ტრეფიკინგთან ბრძოლის მიმართულებით საქართველო წელსაც უმაღლეს შეფასებას იღებს, – ამის შესახებ ნათქვამია საქართველოს იუსტიციის სამინისტროს მიერ გავრცელებულ ინფორმაციაში.

როგორც იუსტიციის სამინისტროს ინფორმაციაშია ნათქვამი, საქართველო მნიშვნელოვან ყურადღებას უთმობს ადამიანით ვაჭრობის (ტრეფიკინგის) წინააღმდეგ ეფექტიან ბრძოლას.

„2025 წლის 29 სექტემბერს გამოქვეყნდა აშშ-ის სახელმწიფო დეპარტამენტის ყოველწლიური ანგარიში ადამიანით ვაჭრობის (ტრეფიკინგის) თაობაზე, რომლის თანახმად ამ დანაშაულის წინააღმდეგ განხორციელებული ღონისძიებებით საქართველო კვლავ უმაღლეს საფეხურზეა და მსოფლიოს მასშტაბით 188 ქვეყანას შორის უკვე მეათე წელია, ინარჩუნებს ადგილს ე.წ. პირველ კალათაში. წელს შეფასების უმაღლეს შკალაში მხოლოდ 33-მა ქვეყანამ დაიკავა ადგილი. საქართველო წელსაც ერთადერთია რეგიონის მასშტაბით და ევროკავშირის წევრობის კანდიდატ სახელმწიფოებს შორის, რომელიც აშშ-ის სახელმწიფო დეპარტამენტის შეფასების უმაღლეს ნიშნულს იკავებს.

აღსანიშნავია, რომ უშუალოდ ევროკავშირის წევრი სახელმწიფოებიდან უმაღლეს პირველ კალათაში ვერ მოხვდა 11 ქვეყანა. საქართველო მნიშვნელოვან ყურადღებას უთმობს ადამიანით ვაჭრობის (ტრეფიკინგის) წინააღმდეგ ეფექტიან ბრძოლას, რომელიც, ასევე, საქართველოს ევროკავშირში ინტეგრაციის პროცესის მნიშვნელოვანი ნაწილია და, ტრანსნაციონალურ ორგანიზებულ დანაშაულთან ბრძოლის კუთხით, ქვეყანასა და რეგიონში უსაფრთხო, საიმედო გარემოს ქმნის. აშშ-ის სახელმწიფო დეპარტამენტის ანგარიშის თანახმად, საქართველო სრულად აკმაყოფილებს ამ ორგანიზებულ დანაშაულთან ბრძოლის სტანდარტებს, განაგრძობს მტკიცე, მდგრად, თანმიმდევრულ და კოორდინირებულ ღონისძიებებს ტრეფიკინგთან ბრძოლის მიმართულებით, რაც განაპირობებს ქვეყნის უმაღლეს შეფასებას. აშშ-ის სახელმწიფო დეპარტამენტის ანგარიშში ხაზგასმულია ადამიანით ვაჭრობის (ტრეფიკინგის) წინააღმდეგ ბრძოლის ყველა მიმართულებით საქართველოს მთავრობის მიერ გაძლიერებული ძალისხმევა როგორც დანაშაულის პრევენციის, ისე დამნაშავეთა გამოვლენის, დასჯისა და მსხვერპლთა დაცვის მიმართულებით. საქართველოს მიერ აშშ-ის სახელმწიფო დეპარტამენტის ანგარიშში მოწინავე პოზიციის დაკავება და საანგარიშო პერიოდში მიღწეული პროგრესი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭოს ეფექტიანი მუშაობის შედეგია. საბჭოს საქართველოს იუსტიციის მინისტრი ხელმძღვანელობს და მის შემადგენლობაში შედის ყველა შესაბამისი სახელმწიფო უწყების, სახალხო დამცველის აპარატისა და პარტნიორი ორგანიზაციების წარმომადგენლები“, – ნათქვამია იუსტიციის სამინისტროს ინფორმაციაში.

აშშ-ის სახელმწიფო დეპარტამენტმა ადამიანით ვაჭრობის შესახებ ანგარიში გამოაქვეყნა, სადაც საუბარია საქართველოზეც. ანგარიშის თანახმად, საქართველოს მთავრობა აკმაყოფილებს ადამიანით ვაჭრობის აღმოსაფხვრელად საჭირო სტანდარტებს, მთავრობის მდგრადი ძალისხმევის გამო, საქართველო „პირველ დონეზე“ დარჩა.

აშშ-ის სახელმწიფო დეპარტამენტი ადამიანით ვაჭრობის შესახებ ანგარიშს აქვეყნებს, სადაც საუბარია საქართველოზეც.

როგორც ანგარიშშია აღნიშნული, საქართველოს მთავრობა სრულად აკმაყოფილებს იმ მინიმალურ სტანდარტებს, რომლებიც ადამიანით ვაჭრობის აღმოსაფხვრელადაა საჭირო. საანგარიშო პერიოდში მთავრობის მიერ სერიოზული და მდგრადი ძალისხმევის დემონსტრირების გამო, საქართველო „პირველ დონეზე“ (Tier 1) დარჩა.

„ეს ძალისხმევა უფრო მეტი ტრეფიკერის დევნას, გასამართლებას, მეტი მსხვერპლის იდენტიფიცირებასა და ტრეფიკინგის საწინააღმდეგო თავშესაფრებისთვის დაფინანსების გაზრდას მოიცავდა. პირველად რამდენიმე წლის განმავლობაში, სასამართლოებმა მსხვერპლებს კომპენსაცია მიანიჭეს. გენერალურმა პროკურატურამ გამოსცა დირექტივა, რომელიც სავალდებულოს ხდის მსხვერპლ-მოწმის კოორდინატორების დანიშვნას ტრეფიკინგის საქმეებში. მიუხედავად იმისა, რომ მთავრობა აკმაყოფილებს მინიმალურ სტანდარტებს, მან გამოიძია ნაკლები ტრეფიკინგის საქმე და საერთო ძალისხმევა სექსუალური ტრეფიკინგის საქმეების იდენტიფიცირებისა და დევნის მიმართ იყო არასაკმარისი. სამართალდამცველებმა მსხვერპლებს მოსთხოვეს დარჩენა ქვეყანაში სასამართლო პროცესის დასრულებამდე, რამაც პოტენციურად შეიძლება, შეაფერხოს თანამშრომლობა უცხოელი მსხვერპლებისგან, რომლებსაც სურდათ რეპატრიაცია, ხოლო მოსამართლეებმა არცერთხელ არ მიუსაჯეს რესტიტუცია სისხლის სამართლის საქმეებში. მთავრობის ძალისხმევა მსხვერპლების იდენტიფიცირებისა და სერვისებზე მიმართვის მიმართ, რომლებსაც არ სურდათ მონაწილეობა სამართალდამცავ ორგანოებთან თანამშრომლობაში, დარჩა მინიმალური. მთავრობის მხრიდან სისტემური თანამშრომლობის ნაკლებობამ სამოქალაქო საზოგადოებასთან შეაფერხა ანტიტრეფიკინგული ძალისხმევა“, – აღნიშნულია ანგარიშში.

ასევე მოცემულია რიგი რეკომენდაციები, რომელთა განხორციელებაც საჭიროა.

„ტრეფიკინგის დანაშაულების, განსაკუთრებით კი სექსუალური ტრეფიკინგის საქმეების აქტიური გამოძიება და მსჯავრდებული ტრეფიკერების შესაბამისი დასჯა, რაც მნიშვნელოვანი ვადით პატიმრობას უნდა ითვალისწინებდეს; ტრეფიკინგის მსხვერპლების იდენტიფიცირება მოწყვლად ჯგუფებში ტრეფიკინგის ინდიკატორების შემოწმებით; სამართალდამცავი ორგანოების შესაძლებლობების გაუმჯობესება; დაზვერვისა და მტკიცებულებების საფუძველზე სამართალდამცავი ოპერაციების დასაგეგმად რესურსებისა და ტრენინგების რაოდენობის გაზრდა; დაზარალებულთა გამოძიებებსა და სისხლის სამართლებრივ დევნაში მონაწილეობის წახალისება დაზარალებულზე ორიენტირებული სასამართლო პროცედურების საშუალებით; ტრეფიკინგის მსხვერპლთა იდენტიფიცირებისთვის შრომის ინსპექციის რესურსებისა და შესაძლებლობების გაზრდა; ტრეფიკინგის აღსაკვეთად და მსხვერპლთა დაცვისთვის მთავრობის ძალისხმევის ხელშეწყობის მიზნით სამოქალაქო საზოგადოებასთან თანამშრომლობის გაზრდა; ტრეფიკინგის მსხვერპლთა იდენტიფიცირების მიზნით სამოქალაქო საზოგადოების შესაძლებლობებისა და ცნობიერების გაზრდა; ტრეფიკინგის საწინააღმდეგო უწყებათაშორისი საკოორდინაციო საბჭოს გამჭვირვალობის გაზრდა და ტრეფიკინგის წინააღმდეგ მთავრობის ძალისხმევის შესახებ რეგულარული ინფორმაციის გამოქვეყნება“, – ნათქვამია ანგარიშში.

ასევე, დოკუმენტშია ნათქვამი, ტრეფიკერები სექსუალური ტრეფიკინგის მიზნით, ქართველი ქალებისა და გოგონების ექსპლუატაციას ახდენენ ქვეყნის შიგნით, კერძოდ აჭარაში და საზღვარგარეთ, კვიპროსში, ეგვიპტეში, თურქეთსა და არაბთა გაერთიანებულ საამიროებში. ამ პირების მოტყუება კი საზღვარგარეთ მაღალანაზღაურებადი სამუშაოების დაპირებით ხდება.

„ტრეფიკერები მსხვერპლების რეკრუტირებას მოტყუებით ახდენენ, მათ უცხოეთში მაღალანაზღაურებად სამუშაოს ჰპირდებიან ჩაის გადამამუშავებელ ქარხნებში, საავადმყოფოებში, სალონებში, რესტორნებსა და სასტუმროებში. საქართველო ასევე არის ტრანზიტული ქვეყანა ქალებისთვის ყირგიზეთიდან, ტაჯიკეთიდან და უზბეკეთიდან. ტრეფიკერები სექსუალური ტრეფიკინგის მსხვერპლთა რეკრუტირებისა და ექსპლუატაციისთვის სულ უფრო მეტად იყენებენ ონლაინ საშუალებებს. უკრაინელი ლტოლვილები, რომლებიც რუსეთ-უკრაინის ომს გამოექცნენ და რუსები, რომლებიც სამხედრო სამსახურში გაწვევას გაექცნენ, ტრეფიკინგის მიმართ მოწყვლადები არიან“, – ნათქვამია ანგარიშში.

დოკუმენტში აღნიშნულია, რომ საანგარიშო პერიოდში რუსეთის მიერ ოკუპირებული საქართველოს რეგიონები საქართველოს მთავრობის კონტროლს მიღმა რჩებოდა და ამ რეგიონებში ე.წ. ხელისუფლებას მხარს რუსული ძალები უჭერდნენ.

„რუსეთისა და აფხაზეთის წარმომადგენლებმა შეზღუდეს საერთაშორისო ორგანიზაციების შესაძლებლობა, რომ ემოქმედათ აფხაზეთში, თუმცა საერთაშორისო ორგანიზაციებს უფრო მეტი შესაძლებლობა ჰქონდათ, ემუშავათ იქ, ვიდრე სამხრეთ ოსეთში. შედეგად, არ იყო ხელმისაწვდომი არანაირი ინფორმაცია ტრეფიკინგის არსებობის ან აფხაზური და სამხრეთ ოსური წარმომადგენლების ძალისხმევის შესახებ ტრეფიკინგის წინააღმდეგ ბრძოლის მიმართ. თუმცა, არასამთავრობო ორგანიზაციები მიიჩნევენ, რომ საქართველოს კონტროლირებად ტერიტორიაზე მყოფი დევნილები აფხაზეთიდან და სამხრეთ ოსეთიდან განსაკუთრებით მოწყვლადები არიან ტრეფიკინგის მიმართ. დამკვირვებლები აცხადებენ, რომ ტრეფიკერებმა მიგრანტები შესაძლოა, იძულებით სამუშაოში ჩართონ აფხაზეთში. ჩრდილოეთ კორეის მოქალაქეები, რომლებიც მუშაობენ აფხაზეთში, შესაძლოა, მოღვაწეობდნენ ექსპლუატაციური სამუშაო პირობების ქვეშ და სახეზე იყოს იძულებითი შრომის მრავალი ინდიკატორი“, – ნათქვამია ანგარიშში.

ჩინეთი და საქართველო კარგი მეგობრები და პარტნიორები არიან, რომლებიც ერთმანეთს ენდობიან, – განაცხადა ჩინეთის სახალხო რესპუბლიკის ელჩმა საქართველოში, ჭოუ ციენმა ჩინეთის სახალხო რესპუბლიკის დაარსების 76-ე წლისთავისა და მეორე მსოფლიო ომში გამარჯვების მე-80 წლისთავისადმი მიძღვნილ ღონისძიებაზე სიტყვით გამოსვლისას.

მისი თქმით, 2023 წელს სტრატეგიული პარტნიორობის დამყარების შემდეგ, ჩინეთსა და საქართველოს შორის პოლიტიკური ურთიერთნდობა მუდმივად ძლიერდება.

„ჩვენ მტკიცედ ვუჭერთ მხარს ერთმანეთს, მივყვეთ ისეთ განვითარების გზას, რომელიც ჩვენი ხალხების მიერ არის არჩეული და ჩვენი ქვეყნების მდგომარეობას შეესაბამება. ჩვენ მხარს ვუჭერთ ერთმანეთს საკუთარი ძირითადი ინტერესების, სუვერენიტეტის, უსაფრთხოებისა და ტერიტორიული მთლიანობის დაცვაში. 2023 წელს სტრატეგიული პარტნიორობის დამყარების შემდეგ, ჩინეთსა და საქართველოს შორის პოლიტიკური ურთიერთნდობა მუდმივად ძლიერდება, ხშირია მაღალი დონის ვიზიტები, ეკონომიკური და სავაჭრო თანამშრომლობა ინარჩუნებს დადებით იმპულსს. 2024 წელს ორმხრივმა ვაჭრობამ 2.25 მილიარდ აშშ დოლარს მიაღწია, რაც 10% წლიურ ზრდას შეადგენს. ორმა მხარემ ახლახან დაასრულა მოლაპარაკებები თავისუფალი ვაჭრობის შეთანხმების განახლების შესახებ თბილისში, რაც კიდევ უფრო გააძლიერებს ჩინეთსა და საქართველოს შორის ვაჭრობას და ხელს შეუწყობს ორმხრივი ეკონომიკური და სავაჭრო ურთიერთობების ხარისხის გაუმჯობესებას. ორივე მხარე აქტიურად უწყობს ხელს ტრანსკასპიური საერთაშორისო სატრანსპორტო დერეფნის მშენებლობას და მუდმივად აღრმავებს თანამშრომლობას. წელს ჩვენი ქვეყნების განათლების სამინისტროებმა ხელი მოაწერეს შეთანხმებას უმაღლესი განათლების ურთიერთაღიარების შესახებ, ჩინური ენა შეტანილია უცხო ენის სასწავლო პროგრამაში საქართველოს საჯარო სკოლებში. ჩვენი ქვეყნების თანამშრომლობა კიდევ უფრო ღრმავდება სხვადასხვა, მათ შორის ტურიზმისა და კულტურის სფეროებში, რაც კიდევ უფრო ამდიდრებს სტრატეგიულ პარტნიორობას.

წელს, პირველი მაისის დღესასწაულის დროს, საქართველო ჩინეთის ათ ყველაზე მზარდად მოთხოვნად საზღვარგარეთულ ტურისტულ მიმართულებას შორის იყო. იმედი გვაქვს, ჩვენი ქართველი მეგობრები უფრო ხშირად ეწვევიან ჩინეთისსხვადასხვა ადგილებს და უკეთ შეიცნობენ რეალურ ჩინეთს“, – განაცხადა ჭოუ ციენმა.

ჩინეთის ელჩმა ასევე აღნიშნა, რომ დღესდღეობით, ჩინეთ-საქართველოს შორის ურთიერთობები მტკიცედ ვითარდება და არსებობს თანამშრომლობის ფართო პერსპექტივები.

„ჩინეთი მზადაა, საქართველოსთან ერთად, კიდევ უფრო გააძლიეროს ჩვენს ქვეყნებს შორის არსებული მეგობრობა და ორი ქვეყნის ურთიერთსარგებლიანი თანამშრომლობა კიდევ უფრო მეტი სიკეთის მომტანი გახადოს ჩვენი ხალხებისთვის.ჩინეთის სახალხო რესპუბლიკას ვუსურვებ განვითარებას, აყვავებას, მშვიდობასა და კეთილდღეობას,ჩინეთ-საქართველოს სტრატეგიულ პარტნიორობას ვუსურვებ კიდევ უფრო დიდი სიმაღლეების მიღწევას,ჩინეთს, საქართველოს და მსოფლიოს კი – მშვიდობასა და კეთილდღეობას!გმადლობთ!”, – განაცხადა ჩინეთის ელჩმა.

დღეს ჩინეთი სამაგალითოა ყველა ცივილიზებული ქვეყნისთვის იმით, რომ წინსვლაზე, მოდერნიზაციასა და განვითარებაზე ორიენტირებული სახელმწიფოა და გლობალურ მშვიდობას აძლიერებს, – ამის შესახებ საქართველოს პრემიერ-მინისტრმა ირაკლი კობახიძემ ჩინეთის სახალხო რესპუბლიკის დაარსების 76-ე წლისთავისა და მეორე მსოფლიო ომში გამარჯვების მე-80 წლისთავისადმი მიძღვნილ ღონისძიებაზე სიტყვით გამოსვლისას განაცხადა. 

მთავრობის მეთაურმა ჩინეთის ელჩს საქართველოში ჭოუ ციენს და ჩინელ ხალხს დღესასწაული მიულოცა და ხაზი გაუსვა ჩინეთის მნიშვნელოვან წვლილს მეორე მსოფლიო ომის შემდგომი საერთაშორისო წესრიგის ჩამოყალიბებაში.

“ჩვენ დიდ მნიშვნელობას ვანიჭებთ ჩინეთის სახალხო რესპუბლიკასთან მჭიდრო და დინამიურ პარტნიორობას. ჩვენი მეგობრობა ურთიერთპატივისცემას, ნდობასა და საერთო პრიორიტეტებს ეფუძნება. საქართველო-ჩინეთის ურთიერთობების სტრატეგიულ დონეზე აყვანა ჩვენი საერთო ინტერესების სიღრმეს ასახავს. საქართველო კიდევ ერთხელ ადასტურებს თავის მტკიცე ერთგულებას და სრულ მზადყოფნას, გააძლიეროს თანამშრომლობა ყველა სფეროში.  დარწმუნებული ვარ, ჩვენი ერთობლივი ინიციატივები და პროექტები ამ პარტნიორობას განამტკიცებს და მნიშვნელოვან შედეგებს მოიტანს. 

“სარტყელისა და გზის” ინიციატივა, შუა დერეფნის მეშვეობით სატრანსპორტო და სავაჭრო კავშირებთან ერთად, განსაკუთრებულ შესაძლებლობებს გვთავაზობს ჩვენი პარტნიორობის გასაღრმავებლად და ჩვენს ერებს შორის ძლიერი კავშირების გასამყარებლად. საქართველოსა და ჩინეთის დინამიურმა თანამშრომლობამ, მათ შორის სავაჭრო შეთანხმებებმა, სავიზო რეჟიმის  გამარტივებამ და ინფრასტრუქტურასა და ლოჯისტიკაში ერთობლივმა ინვესტიციებმა გააძლიერა ეს როლი და აჩვენა შუა დერეფნის, როგორც კავშირის გაძლიერების, ვაჭრობის გაფართოებისა და ურთიერთსასარგებლო შესაძლებლობების შექმნის პლატფორმის მნიშვნელობა. დარწმუნებული ვარ, საქართველოსა და ჩინეთს შორის მტკიცე მეგობრობა და თანამშრომლობა კიდევ უფრო გაღრმავდება, რაც მეტად  ძლიერი პარტნიორობისთვის ახალ შესაძლებლობებს შექმნის”, – განაცხადა ირაკლი კობახიძემ.

საზეიმო მიღებაზე სტუმრებს სიტყვით მიმართა ჩინეთის ელჩმა საქართველოში ჭოუ ციენმა.

შესრულდა ჩინეთისა და საქართველოს სახელმწიფო ჰიმნები.

ღონისძიებას საქართველოს აღმასრულებელი და საკანონმდებლო ხელისუფლების წევრები და დიპლომატიური კორპუსის წარმომადგენლები დაესწრნენ.