საქართველო იმსახურებს ევროკავშირის კანდიდატის სტატუსს, – ამის შესახებ უნგრეთის საგარეო საქმეთა მინისტრმა, პიტერ სიიარტომ საქართველოში ვიზიტის დროს განაცხადა.

„ჩვენ ჩამოვედით აქ, საქართველოში, უნგრეთის პრემიერ-მინისტრის, თითქმის ყველა ჩემი თანამემამულე მინისტრის ხელმძღვანელობით, რათა გავმართოთ ჩვენი პირველი სამთავრობო სამიტი ორ ქვეყანას შორის სტრატეგიული პარტნიორობის შესახებ ხელმოწერილი შეთანხმების სულისკვეთებით.

უნგრეთსა და საქართველოს შორის თანამშრომლობა ძირითადად ოთხ საყრდენზეა დაფუძნებული. მათგან, ალბათ, ყველაზე მნიშვნელოვანი ის არის, რომ ევროკავშირი ამჟამად ძალიან ცუდ მდგომარეობაშია, ამიტომ მნიშვნელოვანი იქნებოდა გაფართოების პოლიტიკის გააქტიურება. ევროკავშირს სჭირდება ახალი იმპულსი, სიახლე და პოზიტიური ენერგია და ეს შეიძლება, მოდიოდეს პირველ რიგში იმ ქვეყნებიდან, რომლებსაც სურთ გახდნენ ევროკავშირის წევრები. ქვეყნები, რომლებიც სწრაფად ვითარდებიან და სურთ, მიაღწიონ ევროკავშირის განვითარების დონეს, ან მიუახლოვდნენ მაინც მას. საქართველო ისეთი ქვეყნის ტიპური მაგალითია, საიდანაც ევროკავშირს შეუძლია სიახლე, იმპულსი და პოზიტიური ენერგია მიიღოს, რადგან ჩვენ ვსაუბრობთ ქვეყანაზე, რომელიც ზედიზედ ორი წელია, აღწევს ორნიშნა ეკონომიკურ ზრდას.

სამწუხაროდ, ევროკავშირი უკიდურესად ფარისევლურად იქცევა საქართველოს მიმართ, ორმაგი სტანდარტების გამოყენებით. მიუხედავად იმისა, რომ მათ არ დააწესეს 12-პუნქტიანი სიის შესრულება, როგორც წინაპირობა იმისა, რომ გამხდარიყო კანდიდატი ისეთი ქვეყნებისთვის, როგორიცაა უკრაინა ან მოლდოვა, მათ ეს მოითხოვეს როგორც წინაპირობა საქართველოსთვის და ამ ქვეყანას არ მიუღია კანდიდატის სტატუსი. მიგვაჩნია, რომ საქართველო უკრაინაზე ან მოლდოვაზე უარეს მდგომარეობაში არ არის. საქართველოც იმსახურებს კანდიდატის სტატუსს. ევროპას დიდ სარგებელს მოუტანს, თუ საქართველო ჩვენთან დაახლოებასა და გაწევრიანების მოლაპარაკებების დაწყებას შეძლებს“,- აღნიშნა სიიარტომ.

მისივე თქმით, უნგრეთი დაუჭერს მხარს საქართველოს, გახდეს ევროკავშირის კანდიდატი.

„ამ შემოდგომაზე მომავალ გადაწყვეტილებაში, უნგრეთი მტკიცედ დაუჭერს მხარს საქართველოს, გახდეს ევროკავშირის კანდიდატი და ჩვენ მნიშვნელოვან პროგრესს უნდა მივაღწიოთ გაწევრიანების მოლაპარაკებებში. მით უფრო, მნიშვნელოვანია ევროკავშირსა და საქართველოს შორის თანამშრომლობის გაძლიერება, რადგან ჩვენ ევროპაში ენერგეტიკული მოდერნიზაციის სერიოზულ პროცესში ვართ. ჩვენ ახლა ვცდილობთ, გადავიტანოთ ევროკავშირის ენერგომომარაგება მდგრად, ეკოლოგიურად სუფთა, მწვანე, განახლებად ენერგიის წყაროებზე. როგორც ევროკავშირს ახლა არ შეუძლია დააკმაყოფილოს თავისი ენერგეტიკული საჭიროებები წიაღისეული საწვავის ეპოქაში გარე წყაროების გარეშე, ასევე მას დასჭირდება გარე წყაროები განახლებადი ენერგიის ეპოქაში, რათა უზრუნველყოს ევროკავშირის ენერგომომარაგების უსაფრთხოება. კავკასიის რეგიონი, რა თქმა უნდა, იქნება ერთ-ერთი ასეთი გარე წყარო. კავკასია შეძლებს მნიშვნელოვანი რაოდენობის განახლებადი ენერგიის წარმოებას და ევროკავშირს ეს ენერგია უსაფრთხოდ მუშაობისთვის დასჭირდება. ახლა საკითხავია, მიაღწევს თუ არა კავკასიაში წარმოებული განახლებადი ენერგია ევროპამდე; ეს უბრალოდ ინფრასტრუქტურის საკითხია. სწორედ ამიტომ არის მნიშვნელოვანი ოთხმხრივი შეთანხმება, რომელიც ჩვენ გავაფორმეთ აზერბაიჯანს, საქართველოს, რუმინეთსა და უნგრეთს შორის გასული წლის ბოლოს, რომელიც მიზნად ისახავს მსოფლიოში ყველაზე გრძელი წყალქვეშა ელექტროგადამცემი მილსადენის აშენებას.

ასე რომ, საქართველოსთან თანამშრომლობა განსაკუთრებით კრიტიკულია ევროპის ენერგეტიკული უსაფრთხოების მომავლისთვის და ჩვენ, უნგრელებს, შეგვიძლია, მნიშვნელოვანი როლი ვითამაშოთ კავკასიური განახლებადი ენერგიის ევროპაში შემოტანაში.

და ბოლოს, ჩვენ ვსაუბრობთ ორ ქრისტიანულ ქვეყანაზე, ორ ქვეყანაზე, რომლებიც ინარჩუნებენ თავიანთ ქრისტიანულ ტრადიციებსა და ქრისტიანულ მემკვიდრეობას. ორი ქვეყანა, რომლებსაც არ ეშინიათ ამის საერთაშორისო პოლიტიკაში მოხვედრის. საერთაშორისო პოლიტიკაში მნიშვნელოვანია ქვეყნები, რომლებსაც სურთ, შეუძლიათ და საკმარისად გაბედულები არიან, დაიცვან თავიანთი ეროვნული ინტერესები, განახორციელონ კონსერვატიული, პატრიოტული პოლიტიკა.

ამრიგად, უნგრეთსა და საქართველოს შორის თანამშრომლობა საერთაშორისო პოლიტიკაში გვაძლიერებს ჩვენი ეროვნული ინტერესების წარმომადგენლობასა და დაცვაში და მათზე კომპრომისზე წასვლა არასდროს არ უნდა დაგვჭირდეს. აქ მალე მოვაწერ ხელს ორ ხელშეკრულებას. პირველ რიგში, ჩვენ გავახანგრძლივებთ სტიპენდიის ხელშეკრულებას კიდევ სამი წლით, ყოველწლიურად 80 ქართველ სტუდენტს დავუწესებთ სტიპენდიას უნგრეთის უნივერსიტეტებში. ეს პროგრამა პოპულარულია, მას წელს 270 აპლიკანტი ჰყავს. მეორეც, ჩვენ მოვაწერთ ხელს ხელშეკრულებას ტექნოლოგიური გადაწყვეტის შესახებ, რომელშიც გავცვლით და მხარს დავუჭერთ ერთმანეთს ქალაქებში მოქმედი ჭკვიანი ტექნოლოგიებით, რაც ხელს შეუწყობს ურბანული გარემოს სიცოცხლისუნარიანობის გაზრდას“,-  განაცხადა პიტერ სიიარტომ ვიდეომიმართვაში.

პალესტინის ჯანდაცვის სამინისტროს მონაცემებით, ისრაელის მიერ განხორციელებულ ავიადარტყმებს სულ მცირე 1537 პალესტინელი ემსხვერპლა, 6612 კი დაშავდა.

მათივე მონაცემებით, დაღუპულთა შორის 500 ბავშვი და 267 ქალია.

„ჰამასის“ თავდასხმის შემდეგ, ისრაელმა ღაზას სექტორის სრული ბლოკირების გადაწყვეტილება მიიღო და სექტორში ელექტროენერგიის, საწვავის, საკვების, წყლისა და სხვა პროდუქტების შეტანა შეწყვიტა.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.

ჩვენი პოზიცია, როგორც ერის, რომელსაც საუკუნეების განმავლობაში არ გადაუხვევია სამართლიანობისგან, ისრაელ-პალესტინის კონფლიქტის მიმართაც ამ მიმართულებით არის, – ამის შესახებ თურქეთის პრეზიდენტმა, რეჯეფ თაიფ ერდოღანმა განაცხადა.

ერდოღანმა აღნიშნა, რომ ორგანიზაციებისგან განსხვავებით, სახელმწიფოები ვალდებული არიან, დაიცვან ომის კანონები და ადამიანის უფლებები. მისივე თქმით, ეს ხაზი თანდათან ქრება.

როგორც რეჯეფ თაიფ ერდოღანმა განაცხადა, ღაზაში ორი მილიონი ადამიანისთვის ელექტროენერგიის, წყლის, საწვავისა და საკვების შეზღუდვა არც „ჰუმანურია“ და ამას არც „ომის კანონებში“ აქვს ადგილი. ერდოღანმა აღნიშნა, რომ ამჟამად ღაზაში წყალი, პური და სხვა საკვები არ არის, რაც ადამიანის უფლებათა საყოველთაო დეკლარაციას ეწინააღმდეგება.

ამასთან, თურქეთის პრეზიდენტის თქმით, აშშ-ის მსგავს ქვეყანას მშვიდობის აღდგენისთვის ზრუნვა შეეფერება.

„აშშ-ის მსგავს ქვეყანას შეეფერება მშვიდობის აღდგენისთვის ზრუნვა, თუ ცეცხლზე ნავთის დამატება? სად არის დასავლეთი? აქვთ თუ არა რაიმე ზომები ამ ეტაპზე? არ აქვთ. არავითარი გამართლება არ შეიძლება ჰქონდეს ღაზაში ჩემს ძმებზე თავდასხმებს, რომლებმაც ხოცვა-ჟლეტის დონემდე მიაღწიეს“, – განაცხადა ერდოღანმა.

აშშ ისრაელში ჯარისკაცების განლაგებას არ გეგმავს, – ამის შესახებ თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა.

„არ არსებობს განზრახვა ან გეგმა ისრაელში ამერიკელი ჯარების ადგილზე განთავსების თაობაზე – ისრაელელებს არ აქვთ ამის სურვილი. ისრაელელებმა ნათლად აჩვენეს, რომ მათ არ სურთ უცხოური ჯარები თავიანთ მიწაზე, რომ მათ სურთ ამ ოპერაციების დამოუკიდებლად წარმართვა და მათ აქვთ სრული უფლება, უნდოდეთ ამის გაკეთება“, – აღნიშნაკირბიმ.

მისივე თქმით, აშშ-ის პრეზიდენტის, ჯო ბაიდენის უპირველესი პრიორიტეტია ამერიკელების უსაფრთხოება ყველგან და „ასევე ჩვენი ეროვნული უსაფრთხოების ინტერესები და ჩვენ გვაქვს ეროვნული უსაფრთხოების ინტერესები მთელ რეგიონში“.

საფრანგეთის პრეზიდენტმა ემანუელ მაკრონმა განაცხადა, რომ მისი მთავრობა „ყველაფერს გააკეთებს“ „ჰამასის“ მიერ აყვანილი მძევლების გასათავისუფლებლად.

„ჩვენ ყველაფერს გავაკეთებთ იმისათვის, რომ მძევლები განთავისუფლდნენ, მიუხედავად მათი ეროვნებისა“, – განაცხადა მაკრონმა.

მაკრონის თქმით, მისი ქვეყანა თანამშრომლობს ისრაელის ხელისუფლებასთან და სხვა პარტნიორებთან, რათა ფრანგი მძევლები “უსაფრთხოდ და ჯანმრთელები” სახლში დააბრუნონ.

”საფრანგეთი არასოდეს ტოვებს თავის შვილებს”, – დასძინა მან.

მისი თქმით, ისრაელს აქვს უფლება დაიცვას თავი ისეთი ტერორისტული ჯგუფებისგან, როგორიცაა „ჰამასი“, თუმცა მშვიდობიანი მოსახლეობის უსაფრთხოების შენარჩუნებით.

მაკრონმა დასძინა, რომ „ტერორიზმთან ბრძოლა ვერ ჩაანაცვლებს მშვიდობის ძიებას“.

როგორც ცნობილია, „ჰამასის“ თავდასხმების შემდეგ საფრანგეთის 17 მოქალაქე, მათ შორის ბავშვები, დაკარგულად ითვლება. დაღუპილია სულ მცირე 12 საფრანგეთის მოქალაქე.

ერთიანობის მთავრობა “დიდ მესიჯს აგზავნის” – ისრაელი “ჰამასის” ბარბაროსულ, ტერორისტულ ორგანიზაციას გაანადგურებს. ამის შესახებ ისრაელის პრემიერ-მინისტრმა ბენიამინ ნეთანიაჰუმ პარლამენტში (ქნესეთში) სიტყვით გამოსვლისას განაცხადა.

მისი თქმით, ებრაელმა ხალხმა ბნელ გამოწვევებს გაუძლო, “შესაძლოა მეტს, ვიდრე ნებისმიერმა სხვა ერმა, მაგრამ არასდროს არ დავნებებულვართ.”

ნეთანიაჰუს თქმით, ებრაელის ხალხისთვის გასული კვირა ყველაზე საშინელი დღე იყო ჰოლოკოსტის შემდეგ.

დღეს ისრაელის პარლამენტმა (კნესეტმა) კენჭი უნდა უყაროს ოპოზიციური პარტია “ეროვნული ერთიანობის” ლიდერის ბენი განცისა და ოთხი ოპოზიციონერი დეპუტატის დანიშვნას ეროვნული საგანგებო მთავრობის ჩამოსაყალიბებლად.

“ჩვენი ეროვნული ერთიანობა დიდ მესიჯს აგზავნის, გარეთაც და შიგნითაც… ამ კონფლიქტის წინაშე ერთად ვდგავართ შიდა ძმობითა და ერთმანეთზე ზრუნვით”, – განაცხადა ნეთანიაჰუმ.

მოლდოვა გამორჩეულ პროგრესს აჩვენებს, ევროკავშირის კიშინიოვის მიმართ მხარდაჭერა ურყევია. ამის შესახებ ევროკომისიის პრეზიდენტმა, ურსულა ფონ დერ ლაიენმა კიშინიოვში მოლდოვას პრეზიდენტ მაია სანდუსთან გამართულ ერთობლივ პრესკონფერენციაზე განაცხადა.

“ნოემბრის დასაწყისში ევროკომისია ევროკავშირის გაფართოების შესახებ თავის ყოველწლიურ ანგარიშს წარადგენს და მოლდოვას, როგორც კანდიდატი ქვეყნის, პროგრესს შეაფასებს. დეკემბერში ამ ანგარიშს ევროპული საბჭოს სამიტზე განიხილავენ. ეს დისკუსიები პირდაპირ გავლენას ახდენს თქვენს, როგორც ევროკავშირის [წევრი] ქვეყნის, მომავალზე. აღვნიშნავ, რომ გამორჩეულ პროგრესს აჩვენებთ. შთაბეჭდილების ქვეშ ვარ მოლდოვას წინსვლის სურვილით. მოგიწოდებთ აქტიური მონაწილეობა მიიღოთ ამ პროცესში,” – განაცხადა ფონ დერ ლაიენმა.

მან აღნიშნა, რომ ევროკავშირის მხარდაჭერა მოლდოვის მიმართ ურყევია.