„ევროკავშირი გმობს რუსეთის შეტევას კახოვკას ჰიდროელექტროსადგურზე, რომელმაც საფრთხე შეუქმნა ასობით ათასი მშვიდობიანი მოქალაქის სიცოცხლეს“, – ამის შესახებ ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში ჯოზეფ ბორელის და ევროკომისარ იანეს ლენარჩიჩის ერთობლივ განცხადებაშია ნათქვამი.

„ეს შეტევა წარმოადგენს რუსეთის სისასტიკის ახალ განზომილებას და შეიძლება ჩაითვალოს საერთაშორისო სამართლის უხეშ დარღვევად“, – აღნიშნულია განცხადებაში.

განცხადების თანახმად, ბორელმა და ლენარჩიჩმა დასძინეს, რომ ისინი მოითხოვენ, რომ სამხედრო დანაშაულის ყველა მეთაური, დამნაშავე და თანამზრახველი პასუხისგებაში მიეცნენ.

უკრაინის პრეზიდენტის, ვოლოდიმირ ზელენსკის განცხადებით, კახოვკის კაშხლის აფეთქება ხელოვნურად გამოწვეული ყველაზე მასშტაბური ეკოლოგიური კატასტროფაა ევროპაში. ამის შესახებ უკრაინის პრეზიდენტმა „ბუქარესტის ცხრიანის“ სამიტზე სიტყვით გამოსვლისას განაცხადა, რომელსაც ნატო-სა და ცენტრალური და აღმოსავლეთ ევროპის ქვეყნების წარმომადგენლები ესწრებიან.

ზელენსკის თქმით, რუსეთმა მასობრივი ეკოლოგიური განადგურების ბომბი ააფეთქა.

„სამწუხაროდ, უკვე წელიწადზე მეტია, რუსეთი აკონტროლებს კაშხალსა და კახოვკის მთელ ჰიდროელექტროსადგურს. მისი აფეთქება გარედან, დაბომბვებით, ფიზიკურად შეუძლებელია. ის დანაღმული იყო. დაინაღმა და აფეთქდა რუსი ოკუპანტების მიერ. რუსეთმა ააფეთქა მასობრივი ეკოლოგიური განადგურების ბომბი. ეს ათწლეულების განმავლობაში ყველაზე დიდი ხელოვნური ეკოლოგიური კატასტროფაა ევროპაში“, – განაცხადა ზელენსკიმ.

სამიტი ინდოეთში, სამხედრო წვრთნები სინგაპურსა და სამხრეთ აფრიკაში, საფრანგეთის პრეზიდენტის და გერმანიის კანცლერის ვიზიტები, ასევე, ჩინეთის ლიდერის, სი ძინპინის მოსკოვსა და საუდის არაბეთში გამგზავრება – ეს ყველაფერი ჩინეთის დიპლომატიის გააქტიურებაზე მიუთითებს. ამის შესახებ Aljazeera სტატიას აქვეყნებს.

ჩინეთი ღრმად არის ინტეგრირებული მსოფლიო ეკონომიკაში. დასავლეთის ლიდერების განცხადებების მიუხედავად, ჩინეთთან ეკონომიკური კავშირების შემცირების ან შეწყვეტის შესახებ, ეს ქვეყანა 120 სახელმწიფოს ძირითადი სავაჭრო პარტნიორია. ახლა კი პეკინს სურს, რომ მსოფლიოს მეორე ეკონომიკის პოზიცია პოლიტიკაზეც გადაიტანოს.

კრემლი კატეგორიულად უარყოფს ბრალდებებს იმის შესახებ, რომ რუსეთი კახოვკას ჰიდროელექტროსადგურზე განხორციელებულ აფეთქებაზე პასუხისმგებელი რუსეთია.

კრემლის პრესსპიკერის, დიმიტრი პესკოვის განცხადებით, მას ცალსახად მიაჩნია, რომ ინციდენტი უკრაინის მხრიდან ჩადენილი წინასწარგანზრახული დივერსია იყო.

„ის დაიგეგმა და განხორციელდა კიევიდან, კიევის რეჟიმისგან მიღებული ბრძანებით. კიევის რეჟიმმა უნდა აიღოს სრული პასუხისმგებლობა ყველა შედეგზე“, – აღნიშნა პესკოვმა.

მისივე მტკიცებით, უკრაინას მიზანია ყირიმისთვის წყლის წართმევა და ბრძოლის ველიდან ყურადღების გადატანა.

შეგახსენებთ, უკრაინის ხელისუფლება კახოვკას ჰესის კაშხალზე განხორციელებულ აფეთქებაში რუსეთს ადანაშაულებს და აცხადებს, რომ ამ ქმედებას უკრაინის კრიტიკული ინფრასტრუქტურის წინააღმდეგ ჩადენილ ტერორისტულად აქტად განიხილავენ.

ვერცერთი რუსი ვერ შეაჩერებს უკრაინის ტერიტორიების გათავისუფლებას, დრო მოვიდა, – ეს განცხადება უკრაინის ეროვნული უსაფრთხოებისა და თავდაცვის საბჭოს მდივანმა, ალექსეი დანილოვმა განაცხადა.

დანილოვის თქმით, რუსეთის მიერ კახოვკის ჰიდროელექტროსადგურის აფეთქება რუსეთის აგრესიის ახალი ეტაპია.

„ამით რუსეთი ღიად აცხადებს თავის ნამდვილ მიზანს – უკრაინის განადგურებას, უკრაინელების მკვლელობას, ეკონომიკის განადგურებას და მოსახლეობისთვის სასიცოცხლო მნიშვნელობის სტრუქტურების განადგურებას“, – წერს დანილოვი საკუთარ სოციალურ ქსელში.

უკრაინის ეროვნული უსაფრთხოებისა და თავდაცვის საბჭოს მდივანი აცხადებს, რომ გაიმართა უკრაინის შეიარაღებული ძალების უმაღლესი სარდლების შტაბის სხდომა.

„შეხვედრის შედეგების მოკლე რეზიუმე ასეთია – არაფერი და არავინ, ვერცერთი რუსი ვერ შეაჩერებს უკრაინის გათავისუფლებას, რომლის დროც დადგა“, – განაცხადა დანილოვმა.