მილანში საქართველოს გენერალური საკონსულო ოფიციალურად გაიხსნა. ღონისძიებას, რომელიც ვისკონტების სასახლეში გაიმართა, თბილისის მერი კახა კალაძე პრემიერ-მინისტრ ირაკლი კობახიძესთან ერთად დაესწრო.

დედაქალაქის მერმა ღონისძიების მონაწილეებს სიტყვით მიმართა და აღნიშნა, რომ საკონსულოს გახსნა ორ ქვეყანას შორის არსებულ ურთიერთობებს კიდევ უფრო გააღრმავებს, საქართველოს მოქალაქეებისთვის კი შესაბამის მომსახურებას გაამარტივებს.

„სრულიად გულწრფელად შემიძლია ვთქვა, მილანი არის ქალაქი, რომელმაც კახა კალაძის ყველა ოცნება რეალობად აქცია. იტალია იყო და სამუდამოდ დარჩება ჩემს მეორე სახლად, რომლის კარსაც ყოველთვის დიდი სიყვარულით, უამრავი ბედნიერი დღის მოგონებით, გამარჯვების განცდით, საყვარელ ადამიანებთან შეხვედრის სიხარულით ვაღებ. დარწმუნებული ვარ, მილანში საქართველოს გენერალური საკონსულოს გახსნა, კიდევ უფრო ფართოდ გახსნის შესაძლებლობას, განმტკიცდეს და გაღრმავდეს საქართველოსა და იტალიას შორის მეგობრული ურთიერთობები, გაიზარდოს თანამშრომლობის პერსპექტივები ყველა სფეროში და რასაკვირველია, გაამარტივებს მილანში საქართველოს მოქალაქეებისთვის საკონსულო მომსახურებას. 30 წელზე მეტი გავიდა, რაც საქართველოსა და იტალიას შორის დიპლომატიური ურთიერთობები დამყარდა, თუმცა ვფიქრობ, გვაქვს შესაძლებლობა, ეს ურთიერთობები კიდევ უფრო გავაღრმაოთ. თბილისი მზადაა, გაიზიაროს ის საუკეთესო მაგალითები, რომლებიც პროექტების სახით, ამ ულამაზეს ქალაქში განხორციელდა“, – განაცხადა კახა კალაძემ.

თბილისის მერმა მილანში საქართველოს გენერალურ კონსულს, ნატალია კორძაიას აღნიშნულ თანამდებობაზე წარმატებები უსურვა.

„სულ რამდენიმე დღის წინ, 2 ივნისს იტალიის ეროვნული დღესასწაული – რესპუბლიკის დღე აღინიშნა. მინდა, ვისარგებლო შემთხვევით და ეს დღე კიდევ ერთხელ მოგილოცოთ. მინდა, მადლობა გადავუხადო იტალიას იმ მტკიცე და ურყევი პოზიციისთვის, რასაც საქართველოს სუვერენიტეტის მხარდასაჭერად აკეთებს. საქართველო არის დამოუკიდებელი, თავისუფალი ქვეყანა. საქართველოს დღევანდელი ხელისუფლება არის პატრიოტი საკუთარი ქვეყნის მიმართ და ყოველთვის გავატარებთ ისეთ პოლიტიკას, სადაც, პირველ რიგში, გათვალისწინებული და დაცული იქნება ჩვენი ქვეყნისა და ხალხის ინტერესები“, – განაცხადა თბილისის მერმა.

გენერალური საკონსულოს ოფიციალური გახსნის ღონისძიებას მილანის მერი ჯუზეპე სალა, ასევე, იტალიისა და საქართველოს მთავრობების წევრები ესწრებოდნენ.

ჩვენ დღეს სიამაყით აღვნიშნავთ, რომ საქართველო არის დამოუკიდებელი და სუვერენული, როგორც არასდროს, თუმცა ასევე გვესმის, რომ დამოუკიდებლობისთვის ბრძოლა, დამოუკიდებლობის შენარჩუნება დაკავშირებულია მუდმივ ბრძოლასთან, ეს არის მუდმივი პროცესი, – ამის შესახებ საქართველოს პრემიერ-მინისტრმა, ირაკლი კობახიძემ მილანში საქართველოს გენერალური საკონსულოს გახსნის ცერემონიაზე განაცხადა.

კობახიძის თქმით, როდესაც საქმე ეხება ქვეყნის ეროვნული ინტერესების დაცვას, ძალიან მნიშვნელოვანია მეგობრებთან ურთიერთობა და პარტნიორობა.

„დღეს, ამ ულამაზეს ქვეყანაში და ამ ულამაზეს ქალაქში აღვნიშნავთ საქართველოს დამოუკიდებლობის დღეს. ეს არის დღე, რომელიც თითოეულ ჩვენგანს, თითოეულ ქართველს განსაკუთრებული სიამაყით გვავსებს, რადგან ის გვახსენებს ჩვენს მრავალსაუკუნოვან ბრძოლას თავისუფლებისთვის, დამოუკიდებლობისა და სუვერენიტეტისთვის. ამ ბრძოლას უამრავი ქართველის სიცოცხლე შეეწირა. დამოუკიდებლობა არის ის, რასაც თითოეული ჩვენგანი განსაკუთრებულად უნდა გავუფრთხილდეთ. ჩვენ ვამაყობთ ჩვენი უნიკალური, მრავალსაუკუნოვანი ისტორიით და სიამაყით ვიმეორებთ, რომ ჩვენი ქვეყანა არის 3 000 წლის, ხოლო საქართველოს სახელმწიფოებრიობა არის 23-საუკუნოვანი ისტორიის. საქართველო, რომელიც არის ძალიან პატარა ქვეყანა, ისტორიულად ყოველთვის იმყოფებოდა იმპერიების გზაგასაყარზე. ასეთ პირობებში ჩვენთვის ძალიან რთული იყო დამოუკიდებლობის შენარჩუნება, მაგრამ ქართველმა ერმა არაერთგზის გამოავლინა გაუტეხელი სული და სწორედ ამის დამსახურებაა, რომ, ურთულესი ისტორიის მიუხედავად, ჩვენ შევძელით ჩვენი დამოუკიდებლობისა და თვითმყოფადობის შენარჩუნება.

ჩვენ დღეს სიამაყით აღვნიშნავთ, რომ საქართველო არის დამოუკიდებელი და სუვერენული, როგორც არასდროს, თუმცა ასევე გვესმის, რომ დამოუკიდებლობისთვის ბრძოლა, დამოუკიდებლობის შენარჩუნება დაკავშირებულია მუდმივ ბრძოლასთან, ეს არის მუდმივი პროცესი. ჩვენ დღესაც ვართ მზად, მთელი შემართებით დავიცვათ ჩვენი დამოუკიდებლობა და ჩვენი სუვერენიტეტი. როდესაც საქმე ეხება ქვეყნის ეროვნული ინტერესების დაცვას, ძალიან მნიშვნელოვანია მეგობრებთან ურთიერთობა და პარტნიორობა. ჩვენ ვამაყობთ იმ ურთიერთობებით, რომელიც არის ჩამოყალიბებული საქართველოსა და იტალიას შორის. ვამაყობთ მეგობრული ურთიერთობებით, რომელიც არის ჩამოყალიბებული ქართველ ხალხსა და იტალიელ ხალხს შორის. ჩვენ ვფიქრობთ, რომ გვაკავშირებს საერთო ღირებულებები“, – განაცხადა ირაკლი კობახიძემ.

ირაკლი კობახიძის განცხადებით, საქართველო ამაყობს იმ მეგობრობით, რომელიც არის ჩამოყალიბებული საქართველოსა და იტალიას შორის.

„ქართველებს გვაქვს განსაკუთრებული დამოკიდებულება იტალიისა და იტალიელი ხალხის მიმართ. ქართველებს გვაქვს რწმენა, რომ ევროპელ ხალხებს შორის ყველაზე მეტად ვგავართ იტალიელებს და ეს არის ჩვენი განსაკუთრებული სიამაყის საგანი. ჩვენ აღგვაფრთოვანებს ყველაფერი, რაც დაკავშირებულია იტალიასთან, ეს არის უნიკალური იტალიური კულტურა, უნიკალური ისტორია, სპორტი, სამზარეულო, დაკავშირებული ამ ძალიან საინტერესო და ულამაზეს ქვეყანასთან.

რაც შეეხება მთავარ თემას, მილანი არის განსაკუთრებულ ემოციებთან დაკავშირებული ერთი კონკრეტული მიზეზის გამო – ბატონი კახა კალაძე, თბილისის მერი წარმოადგენდა ჩვენს ქვეყანას ამ ქალაქში. წლების განმავლობაში, ის სიამაყით იცავდა ჩვენი ქვეყნის ღირსებას ამ ქალაქში და სწორედ ამ ქალაქში მოუტანა მან ჩვენს ქვეყანას ძალიან ბევრი გამარჯვება.

ჩვენ ვამაყობთ იმ მეგობრობით, რომელიც არის ჩამოყალიბებული საქართველოსა და იტალიას შორის. ჩვენი მჭიდრო ურთიერთობების ერთ-ერთი გამოხატულება არის ის, რომ ქალაქ მილანში გაიხსნა გენერალური საკონსულო, რომელიც ჩვენ დღეს დავათვალიერეთ. ეს არის კიდევ ერთი აქტი, რომელიც ხელს შეუწყობს ჩვენს ქვეყნებს შორის ურთიერთობების კიდევ უფრო მეტად გაღრმავებას. საკმაოდ ფართოდ არის წარმოდგენილი იტალიაში, მათ შორის იტალიის ჩრდილოეთ ნაწილში ქართული დიასპორა და, რა თქმა უნდა, ეს ყველაფერი დამატებით უწყობს ხელს ჩვენს ქვეყნებს შორის პარტნიორობის განვითარებას.

ჩვენ მომავალშიც გავაკეთებთ ყველაფერს, რათა კიდევ უფრო მეტად გაღრმავდეს მეგობრობა ჩვენს ქვეყნებს შორის. დასასრულს მინდა, კიდევ ერთხელ გამოვხატო მადლიერება იტალიის მიმართ, იტალიელი ხალხის მიმართ იმ მრავალწლიანი მეგობრობისთვის, რომელსაც ყოველთვის ვგრძნობდით ჩვენ თქვენგან. კიდევ ერთხელ მადლობა, მინდა, გადაგიხადოთ თითოეულ თქვენგანს მობრძანებისთვის. გაუმარჯოს იტალიას, გაუმარჯოს საქართველოს!“ – აღნიშნა ირაკლი კობახიძემ.

შარშან, საანგარიშო პერიოდში როცა იყო დეპუტატების, მინისტრების საკუთრების უფლების და მიმოსვლის თავისუფლების მასობრივი დარღვევები, თქვენ მოუწოდეთ ვინმეს რამისკენ, რომ ეს არ ვარგა? რაც უნდა გირჩიონ ლომჯარიას კადრებმა, როგორმე დაიჯერეთ, რომ საქართველოს ტერიტორიაზე მყოფი ნებისმიერი ადამიანის უფლების დარღვევა გეხებათ, ჩვენი არსებობის ნუ გრცხვენიათ, – ასე მიმართა პარლამენტის პლენარულ სხდომაზე საპარლამენტო უმრავლესობის წევრმა, თეა წულუკიანმა საქართველოს სახალხო დამცველ ლევან იოსელიანს, რომელმაც დეპუტატებს სახალხო დამცველის აპარატის 2024 წლის ანგარიში წარუდგინა.

წულუკიანის თქმით, სახალხო დამცველი ხმალამოღებით უნდა იცავდეს განურჩევლად ყველას, ვისი უფლებებიც ირღვევა.

„რაც შეეხება სახელმწიფოს ნაწილს, არ ვიცი, ეტყობა, მე და თქვენ სხვადასხვა ორგანულ კანონს ვკითხულობთ. ორგანული კანონის მეორე მუხლში პირდაპირ გიწერიათ, რომ საქართველოს ტერიტორიაზე და მისი იურისდიქციის ფარგლებში თქვენ გევალებათ, ზედამხედველობა გაუწიოთ ადამიანის უფლებების დაცვას. ეს გევალებათ და ერთმანეთს ეწინააღმდეგება  ეს და თქვენი გამოსვლა. მაგალითს გეტყვით, თქვენ რომ გამოდიხართ და გვეუბნებით, ოჯახში ძალადობის მსხვერპლები არიან მოხუცებიო, იქ ხომ სახელმწიფო არ სცემს მოხუცს, თუ ეს თქვენი საქმე არ არის, ამაზე რატომ ლაპარაკობთ? მაგრამ თქვენი საქმეა. კაცმა კაცი რომ მოკლას ქუჩაში, იქ სახელმწიფო სად არის, ორი მეზობელი თუ იჩხუბებს, იმაზე რატომ ვლაპარაკობთ მაშინ, ქმარმა რომ ცოლი მოკლა, იქ სახელმწიფოს ხომ არ მოუკლავს, რატომ ლაპარაკობთ ამაზე, მაგრამ თქვენი საქმეა და იმიტომ ლაპარაკობთ. თუმცა კერძო პირებმა როცა გაანერვიულეს მარიამ ლაშხი, პატარა ბავშვები, ეს ჩემი საქმე არ არისო. ლიეტუველი რომ ჩამოდის და მარიგებს აქ ჭკუას, ვის მივცე ხმა, ეს რომ ჩემი უფლებების დარღვევაა, მაშინ არ არის ეს თქვენი საქმე? ამიტომ ნუ აირევით, ეს ჩემი რჩევაა. ნუ აირევით. არ ვუტრირებ, თქვენ მანიპულირება გააკეთეთ ფაქტების. არ ვიცი, ნახევარი საათი რაზე მსჯელობდით, მაგრამ ეს იყო ფაქტების მანიპულირება. მოდით, ასე შევთანხმდეთ – ან თუ არ შევთანხმდებით, თქვენივე ავტორიტეტისთვის არის ცუდი – საქართველოს ტერიტორიაზე ყველა ტიპის ადამიანის უფლება გეხებათ თქვენ, მათ შორის საკუთრების უფლების მასობრივი დარღვევებია მომხდარი ჩვენი მოქალაქეების წინააღმდეგ, როდესაც შარშან ზოგიერთ ადამიანს, რომელიც საერთოდ არ არის პოლიტიკაში ჩართული და არიან პოლიტიკოსის ოჯახის წევრები, აუკრძალეს მიმოსვლის უფლება. ეს არის კონსტიტუციური და კონვენციური ადამიანის უფლება. რადგან შენი ქმარი, ცოლი, მეზობელი თუ ვიღაც არის ჩართული „ქართული ოცნების“ მხარეს, იმას გადაადგილების უფლებებს უზღუდავენ. ეს არ არის თქვენი საქმე? თქვენ მაშინ უნდა მოგეწოდებინათ საქართველოს მთავრობისთვის, შეიტანე სტრასბურგის სასამართლოში ბრიტანეთის წინააღმდეგ სახელმწიფოთაშორისი საჩივარიო. ეს არის თქვენი საქმე. ხმალამოღებული უნდა იცავდეთ ყველას განურჩევლად. თქვენ ხმალამოღებით, ყველას განურჩევლად არ იცავთ, რადგან გრცხვენიათ, და ჩვენი არსებობის ნუ გრცხვენიათ. მაშინ მითხარით, რომ არ გრცხვენიათ ჩვენი დაცვა. თქვენ გრცხვენიათ ჩვენი დაცვა. როდესაც შარშან, საანგარიშო პერიოდში იყო საკუთრების უფლების და მიმოსვლის თავისუფლების მასობრივი დარღვევები დეპუტატების, მინისტრების – ახლა ხომ აღარ არის გომელაური მინისტრი, ვიტყვი, დეპუტატების, მათ ოჯახის წევრების საკუთრების უფლებები დაირღვა, აღარაფერს ვამბობ ბიძინა ივანიშვილზე – თქვენ გრცხვენიათ ამაზე ლაპარაკი. მასობრივად დაირღვა საკუთრების უფლებები, ყველანაირი ტიპის, უკანონოდ, ყველანაირი შემოწმების გარეშე, თქვენ მოუწოდეთ ვინმეს რამისკენ, რომ ეს არ ვარგა? არა ალბათ, რადგან დეპუტატია, მინისტრია, მაღალი დონის პოლიტიკოსია, პარტიის თავმჯდომარეა. რაც არ უნდა გირჩიონ ლომჯარიას კადრებმა, თქვენ როგორმე დაიჯერეთ, რომ საქართველოს ტერიტორიაზე მყოფი ნებისმიერი ადამიანის უფლების დარღვევა გეხებათ, განურჩევლად იმისა, ვინ არღვევს ამ უფლებას. როდესაც პოლიციელმა თვალი დაკარგა, თქვენი მოვალეობაა, სახელმწიფოს მოუწოდოთ, რომ სასწრაფოდ გამოიძიოს ეს და ვინც თვალი ამოთხარა, ის სამაგალითოდ დასაჯოს. ეს არის თქვენი უფლებამოსილება და ვალდებულება. ადამიანის უფლებების სამართალი არის ბალანსი და თქვენ ამ ბალანსს ბოლომდე ხართ აცდენილი“, – მიმართა თეა წულუკიანმა საქართველოს სახალხო დამცველს, ლევან იოსელიანს.

ლევან იოსელიანმა თქვა, რომ მე არ მინდა ვიყო ომბუდსმენი, რომელიც პოლიტიკურ შეფასებებს გააკეთებს, ან რომელიმე პოლიტიკური მხარის ინტერესების გამომხატველი იქნება. მე იმედს ვიტოვებ, რომ ეს მისი გულწრფელი პოზიციაა და მთელი მისი საქმიანობის პერიოდში ამ პოზიციას ბოლომდე პრაქტიკული საქმიანობით დაამტკიცებს, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა, ირაკლი ქადაგიშვილმა სახალხო დამცველის ანგარიშზე საუბრისას.

„რაც შეეხება ანგარიშს, ბუნებრივია, რომ ყოველთვის არსებობს ქვეყანაში გარკვეული გამოწვევები ადამიანის უფლებების დაცვის კუთხით. ჩვენ ვითხოვთ, რომ ყველა შემთხვევაში ეს იყოს კონკრეტული ფაქტებით გამყარებული და დაბალანსებული. აქ ეს შეეხო სხვადასხვა ადამიანებზე, მათ შრის პოლიტიკოსებზე, მათი ოჯახის წევრებზე თავდასხმას და ა.შ.

რაც შეეხება საპროტესტო აქციების გარშემო პოლიციის რეაგირებასთან დაკავშირებულ საკითხებს, რა თქმა უნდა არ არსებობს დემოკრატია და თავისუფალი ქვეყანა, სადაც საპროტესტო აქცია არ ტარდება და აქცია თავისი უფლებებით არ სარგებლობს. ბუნებრივია, რომ საპროტესტო აქციების დროს პოლიციას თავისი ფუნქცია გააჩნია და პირველ რიგში ეს არის აქციის უსაფრთხოების დაცვა.

როდესაც ამ დროს პოლიცია ამეტებს თავის უფლებებს და არღვევს ძირითად პრინციპებს, რა თქმა უნდა ეს განსაკუთრებული კრიტიკის ღირსია. როდესაც საპროტესტო აქცია, მიზანმიმართულად, თავის თავში შეიცავს კანონის სრულად უგულებელყოფას, დარღვევას, გამიზნულ შეტევას პოლიციაზე, გამიზნულ შეტევას პარლამენტზე, ანუ რევოლუციური სცენარის რეალიზაციას, რომელიც არამარტო პარლამენტის შენობის დაკავებას ისახავს მიზნად, არამედ ე.წ. სისტემის დემორალიზაციას და ჩამოშლას. ამ შემთხვევაში დამოკიდებულება უნდა იყოს კრიტიკული ყველას მხრიდან“, – აღნიშნა ირაკლი ქადაგიშვილმა.

ჩვენ ღრმად ვართ შოკირებულნი გრაცში მდებარე სკოლაში მომხდარი ტრაგიკული სროლის გამო, – ნათქვამია საქართველოს საგარეო საქმეთა სამინისტროს განცხადებაში.

„ამ რთულ ჯამს ჩვენი ფიქრებით ვართ დაზარალებულებთან, მათი ოჯახის წევრებთან და ავსტრიელ ხალხთან. ჩვენ სოლიდარობას ვუცხადებთ ავსტრიას და სწრაფ და სრულ გამოჯანმრთელებას ვუსურვებთ ყველა დაშავებულს“, – აღნიშნულია განცხადებაში.

ავსტრიის ქალაქი გრაცის სკოლაში სროლას ათი ადამიანი ემსხვერპლა. ამასთან ერთად, სროლის დროს, სულ მცირე, 30 ადამიანი დაშავდა.

ევროკავშირი რუსეთის წინააღმდეგ სანქციების მე-18 პაკეტს ამზადებს, სამიზნეში რუსეთის ენერგეტიკისა და საბანკო სექტორები იქნება ამოღებული. ამის შესახებ ერთობლივ განცხადებას ევროკომისიის პრეზიდენტი, ურსულა ფონ დერ ლაიენი და ევროკავშირის უმაღლესი წარმომადგენელი, კაია კალასი ავრცელებენ.

“რუსეთის მიზანი მშვიდობა არ არის, მისი მიზანია, ძლიერების მმართველობის დაწესება. შესაბამისად, რუსეთზე ზეწოლას ვზრდით, ვინაიდან, ძალა ერთადერთი ენაა, რომელიც რუსეთს ესმის…

ჩვენი მესიჯი ცხადია: ეს ომი უნდა დასრულდეს. ნამდვილი ცეცხლის შეწყვეტა გვჭირდება, რუსეთი მოლაპარაკებების მაგიდასთან სერიოზული წინადადებით უნდა მოვიდეს. ვინაიდან, დღეისთვის ის მშვიდობის მიღწევის სურვილს არ აჩვენებს, რუსეთზე ზეწოლას გავაძლიერებთ, მათ შორის მეტი ძლიერი სანქციებით. შესაბამისად, ძლიერი სანქციების მე-18 პაკეტის წინადადებით გამოვდივართ. სამიზნეში ორ სექტორს ვიღებთ. რუსეთის ენერგეტიკის სექტორს. და რუსეთის საბანკო სექტორს. ვაფართოებთ საექსპორტო აკრძალვებსა და კონტროლს, და ვაძლიერებთ [სანქციების] გვერდის ავლის საწინააღმდეგო ზომებს”, – ნათქვამია განცხადებაში.

წინადადების თანახმად, შემოთავაზებულია “ჩრდილოეთ ნაკადი – 1-სა” და “ჩრდილოეთ ნაკადი – 2-ის” წინააღმდეგ პირველად სატრანზაქციო აკრძალვის შემოღება, რომლის შედეგადაც ევროკავშირის არც ერთ ოპერატორს არ შეეძლება “ჩრდილოეთ ნაკადის” მილებთან დაკავშირებით პირდაპირ ან არაპირდაპირ გარიგებებში ჩართვა.

ასევე შემოთავაზებულია რუსული ნავთობის წინააღმდეგ შემოღებული ზედა ჭერის ბარელისთვის 60 აშშ დოლარიდან 45 აშშ დოლარამდე ჩამოწევა. განცხადების თანახმად, ახლა რუსული ნავთობი ზედა ჭერის დონესთან ძალიან მიახლოებულ ფასებში იყიდება და მისი ჩამოწევა ევროკავშირს შეცვლილ საბაზრო პირობებთან ადაპტირებისა და ზედა ჭერის ეფექტიანობის აღდგენის საშუალებას მისცემს.

საბანკო სექტორთან დაკავშირებით, შეთავაზებულია არსებული SWIFT სისტემის გამოყენების აკრძალვის “სრულ სატრანზაქციო აკრძალვად” გადაქცევა და მისი კიდევ დამატებით 22 რუსულ ბანკზე გავრცელება.

ასევე, წინადადება ეხება ზემოხსენებული სატრანზაქციო აკრძალვის მესამე ქვეყნებში ფინანსურ ოპერატორებზე გავრცელება, რომლებიც რუსეთთან ვაჭრობის დაფინანსებას სანქციებისთვის გვერდის ავლით ახდენენ.

თუ პარლამენტის შენობის უკანა შესასვლელთან ძალადობა ხდება, ეს აძლევს თუ არა პოლიციას უფლებას, დაიწყოს აქციის დაშლა რუსთაველზე? – ჩემი შეფასებით არა! – რატომ უნდა დააკავონ ადამიანი რამდენიმე მოძალადის გამო თავისუფლების მოედანზე და წაიყვანონ წინასწარი დაკავების იზოლატორში? რა კავშირი აქვთ მათ ერთმანეთთან?! – ეს განცხადება პარლამენტის ტრიბუნიდან სახალხო დამცველმა ლევან იოსელიანმა გააკეთა.

იოსელიანმა დღეს ხაზგასმით აღნიშნა, რომ როდესაც აქციის დაშლა ხდება, უნდა შეფასდეს, თუ რამდენად პროპორციულია სახელმწიფოს მხრიდან გამოყენებული ძალა.

„როდესაც ვთქვი, რომ იმის მიუხედავად, რომ არსებობდა აქციის დაშლის ფორმალური საფუძველი, რადგან სახეზე იყო კონკრეტული ჯგუფის ძალადობრივი ქმედება, საუბარია რამდენად პროპორციულად გამოიყენეს ძალა ამ ძალადობრივი ქმედებაზე.

მაგალითად, თუ პარლამენტის შენობის უკანა შესასვლელთან ძალადობა ხდება, ეს აძლევს თუ არა პოლიციას უფლებას დაიწყოს დაშლა რუსთაველზე? – ჩემი შეფასებით არა! – ადამიანებმა, რომლებიც რუსთაველზე დგანან და მშვიდობიან პროტესტს გამოხატავენ, შეიძლება არ იცოდნენ და ხშირად არ იციან, რა ხდება პარლამენტის უკანა შესასვლელთან ან ჭიჭინაძის ქუჩაზე და მათი მშვიდობიანი პროტესტი დაცვას იმსახურებს, ხოლო მოძალადეების ქმედება იმსახურებს შესაბამისი პასუხის გაცემას.

ეს არის ჩემი მიდგომა. თუ თქვენ სხვანაირად ფიქრობთ, უნდა მითხრათ, რატომ უნდა დააკავონ ადამიანი რამდენიმე მოძალადის გამო თავისუფლების მოედანზე და წაიყვანონ წინასწარი დაკავების იზოლატორში? რა კავშირი აქვთ ერთმანეთთან?!

შეიძლება პოლიციისთვის ასეთი ღონისძიების ჩატარება რთულია და ალბათ, ძალიან რთულია, მაგრამ ჩემი ამოცანაა, რომ პოლიციის მიერ აქციების დაშლის სტანდარტი მსოფლიოში საუკეთესო იყოს, სადაც არც ერთ ადამიანს არანაირი საფრთხეზე არ დაემუქრება და არც ერთი თმის ღერი არ ჩამოუვარდება, განსხვავებით ამ აქციებისგან, სადაც უამრავი დაშავებული ადამიანი ვნახეთ“, – განაცხადა ლევან იოსელიანმა პარლამენტის სხდომაზე.

იოსელიანმა სესიაზე ადამიანის უფლებათა მდგომარეობის შესახებ ყოველწლიური ანგარიში წარადგინა.

ბოიკოტზე დისკუსიების ეტაპი ჩვენ უკვე გავლილი გვაქვს. ახლა ჩვენი მთავარი ამოცანაა – ნეიტრალურ, არაპარტიულ კანდიდატებზე მსჯელობა. ახლა ამ ეტაპზე ვართ და უკან დაბრუნებას არ ვაპირებთ, – ამის შესახებ „გახარია საქართველოსთვის“ წევრმა, ანა ბუჩუკურმა განაცხადა.

მისი თქმით, პარტიას „გახარია საქართველოსთვის“ კონკრეტული გეგმა აქვს, რომლის შესახებაც მალე გახდება ცნობილი.

„ჩვენ ეს ეტაპი, არჩევნებში მონაწილეობა არ მონაწილეობასთან დაკავშირებით, უკვე გავლილი გვაქვს. გავიარეთ ეს ეტაპი და უკან დაბრუნებას ნამდვილად არ ვაპირებთ. ახლა ჩვენი გუნდის, პარტია „გახარია საქართველოსთვის“, მთავარი ამოცანაა ნეიტრალური, არაპარტიული, არაპოლიტიკური კანდიდატების ირგვლივ მსჯელობა. ჩვენ ამ ეტაპზე ვართ გადასულები.

ჩვენს გუნდს გვაქვს ჩვენი გეგმა, რომელსაც ძალიან მშვიდად, წყნარად, აუღელვებლად მივუყვებით და ამ გეგმას, როცა დრო მოვა, გაგაცნობთ. დანარჩენი, ვინ რას იტყვის, ერთმანეთს როგორ გალანძღავენ, ჩვენ მიმართ რა ისტერია იქნება, საერთოდ არანაირი მნიშვნელობა არ აქვს“, – განაცხადა ბუჩუკურმა.

ბატონი ზვიადი [ხარაზიშვილი] თავისი საქმის კარგი პროფესიონალია. მე რაც ვიცი, ბატონი ზვიადი კადრების განკარგულებაში გადავიდა და თუ მისი ნება იქნება, მხოლოდ ამ შემთხვევაში წავა შსს-ს ორგანოებიდან. მე თუ სწორი ინფორმაცია მაქვს, თუ თავად არ დაწერა პატაკი და არ დატოვა შსს, ის სხვა პოზიციაზე გადანაცვლდება, – განაცხადა „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ მედიასთან.

ამასთან, ჟურნალისტის კითხვაზე – „ზვიად ხარაზიშვილის შემცვლელი მიხეილ სააკაშვილმა ვახტანგ გორგასლის ორდენით დააჯილდოვა, რა შეგიძლიათ გვითხრათ ამასთან დაკავშირებით?“ – მდინარაძემ ასე უპასუხა:

„თუ ადამიანი მუშაობდა იმ პერიოდში და საჯარო სამსახურში რაღაცა პოზიციას იკავებდა, ეს ნაცობას არ ნიშნავს. გარანტირებულად შემიძლია გითხრათ, რომ 2012 წელს ნაცმოძრაობამ საჯარო სექტორშიც კი პირწმინდად წააგო არჩევნები. ნაცების დროს რომ რაღაც თანამდებობას იკავებდა, იყო გმირი პოლიციელი და თავის სამშობლოს ემსახურებოდა, თქვენ ამ ადამიანებს გინდათ ნაცის იარლიყი მოარგოთ და ეს არ გამოგივათ. მე გაძლევთ გარანტიას, რომ არც ერთი ნაცი არცერთ უწყებაში თანამდებობაზე არ იქნება ძალიან მალე. პიარისთვის სჭირდებოდათ – ამოარჩევდნენ ხოლმე წარმატებულ პოლიციელს, პროკურორს, საჯარო მოხელეს და აჯილდოებდნენ ხოლმე. რადგან პიარისთვის ამ ადამიანების დაჯილდოებას იყენებდნენ, ჩვენ ეს ადამიანები არსად დავნიშნოთ?“, – განაცხადა მდინარაძემ.