ბატონ ბიძინა ივანიშვილს ემუქრებიან სანქციებით იმიტომ, რომ მან ქვეყანაში დააბრუნა დემოკრატია, ადამიანის უფლებების დაცვა და ქვეყნის მართვა ინსტიტუტებით და არა „კლანურად“, იმ ფარული ჩრდილოვანი ინტერესებით, როგორც ამას აკეთებდა წინა ხელისუფლება, – ამის შესახებ პარლამენტის ვიცე-სპიკერმა არჩილ თალაკვაძემ საგაზაფხულო სესიის პლენარულ სხდომაზე განაცხადა.

მისივე თქმით, ბოლო პერიოდში კვლავ გააქტიურდა საუბარი ბიძინა ივანიშვილისთვის სანქციების დაწესებასთან დაკავშირებით.

ამასთან, თალაკვაძემ აღნიშნა, რომ ივანიშვილმა საქართველოში დააბრუნა სახელმწიფოსა და მოქალაქეების ინტერესების გათვალისწინებით ქვეყნის მართვა.

„როგორც ქვეყნის შიგნით, ისე ქვეყნის გარეთ, რადიკალური ოპოზიცია, მათი ლობისტები და სატელიტები ამ თემას კვლავ ააქტიურებენ. მინდა პირდაპირ ვთქვა, რეალურად რა სანქციებით ემუქრებიან და რისთვის ემუქრებიან ბატონ ბიძინა ივანიშვილს. ემუქრებიან იმიტომ, რომ მან ქვეყანაში დააბრუნა დემოკრატია, ადამიანის უფლებების დაცვა და ქვეყნის მართვა ინსტიტუტებით და არა კლანურად, იმ ფარული, ჩრდილოვანი ინტერესებით, როგორც ამას აკეთებდა წინა ხელისუფლება, როდესაც ქვეყნის ინტერესები, მოქალაქე, არ იყო მთავარი, არამედ მთავარი იყო ის თუ რა სჭირდებოდათ მათ და რა დავალებები ჰქონდათ მიღებული. სწორედ ეს დაამთავრა საქართველოში ბატონმა ბიძინა ივანიშვილმა და დააბრუნა ქვეყნის ინტერესებით და მოქალაქის საუკეთესო ინტერესებით ქვეყნის მართვა და ქვეყნის მართვა გახდა ინსტიტუციონალიზებული. ამისთვის, ემუქრებიან ამ ადამიანს, რომელიც დღეს, პრაქტიკულად, ევროპის შუაგულში ერთ-ერთი ყველაზე დიდი და რეპუტაციულად ყველა სანდო ბანკის მიერ არის, პრაქტიკულად, დასანქცირებული. მას არ ეძლევა საშუალება, რომ საკუთარი ქონება და ფინანსები განკარგოს“, – განაცხადა არჩილ თალაკვაძემ.

თბილისის მერის კახა კალაძის განცხადებით, გარკვეული პოლიტიკური ჯგუფების მხრიდან ზეწოლა გრძელდება და ამის მიზეზი ყველასთვის ნათელია.

ამის შესახებ “ქართული ოცნების” გენერალურმა მდივანმა, თბილისის მერმა, კახა კალაძემ პარტიის დამფუძნებლის, ბიძინა ივანიშვილის შესაძლო სანქცირებასთან დაკავშირებით დასმული კითხვის საპასუხოდ განაცხადა.

„ეს ზეწოლა გრძელდება, რა განცხადებებსაც ვისმენთ ბოლო თვეების განმავლობაში. ყველამ ვიცით, რა ამის მთავარი მიზეზი, რატომ ხდება. ჩვენ აბსოლუტურად ღიად განვაცხადეთ, რომ არ ვუერთდებით სანქციებს, რადგან არ გვინდოდა დაგვეზიანებინა ჩვენი ქვეყანა, არ გვინდოდა დაგვეზიანებინა საკუთარი ხალხი, ჩვენი ქვეყნის მოსახლეობა. როგორ შეიძლება, შევუერთდეთ სანქციებს, როცა დარწმუნებული არ ვართ იმაში, რომ ამით რუსეთს დავაზიანებთ? პირიქით, საკუთარ თავს დავიზიანებთ, ეს იქნებოდა ხარაკირი. იგივეა ე.წ. მეორე ფრონტის გახსნასთან დაკავშირებით. ჩვენ ხომ გამოვიარეთ ეს ყველაფერი, ხომ გადავიხადეთ მძიმე საფასური, ხომ ვიცით, რამხელა უბედურება მოაქვს ომს, რამხელა უბედურება და ზიანი მოგვაყენა 2008 წელმა. ამიტომ, დღეს ყველაზე მნიშვნელოვანი არის მშვიდობა, სტაბილურობა, ეკონომიკური განვითარება. რაც შეეხება ბიძინა ივანიშვილს, ამ ადამიანზე არის ყველაზე მეტი შეტევა. როგორც იცით, მას თანხები ყოველგვარი კანონის გვერდის ავლით გაუჩერეს შვეიცარიაში, ვერანაირი ახსნა-განმარტება ვერ მოიძებნა, თუ რატომ ხდება ეს ყველაფერი, თუმცა ჩვენთვის, საზოგადოებისთვის ყველაფერი ცხადი და ნათელია“, – განაცხადა კახა კალაძემ.

რაც შეეხება კითხვას, თუ რა შედეგი შეიძლება მოიტანოს ბიძინა ივანიშვილის ფორმალურმა დასანქცირებამ, კალაძე ამბობს, რომ ეს უშედეგო იქნება.

„შედეგები – არაფერი. რა სურვილიც აქვთ მათ, რისთვისაც დგამენ ამ ნაბიჯებს, რატომაც აკეთებენ ამას, შედეგს ვერ მოიტანს, იმიტომ რომ არ იცნობენ ბიძინა ივანიშვილს. ბიძინა ივანიშვილს ნამდვილად ვერ დააშანტაჟებენ თანხებით, ფინანსური სანქციებით, რათა მან არასწორი გადაწყვეტილება მიიღოს, არასწორი ნაბიჯი გადადგას ქვეყნის, ხალხის საწინააღმდეგოდ. ბიძინა ივანიშვილის ფენომენს არ იცნობენ და ეს არის სამწუხარო რეალობა“, – განცხადა კახა კალაძემ.

„მიუხედავად იმისა, რომ საქართველო განხორციელებული რეფომებით ყველანაირად იმსახურებს კანდიდატის სტატუსს, კონკრეტული ადამიანები ყველაფერს აკეთებენ იმისთვის, რომ ქვეყანამ აღნიშნული სტატუსი არ მიიღოს,“- ასე გამოეხმაურა კახა კალაძე ევროპლარლამენტარ ვიოლა ფონ კრამონის განცხადებას იმასთან დაკაავშირებით, რომ ქვეყნისთვის სტატუსის მინიჭება მხოლოდ ქართველი ხალხის დამსახურება იქნება.

თბილისის მერის თქმით, კონკრეტული ადამიანების პოლიტიკური გეგმების და წინააღმდეგობების მიუხედავად, საქართველოს ხელისუფლება მაქსიმუმს გააკეთებს 12-პუნქტიანი გეგმის შესასრულებლად.

„არ ვიცი, რამდენად სწორი იქნება ამაზე სერიოზული კომენტარის გაკეთება. ვიცით, ეს ადამიანები რას წარმოადგენენ, ვინ არიან, რა არის მათი მოტივაცია, პირდაპირ შეიძლება ითქვას, რომ მათი მთავარი მიზანი, ამოცანა და მოტივაცია არის ის, რომ ქვეყანამ სტატუსი არ მიიღოს. ამისთვის ყველაფერს აკეთებენ. რა თქმა უნდა, ჩვენი ხალხი, ჩვენი ქვეყანა, ხელისუფლება იმსახურებს სტატუსს და იმსახურებდა მაშინ, როდესაც სხვა ქვეყნებს მისცეს აღნიშნული სტატუსი, რადგან საქართველო იყო ყველაფერში მოწინავე კონკრეტული გადადგმული ნაბიჯებით, განხორციელებული რეფორმებით. თუმცა, იყო პოლიტიკური გადაწყვეტილება. ამ ყველაფრის მიუხედავად, ევროინტეგრაციის რთულ გზაზე, საქართველოს ხელისუფლება ყველაფერს გააკეთებს იმისთვის, რომ აღნიშნული 12 რეკომენდაცია ზედმიწევნით შესრულდეს,“ – განაცხადა კახა კალაძემ.

კონსტიტუციისა და რეგლამენტის დარღვევაზე ოპოზიცია საერთოდ როგორ იღებს ხმას?! – ისინი კონსტიტუციასა და რეგლამენტს არჩევნების დასრულების დღიდან არღვევენ, – ამის შესახებ ჟურნალისტებს უმრავლესობის დეპუტატმა გურამ მაჭარაშვილმა განუცხადა.

მაჭარაშვილი ირწმუნება, რომ სასამართლოსთან დაკავშირებით დროებითი საგამოძიებო კომისიის შექმნის საკითხის კენჭსაყრელ საკითხთა დღის წესრიგში არშეტანა როგორც რეგლამენტით, ასევე პოლიტიკურად სწორი და მართებული გადაწყვეტილებაა.

მისი თქმით, არ შეიძლება პოლიტიკურმა ორგანოებმა საგამოძიებო კომისიის ფარგლებში მოსამართლეების საქმიანობა შეამოწმოს.

„პარლამენტის რეგლამენტის მიხედვით, პარლამენტის ბიურო პარლამენტის სხდომების დღის წესრიგს ყოველ ჯერზე განსაზღვრავს, სადაც განსახილველი და კენჭსაყრელი საკითხები შედის. ბიურო ამ საკითხებს ყოველ ჯერზე თავიდან განიხილავს და თავიდან ამტკიცებს. საგამოძიებო კომისიის შექმნასთან დაკავშირებით ოპოზიციას შარშან ორი-სამი განცხადება ჰქონდა და როცა თავიდანვე ვერ მოხერხდა კომისიის შექმნა, საკითხი ბიუროს მიერ დამტკიცებულ დღის წესრიგში აღარ შედიოდა ხოლმე. რეგლამენტის მიხედვით, პარლამენტის ბიუროს დღის წესრიგში ის საკითხები არ შეაქვს, რომელზეც ადრე იყო პრობლემა, ვერ გადის ან ფორმატია ისეთი, რომ საკითხი არ შედის – რეგლამენტის მიხედვით, ბიუროს ამის უფლებამოსილება გააჩნია“, – განაცხადა გურამ მაჭარაშვილმა.

პარლამენტის მიმდინარე კვირის პლენარული სხდომების დღის წესრიგში, კენჭსაყრელ საკითხთა ნუსხაში, სასამართლოს საკითხზე დროებითი საგამოძიებო კომისიის შექმნის საკითხი შეტანილი არ არის.

პაპუაშვილმა გადაწყვიტა საგამოძიებო კომისიაზე კენჭისყრა ერთპიროვნულად გააქროს და თავად გახდეს სანქცირების ობიექტი, – ამის შესახებ „რესპუბლიკური პარტიის“ თავმჯდომარე ხათუნა სამნიძემ განაცხადა.

მისი თქმით, იმ მოვლენების ფონზე, რაც კომისიასთან დაკავშირებით განვითარდა, შეუძლებელია შალვა პაპუაშვილი არ განიხილებოდეს „კლანის“ ნაწილად.

„ბატონ პაპუაშვილს თავი ჰგონია, ვერ ვიტყვი რა, მაგრამ საგამოძიებო კომისია დღის წესრიგიდან გააქრო. არავითარი საფუძველი არ არსებობს იმისთვის, რომ რიგში მყოფი საკითხებიდან რომელიმე გაქრეს, ასეთი რამ აქამდე არ ყოფილა. პაპუაშვილმა გადაწყვიტა საგამოძიებო კომისიაზე კენჭისყრა ერთპიროვნულად გააქროს და გახდეს თავად სანქცირების ობიექტი. შეუძლებელია სანქციების შემდეგ, რაც კონკრეტულ მოსამართლეებზე ვიხილეთ, ამ მოსამართლეებზე გადაფარებამ, მათმა დაცვამ, მთელი სახელმწიფო მანქანის ჩართვამ, პარლამენტის პარალიზებამ, ახლა უკვე საკითხის დღის წესრიგიდან გაქრობამ არ გამოიწვიოს ის, რომ კონკრეტულად ბატონი პაპუაშვილი არ განიხილებოდეს როგორც ამ „კლანის“ ნაწილი“, – განაცხადა სამნიძემ.

პარლამენტის მიმდინარე კვირის პლენარული სხდომების დღის წესრიგში, კენჭსაყრელ საკითხთა ნუსხაში, სასამართლოს საკითხზე დროებითი საგამოძიებო კომისიის შექმნის საკითხი შეტანილი არ არის.

გაკოტრებული ოპოზიცია ცდილობს დამატებითი შოუს ელემენტები შეიტანოს პარლამენტში – ვინ უნდა გაასამართლოს სასამართლო და მოსამართლე? ხაბეიშვილმა, მწვალებელთა პარტიის ღირსეულმა წარმომადგენლებმა და ბუჩუკურმა?- ამის შესახებ საპარლამენტო უმრავლესობის წევრმა, ირაკლი ზარქუამ ჟურნალისტებთან საუბრისაც განაცხადა.

როგორც მან აღნიშნა, რადიკალური ოპოზიცია რეიტინგებში განულებულია და ხალხმა კიდევ ერთხელ ნახა, განსხვავება მმართველ პარტიასა და რადიკალებს შორის.

“რადიკალური ოპოზიცია რეიტინგებში განულებულია. იმდენად აქვთ დაკარგული თვითრწმენა, რომ არჩევნებშიც აღარ მონაწილეობენ. შუალედურ არჩევნებში 30%-იანი ზრდა დაფიქსირდა. ხალხმა კიდევ ერთხელ ნახა, განსხვავება მმართველ პარტიასა და რადიკალებს შორის. ვინ ზრუნავს ქვეყნის ინტერესებზე, ქართველ ხალხზე, კეთილდღეობაზე. ამით არის განპირობებული, რომ გაკოტრებული ოპოზიცია ცდილობს დამატებითი შოუს ელემენტები შეიტანოს პარლამენტში. საგამოძიებო ნაწილი უსაფუძვლოა. ვინ უნდა გაასამართლოს სასამართლო და მოსამართლე? ხაბეიშვილმა, მწვალებელთა პარტიის ღირსეულმა წარმომადგენლებმა და ბუჩუკურმა? თუ რამე დარღვევა არის, შესაბამისი ინსტანციებია, სადაც ჩვენ ევროპული ყაიდის სასამართლო სისტემა გვაქვს შექმნილი. ჩვენ ამ შოუში მონაწილეობას არ მივიღებთ. გუშინ ჰქონდათ შესაძლებლობა დაეყენებინათ ეს საკითხი ბიუროზე და არ დაუყენებიათ. შეეშვან ამ სპეკულაციებს, თუ ჩამოყალიბდებიან შესაძლებლობა აქვთ, რომ დააყენონ ეს საკითხი, შემდეგ იმსჯელებს უმრავლესობა”,-აღნიშნა ზარქუამ.

გარდა ამისა მან უპასუხა კითხვას, არის თუ არა მმართველი გუნდის ინტერესში, რომ შეისწავლონ გირგვლიანის საქმის მოსამართლის საქმიანობა. ზარქუამ აღნიშნა, რომ მმართველმა გუნდმა სასამართლო სისტემა წნეხისგან გათავისუფლა.

„შეგიძლიათ მიმართოთ რადიკალებს, “ენჯეოშნიკებს”, ვინც მაშინ ითხოვდა გირგვლიანის მოსამართლეები ჩვენ მუდმივად დაგვეტოვებინა სასამართლოში. აქციებს უწყობდა 2012 წელს. ამ კითხვით შეგიძლიათ რადიკალებს მიმართოთ. ჩვენ სასამართლო სისტემა გავათავისუფლეთ წნეხისგან. ჩვენ 2012 წელს ვთქვით, რომ არ დავემსგავსებით სააკაშვილის რეჟიმს, სადაც თავისიანები და სხვისიანები დაყო. ჩვენ შესაძლებლობა მივეცით ისინი თვითგამორკვევაში ყოფილიყვნენ, ნაწილი ჩამოშორდა სასამართლოს, ის ვინც მსხვერპლი იყო, გამოერკვია. საერთაშორისო კვლევები ადასტურებს, რომ დღეს სასამართლო გაცილებით თავისუფალია და ნდობით სარგებლობს საზოგადოებაში. შეგიძლიათ რადიკალებს და არასამთავრობოებს მიმართოთ კითხვით, თუ რა შეიცვალა მაშინ, როდესაც გვთხოვდნენ ეს მოსამართლეები უვადოდ დაგვეტოვებინა”,- აღნიშნავს ზარქუა.