ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყო გადაწყვეტილების მიღების ცენტრში, ნათლად ამბობს, რომ სააკაშვილი მოატყუეს, მისი პროვოცირება მოახდინეს და აიძულეს, ჯარები სამხრეთ ოსეთში შეეყვანა, – ამის შესახებ უკრაინის პრეზიდენტის აპარატის ყოფილმა მრჩეველმა, ალექსეი არესტოვიჩმა რუს ჟურნალისტთან, იულია ლატინინასთან ინტერვიუში განაცხადა.

ჟურნალისტმა არესტოვიჩს ჰკითხა: „როგორ წამოეგო პუტინი აშშ-ის სატყუარას? როგორ იყო ეს საქართველოსთან დაკავშირებით? სააკაშვილი ხომ მზად იყო პუტინთან მოლაპარაკებისთვის, მას მშვენივრად ესმოდა, რომ საქართველო არ იყო რუსეთის ბუფერული სახელმწიფო, უზარმაზარ პრობლემებს განიცდიდა და მზად იყო ყველასთან მოლაპარაკებისთვის. თუმცა პუტინის რეალური დამოკიდებულება საქართველოს მიმართ, როგორც ჩანს, მას არ ესმოდა. Პუტინი რეალურად ფიქრობდა, რომ ეს უნდა იყოს პროვინცია, რომელიც მას ფეხებს უკოცნის. ვინ უნდა ყოფილიყავი, რომ უკრაინას პროვინციასავით მოქცეოდი, მიგეყვანა საქმე ომამდე და წამოგებულიყავი ამერიკულ ტყუილს?“

არესტოვიჩის თქმით, „მანიპულირებულმა მონაცემებმა და შეფასებებმა განაპირობა, რომ საქართველომ დაარტყა სამხრეთ ოსეთს“.

„ჩემი შეფასება პუტინსა და მის პოლიტიკაზე არ ემთხვევა თქვენს შეფასებას. რაც შეეხება საქართველოს, მე ვიცნობ ხალხს, ვინც პირდაპირ იყო გადაწყვეტილების მიღების ცენტრში 2008 წლის ომამდე. ეს ყველაფერი სააკაშვილთან დაკავშირებით ძალიან ჰგავს იმ სქემას, რაც გამოყენებული იყო უკრაინასთან მიმართებით. ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყო გადაწყვეტილების მიღების ცენტრში, ნათლად ამბობს, რომ სააკაშვილი მოატყუეს, მისი პროვოცირება მოახდინეს და აიძულეს, ჯარები სამხრეთ ოსეთში შეეყვანა. შეკითხვაზე, ვინ მოატყუა, ზოგიერთი ამბობს, რომ ეს რუსეთმა გააკეთა. ამ ხალხს კი სხვა მოსაზრება აქვს, რომ არა იმდენად რუსეთიდან, არამედ უკრაინულის მსგავსი ტექნოლოგიის გამოყენებით. მანიპულირებულმა მონაცემებმა, შეფასებებმა განაპირობა, რომ საქართველომ დაარტყა სამხრეთ ოსეთს. ამ პროვოკაციაში არამხოლოდ რუსეთის პასუხისმგებლობაა. იყო თუ არა რუსული ჯარები მზად გვირაბთან ომის დასაწყებად, ეს სერიოზული შეკითხვაა. იქ ტყუილის ელემენტები იყო, ისევე, როგორც ახლა არის კორეელების თაობაზე ორივე მხრიდან, სააკაშვილმა კი თავს უფლება მისცა, ამაზე წამოგებულიყო, ამაში თითქმის დარწმუნებული ვარ. ვისთვის, როგორ და რა პროპორციით გამოვიდა, ამაზე დავა დიდხანს შეიძლება, თუმცა ეს იყო კლასიკური პროვოკაცია, ვერძის საბრძოლველად გაყვანა“, – განაცხადა არესტოვიჩმა.

დღეისათვის საქართველოს ეროვნული ბანკისა და კომერციული ბანკების ერთობლივი ძალისხმევით, ჩვენ გვაქვს რეგიონში ნამდვილად  სამაგალითო საბანკო სექტორი, რითაც შეგვიძლია ვიამაყოთ, – ამის შესახებ საქართველოს პრემიერ-მინისტრმა ირაკლი კობახიძემ ბანკირის პროფესიულ დღესთან დაკავშირებით გამართულ ღონისძიებაზე სიტყვით გამოსვლისას განაცხადა.

მთავრობის მეთაურის თქმით, ქვეყანაში არის ჯანსაღი მაკროეკონომიკური გარემო, რაც  სწორი ეკონომიკური, ეფექტიანი მონეტარული პოლიტიკის შედეგია.

„პირველ რიგში, მინდა მოგილოცოთ პროფესიული დღე. დღეს ჩვენ აღვნიშნავთ ასევე ილია ჭავჭავაძის დაბადების დღეს. როგორც მოგეხსენებათ, სწორედ ილია ჭავჭავაძე გახლდათ დიმიტრი ყიფიანთან ერთად პირველი ქართული ბანკის შექმნის ინიციატორი და გარდა ამისა, ის ხელმძღვანელობდა ათწლეულების განმავლობაში პირველ ქართულ ბანკს.  მას ძალიან კარგად  ესმოდა  საბანკო სექტორის როლი ქვეყნის განვითარების პროცესში, დიდი ძალისხმევა დაუთმო ამ საერთო ეროვნულ საქმეს და ბუნებრივია, აბსოლუტურად ლოგიკურია ის, რომ ილია ჭავჭავაძის სახელს დაუკავშირდა ბანკირის დღის დაფუძნებაც. 

თითქმის საუკუნე-ნახევარი გავიდა  საქართველოში პირველი ბანკის დაფუძნებიდან. დღეისათვის საქართველოს ეროვნული ბანკისა და კომერციული ბანკების ერთობლივი ძალისხმევით, ჩვენ გვაქვს რეგიონში ნამდვილად  სამაგალითო საბანკო სექტორი, რითაც შეგვიძლია ვიამაყოთ.

ჩვენ გვაქვს სწორი ეკონომიკური, ეფექტიანი მონეტარული პოლიტიკა და ამ ყველაფრის შედეგად, გვაქვს ჯანსაღი მაკროეკონომიკური გარემო ჩვენს ქვეყანაში; ბოლო 4 წლის განმავლობაში მივაღწიეთ ძალიან მაღალ ეკონომიკურ ზრდას, ევროპაში ვართ პირველ ადგილზე ეკონომიკური ზრდის თვალსაზრისით. გასული 3 წლის განმავლობაში საშუალო ზრდამ შეადგინა 9.7% და წელსაც გვაქვს ძალიან მაღალი მაჩვენებელი. რა თქმა უნდა, ამ ყველაფერში, საბანკო სექტორს და ეროვნული ბანკის საქმიანობას განსაკუთრებული როლი ენიჭება. ასევე უზრუნველყოფილია ქვეყანაში ფასების სტაბილურობა, ლარის კურსის სტაბილურობა, დაბალია მიმდინარე ანგარიშის დეფიციტი. ჩვენ გვაზარდეთ საერთაშორისო რეზერვების მოცულობა, ამისთვისაც, რა თქმა უნდა, ეროვნულ ბანკს განსაკუთრებული მადლობა ეკუთვნის”, –  განაცხადა პრემიერ-მინისტრმა.

ეროვნული ბანკის რეგულაციები და საზედამხედველო ჩარჩო სრულ თანხვედრაშია მოწინავე საერთაშორისო პრაქტიკასთან, – ამის შესახებ საქართველოს პრემიერ-მინისტრმა ირაკლი კობახიძემ ბანკირის პროფესიულ დღესთან დაკავშირებით გამართულ ღონისძიებაზე სიტყვით გამოსვლისას განაცხადა.

მთავრობის მეთაურის თქმით, საქართველო პირველი ქვეყანაა რეგიონში, რომელმაც უკვე შეიტანა განაცხადი SEPA-ში, ერთიანი ევრო გადახდების სივრცეში გაწევრიანების თაობაზე.

„იყო საკმაოდ რთული ვითარება, გასული წლების განმავლობაში, რაც განპირობებული იყო ჯერ პანდემიით, შემდეგ რუსეთ-უკრაინის ომის დაწყებით. იყო გლობალური ინფლაციური შოკები და უკვე 19 თვეა, ამ ყველაფრის მიუხედავად, ჩვენ ვახერხებთ ინფლაციის მიზნობრივზე დაბალ დონეზე შენარჩუნებას. აქაც, რა თქმა უნდა, ეროვნული ბანკის როლი არის მნიშვნელოვანი და საქართველოს მთავრობის როლი არის ძალიან მნიშვნელოვანი. 

ასევე, ცალკე უნდა აღინიშნოს ის ფაქტი, რომ ეროვნული ბანკი და მთლიანად საფინანსო სისტემა სათანადოდ იცავენ იმ სასანქციო რეჟიმს, რომელიც არის დადგენილი და ამასთან დაკავშირებით განხორციელდა არაერთი ვიზიტი, შედგა მონიტორინგი, რამაც დაადასტურა ის, რომ ჩვენ ყველა თვალსაზრისით გვაქვს სათანადო დამოკიდებულება ამ საკითხის მიმართ, ამისთვისაც მადლობა მინდა გადაგიხადოთ. ეროვნული ბანკის რეგულაციები და საზედამხედველო ჩარჩო სრულ თანხვედრაშია მოწინავე საერთაშორისო პრაქტიკასთან. 

საქართველო პირველი ქვეყანაა რეგიონში, რომელმაც უკვე შეიტანა განაცხადი SEPA-ში (ერთიანი ევრო გადახდების სივრცეში) გაწევრიანების თაობაზე. რა თქმა უნდა, ყველა ამ წარმატებაში თითოეული თქვენგანის როლი არის განსაკუთრებული. განსაკუთრებულია საქართველოს ეროვნული ბანკის როლი, კომერციული ბანკების, თითოეული თქვენგანის როლი და კიდევ ერთხელ მინდა, მადლობა გადაგიხადოთ თქვენი პროფესიონალიზმისთვის და ყველა იმ საქმისთვის, რასაც თქვენ აკეთებთ ჩვენი ქვეყნის სასარგებლოდ. კიდევ ერთხელ მინდა, მოგილოცოთ ბანკირის დღე, პროფესიული დღე და გისურვოთ წარმატებები მომავალ საქმიანობაში,”- განაცხადა პრემიერმა.