დღეს ლომისობის დღესასწაული აღინიშნება

00:18 - 07/06/2023

ლომისობის დღესასწაული სულთმოფენობის შემდგომ, პირველივე ოთხშაბათს აღინიშნება. მორწმუნეები არაგვისა და ქსნის ხეობაში იკრიბებიან. მისი სახელობის სალოცავებიდან ერთი ქსნისა და არაგვის წყალგამყოფ ქედზე მდებარეობს, მეორე კი – სოფელ მლეთაში. მომლოცველები ლომისობის დღესასწაულზე მთელი საქართველოდან იკრიბებიან.

ლეგენდის მიხედვით, ლომისა გზოვანის წმიდა გიორგია, რომელმაც ხორასნიდან 7 ათასი ტყვე დაიხსნა და ხარის რქებზე დაბრძანებული დამკვიდრდა მლეთის მთაზე. მას უძველესი დროიდან ევედრებოდნენ შვილიერებას, თვალის სინათლეს, მიწისა და საქონლის ნაყოფიერებას.

ტაძარში ინახება საყელურიანი დიდი რკინის ჯაჭვი. ვისაც აღთქმა აქვს დადებული, ან რაიმეს თხოვნა სურს წმიდანისთვის, ამ ჯაჭვს კისერზე დაიდებს და ტაძარს ლოცვით სამგზის შემოუვლის.

მლოცველებს სწამთ, რომ ლომისას წმინდა გიორგის სახელობის ეკლესია გამორჩეული ძალის მქონეა. ისინი სალოცავს უმეტესად ცხვარს სწირავენ და სჯერათ, რომ სათხოვარი, რომლითაც ისინი ტაძარში მიდიან, აუსრულდებათ.

მსხვერპლშეწირვის ტრადიციას ბევრი მოწინააღმდეგე ჰყავს – ისინი ცხოველების მასობრივად ხოცვას აპროტესტებენ.

,,ჯერ დარწმუნებით ვერაფერს ვიტყვით რამ გამოიწვია კახოვკის კაშხლის ნგრევა”- ჯონ კირბი

23:45 - 06/06/2023

თეთრ სახლში აცხადებენ, რომ ჯერ საბოლოოდ და დარწმუნებით არ შეუძლია თქმა, რამ გამოიწვია კახოვკის კაშხლის ნგრევა. ამის შესახებ განცხადება აშშ-ის ეროვნული უსაფრთხოების საბჭოს ოფიციალურმა წარმომადგენელმა, ჯონ კირბიმ გააკეთა.

მისი თქმით, აშშ-ის ხელისუფლება უკრაინის მთავრობასთან თანამშრომლობით ცდილობს, დაადგინოს, რა მოხდა.

კითხვაზე, როგორ აისახება კაშხლის აფეთქება ფრონტის ხაზზე არსებულ მდგომარეობაზე, კირბიმ უპასუხა, რომ ამაზე საუბარი ნაადრევია.

უკრაინა კახოვკის ჰიდროელექტროსადგურის კაშხლის განზრახ აფეთქებაში რუს სამხედროებს ადანაშაულებს, რომლებიც ობიექტს აკონტროლებდნენ. მოსკოვში ამბობენ, რომ კაშხალი უკრაინელების დივერსიის შედეგად აფეთქდა.

გაერო-ში უკრაინის მუდმივი წარმომადგენლის ინფორმაციით, უკრაინის ინიციატივით, კახოვკის კაშხლის აფეთქების საკითხზე უახლოეს საათებში, გაერო-ს უშიშროების საბჭოს სხდომაზე იმსჯელებენ.

7 ივნისის ასტროლოგიური პროგნოზი

23:27 - 06/06/2023

ვერძი

ნუ იჩქარებთ, გქონდეთ საკუთარი თავის რწმენა, ყველაფერს დროულად მოასწრებთ და შედეგითაც საკმაოდ კმაყოფილი დარჩებით.

კურო

ელოდეთ სასიამოვნო სიახლეებსა და შეხვედრებს. არ დაგტოვებთ ბედნიერებისა და სიხარულის განცდა, რაც ძალიან კარგად აისახება თქვენს შრომისუნარიანობაზე.

ტყუპები

სახლში არსებული სირთულეები და უამრავი საქმე თქვენგან დიდ ენერგიას მოითხოვს. ელოდეთ, ახალ წარმატებულ გარიგებებსა და პროექტებს. ფინანსური მდგომარეობა გაუმჯობესდება.

კირჩხიბი

ჩამოყალიბდით და გადაწყვიტეთ, რას ელოდებით თქვენი გეგმების განხორციელებით, ზედმეტად ნუ შფოთავთ და დიდ მნიშვნელობას ნუ ანიჭებთ სხვათა აზრს თქვენი პროექტის შეფასებისას.

ლომი

ყველაფერი ჩვეული რიტმით მიედინება, შესაძლოა, მიიღოთ მნიშვნელოვანი გადაწყვეტილება სამუშაოსთან დაკავშირებით. ელოდეთ საინტერესო ცვლილებებს.

ქალწული

ნუ ინერვიულებთ ფინანსებთან დაკავშირებით, თქვენ ყველაფერს დაძლევთ და საფრთხე არ გემუქრებათ. შესაძლოა, ცვლილებები განვითარდეს სამსახურთან დაკავშირებით.

სასწორი

მართალია, კმაყოფილი ხართ თქვენი შრომის შედეგებით, თუმცა, შესაძლოა იგრძნოთ, რომ მოგბეზრდათ არსებული ერთფეროვნება და გინდათ სიახლეები, ნუ ელოდებით სხვისგან ქმედებებს, თავად შეცვალეთ თქვენი ცხოვრება.

მორიელი

ახლა ყველაზე უპრიანი იქნება, მოამზადოთ ნიადაგი თქვენი სამომავლო ქმედებისთვის. დაასრულეთ, ბოლომდე მიიყვანეთ დაწყებული საქმეები და თუ საჭიროება მოითხოვს, დროულად შეიტანეთ მათში კორექტივები.

მშვილდოსანი

ახალი შესაძლებლობებისა და საქმიანი აქტიურობის დრო დადგა. გამოიყენეთ მეგობრებისა და ახლობლების რჩევები. დიდი ალბათობით, მოგიწევთ გარემოს შეცვლა.

თხის რქა

ნაყოფიერი დღეა, შესაძლოა, შემოთავაზება და დამატებითი სამუშაოც კი მიიღოთ. აქტიური პერიოდია, გაგახარებთ ფინანსური საკითხების სასიკეთოდ მოგვარება.

მერწყული

გააანალიზეთ თქვენი საქმიანობა და მიიღეთ მნიშვნელოვანი გადაწყვეტილება. შეეცადეთ, დამოუკიდებლად, თავად შეიმუშაოთ სამოქმედო სტრატეგია, კარგად გათვალეთ, რას მოგიტანთ ესა თუ ის მოლაპარაკება.

თევზები

სანამ რაიმე ახალ საქმეს წამოიწყებთ, სჯობს, დაასრულოთ ძველი პრობლემური საქმეები და ყველაფერი სუფთა ფურცლიდან დაიწყოთ. შესაძლოა, ადრე დაშვებული შეცდომების გამო, დაბრკოლებებმა მნიშვნელოვნად შეგაფერხოთ.

როდის გამოიდარებს საქართველოში

23:15 - 06/06/2023

გარემოს ეროვნული სააგენტოს ინფორმაციით, 6 – 7 ივნისს საქართველოში შენარჩუნებული იქნება წვიმიანი ამინდი, ზოგან ელჭექით, აღმოსავლეთ საქართველოში შესაძლებელია სეტყვა. ჰაერის ტემპერატურა დღის საათებში დაბლობსა და ბარში +22, +27 გრადუსი იქნება.

მათივე ცნობით, 8-9 ივნისს დასავლეთ საქართველოში გამოიდარებს და +31, + 33 გრადუსამდე დაცხება.
აღმოსავლეთ საქართველოში იწვიმებს მხოლოდ ცალკეულ რაიონში.

ქ. თბილისში დროგამოშვებით იწვიმებს. ჰაერის ტემპერატურა დღის საათებში +26, +28 გრადუსი

რას ამბობს სასტიკ მკვლელობაში ბრალდებულის ადვოკატი

23:06 - 06/06/2023

ყოფილი მეუღლის მკვლელობაში ბრალდებულის ადვოკატი ლევან მარსაგიშვილი აცხადებს, რომ მისი დაცვის ქვეშ მყოფს ფსიქიკური პრობლემები აქვს.

მისივე თქმით, დაკავებული რამდენიმე წლის წინ ფსიქიატრიულ დაწესებულებაში მკურნალობდა.

„ამ ადამიანს აქვს საკმაოდ მძიმე ფსიქიკური პრობლემები. რამდენიმე წლის წინ ფსიქიატრიულ დაწესებულებაში იყო მოთავსებული დაახლოებით 2 კვირის განმავლობაში და გადიოდა მკურნალობას. ის ფსიქოტროპულ წამლებსაც იღებდა.. ამ ეტაპზე ბრალის აღიარება, არ აღიარებასთან დაკავშირებით კომენტარს არ ვაკეთებთ“, – განაცხადა ადვოკატმა.

ცნობისთვის, ადვოკატის დაცვის ქვეშ მყოფმა ურთიერთშელაპარაკების ნიადაგზე, ყოფილი მეუღლე საკუთარ ავტომობილში თოკით გაგუდა, შემდეგ კი 27 წლის ქალის ცხედარი ნაქირავები ავტომობილის საბარგულში მოათავსა და გლდანის ციხის მიმდებარე ტერიტორიაზე ხევში გადააგდო. დაკავებულს 16-იდან 20 წლამდე ან უვადო პატიმრობა ემუქრება.

,,ეს არის ქვეყნის ტრაგედია”- ვოლსკი ოპოზიციაზე

23:04 - 06/06/2023

ეს არის ქვეყნის ტრაგედია, როდესაც ნებისმიერი მიმართულებით რაიმე პოზიტიური ხდება და ამ დროს ადამიანების უშველებელი ჯგუფი ირაზმება, რათა ქვეყნის დისკრედიტაცია მოახდინონ, – ამის შესახებ პარლამენტის პირველმა ვიცე-პიკერმა, გიორგი ვოლსკიმ განაცხადა.

„როდესაც ქვეყანაში საერთაშორისო, თუნდაც სპორტული ღონისძიება ტარდება, ევროპის ჩემპიონატი მაქვს მხედველობაში, რაიმე შენდება ან საქართველოს ხელისუფლების წარმომადგენლებისთვის გახსნილია ევროპული ფორმატების კარები, მაღალი დონის სტუმრები გვყავს, ვიზიტი იგეგმება გერმანიაში თუ სხვა რომელიმე ქვეყანაში, ეს არის უშველებელი ტრაგედიის წინაპირობა, რასაც რასაკვირველია, ბინძური პიარით უნდა უპასუხონ, თითქოს ირაკლი ღარიბაშვილს ოლაფ შოლცმა გამოუცხადოს გარკვეული პრეტენზიები და საჩხუბრად დაიბაროს. ეს არის ქვეყნის ტრაგედია, როდესაც ნებისმიერი მიმართულებით რაიმე პოზიტიური ხდება და ამ დროს ადამიანების უშველებელი ჯგუფი ირაზმება, რათა ქვეყნის დისკრედიტაცია მოახდინონ. ეს არის უდიდესი ტრაგედია, რომელიც ახასიათებს, სამწუხაროდ, ჩვენს ქვეყანას. ამის შემქმნელები არიან კონკრეტული ადამიანები, რევოლუციური კომიტეტი, რომელიც ცდილობს, დესტაბილიზაციას გაუხსნას გზა. რასაკვირველია, შოლცთან პრემიერ-მინისტრის ვიზიტი უნდა დაახასიათონ სწორედ ასე, სხვანაირად არ ძალუძთ, სხვა რაიმე ინტელექტუალური რესურსი პოლიტიკური პარტიისა არ გააჩნიათ“, – განაცხადა ვოლსკიმ.

თბილისი, რიგით მერვე საერთაშორისო ლიტერატურულ ფესტივალს მასპინძლობს

22:30 - 06/06/2023

თბილის, რიგით მერვე საერთაშორისო ლიტერატურულ ფესტივალს მასპინძლობს. მწერალთა სახლში 16 ქვეყნის 22 ავტორია შეკრებილი, მათ შორისაა ამერიკელი პოეტი ბობ ჰოლმანი.

ჰოლმანმა სახელი არა მხოლოდ ლექსების წერით, არამედ უძველესი ენების შესწავლითაც გაითქვა, საქართველოში მისი სტუმრობის ძირითადი მიზეზი სწორედ ქართული ენის სიყვარული და მისი შესწავლაა.

ლიტერატურული ფესტივალის ფარგლებში, უცხოელ მწერლებს თბილისის უძველესი უბნებიც დაათვალიერებინეს და ქალაქის ისტორია გააცნეს.

მწერალთა სახლში ქართველი და უცხოელი ავტორების ნაწარმოებების განხილვები და პრეზენტაციებიც მიმდინარეობს. თბილისის ფესტივალი ხვალ დასრულდება.

ვაზიანის აეროპორტის აშენების შემთხვევაში, თბილისიდან აეროპორტამდე გზა 16 კმ-ით დაგრძელდება

22:22 - 06/06/2023

თბილისს ახალი საერთაშორისო აეროპორტი ექნება – ამას ითვალისწინებს მთავრობის მიერ გაცხადებული გეგმა, რომლის მიხედვითაც, ახალი საერთაშორისო აეროპორტი სავარაუდოდ, ვაზიანის აეროდრომის ბაზაზე აშენდება. ამჟამად ვაზიანის აეროპორტი თავდაცვის სამინისტროს საკუთრებაშია და მას სამხედრო დანიშნულება აქვს.

აღსანიშნავია, რომ თბილისის და მისი შემოგარენის ტერიტორიაზე 3 ძირითადი აეროდრომი/ასაფრენი ზოლი მდებარეობს – ესენია თბილისის საერთაშორისო აეროპორტი; ვაზიანის სამხედრო აეროპორტი და თბილისის საავიაციო ქარხნის ასაფრენი ზოლი.

თბილისის აეროპორტსა და ვაზიანის სამხედრო აეროდრომის ასაფრენ ბილიკებს შორის დაშორება 8 კილომეტრს შეადგენს (სწორი ხაზი). თუმცა, საავტომობილო გზა ამაზე ორჯერ მეტად დაგრძელდება. კახეთის გზატკეცილზე თბილისის აეროპორტის გადასახვევიდან ვაზიანის გადასახვევამდე მანძილი 8 კილომეტრს შეადგენს, ხოლო ვაზიანის გადასახვევიდან, სამხედრო აეროდრომამდე მანძილი 8.5 კილომეტრია. შესაბამისად, მთლიანობაში აეროპორტამდე მისვლა 16,5 კილომეტრით დაგრძელდება. ამ მანძილის გავლა ავტომობილით Google-ის შეფასებით, 24 წუთში არის შესაძლებელი.

პრეზიდენტი განცხადებას ავრცელებს

21:17 - 06/06/2023

საქართველოს პრეზიდენტი სალომე ზურაბიშვილი ბუნდესტაგის საგარეო ურთიერთობათა კომიტეტის თავმჯდომარეს მაიკლ როთს შეხვდა. ინფორმაციას ზურაბიშვილი “ტვიტერის” პირად გვერდზე ავრცელებს.

“შეხვედრა მქონდა მაიკლ როთთან. განვიხილეთ საქართველოსთვის ევროკავშირის კანდიდატის სტატუსის მინიჭების საკითხი და ამ გზაზე გერმანიის მტკიცე მხარდაჭერის მნიშვნელობა”, – წერს ზურაბიშვილი.

ახალგორის რაიონის მცხოვრებლებს ლომისობის დღესასწაულზე ე.წ. საზღვრის გადაკვეთის შესაძლებლობა ექნებათ

21:15 - 06/06/2023

ოკუპირებული ე.წ. სამხრეთ ოსეთის რესპუბლიკის ახალგორის რაიონის მცხოვრებლებს რელიგიურ დღესასწაულთან „ლომისობასთან“ დაკავშირებით, დე ფაქტო საქართველო-სამხრეთ ოსეთის „საზღვრის“ გამარტივებული წესით გადაკვეთის უფლება ექნებათ. ინფორმაციას ადგილობრივი სააგენტო „რესი“ ავრცელებს.

ამის შესახებ გადაწყვეტილება დღეს, ე.წ. უშიშროების საბჭოს ოპერატიული სხდომაზე მიიღეს.

დე ფაქტო საზღვრის გადაკვეთა რაზდახანის გამშვები პუნქტით, გამარტივებული წესით, 7 ივნისის 8:00 საათიდან 8 ივნისის 20:00 საათამდე იქნება შესაძლებელი.

გადაწყვეტილების შესრულებაზე კონტროლი დაევალა „რესპუბლიკის უშიშროების საბჭოს მდივანს“ ანატოლი პლიევს , – ნათქვამია ინფორმაციაში.

,,რისი გასაღებიც აქვს „ნაცმოძრაობას“, ის საკეტი უკვე დიდი ხანია გამოცვლილია”- არჩილ თალაკვაძე

20:46 - 06/06/2023

რისი გასაღებიც აქვს „ნაციონალურ მოძრაობას“, ის საკეტი უკვე დიდი ხანია გამოცვლილია. ამიტომაც ცდილობენ წლებია, უშედეგოდ, ხან პარლამენტის, ხან ცესკოს ღობეზე გადაძრომას, – ასე გამოეხმაურა პარლამენტის ვიცე-სპიკერი არჩილ თალაკვაძე „ნაციონალური მოძრაობის“ თავმჯდომარის ლევან ხაბეიშვილის განცხადებას, რომ „ბიძინა ივანიშვილის წინააღმდეგ მთავარი დამარცხების გასაღები „ნაციონალურ მოძრაობას“ აქვს“.

„ოპოზიციური პარტიები ამ სატყუარას თუ წამოეგებიან, „ნაცმოძრაობასთან“ ერთად გარეთ დარჩებიან“, – აღნიშნა თალაკვაძემ.

„ნაციონალური მოძრაობის“ თავმჯდომარემ ლევან ხაბეიშვილმა განაცხადა, რომ ბიძინა ივანიშვილის წინააღმდეგ მთავარი დამარცხების გასაღები „ნაციონალურ მოძრაობას“ აქვს.

„ეს გასაღები „ნაციონალურ მოძრაობას“ აქვს, ჩვენთან უნდა ისაუბროს ყველამ. ენის მოჩლექით არ უნდა ველაპარაკოთ ვინმეს, მოვიდნენ და თუ უნდათ, მივეხმარებით ამ გასაღების გადამრავლებაში, რომ 5-7% მიიღონ, რომ ხვალ-ზეგ კოალიციური მთავრობა იყოს“, – აღნიშნა ხაბეიშვილმა.

„ხო შემოიკრიბეთ არაერთხელ თქვენი ფრთის ქვეშ სხვა პარტიები, რა ქენით მერე დადეთ ბეჭებზე ბიძინა?”- ელისაშვილი

20:42 - 06/06/2023

ლევან ხაბეიშვილს უთქვამს „ნაციონალურ მოძრაობას“ გვაქვს „ოცნების“ დამარცხების გასაღებიო და თუ სხვები ბოდიში და თუ „შეგვეტენებით” თქვენც გახეირებთო. სინამდვილეში „ნაციონალური მოძრაობა“ არის „ქართული ოცნების“ მთავარი საყრდენი და მასულდგმულებელი, – ამის შესახებ პარტია „მოქალაქეების“ ლიდერმა, ალეკო ელისაშვილმა სოციალურ ქსელში დაწერა.

„ხო შემოიკრიბეთ არაერთხელ თქვენი ფრთის ქვეშ სხვა პარტიები, რა ქენით მერე დადეთ ბეჭებზე ბიძინა? თუ პირიქით, მორიგ ჯერზე გაამარჯვებინეთ? სინამდვილეში რეალური ცვლილებების გასაღები „ნაციონალური მოძრაობის“ გარეშე ოპოზიციის გამარჯვებაშია. „ოცნება“ უნდა წავიდეს – ნაციონალები არ უნდა მოვიდნენ! ესაა ახლა მთავარი ეროვნული ამოცანა და ამისთვის ყველა უნდა გავისარჯოთ რამდენადაც შეგვიძლია იმაზე მეტად“, – აღნიშნავს ელისაშვილი.

„ნაციონალური მოძრაობის“ თავმჯდომარემ ლევან ხაბეიშვილმა განაცხადა, რომ ბიძინა ივანიშვილის წინააღმდეგ მთავარი დამარცხების გასაღები „ნაციონალურ მოძრაობას“ აქვს. „ეს გასაღები „ნაციონალურ მოძრაობას“ აქვს, ჩვენთან უნდა ისაუბროს ყველამ. ენის მოჩლექით არ უნდა ველაპარაკოთ ვინმეს, მოვიდნენ და თუ უნდათ, მივეხმარებით ამ გასაღების გადამრავლებაში, რომ 5-7% მიიღონ, რომ ხვალ-ზეგ კოალიციური მთავრობა იყოს“, – აღნიშნა ხაბეიშვილმა.

1...2,0172,0182,019...2,307 Page 2,018 of 2,307