“რადიკალური ოპოზიცია მხოლოდ უცხოელ აგენტებს უჭერდა მხარს, ძალიან კარგად იცოდნენ, რომ არცერთ უცხოელ აგენტს არ ავირჩევდით” -ირაკლი კობახიძე

14:15 - 18/05/2023

პარტია „ქართული ოცნების“ თავმჯდომარის, ირაკლი კობახიძის განცხადებით, იუსტიციის უმაღლესი საბჭოს წევრობის კანდიდატებთან დაკავშირებით რადიკალური ოპოზიციის მხრიდან იყო კონსულტაციების იმიტაცია და არა რეალური კონსულტაციები.

მისივე თქმით, მათ მხარდაჭერის არავითარი მზაობა არ ჰქონდათ.

„კონსულტაციები წარმოებდა ამ პერიოდის განმავლობაში, მათ შორის პლენარულ სხდომათა დარბაზშიც კი წარიმართებოდა კონსულტაციები. ჩვენ ვიყავით ძალიან გახსნილი. რადიკალურ ოპოზიციას რაც შეეხება, სინამდვილეში, მას ჰქონდა კონსულტაციების იმიტაცია. ეს გამოჩნდა იქიდან გამომდინარე, რომ მათ მხარდაჭერის არავითარი მზაობა არ ჰქონდათ. ერთადერთი, ვისაც ისინი უჭერდნენ მხარს სახალხო დამცველის არჩევის დროს, ესენი იყვნენ უცხოელი აგენტები, რამდენიმე ასეთი კანდიდატი იყო, არავის სხვას არ უჭერდნენ მხარს. მათ ძალიან კარგად იცოდნენ, რომ ჩვენ უცხოელ აგენტს არ ავირჩევდით სახალხო დამცველად და ასევე, როდესაც საქმე ეხება იუსტიციის საბჭოს წევრების არჩევას, მხოლოდ უცხოელ აგენტებს უჭერდნენ მხარს. ძალიან კარგად იცოდნენ, რომ ჩვენ არც ერთ უცხოელ აგენტს არ ავირჩევდით იუსტიციის უმაღლეს საბჭოში. აქედან გამომდინარე, მათი მხრიდან ეს იყო კონსულტაციების იმიტაცია და არა რეალური კონსულტაციები“, – განაცხადა ირაკლი კობახიძემ.

“ზოგჯერ ადამიანებს სურთ, იფიქრონ, რომ მათ განსაკუთრებულად უნდა მოექცნენ”- კელი დეგნანი

14:00 - 18/05/2023

ზოგჯერ ადამიანებს სურთ, იფიქრონ, რომ მათ განსაკუთრებულად უნდა მოექცნენ და არ არის საჭირო ყველა ნაბიჯის გავლა. ონლაინ არის ვიზის შესახებ ყველა ინფორმაცია და რჩევები, რომლებსაც ვაძლევთ, რათა დავეხმაროთ ადამიანებს ვიზის რაც შეიძლება სწრაფად მიღებაში, – ამის შესახებ საქართველოში აშშ-ის ელჩმა, კელი დეგნანმა განაცხადა.

დეგნანის თქმით, თუ ადამიანები იცავენ ამ წესებს, ისინი ჩვეულებრივ იღებენ ვიზას.

ელჩს ჟურნალისტებმა კითხვა დაუსვეს პარტია „ქართული ოცნების“ თავმჯდომარის, ირაკლი კობახიძის განცხადებაზე, რომელმაც ამერიკის ვიზებთან დაკავშირებით საუბრისას აღნიშნა, რომ ანსამბლი „მართვე“, რომელიც ამერიკის შეერთებულ შტატებში მიემგზავრებოდა, საქართველოში დატოვეს.

„სამწუხაროდ, „იმედმა“ კიდევ ერთხელ გადაწყვიტა არასწორი ინფორმაციის გავრცელება. ფაქტობრივად, ჩვენ ყოველწლიურად ვიღებთ ათასობით ქართველს შეერთებულ შტატებში, მათ შორის კულტურული, მათ შორის მრავალი გაცვლითი პროგრამის ფარგლებში, რაც შეერთებულ შტატებსა და საქართველოს შორის პარტნიორობის მნიშვნელოვანი ნაწილია. გასულ თვეში თბილისის სახელმწიფო საბალეტო დასის 30-კაციან ჯგუფს ვიზა მივეცით აშშ-ში გასამგზავრებლად. გასულ კვირას ჩვენ ვიზები მივეცით ქართველ მოცეკვავეთა და მომღერალთა ჯგუფს, რომლებიც აპირებენ კონცერტის ჩატარებას ჩვენს კონგრესის ბიბლიოთეკაში საქართველოს დამოუკიდებლობის დღის აღსანიშნავად. ზოგჯერ ადამიანებს სურთ, იფიქრონ, რომ მათ განსაკუთრებულად უნდა მოექცნენ და არ არის საჭირო ყველა საჭირო ნაბიჯის გავლა, მაგრამ ონლაინ არის ვიზის შესახებ ყველა ინფორმაცია და რჩევები, რომლებსაც ჩვენ ვაძლევთ, რათა დავეხმაროთ ადამიანებს ვიზის რაც შეიძლება სწრაფად მიღებაში. თუ ადამიანები იცავენ ამ წესებს და ამ რჩევებს, ისინი ჩვეულებრივ იღებენ ვიზას, თუ არის მისაღები. ეს მარტივი სიმართლეა, ეს არის ფაქტები“, – განაცხადა კელი დეგნანმა.

რეჯეფ ერდოღანი თუ ქემალ ქილიჩდაროღლუ? -რა შანსები აქვთ თურქეთის პრეზიდენტობის კანდიდატებს

13:51 - 18/05/2023

გერმანული რადიო „დოიჩე ველე“ (Deutsche Welle) თავის ვებ-გვერდზე აქვეყნებს თურქეთში ჩატარებული საპრეზიდენტო არჩევნების პირველი ტურის ანალიზს, სათაურით „რეჯეფ ერდოღანის ძლიერება და სისუსტე“ (ავტორი – ელმაზ თოფჯუ).

გთავაზობთ პუბლიკაციას მცირეოდენი შემოკლებით:

თურქეთში ჩატარებული საპრეზიდენტო არჩევნების პირველმა ტურმა აჩვენა, რომ მილიონობით თურქი საკუთარ პრეზიდენტს აღარ ენდობა. არცერთ წინა არჩევნების დროს არ ყოფილა რეჯეფ ერდოღანის მდგომარეობა ისეთი მყიფე, როგორც ახლაა. თუმცა ექსპერტები მაინც თვლიან, რომ მეორე ტურში მოქმედ პრეზიდენტს უფრო მეტი შანსები აქვს, ვიდრე მის მეტოქეს – ქემალ ქილიჩდაროღლუს.

მაღალი ინფლაცია და უმუშევრობა, მასშტაბური რეპრესიები მმართველი რეჟიმის კრიტიკოსების წინააღმდეგ, სუსტი მენეჯმენტი მიწისშვრის შედეგების ლიკვიდაციის დროს… თურქეთი კრიზისის ღრმა მორევში იმყოფება. ბევრი თურქისათვის ასეთი სიტუაციის მიზეზს რეჯეფ ერდოღანი წარმოადგენს, რომელიც ქვეყანას უკვე 20 წელია ხელმძღვანელობს და ფაქტიურად ერთპიროვნულად მართავს.

მაგრამ, როგორც ჩანს, პრობლემები, რომლებიც თურქული საზოგადოების წინაშე დგას, პრეზიდენტთან მიმართებით მაინცდამაინც ძლიერ არ მოქმედებს. ყოველ შემთხვევაში, 14 მაისს ჩატარებული საპრეზიდენტო არჩევნების პირველ ტურში 69 წლის პოლიტიკოსმა იმაზე უფრო კარგი შედეგები აჩვენა, ვიდრე მოსალოდნელი იყო – რეჯეფ ერდოღანმა თითქმის 5%-ით აჯობა ქემალ ქილიჩდაროღლუს, მაგრამ საბოლოო ჯამში სანუკვარ მიზანს ვერ მიაღწია – მხოლოდ პროცენტნახევარი დააკლდა გამარჯვებისათვის.

უპირატესობა ოპოზიციასთან შედარებით

საპრეზიდენტო არჩევნების მეორე ტურში, რომელიც 28 მაისს უნდა გაიმართოს, მოქმედ პრეზიდენტს უფრო მეტი შანსები აქვს, ვიდრე მის მეტოქეს.

პოლიტოლოგი იმრე ერდოღანი (სტამბოლის ბილგის უნივერსიტეტიდან) თვლის, რომ საპარლამენტო არჩევნებში, რომელიც საპრეზიდენტოსთან ერთად ჩატარდა, მმართველმა სამართლიანობისა და განვითარების პარტიამ (სგპ), მართალია, ამომრჩეველთა ხმების გარკვეული რაოდენობა დაკარგა, მაგრამ მისი პოზიციები საკმაოდ მყარია: დიდ ეროვნულ კრების (პარლამენტის) 600 ადგილიდან 322 მოიპოვა, ოპოზიციამ კი, რომელიც სხვადახვა წვრილ-წვრილი პარტიებისაგან შედგება, მხოლოდ 213. გარდა ამისა, რეჯეფ ერდოღანის მთავარმა მოკავშირემ – უკიდურესად მემარჯვენე ნაციონალისტური მოძრაობის პარტიამ ხმების 10% მიიღო, რაც პარლამენტში 50 ადგილს უდრის. მესამე ძალამ – ერდოღანის მოწინააღმდეგე პროქურთულმა დემოკრატიულმა პარტიამ ხმების დაკარგა და მას ახალი მოწვევის საკანონმდებლო ორგანოში მხოლოდ 61 ადგილი ექნება. „ვერავინ ვერ შეძლებს ამ რეალობის იგნორირებას“, – ამბობს იმრე ერდოღანი „დოიჩე ველესთან“ საუბარში.
სოციოლოგები შეცდნენ.

საპრეზიდენტო არჩევნების წინ ბევრი გამოკითხვა აჩვენებდა, რომ ოპოზიციის კანდიდატი გაიმარჯვებდა – ქილიჩდაროღლუ პოპულარობით ერდოღანს უსწრებდა. მაგრამ ახლა წინასწარი ოფიციალური შედეგები მოწმობს, რომ სოციოლოგებმა შეცდომა დაუშვეს.

თითქოსდა წარმოუდგენელია, მაგრამ მიწისძვრით დაზარალებულ ზონაშიც კი რეჯეფ ერდოღანმა ხმების უმრავლესობა მიიღო: ქალაქ ქაჰრამანშახარში, მიწისძვრის ეპიცენტრში, სადაც მოქმედ პრეზიდენტს უამრავ ბრალდებას უყენებდნენ, მას ხმა ამომრჩევლების 71,9%-მა მისცა.

არის თუ არა ასეთ პირობებში რეჯეფ ერდოღანი და მისი „რესპუბლიკური ალიანსი“, მმართველი სამართლიანობის და განვითარების პარტიის ხელმძღვანელობით, გამარჯვებული? როგორც ბეატა ანელტი, სტამბოლში მოქმედი ფრ.ნაუმენის ფონდის წარმომადგენლობის დირექტორი, თვლის, რომ არ არის. „არცერთ წინა არჩევნების დროს რეჯეფ ერდოღანის მდგომარეობა ისეთი მყიფე არ ყოფილა, როგორიც ახლაა. იგი არასოდეს არ მდგარა მე-2 ტურის აუცილებლობის წინაშე“, – ამბობს ექსპერტი.

წინასაარჩევნო „საჩუქრების“ მნიშვნელოვანი როლი

ბეატა ანელტის თქმით, რეჯეფ ერდოღანის წინასაარჩევნო კამპანიას სამართლიანს და პატიოსნურს ვერ ვუწოდებთ: თურქული მასმედიის 90%-ს მთავრობის მიმართ ლოიალური დამოკიდებულება აქვს და, ცხადია, ისინი მოსახლეობაში მმართველი პარტიის იდეოლოგიას ქადაგებენ. მეტი ხმების მიღების კიდევ ერთი მიზეზი, დიდი ალბათობით, ისაა, რომ პრეზიდენტი რეჯეფ ერდორანი და მისი პარტია მოსახლეობაში წინასაარჩევნო „საჩუქრებს“ არიგებდნენ – მოსახლეობას პირდებოდნენ მინიმალური ხელფასის დონის მომატებას, სოციალური უზრუნველყოფის გაუმჯობესებას სახელმწიფო სექტორში დასაქმებულებისათვის და პენსიაზე ვადამდე გასვლას. ბეატა ანელტის აზრით, მოსახლეობა მადლობელია ასეთი საჩუქრებისა, რასაც საარჩევნო ურნებთან დემონსტრირებენ.

პოლიტოლოგი იმრე ერდოღანი ასეთ შეფასებას ეთანხმება: მისი თქმით, რეჯეფ ერდოღანის, როგორც ქვეყნის მეთაური წინასაარჩევნო „საჩუქრებმა“ მართლაც მნიშვნელოვანი როლი შეასრულეს. „როცა პრეზიდენტი აცხადებს, რომ მოსახლეობა ბუნებრივ გაზს ერთი თვის განმავლობაში უფასოდ მიიღებსო, არავინ არ ფიქრობს იმაზე, რომ საშუალოვადიან პერსპექტივაში გაზით უფასოდ უზრუნველყოფა შიდა სახელმწიფო ვალის რაოდენობაზე ნეგატიურ გავლენას მოახდენს. უფრო მეტიც – თურქი ამომრჩევლები სოციალურ-ეკონომიკურ პრობლემებს და არასასურველ მოვლენებს იდეოლოგიური პრიზმაში უყურებენ. რადგანაც ისინი ინფორმაციას ძირითადად პროსამთავრობო მასმედიიდან იღებენ, ოპოზიციას უძნელდება მოსახლეობამდე თავისი თვალსაზრისი მიიტანოს“, – განმარტავს იმრე ერდოღანი.

რელიგიამაც თავისი როლი შეასრულა, განსაკუთრებით მაშინ, როცა სარწმუნოების გამოყენება საზოგადოების პოლარიზაციის მიზნით ხდება – ისე, როგორც ამჟამინდელი საარჩევნო კამპანიის დროს იყო. თვითონ განსაჯეთ: თურქეთის იუსტიციის მინისტრმა ბექირ ბოზდაღმა 14 მაისის არჩევნებს „მორწმუნეთა და ურწმუნოთა არჩევანი“ უწოდა.

ვისთან იქნებიან უკიდურესი მემარჯვენეები?

მმართველმა სამართლიანობისა და განვითარების პარტიამ, წინასაარჩევნო კაპმანიის დროს, ადმინისტრაციული რესურსით – სახელმწიფო აპარატით ისარგებლა. თითქმის ყველა მინისტრი პროვინციებში და დიდ ქალაქებში იყო წასული და მოსახლეობას აგიტაციას უწევდა, რომ ხმა მმართველი პარტიისა და პრეზიდენტისთვის მიეცა. თვითონ რეჯეფ ერდოღანი ყოველ კვირას რომელიღაც ახალ მსხვილ ობიექტს ხსნიდა, ხოლო არჩევნების დაწყებამდე გამოაცხადა, რომ ქვეყნის აღმოსავლეთით ნავთობის დიდი საბადოები აღმოჩნდა.

დამკვირვებლები თვლიან, რომ მეორე ტურისთვის კიდევ ერთი მნიშვნელოვანი ფაქტორის როლს შეასრულებს ის, თუ ვინ მიიღებს მესამე კანდიდატის – ულტრამემარჯვენე ნაციონალისტური ალიანსის წარმომადგენლის სინან ოგანის ხმებს, რომელიც თავისი მომხრეების წინაშე საჯარო რეკომენდაციით მალე უნდა გამოვიდეს. მაგრამ მისი მოწოდება არ ნიშნავს იმას, რომ ყველა ისე გააკეთებს, როგორც მას უნდა. საერთოდ კი, იდეოლოგიურად სინან ოგანი უფრო სამთავრობო ბანაკთან არის დაკავშირებული, ვიდრე ოპოზიციურ ალიანსთან.

რეჯეფ ერდოღანი და ნატო/ევროკავშირი

იმდენად, რამდენადაც თურქეთი საპრეზიდენტო რესპუბლიკას წარმოადგენს, რომელშიც პრეზიდენტი მთავრობასაც ხელმძღვანელობს, ქვეყნის მომავალი ახლა მეორე ტურის შედეგებზეა დამოკიდებული. ბეატა ანელტი არ ელოდება რაიმე სერიოზულ ცვლილებებს, თუ რეჯეფ ერდოღანი თავის პოსტს შეინარჩუნებს. „თურქეთის პრეზიდენტი ისევ ისეთი რთული პარტნიორი იქნება, რომელიც საგარეო პოლიტიკურ ურთიერთობას აყალიბებს არა ფასეულობებისა და თამაშის შეთანხმებული წესების საფუძველზე, არამედ პირველ რიგში თავისი საკუთარი პირადული ინტერესების შესაბამისად“, – ამბობს ექსპერტი.

ცხადია, რომ რეჯეფ ერდოღანის სავარაუდო გამარჯვება ნატოსა და ევროკავშირისათვის ახალ პრობლემებს ნიშნავს. ის, რომ ნატოს წევრი თურქეთი მძიმე ეკონომიკურ სიტუაციაში იმყოფება, ჩრდილოატლანტიკური ალიანსისათვის კარგი ნამდვილად არ არის. მით უმეტეს, რომ არსებული პრობლემები არჩევნების შემდეგ აუცილებლად გამწვავდება. რეჯეფ ერდოღანს მოუწევს ბრიუსელის „რჩევებს“ ლოიალურად მიუდგეს და გარკვეულწილად დაეთანხმოს. ეს ევროკავშირის პოზიციებს გააძლიერებს. სრულიად შესაძლებელია, რომ უახლოეს თვეებში არჩევნებში გამარჯვებულმა რეჯეფ ერდოღანმა, ევროპისაგან დახმარების მიღების მიზნით, თავისი პრეტენზიები მოხსნას შვედეთის ნატოში მიღების წინააღმდეგაც.

ქემალ ქილიჩდაროღლუ და სირიელი ლტოლვილები

ანკარის უნივერსიტეტის პროფესორი მურატ ერდოღანი, რომელიც მიგრაციის პრობლემებს იკვლევს, ასევე ვარაუდობს, რომ დღევანდელი სიტუაციის გათვალისწინებით, მოქმედი პრეზიდენტი მეორე ტურში გაიმარჯვებს, მაგრამ თუ ქვეყნის ხელისუფლებაში ქემალ ქილიჩდაროღლო მოვა, მოსალოდნელია ევროკავშირის მიმართ საგარეო პოლიტიკური კურსის ცვლილება. მეცნიერმა ყურადღება გაამახვილა ქემალ ქილიჩდაროღლუს დაპირებებზე – ევროკავშირში უვიზოდ მიმოსვლასა და ლტოლვილთა პაქტის შემუშავებაზე. ისევე როგორც რეჯეფ ერდოღანს, ქემალ ქილიჩდაროღლუსაც სურს ლტოლვილების მიმართ პოლიტიკის გადახედვა: იგი თურქებს ჰპირდება, რომ ყველა სირიელს უკან, თავიანთ ქვეყანაში დააბრუნებს, არა უგვიანეს ორი წლის განმავლობაში. მოკლედ, 28 მაისს ცნობილი გახდება, შეიცვლება თუ არა თურქეთის საშინაო და საგარეო პოლიტიკა.

წყარო

“დეგნანის კანტორამ გადაწყვიტა რომ ასე დავესაჯეთ”- ლაშა ბასლანძე

13:41 - 18/05/2023

პროდიუსერი ლაშა ბასლანძე სოციალურ ქსელში „ქართული ოცნების“ თავმჯდომარის, ირაკლი კობახიძის განცხადებას ეხმიანება იმის შესახებ, რომ ანსამბლ „მართვეს“ 50 ბავშვს არ ჩაურტყეს აშშ-ის ვიზები.

როგორც ბასლანძე წერს, ერთ-ერთი მისი ქალიშვილი ელენიკოა, რომელსაც რამდენიმე უნივერსიტეტიდან ჰქონდა დაფინანსება, გაეროს მოდელირებულ სხდომაზეც იყო ნიუ იორკში და სიტყვით წარსდგა, თუმცა ამერიკის ვიზა ვერ მიიღო.
მისივე თქმით, „დეგნანის კანტორამ გადაწყვიტა რომ ასე დავესაჯეთ. იმედია მალე წავა ეს განაცებული ფაშისტი ამ ქვეყნიდან და ჩამოვა ვინმე ნორმალური“

„ჩემს ელენიკოზე ლაპარაკობს ირაკლი და კი რამდენიმე უნივერსიტეტიდან ჰქონდა დაფინანსება და ეს ამბავი მთელმა საქართველომ იცის. მანამდე ორჯერ იყო ნამყოფი. გაეროს მოდელირებულ სხდომაზეც კი იყო ნიუ იორკში და სიტყვით წარსდგა, მაგრამ დეგნანის კანტორამ გადაწყვიტა რომ აი ასე დავესაჯეთ. იმედია მალე წავა ეს განაცებული ფაშისტი ამ ქვეყნიდან და ჩამოვა ვინმე ნორმალური რომ ისევ ისე როგორც ადრე წარმოდგენა დაგვიბრუნდეს ჩვენთვის სანატრელი ქვეყნის საელჩოზე!“- წერს ლაშა ბასლანძე.

“ეს ინდექსი რეალურად აჩვენებს, რომ ქვეყანა პროდუქტიულობის 43 პროცენტს უმოძრაოდ ტოვებს” – სატრანსპორტო დერეფნის კვლევის ცენტრი

13:29 - 18/05/2023

2020 წელს – საქართველოს ადამიანური კაპიტალის ინდექსის მაჩვენებელი 0.57 შეადგენდა, (მსოფლიოს 169 ქვეყანას შორის საქართველოს 84 – ე ადგილი უკავია), – ამის შესახებ ინფორმაციას სოციალურ ქსელში სატრანსპორტო დერეფნის კვლევის ცენტრი ავრცელებს.

“რეალურად სად ვართ? – ადამიანური კაპიტალის ინდექსი

ადამიანური კაპიტალის ინდექსი ზომავს რომელი ქვეყნებია საუკეთესო თავისი მოქალაქეების ეკონომიკური და პროფესიული პოტენციალის მობილიზებაში. მაჩვენებელი განსაზღვრავს რამდენ კაპიტალს კარგავს თითოეული ქვეყანა განათლებისა და ჯანმრთელობის უქონლობის გამო. ინდექსი პირველად გამოქვეყნდა 2018 წელს და ახდენს მსოფლიოს 160 მდე ქვეყნის რანგირებას.

ადამიანური კაპიტალის ინდექსი ძირითადად ეფუძნება ორ კომპონენტს, როგორიცაა განათლებისა და ჯანდაცვის სისტემების ხელმისაწვდომობა და ხარისხი.

2020 წელს – საქართველოს ადამიანური კაპიტალის ინდექსის მაჩვენებელი 0.57 შეადგენდა, (მსოფლიოს 169 ქვეყანას შორის საქართველოს 84 – ე ადგილი უკავია).

მსოფლიო ბანკის მეთოდოლოგიის თანახმად, ქვეყანაში დღეს დაბადებული ბავშვი სრული განათლებისა და სრულყოფილი ჯანმრთელობის შემთხვევაში, ზრდასრულ ასაკში თავისი შესაძლო პროდუქტიულობის 57%-ს მიაღწევს.

ინდექსი რეალურად აჩვენებს, რომ ქვეყანა პროდუქტიულობის 43%-ს უმოძრაოდ ტოვებს, იმით, რომ არ აფინანსებს განათლებას და ჯანდაცვას. საქართველოს მაჩვენებელი – აღმოსავლეთ ევროპისა და ცენტრალური აზიის რეგიონის საშუალო მაჩვენებლებთან შედარებით – დაბალია.

2020 წელი – ყაზახეთი – 55 ადგილი (0.63 ინდექსი), უზბეკეთი – 57 (0.62), ბულგარეთი – 60 (0.61), ყირგიზეთი – 72 (0.60), რუმინეთი – 78 (0.58), მოლდოვა – 79 (0.58), სომხეთი – 81 (0.58), აზერბაიჯანი – 82 (0.58) , საქართველო – 84 (0.57).

წამყვანი პოზიცია – სინგაპური 1 ადგილი (0,88 ინდექსი), ჰონკონგი – 2 (0,81), იაპონია – 3 (0,80), კორეა – 4 (0,80).

საქართველოში განათლების ხარისხის ზრდა, ქვეყანას დაეხმარება გაუტოლდეს რეგიონულ საშუალო მაჩვენებელს.

2018 წელს როდესაც მსოფლიო ბანკმა პირველად გამოაქვეყნა – ადამიანური კაპიტალის ინდექსი, საქართველოს მსოფლიოში 61 – ე ადგილი ეკავა და მისი ინდექსი – 0.61 წარმოადგენდა. (2020 წელთან შედარებით 23 საფეხურით გაუარესდა) იმ პერიოდში საქართველო უსწრებდა – რუმინეთს 67 ადგილი (0.60 ინდექსი), აზერბაიჯანს – 69 (0.60), მოლდოვას – 75 (0.58), ყირგიზეთს – 76 (0.58), სომხეთს – 78 (0.58).

ფაქტობრივად მსოფლიო ბანკის 2018 და 2020 წლების მონაცემების შედარებისას, საქართველოს ადგილი როგორც გაუარესდა, 23 საფეხურით, ასევე , 2020 წელს საქართველოსაგან განსხვავებით, საკუთარი მდგომარეობა გააუმჯობესეს რეგიონის იმ ქვეყნებმა რომლებიც 2018 წელს მნიშვნელოვნად ჩამორჩებოდნენ საქართველოს.

ბოლო წლებში, საქართველოს დახმარება – ადამიანური კაპიტალის პროგრამის დაფინანსების კუთხით, ჯამში 500 მლნ დოლარს შეადგენს, საიდანაც 400 მლნ დოლარი მსოფლიო ბანკმა, 100 მლნ ევრო კი საფრანგეთის განვითარების სააგენტომ (AFD) გამოყო. (რად გვინდა ამერიკა?????)

აღნიშნული კრედიტი გამორჩეულია იმით, რომ ეს არის ბიუჯეტის მხარდაჭერის სესხი, რაც ნიშნავს, რომ უწყებები გააგრძელებენ მუშაობას რეფორმის გეგმის შესაბამისად და შესრულებული სამუშაოს შემდეგ მოხდება, ქვეყნისათვის ამ თანხის ანაზღაურება,”- ნათქვამია ინფორმაციაში.

https://www.facebook.com/geotranscor/posts/pfbid02vujCjRe5oAPzKkPmAnzUvYxQe1FJwmPJDckN1v4vGpnLFtqhvjhwwNzZ88tVMsUhl

“როგორც ჩანს, მოქმედებდა ფორმულა 4/1-ზე” – ნატო ჩხეიძე

13:27 - 18/05/2023

ჩათში მეხუთე გვარიც იყო – ნიშნიანიძე, რომელიც მეორე ტურში გადავიდა – როგორც ჩანს, მოქმედებდა ფორმულა 4/1- ზე, რომელიც ბოლომდე ოპოზიციური ჯგუფებისთვისაც არ იყო დამაჯერებელი თუ გაგებული, გარიგება დაგვბრალდა ჩვენ, „ნაცმოძრაობამ“ კი აღშფოთებული სახე მიიღო, – ამის შესახებ განცხადება დეპუტატმა ნატო ჩხეიძემ პარლამენტში გააკეთა.

როგორც მან აღნიშნა, „ნაციონალურმა მოძრაობას“ გუშინდელ ბრიფინგზე „დაავიწყდა ან დაივიწყეს“ ამ გვარის შესახებ, თუმცა, ეს არ დაავიწყდა ქართულ ოცნებას, რომელიც ჩხეიძის თქმით, როგორც ჩანს პირობის შესრულებას აპირებს, რადგან ნიშნიაძე გადასულია მეორე ტურში.

„გუშინდელი კენჭისყრის და მას მოდევნებული ბრიფინგების შემდეგ როცა ვითარება უნდა ახსნილიყო, პირიქით მოხდა, ასახსნელი მეტი დარჩა საზოგადოებისთვისაც და ჩემთვისაც. „ნაციონალური მოძრაობის“ ბრიფინგის დროს არ ვიცი მეტი გულწრფელობის, დამაჯერებლობის თუ თვალსაჩინოებისთვის თქვეს, ჩათში ჩაწერილი მესიჯის შესახებ, რომ იყო ოთხი გვარი: სალია, საჯაია, წიქარიშვილი და მუხაშავრია და თქვეს, რომ ჩათში ჩაგდებული იყო ეს ოთხი გვარი, მათ დაავიწყდათ ან დაივიწყეს, რომ იმ ჩათში მეხუთე გვარი იყო ნიშნიანიძე, მაგრამ ეს არ დაივიწყა „ქართულმა ოცნებამ“, რომელიც საერთოდ დიდად პირობის შემსრულებელი არ არის, მაგრამ ამ შემთხვევაში, როგორც ჩანს, მოინდომეს რაღაც პირობის შესრულება და იმ კანდიდატთა სიაში, რომლებიც მეორე ტურში გადავიდნენ, ერთ – ერთი არის ნიშნიანიძე. როგორც ჩანს, მოქმედებდა ფორმულა 4/1- ზე, რომელიც მთლად ბოლომდე და ნათლად ოპოზიციური ჯგუფებისთვისაც არ იყო მთლად დამაჯერებელი თუ გაგებული, ამიტომ იყო ოპოზიციური ჯგუფებიდან ფრაზები იმის შესახებ, რომ აქ არის გარიგება და ეს გარიგება საბოლოო ჯამში დაგვბრალდა ჩვენ, ჩხეიძეებს, მაჭუტაძეს და კიდევ ორ დეპუტატს, „ნაციონალური მოძრაობა“ გადგა გვერდზე და აღშფოთებული სახეც მიიღო. მე ცხადია, კითხვები მექნება „ნაციონალური მოძრაობის“ ფრაქციის ზოგიერთ წევრთან. შეკითხვა დაუსვით ბეჟაშვილს, როცა ჩათში 5 კანდიდატი იყო ჩაგდებული, რატომ თქვა, რომ 4 იყო?” – განაცხადა ჩხეიძემ.

17 მაისის პარლამენტის პლენარულ სხდომაზე გუშინ გამართული კენჭისყრის შედეგად, იუსტიციის უმაღლესი საბჭოში არსებული 5 არამოსამართლე წევრის ვაკანსიიდან სამი ვაკანსია შეივსო. 90 ხმაზე მეტი ხმა ტრისტან ბენაშვილმა (93 ხმა), გიორგი გზობავამ (91 ხმა) და ზურაბ გურასპაშვილმა (93 ხმა) მიიღეს და შესაბამისად, იუსტიციის უმაღლესი საბჭოს არამოსამართლე წევრები გახდნენ. აღსანიშნავია, რომ „ქართული ოცნების“ უმრავლესობას პარლამენტში სულ 84 ხმა აქვს.

როგორც ცნობილია, კანდიდატებს საპარლამენტო უმრავლესობისა და “ევროპელი სოციალისტების” გარდა, მხარი დაუჭირეს ფრაქცია “ნაციონალური მოძრაობის” წევრმა დეპუტატებმა ნიკა მაჭუტაძემ, ნატო ჩხეიძემ, როსტომ ჩხეიძემ და ბაჩუკი ქარდავამ, ასევე უფრაქციო დეპუტატმა დილარ ხაბულიანმა. გუშინდელ ბრიფინგზე ნიკა მაჭუტაძემ და ნატო ჩხეიძემ ისაუბრეს, რომ არსებობდა გარკვეული მოლაპარაკებები მათი ოპოზიციონერი კოლეგებისა და „ქართულ ოცნების” და განიხილებოდა სხვადასხვა ფორმულა, მათ შორის 3/2- ზე, 4/1- ზე. მათ ასევე აღნიშნეს, რომ ოპოზიციაში ადგილი ჰქონდა მისკომუნიკაციას. საპასუხოდ ნაციონალური მოძრაობის წევრმა ლევან ბეჟაშვილმა განაცხადა, რომ კენჭისყრამდე ჩათში 4 გვარი ჩავარდა, რეკომენდაციის სახით, თუ ვისთვის უნდა დაეჭირა მხარი ოპოზიციას. პარლამენტი იუსტიციის უმაღლეს საბჭოში დარჩენილ ორ ვაკანტურ თანამდებობაზე საბჭოს წევრობის არამოსამართლე კანდიდატებს დღევანდელ პლენარულ სხდომაზე უყრის კენჭს.

კობა კობალაძე ოფიციალური ვიზიტით ამერიკაში იმყოფება

13:25 - 18/05/2023

ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე, ამერიკის შეერთებული შტატების ომის ვეტერანთა დეპარტამენტის მიწვევით, ვაშინგტონში იმყოფება.

ვიზიტის ფარგლებში, კობა კობალაძემ პირველი შეხვედრა გამართა აშშ-ს შრომის დეპარტამენტის მდივნის თანაშემწესთან, რიჩარდ როდრიგესთან.

შეხვედრაზე, კობა კობალაძემ, მასპინძელ მხარეს სამსახურის სტრუქტურა, მიზნები, სამომავლო გეგმები, ის ერთობლივი პროგრამები გააცნო, რომელთაც სამსახური, სახელმწიფოსთან და არასამთავრობო სექტორთან ერთად ახორციელებს ვეტერანების და ომში დაღუპულთა ოჯახის წევრების მხარდასაჭერად. მან, ასევე, ისაუბრა იმ გამოწვევებზე, რომლებიც სამსახურისა და საქართველოს ვეტერანების წინაშე ჯერ კიდევ დგას და რომელთა გადალახვაშიც, საერთაშორისო პარტნიორების თანადგომა მნიშვნელოვანია. სამსახურის დირექტორმა ხაზი გაუსვა საქართველოს გეოსტრატეგიულ მნიშვნელობას, ჩვენი ქვეყნის წინაშე მშვიდობისა და უსაფრთხოების კუთხით არსებულ გამოწვევებს.

თავის მხრივ, რიჩარდ როდრიგესმა, მხარდაჭრის სურვილი გამოთქვა და ისაუბრა იმ საკითხებზე, რა მიმართულებითაც შეუძლიათ დაეხმარონ ვეტერანების საქმეთა სახელმწიფო სამსახურს და ქართველ ვეტერანებს. მხარეები შეთანხმდნენ ორმხრივი თანამშრომლობის სამომავლო გზებსა და სხვადასხვა ერთობლივი სოციალური პროგრამების განხორციელებზე, რაც ხელს შეუწყობს ქართველი ვეტერანების ფსიქო-სოციალური პირობების გაუმჯობესებას.

კობა კობალაძემ გულითადი მადლობა გადაუხადა მასპინძლებს მიღებისა და თანადგომისთვის.

რიჩარდ როდრიგესი არის ვეტერანი, რომელსაც აქვს 30 წელზე მეტი სამუშაო გამოცდილება აშშ-ს მთავრობაში, კორპორატიულ სექტორში და 21 წლიანი გამოცდილება შეერთებული შტატების საზღვაო ქვეითთა კორპუსში.

შეხვედრას, ასევე, ესწრებოდნენ: ვეტერანების საქმეთა სახელმწიფო სამსახურის სამართლებრივი უზრუნველყოფის დეპარტამენტის უფროსის მოადგილე, ირაკლი ჭანტურიძე, პროტოკოლის განყოფილების უფროსი, მარიამ ადამაშვილი, შრომისა და საერთაშორისო პოლიტიკის საკითხებში მრჩეველი, კეტლინ რიუ და შრომის დეპარტამენტის წარმომადგენლები.

ვიზიტის ფარგლებში, ვეტერანების საქმეთა სახელმწიფო სამსახურის დირექტორი, კობა კობალაძე სამთავრობო და არასამთავრობო სექტორთან შეხვედრებს განაგრძობს.

მუზეუმების საერთაშორისო დღესთან დაკავშირებით კულტურის სამინისტრომ პრემიები გასცა

13:12 - 18/05/2023

ეროვნულ მუზეუმში საქართველოს კულტურის, სპორტისა და ახალგაზრდობის მინისტრმა თეა წულუკიანმა მუზეუმების საერთაშორისო დღესთან დაკავშირებით, დამოუკიდებელი საქართველოს ისტორიაში, სამუზეუმო პრემიები პირველად გასცა.

სამინისტროს ინფორმაციით, საზეიმო ღონისძიებას მუზეუმების ხელმძღვანელები, თანამშრომლები, სამუზეუმო სფეროს წარმომადგენლები და მეცნიერები ესწრებოდნენ.

პრემიების დაწესების იდეის ავტორები არიან საქართველოს ხელოვნების სასახლე-კულტურის ისტორიის მუზეუმის გენერალური დირექტორი გიორგი კალანდია, საქართველოს ეროვნული მუზეუმის გენერალური დირექტორის პირველი მოადგილე ნიკა ახალბედაშვილი და გიორგი ჩიტაიას სახელობის ეთნოგრაფიული მუზეუმის დირექტორი ნინო ჭიპაშვილი. საქართველოს წამყვანი მუზეუმების ინიციატივით დაწესდა ხუთი სამუზეუმო პრემია: აკადემიკოს სიმონ ჯანაშიას, აკადემიკოს შალვა ამირანაშვილის, აკადემიკოს გიორგი ჩიტაიას, დავით არსენიშვილისა და აკაკი ჭანტურიას სახელობის.

აკადემიკოს სიმონ ჯანაშიას სახელობის პრემია, საქართველოს მუზეუმების სამეცნიერო საქმიანობაში შეტანილი განსაკუთრებული წვლილისათვის, გადაეცა ისტორიის მეცნიერებათა დოქტორს, პროფესორ ვახტანგ ჯაფარიძეს.

აკადემიკოს შალვა ამირანაშვილის სახელობის პრემია საქართველოს სამუზეუმო საქმიანობაში შეტანილი განსაკუთრებული წვლილისათვის გადაეცა ხელოვნებათმცოდნეობის დოქტორს, საგანძურის მთავარ მცველს, ელენე კავლელაშვილს (გარდაცვალების შემდეგ).

აკადემიკოს გიორგი ჩიტაიას სახელობის პრემია გიორგი ჩიტაიას ღვაწლის სათანადოდ შესწავლისა და დაფასებისთვის გადაეცა ისტორიის მეცნიერებათა დოქტორს, პროფესორ თამილა ცაგარეიშვილს.

დავით არსენიშვილის სახელობის პრემია დავით არსენიშვილის ღვაწლის სათანადოდ წარმოჩენისათვის გადაეცა ისტორიის მეცნიერებათა დოქტორს, პროფესორ ნათელა ვაჩნაძეს.

აკაკი ჭანტურიას სახელობის პრემია მარტვილის მხარეთმცოდნეობის მუზეუმის დაარსებისა და უნიკალური სამუზეუმო კოლექციების შექმნისათვის გადაეცა ისტორიკოს გივი ელიავას (გარდაცვალების შემდეგ).

გარდა ამისა, მადლობის სიგელებით დაჯილდოვდნენ ის ადამიანები, რომლებმაც 2022-2023 წლებში ოჯახის კუთვნილი სამუზეუმო ექსპონატები საქართველოს მუზეუმებს საჩუქრად გადასცეს, რითაც მათ სამუზეუმო კოლექციების შევსებაში განსაკუთრებული წვლილი შეიტანეს. მინისტრის მიერ მადლობის სიგელები გადაეცათ: კლარა მაჭარაშვილს – სხვიტორის აკაკი წერეთლის სახლ-მუზეუმის თანამშრომელსა და უხუცეს მუზეუმელს, რომელმაც 2022 წლის 20 დეკემბერს საქართველოს ხელოვნების სასახლეს უსახსოვრა მამის, 1937 წელს რეპრესირებული სოლომონ მაჭარაშვილის, შვეიცარიული, უნიკალური ოქროს (100 გ) საათი. სოლომონ მაჭარაშვილი აკაკი წერეთლის სახლეულის წევრი იყო. კლარა მაჭარაშვილმა განაცხადა, რომ საჩუქარი უსახსოვრა ქართველ ხალხს: „მამაჩემის ხსოვნის უკვდავსაყოფად, ჩემი ხალხის პატივისცემის ნიშნად, თქვენი მუზეუმისა და კულტურის სამინისტროს ნდობის დასტურად“;

თინა ჩუბინიძეს – 86 წლის პედაგოგს, რომელმაც 2022 წლის 15 იანვარს ხელოვნების სასახლეს გადასცა ბაბუის, იორდანე ჩუბინიძის, ნაქონი ვერცხლის მოოქრული უნიკალური ქამარი, რომელიც მნიშვნელოვანი შენაძენია ქართული ხალხური გამოყენებითი ხელოვნების ისტორიისათვის;

ნუგზარ ალანიას, რომელმაც ხელოვნების სასახლეს საჩუქრად გადასცა მამის, დამიანე ალანიას, უნიკალური არქივის ნაწილი: არაერთი ფოტო, გაზეთი თუ წიგნი; ტიციან ტაბიძის ხუთი ხელნაწერი, რომელთაგან ერთი ლექსი დღემდე გამოუქვეყნებელია და იეთიმ გურჯის 1921 წელს დაწერილი ლექსი „ავტოგრაფი“;

სიმონ კოპაძეს – მეცნიერსა და მკვლევარს, რომელმაც ხელოვნების სასახლეს გადასცა კონსტანტინე გამსახურდიას უძვირფასესი 57-გვერდიანი ხელნაწერი ცნობილი ტრილოგიიდან „დავით აღმაშენებელი“.

სამუზეუმო სფეროში კეთილსინდისიერი საქმიანობისთვის მადლობის სიგელები გადაეცათ ხელოვნების სასახლის ფონდების მთავარ მცველს, ირინა მოისწრაფიშვილსა და გიორგი ჩიტაიას ეთნოგრაფიული მუზეუმის გიდს, ნინო მაჩაბერიძეს.

სამინისტროს განცხადებით, სამუზეუმო პრემია გაიცემა წელიწადში ერთხელ 1000 ლარის ოდენობით. პრემიის მიმღები უნდა აკმაყოფილებდეს შემდეგ კრიტერიუმებს:

ხანგრძლივი (მინიმუმ 10 წელი) კეთილსინდისიერი საქმიანობა სამუზეუმო სფეროსთვის;

სამუზეუმო სფეროში აღიარებული მონოგრაფიები, სამეცნიერო ნაშრომები, საცნობარო ლიტერატურისა და კატალოგების შექმნაში მონაწილეობა ან ავტორობა;

სამუზეუმო კოლექციების შექმნა ან მათ შექმნაში მონაწილეობა;

მუზეუმის შექმნა ან მის შექმნაში მონაწილეობა;

ზოგადეროვნული ან საერთაშორისო დონის სამუზეუმო ექსპოზიციის მოწყობა ან მის მოწყობაში მონაწილეობა;

მნიშვნელოვანი სამუზეუმო ექსპონატების მაღალი დონის რესტავრაცია ან რესტავრაციის პროცესში მონაწილეობა;

ზოგადეროვნული ან საერთაშორისო დონის სამუზეუმო საგანმანათლებლო პროგრამების შექმნა ან სამუზეუმო სფეროში მათი დანერგვა;

მუზეუმის ისტორიის ან მუზეუმის შემქმნელთა ბიოგრაფიების კვლევაში მნიშვნელოვანი წვლილის შეტანა.

“გაგდებამდე უნდა წერო საჯაროდ სიმართლე”- თამარ ჩერგოლეიშვილი სალომე სამადაშვილს მიმართავს

13:08 - 18/05/2023

“გაგდებამდე უნდა წერო
საჯაროდ სიმართლე, თორემ ჭორაობას რომ გამოგიქვეყნებენ, გაგაგდებენ და აცოცების შანსი გერთმევა – ამის შესახებ “ტაბულას დამფუძნებელი, თამარ ჩერგოლეიშვილი სოციალურ ქსელში წერს.

“თავი სულელი არასოდეს მგონებია, მაგრამ 2012-მდე, მეგონა რომ არსებობდნენ ჩემზე მცოდნე და ჭკვიანი ადამიანები, რომლებსაც ჩემზე უკეთ ესმით პოლიტიკა – მეტი ნდობა მქონდა პოლიტიკური ელიტის მიმართ

2012 წლის მერე ნანახით მივხვდი, რომ ასეთი ადამიანები არ არსებობენ.

ამიტომ ავიღე და 2013 წელს ევროსაბჭოსთან კონტრაქტი გავწყვიტე – ჩავთვალე, რომ გიგას უნდა დავეხმარო (დავინახე რამხელა პრობლემების წინაშე დგას, ფაქტობრივად – მარტო) და აქ უფრო საჭირო ვარ, ვიდრე სტრასბურგში.

ამის მერე დაიწყო რაც დაიწყო …

მე ისე ვმოქმედებდი, როგორც მე ვთვლიდი სწორად.

ვთვლიდი, რომ მზის სხივი საუკეთესო დიზინფექტორია და პრობლემებზე ხმამაღლა უნდა ვილაპარაკო, რომ მოვაგვარო.

მიმაჩნდა რომ თუ წესებს დავიცავდი (არ მოვიტყუებოდი, ცილს არ დავწამებდი, არ ვიბოზებდი …) და დაუღალავად ვაკაკუნებდი – გამეღებოდა, თუ დაუღალავად მოვითხოვდი – მომეცემოდა.

(ეს ლოგიკა სულ მუშაობს ჩემთვის, ასე ვიღებ – რაც მინდა).

როცა ჩემს წვეტიან აზრებს საჯაროდ ვწერდი, ჩემი მაშინდელი გარემოცვა (🤢) ძალიან წუხდა – საჯაროდ ნუ წერო, თორემ კერძო საუბრებში თავად უარესებს იძახდნენ (ამიტომ ამერია გული და უკანმოუხედავად შემზიზღდნენ ოდისევსოს ბღავილი რომ დაიწყეს – მე ხომ ვიცი, რას ლაპარაკობდნენ მანამდე).

ხოდა სასაცილო ის იყო, რომ ვინც მე პატიოსნად მოქცევისთვის და სიმართლის საჯარო თქმისთვის მლანძღავდა – იმას კერძო საუბრებს უქვეყნებნენ ქოცები და უარეს შარებში ეხვეოდნენ.

სალომე სამადაშვილი ამის მაგალითია – გაგდებამდე უნდა წერო
საჯაროდ სიმართლე, თორემ ჭორაობას რომ გამოგიქვეყნებენ, გაგაგდებენ და აცოცების შანსი გერთმევა, მერე რა უნდა”- წერს ჩერგოლეიშვილი.

“გუშინ პარლამენტში მომხდარი ნიშნავდა ლუსტრაციას” – გია ვოლსკი

12:53 - 18/05/2023

გუშინ იყო აბსოლუტურად უტიფარი, ყოველგვარ ზღვარს გადასული განცხადებები და შეტევა იმ ადამიანების მიმართ, ვინც ჩათვალა, რომ ხმა მიეცა კანდიდატებისთვის და შესრულებულიყო ევროკომისიის პრინციპული რეკომენდაცია, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, შეტევა და იმ ადამიანების ლანძღვა, ვინც ხმა მისცა და ასევე ვისაც ხმა მისცეს, დაუმსახურებელი და უსაფუძვლო იყო.

„ეს ყველაფერი ლუსტრაციას ნიშნავდა, რომ რეკომენდაციის შესრულება არ არის იმ ინტერესში, რომელიც გააჩნია „ნაცმოძრაობის“ „მებრძოლ კოალიციას“. მათი მიზანია, რეკომენდაციები არ შესრულდეს და არ დაკომპლექტდეს იუსტიციის უმაღლესი საბჭო. ეს იმდენად ნათელი გახდა, რომ არ ვიცი, გუშინდელი სკანდალიდან როგორ შეიძლება გამოვიდნენ. თქვეს, რომ იყო გარიგება, ფული გადაიხადეს, ფული ჯოჯოხეთს ანათებს და ა.შ. სრულიად უნამუსო და უტიფარი განცხადებები გააკეთეს. არ შეიძლება, ასეთი გარიგება შემდგარიყო. ასეთი გარიგება არ ყოფილა, ეს არ არის „ნაცმოძრაობა“, რომელიც აღზევებული იყო და დაკავებული გარიგებებით და ხალხის დაშინებით, ინტრიგებით. მათ სხვა რესურსი არ ჰქონდათ. თუ ადამიანებმა გადაწყვიტეს, რომ საქართველოსთვის ასე უკეთესია, რომ რეკომენდაცია შესრულდეს, რატომ შეიძლება იმ იდეას უპირისპირდებოდეს, რაც აქვთ ხაბეიშვილსა და კეზერაშვილს“, – განაცხადა ვოლსკიმ.

პარლამენტმა იუსტიციის საბჭოს სამი არამოსამართლე წევრი აირჩია, დარჩენილ ორ ვაკანტურ თანამდებობაზე ასარჩევად კი კენჭისყრა ხელახლა გაიმართება. დღევანდელ პლენარულ სხდომაზე იუსტიციის უმაღლესი საბჭოს არამოსამართლე წევრების ხუთ ვაკანტურ თანამდებობაზე ასარჩევად, საერთო ჯამში, 29 კანდიდატს უყარეს კენჭი. ხმათა საჭირო რაოდენობა მიიღო ტრისტან ბენაშვილმა (93 მომხრე, ნული წინააღმდეგი), გიორგი გზობავამ (91 მომხრე, ნული წინააღმდეგი) და ზურაბ გურასპაშვილმა (93 მომხრე, ნული წინააღმდეგი).

იუსტიციის უმაღლესი საბჭოს არამოსამართლე წევრის ასარჩევად, სულ მცირე, 90 ხმა იყო საჭირო. შესაბამისად, საბჭოს წევრების ასარჩევად საჭირო იყო როგორც უმრავლესობის, ისე ოპოზიციის ხმები. იუსტიციის უმაღლესი საბჭოს წევრების არჩევას ოპოზიციიდან როსტომ და ნატო ჩხეიძეებმა, ნიკა მაჭუტაძემ, ბაჩუკი ქარდავამ და დილარ ხაბულიანმა დაუჭირეს მხარი.

“არ გამოიყენოთ შაქრის შემცვლელი, თუ წონის დაკლებას ცდილობთ” – ჯანმო

12:33 - 18/05/2023

არ გამოიყენოთ შაქრის შემცვლელი, თუ წონის დაკლებას ცდილობთ, – ნათქვამია ჯანდაცვის მსოფლიო ორგანიზაცია ახალ გაიდლაინში. ინფორმაციას ამის შესახებ ტელეკომპანია CNN-ი ავრცელებს.

ჯანდაცვის გლობალურმა ორგანიზაციამ განაცხადა, რომ არსებული მტკიცებულებების სისტემატური მიმოხილვა ცხადყოფს, რომ უშაქრო დამატკბობლების გამოყენებას „არავითარი გრძელვადიანი სარგებელი არ მოაქვს სხეულის ცხიმის შესამცირებლად მოზრდილებში ან ბავშვებში“.

მიმოხილვამ ასევე ცხადყო, რომ შესაძლოა პოტენციური არასასურველი ეფექტი დადგეს შაქრის შემცვლელების ხანგრძლივი გამოყენების გამო, როგორიცაა მე-2 ტიპის დიაბეტისა და გულ-სისხლძარღვთა დაავადებების გაზრდილი რისკი.

„ადამიანებმა უნდა განიხილონ სხვა გზები, რათა შეამცირონ თავისუფალი შაქრის მიღება. კერძოდ, მიიღონ საკვები, რომელიც ბუნებრივად შეიცავს შაქარს, როგორიცაა ხილი, ან უშაქრო საკვები და სასმელები. უშაქრო დამატკბობელი არ არის აუცილებელი დიეტური ფაქტორი და არ გააჩნია საკვები ღირებულება. ადამიანებმა უნდა შეამცირონ თავიანთ რაციონში სიტკბოობა, ცხოვრების ადრეულ ასაკში, ჯანმრთელობის გასაუმჯობესებლად“, – აღნიშნა ჯანმოს დირექტორმა კვებისა და სურსათის უვნებლობის საკითხებში, ფრანჩესკო ბრანკამ.

ორგანიზაციაში აღნიშნეს, რომ რეკომენდაცია ვრცელდება ყველა ადამიანზე, გარდა იმ ადამიანებისა, რომლებსაც დიაბეტი ჰქონდათ.

„ეს ახალი გაიდლაინი ეფუძნება უახლესი სამეცნიერო ლიტერატურის საფუძვლიან შეფასებას და ის ხაზს უსვამს იმას, რომ ხელოვნური დამატკბობლების გამოყენება არ არის კარგი სტრატეგია წონის დაკლებისთვის“, – აღნიშნა მკვლევარმა, იან ჯონსონმა.

საქართველოს საავტორო უფლებათა ასოციაციის საქმიანობის აუდიტორული შემოწმების შედეგები ცნობილია

12:28 - 18/05/2023

საქართველოს საავტორო უფლებათა ასოციაციის საქმიანობის აუდიტორული შემოწმების შედეგები ცნობილია.

„საქართველოს ინტელექტუალური საკუთრების ეროვნული ცენტრის – „საქპატენტის“ უფლებამოსილებას, კანონმდებლობით განსაზღვრულ სხვა ფუნქცია მოვალეობებთან ერთად, საავტორო და მომიჯნავე უფლებათა სფეროში სახელმწიფო პოლიტიკის გატარება წარმოადგენს. საქპატენტს კანონით აქვს მინიჭებული უფლება შეისწავლოს ავტორთა ქონებრივი უფლებების მართვასთან დაკავშირებული ნებისმიერი ინფორმაცია.

ერთ-ერთი ორგანიზაცია, რომელიც საქართველოში ავტორთა უფლებებს კოლექტიურ საფუძველზე მართავს ა(ა)იპ საქართველოს საავტორო უფლებათა ასოციაციაა (შემდგომ – ასოციაცია), რომლის გამგეობის თავმჯდომარე 2011 წლიდან დღემდე გიგა კობალაძეა.

ასოციაციის უმთავრესი ამოცანაა შეაგროვოს და სამართლიანად გაანაწილოს ავტორებზე მათი კუთვნილი უფლებების მართვიდან მიღებული ჰონორარები.კანონით დაკისრებული უფლება-მოვალეობების ჯეროვნად შესრულების მიზნით, საქპატენტმა 2023 წლის 3 თებერვალს გამოაცხადა ელექტრონული ტენდერი, რომლის მიზანი 2021-2022 წლების განმავლობაში ასოციაციის მიერ ავტორთა ქონებრივი უფლებების მართვის ეფექტიანობის შესამოწმებლად აუდიტორული მომსახურების შესყიდვა იყო.

დავაზუსტებთ, რომ აუდიტორული შემოწმების შესახებ საქპატენტმა ოფიციალურად აცნობა ასოციაციას 2022 წლის 19 დეკემბერს და ამ საკითხზე საქპატენტში შეხვედრისა თუ სხვა არაერთი, მათ შორის, წერილობითი კომუნიკაციის შემდეგ, ასოციაციამ 2023 წლის 12 იანვარს წერილობით გამოხატა თანხმობა ეთანამშრომლა აუდიტორულ კომპანიასთან და მიეწოდებინა მისთვის ავტორთა ქონებრივი უფლებების მართვასთან დაკავშირებული დოკუმენტები. გადაწყვეტილებას აუდიტორული შემოწმების შესახებ წინ უძღოდა არაერთი, მათ შორის, საჯარო სივრცეში გავრცელებული ინფორმაცია საქართველოში ავტორთა ქონებრივი უფლებების სფეროში შესაძლო დარღვევების შესახებ.

განსაკუთრებით საყურადღებო იყო USAID-ის ეკონომიკური უსაფრთხოების პროგრამასთან თანამშრომლობით აღნიშნულ საკითხზე განხორციელებული რაოდენობრივი და თვისებრივი კვლევის შედეგები, რომლებიც მიუთითებდნენ ავტორთა ქონებრივი უფლებების მმართველი ორგანიზაციების, მათ შორის, ასოციაციის მხრიდან, სავარაუდო გადაცდომების შესახებ, განსაკუთრებით კი ჰონორარების შეგროვებისა და განაწილების პროცესში გაუმჭვირვალობის, თუ სხვა მნიშვნელოვანი დარღვევების თაობაზე.

მიმდინარე წლის 28 აპრილს ელექტრონული ტენდერის გზით შერჩეულმა აუდიტორულმა კომპანიამ საქპატენტს, როგორც დამკვეთს, წარმოუდგინა ასოციაციის საქმიანობის შემოწმების ანგარიში, რომლის თანახმად, ასოციაციის საქმიანობაში არაერთი ხარვეზი გამოვლინდა. იმის გათვალისწინებით, რომ აუდიტის ანგარიში 140 გვერდისგან შედგება და ასახავს ასოციაციის საქმიანობის მრავალ ნაკლოვანებას, ამ განცხადებაში არსებული დარღვევებიდან მხოლოდ რამდენიმე მაგალითზე გავამახვილებთ ყურადღებას.როგორც ირკვევა, ასოციაციას დარღვეული აქვს შემოსავლების და ხარჯების აღრიცხვის მეთოდი, კერძოდ, ასოციაცია დარიცხვის მეთოდის ნაცვლად, კანონმდებლობის მოთხოვნათა საწინააღმდეგოდ, ე.წ. საკასო მეთოდს იყენებს. სათანადო ინფორმაციის ასოციაციაში არ არსებობის გამო კი აუდიტმა ვერ დაადგინა თუ რა თანხის გადახდის ვალდებულება გააჩნდა/გააჩნია ასოციაციას სახელმწიფო ბიუჯეტის წინაშე.

ასოციაციის საქმიანობის ამსახველი დოკუმენტების შესწავლის საფუძველზე, აუდიტის ანგარიშში მითითებულია, რომ 2021 წელს ასოციაციის მიერ ავტორთა ქონებრივი უფლებების განკარგვის გზით შეგროვებული ჰონორარების ჯამმა შეადგინა 3 822 063 ლარი. ასოციაციის წესდების მიხედვით დამტკიცებული წესის თანახმად, შეგროვებული ჰონორარიდან ადმინისტრაციული ხარჯისათვის ასოციაციას შეუძლია გამოიყენოს არაუმეტეს 20 %. ანუ ასოციაციას, იმ სამუშაოსთვის, რომელსაც იგი ავტორთა ჰონორარების შეგროვებისა და განაწილებისათვის ეწევა, უფლება აქვს შეგროვებული თანხის არაუმეტეს 20 % მიიღოს. თუმცა აუდიტმა დაადგინა, რომ ადმინისტრირებისათვის არა 20 % არამედ 47 % გაიხარჯა. უფრო ზუსტად კი ასოციაციის მართვის ხარჯმა შეადგინა 1 791 597 ლარი.

გასათვალისწინებელია, რომ ევროპარლამენტისა და ევროსაბჭოს 2014 წლის 26 თებერვლის 2014/26/EU დირექტივის მიხედვით, მართვის საფასური უნდა იყოს გონივრული და არ უნდა აღემატებოდეს საავტორო და მომიჯნავე უფლებების მართვის დოკუმენტირებულ ხარჯებს. საინტერესოა, რომ აუდიტის ანგარიშში, ამ მიგნებასთან ერთად ასოციაციის განმარტებაცაა მითითებული, სადაც აღნიშნულია, რომ ადმინისტრაციული ხარჯის ასეთი დიდი მოცულობა პანდემიის პერიოდში შემოსავლების შემცირებითა და არსებული ფიქსირებული ხარჯით იყო განპირობებული, მათ განმარტებაზე უფრო საინტერესო კი ის „ფიქსირებული“ ხარჯია, რომელიც ასოციაციამ პანდემიის პერიოდში ავტორთა ჰონორარებიდან გახარჯა.

ირკვევა, რომ ადმინისტრაციული ხარჯის ძირითადი ნაწილი თანამშრომლებზე გაცემული შეუსაბამოდ მაღალი სარგებელია. მაგალითად, ასოციაციაში ერთ-ერთ ხელმძღვანელ პოზიციაზე დასაქმებულმა პირმა 2021 წელს სარგებლის სახით 233 062 ლარი მიიღო (მათ შორის: ხელფასი 150 000 ლარი; პრემია 6 250 ლარი; ბონუსი 25 000 ლარი და სარგებელი 51 812 ლარი, რომელიც, თავის მხრივ, უცხოეთში სწავლის ღირებულებას – 28 086 ლარს, ნორმის ზემოთ მივლინების თანხას – 19 417 ლარს, დაზღვევის საფასურს – 2 921 ლარს, სასაჩუქრე ვაუჩერის ღირებულებას – 188 ლარს და ავტომანქანით სარგებლობის ღირებულებას – 1 200 ლარს მოიცავს).

დამატებით აღნიშვნის ღირსია, რომ ასოციაციამ 2021 წელს ავტორთა ქონებრივი უფლებების მართვის, მათი კუთვნილი ჰონორარების შეგროვებით მიღებული თანხიდან 42 316 ლარის ღირებულების ავტომობილი შეიძინა. აუდიტის ანგარიშით დგინდება, რომ გასული 2021 წლის მსგავსი მდგომარეობა დაფიქსირდა 2022 წელსაც, კერძოდ, ასოციაციის ავტორთა უფლებების მართვის შედეგად შეგროვებული 5 412 250 ლარიდან ასოციაციის მართვის ხარჯმა, ნაცვლად 20%-ის შეადგინა 40%, კერძოდ, 2 158 279 ლარი.გასულ წელთან შედარებით გაზრდილი შემოსავლებიდან 2022 წელსაც მნიშვნელოვანი თანხები ქონებრივი უფლებების მფლობელ ავტორთა ნაცვლად, ადმინისტრაციასა და მაღალ პოზიციებზე დასაქმებულ პირებს მოხმარდა.

მენეჯერულ პოზიციაზე დასაქმებულმა იგივე პირმა კი 2022 წელს სარგებლის სახით 336 569 ლარი მიიღო (მათ შორის: ხელფასი 143 750 ლარი; პრემია 27 500 ლარი; ბონუსი 37 500 ლარი და სარგებელი 127 819 ლარი, რომელიც მოიცავს სწავლის ღირებულებას – 77 957 ლარს, ნორმის ზემოთ მივლინების თანხას – 42 516 ლარს, დაზღვევის ღირებულებას – 5 959 ლარს, სასაჩუქრე ვაუჩერის ღირებულებას – 188 ლარს და ავტომანქანით სარგებლობის ღირებულებას – 1 200 ლარს).

ამავდროულად, ასოციაციამ 2021 წელს თუ ავტომობილი შეიძინა, 2022 წელს შეისყიდა უძრავი ქონება ქალაქ ბათუმში, რომლის ღირებულებამ 146 669 ლარი შეადგინა.ზემოთ აღწერილ ხარვეზებთან ერთად, ვფიქრობთ, აღნიშვნის ღირსია აუდიტის ანგარიშში მითითებული კიდევ ერთი ნაკლოვანება, კერძოდ დგინდება, რომ ასოციაცია სადეპოზიტო ანაბარზე დარიცხულ თანხას (2021 წ – 2 804 ლარი, 2022 წ – 9 599 ლარი) არამიზნობრივად იყენებდა ადმინისტრაციული ხარჯებისთვის ავტორებზე განაწილების ნაცვლად.

დამატებით გვინდა აღვნიშნოთ, რომ 2023 წლის 7 აპრილს, საქართველოს საავტორო უფლებათა ასოციაციამ წერილობით მიმართა საქპატენტს და აცნობა, რომ 2023 წლის 23 აპრილს ტარდებოდა ასოციაციის საერთო კრება, რომელზეც განიხილებოდა 2022 წლის საქმიანობის შეჯამება და ანგარიშის დამტკიცება, ასოციაციის წესდებასა და ავტორთა საბჭოს დებულებების ახალი რედაქციების მიღება, ავტორთა საბჭოს, გამგეობისა და თავმჯდომარის არჩევა, ასევე, ასოციაციის საქმიანობის მომავალი სტრატეგიული გეგმების წევრებისთვის გაცნობა.

საქპატენტმა წერილობით მიმართა ასოციაციას საერთო კრების გადადებასთან დაკავშირებით (ვინაიდან მიმდინარეობდა ზემოხსენებული აუდიტორული შემოწმება და არსებობდა შესაძლებლობა, რომ შემოწმების დასრულების შემდგომ აუდიტის ანგარიშში აისახებოდა ასოციაციის საქმიანობის შესახებ რიგი მიგნებები და გაიცემოდა შესაბამისი რეკომენდაციები), რათა შესაძლებელი ყოფილიყო აუდიტის შედეგების სრულყოფილი გაცნობა და ასოციაციის სტრატეგიული გეგმებისა და მომავალი საქმიანობის აღნიშნულ ინფორმაციაზე დაყრდნობით განსაზღვრა. მიუხედავად საქპატენტის დასაბუთებული მოთხოვნისა, საქართველოს საავტორო უფლებათა ასოციაციამ არ გადადო საერთო კრება, უფრო მეტიც, კიდევ ერთხელ აირჩიეს მოქმედი გამგეობის თავმჯდომარე, თუმცა, როგორც ირკვევა, საერთო კრების კანონმდებლობის მოთხოვნათა შეუსაბამოდ ჩატარებისა და პროცედურული დარღვევების გამო, ასოციაციის საერთო კრების შედეგები საჯარო რეესტრმა არ დაარეგისტრირა. აღნიშნულ საკითხზე საჯარო რეესტრის მიერ დადგენილი ხარვეზი საჯაროა და გამოქვეყნებულია მის ოფიციალურ ვებგვერდზე, დარღვევებს შორის კი ისეთი მნიშვნელოვანი გადაცდომებია მითითებული, როგორიცაა:

• წევრთა საერთო კრების ოქმი არ შეიცავს მოქმედი კანონმდებლობით კრების ოქმისთვის განსაზღვრულ მონაცემებს; მითითებას საერთო კრების მოწვევის პროცედურის დაცვასა და ამ კრების გადაწყვეტილებაუნარიანობაზე;

• წევრთა საერთო კრების ოქმით მიღებული გადაწყვეტილება არ შეესაბამება დღის წესრიგით განსაზღვრულ საკითხებს, ამასთან, დღის წესრიგის 2 საკითხს წარმოადგენდა წესდების ახალი რედაქციის დამტკიცება, თუმცა კრების ოქმით არ დგინდება კრების მიერ წესდების ახალი რედაქციის დამტკიცების თაობაზე გადაწყვეტილების მიღების ფაქტი;

• წესდებით არ დგინდება საზოგადოების წევრის მიღებაზე უფლებამოსილი პირი/ორგანო; ასევე წესდებით სრულყოფილად არ დგინდება გამგეობის სხდომის მოწვევის წესი და პროცედურა;

• სარეგისტრაციოდ წარმოდგენილია წესდების ახალი რედაქცია და შესაძლოა განხორციელდეს სუბიექტის რეგისტრირებული მონაცემების კანონთან შესაბამისობაში მოყვანის რეგისტრაცია, რასთან დაკავშირებითაც წარმოდგენილი უნდა იყოს სრულყოფილად შედგენილი სადამფუძნებლო შეთანხმება ან წესდება.

აუდიტის ანგარიში კიდევ ერთხელ ადასტურებს იმ ფაქტს, რომ, ავტორთა ქონებრივი უფლებების დაცვის მიზნით, აუცილებელია ეფექტიანი ზომების დროულად მიღება. ამ ეტაპზე განსაკუთრებით მნიშვნელოვანია საავტორო და მომიჯნავე უფლებების კოლექტიურ მართვასთან დაკავშირებით მოქმედ კანონმდებლობაში არსებული ხარვეზების გასწორება. ამ მიზნით უცხოელი პარტნიორების (CLDP, USAID) ჩართულობითა და, ასევე, მოწვეული უცხოელი ექსპერტების მონაწილეობით, საქართველოს პარლამენტის კულტურის კომიტეტთან ერთად, მომზადებულია საკანონმდებლო ცვლილებების პაკეტი, რომლის განხილვას პარლამენტი უახლოეს მომავალში გეგმავს“, – აღნიშნულია საქპატენტის განცხადებაში.

1...2,1052,1062,107...2,307 Page 2,106 of 2,307