპიდან“. ესაა რეალობა, რაც „ოცნებამ“ შექმნა საკუთარი ძალადობრივი პოლიტიკიდან გამომდინარე. ამავდროულად, ქართველი ხალხი მიიღებს იმ აუცილებელ მხარდაჭერას ყველა ცივილიზებული ქვეყნიდან, რომელიც უზრუნველყოფს ბრძოლის წარმატებით დასრულებას. ეს წარმატება სჭირდება საზოგადოების გამთლიანებას ჩვენს ქვეყანაში, მშვიდობის დამყარებას და ქვეყნის ნორმალურ განვითარებას. სწორედ ამ მიზნით იქნა მიღებული ის უმნიშვნელოვანესი რეზოლუცია, რომელსაც ერთხმად დაუჭირა მხარი ევროპის საბჭოს საპარლამენტო ასამბლეამ“, – განაცხადა ჯაფარიძემ.

ცნობისთვის, ევროსაბჭოს საპარლამენტო ასამბლეაზე საქართველოს დელეგაციის ხელმძღვანელმა, თეა წულუკიანმა განაცხადა: „„ქართული ოცნების“ გუნდის საერთო გადაწყვეტილებით, მიუხედავად იმისა, რომ ჩვენი უფლებამოსილება დამტკიცებულია, დღეიდან ვწყვეტთ მუშაობას ევროსაბჭოს საპარლამენტო ასამბლეაში, საქართველო, როგორც სახელმწიფო, რჩება წევრად“.