ექსპერტი ლევან ნიკოლეიშვილი სოციალურ ქსელში წერს, რომ საქართველოს პრემიერ-მინისტრი ოპონენტებს თავისი სიმართლით გულს უხეთქავს.

ექსპერტის თქმით, ძალიან საეჭვოდ არ მოსწონთ ის, რომ დღიდან დამოუკიდებლობის აღდგენისა, ყველაზე უფრო მეტად დღევანდელი ხელისუფლება იბრძვის სუვერენიტეტისა და ეროვნული იდენტობის შესანარჩუნებლად.

„ეს უკვე მერამდენედ უხეთქავს გულს ჩვენი პრემიერი, ირაკლი ღარიბაშვილი ოპონენტებს გულს თავისი სიმართლითა და პირდაპირობით. თან ამ სიმართლეს ყოველთვის ახლავს ფაქტები: ფაქტია, რომ ევროკავშირს, აშშ-ს და რუსეთს შორის სავაჭრო ბრუნვა 2022 წელს რამდენიმე მილიარდი ევროთი და დოლარით გაიზარდა. ასევე ფაქტია, რომ ევროკავშირისა და აშშ-ს სავაჭრო ბრუნვა რუსეთთან 110-ჯერ აღემატება საქართველოს სავაჭრო ბრუნვას რუსეთთან. ამ დროს ქართველი თუ უცხოელი ოპონენტები რას ითხოვენ უნდა გავჩერდეთ, თვით დაზარალების რეჟიმში უნდა გადავიდეთ, ხოლო დანარჩენებმა ვისაც უნდა რა აკეთონ, ოღონდ არ მოშივდეთ და არ შესცივდეთ (რამე ხომ არ გამომრჩა ნავთობპროდუქტები კვლავ შედის ხომ რუსეთიდან ევროპაში? ) რაც შეეხება უვიზო რეჟიმს, ნუ გვავიწყდება, საქმე ეხება 1 მილიონ საქართველოს მოქალაქეს. ხოლო ფრენების აღდგენას რუსეთ-საქართველოს შორის, თუ არა სანქცირებული ავია კომპანიები იფრენენ, ჩვენ რა ვქნათ, ჩვენ დავასანქციროთ?

დიდი დაკვირვება არ ჭირდება იმის მიხვედრას, რომ ყველაზე უფრო რაზეც, ნერვები ეშლებათ და აღიზიანებთ, არის ის, რომ არც ერთი საერთაშორისო სამართლებრივ ნორმას არ ვარღვევთ, ყველა საერთაშორისო ფორუმისა, თუ სამშვიდობო ინიციატივის მონაწილეები ვართ (ერაყსა და ავღანეთში პირველები თუ არა მეორეები ვიყავით!), ევროატლანტიკური ინტეგრაცია კი საერთოდ კონსტიტუციაში ჩავწერეთ. უბრალოდ ძალიან საეჭვოდ არ მოსწონთ ის, რომ დღიდან დამოუკიდებლობის აღდგენისა, ყველაზე უფრო მეტად დღევანდელი ხელისუფლება იბრძვის სუვერენიტეტისა და ეროვნული იდენტობის შესანარჩუნებლად“, – წერს ნიკოლეიშვილი.

მალე მელია ამ სამეულის დასანქცირებას მოითხოვს და ამ თხოვნით სანქციების სფეროში კიდევ ერთ არაფორმალურ მმართველს – არახამიას მიმართავს, – ასე გამოეხმაურა „ხალხის ძალის“ წევრი დავით ქართველიშვილი ნიკა მელიას განცხადებას, რომლის თანახმად მან ნაცმოძრაობის არაფორმალურ მმართველად კეზერაშვილთან და მერაბიშვილთან ერთად ზურაბ ადეიშვილი დაასახელა.

„ბალახი მწვანეა, წყალი სველია. დაიწყო ბანალური აღიარებების ცვენა. მალე მელია ამ სამეულის დასანქცირებას მოითხოვს და ამ თხოვნით სანქციების სფეროში კიდევ ერთ არაფორმალურ მმართველს – არახამიას მიმართავს. ბოლოს ერთმანეთს დუელში გამოიძახებენ – სეკუნდანტობას “ლელოელებს” სთხოვენ, რომლებიც “გორბის” გამოკითხვებით “თითქმის არც არსებობენ”. მოკლედ ძალზე უინტერესოდ, მაგრამ მაინც ვითარდება ეს სერიალი – თუმცა “პულტი” ჩვენს ხელშია და ყოველთვის შეგვიძლია საქართველოს წინსვლისა და განვითარების “არხებზე” გადავრთოთ“, – წერს დავით ქართველიშვილი.

ექსპერტი ნინო ფოჩხუა სოციალურ ქსელში წერს, რომ რუსეთის მიერ საქართველოს მოქალაქეებისთვის უვიზო რეჟიმის დაწესებას და პირდაპირი ფრენების აღდგენას გაუგებარი რეაქციები მოჰყვა მაშინ, როდესაც სხვა ქვეყნებს, ამერიკის სტრატეგიულ პარტნიორებსაც და ევროკავშირის წევრ ქვეყნებსაც, არც ფრენები შეუწყვეტიათ რუსეთთან და არც სავაჭრო ბრუნვა.

„განა ამისთვის არ იბრძოდნენ ჩვენი წინაპრები და ჩვენ 30 წლის განმავლობაში, რაც გუშინ პრემიერმა ბრძანა? ამდენი სისხლი, უბედურება გაიარა საქართველომ და რისთვის, შეზღუდული სუვერენიტეტი რომ მოგვეპოვებინა, განა ამხელა კულტურის და ტრადიციების მქონე ქვეყანამ ეს დაიმსახურა? ყველაფერი გასაგები იქნებოდა, რომ არა ის ორმაგი სტანდარტი, რაც დღეს მსოფლიოში დამკვიდრდა. ვერ ვიგებ, რატომ ასეთი რეაქციები ამ პატარა ქვეყანაზე, მაშინ როცა სხვა ქვეყნებს, ამერიკის სტრატეგიულ პარტნიორებსაც და ევროკავშირის წევრ ქვეყნებსაც, არც ფრენები შეუწყვეტიათ რუსეთთან და არც სავაჭრო ბრუნვა. ამას არ ადევს გრიფით საიდუმლო და ყველა დაინტერესებულ პირს შეუძლია მოიძიოს. მაგალითად, შარშან უკრაინამ ოკუპანტი ქვეყნიდან ბუნებრივი აირის შესყიდვით 570 მილიონი დოლარის შემოსავალი მიიღო.

4 დღეში ევროკავშირიდან რუსეთში შესული თანხა 270 მილიარდს შეადგენს, რაც ჩვენი ქვეყნის 1 წლის სავაჭრო ბრუნვას უდრის. აღარაფერს ვამბობ წარსულში საქართველოს მიმართ დამოკიდებულებაზე. მაშინ, როცა 2008 წელს ქვეყანა ცეცხლში იყო გახვეული, იხოცებოდნენ ჩვენი ბიჭები რუსეთ-საქართველოს ომში, ევროკავშირს არც სანქციები დაუწესებია რუსეთისთვის და დაუწესებია კი არა, 2.5 ტრილიონი დოლარის საქონელი შეიძინა. კიდევ უფრო გასაკვირია, ფრენებზე ასეთი რეაქციები, მაშინ როცა ამერიკის მთავარი პარტნიორები და ევროკავშირის წევრი ქვეყნები შეუფერხებლად დაფრინავენ ოკუპანტ ქვეყანაში. პრემიერმა კი გუშინ ყველაფერს დაარქვა თავისი სახელი, ამიტომ არის ეს ორკესტრირებული გმინვა“, – წერს ფოჩხუა.

რუსეთის სავაჭრო ბრუნვა აშშ-თან 16,2 მილიარდ დოლარს შეადგენს. ევროპამ რაც ივაჭრა რუსეთთან სარფიანად, ასეულ მილიარდებზეა საუბარი, ეს ცალკე თემაა, – ამის შესახებ ანალიტიკოსი ზაალ ანჯაფარიძე სოციალურ ქსელში წერს.

მისი თქმით, შარშან ოკუპანტი და მტერი სახელმწიფოს გაზის ევროპაში ტრანზიტიდან თავად უკრაინამ 570 მლნ დოლარი ჩაიჯიბა.

„რუსეთის სავაჭრო ბრუნვა აშშ-თან 16,2 მილიარდ დოლარს შეადგენს. 2022 წელს აშშ-ის იმპორტი რუსეთიდან 14,5 მილიარდი დოლარია. შარშან ოკუპანტი და მტერი სახელმწიფოს გაზის ევროპაში ტრანზიტიდან თავად უკრაინამ 570 მლნ დოლარი ჩაიჯიბა. ევროპამ რაც ივაჭრა რუსეთთან სარფიანად, ასეულ მილიარდებზეა საუბარი, ეს ცალკე თემაა. საქართველოს სავაჭრო ბრუნვა რუსეთთან არის მიზერზე მიზერი. შესაბამისად, კითხვაა: ამ პატარა და ღარიბ ქვეყანას რას გვაწვებიან, რა უნდათ?“, – წერს ზაალ ანჯაფარიძე.