„კოალიცია ცვლილებისთვის“ მხარს უჭერს საქართველოს პრეზიდენტის, სალომე ზურაბიშვილის ინიციატივას ტექნიკური მთავრობის დასახელებასთან დაკავშირებით.

როგორც კოალიციის განცხადებაშია აღნიშნული, პრეზიდენტის დღევანდელი ინიციატივა სრულ შესაბამისობაშია ქარტიასთან.

„პრეზიდენტის დღევანდელი ინიციატივა სრულ შესაბამისობაშია „ქართულ ქარტიასთან“. ჩვენ ხელმოწერით დავადასტურეთ ჩვენი ერთგულება, სრულად შევასრულოთ ქარტიით გათვალისწინებული ყველა პუნქტი. შესაბამისად, მხარს ვუჭერთ პრეზიდენტის დღევანდელ ინიციატივას“, – აღნიშნულია განცხადებაში.

საქართველოს პრეზიდენტმა, სალომე ზურაბიშვილმა დღეს გამართულ ბრიფინგზე განაცხადა, რომ ტექნიკურ მთავრობას არჩევნებამდე დაასახელებს და ის იქნება მხოლოდ და მხოლოდ პასუხისმგებელი იმაზე, რომ აღმასრულებელის მხრიდან შეასრულოს, რაც წერია ქარტიაში. ამასთან, როგორც მან აღნიშნა, დროა, ქარტიაზე ხელმომწერმა ოთხმა პარტიამ მიიღოს გადაწყვეტილება, რამდენად არიან ბოლომდე ქარტიის სულისკვეთებისა და მისი ყოველივე სიტყვის ერთგულნი.

არჩევნებამდე 14 დღით ადრე, სალომე ზურაბიშვილის პოლიტიკური აქტიურობა ურთიერთბრალდებების თემა ხდება. მთავრობის მეთაური, პრეზიდენტს კონსტიტუციის დარღვევაში ადანაშაულებს და დემოკრატიული არჩევნების პრინციპებზე მიუთითებს.

საქართველოს მთავრობის მეთაურმა ქვეყნის უზენაესი კანონის დარღვევაში ქვეყნის პრეზიდენტი დღეს კიდევ ერთხელ დაადანაშაულა. ირაკლი კობახიძემ სალომე ზურაბიშვილს შეახსენა, რომ კონსტიტუციის მიხედვით, პრეზიდენტი ზეპარტიული უნდა იყოს. მთავრობის მეთაურის ადრესატები იყვნენ საერთაშორისო დამკვირვებლებიც. პრემიერი მათ მოუწოდებს, ყურადღება გაამახვილონ ზურაბიშვილის ახალ ინიციატივაზე, რომელიც 26 ოქტომბერს ორბელიანების სასახლის საარჩევნო საკოორდინაციო შტაბად გადაქცევას გულისხმობს.

ათონელის რეზიდენციის საკოორდინაციო პლატფორმად გარდაქმნაში პრობლემას ვერ ხედავენ ხელისუფლების ოპონენტები. ოპოზიციონერი ლიდერები დარწმუნებული არიან, რომ სალომე ზურაბიშვილის ყველა ინიციატივა ქვეყნის ევროინტეგრაციას ემსახურება.

სალომე ზურაბიშვილის ბოლო ინიციატივა კონსტიტუციის დარღვევის მორიგი დასტურია მმართველი გუნდისთვის. “ქართულ ოცნებაში“ ამბობენ, რომ ქვეყნის პრეზიდენტსა და ოპოზიციას შორის გამყოფი ხაზი უკვე დიდი ხანია აღარ არსებობს. მათივე თქმით, პრეზიდენტმა დაივიწყა ზეპარტიულობის პრინციპი.

26 ოქტომბერს ორბელიანების სასახლეში საკოორდინაციო შტაბის მოწყობა პრეზიდენტმა რამდენიმე დღის წინ დააანონსა. ვისთვის გაიღება ათონელის სასახლის კარი ზუსტად 14 დღეში – ეს ჯერ უცნობია.

აგენტურის მთავარი დაპირება ტექნიკური მთავრობა ყოფილა – ზურაბიშვილმა გვამცნო რამდენიმე წუთის წინ, – ამის შესახებ ფრაქცია „ქართული ოცნების“ თავმჯდომარე, მამუკა მდინარაძე სოციალურ ქსელში წერს.

მისი თქმით, „სალომე ზურაბიშვილმა ბრიფინგზე კვლავ დაადასტურა, რომ ოთხი პარტია – სააკაშვილის, გვარამიას, ხაზარაძის და გახარიას პარტიები საერთო მიზნით, საერთო პატრონის დავალებებით მოქმედებენ.“

„ჩვენი დაპირებაა მშვიდობა, ღირსება და გაცილებით უკეთესი ცხოვრება თითოეული მოქალაქისათვის! დღეს საქართველო უკვე პირველი ქვეყანაა ეკონომიკური ზრდის მაჩვენებლით ევროპაში! ოთხ წელიწადში სიღარიბით და უმუშევრობით საშუალო ევროპულ მაჩვენებელს ჩამოვცდებით! ჩვენი დაპირებაა, მხოლოდ ამ გზით ევროპული ოჯახის სრულფასოვანი წევრობა! ჩვენი დაპირებაა შერიგება და ურთიერთპატიება ქვეყნის გაერთიანების მიზნით! აგენტურის მთავარი დაპირება ტექნიკური მთავრობა ყოფილა – ზურაბიშვილმა გვამცნო რამდენიმე წუთის წინ. სანქციები, ეკონომიკის ჩამოქცევა და ომი მათი დაპირებების შედარებით ფარული მხარეა. ზურაბიშვილმა ბრიფინგზე კვლავ დაადასტურა, რომ ოთხი პარტია – სააკაშვილის, გვარამიას, ხაზარაძის და გახარიას პარტიები საერთო მიზნით, საერთო პატრონის დავალებებით მოქმედებენ.

ერთი საინტერესო დეტალიც – გახარიას კანონით არ ეკუთვნის უფასო სარეკლამო დრო და ამის მიუხედავად „ნაცმედიები“ დაუბრკოლებლად უშვებენ მის ვიდეორგოლებს“, – წერს მამუკა მდინარაძე სოციალურ ქსელში.

საქართველოს პრეზიდენტი სალომე ზურაბიშვილი აცხადებს, რომ ტექნიკურ მთავრობას არჩევნებამდე დაასახელებს.

ამის შესახებ სალომე ზურაბიშვილმა განცხადება პრეზიდენტის ადმინისტრაციაში გააკეთა.

„ვაპირებ, რომ წარვადგინო ტექნიკური მთავრობა, ამ გარდავალ ეტაპზე შევქმნა ტექნიკური, ადმინისტრაციული მთავრობა, რომელიც იქნება მხოლოდ და მხოლოდ პასუხისმგებელი იმაზე, რომ აღმასრულებელის მხრიდან შეასრულოს ის, რაც წერია ქარტიაში და ამ თვეებში მიგვიყვანოს იქ, სადაც უნდა მივიდეთ, ანუ ევროპის კარებთან.

რადგან ჩემი წარსადგენია, ვთვლი, რომ უნდა იყოს წარდგენილი ადრე, არჩევნებამდე, რათა საზოგადოებამ იცოდეს, ვინ იქნება პასუხისმგებელი მთავრობაში და პარლამენტის კონტროლის ქვეშ ვინ წაიყვანს ამ ქვეყანას ქარტიის გზაზე“, – განაცხადა სალომე ზურაბიშვილმა.

მისივე თქმით, დროა, რომ ქარტიაზე ხელმომწერმა ოთხმა პარტიამ მიიღოს გადაწყვეტილება, რამდენად არიან ბოლომდე ქარტიის სულისკვეთებისა და მისი ყოველივე სიტყვის ერთგულნი.

„იმ დროს, როცა ამ ოთხ პარტიას შორის ჯერ არ არის ურთიერთნდობა, გარკვეული იყოს, ვინ დგას ერთგულად ბოლომდე ამ ქარტიის უკან. მე ველოდები, რომ პარტიებმა კიდევ ერთხელ დაადასტურონ, რომ ამ ყველაფერს ეთანხმებიან, თუ არადა, ვინც არ ეთანხმება, უკან წაიღონ ხელმოწერა. საჭიროა, საზოგადოებამ იცოდეს, რომელი პარტია არის ბოლომდე თანმიმდევრობით ამ ქარტიის უკან“, – განაცხადა სალომე ზურაბიშვილმა.

ჩვენ ახლა განსაკუთრებული მდგომარეობა გვაქვს, რომ არც კი გვიწევს ფაქტობრივად ამ ე.წ. კვლევებზე საუბარი და მათი უარყოფა, თავად ოპოზიცია ამხელს ერთმანეთს, – ამის შესახებ პარლამენტის თავმჯდომარე შალვა პაპუაშვილმა „მთავარი არხის“ კვლევებთან დაკავშირებით განაცხადა.

როგორც პარლამენტის თავმჯდომარემ აღნიშნა, ოპოზიცია თავად ამხელს ერთმანეთს, როდესაც მათ მიერ ჩატარებულ კვლევებს ვხედავთ.

„აქ ჩვენს სამუშაოს თავად ოპოზიცია აკეთებს და ამხელს ერთმანეთს. ვხედავთ, რომ როცა ეს არის კეზერაშვილის მართულ ტელევიზიაში, მაშინ „ნაციონალური მოძრაობაა“ წინ, როცა ეს არის ნიკა გვარამიას მართულ ტელევიზიაში, მაშინ ნიკა გვარამია არის წინ. სასაცილოა, ასე არასერიოზულადაც ხომ არ უნდა მოექცნენ საკუთარ საზოგადოებას. ასე რომ, ჩვენზე კარგად ამ კვლევებზე საუბრობენ თავად ოპოზიციის წარმომადგენლები, რომ ეს არის ხან კეზერაშვილის ოცნებები, ხან გვარამიას ოცნებები, ხან სააკაშვილი, ხან ხაზარაძის ოცნებები. ეს ოცნებები დარჩებათ მათ უკან 26 ოქტომბერს, როდესაც ქართველი ხალხი უკვე მერამდენეჯერ რეალობის სარკეში ჩაახედებს მთლიანად ოპოზიციას“, – განაცხადა შალვა პაპუაშვილმა.

ცენტრალური საარჩევნო კომისიის (ცესკო) თავმჯდომარემ, გიორგი კალანდარიშვილმა „დღის ქრონიკაში“ განმარტა, რატომ ვერ გაიხსნა სტრასბურგში საარჩევნო უბნები.

„უცხოეთში, საარჩევნო უბნების შექმნის საფუძველს წარმოადგენს საგარეო საქმეთა სამინისტროს მიერ მოწოდებული ინფორმაცია, ლოკაციები და ამომრჩეველთა რაოდენობა, იქ, ამის შესახებ ინფორმაცია არ იყო. მეორე – გასულია ყველანაირი ვადები, მესამე – ცესკო, კენჭისყრის დღემდე რაც იქმნება, იმის მიღმა დამატებით სხვა ლოკაციაზე, თუნდაც ასეთ მომართვიანობას ჰქონდეს ადგილი, ფიზიკურად ვერ შექმნის საარჩევნო უბანს.

ეს საკითხი გამოყენებულია იმისთვის, რომ ერთი მხრივ, ჩვენი უცხოეთში მყოფი თანამემამულეები შეცდომაში შეიყვანონ და ამ საკითხზე არასწორი აღქმები შეუქმნან. მეორე მხრივ – როდესაც საკითხის მოგვარება შეუძლებელია, რადგან შესაბამისი ვადები, შესაბამისი პროცედურები ამოწურულია. როდესაც ამ ყველაფრის შესახებ ცნობილია სხვადასხვა ჩართული მხარისთვის, რომ რაღაც პროცედურა არის შეუსრულებელი და წარმოუდგენელი, ცხადია, ამ დროს ხდება ამ საკითხზე პედალირება და იმდაგვარად წარმოჩენა, რომ თითქოს ცესკოს რაიმე მოქმედების გაკეთება შეუძლია და თითქოს ის ამას არ აკეთებს. ეს არის სამართლებრივიდან პოლიტიკურ სივრცეში გადატანის მცდელობა, რომელიც მიზნად ისახავს ინსტიტუციის იმდაგვარად წარმოჩენას,რომ თითქოს ის რაღაცას არ აკეთებს და ამით მეტი პოლიტიკის შემოტანა ამ პროცესში“, – აღნიშნა გიორგი კალანდარიშვილმა.

„ეს იმ ბინძური, ფაშისტური კამპანიის გაგრძელებაა, რასაც რადიკალური ოპოზიცია და თავიანთი პატრონები ახორციელებენ“, – ამის შესახებ თბილისის მერმა, კახა კალაძემ ცენტრალური საარჩევნო კომისიის თავმჯდომარის, გიორგი კალანდარიშვილის მიერ  გაკეთებული იმ განცხადების შეფასებისას აღნიშნა, რომლის თანახმადაც თანამშრომლებს შეტყობინებები ეგზავნებათ, სადაც მათ სამსახურის დატოვებას სთხოვენ.

მისივე შეფასებით, ოპოზიციის წარმომადგენლებს ქვეყნის განადგურების სურვილი აქვთ, თუმცა მათ ამის შესაძლებლობა არ მიეცემა.

„ეს არის იმ ბინძური, ფაშისტური კამპანიის გაგრძელება, რასაც რადიკალური ოპოზიცია და თავიანთი პატრონები ახორციელებენ სხვადასხვა გზით ქვეყანაში. რატომ უნდა დატოვოს თანამშრომელმა თანამდებობა, რა არის საპროტესტო? რა ხდება ცუდი ქვეყანაში? ის, რომ მშვიდობა გვაქვს? ის, რომ ბომბები არ ცვივა და ქალაქები და სოფლები არ ნადგურდება? ამის გამო?

ეს არის მათი მთავარი ამოცანა, რომ ქვეყანაში იყოს ისეთი მდგომარეობა, ისეთი კრიზისული ვითარება, საომარი მოქმედებები, ქალაქები და სოფლები ცეცხლის ალში იყოს გახვეული, იყოს გაუბედურებული ოჯახები, იყოს დაღუპული ახალგაზრდობა, ქვეყნის გაქცეული მოსახლეობა – ეს არის მათი მთავარი ამოცანა, მაგრამ არ მოგცემთ ამის შესაძლებლობას. ქვეყანაში იქნება მშვიდობა, სტაბილურობა და ეკონომიკური განვითარება”, – განაცხადა თბილისის მერმა.

კახა კალაძემ აქვე შეაფასა ქვეყანაში არეულობის მცდელობასთან დაკავშირებით პრემიერ-მინისტრ ირაკლი კობახიძის მიერ დღეს გაკეთებული განცხადება და აღნიშნა, რომ ოპოზიციის წარმომადგენლები ყველაფრის მკადრებლები არიან.

”მერწმუნეთ, ისეთ ბოროტ ძალასთან გვაქვს საქმე, ყველაფრის მკადრებლები და ყველაფერზე წამსვლელები არიან. შესაბამისად, გვმართებს ძალიან დიდი ყურადღება – შესაბამის სტრუქტურებს და, რა თქმა უნდა, საზოგადოებასაც. იციან, რომ არჩევნები წაგებული აქვთ. არანაირი რესურსი და შესაძლებლობა არ გააჩნიათ, რომ არჩევნები დემოკრატიული გზით, ხალხის მხარდაჭერით მოიგონ და ამგვარი ქმედებებით, პროვოკაციებით, აქვთ სურვილი, ქვეყანაში სიტუაცია დაძაბონ. ძალიან ფრთხილად უნდა ვიყოთ ყველა მიმართულებით”, – აღნიშნა კახა კალაძემ.