ეს არის რუსის ამოცანა, რომ საქართველოს მართლა წაართვას მამული, ენა და სარწმუნოება. თუ ვინმე საფრთხეს უქმნის ჩვენს მამულს, ეს არის რუსეთი, თუ ვინმემ საფრთხე შეუქმნა ენას, ეს არის რუსეთი, თუ ვინმე პრობლემას უქმნის სარწმუნოებას და ჩვენი ეკლესია-მონასტრები გადაუღებია, ესენი არიან რუსები, – ამის შესახებ „ერთიანი ნაციონალური მოძრაობის“ თავმჯდომარემ ლევან ხაბეიშვილმა განაცხადა.

ის პარლამენტთან „უცხოური გავლენების გამჭვირვალობის შესახებ“ კანონპროექტის საწინააღმდეგო აქციაზე იმყოფება, სადაც სამართალდამცავებმა მომიტინგეების დაშლის მიზნით ე.წ. წიწაკის სპრეი გაუშვეს.

დაშავდა მათ შორის, ხაბეიშვილი თუმცა, როგორც თავად აღნიშნა, ეს „არ ღირს მოსაყოლად, რადგან ახალგაზრდებს უფრო მეტი მოხვდათ“.

„პრობლემა შემდეგში მდგომარეობს, ეს კანონი არ უნდა ქართველ ხალხს, არ უნდა არავის, არ უნდათ ჩვენს პარტნიორებს, ამიტომ უნდა გაიტანონ ეს კანონი, წარმოუდგენელია, რაც ხდება, ხელკეტებით, „დუბინკებით“ ამ ბავშვების დაშინება შეუძლებელია.

პუტინის ამოცანა რა არის? – საქართველო არ იქნება ევროკავშირის წევრი, საქართველო მე ვარ, მე უნდა დამელაპარაკოთო. როგორ? აი, უარს ვათქმევინებ ახლა ევროკავშირზე, ეს პროცესი მიდის. ახლა მდინარაძეს და ოხანაშვილს პირი რომ დაუღიათ და ვერ გაუგიათ, ეს კანონი რატომ გამოაქვთ. აი, ამიტომ გამოაქვთ, რუსეთის გზავნილია ცივილიზებულ სამყაროსთან, რომ საქართველო არ გახდება ევროკავშირის წევრი, საქართველოს არ ექნება პორტები, არ ექნება ეკონომიკა, საქართველო ვერ განვითარდება და ვერც შუა დერეფანი ვერ იქნება, რომელიც კასპიის ზღვასთან დააკავშირებს ცივილიზებულ სამყაროს. ეს არის რუსის ამოცანა, რომ საქართველოს მართლა წაართვას მამული, ენა და სარწმუნოება. თუ ვინმე საფრთხეს უქმნის ჩვენს მამულს, ეს არის რუსეთი, თუ ვინმემ საფრთხე შეუქმნა ენას, ეს არის რუსეთი, თუ ვინმე პრობლემას უქმნის სარწმუნოებას და ჩვენი ეკლესია-მონასტრები გადაუღებია, ესენი არიან რუსები და თუ ვინმე მხარში გვიდგას, ეს არის დასავლეთი. მე,როგორც რიგითი ქართველი, ორი შვილი მყავს, აქ ვარ, რადგან საქართველოს მომავალს ვიცავ.

სპეცრაზმით, ხელკეტებით, გაზით, ტყვიებით შეიარაღებულები იცავენ მდინარაძეს, ოხანაშვილს, სოზარ სუბარს, რომ დისკომფორტი არ შეექმნან, ანუ საქართველო ისე უნდა გაყიდონ, რუსული კანონი ისე უნდა მიიღონ, ევროპაზე უარი ისე უნდა თქვან, რომ ხმაც არ უნდა გაიგონ, ეს დავალება აქვთ და მოძალადე პოლიციელები უდგანან სათავეში. ჩემგან ხელმარჯვნივ, პოლიციის ფორმაში გადაცმული -რუხაძე, ეს არის მოძალადე, კორუმპირებული ჩინოვნიკია, დაათვალიერებენ ბავშვებს, წაიყვანენ, 3000 ლარს ჯარიმას დაუწერენ, ცოტას სცემენ, ფიზიკურად გაუსწორდებიან – რუხაძისნაირები. როდინოვსა და მას შორის რა განსხვავებაა? ისინი სხვა რამეს კი არ აკეთებდნენ, რასაც ესენი ახლა აკეთებენ. ეს ბრძოლა ყველასია, ეს არ არის პარტიული საქმე, ეროვნული საქმეა“, – განაცხადა ხაბეიშვილმა.

მამუკა მდინარაძე, ბიძინა, ეს მოგწონთ? გგონია, ეს რომ დაგვმართე, ჩვენს ახალგაზრდებს ამით უკან დაგვხევ? ცოტა აზრზე მოვალ და ისევ იქ დავდგები, – ამის შესახებ ოპოზიციონერმა დეპუტატმა, ანა წითლიძემ პარლამენტთან მიმდინარე აქციაზე განაცხადა მას შემდეგ, რაც ის სამართალდამცავების მხრიდან გამოყენებული ე.წ წიწაკის სპრეით დაშავდა.

წითლიძის თქმით, მშვიდობიანი ახალგაზრდები ხელებაწეული იდგნენ და ცრემლსადენი გაზი და წიწაკის სპრეი გამოიყენეს.

„ნახეთ, რა გააკეთეს. უბრალოდ ვცდილობდი, რომ უკანა მხრიდან დარბევის დროს ახალგაზრდებს წინ დავდგომოდი, რომ მაგის შესაძლებლობა არ მიეცათ, რომ ახალგაზრდებისთვის შეთრევა უნდოდათ. აქ დაგვაცალეს გაზი და წიწაკის სპრეი. მშვიდობიანი ახალგაზრდები ხელებაწეული იდგნენ.

მამუკა მდინარაძე, ბიძინა, ეს მოგწონთ? გგონია, ეს რომ დაგვმართე, ჩვენს ახალგაზრდებს ამით უკან დაგვხევ? ცოტა აზრზე მოვალ და ისევ იქ დავდგები. გგონია, ამით ვინმე შეაშინე? შენ ხარ შეშინებული, იმიტომ, რომ ასე გჭირდება ჩვენი და ამ ახალგაზრდების დაზიანება, რომ შენ პარლამენტიდან გახვიდე. ამ ბავშვებს ეს იმიტომ დაუშინეს, რომ ეს მშიშარა „ქართული ოცნების“ დეპუტატი პარლამენტიდან გასულიყვნენ“, – აღნიშნა წითლიძემ.

ცნობისთვის, ე.წ წიწაკის სპრეის გამოყენების შედეგად პარლამენტის შენობასთან მიმდებარე აქციაზე რამდენიმე მოქალაქე დაშავდა.

მათ პირველად სამედიცინო დახმარებას სასწრაფო სამედიცინო დახმარების ექიმები უწევენ.

მიუხედავად ადგილზე მყოფი პოლიციელების არაერთი მოწოდებისა, აქციის მონაწილეები არ დაემორჩილნენ სამართალდამცველთა კანონიერ მოთხოვნებს – მართლწესრიგის აღდგენის მიზნით, შინაგან საქმეთა სამინისტრომ გამოიყენა კანონით დადგენილი სპეციალური საშუალებები, – ამის შესახებ განცხადებას შინაგან საქმეთა სამინისტრო ავრცელებს.

როგორც შსს-ს მიერ გავრცელებულ განცხადებაშია აღნიშნული, აქციის მონაწილეები სამართალდამცველებს სიტყვიერად და ფიზიკურად დაუპირისპირდნენ, ასევე, მათი მიმართულებით ისროლეს სხვადასხვა საგანი.

„შინაგან საქმეთა სამინისტროს სხვადასხვა დანაყოფის თანამშრომლები, მართლწესრიგის დაცვის მიზნით, მობილიზებულები არიან პარლამენტისა და მთავრობის ადმინისტრაციის შენობების მიმდებარე ტერიტორიაზე.

მიუხედავად ადგილზე მყოფი პოლიციელების არაერთი მოწოდებისა, ასევე, შინაგან საქმეთა სამინისტროს მიერ გავრცელებული ოფიციალური განცხადებისა, რომ გაეთავისუფლებინათ დეპუტატებისა და პარლამენტის აპარატის თანამშრომლებისთვის საკანონმდებლო ორგანოს გამოსასვლელები, აქციის მონაწილეები არ დაემორჩილნენ სამართალდამცველთა კანონიერ მოთხოვნებს.

მართლწესრიგის აღდგენის მიზნით, შინაგან საქმეთა სამინისტრომ გამოიყენა კანონით დადგენილი სპეციალური საშუალებები.

აქციის მონაწილეები სამართალდამცველებს სიტყვიერად და ფიზიკურად დაუპირისპირდნენ, ასევე, მათი მიმართულებით ისროლეს სხვადასხვა საგანი.

კიდევ ერთხელ მოვუწოდებთ, პოლიტიკურ ლიდერებს, აქციის ორგანიზატორებსა და მონაწილეებს, არ გასცდნენ შეკრებისა და მანიფესტაციის კანონით დადგენილ ნორმებს.

კანონდარღვევის თითოეულ ფაქტს შესაბამისი სამართლებრივი რეაგირება მოჰყვება“, – ნათქვამია განცხადებაში.

ვაჟა სირაძეს არ დაუძახოთ პატრულის უფროსი, ის არის ბოქაული იმიტომ, რომ ემსახურება რუსებს, – ამის შესახებ პარტია „ხალხისთვის“ ლიდერმა, ანა დოლიძემ პარლამენტთან მიმდინარე საპროტესტო აქციაზე განაცხადა, სადაც „უცხოური გავლენის გამჭვირვალობის შესახებ“ კანონპროექტს აპროტესტებენ.

მისი განმარტებით, პოლიციამ ისე გამოიყენა ძალა აქციის მონაწილეების წინააღმდეგ, რომ არანაირი გაფრთხილება არ ყოფილა.

„მშვიდობიანი ხალხი რომ დგას, ჯავშანმანქანა, მძიმე შეიარაღება არ უნდა გამოიყვანო. გაფრთხილება არ იყო. რატომ უნდა დაშალონ დემონსტრაცია, თუ ის არ არის ძალადობრივი? ეს არის ჩვენი კონსტიტუცია, ჩვენი ფასეულობა, რითაც აქამდე მოვედით. აქ ვერ გაპარპაშდა ვერცერთი შაჰი. თუ გახდა დემონსტრაცია ძალადობრივი, მაშინ უნდა დაშალონ. უნდათ, რომ არ ორღობეში გაგვატარონ ათასობით ადამიანი. მისაღები გამოცდების უნარებს ვერ ჩააბარებს ის ადამიანი, ვინც ეს დაგეგმა. ვაჟა სირაძეს არ დაუძახოთ პატრულის უფროსი, ის არის ბოქაული იმიტომ, რომ ემსახურება რუსებს. სისტემასთან ერთად ეს ბოქაულობაც უნდა მოვაშოროთ აქედან“,- განაცხადა დოლიძემ.

პარლამენტის უკანა შესასვლელთან პოლიციამ ე.წ. წიწაკის სპრეი კიდევ რამდენჯერმე გამოიყენა. ტერიტორიაზე დაპირისპირება გრძელდება, ვითარება კვლავ არასტაბილურია.სამართალდამცავები, მათ შორის სპეცრაზმი ტერიტორიის აქციის მონაწილეებისგან გაწმენდას ცდილობს.

აქციის მონაწილეები პარლამენტის შენობიდან მთავრობის ადმინისტრაციისკენ მსვლელობით მიემართებიან.

აქციის მონაწილეებს, რომლებიც კანცელარიისკენ გადაადგილდებიან, წინ გიორგი ქადაგიძე და რატი ამაღლობელი მიუძღვებიან.

მანამდე, პარლამენტთან სიტუაცია რამდენჯერმე დაიძაბა. საკანონმდებლო ორგანოსთან სამართალდამცველებსა და აქციის მონაწილეებს, მათ შორის პარტია „ახალის“ ლიდერებს შორის ფიზიკური დაპირისპირება მოხდა. დაპირისპირებისას, სამართალდამცველებმა პარტია „ახალის“ ლიდერებთან ერთად, რამდენიმე ადამიანი ტერიტორიიდან გაიყვანეს.