ჩვენს ოპოზიციას ალაპარაკებს ბარიერის ვერგადალახვის შიში, პარტია, რომელიც ფიქრობს, რომ ვერ გადალახავს ხუთპროცენტიან ბარიერს, პრაქტიკულად, პარტიად არ იწოდება, ასეთი შეიძლება, იყოს ახალი შექმნილი პარტია, მაგალითად ერთი წლის პარტია და მერე შეიძლება, იყოს მზარდი, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძის თქმით, იმ პარტიებმა, რომლებსაც ეშინიათ, რომ შესაძლოა, ხუთპროცენტიანი ბარიერი ვერ გადალახონ, საკუთარ ქმედებებს უნდა გადახედონ.

„წლები რომ გადის და მათი რეიტინგი გაზრდის ნაცვლად მცირდება, უნდა მიხვდნენ, ბარიერზე კი არ უნდა იწვალონ და თხოვნებით იყვნენ წარმოდგენილი, არამედ რაღაცები შეცვალონ, ან მესიჯბოქსში, ან ქმედებაში, ან სულ მცირე თავისი ქვეყანა არ უნდა დააზიანონ მხოლოდ იმიტომ, რომ იქნებ, ამით დაზიანდეს ხელისუფლება. თუ ამას ვერ ხვდებიან და 90 ათასი ხმის მოგროვების შანსიც არ აქვთ, უნდა გადააფასონ თავისი პერსპექტივები, მოვლენები, მესიჯები და ა.შ. ვფიქრობ, მხოლოდ ამით არის გამოწვეული, რომ რამდენიმე ადამიანს უნდა პარლამენტარის მანდატი და არ აქვთ ის ამბიციები, რომელზეც თავად საუბრობენ ხოლმე. რაც შეეხება იძულებას, როგორ წარმოგიდგენიათ, მაგალითად ევროკომისიის წარმომადგენლებმა გვითხრან, რომ რაც არის ევროკავშირის ქვეყნების ნახევარზე მეტში, ის არ გააკეთოთ არავითარ შემთხვევაშიო. ევროპაში რაც არის მიჩნეული კარგად, ის როგორ შეიძლება, საქართველოში იყოს ცუდი. ჩვენ არ ვფიქრობთ, რომ ამასთან დაკავშირებით რაიმე ხისტი პოზიცია ექნებათ ჩვენს  ევროპელ პარტნიორებს“, – განაცხადა მდინარაძემ.

ამასთან, მამუკა მდინარაძის განცხადებით, „ნაციონალური მოძრაობა“ ცდილობს, ბარიერის დაწევის საკითხზე ირაკლი კობახიძის მიერ 2022 წელს გაკეთებული განცხადება ისე წარმოაჩინოს, თითქოს მიმდინარე წელს იყო ნათქვამი მსგავსი რამ.

„ნაცმოძრაობას“ და მის კლასტერს თუ რაიმე რესურსი გააჩნია სოციალურ ქსელში, ცდილობენ 2022 წელი მოაშორონ ირაკლი კობახიძის ნათქვამს და სოციალურ ქსელში დასპონსორებული სტატუსები გვხდება, სადაც საუბარია, თითქოს წელს მოხდა ეს ამბავი. ასეთი მარტივი ტყუილის ტირაჟირებას ცდილობენ. არეკლამებენ ისეთ პოსტებს, სადაც საუბარია, თითქოს 2023 წლის დეკემბერზე იყო საუბარი, როდესაც ირაკლი კობახიძე საუბრობდა კანდიდატის სტატუსზე და შესაბამის დათქმაზე ბარიერის შემცირებასთან დაკავშირებით. დღეს მოცემულობა აღარ გვთავაზობს, რომ ბარიერის დაწევაზე ვისაუბროთ“, – განაცხადა მდინარაძემ.

რომელი ჭკუათმყოფელი ანდობს თავის კომპანიას, თავის სიკეთეს ღატაკ ადამიანებს, რომლის ხელფასებზე უფრო მეტი აქვთ „ტაქსისტებს“ – მათხოვრების პარლამენტი გვაქვს რეალურად, – ამის შესახებ „გირჩის“ დეპუტატმა ვახტანგ მეგრელიშვილმა პლენარულ სხდომაზე განაცხადა, სადაც დეპუტატების ხელფასების მომატების შესახებ კანონპროექტის განხილვა მიმდინარეობს.

როგორც მეგრელიშვილმა აღნიშნა, დეპუტატებს უნდა მიეცეთ ლობისტური საქმიანობის უფლება.

“თქვენ რომ დააფუძნოთ ნებისმიერი კომპანია, საწარმო, სახაჭაპურე მაგალითად, მენეჯმენტი რომ დაიქირაოთ, თქვენი აზრით, როგორი იქნება ხელფასის დაახლოებითი პროცენტი, წილი, ამ კაცს რასაც ანდობ, ქონებას, კაპიტალს იმაზე?! ჩვენ თუ მართლა პარლამენტი და ჩვენ თუ მართლა ამ ქვეყნის მმართველი ორგანო ვართ, ჩვენ თუ 25-მილიარდიან ბიუჯეტს ვმართავთ, ჩვენ გვაქვს 0.04%, 6 ათას ლარზე დავთვალე საშუალო ხელფასები. რომელი ჭკუათმყოფელი ანდობს თავის კომპანიას, თავის სიკეთეს ღატაკ ადამიანებს, რომლის ხელფასებზე უფრო მეტი აქვთ „ტაქსისტებს“? კარგად მომუშავე „ტაქსისტებს“ უფრო მეტი აქვთ ანუ ყველაზე დაბალკვალიფიციურ სამუშაოზე ადამიანებს შეუძლიათ მეტი გამოიმუშაონ ანუ მათხოვრების პარლამენტი გვაქვს რეალურად. როგორც პარლამენტის თავმჯდომარე, დაუჭერთ თუ არა მხარს იმას, რომ პარლამენტარებს ჰქონდეთ ლობისტური საქმიანობის საშუალება?“, – მიმართა ვახტანგ მეგრელიშვილმა შალვა პაპუაშვილს.

ფარცხალაძეს ნაძარცვი რუსეთში მზითვივით გაატანეს – რა დასჯაზეა საუბარი? – ამის შესახებ „სტრატეგია აღმაშენებლის“ დეპუტატმა პაატა მანჯგალაძემ ოთარ ფარცხალაძესთან დაკავშირებით აშშ-ის ელჩის განცხადების კომენტირებისას აღნიშნა.

მანჯგალაძეს არ აქვს მოლოდინი, რომ ხელისუფლება ფარცხალაძის საქმეს გამოიძიებს და მას დასჯის.

„მარტივი „ქეისი“ გვაქვს ე.წ. ფარცხალაძის საქმის სახით. ჯაშუშზე არათუ გამოძიება დაიწყეს და სისხლის სამართლის საქმე აღძრეს, არამედ დააწინაურეს, საბანკო რეგულაცია შეცვალეს და ნაძარცვი მზითვივით გაატანეს რუსეთში. ეს არის “ქართული ოცნების” სახე. რა დასჯა, პირიქით აწინაურებენ რუსეთთან დაკავშირებულ ადამიანებს”,- განაცხადა მანჯგალაძემ.

ინფორმაციისთვის, ფარცხალაძის სანქცირებასთან დაკავშირებით, აშშ-ის ელჩმა რობინ დანიგანმა „რადიო თავისუფლებასთან“ ინტერვიუში განაცხადა, რომ სანქცირება მთავრობებისთვის არის მინიშნება გამოძიებაზე.

„როცა სანქციებს მივმართავთ, ქვეყნებისგან არა მხოლოდ მათ დაცვას მოველით, არამედ, როცა ეს ადამიანები ცალკეული ქვეყნის მოქალაქეები არიან, ეს არის სასარგებლო ინფორმაცია მთავრობებისთვის მათ მიერ კორუფციის შესაძლო შემთხვევების გამოსაძიებლად, ანდა, ფარცხალაძის შემთხვევაში, „ეფესბესთან” ძალიან მჭიდრო შესაძლო ურთიერთქმედების შემთხვევისა. ჩვენ ვურჩევდით მთავრობებს ყველა შემთხვევასთან მიმართებით, ჩვენი სანქციები გამოიყენონ ერთგვარ მინიშნებად, რომელიც შეუძლიათ გამოიძიონ“, – ამბობს ელჩი.

თუკი ვინმე ფიქრობს, რომ დეპუტატთა ანაზღაურების შესაბამისობაში მოყვანა არასწორად ხდება და საკითხს მხარს არ უჭერს, მაშინ ამაზე პოლიტიკური პასუხისმგებლობა უნდა აიღოს – მომავალ პარლამენტში მოხვედრის შემთხვევაში, ანაზღაურება არ აიღოს და ქველმოქმედებას მოახმაროს! – ეს განცხადება პარლამენტის თავმჯდომარე შალვა პაპუაშვილმა პლენარულ სხდომაზე ოპოზიციის მისამართით გააკეთა.

პაპუაშვილმა ოპოზიციონერ კოლეგებს პარლამენტის წევრთა ხელფასების ზრდასთან დაკავშირებული კანონის პროექტის მხარდაჭერისკენ მოუწოდა.

„ოპოზიციიდან ბევრი გამოსვლა მოვისმინე. ვნახოთ, რეგლამენტში ცვლილებას მხარს დაუჭერთ თუ არა, რადგან სწორედ ეს არის პასუხისმგებლობა. ასეთ თემებზე პოპულისტური საუბარია ადვილია. თქვენი უნარი აიღოთ პოლიტიკური პასუხისმგებლობა, კენჭისყრაზე გამოჩნდება მხარს დაუჭერთ თუ არა პროექტს.

ყველანაირი უხერხულობა მოხსნილი იმით, რომ ხელფასების ზრდა მომავალი მოწვევის პარლამენტს ეხება და თუ ფიქრობთ, რომ გადაწყვეტილება სწორია, გთხოვთ მხარი დაუჭიროთ. სხვა შემთხვევაში, არ ვიცით, მომავალ მოწვევის პარლამენტში ვინ იქნება, მაგრამ ის, ვინც მხარს არ დაუჭრეს და მომავალ პარლამენტში იქნება, მორალური წნეხი ექნება და არ უნდა გაუკვირდეს, თუ მას ამას შეახსენებენ“, – განაცხადა შალვა პაპუაშვილმა.

პარლამენტმა პირველი მოსმენით განიხილა რეგლამენტში ცვლილებები, რომლის მიხედვით, 2025 წლის 1-ელი იანვრიდან – მომდევნო მოწვევის პარლამენტის წევრებისა და თანამდებობის პირების ხელფასების ოდენობა იზრდება.

პირობა და საფუძველი, რისთვისაც ბარიერის დაწევა იყო საჭირო, თვითონ ოპოზიციამ გააუქმა, – ამის შესახებ პარლამენტის ვიცე- სპიკერმა არჩილ თალაკვაძემ განაცხადა.

როგორც მან აღნიშნა, ოპოზიცია უნდა მოემზადოს არჩევნებისთვის 5-პროცენტიანი ბარიერის პირობებში.

„სისტემა, რომლითაც ჩატარდება 2024 წლის არჩევნები, არის დაფუძნებული ევროპულ სტანდარტებზე და ევროპულ გამოცდილებაზე. კალენდარს მეც და თქვენც ისე ვხედავთ და ისე ვკითხულობთ, როგორც არის, ერთი კალენდარი გვაქვს. კობახიძემ განცხადება წინა წელს გააკეთა და თქვა, რომ თუ სტატუსს მიიღებდა დეკემბერში საქართველო, მზად ვიყავით ამ კომპრომისისთვის. მაშინ საქართველომ ვერ მიიღო სტატუსი და საფუძვლები, რითაც ეს კომპრომისი უნდა მიეღო ოპოზიციას, ამოიწურა, ოპოზიციამ გააგრძელა პოლარიზაცია, საქართველოს ევროპული მომავლის საბოტაჟი, სტატუსის წინააღმდეგ ყველაფერი გააკეთა დაწყებული ლობისტებში ფულის გადახდით და პირადი მოლაპარაკებებით და ამის შემდეგ კიდევ მოდიხართ და ამბობთ, რომ „ქართულ ოცნებას“ კიდევ რჩება ვალდებულება, განიხილოს რაიმე შეღავათის გაკეთება ოპოზიციისთვის?! სამაგიეროდ, არ გახსოვთ ამ ოპოზიციის მუქარები, რომ შეცვლიან ხელისუფლებას. 80 ათასი თუ არ ჰყავთ მთელს ქვეყანაში, რეგიონში ათასი მოქალაქეც თუ არ უჭერს მხარს პოლიტიკურ პარტიას, რომელიც იმუქრება, რომ მომავალზე მე ვარ პასუხისმგებელი და მე გავიმარჯვებ არჩევნებშიო, მაშინ რაღაზეა საუბარი? მე შეგახსენებთ, რა განცხადებაც იყო გაკეთებული, ჩვენ ვთქვით, რომ ოპოზიციას შეიძლება შეღავათი მივცეთ და ბარიერი დავწიოთ, თუ ეს დაეხმარება პოლარიზაციის შემცირებას, ბარიერი არათუ დავწიეთ, წინა საპარლამენტო არჩევნებზე ნულოვანი ბარიერი გამოვიყენეთ. ამის შემდეგ პოლარიზაცია არათუ შემცირდა, ეს ოპოზიცია საერთოდ არ შემოვიდა პარლამენტში 8 თვის განმავლობაში და მას შემდეგ უკიდურესი კონფრონტაციის რეჟიმშია ხელისუფლებასთან და საკუთარ ქვეყანასთან. შესაბამისად, პირობა და საფუძველი, რისთვისაც ეს იყო საჭირო, თვითონ ოპოზიციამ გააუქმა. დღეს უკვე ერთი წელი რჩება არჩევნებამდე, ეს სისტემა ასახულია კონსტიტუციაში, წინასწარ განხილული, მიღებული და ოპოზიცია უნდა მოემზადოს არჩევნებისთვის იმ პირობებში, რაც კონსტიტუციაში წერია. დღეს პოლიტიკური წუწუნი ბარიერზე მიუთითებს ერთადერთზე, რომ ეს რადიკალური ოპოზიცია გაკოტრებულია და მინიმალური მხარდაჭერაც კი არ აქვს, რომ პარლამენტში შევიდეს და რაიმე გააკეთოს,“ – განაცხადა თალაკვაძემ.

სააკაშვილს არაფერი სჭირს, გარდა იმისა, რომ ციხეში ჯდომა არ უნდა, ბოდიში, ამაზე მაშინ ეფიქრა, საქართველოში რომ შემოიპარა და მაწონში, თუ სადღაც ჯანდაბაში იჯდა, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.

ელისაშვილს კითხვა დაუსვეს ევროპის სახალხო პარტიის (EPP) პოლიტიკური ასამბლეის მიერ მიღებულ რეზოლუციაზე, სადაც ნათქვამია, რომ მიხეილ სააკაშვილი ციხეში იმყოფებოდა პოლიტიკურად მოტივირებული ბრალდებით, ასევე, რეზოლუცია მოუწოდებს ხელისუფლებას სააკაშვილის ჯანმრთელობის დასაცავად სწრაფი ზომების მიღებისა და მისი დაუყოვნებლივ გათავისუფლებისკენ.

„სახალხო პარტიასთან დიდ ბოდიშს ვიხდი და მათ მიმართ პატივისცემას ვადასტურებ, მაგრამ მიხეილ სააკაშვილი არც პოლიტიკური პატიმარია და თავსაც ძალიან ჯანმრთელად გრძნობს. ყოველ შემთხვევაში, სტრასბურგიდან მთელი დელეგაცია იყო ჩამოსული, შეამოწმეს და ნახეს, რომ მშვენიერ პირობებშია, მას ჯანმრთელობის არანაირი პრობლემა არ აქვს და ამბობს, ვისაც დავრდომილი გგონივართ, პუტინის ხალხი ხართო. გეგონება, ერთი წელი თავად არ გაჰკიოდა, მკლავენო“, – განაცხადა ელისაშვილმა.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის ადმინისტრაციაში ინვესტორთა საბჭოს სხდომა გაიმართა.ამის შესახებ ინფორმაციას მთავრობის ადმინისტრაცია ავრცელებს.

საბჭოს სხდომაზე, რომელიც ირაკლი ღარიბაშვილმა გახსნა, მისასალმებელი სიტყვით გამოვიდნენ გაერთიანებული სამეფოს საელჩოს მისიის უფროსის მოადგილე კლერ ოლბლესი და ევროპის რეკონსტრუქციისა და განვითარების ბანკის (EBRD) რეგიონული დირექტორი კავკასიაში ალკისვრენიოს დრაკინოსი.

სხდომის მონაწილეებს ინვესტორთა საბჭოს მდივანმა გიორგი ჩერქეზიშვილმა როგორც წინა სხდომაზე მიღებული გადაწყვეტილებების აღსრულების, ისე, ზოგადად, საბჭოს საქმიანობის დინამიკის შესახებ ინფორმაცია მიაწოდა.

ყურადღება გამახვილდა საქართველოსთვის ევროკავშირის წევრობის კანდიდატის სტატუსის მინიჭებასთან დაკავშირებით ევროკომისიის დადებითრეკომენდაციაზე. პრემიერ-მინისტრმა აღნიშნა, რომ ეს გადაწყვეტილება ისტორიულია და ქვეყანას ახალ შესაძლებლობებს აძლევს. სხდომის მონაწილეებმა ევროინტეგრაციის გზაზე მიმდინარე რეფორმებში ინვესტორთა საბჭოს ჩართულობაზე იმსჯელეს.

სხდომის მონაწილეებმა ასევე განიხილეს მეწარმეთა შესახებ კანონში შესატანი ცვლილებები, მათ შორის ბიზნესის ხელახალი რეგისტრაციის გადავადების საკითხი. პრემიერ-მინისტრის გადაწყვეტილებით, ხელახალი რეგისტრაცია გადავადდება და აღნიშნულ საკითხზე მთავრობა დაპარლამენტი აქტიურად იმუშავებს. სხდომაზე ასევე განიხილეს ქართული პროდუქციის ევროკავშირში ექსპორტის ხელშეწყობის მიმართულებით გადასადგმელი ნაბიჯები და იმსჯელეს ახალი ფინანსური ინსტრუმენტების ხელმისაწვდომობის საკითხებზე.

განსახილველ საკითხებს შორის ასევე იყო ქვეყანაში არსებული საინვესტიციო გარემო, ეკონომიკური მიმართულებით საქართველოს მთავრობის მიერმიღწეული პროგრესი და ის მსხვილი ეკონომიკური პროექტები, რომლებზეც პრემიერ-მინისტრ ირაკლი ღარიბაშვილის დავალებით მთავრობისეკონომიკური გუნდი აქტიურად მუშაობს.

ჩვენ სრულ მხარდაჭერას ვუცხადებთ საქართველოს დემოკრატიულ, ეკონომიკურ განვითარებასა და ტერიტორიულ მთლიანობას, – ამის შესახებ ეუთოს საპარლამენტო ასამბლეის პრეზიდენტმა, პია კაუმამ განაცხადა.

„პირველ რიგში, მინდა მადლობა გადავუხადო ბატონ პარლამენტის თავმჯდომარეს და საქართველოს იმ მასპინძლობისთვის, რომელიც მათ ჩვენს მიმართ გამოიჩინეს. მე და ჩემი გუნდი საქართველოში დილით ჩამოვედით და როგორც იცით, ჩვენ სამხრეთ კავკასიის რეგიონში ტური გვაქვს. ჩვენ გავატარეთ ორი დღე აზერბაიჯანში და ახლა ორ დღეს საქართველოში დავყოფთ და შემდეგ ტურს სომხეთში გავაგრძელებთ, რათა გვქონდეს სრული სურათი აღნიშნული რეგიონის შესახებ, თუ რეალურად როგორია სხვადასხვა ჯგუფების ხედვა და რა სიტუაციაა ამ დროისთვის“, – განაცხადა პია კაუმამ.

პია კაუმამ შეხვედრა საქართველოს პარლამენტის თავჯდომარესთან გამართა და საქართველოს ევროკავშირის კანდიდატის სტატუსის რეკომენდაციის მიღება მიულოცა.

„რა თქმა უნდა, მინდა მივულოცო საქართველოს ევროკავშირში ინტეგრაციის შესახებ პოზიტიული ახალი ამბის მიღება. ჩვენ ყველამ ამის შესახებ გასულ კვირას გავიგეთ და გვსურს მივულოცოთ და მოვუწოდოთ საქართველოს, რომ აუცილებელი ნაბიჯები გადადგას, რათა საბოლოოდ გახდეს ევროკავშირის წევრი. ჩვენ ამას მივესალმებით, როგორც ევროკავშირი და როგორც ჩემი ქვეყანა ფინეთი. ასევე, მსურს ვისარგებლო შესაძლებლობით და დავაფასო თქვენი პარლამენტის მუშაობა და იმ რეფორმების მართვა, რომლებიც თქვენ ევროკავშირში ინტეგრაციის გზაზე განახორციელეთ“, – აღნიშნა კაუმამ.

ეუთოს საპარლამენტო ასამბლეის პრეზიდენტმა 2024 წლის საპარლამენტო არჩევნების შესახებაც ისაუბრა.

„მაგრამ ასევე, როდესაც საქმე ეხება არჩევნებზე დაკვირვებას, თქვენ შეიძლება იცოდეთ, რომ ჩემი ორგანიზაცია OSCEPA არის ორგანიზაცია, რომელიც ახორციელებს საარჩევნო, სადამკვირვებლო მისიებს. ბოლოს ეს საქართველოში სამი წლის წინ გავაკეთეთ და იმედია, რომ მომავალ წელსაც მოგვიწვევენ. საქართველო არის OSCE-სა და OSCPA-ს ხანგრძლივი წევრი და ყოველთვის ძალიან აქტიური პარტნიორია, როცა საქმე ეხება დემოკრატიას, განვითარებასა და კანონმდებლობასთან დაკავშირებული დემოკრატიული ნაბიჯების გადადგმას“, – განაცხადა პია კაუმამ.

„ასევე, მინდა აღვნიშნო, რომ ჩვენ სრულ მხარდაჭერას ვუცხადებთ საქართველოს დემოკრატიულ და ეკონომიკურ განვითარებასა და თქვენს ტერიტორიულ მთლიანობას. ასევე, ის ფაქტი, რომ ისეთ სასიცოცხლოდ მნიშვნელოვან ადგილას იმყოფებით, როგორიც სამხრეთ კავკასიაა და თქვენ რეგიონულ სტაბილურობაში კონსტრუქციულ და ძალიან მნიშვნელოვან როლს ასრულებთ. ჩვენ ამას ძალიან ვაფასებთ. კიდევ ერთხელ, მინდა მოგილოცოთ თქვენს მიერ გატარებული რეფორმები და ევროკავშირში გაწევრიანების ახალი გზა, რომელიც უახლოეს მომავალში გექნებათ“, – დასძინა ეუთოს საპარლამენტო ასამბლეის პრეზიდენტმა.