„აქ მნიშვნელოვანი არის ის, რომ ამ ყველაფრის შესახებ ჩვენ ინფორმაციას ვიღებთ აგენტების შესახებ ამერიკული კანონი FARA-ს მეშვეობით, თანაც უკვე მეორედ. ეს კიდევ ერთხელ გვარწმუნებს, რამდენად მნიშვნელოვანი ყოფილა ეს კანონი და, თურმე, როგორი კარგია იმისთვის, რომ ვიცოდეთ საზოგადოებრივ თუ პოლიტიკურ ცხოვრებაში, ასევე მედიასივრცეში მიმდინარე მოვლენების შესახებ, საიდან და როგორ ფინანსდებიან ისინი“, – ამის შესახებ „ხალხის ძალის“ წევრმა, ეკა სეფაშვილმა, მედიასთან ისაუბრა.

მისი თქმით, FARA-ს მეშვეობით მიღებული ინფორმაცია ხაზს უსვამს, რომ ეს ძალიან მნიშვნელოვანი კანონია. იგი საშუალებას აძლევს საზოგადოებას, უკეთესად განსაჯოს, ვინ ვინ არის და ვინ რა მიზნით იღვწის.

„რადგან კეზერაშვილი პიარ-კამპანიის განხორციელებას გეგმავს საერთაშორისო მასშტაბით, როგორც ჩანს, სამართლებრივი ბრძოლის საშუალება და სამართლებრივი ბერკეტები არ გააჩნია. ჩვენ გვახსოვს მისი განცხადება, რომ BBC-ის სიუჟეტის საპასუხოდ ის აუცილებლად იჩივლებდა, თუმცა, როგორც ჩანს, გადაიფიქრა სასამართლოში ჩივილი იქიდან გამომდინარე, რომ, ალბათ, არ არის ამ დავის მოგების საშუალება ჩვეულებრივი სამართლებრივი გზით. ახლა კი ცდილობს იმიჯის შექმნას, რისთვისაც დაიქირავა ამერიკული კომპანია, რომელმაც უნდა ჩაუტაროს ე.წ რეპუტაციის აღმდგენი პიარ-კამპანია, რათა შელახული იმიჯი და რეპუტაცია აღიდგინოს.

აქ მნიშვნელოვანი არის ის, რომ ამ ყველაფრის შესახებ ჩვენ ინფორმაციას ვიღებთ აგენტების შესახებ ამერიკული კანონი FARA-ს მეშვეობით, თანაც უკვე მეორედ. ეს კიდევ ერთხელ გვარწმუნებს, რამდენად მნიშვნელოვანი ყოფილა ეს კანონი და, თურმე, როგორი კარგია იმისთვის, რომ ვიცოდეთ საზოგადოებრივ თუ პოლიტიკურ ცხოვრებაში, ასევე მედიასივრცეში მიმდინარე მოვლენების შესახებ, საიდან და როგორ ფინანსდებიან ისინი. ვფიქრობ, ასეთი ტიპის ხარჯების შესახებ საზოგადოებამ ნამდვილად უნდა იცოდეს ისევე, როგორც გავიგეთ, სააკაშვილის ოჯახმა როგორ დაიქირავა 1 000 000$-ზე მეტად ლობისტური კომპანია და ვფიქრობ, ეს საშუალებას აძლევს საზოგადოებას, უკეთესად განსაჯოს, ვინ ვინ არის და ვინ რა მიზნით იღვწის“, – განაცხადა ეკა სეფაშვილმა.

„ქართული ოცნების“ წარმომადგენლის ოჯახის წევრს რუსეთის სახელმწიფო ბიუჯეტიდან რომ მიეღო ჰონორარები, წარმოიდგინეთ, რა ამბავში იქნებოდა თავად ხოშტარია ან სხვა „პროდასავლური“ ინტერესების გამტარებლები, – ამის შესახებ პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა განაცხადა, რომელსაც კითხვა დაუსვეს მედიით გავრცელებულ ინფორმაციაზე, რომლის მიხედვითაც, „ელენე ხოშტარიას ოჯახს რუსეთიდან 22 მაისს 2.5 მილიონზე მეტი რუსული რუბლი ჩაერიცხა“.

ოხანაშვილის თქმით, კიდევ ერთხელ ჩანს ქვეყნის ეროვნული ინტერესებისადმი დამოკიდებულება.

„ეს არის მათი მიდგომა და სტანდარტი. ეს ადამიანები მორალს უკითხავენ სხვას კონკრეტულ საკითხთან დაკავშირებით. რამდენად მორალურია, სხვას უკითხავდე მორალს, აბრალებდე რუსეთუმეობას და ოკუპანტი ქვეყნის სახელმწიფო ბიუჯეტიდან ოჯახის წევრი იღებდეს ამხელა შემოსავალს. რა მორალურ სტანდარტში ჯდება ან რაზე გვაფიქრებინებს, ამას ჩვენი საზოგადოება კარგად ხვდება და ამ ყველაფერს კარგად აფასებს“, – აღნიშნა ანრი ოხანაშვილმა.