ირაკლი კობახიძე მრავალი თაობის აღმზრდელი და პედაგოგია თბილისის სახელმწიფო უნივერსიტეტში. მისი შრომები და განსაკუთრებით, მისი საუკეთესო ნაშრომი – საქართველოს მოქმედი კონსტიტუცია მრავალი თაობისთვის დარჩება სამართლებრივი აზროვნების, თეორიული ცოდნის პრაქტიკაში დანერგვის სანიმუშო მაგალითად. ხოლო, რაც შეეხება სააკაშვილის ამორალურ იდეოლოგიას „ფრანკლინის კლუბის“ ან ნებისმიერი სხვა მჭექარე სახელწოდებით, ის შარშანდელი თოვლივით გაქრება, რადგან ჩვენმა საზოგადოებამ ის უკვე დიდი ხანია მოისროლა ისტორიის სანაგვეზე და მისი რეინკარნაციის ნებისმიერი მცდელობა მარცხისთვისაა განწირული, – ამის შესახებ საპარლამენტო უმრავლესობის წევრმა დავით მათიკაშვილმა პლენარულ სხდომაზე განაცხადა.

მისი თქმით, ისტორია არაერთ ფაქტს ინახავს, როდესაც საკუთარი მიზნების მისაღწევად, ახალგაზრდა ადამიანებით მანიპულირება ხდება.

„სამწუხაროდ, ამ მდარე იდეოლოგიით თავგზააბნეული ახალგაზრდა ბრმა იარაღად იქნა გამოყენებული სააკაშვილის მორალის, უფრო სწორედ კი ამორალურობის მეხოტბეების მიერ რაც პირდაპირი მნიშვნელობით ფსკერს ქვემოთ დაშვებაა და საკუთარი უღირსი შინაგანი ბუნების თვითლუსტრაციაა არა იმ ახალგაზრდა ადამიანისთვის, რომელიც ჩვენი შვილების თანატოლია და ვისაც წინ მთელი ცხოვრება ელოდება, არამედ იმ ძალებისთვის, რომლებსაც 2012 წელს ქართულმა საზოგადოებამ ერთხელ და სამუდამოდ ჩამოართვა სახელისუფლებო მანდატი და ახლა ახალგაზრდებისთვის ტვინის გამორეცხვით ცდილობს საკუთარი ბნელი დღის წესრიგის რეალიზებას“, – აღნიშნა დავით მათიკაშვილმა.

თბილისის მერის კახა კალაძის განცხადებით, რეფორმების განხორციელებასა და 12-პუნქტიანი გეგმის შესრულებაში მხოლოდ ხელისუფლებაა ჩართული, რადგან იცის, რამდენად მნიშვნელოვანია ეს, რათა ქვეყანამ ევროკავშირის წევრობის კანდიდატის სტატუსი მიიღოს. ამის შესახებ კალაძემ ჟურნალისტებს ევროპარლამენტარ მარინა კალიურანდის განცხადებების კომენტირებისას განუცხადა.

„გულწრფელად ვიტყვი, საერთოდ არ მაინტერესებს, რისი სჯერა დასავლეთს. ჩვენთვის ყველაზე მთავარია, რომ 12 რეკომენდაცია, რომელიც მოცემულია და სრულდება, ივნისის ბოლოს ზედმიწევნით იქნება შესრულებული. მიუხედავად იმისა, რომ აღნიშნულ გზამკვლევში პირველი მოცემული იყო დეპოლარიზაცია, რომელიც ცალმხრივად ვერ განხორციელდება, ამას მეორე მხარეც ჭირდება, რომელიც დღეს რადიკალიზმს წამოადგენს და ბოიკოტის რეჟიმშია, ეს ბოიკოტი კი იკვეთება ქვეყნის და არა მხოლოდ ხელისუფლების წინააღმდეგ. რეფორმებს და იმ 12-პუნქტიან გეგმას ასრულებს მხოლოდ და მხოლოდ ხელისუფლება, რადგან ვიცით, რამდენად მნიშვნელოვანია ეს იმისთვის, რომ ქვეყანამ მიიღოს სტატუსი, მიუხედავად იმისა, რომ ამას აქამდეც ვიმსახურებდით. შესრულდება ეს 12-პუნქტიანი გეგმა და შემდეგ უკვე დაველოდებით, დეკემბერში რა გადაწყვეტილება იქნება მიღებული“, – განაცხადა კახა კალაძემ.

მისივე თქმით, როდესაც „თვალში ნაცრის შეყრას ცდილობენ“, ეს არ უნდა დაუშვა.

„ჩვენ იმისთვის ვართ პოლიტიკოსები, რომ როდესაც არის მცდელობა, საზოგადოება შეცდომაში შეიყვანონ, არასწორი ინფორმაცია გაავრცელონ, ეს არ უნდა დავუშვათ. მერე რა, თუნდაც დასავლელი პარტნიორი იყოს, მათაც სიმართლე უნდა ვუთხრათ, მეგობარსაც სიმართლე უნდა ვუთხრათ. არ აქვს მნიშვნელობა, ვინც არ უნდა იყოს – შენი მეგობარი, კეთილმოსურნე თუ მტერი, როდესაც თვალებში ნაცარს გაყრიან, კეთილი უნდა ინებო, დადგე სიმაღლეზე და თქვა შენი სათქმელი. თეთრზე უნდა თქვა, რომ თეთრია, შავზე – შავია და ეს სხვებსაც უნდა გააგებინო“, – განაცხადა კახა კალაძემ.

ჩვენ დეოლიგარქიზაციის შესახებ კანონი არ გვჭირდება, რადგან ოლიგარქიზაციის პრობლემა არ გვაქვს. ჩვენს პრობლემას ერთპიროვნული მმართველობის პრობლემა, სასამართლოს არარსებობა ჰქვია, – ამის შესახებ „გირჩის“ წევრმა, იაგო ხვიჩიამ საქართველოს პირველ არხს განუცხადა.

მისივე თქმით, რეკომენდაციებიდან ყველაზე მნიშვნელოვანია დეპოლარიზაცია.

„დეოლიგარქიზაცია ისეთი ტერმინია, რომელსაც ყველა მხრიდან მოაბამ ყურს. ევროკომისიის რეკომენდაციებში ყველაზე მთავარი მუხლი დეპოლარიზაციაა, რომლის შეუსრულებლობის შემთხვევაში, არც ერთი სხვა მუხლის შესრულებას აზრი არ აქვს. მთავარი პრობლემა ესაა და ქვეპრობლემებისთვის შექმნილია ბევრი პატარ-პატარა პუნქტი, რომლის შესრულებას არანაირი აზრი არ აქვს. დეოლიგარქიზაცია საერთოდ მავნებლობაა და პარლამენტმა არ უნდა მიიღოს. ის პოლარიზაციას უფრო აღრმავებს და მისი შემცირებისკენ არ არის ნაბიჯი გადადგმული. ჩვენ დეპოლარიზაცია უნდა შევამციროთ და არა ის, რომ ვისაც ფული აქვს, მას პოლიტიკაში მოსვლა ავუკრძალოთ. ეს ცვლილებები ხელისუფლების ფულიანებს არ შეეხება და ოპოზიციის ფულიანებს შეეხებათ“, – განაცხადა იაგო ხვიჩიამ.

ვენეციის კომისიამ საქართველოს მმართველი პარტიის მიერ შემუშავებულ „დეოლიგარქიზაციის კანონპროექტის“ შესახებ დასკვნა გამოაქვეყნა, რომლის მიხედვითაც, დეოლიგარქიზაციის კანონპროექტი არსებული ფორმით არ უნდა იყოს მიღებული.

პრეზიდენტი ისე როცა მოქმედებს, რომ ეროვნული ბანკის კოორდინაცია ჩაშლილი იყოს, იძულებული ვხდებით, ისეთი ნაბიჯი გადავდგათ, რაც ამ ინსტიტუტის გამართულ მუშაობას უზრუნველყოფს, – ამის შესახებ პარლამენტის საპროცედურო საკითხთა კომიტეტის თავმჯდომარე ირაკლი ქადაგიშვილმა საქართველოს პირველ არხს განუცხადა.

მისი თქმით, პრეზიდენტი ცდილობს, რომ ხელისუფლებას ყველაფერში პოლიტიკური წინააღმდეგობა გაუწიოს.

„საბოლოო ჯამში, პოლიტიკური პასუხისმგებლობა ეკისრება არა პრეზიდენტსა და ეროვნულ ბანკს, არამედ ხელისუფლებას, თუ როგორია ქვეყანაში ინფლაცია, ლარის კურსი, მონეტარული პოლიტიკა. ინსტიტუციური დამოკიდებულება ისე არ უნდა გავიგოთ, რომ ეს არ არის მჭიდრო თანამშრომლობის არეალი. რა თქმა უნდა, უნდა იყოს თანამშრომლობა და ამის ჩაშლაზეა საუბარი, რისი დაძლევაც გვინდა. ხელისუფლება იმ პასუხისმგებლობას ვერ მოიხსნის, რომელიც მის წინაშეა. პრეზიდენტი ცდილობს, რომ ის პოლიტიკა, რაც ბოლო ერთი წელია აირჩია, ხელისუფლებას ყველაფერში პოლიტიკური წინააღმდეგობა გაგვიწიოს. ეს ღიად და აშკარად იკვეთება მის განცხადებებში თუ ქმედებებში. რა მიზანი აქვს, ეს ცალკე მსჯელობის საგანია“, – განაცხადა ირაკლი ქადაგიშვილმა.