აჭარაში, სტიქიის ზონაში, სადაც ადიდებულმა მდინარემ პრობლემები შექმნა, ყველა შესაბამისი სამსახური მობილიზებულია. როგორც მედიასთნ ხელვაჩაურის მუნიციპალიტეტის მერმა ზაზა დიასამიძემ განაცხადა, კოტეჯები, რომლებიც ადიდებულმა წყალმა დატბორა, არ ფუნქციონირებს, ვინაიდან ექსპლუატაციაში არ არის მიღებული:

“ადიდებულია მდინარე ყოროლისწყალი თავისი შენაკადებით. ჩვენ, ყველა შესაბამის სამსახურთან ერთად ადგილზე ვიმყოფებით და ვსწავლობთ ვითარებას. კოტეჯები არ ფუნქციონირებს, ექსპლუატაციაში არ არის მიღებული. ამასთან დაკავშირებით განცხადებას დამატებით გავაკეთებთ,”– აცხადებს ხელვაჩაურის მუნიციპალიტეტის მერი ზაზა დიასამიძე.

შეგახსენებთ, ხელვაჩაურში სტიქიას ებრძვიან. უხვი ნალექის შედეგად, სოფელ ყოროლისთავში მდინარე ადიდდა. დაიტბორა კოტეჯები და საცხოვრებელი სახლების ნაწილი, დაზიანდა ინფრასტრუქტურა.

აჭარის საავტომობილო გზების დეპარტამენტის ინფორმაციით, უხვმა ნალექმა ქობულეთი-სახალვაშოს მიმართულები პრობლემები შექმნა.

უწყების ცნობით, აღნიშნულ მონაკვეთზე საავტომობილო მოძრაობა არის აკრძალული. მათი ინფორმაციით, ქობულეთის, ხელვაჩაურისა და შუახევის მუნიციპალიტეტში ადგილობრივი მნიშვნელობის საავტომობილო გზებზე დამეწყრილი მონაკვეთების გაწმენდითი სამუშაოები ინტენსიურად მიმდინარეობს.

ძლიერი წვიმის შედეგად ქობულეთში მეწყრული პროცესები განვითარდა. ასევე, ხელვაჩაურში სოფელ ორთაბათუმში მდინარესთან არსებული კოტეჯები დაიტბორა. შემთხვევის შედეგად არავინ დაშავებულა.

კრემლი სომხეთის პარლამენტის მიერ სისხლის სამართლის საერთაშორისო სასამართლოს რომის სტატუტის რატიფიცირებას ეხმაურება. როგორც რუსეთის პრეზიდენტის პრესმდივანმა, დიმიტრი პესკოვმა განაცხადა, რუსეთი არ ისურვებდა, რომ ვლადიმირ პუტინს ოდესმე მოუწიოს მოკავშირე სომხეთში ვიზიტზე უარის თქმა.

„რა თქმა უნდა, არ ვისურვებდით, რომ ოდესმე რაიმე მიზეზით პრეზიდენტს მოუწიოს უარის თქმა სომხეთში ვიზიტებზე“, – განაცხადა პესკოვმა და აღნიშნა, რომ სომხეთი არის რუსეთის მოკავშირე, მეგობარი სახელმწიფო და პარტნიორი.

„უდავოდ, ჩვენ ბევრი რამ გვაერთიანებს მოძმე სომეხ ხალხთან. ეჭვი არ გვაქვს, რომ ყოველთვის გაგვაერთიანებს“, – განაცხადა პესკოვმა.

პესკოვმა ასევე არაკორექტული უწოდა სომხეთის გადაწყვეტილებას, მოეხდინა რომის სტატუტის რატიფიცირება.

„რა თქმა უნდა, სომხეთის მოქმედი ხელმძღვანელობის მიმართ გაჩნდება დამატებითი კითხვები, ისინი წინასწარ გადაეცა სომხურ მხარეს. ჩვენ ეჭვი გვეპარება და თავიდანვე გვეპარებოდა იმაში, რომ, ორმხრივი ურთიერთობების თვალსაზრისით, სომხეთის მიერ რომის სტატუტთან მიერთება კორექტულია. კვლავ მიგვაჩნია, რომ ეს არაკორექტული გადაწყვეტილებაა“ , – განაცხადა კრემლის წარმომადგენელმა.

როგორც პესკოვმა აღნიშნა, რუსეთი აბსოლუტურად არ ეთანხმება ფაშინიანის არგუმენტებს, რომელიც რომის სტატუტის მიღებას ასაბუთებს თავისი ქვეყნის უსაფრთხოებისთვის არასაკმარისი ინსტრუმენტებით.

„ჩვენ აბსოლუტურად არ ვეთანხმებით სომხეთის პრემიერ-მინისტრის, ფაშინიანის სიტყვებს იმის შესახებ, რომ სომხეთის გადაწყვეტილება, მიუერთდეს რომის სტატუტს, დაკავშირებული იყო კოლექტიური უსაფრთხოების ხელშეკრულების ორგანიზაციისა და სომხურ-რუსული პარტნიორობის ინსტრუმენტების არასაკმარისობით ქვეყნის უსაფრთხოების უზრუნველსაყოფად. ეს ასე არ არის“, – განაცხადა დიმიტრი პესკოვმა.

სომხეთის პარლამენტმა სისხლის სამართლის საერთაშორისო სასამართლოს რომის სტატუტის რატიფიცირება მოახდინა.

შეიძლება დავეთანხმოთ კიდეც ჩუგოშვილს და მათმა პოზიციამ შეიძლება ახალი პრაქტიკა მოგვცეს – თუკი პრეზიდენტი წარმომადგენლობით უფლებამოსილებას ახორციელებს ქვეყნის შიგნით, დიახ, ამას ასევე სჭირდება თანხმობა, – ამის შესახებ ფრაქცია “ქართული ოცნების” თავმჯდომარე მამუკა მდინარაძემ განაცხადა.

ამასთან, როგორც მან აღნიშნა, პრეზიდენტი აქამდეც ქმნიდა პრობლემებს, თუმცა, ამაზე მკაცრი დამოკიდებულება არ ჰქონდათ მანამ, სანამ წითელი ხაზები არ გადაკვეთა.

„სხვათა შორის, ამაზე შეიძლება დავეთანხმოთ კიდეც (თამარ ჩუგოშვილს). წარმომადგენლობით უფლებამოსილებას კონსტიტუციის თანახმად, სჭირდება მთავრობის თანხმობა, დიახ, ქვეყნის შიგნითაც. აქამდე ქვეყნის გარეთ ის ითხოვდა, ქვეყნის შიგნით არც ითხოვდა! დიახ, მათმა პოზიციამ, რომელიც ერთ ნაწილში იყო ოდნავ რელევანტური, შეიძლება ახალი პრაქტიკა მოგვცეს, რომ თუკი წარმომადგენლობით უფლებამოსილებას ახორციელებს ქვეყნის შიგნით, დიახ, ამას ასევე სჭირდება თანხმობა. ეს გუნდთან ნამდვილად არ გამივლია, მე როგორ ერთი იურისტი, ასე მიმაჩნია, არ ვიცი, შეიძლება სხვა პოზიცია წარადგინონ ჩვენებმა საკონსტიტუციო სასამართლოში, მაგრამ არ მგონია. დიახ, მას წარმომადგენლობითი უფლებამოსილების განხორციელების ნებისმიერ მომენტში სჭირდება თანხმობა, ყოველ შემთხვევაში ასე წერია კონსტიტუციაში. აქამდე თუ ამას ყურადღებას არავინ აქცევდა, იმასაც კი არ აქცევდა ვინმე ყურადღებას, თუ რა პოზიციები ჰქონდა, ლოიალური, რბილი დამოკიდებულება ჰქონდა მთავრობას, რომ პოლარიზაცია არ გაღრმავებულიყო, შეიძლება ახლა ჩვენ დავდოთ პრეცედენტი, რომ წარმომადგენლობითი უფლებამოსილების განხორციელების ნებისმიერ ფორმას, მათ შორის, ქვეყნის შიგნით, სჭირდება თანხმობა.

აქამდე არ იყო მკაცრი დამოკიდებულება, ადამიანმა, რომელმაც თქვა, რომ ფორმალურად ახორციელებთ რეკომენდაციებსო, ამის შემდეგაც კი მისცეს თანხმობა უცხო ქვეყნებთან წარმოედგინა საქართველოს პოზიცია, მაგრამ როცა ეს პოზიციები არ შეცვალა, როცა რუბიკონი, ყოველგვარი წითელი ხაზი გადაკვეთა, ამის შემდეგ იმოქმედა მთავრობამ. წლების განმავლობაში ის პრობლემებს ქმნიდა ელჩების დანიშვნაზე, ვატარებდით, ატარებდა ამას მთავრობა, რაღაც ეტაპზე გადაწყდა, რომ მოდით, ეს აღარ გავატაროთ. ეს ეტაპია, როცა მოთმინების ძაფი წყდება, როცა ზიანდება სახელმწიფოს ინტერესები, როცა ევროპული ინტეგრაცია ზიანდება, ელჩები არ არიან წარმოდგენილნი და ურთიერთობები ზიანდება, “- განაცხადა მდინარაძემ.

მდინარაძის შეფასებით, პრეზიდენტის წარმომადგენლებს უსუსური არგუმენტები ჰქონდათ.

„შეუძლებელია ვინმემ იდავოს დაარღვია თუ არა. მოდით, კვალიფიკაციას ნუ დავუწუნებთ თამარ ჩუგოშვილს და მაია კოპალეიშვილს, მაგრამ ისეთი საოცრებების ლაპარაკი მოუწიათ, რომ საზოგადოებაც, ყველაზე ნაკლებად გათვითცნობიერებული ადამიანიც კი მიხვდებოდა, რომ ასეთი გიჟური, უსუსური, არარეალური არგუმენტების ფონზე ყველაფერი ნათელი და გასაგებია“, – განაცხადა მდინარაძემ.

საქართველოს პრეზიდენტის წარმომადგენელმა, თამარ ჩუგოშვილმა საკონსტიტუციო სასამართლოს სხდომაზე, სადაც სალომე ზურაბიშვილის საიმპიჩმენტო წარდგინების განხილვა მიმდინარეობს, აღნიშნა, რომ გაუგებარია, რატომ არის დაკავშირებული 52-ე მუხლის განმარტება თვითმფრინავში ჩაჯდომასთან და პრეზიდენტის საზღვარგარეთ გასვლასთან.

„წარდგინების ავტორები კონსტიტუციის დარღვევად არ მიიჩნევენ შემთხვევებს, როდესაც სახელმწიფოს მეთაური ქვეყნის შიგნით ხვდება სხვა ქვეყნის მეთაურებსა თუ უმაღლესი ოფიციალური თანამდებობის პირებს. მე არ მესმის, რატომ არის დაკავშირებული 52-ე მუხლის განმარტება თვითმფრინავში ჩაჯდომასთან და პრეზიდენტის საზღვარგარეთ გასვლასთან,”- განაცხადა ჩუგოშვილმა.