„ქართული ოცნების“ მხრიდან დღევანდელი გადაწყვეტილება კიდევ ერთი დასტურია, რომ მისი ხედვა, ადგილი და მისწრაფება არის ძალიან შორს ევროპისგან, – ამის შესახებ ოპოზიციონერმა დეპუტატმა, ხათუნა სამნიძემ განაცხადა, რითაც „ქართული ოცნების“ მიერ „ევროპის სახალხო პარტიის“ დამკვირვებელი წევრის სტატუსის დატოვებას შეეხებოდა.

როგორც ხათუნა სამნიძემ აღნიშნა, „ქართულმა ოცნებამ“, როგორც ორგანიზაციამ, ზურგი აქცია ევროპულ ოჯახს.

„პრემიერ-მინისტრის მიერ გაკეთებული განცხადებების შემდეგ, „ევროპულ სოციალისტური პარტიის“ ოჯახში აქტიურად განიხილებოდა „ქართული ოცნების“ წევრობასთან დაკავშირებული საკითხი. შესაძლოა, გაერიცხათ კიდეც. როგორც ჩანს, „ქართულმა ოცნებამ“ გადაწყვიტა, თავად მიიღოს გადაწყვეტილება და ევროპული ოჯახის წევრობაზე თავად თქვეს უარი. რაც კიდევ ერთო დასტურია იმისა, რომ საქართველოს ხელისუფლებაში არის პარტია, რომელიც არც ერთი ევროპული ოჯახის წევრი არ არის და რომელიც საქართველოს საზოგადოების უმრავლესობის არჩევანისა და კონსტიტუციის წინააღმდეგ მიდის.

როდესაც კობახიძე ამბობს, რომ ევროპულ ოჯახში ვერ იგრძნო ვერანაირი მხარდაჭერა, თურმე აბსურდულ რეზოლუციებზეა საუბარი, მას ავიწყდება, რომ ის განცხადებები, რაც გაკეთდა პრემიერის მხრიდან, არც ერთი არ იყო ევროპული ფასეულობა და ევროპული ღირებულება. სწორედ ამიტომ მათ მიიღეს ძალიან მკაცრი პასუხი საკუთარი ევროპული ოჯახიდან. დღევანდელი გადაწყვეტილება, რომ დატოვონ „ევროპელი სოციალისტები“, არის კიდევ ერთი დარტყმა ქვეყნის იმიჯზე და კიდევ ერთი დასტური, რომ „ქართულმა ოცნებამ “ევროპას ზურგი აქცია“, – განაცხადა სამადაშვილმა.

ირაკლი კობახიძემ დღეს განაცხადა, რომ „ქართულმა ოცნებამ“ მიიღო გადაწყვეტილებ, „ევროპის სოციალისტური პარტიის“ დამკვირვებელი წევრის სტატუსის და პარტიასთან დაკავშირებული სხვა გაერთიანებების დატოვების შესახებ.

აშშ ვერ იტყვის, მოახდენს თუ არა გავლენას პუტინის გადაწყვეტილება საქართველოს კანდიდატის სტატუსზე, ეს აჩენს შეკითხვას, რატომ აკეთებს პუტინი ამას საქართველოსთვის ახლა, დარწმუნებული ვარ, არავის სჯერა, რომ ის ზრუნავს ქართველი მგზავრების კომფორტზე, – ამის შესახებ საქართველოში აშშ-ის ელჩმა, კელი დეგნანმა განაცხადა.

ელჩის თქმით, ვლადიმერ პუტინს თუ სურს, აჩვენოს მზრუნველობა, გაიყვანდა რუსეთის ჯარებს აფხაზეთიდან და ცხინვალიდან.

„ჩვენ ვნახეთ, რომ ზოგჯერ პუტინი იყენებს ქვეყანაში რუსების ყოფნას ამ ქვეყანაში ჩარევისთვის. ვფიქრობ, უკვე ბევრი ქართველია შეშფოთებული საქართველოში რუსეთის ასობით ათასი მოქალაქის ყოფნით, რომლებიც გასულ წელს ჩამოვიდნენ. ახლა ჩვენ გვესმის რუსეთის ტურიზმის სააგენტოსგან, რომ შესაძლოა, კიდევ მილიონი ჩამოვიდეს პირდაპირი ფრენების გახსნის შემდეგ. ბატონ პუტინს თუ სურს, აჩვენოს, რომ ზრუნავს, ის გაიყვანდა რუსეთის ჯარებს აფხაზეთიდან და ცხინვალიდან და შეასრულებდა ცეცხლის შეწყვეტის შეთანხმებით ნაკისრ ვალდებულებებს, შეცვლიდა რუსეთის მიერ აფხაზეთისა და ცხინვალის აღიარებას. ეს იქნებოდა ნიშნები, რომელსაც ქართველები დააფასებდნენ. შეგახსენებთ, რომ ეს არის ქვეყანა, რომელიც 2008 წელს შემოიჭრა საქართველოში, რომელმაც 1989 წელს სცადა დაენგრია საქართველოს დამოუკიდებლობა. მათ სცადეს ქართული ენის ჩაჩუმება 1978 წელს და საუკუნეების განმავალობაში შეურაცხყოფდნენ ქართულ ეკლესიებს მთელი ქვეყნის მასშტაბით. ეს არის ქვეყანა, რომელიც თავს ესხმის უკრაინას, ისევე როგორც ეს გააკეთა საქართველოს წინააღმდეგ 15 წლის წინ. სამიზნეში იღებს საცხოვრებელ კორპუსებს, სკოლებს, საავადმყოფოებს, ბავშვები აშორებს ოჯახებს. უცნაურად ჩანს ეს ჟესტი სისხლიანი რეჟიმისგან, რომელიც იმას უკეთებს ახლა უკრაინას, რაც საქართველოს 15 წლის წინ გაუკეთა“, – განაცხადა დეგნანმა.

არავითარი კავშირი ფრენების აღდგენას, სავიზო რეჟიმის გაუქმებასა და სტრატეგიულ პარტნიორობას შორის, არ არის. ეს რომ ასე იყოს, ამერიკის შეერთებულ შტატებს აქამდე ექნებოდა დაწესებული პირდაპირი ფრენები ან გაუმარტივებდა ჩვენს მოქალაქეებს სავიზო რეჟიმს, თუმცა საკმაოდ მკაცრი რეჟიმი მოქმედებს ჩვენი მოქალაქეების მიმართ, რადგან ფრენები და სავიზო რეჟიმი არის სრულიად სხვა რამე და სტრატეგიული პარტნიორობა არის სრულიად სხვა რამე, – ამის შესახებ „ქართული ოცნების“ თავმჯდომარე ირაკლი კობახიძემ პარტიის ცენტრალურ ოფისში გამართულ ბრიფინგზე განაცხადა.

ირაკლი კობახიძემ რუსეთის მიერ საქართველოს მოქალაქეებისთვის სავიზო რეჟიმის გაუქმებასთან დაკავშირებით საუბრისას აღნიშნა, რომ არაერთ ქვეყანას, მათ შორის, ამერიკის შეერთებული შტატების სტრატეგიულ პარტნიორ ქვეყანას აქვს პირდაპირი ფრენები რუსეთის ფედერაციასთან.

მისივე თქმით, ოპოზიცია ცდილობს, ეს ყველაფერი წარმოაჩინოს ისე, თითქოს პირდაპირი ფრენების ცალმხრივად აღდგენა ნიშნავს სტრატეგიული პარტნიორობის დამყარებას.

„რაც შეეხება ფრენებს. საუბარი ჰქონდა ჩვენს კოლეგებს იმასთან დაკავშირებით, რომ არის არაერთი ქვეყანა სადაც არის ფრენები. მათ აქვთ პარტნიორობა დასავლეთთან, თუმცა ფრენები აქვთ რუსეთის ფედერაციასთან, მათ შორის არის ისრაელი, რომელიც არის ამერიკის შეერთებული შტატების სტრატეგიული პარტნიორი და არის პირდაპირი ფრენები რუსეთთან. ასევე არის თურქეთი, რომელიც არის ევროკავშირის წევრობის კანდიდატი ქვეყანა და ნატოს წევრი ქვეყანა და იქაც ხორციელდება ფრენები. ჩვენი მეზობელი ქვეყნები: აზერბაიჯანი, სომხეთი – აქაც არის პირდაპირი ფრენები. მთლიანობაში ეს ყველაფერი მიუთითებს იმაზე, რომ სპეკულაციებშიც არ არსებობს არავითარი საფუძველი. ოპოზიცია ცდილობს, ეს ყველაფერი ისე წარმოაჩინოს, თითქოს პირდაპირი ფრენების ცალმხრივად აღდგენა რუსეთის მხრიდან ნიშნავს სტრატეგიული პარტნიორობის დამყარებას. ასეთი სპეკულაციებიც კი გვესმის პირდაპირი თუ ირიბი ფორმით“, – განაცხადა ირაკლი კობახიძემ.