თუკი ვინმე არის რუსული სტილის პოლიტიკოსი საქართველოში, ეს, პირველ რიგში, გახლავთ „ლელოს“ ლიდერები, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე თქმით, მამუკა ხაზარაძეს, თავისი წარსულიდან გამომდინარე, ვაშინგტონი მოსკოვში ერევა.

„ჩვენ ახლახან ვნახეთ მამუკა ხაზარაძე ვაშინგტონში და თავს იწონებდა, აბეზღებდა ქართველებს, რომ მათთვის სანქციები დაეწესებინათ. მე მგონი, თავისი წარსულიდან გამომდინარე, ვაშინგტონი მოსკოვში ერევა და ისეთი წარმოდგენა ჰქონდა, რომ ცენტრში ჩავიდა, რათა დაებეზღებინა საქართველოს მოქალაქეები და მერე გამოვიდა და თავს იწონებდა, რომ, აი, ახლა მალე იქნება სანქციები, მოვუყვები ქართველებზეო და ამერიკა დაასანქცირებსო. ამ ადამიანებს საკუთარი ქვეყნის მიმართ არანაირი ერთგულება არ აქვთ. ადრე იყურებოდნენ მოსკოვისკენ და ის მიაჩნდათ ცენტრად, ახლა იყურებიან სხვა ქვეყნებისკენ და ისინი მიაჩნიათ ცენტრად“, – განაცხადა პაპუაშვილმა.

ადრე თუ გვიან ნიკა მელია თავისი მომხრეებით შექმნის პარტიას, ამის პროგნოზირება არის ძალიან მარტივი, – ამის შესახებ „ევროოპტიმისტების“ წევრმა, რომან გოცირიძემ „ნაციონალურ მოძრაობაში“ მიმდინარე პროცესების კომენტირებისას განაცხადა.

მისივე თქმით, „ნაციონალური მოძრაობა“ ბოლო ერთი წლის განმავლობაში თვითდაზიანების რეჟიმშია.

„არ ვიცი, რა მანიფესტი იქნება, ვინ მოაწერს ხელს, ვინ – არა, ვის გარიცხავენ პარტიიდან ან ვის – არა. ერთი რამ არის ფაქტი – ის, რომ ამ ერთი წლის განმავლობაში „ნაციონალური მოძრაობა“ არის თვითდაზიანების რეჟიმში. რაც მოხდა, ეს არის ძალიან ცუდი. ის, რომ ადრე თუ გვიან ნიკა მელია თავისი მომხრეებით შექმნის პარტიას, ამის პროგნოზირება არის ძალიან მარტივი“, – განაცხადა გოცირიძემ.

მთელი 20 წელია, „ნაციონალური მოძრაობა“ ამ გეგმით მოქმედებს. როცა იყვნენ ხელისუფლებაში, მათი პოლიტიკა იყო ომი და გახლეჩა, 2008 წლამდე მიგვიყვანეს ამ პოლიტიკით, ადამიანების წამებამდე მიგვიყვანეს, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, „ნაციონალური მოძრაობა“ იმავეს აკეთებს ოპოზიციაში ყოფნის პერიოდში, რასაც ხელისუფლებაში ყოფნის დროს აკეთებდა.

„ომი და გახლეჩა არის მათი პოლიტიკა. „ნაცმოძრაობა“ არის ომისა და ღალატის პარტია, ეს კიდევ ერთხელ წამოსცდა თემურ ალასანიას“, – განაცხადა კობახიძემ.

საქართველოს ყოფილი პრეზიდენტის, მიხეილ სააკაშვილის ბიძამ, თემურ ალასანიამ აშშ-ში, ემიგრანტებთან შეხვედრაზე განაცხადა: „გაყოფილი, გახლეჩილი, ერთმანეთს დატაკებული საქართველო მირჩევნია, რადგან ეს არის პლურალიზმი, დემოკრატია, თავისუფლების საზომები“.

აზერბაიჯანის პრეზიდენტი აცხადებს, რომ საფრანგეთი სამხრეთ კავკასიის რეგიონში ახალი ომების გაჩაღებისთვის ნიადაგს ამზადებს. აზერბაიჯანული სააგენტოს, „ტრენდის“ ცნობით, ამის შესახებ ნათქვამია ბაქოში მიმდინარე საერთაშორისო კონფერენციის – „დეკოლონიზაცია: ქალების გაძლიერება და განვითარება“ მონაწილეებისადმი ალიევის მიმართვაში.

ილჰამ ალიევი აღნიშნავს, რომ „ფრანგული კოლონიალიზმის სამარცხვინო მეთოდები“ დღესაც გრძელდება.

„საფრანგეთი არღვევს სტაბილურობას არა მხოლოდ თავის ყოფილ და ახლანდელ კოლონიებში, არამედ ჩვენს რეგიონშიც – სამხრეთ კავკასიაში, სადაც მხარს უჭერს სეპარატისტულ ტენდენციებს და სეპარატისტებს. ის ატარებს მილიტარისტულ პოლიტიკას სომხეთის შეიარაღებით, აქეზებს სომხეთში რევანშისტულ ძალებს, ამზადებს ნიადაგს ჩვენს რეგიონში ახალი ომებისთვის“, – მიიჩნევს აზერბაიჯანის პრეზიდენტი.

„ნაციონალური მოძრაობისა“ და გახარიას პარტიის გამოკლებით უნდა შეიქმნას საპარლამენტო და არასაპარლამენტო ოპოზიციიდან შემდგარი დიდი გაერთიანება – კონსულტაციები უნდა დაიწყოს მალე, იანვრიდან, – ამის შესახებ „ევროოპტიმისტების“ დეპუტატმა, რომან გოცირიძემ განაცხადა. როგორც მან აღნიშნა, „ნაციონალურ მოძრაობას“ ბარიერის პრობლემა არ აქვს და ბარიერის გადალახვის შანსი აქვს გახარიას პარტიასაც, ამიტომ ოპოზიციურ ველზე არსებულმა დანარჩენმა პოლიტიკურმა ძალებმა, მათ შორის, არასამთავრობო სექტორის იმ წარმომადგენლებმა ვისაც პოლიტიკაში წასვლის სურვილი აქვთ, ერთი დიდი გაერთიანება უნდა შექმნან, თუმცა, გოცირიძე არ გამორიცხავს ასევე მეორე გაერთიანების შექმნასაც მათგან, რომელსაც ამ ბლოკთან თავსებადობა არ ექნება.

დეპუტატი აცხადებს, რომ მცირე პარტიების მხრიდან არჩევნებზე ცალკე გასვლა ან გულუბრყვილობა იქნება ან „ქართული ოცნების“ სასარგებლოდ მოქმედება.

„თუ მცდელობისა და ბრძოლის მოუხედავად დაბალი ბარიერი ვერ იქნა მიღწეული, გამოსავალი არის დიდი, მსხვილი ოპოზიციური გაერთიანების შექმნა, რომელიც დაამარცხებს ქართულ ოცნებას, შექმნის კოალიციას და გაისტუმრებს წარუმატებელ ხელისუფლებას პოლიტიკურ მოუსავლეთში. პირადად ჩემი აზრი თუ გაინტერესებთ, დღეს არის ორი პარტია, რომელიც არავისთან გაერთიანებას არ აპირებს და რომელთაც აქვთ ბარიერის გადალახვის შანსი, ერთს 100%-იანი შანსი, ესაა „ნაციონალური მოძრაობა“, მეორეს – გახარიას პარტიას კი ნაწილობრივი შანსი აქვს. დანარჩენი, საპარლამენტო და არასაპარლამენტო ოპოზიცია უნდა გაერთიანდეს ერთ დიდ, მთავარ ბლოკში, რომელიც იქნება იმაზე ძლიერი ვიდრე „ნაციონალური მოძრაობაა“, შესაძლებელია და არ გამოვრიცხავ კიდევ ერთი ოპოზიციური ბლოკის შექმნას, რომელსაც ამ დიდ ბლოკთან არ ექნება თავსებადობა. ძალა ამ შემთხვევაში არის ერთ, დიდ საარჩევნო ბლოკში გაერთიანებაში. ცალ-ცალკე გასული პარტიების უდიდესი ნაწილი ბარიერს ვერ გადალახავს და თუ ერთმა ან ორმა გადალახა, ეს აბსოლუტურად არაფერს არ ცვლის. „ნაციონალური მოძრაობისა“ და გახარიას პარტიის გამოკლებით, უნდა შეიქმნას საპარლამენტო და არასაპარლამენტო ოპოზიციიდან შემდგარი დიდი ბლოკი, მათ შორის შეიძლება იყვნენ არასამთავრობო ორგანიზაციების აქტიური ნაწილი და ცნობადი პირები, რომლებსაც პოლიტიკაში მოსვლა გადაუწყვიტავთ. ეს ბლოკი უნდა იყოს ნომერ პირველი თავის ელექტორალური ძალით, „ნაციონალური მოძრაობის“ ტოლფასი ან მასზე მეტი. ამ არითმეტიკით იმარჯვებს ოპოზიცია და იცვლება ხელისუფლება. პატარა პარტიების მხრიდან არჩევნებზე ცალკე გასვლა ან გულუბრყვილობა და ილუზიაა, ან უპასუხისმგებლობა ან „ქართული ოცნების“ წისქვილზე ასხამენ პირდაპირ წყალს, ან კიდევ არიან ახირებული ადამიანები, რომლებიც მოქმედებენ ოლიმპიური პრინციპით – გამარჯვება კი არ არის მთავარი, არამედ მონაწილეობა. ეს არის დიდი შეცდომა. გაერთიანებაზე საუბარი ოპოზიციამ უნდა დაიწყოს მალე, ალბათ იანვრიდან უნდა დაიწყოს კონსულტაციები“, – განაცხადა გოცირიძემ.

ბარიერი 5%-ზე დარჩება, დაიწევს თუ გაიზრდება, საზოგადოებას იმდენად სჭირდება რუსული ხელისუფლების მოშორება ქვეყნის მართვის სათავეებიდან, რომ „ქართული ოცნება“ შემდეგ არჩევნებზე ვერანაირი კონფიგურაციით ვერ შეინარჩუნებს ძალაუფლებას, – ამის შესახებ „ლელოს“ წევრმა, სალომე სამადაშვილმა განაცხადა.

როგორც სალომე სამადაშვილმა აღნიშნა, „ქართულ ოცნებას“ აქვს ძალიან ცრუ მოლოდინი, რომ ბარიერს არ დაწევს და ამით გადაუნაწილებელ ხმებს მიითვისებს.

„მინდა, ესმოდეს საზოგადოებას, „ქართული ოცნება“ ერთადერთი მიზეზით ამბობს უარს ბარიერის დაწევაზე, რომ მოიპაროს მორიგ ჯერზე თქვენი ხმები. სხვა პარტიებს რომ მისცემთ ხმებს და ეს პარტიები პარლამენტში ვერ მოხვდებიან, ამ ხმებს მიიწერს „ქართული ოცნება“. თქვენი ხმების მოპარვა უნდათ და ამიტომ არ წევენ ბარიერს. მიგვაჩნია, რომ ბარიერი დარჩება 5%-ზე, დაიწევს თუ გაიზრდება, საზოგადოებას უკვე იმდენად სჭირდება რუსული ხელისუფლების მოშორება ქვეყნის მართვის სათავეებიდან, რომ „ქართული ოცნება” შემდეგ არჩევნებზე ვერანაირი კონფიგურაციით ვერ შეინარჩუნებს ძალაუფლებას. ბარიერს თუ შეცვლიან, ჩვენ დავუჭერთ მხარს; თუ არ შეცვლიან, ყველა შემთხვევაში შევცვლით ბიძინა ივანიშვილის ხელისუფლებას“, – განაცხადა სამადაშვილმა.