ბუნებრივია, არავის სჯერა, რომ პროტოკოლურ წესებთან არის დაკავშირებული პრობლემა. ვფიქრობ ადგილი აქვს სხვა განწყობების დემონსტრირებას და ეს საკითხი ამისთვის არის მომიზეზებული, – ამის შესახებ საპარლამენტო უმრავლესობის წევრმა, მიხეილ სარჯველაძემ განაცხადა, რითაც გამოეხმაურა 26 მაისის ღონისძიებაზე პროტოკოლის დარღვევასთან დაკავშირებით საქართველოს პრეზიდენტის, სალომე ზურაბიშვილის მიერ გაკეთებულ განცხადებას.

„იქ კონკრეტული საკითხები რაც დასახელდა, არ იყო საფუძვლიანი პრეტენზია და შესაბამისად, არ მგონია რომ ვინმეს მიზეზი აქვს, იგივე მთავრობის პროტოკოლი გააკრიტიკოს რომელიმე პროცედურის დაუცველობაზე“, – აღნიშნა სარჯველაძემ.

ამასთან, დეპუტატის თქმით, თავიდანვე მმართველი გუნდის ამოცანა იყო, რომ პრეზიდენტი ზეპარტიული ყოფილიყო, თუმცა, დღეს სალომე ზურაბიშვილი ამ ამოცანას ვერ ასრულებს.

„ფაქტია, რომ აქტიურად და არა მხოლოდ კულუარული ან საქმიანი დისკუსიების ფორმატებში, არამედ სადემონსტრაციოდ იკავებს პრეზიდენტი ერთ მხარეს – ოპოზიციის მხარეს და მე არ მგონია, რომ ეს მხოლოდ იმით იყოს გამოწვეული, რომ ემპათია აქვს დასუსტებული ოპოზიციისადმი. მე მგონია, რომ იქ უშვებს შეცდომას, როდესაც ცდილობს, რომ სიმპათიები დაიმსახუროს ოპოზიციის მხრიდან. აქ არასწორი გათვლები აქვს, მაგრამ არ გამოვრიცხავ, რომ გარკვეული ახალი კონფიგურაციის შექმნის მცდელობასთან გვქონდეს საქმე, რადგან არ არის გამორიცხული, რომ ოპოზიციაში აღმოჩნდნენ ძალები, რომელთათვისაც მისაღები აღმოჩნდეს პრეზიდენტის კანდიდატურა გარკვეული პოლიტიკური სამომავლო გეგმებისთვის. ეს მხოლოდ ვარაუდი შეიძლება იყოს.

ჩვენთვის ამოცანა იყო, რომ პრეზიდენტი ყოფილიყო ზეპარტიული. ამ ამოცანას სამწუხაროდ ვერ ასრულებს, რადგან რაღაც ეტაპზე, ფადი ასლის განცხადებებს რომ ემსგავსება პრეზიდენტის განცხადებები, ეს უხერხულობა ცხადია არის. აღარ ჩამოვთვლი ოპოზიციურ ლიდერებს, რომელთა განცხადებებიც ერთ-ერთში ემთხვევა ის კრიტიკული განცხადებები, რომელსაც პრეზიდენტი აკეთებს. პრეზიდენტის ინსტიტუტის საკეთილდღეოდ უნდა ვთქვათ, რომ უმჯობესი იქნება პოლიტიკური ნეიტრალიტეტი და მიკერძოებისგან თუ მეტ-ნაკლებად იქნება დაცული. პრეზიდენტის განცხადებები რამენაირად უნდა იყოს მეტ-ნაკლებად ნეიტრალური, გამაერთიანებელი. მათ შორის დეპოლარიზაციის მიმართულებით შეუძლია შეასრულოს პოზიტიური როლი პრეზიდენტმა“, – განაცხადა მიხეილ სარჯველაძემ.

სამწუხარო რეალობასთან გვაქვს საქმე საბოლოოდ, როცა სალომე ზურაბიშვილის მიმართ საზოგადოებას ნდობა აღარ აქვს და პრაქტიკულად, დელეგიტიმაცია არსებობს პრეზიდენტის მიმართ, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა განაცხადა.

მისი თქმით, ისეთ დროსა და ვითარებაში, რასაც ჰქვია დამოუკიდებლობის დღე ყოველგვარი პოლიტიკური სუბიექტური ინტერესი ერთი დღით მაინც უნდა გადადოს ნებისმიერმა პოლიტიკოსმა, არათუ პრეზიდენტმა.

„თავისი სიტყვებიდან გამომდინარე, რეალურად შეიძლება, არც კი დაუგდოს ადამიანმა ყური მის სიტყვებს. გამაღიზიანებელია ისეთ დროსა და ვითარებაში, რასაც ჰქვია 26 მაისი, დამოუკიდებლობის დღე, როდესაც ყოველგვარი პოლიტიკური სუბიექტური ინტერესი ერთი დღით მაინც უნდა გადადოს ნებისმიერმა პოლიტიკოსმა, არათუ პრეზიდენტმა, რომელიც არის ზეპარტიული, ამის ამბიცია თუ გაქვს და ამ დროს შენ საკუთარ მოქალაქეებს ეთნიკური ნიშნითაც კი გამოყოფ და ზოგს ნახევრად რუსს ეძახი და წვევამდელებისგან ფიცს იღებ. ბევრი ოფიცერი მონაწილეობს იქ და შეიძლება, მათი ოჯახია წევრები ან ნათესავები იყვნენ რუსეთის ფედერაციაში, ვინც მაგალითად, იქიდან ოჯახებს არჩენენ და შეურაცხყოფას აყენებ იმ ხალხს, ვინც შენ წინაშე ფიცს დებს.

გარდა ამის, აუცილებლად უნდა გავიხსენოთ ის დღე, როდესაც მას ჰქონდა წინასაარჩევნო კამპანია, თუ არ ვცდები ეს ირაკლი კობახიძემ თქვა – „ძლიერი ქალი სუსტი კაცების წინააღმდეგ,“ მაშინდელი რეალობა და ახლა ჩვენ მივიღეთ – „სუსტი ქალი, სუსტი პრეზიდენტი სახელმწიფოს წინააღმდეგ.“ ეს რეალობა მივიღეთ სამწუხაროდ. ეს ერთი წელი თუ წელიწადნახევარი გავა. როცა აღარ იქნება პრეზიდენტი, არ ვიცი, ის აპირებს აქ დარჩენას თუ წასვლას უცხოეთში, მნიშვნელობა არ აქვს. პრეზიდენტმა ჩართოს თავისი ვიდეო გამოსვლები, საზოგადოება როგორ შეაფასებს ამ გამოსვლებს იმ რეალობაში, რა რეალობებიც იყო, მერე თვითონ უნდა დაფიქრდეს ამაზე“, – განაცხადა მაჭარაშვილმა.

სალომე ზურაბიშვილს შეუძლია, 12 რეკომენდაციიდან ერთ-ერთი შეასრულოს, მაგალითად, გაათავისუფლოს პრეზიდენტი სააკაშვილი და ნიკა გვარამია, – ამის შესახებ „ნაციონალური მოძრაობის“ თავმჯდომარე ლევან ხაბეიშვილმა პრეზიდენტის ადმინისტრაციასთან განაცხადა, სადაც ნიკა გვარამიას შეწყალების მოთხოვნით აქცია იმართება.

მისი თქმით, სალომე ზურაბიშვილმა უნდა გადადგას კონკრეტული ნაბიჯი, რომელიც ემსახურება ჩვენი სახელმწიფოს ინტერესებს.

„დამოუკიდებელი საქართველოს ისტორიაში არავინ გაუსამართლებიათ იმის გამო, რომ მეუღლეს ავტომობილი ათხოვა, ასეთი რამ ბუნებაში არ არსებობს. ეს კარგად უნდა იცოდეს საზოგადოებამ. სალომე ზურაბიშვილს შეუძლია, 12 რეკომენდაციიდან ერთ-ერთი შეასრულოს, მაგალითად, გაათავისუფლოს პრეზიდენტი სააკაშვილი და ნიკა გვარამია. შესაბამისად, დღეს ნიკას თავისუფლებისთვის იმართება აქცია.

მნიშვნელოვანია, რომ სალომეს როდესაც უნდა, რომ წარმოადგინოს საქართველო და იყოს საქართველოს პრეზიდენტი, მაშინ მარტო ლაპარაკით არა, საქმითაც უნდა დაამტკიცოს ეს და ეს ინსტრუმენტი არის მის ხელში, შესაბამისად, უნდა გადადგას კონკრეტული ნაბიჯი, რომელიც ემსახურება ჩვენი სახელმწიფოს ინტერესებს“, – განაცხადა ხაბეიშვილმა.

კობა კობალაძე აშშ-ს საერთაშორისო განვითარების საფინანსო კორპორაციის მმართველ დირექტორს კენეტ ანჯელს შეხვდა

ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ, ამერიკის შეერთებულ შტატებში სამუშაო ვიზიტის ფარგლებში, მორიგი შეხვედრა გამართა აშშ-ს საერთაშორისო განვითარების საფინანსო კორპორაციის, DFC-ის მმართველ დირექტორთან, პროექტების დაფინანსების მიმართულებით, კენეტ ანჯელთან.

შეხვედრაზე საუბრის ძირითადი საკითხი გახლდათ თბილისში, მრავალპროფილური, მულტიფუნქციური ჰოსპიტლის მშენებლობის მხარდაჭერა DFC-ის მხრიდან. კობა კობალაძემ დეტალურად განმარტა ვეტერანთა მრავალპროფილური ჰოსპიტლის პროექტის განხორციელების საჭიროება. ასევე, ისაუბრა მის პრიორიტეტებზე, მობილობასა და უპირატესობებზე. კობა კობალაძის განმარტებით, ეს ჰოსპიტალი გახდება კავკასიის რეგიონში ერთ-ერთი მნიშვნელოვანი სტაციონარი, სადაც სამედიცინო სერვისების მიღებას შეძლებენ, ქართველი ვეტერანები და მათი ოჯახის წევრები, ვეტერანები საქართველოს ოკუპირებული ტერიტორიებიდან, ასევე, აზერბაიჯანიდან, სომხეთიდან და სხვა ქვეყნებიდან.

კენეტ ანჯელის განცხადებით, ჯანდაცვის სფერო, DFC-ის პრიორიტეტული მიმართულებაა. მან დაინტერესება გამოხატა აღნიშნული პროექტის მიმართ და განაცხადა, რომ გარკვეული კრიტერიუმების დაკმაყოფილების შემდეგ, რომელიც აშშ-ს საერთაშორისო განვითარების საფინანსო კორპორაციას აქვს გაწერილი, ისინი მზად იქნებიან, ითანამშრომლონ ამ საკითხზე ვეტერანების საქმეთა სახელმწიფო სამსახურთან და განიხილონ ჰოსპიტლის მშენებლობის შემდეგი ეტაპები.

კობა კობალაძემ კენეტ ანჯელს მადლობა გადაუხადა შეხვედრისა და ვეტერანთა ჰოსპიტლის მშენებლობაში დახმარების მზაობისთვის. მისი თქმით, ეს არის უმნიშვნელოვანესი პროექტი, რომელიც ვეტერანებს და მათი ოჯახის წევრებს გაუმარტივებს ერთ სივრცეში მრავალპროფილური, მაღალი სტანდარტის სამედიცინო სერვისების მიღებას.

შეხვედრას, ასევე, ესწრებოდნენ: ვეტერანების საქმეთა სახელმწიფო სამსახურის პროტოკოლის განყოფილების უფროსი, მარიამ ადამაშვილი და ამერიკის შეერთებულ შტატებში საქართველოს საელჩოს უფროსი მრჩეველი, პაატა პატიაშვილი. თბილისში, ვეტერანთა მულტიფუნქციური ჰოსპიტლის მშენებლობისთვის, ვეტერანების საქმეთა სახელმწიფო სამსახურს, ლუბლიანას ქუჩაზე, 5300 კვ.მ მიწის ფართობი სახელმწიფოსგან უკვე გადაეცა.

ვეტერანების საქმეთა სახელმწიფო სამსახურის დირექტორი, კობა კობალაძე, სამთავრობო და არასამთავრობო სექტორთან აშშ-ში შეხვედრებს განაგრძობს.

ქალბატონი პრეზიდენტი ინიციატივით გამოვიდა, რომ დიასპორის მინიმუმ ერთი წარმომადგენელი პარლამენტში მოვახვედროთ. არათუ პარლამენტში, ჩვენ ფრანგული დიასპორის წარმომადგენელი, ქალბატონი სალომე ზურაბიშვილი დავნიშნეთ, ავირჩიეთ საქართველოს პრეზიდენტად, – ამის შესახებ პრემიერ-მინისტრმა ირაკლი ღარიბაშვილმა საგარეო საქმეთა სამინისტროში სიტყვით გამოსვლისას განაცხადა, სადაც დიასპორის ფორუმი 2023 მიმდინარეობს.

როგორც პრემიერმა აღნიშნა, მისთვის შეურაცხმყოფელია „დიასპორას ვუწოდო ნახევრად რუსი, ნახევრად ქართველი“.

„ახლა, რაც შეეხება დიასპორის საკითხებს, ხელისუფლებამ, რამდენიმე წლის წინ ჩვენივე ინიციატივით კონსტიტუციაში ჩავწერეთ,რომ დიასპორაზე ზრუნვა არის ხელისუფლების ვალდებულება. ამით ჩვენ ვაღიარეთ პირდაპირი პასუხისმგებლობა და ვალდებულება, რომ ჩვენ ვიზრუნოთ ჩვენ მოქალაქეებზე. საერთოდ, მიმაჩნია, რომ ძალიან უხერხული და შეურაცხმყოფელია ყოველგვარი საუბარი იმაზე, თუ რომელ ქვეყანაში, რამდენი დიასპორის წარმომადგენელი ცხოვრობს, ეს არის შეურაცხმყოფელი. შეურაცხმყოფელია ჩემთვის, რომ ჩვენ დიასპორას ვუწოდო – ნახევრად რუსი, ნახევრად ქართველი და ასევე შეურაცხმყოფელი იქნებოდა ალბათ, ქალბატონი პრეზიდენტისთვის, რომ მისთვის ვინმეს ეწოდებინა ნახევრად ფრანგი, როდესაც ის, ავირჩიეთ საქართველოს პრეზიდენტად. ალბათ, დამეთანხმებით.

ქალბატონი პრეზიდენტი ინიციატივით გამოვიდა, რომ დიასპორის მინიმუმ ერთი წარმომადგენელი პარლამენტში მოვახვედროთ. არათუ პარლამენტში, ჩვენ, დიასპორის, ფრანგული დიასპორის წარმომადგენელი, ქალბატონი სალომე ზურაბიშვილი დავნიშნეთ, ავირჩიეთ საქართველოს პრეზიდენტად. აქედან გამომდინარე, მე მინდა, კიდევ ერთხელ ყველას ვუსურვო მშვიდობა, სტაბილურობა, კეთილდღეობა და გაერთიანება“, – განაცხადა ღარიბაშვილმა.