Home Blog Page 2

ფუი ეშმაკს! ასეთია როთის განცხადებებზე ჩემი პასუხი – გურამ მაჭარაშვილი

x

ჩვენ მიხაილ როთს არ ვეჯიბრებით, ვინ უფრო მეტად დადის ეკლესიაში – წავიდეს იმ გერმანიაში და სადაც უნდა იქ იაროს! აქ ნუ ჩამოდის და შეურაცხმყოფელ განცხადებებს ნუ აკეთებს! უნდა თავის ეკლესიაში იაროს და რა პირადი ცხოვრებაც სურს, ის აიწყოს, ოღონდ გერმანიაში! – ასე გამოეხმაურა გერმანიის ბუნდესტაგის საგარეო ურთიერთობათა კომიტეტის თავმჯდომარეს უმრავლესობის დეპუტატი გურამ მაჭარაშვილი.

მაჭარაშვილი იმასაც ამბობს, რომ „როთი გახდა ოპოზიციის, რაც ძალიან კარგია“.

„მიხაელ როთი არის ადამიანი, რომელსაც თავისი სამყარო აქვს – რასაც როთი აკეთებს, არის ის, რომ გვიკვალავს გზას, რაც შეიძლება მეტი მხარდამჭერი გვყავდეს 26 ოქტომბერს.

ფუი ეშმაკს! – ასეთია როთის განცხადებებზე ჩემი პასუხი. თუ როთი მიხვდა, რომ ეკლესიაში სიარული კარგია, მაშინ მოინანიოს და თქვას, რომ მის მიერ ქართული ეკლესიისა და ქართველი ახალგაზრდების მიმართ გაკეთებული განცხადებები სწორი არ იყო. თუ ფიქრობს, რომ ქართული მართლმადიდებლური ეკლესია ჩამორჩენილია და ეკლესიაში ახალგაზრდები არ უნდა დადიოდნენ, ეს მისი პრობლემაა.

რითი არ არის საქართველოს მოქალაქე და თანამდებობის პირი საქართველოში – ის შეურაცხმოფელ განცხადებებს არ უნდა ბედავდეს!” – განაცხადა მაჭარაშვილმა.

ავიაკომპანია British Airways ლონდონსა და თბილისს შორის პირდაპირ ფრენებს შეასრულებს

British Airways-თან მოლაპარაკებები წარმატებით დასრულდა – ავიაკომპანია  ლონდონსა და თბილისს შორის პირდაპირ ფრენებს კვირაში 4 სიხშირით შეასრულებს.

საქართველოს მთავრობის კერძოდ, ეკონომიკის სამინისტროს რამდენიმეწლიანი აქტიური მუშაობის შედეგად პირდაპირი ფრენა ბრიტანეთიდან საქართველოს მიმართულებით 2025 წლის ზაფხულის სანავიგაციო სეზონიდან დაიწყება.

აღსანიშნავია, რომ British Airways-ს აქვს ძალიან კარგი კავშირი ამერიკის შეერთებულ შტატებთან. ლონდონსა და თბილისს შორის პირდაპირი ფრენების დაწყებით გაუმჯობესდება დაკავშირებადობა როგორც ბრიტანეთთან, ასევე ამერიკის კონტინეტთანაც, რადგან  დაგეგმილი ფრენების განრიგი მორგებულია ამერიკაში ტრანზიტულ ფრენებზე.

British Airways-ის საქართველოში შემოსვლა ხელს შეუწყობს ბრიტანეთიდან ტურისტული ნაკადების ზრდას. გარდა ამისა, ბრიტანეთი საქართველოს მნიშვნელოვანი სავაჭრო – ეკონომიკური პარტნიორია, ამდენად, პირდაპირი ავიარეისების დანიშვნა ხელს შეუწყობს ეკონომიკის სხვადასხვა სექტორში ჩვენი ქვეყნების დაახლოებას.

British Airways-ი მსოფლიოს 190 მიმარულებით დაფრინავს. ავიაკომპანიას მთავარი ბაზა ლონდონის ჰითროუს აეროპორტში მდებარეობს.

ამ დროისთვის, საქართველოში 60-ზე მეტი ავიაკომპანია საქმიანობს, რომლებიც მსოფლიოს 30-ზე მეტ ქვეყანაში 100-ზე მეტ რეგულარულ რეისს ასრულებენ. ასევე აღსანიშნია, რომ მიმდინარე წლის 6 თვეში, 3 მილიონზე მეტი საერთაშორისო მოგზაური ეწვია  საქართველოს,  საერთაშორისო ტურიზმიდან მიღებულმა შემოსავლებმა რეკორდულ მაჩვენებელს – 1.9 მილიარდ აშშ დოლარს მიაღწია.

ცესკო მოუწოდებს ჩართულ მხარეებს, ნუ შეიყვანენ შეცდომაში ამომრჩევლებს

ცესკო მოუწოდებს ჩართულ მხარეებს, ნუ შეიყვანენ შეცდომაში ამომრჩევლებს, – ცენტრალური საარჩევნო კომისია განცხადებას ავრცელებს.

„2024 წლის 26 ოქტომბრის საპარლამენტო არჩევნებისათვის მზადების პროცესში, საარჩევნო ადმინისტრაციის ერთი-ერთი უმნიშვნელოვანესი მიზანი და მუდმივი საზრუნავი, ამომრჩევლის სწორი ინფორმირებაა, განსაკუთრებით ხმის მიცემის, საარჩევნო ბიულეტენის შევსებისა და ხმის დათვლის წესთან დაკავშირებით. განვლილი პერიოდის მანძილზე, ექვსასი ათასზე მეტმა ამომრჩეველმა, უშუალოდ მიიღო მონაწილეობა, საარჩევნო ტექნოლოგიების საყოველთაო დემონსტრირების მიზნით, საარჩევნო ადმინისტრაციის მიერ შეთავაზებულ სხვადასხვა აქტივობაში, მათ შორის იმიტირებულ კენჭისყრებში. ასევე, ამომრჩეველთა ინფორმირების მიზნით, უწყვეტად მიმდინარეობს ცესკოს საინფორმაციო რგოლების გაშუქება ყველა ხელმისაწვდომი საშუალებით და არაერთი აქტივობის განხორციელება ხმის მიცემის, საარჩევნო ბიულეტენის შევსებისა და ხმის დათვლის წესთან დაკავშირებით, სწორედ იმიტომ, რომ საარჩევნო ტექნოლოგიების მასშტაბური გამოყენების პირობებში, განსაკუთრებით მნიშვნელოვანია, ხმის მიცემის პროცედურების და საარჩევნო ბიულეტენის შევსების წესის ზუსტი ახსნა ამომრჩევლებისთვის და მათი ინფორმირება.

სამწუხაროდ, ზოგიერთი ჩართული მხარე, ამომრჩეველთა ინფორმირების კამპანიისას, მედიასაშუალებებით ავრცელებს ურთიერთსაწინააღმდეგო, არასწორ და კანონთან შეუსაბამო ინფორმაციას საარჩევნო ბიულეტენების შევსების წესის, ხმის მიცემის ფარულობისა და ხმების დათვლის წესთან დაკავშირებით.

ამის დასტურია „TV პირველის” ეთერში, მიმდინარე წლის 5 სექტემბერს, სადამკვირვებლო მისიის „ჩემი ხმა’’ წარმომადგენლის მიერ გაკეთებული განცხადება. კერძოდ, მან პირდაპირ მოუწოდა ამომრჩევლებს, გააფერადონ საარჩევნო სუბიექტის წინ არსებული ერთი წრე, შემდეგ ის გადახაზონ და გააფერადონ სხვა წრე და „დააიმედა“ ამომრჩევლები, რომ ხელით გადათვლისას, საარჩევნო ადმინისტრაცია იძულებული იქნება ასეთი საარჩევნო ბიულეტენები ჩათვალოს ნამდვილად, მიუხედავად იმისა, რომ აპარატი მას ბათილად მიიჩნევს. ამავე კონტექსტში, იმგვარად მოიხსენია ხმის მიცემის კაბინაში საარჩევნო ბიულეტენების ფოტოგადაღების შესაძლებლობა, თითქოს ეს დაშვებული იყოს კანონით.

ასევე, ტელეკომპანია „ფორმულას“ ეთერში მიმდინარე წლის 15 სექტემბერს გავრცელდა ზემოხსენებული ორგანიზაციის იმავე წარმომადგენლის მიერ სხვა განცხადება, რომელიც გარკვეულწილად წინააღმდეგობაშია 5 სექტემბერს გავრცელებულ ინფორმაციასთან, მაგრამ ამავდროულად, კვლავ კანონსაწინააღმდეგო და მანიპულაციურია. იგი შეიძლება აღქმულ იქნას, როგორც მოწოდება საარჩევნო ბიულეტენის, რომელიც სახელმწიფო საკუთრებაა, განზრახ დაზიანებისკენ. ამან კი, შეიძლება გამოიწვიოს ამომრჩევლის ხელოვნური დაყოვნება საარჩევნო უბნებში, რიგები და შესაბამისად, ამომრჩეველთა უკმაყოფილება. ამ შემთხვევაში, განმცხადებელი საუბრობს, რომ ფოტოვიდეოგადაღება არის აკრძალული, მაგრამ შეფასებებში ის მაინც უშვებს ფარული კენჭისყრის კაბინაში ფოტოვიდეოგადაღების შესაძლებლობას.

აშკარაა, რომ საქმე გვაქვს საარჩევნო კანონმდებლობის ელემენტარული მოთხოვნების უცოდინარობასთან ან მიზანმიმართულ დეზინფორმაციასთან, ვინაიდან, ახალი ნორმების თანახმად, იმ უბნის საარჩევნო კომისიას, სადაც ხმის მიცემა ელექტრონული საშუალებებით განხორციელდება, საერთოდ არ გააჩნია უფლებამოსილება იმსჯელოს ე.წ „საეჭვო ბიულეტენებზე“. ხმის მიცემა არის კატეგორიული და ნამდვილია მხოლოდ ის საარჩევნო ბიულეტენი, რომელშიც ამომრჩეველი გააფერადებს მხოლოდ ერთი საარჩევნო სუბიექტის წინ არსებულ წრეს. ამასთან, ხმის მიცემა ფარულია და დაუშვებელია კაბინაში ფოტოვიდეოგადაღება.

ამგვარმა, კანონშეუსაბამო და დეზინფორმაციულმა საინფორმაციო კამპანიამ, შესაძლოა გამოიწვიოს ამომრჩევლის დაბნევა და იმგვარი ნეგატიური შედეგი, რომელმაც, შეიძლება, საფრთხე შეუქმნას არჩევნების მთლიანობას.

მოვუწოდებთ ყველა საერთაშორისო თუ ადგილობრივ სადამკვირვებლო ორგანიზაციას, გაემიჯნონ ასეთი ტიპის ე.წ. საინფორმაციო კამპანიებს, მოახდინონ სათანადო რეაგირება და თავიანთ საჯარო თუ სხვა ტიპის ღონისძიებაზე, სწორედ ისე უზრუნველყონ ამომრჩევლის ინფორმირება, როგორც ეს საარჩევნო კანონმდებლობაშია მოცემული.

საარჩევნო ადმინისტრაცია, როგორც არჩევნების გამართვაზე პასუხისმგებელი ორგანო, იტოვებს უფლებას არ ითანამშრომლოს ან შეწყვიტოს თანამშრომლობა იმ ორგანიზაციებთან, რომლებიც გააგრძელებენ ზემოაღნიშნული ტიპის დეზინფორმირების კამპანიას. ამასთან, პასუხისმგებლობა ასეთი კამპანიის შედეგად ბათილ ან გაფუჭებულ ყველა საარჩევნო ბიულეტენზე, დაეკისრებათ თავად ამ ორგანიზაციებს, მათ წარმომადგენლებსა თუ ინდივიდუალურ პირებს.

როგორც ცნობილია, არჩევნები საერთო საქმეა და მასში ჩართულ ყველა მხარეს აქვს ვალდებულება ზედმიწევნით დაიცვას კანონმდებლობის მოთხოვნები და გადამოწმებული და ზუსტი ინფორმაცია მიაწოდოს ამომრჩეველს. ჩვენ კი, ჩვენი მხრივ, ყველას შევახსენებთ, რომ:

• ხმის მიცემა ფარულია!
• ფოტოვიდეოგადაღება კაბინაში აკრძალულია!
• გააფერადეთ თქვენთვის სასურველი მხოლოდ ერთი სუბიექტის წინ არსებული წრე!“ – აცხადებს ცესკო.

თიბისის მხარდაჭერით სოფელ ნიქოზში ცოცვის ფესტივალი ჩატარდა 

თიბისის მხარდაჭერით, ცხინვალის მოსაზღვრე სოფელში, ნიქოზის მეკლდეურთა საცოც დარბაზში ცოცვის ფესტივალი გაიმართა. აღსანიშნავია, რომ ფესტივალი პირველად ჩატარდა და მასში ჩაერთვნენ, როგორც ნიქოზის თემში მცხოვრებმა ბავშვებმა, ისე თბილისის და დაბა ბედიანის სპორტსმენებმა.

ფესტივალში მონაწილეობა მიიღო 50-მდე მოზარდმა. ღონისძიების ბოლოს სამ ასაკობრივ კატეგორიაში გამოვლინდნენ გამარჯვებული გოგონები და ბიჭები. Მათ სიგელები და სხვადასხვა ფასიანი პრიზები გადაეცათ.

ფესტივალის ფარგლებში, სხვადასხვა ორგანიზაციებისა თუ კომპანიების ჩართულობით, ნიქოზის საცოც დარბაზში, მოეწყო ახალი საცოცი კედლები და შეძენილ იქნა სავარჯიშო ინვენტარი. დარბაზში გაუმჯობესდა სავარჯიშო პირობების რის შედეგადაც, 2 წლიანი პაუზის შემდეგ, განახლდა ვარჯიშები.

აღსანიშნავია, რომ ნიქოზის მეკლდეურთა კლუბი, ერთადერთი სპორტული აქტივობაა ნიქოზის თემში, სწორედ ამიტომ მეტად მნიშვნელოვანია, მსგავსი ღონისძიებების მხარდაჭერა და სათანადო სავარჯიშო პირობების შექმნა, ნიქოზის თემში მცხოვრები ახალგაზრდებისთვის.

თიბისისთვის, ახალი თაობის მხარდაჭერა, მათ განვითარებაზე ზრუნვა და წახალისება, 30 წელზე მეტია, ერთ-ერთი ყველაზე მნიშვნელოვანი მიმართულებაა. მსგავსი პროექტების მხარდაჭერით, თიბისი ცდილობს წაახალისოს, განავითაროს და მხარი დაუჭიროს ახალ თაობას მათ წამოწყებებში.

(R)

“რუსეთი თუ ევროკავშირი?- საქართველო საბედისწერო გამოცდის მოლოდინში”-Deutsche Welle

„საქართველოში 26 ოქტომბერს პარლამენტის არჩევნები ჩატარდება, რომლის დროსაც მოსახლეობა საბედისწერო გადაწყვეტილებას მიიღებს: რომელი მიმართულებით უნდა წავიდეს ქვეყანა – ევროკავშირისაკენ თუ რუსეთისაკენ“, – ნათქვამია გერმანული სამაუწყებლო კომპანიის „დოიჩე ველეს“ (Deutsche Welle) მიერ გამოქვეყნებულ სტატიაში სათაურით: “რუსეთი თუ ევროკავშირი? საქართველო საბედისწერო გამოცდის მოლოდინში” (ავტორი – ქრისტიან ტრიპე).

გთავაზობთ პუბლიკაციას შემოკლებით:

საქართველოში შეიძლება დიქტატურა დამყარდეს, რომლის შედეგი ის იქნება, რომ სამხრეთკავკასიური სახელმწიფო ევროკავშირის წევრი ვერ გახდება – კანდიდატის სტატუსის მიუხედავად. ქვეყნის მთავრობა ყველაფერს აკეთებს დასავლეთისაგან დისტანცირებისათვის – ამჟამინდელი პარლამენტი, რომლის შემადგენლობაში ძირითადად მმართველი პარტიის „ქართული ოცნების“ დეპუტატები ჭარბობენ, ზედიზედ იღებს ანტიდემოკრატიულ კანონებს, რომლებსაც ოპოზიცია „რუსული კანონების ასლს“ უწოდებს. ოპოზიცია ამით მოსახლეობას შთააგონებს, რომ საქართველო თავისი პოლიტიკით რუსეთს ემსგავსება, რომელსაც კრემლი ავტორიტარული მეთოდებით მართავს.
რადიკალური საარჩევნო კამპანიის ფონზე „ქართული ოცნება“ „ცეცხლზე ნავთს ასხამს“ და აცხადებს, რომ არჩევნების შემდეგ ოპოზიციური პარტიების ნაწილი აიკრძალება. მთავრობა მოსახლეობას არწმუნებს, რომ არსებობს „გლობალური ომის პარტია“, რომელსაც რუსეთთან ომში საქართველოს ჩათრევა სურს და ეს ყველაფერი დასავლეთის ეგიდით ხორციელდება. დამკვირვებლები თვლიან, რომ ქვეყნის მთავრობა აშკარად ცდილობს დასავლეთს გაემიჯნოს და რუსეთს დაუახლოვდეს, ანუ უარი თქვას ნატოსა და ევროკავშირში ინტეგრირებაზე.

ქართული ოპოზიცია ძირითადად ხუთი პარტიით არის წარმოდგენილი – მეტ-ნაკლებად ლიბერალური, კონსერვატიული და სოციალ-დემოკრატიული მიმართულებების მქონე ორგანიზაციების სახით. მათ პროევროპული კურსი აერთიანებთ და ერთმანეთთან გარკვეული კონკურენციის მიუხედავად, მკაფიოდ გამოდიან ვლადიმერ პუტინის რეჟიმის წინააღმდეგ. ამას წინათ მათ ივალდებულეს, რომ საარჩევნო კამპანიის დროს მტრობა შეწყვიტონ და ერთად გამოვიდნენ „ქართული ოცნების“ ავტოკრატიული, ანტიევროპული პოლიტიკის წინააღმდეგ.
საქართველოს საგარეო პოლიტიკური კურსის ცვლილებაში პასუხისმგებელია ბიძინა ივანიშვილი – მილიარდერი, რომელმაც თავისი ცხოვრების მნიშვნელოვანი ნაწილი რუსეთში გაატარა და იქ გამდიდრდა. მან დააარსა „ქართული ოცნება“, რომელმაც 2012 წელს არჩევნებში გაიმარჯვა, მშვიდობიანად დაამხო „ერთიანი ნაციონალური მოძრაობის“ ხელისუფლება, მცირე ხანს იყო პრემიერის პოსტზე და შემდეგ, თუმცა პოლიტიკიდან წასვლა გამოაცხადა, მაინც ჩრდილოვან ლიდერად დარჩა. ამჟამად ბიძინა ივანიშვილი კვლავ აქტიურად მონაწილეობს წინასაარჩევნო კამპანიაში და ანტიდასავლურ იდეებს ქადაგებს – „ვერავინ ვეღარ აიძულებს ქართველ ხალხს ფსევდოლიბერალური ფასეულობებით იცხოვროს და მის ტრადიციებში გარედან ჩაერიოსო“.

მილიარდერი და მისი პარტიის წარმომადგენლები თავს არიდებენ უცხოელ ჟურნალისტებთან შეხვედრებს. თუმცა როგორც „ქართული ოცნების“ ერთ-ერთი მხარდამჭერი, მსხვილი კომპანიის მენეჯერი ინკოგნიტოდ ამბობს, ოლიგარქის ანტიდასავლური განცხადებები „წმინდა წყლის რიტორიკას“ წარმოადგენს, საქართველო ევროპულ გზიდან არ გადაუხვევს და ამ ეტაპზე გაჟღერებული კრიტიკული გამონათქვამები რუსეთთან ბალანსის დაცვას ემსახურება და მეტს არაფერს. ფაქტობრივად, „ქართული ოცნების“ წინასაარჩევნო პლაკატებზე ევროკავშირის დროშაა გამოსახული ასეთი წარწერით: „ევროპისაკენ – მხოლოდ მშვიდობით, ღირსებით და კეთილდღეობით“.
მაგრამ როგორც შოთა უტიაშვილი ამბობს რონდელის ფონდიდან, „ქართული ოცნებას“ ამომრჩევლის მოტყუება სურს და აიძულებს, რომ არჩევანი გააკეთოს არა რუსეთს და ევროკავშირს შორის, არამედ თითქოსდა ომსა და მშვიდობას შორის.

რუსეთი საქართველოს ძლიერ ჩრდილოელ მეზობელს წარმოადგენს. რუსეთის იმპერია საუკუნეების განმავლობაში ბატონობდა კავკასიაში – როგორც მეფე-იმპერატორების დროს, ასევე საბჭოთა ბელადების პერიოდში. რუსეთსა და საქართველოს შორის 2008 წელს ხანმოკლე ომიც მოხდა, რომელშიც თბილისი დამარცხდა, მოსკოვმა კი გავლენა განიმტკიცა ორი სეპარატისტული რეგიონის – აფხაზეთისა და „სამხრეთ ოსეთის“ გაკონტროლების გზით, რომლებიც კრემლმა თვალთმაქცურად აღიარა დამოუკიდებელ ქვეყნებად. ორი რეგიონის დაკარგვა ქართველებისათვის დიდ ტრავმას წარმოადგენს. როგორც 2020 წელს კარნეგის ფონდის ეგიდით ჩატარებულმა გამოკითხვამ აჩვენა, ქართველთა 78%-ისათვის ტერიტორიული მთლიანობის აღდგენა უფრო მნიშვნელოვანია, ვიდრე ნატოში და ევროკავშირში გაწევრიანება. მხოლოდ 13% თვლის, რომ პრიორიტეტი ევროპულ კურსს უნდა მიენიჭოს, ვიდრე აფხაზეთისა და სამხრეთ ოსეთის დაბრუნებას საქართველოს შემადგენლობაში. მმართველი პარტია, როგორც იტყვიან, სწორედ „ამ კლავიატურით“ მანიპულირებს ამომრჩევლების წინაშე.

ისინი, ვინც ამ დღეებში თბილისში ინტერესდება, თუ არჩევნების როგორი შედეგი იქნება ქვეყნისთვის უარესი, სხვადასხვანაირ პასუხს იღებენ: დასავლელი დიპლომატები და დამკვირვებლები დარწმუნებულნი არიან, რომ თუ მმართველი პარტია ხმების ორ მესამედს მოაგროვებს, ეს იქნება დიქტატურის დამყარება კანონიერი საფუძვლით. ქართულ სამოქალაქო საზოგადოებაში მუდმივად ისმის მოდური ფრაზა „მეორე მინსკი“, რაც იმას ნიშნავს, რომ მთავრობა მალე ისეთ პოლიტიკურ რეპრესიებს განახორციელებს, როგორიც რამდენიმე წლის წინ მინსკში, ბელარუსში ხდებოდა.

„ამის საფრთხე მართლაც რეალურია, – ამბობს ნოდარ ხარშილაძე, „ქართული ანალიტიკური ცენტრის“ დამაარსებელი, – „ოცნება“ არჩევნების შედეგებს გააყალბებს, რაც თავის მხრივ საპროტესტო აქციებს გამოიწვევს, განსაკუთრებით ახალგაზრდების მხრიდან, რომელთა დაშინება შეუძლებელია“. თითქმის იგივე პოზიცია აქვს გიორგი მელაშვილსაც – ანალიტიკური ცენტრის “ქართულ-ევროპული ინსტიტუტის“ თანამშრომელს, რომლის თქმით, მმართველ „ქართულ ოცნებას“ ოპოზიციის განადგურება და ავტორიტარული, ერთპარტიული სახელმწიფოს ჩამოყალიბება სურს.

აგვისტოს ბოლოს რუსული დაზვერვის ერთ-ერთმა ხელმძღვანელმა სერგეი ნარიშკინმა ირიბად მიანიშნა ქართველებს, რომ თუ არჩევნებში რუსეთისადმი მეგობრულად განწყობილი „ქართული ოცნება“ არ გაიმარჯვებს, მაშინ შეიძლება სიტუაციაში კრემლი ჩაერიოს. თუმცა თბილისში რუსეთის გაფრთხილებას სერიოზულად არავინ არ აღიქვამს. ყველა თვლის, რომ კრემლის რეაქცია „მხოლოდ თეატრალურია და იარაღის უშედეგო ჟღარუნს ჰგავს“. „აფხაზეთსა და სამხრეთ ოსეთში დისლოცირებული რუსული სამხედრო ბაზები ცარიელია – ისევე როგორც ჩრდილოეთ კავკასიაში არსებული რუსული არმიის ყაზარმები. ყველა ფრონტზეა წასული“, – განმარტავს ექსპერტი შოთა უტიაშვილი. ამჟამად რუსეთი საქართველოში შემოსაჭრელად საკმარის სამხედრო ძალას არ ფლობს.
ეს შეფასება დღეისათვის ერთადერთ რეალურ და პოზიტიურ პროგნოზად ითვლება, თუ რა შეიძლება არ მოხდეს უახლოეს მომავალში, საპარლამენტო არჩევნებამდე. 26 ოქტომბრის შედეგები კი საქართველოს ნამდვილად შეცვლის.

მოამზადა სიმონ კილაძემ

წყარო:

დედოფლისწყაროში 38 წლის კაცის ცხედარი იპოვეს

დედოფლისწყაროში 38 წლის მამაკაცის ცხედარი იპოვეს. ცხედარს სოფელ ქვემო ქედში, ერთ- ერთი ადგილობრივის კუთვნილ ვენახში მიაკვლიეს.

ადგილობრივების ინფორმაციით, გარდაცვლილი მეგობრებთან ერთად, რთველში იმყოფებოდა და სახლში აღარ დაბრუნდა.

ორდღიანი ძებნის შემდეგ, მამაკაცს საკუთარ ავტომობილში, იმ ვენახში მიაგნეს, სადაც მეგობრებთან ერთად იყო.
გამოძიება მომხდარ ფაქტზე სისხლის სამართლის კოდექსის 115- ე მუხლით მიმდინარეობს.

გარდაცვალების რეალურ მიზეზს ექსპერტიზა დაადგენს.

ბორელი მოუწოდებს საქართველოს გააუქმოს კანონი „ოჯახური ღირებულებებისა და არასრულწლოვანთა დაცვის შესახებ“

საგარეო და უსაფრთხოების საკითხებში ევროკავშირის უმაღლესი წარმომადგენელი ჯოზეფ ბორელი აცხადებს, რომ „ოჯახური ღირებულებებისა და არასრულწლოვანთა დაცვის“ შესახებ საკანონმდებლო პაკეტი ძირს გამოუთხრის ადამიანთა ფუნდამენტურ უფლებებს, გაზრდის დისკრიმინაციას.

როგორც ბორელი „ტვიტერის“ გვერდზე წერს, მოუწოდებს საქართველოს, გაიწვიოს ეს კანონმდებლობა.

„საქართველოს პარლამენტმა მიიღო საკანონმდებლო პაკეტი „ოჯახური ღირებულებებისა და არასრულწლოვანთა დაცვის“ შესახებ, რომელიც ძირს გამოუთხრის ადამიანთა ფუნდამენტურ უფლებებს, გაზრდის დისკრიმინაციასა და სტიგმატიზაციას. მოვუწოდებ საქართველოს, გაიწვიოს ეს კანონმდებლობა, რომელსაც ქვეყანა კიდევ უფრო მეტად გადაჰყავს ევროკავშირში ინტეგრაციის გზიდან“, – წერს ჯოზეფ ბორელი.

https://x.com/JosepBorrellF/status/1836303130624999460

მიგრაციის დეპარტამენტის და სასაზღვრო პოლიციის თანამშრომლებმა საქართველოში სამართლებრივი საფუძვლის გარეშე მყოფი უცხო ქვეყნის 5 მოქალაქე დააკავეს

შინაგან საქმეთა სამინისტროს ცნობით, მიგრაციის დეპარტამენტის და სასაზღვრო პოლიციის თანამშრომლებმა, ერთობლივად ჩატარებული ღონისძიების შედეგად, ნიგერიის ფედერაციული რესპუბლიკის, ერაყის რესპუბლიკის, პაკისტანის ისლამური რესპუბლიკის, თურქეთის რესპუბლიკისა და ეგვიპტის არაბთა რესპუბლიკის, ჯამში, 5 მოქალაქე დააკავეს.

უწყების ცნობით, დადგინდა, რომ დაკავებული პირები “უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის გათვალისწინებით, ქვეყანაში იმყოფებოდნენ სამართლებრივი საფუძვლის გარეშე.

“მათ არ ისარგებლეს გაძევების გადაწყვეტილებით განსაზღვრული ვადებით, რაც ქვეყნის ნებაყოფლობით დატოვებას გულისხმობს, რის შედეგადაც შინაგან საქმეთა სამინისტროს მიგრაციის დეპარტამენტის მიერ მიღებული იქნა გადაწყვეტილება აღნიშნული პირების დაკავების თაობაზე.

გადაწყვეტილების აღსრულების მიზნით, ამ დროისთვის, დაკავებულები მოთავსებული არიან მიგრაციის დეპარტამენტის დროებითი განთავსების ცენტრში შემდგომში მათი წარმოშობის ქვეყანაში დაბრუნების მიზნით”, – აღნიშნულია ინფორმაციაში.

პროგრამის – „ისწავლე და დასაქმდი“ ახალი ეტაპი დღეიდან ამოქმედდა

დედაქალაქის მერიამ პროგრამის – „ისწავლე და დასაქმდი“ ახალი ეტაპი დღეიდან 1-ელი ოქტომბრის ჩათვლით გამოაცხადა, – განაცხადა თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე.

მისივე თქმით, აღნიშნული პროგრამა ხუთი წელია ხორციელდება, რომლის ფარგლებში, ჯამში, 10 000-მდე მოქალაქე გადამზადდა, ხოლო მათი დასაქმების მაჩვენებელი, დაახლოებით, 70 პროცენტია.

„პროგრამა „ისწავლე და დასაქმდი“ ითვალისწინებს 18 წლიდან, თბილისში რეგისტრირებული მოქალაქეების პროფესიულ მომზადება/გადამზადებას შრომის ბაზარზე მოთხოვნად სპეციალობებში, ასევე, კერძო სექტორთან თანამშრომლობით, მათი დასაქმების ხელშეწყობას. მოქალაქეებისთვის აღნიშნულ კურსებზე სწავლა უფასოა“, – განაცხადა კახა კალაძემ.

თბილისის მერის თქმით, ამ ეტაპზე, მომზადება/გადამზადებას 1 000-მდე მოქალაქე გაივლის.

„პროგრამის ფარგლებში, მოქალაქეების მომზადება/გადამზადება განხორციელდება 60-მდე სპეციალობაში, მშენებლობის, ინჟინერიის, ინფორმაციული ტექნოლოგიების, კვების, ტურიზმის, მომსახურების, დიზაინის, ტრანსპორტის, ვეტერინარიის, ჯანდაცვისა და ფინანსების სფეროში“, – აღნიშნა კახა კალაძემ.

მისივე განმარტებით, კურსების ხანგრძლივობა არის ერთიდან შვიდ თვემდე და სასწავლო პროცესი მოიცავს, როგორც თეორიულ, ისე პრაქტიკულ მეცადინეობებს, ონლაინ და ადგილზე დასწრებით.

„მიმდინარე კონკურსის ფარგლებში, პროგრამას დაემატება 11 ახალი მიმართულება, მათ შორის მზის ფოტოელექტრული და თერმული სისტემების მონტაჟის შესწავლა, პერსონალური მონაცემების დაცვის ოფიცერი, სამშენებლო სამართალი, სახელმწიფო შესყიდვები, ფიტნეს ინსტრუქტორის, ჭაბურღილის ბურღვის შესწავლა, ვიდეო-მონტაჟი, ხელოვნური ინტელექტის პრაქტიკული ინსტრუმენტები, ექსელი, საინჟინრო კომპიუტერულ გრაფიკულ პროგრამებში მუშაობა – ArcGiz და ArcCad, ტიხრული მინანქარი“, – განაცხადა კახა კალაძემ.

პროგრამა „ისწავლე და დასაქმდი“ განხორციელდება შემდეგ კოლეჯებში: „გლდანის პროფესიული მომზადების ცენტრი“; კოლეჯი „სპექტრი”; პროფესიული კოლეჯი „იკაროსი”; კოლეჯი „მერმისი“; „სქილვილ ედუქეიშენ“; „საქართველოს ტექნიკური უნივერსიტეტი“; „პროჯექტ ფოლი პო/Project Folie Po“; „ედუსითი გეო“; „ფანტასმაგორია“; „გირის სპორტის, მას-რესლინგის, ბაგირის გადაწევისა და ქროსფიტის (ძალისმიერი ფიტნესის) თბილისის ფედერაცია; „სქილ ლაბი“.

კონფლიქტის დასრულებისთვის აუცილებელი პირობა-რამაზ ქართველიშვილი

რუსეთის პრეზიდენტ პუტინს თვალებში ჩავხედე და გულწრფელად ვუთხარი, რომ უკრაინის ომი ვერ გადაწყდება ბრძოლის ველზე. პრობლემის გადაწყვეტის ერთადერთი გზა დიპლომატიაა და დიალოგი. ორივე მხარეს მოუწევს ერთად დასხდომა და კრიზისიდან გამოსვლის გზების ძიება.
ნარენდრა მოდი, კიევი, 2024 წლის 23 აგვისტო. “ჩვენ ვიმყოფებით პირველი მსოფლიო ომის წინ არსებულ კლასიკურ სიტუაციაში, როცა არც ერთ მხარეს არ აქვს დიდი შესაძლებლობა პოლიტიკური კომპრომისებისთვის და წონასწორობის ნებისმიერ დარღვევას შეუძლია გამოიწვიოს კატასტროფული შედეგები.”

ჰენრი კისინჯერი, The Economist, 2023 წლის 17 მაისი. ცალმხრივი კომპრომისის ორმხრივი მოლოდინი და… „სასიცოცხლო“ ინტერესთა ბალანსის რღვევის პროცესი LIVE-რეჟიმში – სერიიდან „ორი მსოფლიო ომის შეუთვისებელი გაკვეთილები, ანუ სიგნალები წარსულიდან“.
ისტორიული გამოცდილება გვიჩვენებს: გეოპოლიტიკურ და „სასიცოცხლო“ ინტერესთა მყიფე ბალანსის დარღვევა ყოველთვის მწვავე სამხედრო-პოლიტიკურ კრიზისებთან და კატაკლიზმებთანაა დაკავშირებული. ორივე მსოფლიო ომის მიზეზი სწორედ ამგვარი წონასწორობის მოშლის მცდელობა გახდა. ორივეჯერ ომი მწვავე კრიზისის ბოლო, უმწვავესი ფაზის დასასრულს გაჩაღდა, როცა ინტერესთა არამყარი წონასწორობის რღვევის პროცესმა შეუქცევადი ხასიათი მიიღო. აქ აუცილებელია განიმარტოს-ორ მსოფლიო ომამდე არსებულმა კრიზისებმა ჩასახვის, მომწიფების, განვითარების(მწვავე) და „დასრულების“(უმწვავესი) სტადიები გაიარა. ორივე შემთხვევაში, ინტერესთა არამყარი ბალანსის ფორმირებამდე, წონასწორობის მსხვრევის პოტენციალი კრიზისის ჩასახვის ეტაპზე ჩაიდო(1871 წელს გერმანიის მიერ საფრანგეთის ელზას-ლორენის ოკუპაცია და 1919 წელს ვერსალის სისტემის შექმნა). შედარებით უფრო მყარი ბალანსი შექმნა 1945 წლის იალტა-პოტსდამმა, რომელმაც საბჭოთა კავშირის დაშლამდე იარსება. წონასწორობის ეროზიის პროცესი სწორედ 1991 წლის 25 დეკემბერს იღებს სათავეს, რომელმაც ახლანდელ მწვავე კრიზისამდე მიიყვანა მსოფლიო.
ამჟამად ჩვენ LIVE-რეჟიმში ეგზისტენციალურ ინტერესთა მყიფე ბალანსის საფუძველში მორღვევის ორ პარალელურ პროცესს ვადევნებთ თვალს. პირველი- აზიის აღმოსავლეთში, ტაივანის ირგვლივ აშშ-ჩინეთის დაპირისპირებაა. ის საკმაოდ დუნედ მიმდინარეობს და მისი მწვავე ფაზაში გადასვლა მხოლოდ დროის საკითხია. მეორე -უკრაინის კონფლიქტის გარშემო, ნატო-რუსეთის დაპირისპირება აგერ აქ, ევროპაში ვითარდება. ეს უკვე ძალზე შორს წასული მწვავე პროცესია უმწვავეს, „დამამთავრებელ“ ფაზაში შესვლის რეალური პერსპექტივით.
ვითარების მთელი ტრაგიზმი ისაა, რომ არც უკრაინის, არც ტაივანის ირგვლივ დაპირისპირებულ მხარეებს „არ აქვთ მეტი შესაძლებლობა პოლიტიკური დათმობებისთვის“.
ახლანდელ მოვლენებს გონების თვალით პირველი მსოფლიო ომის წინ არსებულ სიტუაციაში გადავყავართ. ვავლებთ პარალელებს და მართლაც გამაოგნებელ მსგავსებებს და დამთხვევებს ვპოულობთ.


ისტორიული ფაქტია-პირველი მსოფლიო ომი გერმანიის და ავსტრია-უნგრეთის იმპერიების პირველმა პირებმა, კაიზერმა ვილჰელმ მეორემ და იმპერატორმა ფრანც იოსებმა გააჩაღეს. ივლისის კრიზისის ბოლო ეტაპზე მათ რუსეთის იმპერატორი ნიკოლოზ მეორე შეუერთდა. თითოეულს საკუთარი იმპერიის სასიცოცხლო ინტერესები ამოძრავებდა.
ფრანც იოსები თვლიდა, რომ სარაევოში მისი „საცოდავი ბიძაშვილის“ საზარელი მკვლელობა პირდაპირი შედეგი იყო რუსი და სერბი პანსლავისტების აგიტაციისა, რომელთაც მიზნად ჰქონდათ დასახული მისი იმპერიის და სამთა კავშირის(გერმანია, ავსტრია-უნგრეთი, იტალია) დასუსტება. „ევროპის მონარქების სამშვიდობო პოლიტიკა საფრთხეში იქნება, სანამ ბელგრადში დანაშაულებრივი აგიტაციის ეს კერა არსებობს“-წერდა 4 ივლისს ფრანც იოსები თავის გემანელ კოლეგას.
კაიზერის გერმანიაში სლავები ადგილობრივ ელიტასაც ჭირივით სძულდა. გენერალური შტაბის უფროსი მოლტკე გენერლებთან შეხვედრებისას სერბებს „დამნაშავე ერად“ მოიხსენიებდა. სლავების მიმართ სიძულვილს თავად ვილჰელმიც ვერ მალავდა კულუარულ საუბრებში.
კაიზერს მიაჩნდა, რომ რუსეთი და მისი მოკავშირე სერბეთი, ინგლისის და საფრანგეთის კოლონიურ იმპერიებთან ერთად, მთავარი დაბრკოლებები იყვნენ გერმანიის „ეგზისტენციალური“ მიზნის-გლობალური ჰეგემონიის დამყარების-გზაზე. მაგრამ ჯერ რუსეთის დაჩოქებას ჰქონდა ვილჰელმისთვის „სასიცოცხლო“ მნიშვნელობა. მხოლოდ ყოველივე ეს უნდა განეხორციელებინა დიდი ომის გარეშე-„გლადიატორის დიდება უბრძოლველად“.
ნიკოლოზ მეორე სერბეთს ავსტრია-უნგრეთის აგრესიის წინაშე ბედის ანაბარა ვერ დატოვებდა, იმპერატორი გრძნობდა, რომ წინააღმდეგ შემთხვევაში ახალ რევოლუციას მიიღებდა, რომელსაც ის ვერ გაუძლებდა და შიდა კრიზისით მოცული მისი თვალუწვდენელი იმპერია ხუხულასავით დაიშლებოდა.
1914 წლის ივლისის კრიზისის ბოლო, უმწვავესი ეტაპის დასაწყისისთვის ნათლად გამოიკვეთა ტენდენცია: დაპირისპირებულ მხარეთაგან თითოეული ესკალაციის გზით აპირებდა მოძრაობას, არც ერთი მათგანი უკანდახევაზე არც კი ფიქრობდა- დათმობა დამარცხების ტოლფასი იყო. დიდი ომი არავის უნდოდა, მაგრამ 5 ივლისს დაწყებული კრიზისის ინერცია ყველას სწორედ იქით, კატასტროფისკენ მიაქანებდა. 26 ივლისს, როცა ავსტრია-უნგრეთმა მის მიერ სერბეთისთვის წაყენებული ულტიმატუმის ათივე პუნქტის შესრულება კატეგორიულად მოითხოვა (ბელგრადმა მხოლოდ ერთი, არცთუ დიდად მნიშვნელოვანი, პუნქტი არ მიიღო), უკვე ცხადი გახდა, რომ ვენა მხოლოდ საბაბს ეძებდა ომის დასაწყებად. კაიზერის მხრიდან თავისი მოკავშირის დაშოშმინების მცდელობა უშედეგო აღმოჩნდა.
არაკონტროლირებადი ესკალაცია ღვარცოფივით მოვარდა და რამდენიმე დღის განმავლობაში ევროპის მთელი პოლიტიკურ-დიპლომატიური ლანდშაფტი ძირფესვიანად წალეკა. უმწვავესი კრიზისის ბოლო დღეების მოვლენების უმოკლესი ქრონიკა ნათლად წარმოაჩენს ვითარების ტრაგიკულობას.
29 ივლისი.ავსტრიელების არტილერია ბომბავს ბელგრადს. ამავე დღეს რუსეთს თავისი ჯარი ავსტრიის საზღვარზე მზადყოფნაში მოჰყავს.
30 ივლისი. ავსტრია-უნგრეთი იწყებს არმიაში რეზერვისტთა გაწვევას. რუსეთი მყისვე აცხადებს მობილიზაციას.
31 ივლისი.გერმანია ულტიმატუმს უყენებს რუსეთს-უახლოესი 12 საათის განმავლობაში გააუქმოს მობილიზაცია და მკაფიოდ განმარტოს, რა მიზანს ისახავს მისი ეს ქმედება(ბერლინი პეტერბურგისგან ცალმხრივ კომპრომისს ელოდება-რ.ქ.)
1 აგვისტო-ნაშუადღევს ულტიმატუმის ვადა ამოიწურა. პეტერბურგისგან პასუხი არ ჩანს-ეს არაორაზროვანი მინიშნებაა: რუსეთი დათმობას არ აპირებს და კომპრომისს გერმანიისგან მოითხოვს. კაიზერი თავის პოზიციაზე ისევ მტკიცედ დგას. ერთი საათის შემდეგ გერმანიის ელჩი პურტალესი ბერლინიდან იღებს ინსტრუქციას: თუ პეტერბურგი გააგრძელებს დუმილის პოლიტიკას, 17 საათზე რუსეთს ომი გამოუცხადოს. თავის მხრივ ელჩი კიდევ 2 საათს აძლევს მოსაფიქრებლად პეტერბურგს და მხოლოდ 19 საათზე ოფიციალურად ამცნობს მას ბერლინის გადაწყვეტილიბას ომის გამოცხადების თაობაზე. თავად იმპერატორი დათქმულ დროს, საღამოს 5 საათზე ხელს აწერს 2 მილიონი გერმანელის შეიარაღებულ ძალებში გაწვევის ბრძანებულებას და შესასრულებლად მას გენერალური შტაბის უფროსს მოლტკეს გადასცემს.ცოტა ხნის შემდეგ შტაბისკენ ავტომანქანით მიმავალ გენერალს მალემსრბოლი, ვილჰელმის თხოვნით, გზიდან უკან მოაბრუნებს. კაიზერის სამუშაო კაბინეტში შესულ მოლტკეს დახვდა სურათი, რომელმაც ის კინაღამ აატირა. იმპერატორი სასოწარკვეთილებას მოეცვა. ჩანდა: მან ახლაღა გააცნობიერა, რომ საკუთარი არასწორი გათვლების გამო ომის გამჩაღებელი ხდებოდა, დიდი ომის, რომელსაც ის მუდამ ასე გაურბოდა (სიგნალი წარსულიდან 24 ).
დღის ბოლოს რეზერვისტთა მობილიზაცია გამოაცხადა პარიზმა. დიდ ომში უკანასკნელი ლონდონი ჩაერთო. ეს 4 აგვისტოს მოხდა, მას შემდეგ, რაც ბრიტანეთის პირველმა დიპლომატმა გრეიმ დიდწილად პაციფისტურად განწყობილი ინგლისური ელიტის წინააღმდეგობა მათი დიდი წინამორბედის უილიამ გლადსტონის დანაბარების შეხსენებით გატეხა-ინგლისის წმინდათაწმინდა ვალია არ დაუშვას ევროპაში ნებისმიერი სახელმწიფოს ჰეგემონია.
უკრაინის კონფლიქტის ირგვლივ დღესდღეობით არსებული დაპირისპირება ტყუპისცალივით ჰგავს 1914 წლის ივლისის მიწურულს ევროპაში შექმნილ სიტუაციას, საუკუნის წინანდელი მოვლენების განვითარების ლოგიკა, ციკლური ალგორითმი, ჩვენს სინამდვილეში თითქმის ერთი ერთში მეორდება. როგორც მაშინ, დღესაც დაპირისპირებულ მხარეთა მიზნები, ეგზისტენციალური ინტერესები, კრიზისის დასრულებისთვის აუცილებელი პირობების ხედვა ერთმანეთისგან დიამეტრალურად განსხვავებულია.


დაპირისპირებულ მხარეთა მიზნები
რუსეთი: უკრაინის ნეიტრალური სტატუსი, დემილიტარიზაცია, დენაციფიკაცია. ამით – მინიმუმ თავისი უსაფრთხოების უზრუნველყოფა, მაქსიმუმ-გლობალური უსაფრთხოების ახალი სისტემის შექმნა.
აშშ და ნატო: ჩრდილოატლანტიკურ ალიანსში უკრაინის გაწევრიანების პროცესის შეუქცევადობა, რუსეთის სტრატეგიული დამარცხება და, როგორც შედეგი, ვაშინგტონსა და დანარჩენ მსოფლიოს შორის ვერტიკალური ურთიერთობების განმტკიცება.


ეგზისტენციალური ინტერესები
მოსკოვი: უკრაინის ბრძოლის ველზე კოლექტიურ დასავლეთთან სტრატეგიული დამარცხება რუსეთის სახელმწიფოებრიობის შეწყვეტა იქნება. ამიტომ-ომი ყველა დასახული მიზნის განხორციელებამდე{პუტინი, 2024 წლის 8 ივნისი).
ნატო: უკრაინის კონფლიქტში რუსეთის გამარჯვება არა მარტო უკრაინის დამარცხება იქნება, არამედ ნატოსიც, ამიტომ „ეს არ უნდა დავუშვათ“(სტოლტენბერგი, 2022 წლის 11 ოქტომბერი)


კონფლიქტის დასრულებისთვის აუცილებელი პირობა
რუსეთი: კოლექტიური დასავლეთის მიერ უკრაინისთვის სამხედრო დახმარების შეწყვეტა.
კოლექტიური დასავლეთი: რუსეთის მიერ დაკავებული უკრაინული ტერიტორიების დეოკუპაცია. აქ რაიმე კომპრომისის გამოძებნა პრაქტიკულად გამორიცხულია ისევე, როგორც საუკუნეზე მეტი ხნის წინათ, დღესაც ურთიერთდაპირისპირებული ძალები ცალმხრივი კომპრომისის ორმხრივი ამაო მოლოდინის რეჟიმში იმყოფებიან. იმ დროის დაძაბულობის განმუხტვის ფორმულამ „ესკალაციის გზით დეესკალაციისკენ“ არ იმუშავა და რეალურად გამოვიდა „ესკალაციის გზით არაკონტროლირებადი ესკალაციისკენ“. მსგავსი ტრენდი ახლა უკვე სახეზეა. ამ ღერძულა ხაზიდან აქეთ-იქით გადახვევები, ზიგზაგები ტაქტიკური ხასიათისაა და მაგისტრალურ მიმართულებას არ ცვლის. ამ მხრივ საგულისხმოა აშშ-ს და დიდი ბრიტანეთის ლიდერების ახლახან გამართული შეხვედრა. მოლოდინი, რომ ბაიდენი და სტარმერი რუსეთის ტერიტორიის სიღრმეში დასავლური შორსმსროლელი რაკეტების გამოყენებასთან დაკავშირებით კიევისთვის ნების დართვის საკითხზე საკუთარ გადაწყვეტილებას გამოაცხადებდნენ, არ გამართლდა. მხარეებმა საჯარო სივრცეში ამ დელიკატურ თემაზე საუბარს დიპლომატიურად თავი აარიდეს და მხოლოდ ის თქვეს, უკრაინის ირგლივ სტრატეგიაზე ვიმსჯელეთო. ვაშინგტონში ამ ნებართვაზე პუტინის მიერ გაჟღერებული რუსეთის გარდაუვალი მწვავე რეაქციის გარდა კიდევ ერთი რამ გაითვალისწინეს: წინ საპრეზიდენტო არჩევნებია და ბაიდენმა მშვენივრად იცის, რომ ამ პერიოდში სიტუაციის ესკალაცია მხოლოდ ანტისაომრად განწყობილი ტრამპის წისქვილზე დაასხამს წყალს.
ვითარება ზედმიწევნით ზუსტად შეაფასეს კრემლში-ახალ მიწაზე მდებარე პოლიგონი ბირთვული იარაღის გამოცდისთვის უკვე სრულ მზადყოფნაშია და იქ მხოლოდ ბრძანებას ელოდებიან.
გაგრძელება იქნება

რამაზ ქართველიშვილი -Ramaz Kartvelishvili©️

თიბისი თელავში მუსიკის საერთაშორისო ფესტივალის მხარდამჭერია

21-29 სექტემბერს თელავში, მუსიკის საერთაშორისო ფესტივალი გაიმართება, რომელსაც  წარმოგიდგენთ კლასიკური მუსიკის ცენტრი საქართველოს კულტურისა და სპორტის სამინისტროს მხარდაჭერით.  ფესტივალის მხარდამჭერები არიან თიბისი და მაგთი.

წელს ფესტივალი ეძღვნება თელავის ფესტივალის დაარსებიდან მე-40 წლისთავს.

მსმენელის წინაშე წარდგებიან ელისო ვირსალაძე, ასევე გამოჩენილი მუსიკოსები – მევიოლინე სვეტლინ რუსევი, პიანისტი ანდრეა ლუკეზინი, ფლეიტისტი არიელ ცუკერმანი, ევგენი მიქელაძის სახელობის საქართველოს ეროვნული სიმფონიური ორკესტრი, თელავის ქალთა კამერული გუნდი – ქორმაისტერი სოლომონ გოგილაშვილი, ოპერის კამერატა – კონცერტმაისტერი ლელა მჭედლიძე.

ევგენი მიქელაძის სახელობის საქართველოს ეროვნულ სიმფონიურ ორკესტრს და ოპერის კამერატას უდირიჟორებს ფესტივალის დიდი ხნის მეგობარი არიელ ცუკერმანი.

საიუბილეო ფესტივალის 22 სექტემბრის ღონისძიებებს თიბისი წარმოგიდგენთ. ფესტივალის ერთ-ერთი მთავარი მიზნობრივი ჯგუფია ახალი თაობა, რომელთათვის ყოველ წელს იმართება სხვადასხვა სახის ღონისძიებები – კლასიკური მუსიკის პოპულარიზაციის, პროფესიული ზრდის, ახალი სახელების გამოვლენის მიზნით.

22 სექტემებერს თელავის ისტორიული მუზეუმის ამფითეატრში 15:00 სთ–ზე გაიმართება ნ. დუმბაძის სახ. მოზარდ მაყურებელთა პროფესიული სახელმწიფო თეატრის თოჯინური ოპერა-სპექტაკლი „სევილიელი დალაქი“ (რეჟ.: ბესო კუპრეიშვილი) და თელავის ვაჟა–ფშაველას სახელობის პროფესიული თეატრის დიდ სცენაზე 18.00 სთ–ზე ახალგაზრდა მუსიკოსების გალა კონცერტი, სადაც მონაწილეობას იღებენ საქართველოს წამყვანი სამუსიკო სასწავლებლების (თბილისი, თელავი, ქუთაისი) ნიჭიერი მოსწავლეები და სტუდენტები.

კონცერტში მონაწილეობას იღებს ცოტნე ზედგენიძე, რომლის ერთ-ერთი პირველი სოლო კონცერტი გაიმართა ფესტივალზე (2018).

(R)

პროექტი-”მადლობა თავდადებისთვის” უმაღლესი სასწავლებლების ჟურნალისტიკის ფაკულტეტის სტუდენტების მონაწილეობით განახლდა

პროექტი-”მადლობა თავდადებისთვის” ქვეყნის უმაღლესი სასწავლებლების ჟურნალისტიკის ფაკულტეტის სტუდენტების მონაწილეობით განახლდა

17 ოქტომბერს, ჩვენს ქვეყანაში აღინიშნება ვეტერანის დღე. ეს დღე ეკუთვნის ყველა თაობის ომისა და თავდაცვის ძალების ვეტერანს, რომელთაც დიდი წვლილი მიუძღვით ჩვენი ქვეყნის ტერიტორიული მთლიანობის, თავისუფლებისა დამოუკიდებლობისათვის ბრძოლაში. ვეტერანებისთვის განსაკუთრებით მნიშვნელოვანია საზოგადოების მხარდაჭერა და მათ მიმართ მადლიერების გამოხატვა იმ ფასდაუდებელი ღვაწლისთვის, რაც ქვეყნისთვის გაიღეს. განსაკუთრებით ღირებულია მომავალი თაობების ჩართულობა მათი ძალისხმევის აღიარებისთვის.

ამ მიზნით, ვეტერანების საქმეთა სახელმწიფო სამსახურმა, შეიმუშავა პროექტი_”მადლობა თავდადებისთვის”, რომელიც გასულ წელს გამოცხადდა და მასში მონაწილეობა მიიღეს საქართველოს უმაღლესი სასწავლებლების ჟურნალისტიკის ფაკულტეტის სტუდენტებმა. პროექტი ითვალისწინებდა სტუდენტის მიერ ვიდეოსიუჟეტის მომზადებას მის მიერ არჩეულ ომის ვეტერანზე_ ვეტერანის მიერ განვლილ გზაზე, მის ბრძოლაზე ქვეყნის ერთიანობისათვის. პროექტის მონაწილეებს, ვეტერანების საქმეთა სახელმწიფო სამსახურის სათავო ოფისში, შეხვდა სამსახურის დირექტორი, გენერალ-მაიორი კობა კობალაძე და პირადად გადასცა სპეციალური საჩუქრები.

პროექტი ”მადლობა თავდადებისთვის” მიმდინარე წლის 18 სექტემბერს კვლავ განახლდება და 10 ოქტომბრამდე გასტანს. იმედს გამოვთქვამთ, რომ აღნიშნულ პროექტში, მონაწილეობას ჩვენი ქვეყნის ყველა უმაღლესი სასწავლებელი მიიღებს;

123...2,131Page 2 of 2,131
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი