თუ შენი ქვეყნის მოღალატე არ ხარ, რატომ შეიძლება შენი მტრის ცრუ არგუმენტებს იმეორებდე ასეთ მნიშვნელოვან საერთაშორისო ტრიბუნაზე გამოსვლისას?,”- ასე ეხმაურება “ევროპული საქართველოს” თავმჯდომარე, გიგა ბოკერია, საქართველოს  პრემიერ-მინისტრ ირაკლი ღარიბაშვილის ბრატისლავაში გლობალური უსაფრთხოების ფორუმზე გაკეთებულ განცხადებას.

ევროპული საქართველოს“ თავმჯდომარის, გიგა ბოკერიას შეფასებით,განცხადებები მისი მხრიდან საქართველოს ეროვნული ინტერესების ღალატის კიდევ ერთი დემონსტრაციაა.

ბოკერიას თქმით, იმის ნაცვლად, რომ ირაკლი ღარიბაშვილს ეს ტრიბუნა მკვეთრი გზავნილისთვის გამოეყენებინა, რომ საქართველო ევროკავშირის წევრობას იმსახურებს, მან პუტინის რეჟიმისთვის დამახასიათებელი მცდარი განცხადებები გაახმოვანა.

„ანუ, რუსეთი აპრიორი კი არ იყო აგრესიული, კი არ ერჩოდა ჩვენს სახელმწიფოებრიობას და არ ცდილობდა ჩვენს განადგურებას, არამედ ჩვენ გავაღიზიანეთ, რადგან გვინდოდა ნატო-სა და ევროკავშირის წევრი გავმხდარიყავით, ეს არის ყველაზე დიდი სიცრუე.

ჩვენივე ისტორია და ყველა სხვა რუსეთის მეზობელი ქვეყნის ისტორია არის დასტური, პირველი აგრესიის დროს ცხინვალსა და აფხაზეთში საერთოდ არ იდგა ნატო-სა და ევროკავშირში გაწევრიანების საკითხი, მაშინ რამ გამოიწვია რუსეთის აგრესია საქართველოს წინააღმდეგ? მოლდოვაში, რომელმაც ნეიტრალიტეტი ჩაწერა კონსტიტუციაში, რატომ განხორციელდა აგრესია დნესტრისპირეთში და რატომაა ჯერ კიდევ ოკუპაციის პრობლემა ამ რეგიონში? ასევე უკრაინის მთავრობამაც გამოაცხადა ნეიტრალიტეტი, თუმცა პუტინის რეჟიმმა ზეწოლა მოახდინა იანუკოვიჩზე და ევროპასთან უვიზო მიმოსვლასა და ვაჭრობაზე ათქმევინა უარი”,- განაცხადა ბოკერიამ.

მისი თქმით, პრემიერის ამ ქცევას ადეკვატური შეფასება უნდა მიეცეს, რადგან ეს არის საქართველოს ეროვნული ინტერესების ღალატი.

„ეს ფაქტებიც კი საკმარისია იმის დემონსტრირებისთვის, თუ რამხელა სიცრუეა ეს და რატომ შეიძლება, თუ მოღალატე არ ხარ, რომ შენი მტრის ცრუ არგუმენტებს იმეორებდე ასეთ მნიშვნელოვან საერთაშორისო ტრიბუნაზე გამოსვლისას. რატომ შეიძლება, რომ დასავლეთის მიერ წარსულში დაშვებულ მძიმე შეცდომებს იყენებდე არა იმისთვის, რომ იგივე შეცდომა აღარ დაუშვან და სწრაფად მიგვიღონ ნატო-სა და ევროკავშირში, არამედ ამის ნაცვლად იძახდე, რომ მაშინ თქვენ ცუდად მოიქეცით და დღეს ნუ გვთხოვთ, რომ მკაფიო პოზიცია გვქონდეს რუსეთის წინააღმდეგო. რატომ უნდა ამბობდე იმაზე, რაც რუსეთის აგრესიის გამო ხდება, რომ ვერცერთი მხრიდან, ვერც რუსეთის და ვერც დასავლეთის მხრიდან ვერ ვხედავთ ნაბიჯებს მშვიდობისთვისო, ანუ ბოროტება და სიკეთე ერთ ქვაბში მოხარშა. ეს არის სწორედ ღალატის მაგალითი, ეს არ არის უბრალო სიტყვა და როცა ასე იქცევა შენი ქვეყნის პრემიერ-მინისტრი, ამას უნდა მიეცეს ადეკვატური შეფასება”,- განაცხადა გიგა ბოკერიამ.

საქართველოს პრეზიდენტი სამუშაო ვიზიტით ბრიუსელში იმყოფება. სალომე ზურაბიშვილი უკვე შეხვდა ევროპული საბჭოს პრეზიდენტს, შარლ მიშელს.

დაგეგმილია შეხვედრა ევროკომისიის პრეზიდენტ ურსულა ფონ დერ ლაიენთან და ევროპარლამენტის პრეზიდენტ რობერტა მეცოლასთან. ხვალ კი საქართველოს პრეზიდენტი ევროპარლამენტს სიტყვით მიმართავს.

ფრაქცია „ქართული ოცნების“ თავმჯდომარე მამუკა მდინარაძე აცხადებს, რომ რუსეთ-საქართველოს შორის პირდაპირი ფრენების აღდგენასთან დაკავშირებით ელჩების დემარში მისი აზრით, არაობიექტურია.

„ჩვენ ასეთი დემარში გვახსოვს მიხეილ სააკაშვილის პატიმრობასთან დაკავშირებით. გახსოვთ ალბათ ეს თქვენ და მაშინ აღმოჩნდა, რომ ეს დემარში იყო უსაფუძვლო და ამას პირდაპირი და მკაფიო პასუხი გასცა სტრასბურგის სასამართლომ. ამ დემარშზე, რომელიც უსაფუძვლო შიშებით, თუ წუხილებით არის გამოწვეული, ალბათ მომავალი გაგვცემს პასუხს, რადგან ასეთი ქეისები სტრასბურგში არ განიხილება. ეს [დემარში] არის არასწორი შეფასება მოვლენების და ერთი სამწუხარო ამბავი, ევროკავშირის ელჩმა თავისი განცხადების პირველ ნაწილში თქვა, რომ ეს იყო რუსეთის ცალმხრივი გადაწყვეტილება, მაგრამ მეორე ნაწილში არასწორი იყო ინფორმაცია, რომ ამას სჭირდებოდა საქართველოს მთავრობის თანხმობა. თუ საუბარია იმ დეტალებზე, იმ ტექნიკურ საკითხებზე, რომელიც საქაერონავიგაციამ, აეროპორტების გაერთიანებამ უნდა გასცეს, მათი არგაცემა იქნებოდა სანქციები და სანქციები დააზარალებს ქვეყანას და მის მოქალაქეებს. კიდევ უფრო სიღრმეში თუ შევალთ, გაგახსენებთ, რომ ფრენები რუსეთთან საქართველოს მაშინდელი პრეზიდენტის უშუალო ინიციატივით აღდგა. მაშინ მოლაპარაკების შუამავლად გამოიყენა ბატონი თამაზ გაიაშვილი.

პუტინისა და სააკაშვილის უშუალო კომუნიკაციის შედეგად 2010 წელს, ოღონდ მაშინ [სააკაშვილი] იხვეწებოდა, ამ სიტყვების პირდაპირი გაგებით, ფრენების აღდგენას და აღდგა. ცალმხრივი სანქცია დააწესა რუსეთმა 2019 წელს. მაშინ ჩვენი ამერიკელი, ევროპელი პარტნიორები მოუწოდებდნენ რუსეთს, ეს სანქცია მოეხსნა, ახლა მოიხსნა და ამ მოხსნას პასუხობენ დემარშით. ჯერ უპრეცედენტოა, როდესაც სხვა ქვეყნის გადაწყვეტილებას სხვა ქვეყანაში დემარშით პასუხობ, ეს ჩემი აზრით, არ არის ობიექტური, მეორეც, არ დაგვავიწყდეს რომ საქართველო არის დღეს რუსეთის ოკუპაციასთან მიმართებაში, უკრაინის შემდეგ რისკის შემცველი ნომერ პირველი ქვეყანა და ახლა საქართველოს მხრიდან სანქციების დაწესება და მსგავსი საკითხების იმგვარად გადაწყვეტა, რომელიც გლობალური ომის პარტიას, თუ მათი დავალებებით საქართველოში რადიკალურ ოპოზიციას უნდათ, რისკებს შეიცავს და მეორე – ეკონომიკური თვალსაზრისით დააზიანებს ქვეყანას და მის მოქალაქეებს. მარტივი კითხვა, ყველაზე სახალხო ენაზე რომ ვთქვათ არის ის, რომ ლარსით შემოვა, ბაქოდან, ერევნიდან, ჩამოფრინდება, თუ შემდეგ მანქანით გადმოკვეთს საზღვარს, საქართველოს მოქალაქე, ჩვენი თანამემამულე, თუ რუსი ტურისტი, ამას რა მნიშვნელობა აქვს“, – განაცხადა მდინარაძემ.

რადიკალები ხართ თქვენ, ვინც კონსტიტუციას არღვევთ, ვინც ბედავს, რომ საქართველოს დამოუკიდებლობის სანაცვლოდ შესთავაზოთ რუსეთის ორბიტაზე დაბრუნება. გამორიცხულია, რევოლუცია იქნება, თუ რაც იქნება, მიიღებთ, აბა რას იზამთ, – ამის შესახებ პარტია „კანონი და სამართლის“ ხელმძღვანელმა, დეპუტატმა თაკო ჩარკვიანმა პარლამენტის დღევანდელ პლენარულ სხდომაზე განაცხადა.

„თქვენ ხომ რადიკალიზმი გგონიათ, როცა მე კონსტიტუციას ვიცავ, არა, რადიკალები ხართ თქვენ, ვინც კონსტიტუციას არღვევთ, ვინც ბდავს, რომ საქართველოს დამოუკიდებლობის სანაცვლოდ შესთავაზოთ რუსეთის ორბიტაზე დაბრუნება. რატომ ვარ ახლა მშვიდად? იმიტომ, რომ გამორიცხულია, რევოლუცია იქნება, თუ რაც იქნება, მიიღებთ, აბა რას იზამთ. ვინ გითხრათ, რომ ამ სიტყვის მეშინია, რას ქვია, ქვეყანას მართმევთ და რუსეთის ორბიტაზე გინდათ გადაყვანა. დაგიჩემებიათ  ეს 11 წელი, მოსულები ხართ აქ, რა გირგვლიანი, სად იყო ოხანაშვილი, მე რომ გირგვლიანის გამო ვიდექი ქუჩაში. უკვე საქართველოს სახელმწიფოებრიობას ეხება ეს. რევოლუცია მინდა? აბა, მანდ გაგაჩერებთ თქვენ? აბა დამოუკიდებლობას წაგართმევინებთ? როგორ გეკადრებათ, ქუჩაში დავდგებით და უბედურება თქვენ კისერზე იქნება, სისხლს დაღვრის ქათველი ხალხი და დამოუკიდებლობას არ დატოვებს. არ იცით ეს? თუ სუბარის ჭკუაზე უნდა იყოთ? ინდაური რომ გვყავს თავის დროზე გაშვებული მის ეზოში, იმიტომ, რომ ვერ იყო კარგი უფლების დამცველი, ზუსტად იმ გირგვლიანის დროს, ვიდრე ჭკუაზე მოვიდოდა“, – განაცხადა თაკო ჩარკვიანმა.

ჩარკვიანმა გირგვლიანის თემაზე და მიხეილ სააკაშვილის შესახებაც ისაუბრა.

„ჩვენ თვალწინ გაიარა გირვლიანის თემამ, მე არ მესწავლება, მაგრამ სააკაშვილს არ უთქვამს, წაიყვანეთ ოქროყანაში და მოკალითო, ბრმები არ ვართ, კარგად ვიცით, იქ, სტრასბურგში რაც ხდებოდა და რაც წერია. დიახ, შეწყალების დროს, როცა შეუტანეს სია, იმის გამო სთხოვენ პასუხს. მან უთხრა, მოკალით გირგვლიანიო? მართლა არანორმალურებად ხომ არ იქეცით იმიტომ, რომ რუსეთის მონები ხართ აქ. შემირცხვენია თქვენი ქართველობა, რას ქვია, სიტყვა რევოლუციის მეშინია, აბა დამოუკიდებლობაზე რომ იქნება ლაპარაკი, თქვენმა მზემ, მანდ გაგაჩერებთ ზუსტად, აბა, დამოუკიდებლობას დაგაკარგვინებთ?“, – აღნიშნა თაკო ჩარკვიანმა.

დასავლელი ლიდერები ამბობენ იმას, რომ რუსეთმა არ აპატია უკრაინას ნატოს-კენ სწრაფვა. დასავლელი ლიდერების არაერთი განცხადებაა. ამას არ ფიქრობს არც ირაკლი ღარიბაშვილი, არც ირაკლი კობახიძე და არც გუნდის რომელიმე წევრი, აქ საუბარია ფაქტის კონსტატაციაზე, – ასე უპასუხა „ქართული ოცნების“ თავმჯდომარემ ირაკლი კობახიძემ ჟურნალისტების შეკითხვას, რომელი პრემიერ-მინისტრის ირაკლი ღარიბაშვილის მიერ ბრატისლავაში, გლობალური უსაფრთხოების ფორუმის (GLOBSEC) ფარგლებში, თემატურ დისკუსიაში მონაწილეობისას გაკეთებული განცხადებების შეფასებას შეეხებოდა.

მისივე თქმით, ნატო-ში გაწევრიანებაზე საქართველოს პოზიცია კონსტიტუციაში წერია.

„დასავლელი ლიდერები ამბობენ ამას, რომ რუსეთმა არ აპატია უკრაინას ნატო-სკენ სწრაფვა. არაერთი განცხადებაა. არის ეს პოზიცია, დამოკიდებულება და შეხედულება, რომ უკრაინა დაისაჯა ნატოში გაწევრიანების სურვილისთვის. ამას არ ფიქრობს არც ირაკლი ღარიბაშვილი, არც ირაკლი კობახიძე და არც გუნდის რომელიმე წევრი. ამაზე არ ყოფილა საუბარი, აქ საუბარია ფაქტის კონსტატაციაზე, რომელიც არაერთხელ განუხორციელებიათ დასავლელ პოლიტიკურ ლიდერებსაც. საუბარია რაზე, რუსეთს არ მოსწონდა უკრაინის სწრაფვა ნატოს-კენ და სამხედრო აგრესიის ერთ-ერთი მიზეზი იყო ეს. ეს არის ფაქტის კონსტატაცია. [ნატო-ში გაწევრიანებაზე] ჩვენი პოზიცია წერია საქართველოს კონსტიტუციაში, ჩემი ხელით დავწერე ეს პუნქტი. რაც შეეხება სტრატეგიული მოთმინების პოლიტიკაზე ირაკლი ღარიბაშვილის გაკეთებულ განცხადებას, სტრატეგიული მოუთმენლობის პოლიტიკამ 2008 წელს გამოიწვია საქართველოს მაშინდელი ხელისუფლების მიერ პუტინისთვის ტერიტორიების 20%-ის ჩაბარება. ეს იყო სტრატეგიული მოუთმენლობის პოლიტიკა, რბილად რომ ვთქვათ, აქ მხოლოდ მოუთმენლობა არ იყო პრობლემა, ეს იყო უმძიმესი ავანტიურა, რა დროსაც წინა ხელისუფლებამ, სააკაშვილმა, მისმა რეჟიმმა, „ნაცმოძრაობამ“ ჩააბარა რუსეთის ფედერაციას მისი ტერიტორიების 20%. სწორედ ეს იყო სტრატეგიული მოუთმენლობის პოლიტიკის შედეგი. ჩვენ გვაქვს პრაგმატული პოლიტიკა და ამ პრაგმატული პოლიტიკის შედეგია ის, რომ „ქართული ოცნების“ ხელისუფლება არის პირველი ხელისუფლება, დამოუკიდებელი საქართველოს ისტორიაში, რომელსაც ომი არ ჰქონია. ეს არის პრაგმატული პოლიტიკის შედეგი“, – განაცხადა კობახიძემ.

პირველი გეგმა ჩაიშალა და აამუშავეს გეგმა B – გეგმა B არის, რომ სააკაშვილმა უნდა განაახლოს სათანადო კალორაჟით საკვების მიღება და დაბრუნდეს პოლიტიკაში, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

თელავში გამართულ, „ნაციონალური მოძრაობის“ პოლიტსაბჭოსთან დაკავშირებით ირაკლი კობახიძემ განაცხადა, რომ საქართველოს მესამე პრეზიდენტი უყურადღებობას უჩიოდა და როგორც ჩანს, მის მიმართ ყურადღება ასე გამოხატეს.

„სააკაშვილი უჩიოდა უყურადღებობას და როგორც ჩანს, ამით გამოხატეს ყურადღება მის მიმართ. მის სახლში ჩავიდნენ და იქ გამართეს პოლიტსაბჭოს სხდომა. ჩაიშალა პირველი გეგმა. ეს ადამიანები 500-600 დღის განმავლობაში ამტკიცებდნენ, რომ სააკაშვილი ყოველდღე კვდებოდა, მას კლავდა ქართული ხელისუფლება, სასამართლო, ის ხან იწამლებოდა, ხან აწამებდნენ, ათასი რამ მოიგონეს. სტრასბურგის სასამართლომ ამ ყველაფერს ცივი წყალი გადაასხა, აქედან გამომდინარე ამუშავეს გეგმა B. გეგმა B არის ის, რომ სააკაშვილმა უნდა განაახლოს სათანადო კალორაჟით საკვების მიღება და უნდა დაბრუნდეს პოლიტიკაში. როგორც ჩანს, ეს არის ახალი გეგმა და ამის გამოხატულება შეიძლება იყოს მის სახლში პოლიტსაბჭოს სხდომის გამართვა,“ – განაცხადა კობახიძემ.

„დღეს დილით უკრაინელებმა რამდენიმე ათეული დრონით დაბომბეს მოსკოვი, ამ ჯოჯოხეთური სახელმწიფოს დედაქალაქი. უკრაინელებს ჩვენი დახმარება არ სჭირდება, უჩვენოდაც გადაამტვრევენ ცოტა ხანში ხერხემალში და ჩვენ სად ვიქნებით მაშინ, აი ეს მაინტერესებს. ან უკრაინულებს ან დანარჩენ მსოფლიოს თვალი როგორ უნდა გავუსწოროთ”, – ამის შესახებ დეპუტატმა ალექსანდრე ელისაშვილმა პარლამენტის პლენარულ სხდომაზე განაცხადა.

მან სხდომაზე უმრავლესობის წევრს ანრი ოხანაშვილს მიმართა.

„როგორ შეწყდა ის ფრენები აბა კარგად გავიხსენოთ, ნახირივით რომ გამოყარეს ჩვენი ხალხი, საქონლის გადასატან თვითმფრინავში რომ შეყარეს, მაშინაც ვაპროტესტებდი ბატონო ანრი. მაშინაც ვაპროტესტებდი სააკაშვილმა ომიდან რამდენიმე თვეში რომ მოუხსნა სავიზო რეჟიმი. რამდენ ხანს უნდა ილაპარაკოთ სააკაშვილზე. 11 წელია ხელისუფლებაში ხართ. ახლა ამ ფონზე, თვითონ რუსებს მაინც ადევნეთ თვალი რას ლაპარაკობენ. იძირება რუსეთის საქმე, უკან-უკან მიდის. მანამდე კრემლს მოარტყეს დრონი, ახლა ორგანიზებულად დაბომბეს მოსკოვი. მარცხდება რუსეთი და ვის მხარეს ხართ თქვენ”? – განაცხადა  ალექსანდრე ელისაშვილმა.

დაუყოვნებლივ გამოცხადდეს ირაკლი ღარიბაშვილი პარლამენტში და განუმარტოს საზოგადოებას, რა პირობებით საუბრობს მტერთან ქართველი ხალხის ზურგს უკან მისი მთავრობა, – ამის შესახებ „ნაციონალური მოძრაობის” ფრაქციის თავმჯდომარე, თინა ბოკუჩავამ პარლამენტის პლენარულ სხდომაზე სიტყვით გამოსვლისას განაცხადა.

მისი თქმით, რუსეთის პრეზიდენტმა, ვლადიმერ პუტინმა პირადად დაადასტურა, რომ საქართველოს ხელისუფლება ქართველი ხალხის ზურგს უკან “მოღალატეობრივად და მალულად აწარმოებდა რუსეთის ფედერაციასთან მოლაპარაკებებს”.

„მთელი მსოფლიო ხედავს, რომ „რუსული ოცნების“ ხელით საქართველომ იცვალა საგარეო კურსი და მიმდინარეობს ქვეყნის რუსიფიკაცია. ვლადიმერ პუტინმა პირადად დაადასტურა, რომ საქართველოს ხელისუფლება ქართველი ხალხის ზურგს უკან მოღალატეობრივად, მალულად აწარმოებდა რუსეთის ფედერაციასთან მოლაპარაკებებს და რომ სწორედ ქართული მხარის დაჟინებული თხოვნის საპასუხოდ მიიღო მან ფრენების აღდგენის და სავიზო რეჟიმის გაუქმების გადაწყვეტილება. ვინ აწარმოებდა მტერთან ფარულ მოლაპარაკებებს, ვინ არის ეს პირი ან პირთა წრე, ვინც ქართველი ხალხის ზურგს უკან მტერთან მოლაპარაკებებს აწარმოებს? რა დათმო საქართველოს ხელისუფლებამ სანაცვლოდ? რა სხვა საკითხები განიხილებოდა ფარულ მოლაპარაკებებზე ოკუპანტთან? მაგალითად, განიხილებოდა თუ არა სარკინიგზო მიმოსვლის აღდგენა? ამ საკითხებზე ვითხოვთ ირაკლი ღარიბაშვილისგან პასუხს. დაუყოვნებლივ გამოცხადდეს ირაკლი ღარიბაშვილი პარლამენტში და განუმარტოს საზოგადოებას, რა პირობებით საუბრობს მტერთან ქართველი ხალხის ზურგს უკან მისი მთავრობა. ღარიბაშვილთან ერთად ქვეყნის რუსიფიკაციის, მოღალატეობრივ საქმეში წვლილი მიუძღვის პარლამენტის თითოეულ წევრსაც, რომელიც ტოტალურ პოლიტიკურ მორჩილებას ირჩევს ქვეყნის ინტერესის ნაცვლად. გუშინდელ ბიუროს სხდომაზე დავაყენე საკანონმდებლო ინიციატივა, რომელიც აკრძალავდა რუსი სანქცირებული პირების საქართველოში შემოსვლას, რომლებიც აკრძალავდა ეკონომიკურ საქმიანობას იმ მოქალაქეებისთვის, რომელსაც დარღვეული აქვთ „ოკუპაციის შესახებ კანონი“. საქართველოში ჩამოსული რუსეთის მოქალაქეებისთვის სასათბურე პირობები შექმენით, მათ შორის ეკონომიკური თვალსაზრისით. იზრდება მათი დეპოზიტები მაშინ, როცა საქართველოს მოქალაქეებისთვის ბანკებში მხოლოდ სესხები იზრდება და არა დეპოზიტები“,-განაცხადა ბოკუჩავამ.