რეგისტრაცია არ არის კრიტერიუმი არასამთავრობოებზე დაფინანსების გაცემისთვის, დაფინანსების გაცემისთვის იქნება კონკრეტული კრიტერიუმები – გამოცდილება, კეთილსინდისიერება და კომპეტენცია, – ამის შესახებ პრემიერმა ჟურნალისტის კითხვის პასუხად განაცხადა.

ირაკლი კობახიძის თქმით, როდესაც კონკურსი ცხადდება, ზოგადად არის ხოლმე ძირითადად ორი კრიტერიუმი – კომპეტენცია და კეთილსინდისიერება და ასე იქნება არასამთავრობო ორგანიზაციების დაფინანსების შემთხვევაშიც.

„არასამთავრობო ორგანიზაციების დაფინანსებისთვის რეგისტრაცია არ არის კრიტერიუმი. მეტიც, ეს შეიძლება იყოს ორგანიზაცია, რომელიც საერთოდ არ ფინანსდება უცხოეთიდან, შესაბამისად არც ეკუთვნის რეგისტრაცია რეესტრში და მასაც შეუძლია, რა თქმა უნდა, განაცხადის შემოტანა. დაფინანსების გაცემისთვის იქნება კონკრეტული კრიტერიუმები, ეს არის ორგანიზაციის გამოცდილება, კეთილსინდისიერება და კომპეტენცია, რაც არის სტანდარტული კრიტერიუმები. ყველა მიმართულებით, როცა კონკურსები ცხადდება, ძირითადად ორი კრიტერიუმია, ესენია კომპეტენცია და კეთილსინდისიერება,”- აღნიშნა პრემიერმა.

ბორდერიზაცია არის სწორედ 2012 წლამდე ჩადენილი დანაშაულის მემკვიდრეობა, მაშინ იქნა ჩადენილი კონკრეტული დანაშაული „ნაცმოძრაობის” რეჟიმის მიერ, როცა ჩააბარეს ჩვენი ტერიტორიების 20% და ბორდერიზაცია არის ამ ყველაფრის მემკვიდრეობა, – ამის შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე, ჟურნალისტის კითხვის საპასუხოდ განაცხადა.

მთავრობის მეთაურის თქმით, ამ მძიმე მემკვიდრეობის მიუხედავად, სახელმწიფო მაქსიმუმს აკეთებს ეროვნული ინტერესების დასაცავად.

„შეგახსენებთ, რომ გამსახურდიას დროს გაუქმებული საზღვრები თავიდან, კანონის დონეზე შემოხაზა „ნაცმოძრაობის რეჟიმმა. მათ თავიდან აღადგინეს სამხრეთ ოსეთის ძველი ოლქის საზღვრები და პირდაპირ შექმნეს იმ საზღვრებში ადმინისტრაციული ერთეული. დღევანდელი ბორდერიზაცია მიყვება სწორედ „ნაცმოძრაობის” მიერ აღდგენილ საზღვრებს, პირდაპირ იმ რუკებით მოქმედებენ, რომელიც დააკანონა „ნაცმოძრაობამ”. არ არსებობდა ეს საზღვრები 2006 წლამდე და 2006 წელს სწორედ „ნაცმოძრაობამ” დააკანონა ის საზღვრები, რასაც მიყვება დღეს ეს ბორდერიზაციის პროცესი. ეს ჩვენთვის არის შემაშფოთებელი, თუმცა ამ ყველაფერმა შეუქმნა რეალურად რუსეთის ფედერაციას ბორდერიზაციის საფუძველი. პირდაპირ დაუკანონეს საზღვრები საკუთარი კანონით”, – განაცხადა პრემიერმა.

ირაკლი კობახიძის შეფასებით, დღეს სახელმწიფო ამ მიმართულებით ეფექტიანად მუშაობს, რაც გამოიხატება იმაში, რომ არ ყოფილა არც ერთი შემთხვევა, როცა ბორდერიზაცია სცდება „ნაცმოძრაობის” მიერ დაკანონებული საზღვრების ფარგლებს.

„თუ არ ჩავთვლით გახარიას ერთ-ერთ დავალებას, რამაც გამოიწვია ის, რომ ბორდერიზაცია განხორციელდა იმ ძველი საზღვრების მიღმა, სხვა შემთხვევაში არსებითად არ ყოფილა არც ერთი ასეთი შემთხვევა, როცა ბორდერიზაცია სცდება „ნაცმოძრაობის” მიერ დაკანონებული საზღვრების ფარგლებს. ეს არის ეფექტური მუშაობა. მაქსიმუმი კეთდება ამისთვის. რაც შეეხება გატაცება-მკვლელობას, იყო ძალიან მძიმე ფაქტები ამ კუთხით, თუმცა აქაც რაოდენობა თვისებრივად შემცირებულია. რომ ავიღოთ მკვლელობა-გატაცება, წინა ხელისუფლების პერიოდში რამდენჯერმე აღემატებოდა მაჩვენებელი ჩვენი ხელისუფლების პერიოდს, უბრალოდ მალავდნენ ამ ინფორმაციას, სამივე ტელევიზია იყო ერთ ხელში, მაშინდელი რეჟიმის ხელში და ეს ინფორმაცია იმალებოდა. ჩვენი ხელისუფლების პირობებში, მონაცემები რადიკალურად შემცირებულია და სწორედ ეს უკავშირდება სახელმწიფო უსაფრთხოების სამსახურის ეფექტიან მუშაობას”, – აღნიშნა პრემიერ-მინისტრმა.

ყველა პოლიტიკურ პარტიას შეუძლია რეკლამის განთავსება, შეუფერხებლად აგიტაციის წარმოება, სრული თავისუფლება არის უზრუნველყოფილი – ასეთ პირობებში როგორ უნდა დადოს ეუთო-ოდირმა დასკვნა არჩევნების არაკონკურენტულობის თაობაზე, –  ამის შესახებ პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

პრემიერის თქმით, თუ ასეთ საარჩევნო გარემოს პირობებში ეუთო-ოდირი სხვა რამეს დაწერს, ამას ფასი ვერ ექნება.

„რუსეთის დაზვერვის ინფორმაციით, ეუთო-ოდირი წინასწარ დასკვნას დადებს არჩევნების არაკონკურენტულ გარემოში ჩატარებასთან დაკავშირებით. მე არ მგონია, რომ ეს პროგნოზი იყოს სწორი. იმისათვის, რომ ეუთო-ოდირმა დადოს დასკვნა არაკონკურენტული არჩევნების შესახებ, ამისთვის ელემენტარული ხელჩასაჭიდი ხომ უნდა ჰქონდეს. მაგალითად, რა, რომ ვიღაცეებს არ ჰქონდათ ბილბორდების განთავსების საშუალება, ან დაუბლოკეს რეგისტრაცია, ან საერთო გარემო არ იყო კონკურენტული. რაღაც ხელმოსაჭიდი ხომ უნდა იყოს. დღეს ყველა ხედავთ, რომ რეგისტრირებულია უამრავი პარტია. ყველას შეუძლია რეკლამის განთავსება, შეუფერხებლად აგიტაციის წარმოება – სრული თავისუფლება არის უზრუნველყოფილი. ასეთ პირობებში როგორ უნდა დადოს ეუთო-ოდირმა დასკვნა არჩევნების არაკონკურენტულობის თაობაზე. ან იგივე, როდესაც საუბარია თავისუფალ არჩევნებზე. რაღაც ხელმოსაჭიდი ხომ უნდა ჰქონდეს. თქვენ ხედავთ, როგორ წარიმართება საარჩევნო პროცესები საქართველოში, როგორია საარჩევნო გარემო. როცა არაფერია ხელმოსაჭიდი, რა უნდა დაწეროს ეუთო-ოდირმა. ამიტომ, მე რუსეთის დაზვერვის ამ განცხადებას ვერ დავეთანხმებოდი. თუ ასეთ საარჩევნო გარემოს პირობებში ეუთო-ოდირი სხვა რამეს დაწერს, ამას ფასი ვერ ექნება. მთავარი შემფასებელი ამ არჩევნების იქნება ქართული საზოგადოება და ქართველი ხალხი. ეს არის ჩვენთვის მთავარი “, – განაცხადა პრემიერმა.

წლევანდელი არჩევნები წარიმართება უპრეცედეტო გარე ჩარევის ფონზე, რაც არის საარჩევნო პრინციპების უხეში დარღვევა და რაც ძალიან სამწუხაროა, – ამის შესახებ პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

პრემიერის თქმით, ხელისუფლება ისმენს ათასგვარ მუქარას, შანტაჟს და ამას  აქვს ერთადერთი მიზეზი – ის, რომ საქართველოში არ გაიხსნა მეორე ფრონტი.

„რუსეთს არ აქვს რესურსი, რომ რაიმე არსებითი გავლენა მოახდინოს საარჩევნო პროცესებზე საქართველოში. რაც შეეხება ზოგადად სურათს, ძალიან სამწუხაროა, რომ წლევანდელი არჩევნები წარიმართება უპრეცედეტო გარე ჩარევის ფონზე, რაც არის საარჩევნო პრინციპების უხეში დარღვევა, რაც ძალიან სამწუხაროა. ვისმენთ ათასგვარ მუქარას, შანტაჟს. ყველაფერს აქვს ერთადერთი მიზეზი – ის, რომ ჩვენ საქართველოში არ გავხსენით მეორე ფრონტი. ამის გამო არიან გულდაწყვეტილი კონკრეტული ადამიანები და მათ აქვთ იმედი, რომ ამ არჩევნების შემდეგ მაინც მოახერხებენ საკუთარი აგენტურის დაბრუნებას ხელისუფლებაში, რათა გახსნან მეორე ფრონტი, რასაც ვერ ეღირსებიან, იმიტომ, რომ ქართული საზოგადოება ასეთ ძალას, სისხლიანი რეჟიმის ავტორებს არასდროს არ მოაბრუნებს ხელისუფლებაში.

სახელმწიფო უსაფრთხოების სამსახური კარგად რომ მუშაობს, იმიტომ არის მყარად დაცული საქართველოში მშვიდობა და უსაფრთხოება უწყვეტად, 12 წლის განმავლობაში.  როცა წინა რეჟიმს არ ჰქონდა არავითარი სისტემები და პირიქით, ავანტიურებს აწარმოებდა, მაშინ მოხდა სწორედ ომი, რამაც შეიწირა 400-ზე მეტი ჩვენი თანამოქალაქე, 30 000-ზე მეტი დევნილად იქცა”, – განაცხადა პრემიერმა.

სიღარიბის დაძლევა არის ჩვენი ერთ-ერთი უმთავრესი ეროვნული ამოცანა – ორიდან ერთ-ერთი უმთავრესი; ერთი არის ტერიტორიული მთლიანობის აღდგენა და მეორე – სიღარიბის განულება, – ამის შესახებ პრემიერ-მინისტრმა ირაკლი კობახიძემ ბრიფინგზე განაცხადა.

მთავრობის მეთაურის თქმით, როდესაც „ქართული ოცნება” მოვიდა ხელისუფლებაში, სიღარიბის მაჩვენებელი 30%-ს შეადგენდა, რაც იმას ნიშნავს, რომ 1 120 000 ადამიანი ცხოვრობდა სიღარიბის ზღვარს მიღმა.

„უკვე შარშანდელი მონაცემებით, სიღარიბის ზღვარს  მიღმა ცხოვრობს ჩვენი თანამოქალაქეების 11,8%, რაც ნიშნავს იმას, რომ 440 ათასი არის მაჩვენებელი. თავის მხრივ, ეს იმას ნიშნავს, რომ 2012 წლიდან დღემდე 680 ათასმა ადამიანმა დაძლია სიღარიბე. თუმცა, ჩვენთვის რა თქმა უნდა, ეს მაჩვენებელიც ვერ იქნება დამაკმაყოფილებელი. როცა ჩვენი 440 ათასი თანამოქალაქე ცხოვრობს სიღარიბის ზღვარს მიღმა, ეს ნიშნავს, რომ კიდევ ბევრია გასაკეთებელი. თუმცა, უკვე წელს ველოდებით სიღარიბის მაჩვენებლის სერიოზულ კლებას. იმედი გვაქვს, წლის ბოლოს ერთნიშნამდე შემცირდება სიღარიბის მაჩვენებელი და ამ ტემპით უნდა გავაგრძელოთ”, – განაცხადა პრემიერმა.

ირაკლი კობახიძის თქმით, როდესაც საუბარია სწრაფ ეკონომიკურ ზრდაზე, სწორედ ამას მოაქვს სიღარიბის და უმუშევრობის შემცირება, დასაქმება და ყველა მიმართულებით არის ძალიან კარგი ტემპები.

„მთავარია, ეს ტემპები შევინარჩუნოთ. ასეთ შემთხვევაში, ჩვენ 2030 წლისთვის უკვე შევძლებთ როგორც უმუშევრობის, ისე სიღარიბის მიმართულებით მონაცემების განულებას. ეს არის აბსოლუტურად რეალური. 2028 წლისთვის ეს მონაცემები უკვე მინიმუმამდე დავა და ეს იქნება ჩვენი ერთ-ერთი უმთავრესი საარჩევნო დაპირება”, – აღნიშნა პრემიერ-მინისტრმა.

ამერიკის შეერთებულ შტატებში სენატის საგარეო ურთიერთობათა კომიტეტში საქართველოს საკითხზე ეკა გიგაურის გამოსვლას მმართველ გუნდში კრიტიკა მოჰყვა.

პარლამენტის განათლების, მეცნიერებისა და ახალგაზრდულ საკითხთა კომიტეტის თავმჯდომარის, გივი მიქანაძის თქმით, არასამთავრობო ორგანიზაცია “საერთაშორისო გამჭვირვალობა-საქართველოს” ხელმძღვანელის მოხსენება რადიკალური ოპოზიციის ინტერესს ემსახურებოდა.

“ხელისუფლება ანტიამერიკულ რელსებზე არ გადასულა. ეკა გიგაური, როგორც ოდიოზური პიროვნება, საზოგადოებაში ჩამოყალიბდა, როგორც ადამიანი, რომელიც ემსახურება მხოლოდ და მხოლოდ მის პატრონებს და ეწევა იმ პოლიტიკას, რომელიც რადიკალური ფრთის მხარდაჭერას გულისხმობს”, – განაცხადა გივი მიქანაძემ.