„კანდიდატის სტატუსის მონიჭებასთან დაკავშირებით დადებითი რეკომენდაცია მივიღეთ, მაგრამ ევროპარლამენტარების ნაწილისგან, მარგინალური ჯგუფისგან ისევ გაიჟღერა არასწორმა გზავნილებმა, რაც ჩვენთვის ყურადსაღები უნდა იყოს, რომ სიფრთხილე გვერდზე არ გადავდოთ”, – ამის შესახებ მედიასთან „ხალხის ძალის” ერთ-ერთმა ლიდერმა, დეპუტატმა დიმიტრი ხუნდაძემ განაცხადა.
მისი თქმით, ბრძოლა არ დასრულებულა და ხიფათი ისევ ქვეყნის გარშემოა, მით უმეტეს, როცა რეგიონში ურთულესი ვითარებაა და ღია საომარი დაპირისპირებებია.
„დღეს რაც ხდება, გონივრული პოლიტიკური ნაბიჯების შედეგია. დადებითი რეკომენდაციის მიღება კანდიდატის სტატუსთან დაკავშირებით მისალოცია ყველასთვის – საზოგადოებისთვის და ხელისუფლებისთვის, რადგან რისკები მაქსიმალურად იქნა დაზღვეული. დავინახეთ, რომ რეკომენდაციის მიღება შესაძლებელი ყოფილა ცალ ფეხზე დგომის გარეშე. ოპოზიციას ახლა დარჩა მხოლოდ ის, რომ სიტყვებს ეკიდება – საზოგადოებამ მიიღო ეს და არა – ხელისუფლებამო. რა თქმა უნდა, ეს სიგიჟეა. ეს საზოგადოება იყო ერთი წლის წინაც და თუ მხოლოდ საზოგადოების მიმართ იყო პატივისცემა, დადებითი დასკვნა მაშინაც უნდა მიგვეღო. ვიცით თურქეთი, რომელსაც უკვე თითქმის 20 წელია აქვს კანდიდატის სტატუსი, [მაგრამ არ არის ევროკავშირის წევრი] და, ასევე, რვა ქვეყანა, რომელსაც ანალოგიურად, მხოლოდ სტატუსი აქვს წლებია. მაშინ რა გამოდის, საქართველოში საზოგადოებას ერთი წლის შემდეგ სცეს პატივი და დანარჩენ ქვეყნებში ვერ მომწიფდა პოლიტიკური გადაწყვეტილება, რომ საზოგადოებას მაინც სცენ პატივი? ეს, რა თქმა უნდა, ასე არ არის. მივიღებთ თუ არა კანდიდატის სტატუსს – აქ მთავარი გზამკვლევი უნდა იყოს ქვეყნის უსაფრთხოების დაცვა და ღირსება, ისევე, როგორც ეს რეკომენდაცია მივიღეთ.
ძალიან ბევრი შეურაცხყოფა გვახსოვს, მით უმეტეს, „ხალხის ძალას”, როცა სხვაზე მეტი სიმართლის თქმა მოგვიწია. გახსოვთ ალბათ, პოლიტიკური პროცესები რომ კულისებში გადავიდა და საზოგადოების ინფორმირებულობა საჭირო გახდა. სწორად ინფორმირებული საზოგადოება კი თავისი ქვეყნის სადარაჯოზე სწორად წარსდგა. წინააღმდეგ შემთხვევაში, შეიძლება სტატუსი იმ დიდი ზიანის საფასურად მოენიჭებინათ, რაც, მაგალითად, უკრაინაში ვნახეთ, მაგრამ, მისი მიმღები აღარავინ ყოფილიყო. უმძიმესი ვითარებაა იქ, უმძიმესი ვითარებაა ახლო აღმოსავლეთში და სწორი, გონივრული ვითარებით მოვახერხეთ, რომ მშვიდობა შევინარჩუნეთ.
მახსენდება, როცა 12 პუნქტის შესრულებისთვის სამი თვე მოგვცეს, ამას ხაფანგი ვუწოდეთ და დიახ, დღესაც ვიმეორებ, ეს იყო ხაფანგი, რომელსაც არ წამოვეგეთ. ვადა, შემდეგ, ევროკავშირმა თვითონ გაახანგრძლივა. ზუსტად ამ დროს შეკრიბეს საზოგადოება აქციაზე – „გსურთ თუ არა ევროპა”, სადაც, მათ სცენაზე ცალ ფეხზე მდგარი არასამთავრობო სექტორი დახვდა, რომელიც ტექნიკურ მთავრობას ითხოვდა – ჩვენ მოვდივართ ხელისუფლებაშიო. დღეს კი რადიკალურმა ოპოზიციამ დაიწყო სიტყვებით თამაში, როგორც სჩვევია, რომ თითქოს ჩვენ ვთქვით, კანდიდატის სტატუსია ხაფანგიო. სტატუსი კი არა, ეს მოკლე ვადა იყო ხაფანგი, რომელიც რეკომენდაციის არმიცემას გამოიწვევდა, რითაც საზოგადოების ემოციას პიკში აწევდნენ და შეეცდებოდნენ, საახალწლოდ ჩვენთვის „მაიდანი” გამოეცხოთ. პრაქტიკულად, რევოლუციური კონვეიერი გადავჭერით საზოგადოების სწორად ინფორმირებით.
კანდიდატის სტატუსის მონიჭებასთან დაკავშირებით დადებითი რეკომენდაცია მივიღეთ, მაგრამ ევროპარლამენტარების ნაწილისგან, მარგინალური ჯგუფისგან ისევ გაიჟღერა არასწორმა გზავნილებმა, რაც ჩვენთვის ყურადსაღები უნდა იყოს, რომ სიფრთხილე გვერდზე არ გადავდოთ. სწორად მივდივართ, სწორ გზაზე ვდგავართ, სწორი პოლიტიკური ნაბიჯებია გადადგმული, მაგრამ ბრძოლა არ დასრულებულა და ხიფათი ისევ ჩვენს გარშემოა. მით უმეტეს, როცა რეგიონში ურთულესი ვითარებაა და ღია საომარი დაპირისპირებებია. ასე, რომ სიფრთხილე, როგორც იარაღი, ისე უნდა გვქონდეს მომარჯვებული”, – განაცხადა დიმიტრი ხუნდაძემ.
