პარტია „ხალხის ძალის“ წევრი დავით ქართველიშვილი USAID-ის დახურვის ფაქტს სოციალურ ქსელში ეხმიანება.

„USAID ათწლეულების განმავლობაში უბრალოდ „დახმარების სააგენტოს“ კი არა, აშშ-ის გავლენის გლობალური არქიტექტურის ძირითად ელემენტს წარმოადგენდა“, – წერს ანალიტიკოსი და აღნიშნავს, რომ USAID-ის დახურვა არა „რბილის ძალის“ დემონტაჟი, არამედ მისი ტრანსფორმაციაა და ახლა ტრადიციული დიპლომატია მონაცემთა მანიპულირებითა და ციფრულ კონტროლით ჩანაცვლდა, თუმცა შინაარსი იგივე დარჩა.

„აშშ-ის სახელმწიფო მდივანმა, მარკო რუბიომ განაცხადა, რომ აშშ-ის საერთაშორისო განვითარების სააგენტო (USAID) ოფიციალურად იხურება. სტრუქტურა, რომელიც ათწლეულების განმავლობაში „რბილი ძალის“ ინსტრუმენტს წარმოადგენდა, ტრამპის ხელისუფლებაში მოსვლის შემდეგ ლიკვიდაციის პროცესში იყო. აშშ-ის პრეზიდენტმა თავიდანვე დაიწყო საგარეო დახმარების ხარჯების, თითქმის 5 მილიარდი დოლარით შემცირება, მათ შორის, სახელმწიფო დეპარტამენტის, USAID-ისა და რიგი სამშვიდობო მისიების პროგრამების.

USAID ათწლეულების განმავლობაში უბრალოდ „დახმარების სააგენტოს“ კი არა, აშშ-ის გავლენის გლობალური არქიტექტურის ძირითად ელემენტს წარმოადგენდა: არასამთავრობო ორგანიზაციებისთვის გრანტებიდან და მულტიკულტურალიზმის ხელშეწყობიდან დაწყებული, მართული კრიზისების შექმნითა და ტრანსნაციონალური კორპორაციების ინტერესებიდან გამომდინარე, ეკონომიკის „გადატვირთვით“ დამთავრებული.

მაგრამ ინსტრუმენტი გაიცვითა და მოძველდა: მიგრაციული კრიზისისა და რიგ რეგიონში მასშტაბური დესტაბილიზაციის შემდეგ, მისი ეფექტურობა მკვეთრად შემცირდა. თუმცა, ამჟამად საქმე არ ეხება „რბილი ძალის“ იდეის დემონტაჟს, არამედ მისი ფორმის შეცვლას. USAID-ის ზოგიერთი თანამშრომელი უკვე გადავიდა Palantir-ის სახელწოდების მქონე ახალ სტრუქტურებში, ილონ მასკის პროექტებსა და BigTech სექტორის სხვა ორგანიზაციებში.

გლობალური პროცესების მართვა ტრადიციული დიპლომატიიდან მონაცემთა მანიპულირებაზე, ციფრულ კონტროლსა და ხელოვნური ინტელექტის განუსაზღვრელ შესაძლებლობაზე გადადის. USAID-ის დახურვა სოროსის იმპერიის კრიზისთან და ძველი არასამთავრობო ორგანიზაციების ტრანსფორმაციასთან ერთ ჭრილში უნდა განვიხილოთ.

ეს იმ ეპოქის დასასრულია, როდესაც გლობალიზმი ჰუმანიტარული მისიებითა და ლიბერალური ღირებულებებით იყო შენიღბული. ეს ერა მოკვდა და მას ახალი ერა ანაცვლებს: ტექნიკური საინფორმაციო მონაცემების ბანკი, ციფრული კორპორაციები და კერძო პლატფორმები, რომლებიც ახლა პირდაპირ მართავენ საზოგადოებებს. ფორმაა ტრანსფორმირებული, თორემ შინაარსი იგივე რჩება“, – წერს დავით ქართველიშვილი.

ის ჯერ გაექცა თავის თანაგუნდელებს, შემდეგ – თავის ამომრჩეველს. ეს პასუხისმგებლობისგან გაქცეული ადამიანის ქმედება და ნაბიჯებია, რასაც ჩვენ ვხედავთ, – განაცხადა განათლების, მეცნიერებისა და ახალგაზრდულ საქმეთა საპარლამენტო კომიტეტის თავმჯდომარის მოადგილემ, გიორგი სოსიაშვილმა გიორგი გახარიაზე საუბრისას.

მისივე თქმით, გახარიას მიერ გერმანიის ბანკში ანგარიშის გახსნა, გერმანიასთან გარკვეული ურთიერთობის დაჭერა, სამომავლოდ რაღაც გეგმების დალაგებას ნიშნავს.

„ნიშნავს იმას, რომ მას და მის თანაგუნდელებს ამოძრავებთ ერთადერთი წყურვილი, რომ მომავალში მათ ითამაშონ გარკვეული როლი გარე პატრონების ხელში და ჩაერთონ გადატრიალების მცდელობაში. თუმცა, მათი ეს მცდელობა მარცხით დასრულდება, როგორც არა ერთხელ გვიხილავს“, – აღნიშნა სოსიაშვილმა.

არსებული ინფორმაციით, გიორგი გახარიამ გერმანიაში ბინადრობის ნებართვა მიიღო და ბანკში ანგარიშის გახსნასაც ელოდება. გახარიას პარტიაში „ქრონიკის“ შეტყობინებებს არ პასუხობენ, სხვა მედიასაშუალებებთან კი აცხადებენ, რომ მათი ლიდერი სამუშაო ვიზიტითაა წასული.

კარგი  იქნებოდა, ჩერგო „ქოცებში“ შესულიყო, ეს იქნებოდა „ქართული ოცნების“ დაშლის უმოკლესი გზა. ჩერგო პროფესიონალია ამ საქმის, მიდის და შლის, – ამის შესახებ პარტია „გირჩის“ ერთ-ერთმა ლიდერმა, იაგო ხვიჩიამ განაცხადა.

მისივე თქმით, „რვიანი“ არასდროს არსებობდა და ეს პარტიები „ნაციონალური მოძრაობას“ წარმოადგენდა.

„ჩემი აზრით, არანაირი „რვიანი“ არ არსებობს, არც არასდროს არ არსებობდა, ეს ხალხი იყო „ნაცმოძრაობა“. მერე „ნაცმორაობის“ რვა განაყოფი ერთად შეერთდა, ყოფილი „ნაცები“, და ისევ „ნაცურ“ ბოიკოტს აწვებიან, და ამით ისინი ისევ რვა პარტია ხომ არ გახდებიან? ზოგადად, არანაირი რვა პარტია საქართველოში არ არსებობს, ბევრად უფრო მოკრძალებული არჩევანი გვაქვს ამ თვალსაზრისით.

ჩერგოლეიშვილს ახლა ყველა ებრძვის, ფეხი დაუცურდა. მე არ მინდა, მასთან მებრძოლების რიგში აღმოვჩნდე ამ მძიმე ჟამს. ზოგადად, მე ვგულშემატკივრობ, რომ ჩერგო დარჩეს. საერთოდ, კარგი იქნებოდა, რომ ჩერგო „ქოცებში“ შესულიყო, ეს იქნებოდა ალბათ „ქართული ოცნების“ დაშლის უმოკლესი გზა. იგი პროფესიონალია ამ საქმის, მიდის და შლის. თუმცა ასე არ არის მოწყობილი. მხოლოდ „რვიანით“ ვკმაყოფილდებით ამჯერად“, – განაცხადა იაგო ხვიჩიამ.

დიდი ბრიტანეთის საელჩომ ქართული საზოგადოების კითხვები და წუხილები ტრადიციულად უპასუხოდ დატოვა, სანაცვლოდ კი, მორიგი არამეგობრული განცხადება მივიღეთ, – ამის შესახებ პარლამენტის თავმჯდომარე შალვა პაპუაშვილი სოციალურ ქსელში წერს.

პაპუაშვილი საუბრობს საელჩოს დღევანდელ განცხადებაზე, სადაც აღნიშნულია: „შვიდი არასამთავრობო ორგანიზაციისთვის საბანკო ანგარიშების გაყინვა გვაშფოთებს, ეს, შესაძლოა, პოლიტიკურად მოტივირებული იყოს, რომლის მიზანი ამ ორგანიზაციების გაჩუმებაა“.

„საზოგადოებას შევახსენებ, რომ, სულ რამდენიმე კვირის წინ, დიდი ბრიტანეთის საელჩო ცდილობდა ექსტრემისტული დღის წესრიგის მქონე ორგანიზაციებისთვის ფულის მიცემას, კერძოდ, თამარ ჩერგოლეიშვილის პარტიული კედლის გაზეთის, „ტაბულასთვის“ და „ნაციონალური მოძრაობის“ მე-5 ნომრის, გია ჯაფარიძის რადიკალური ორგანიზაციისთვის, „მომავლის აკადემიისთვის“.

ორივე შემთხვევაში, დაფინანსების მცდელობის საბაბი იყო, მათ მიერ, თითქოს, ადგილობრივ არჩევნებთან დაკავშირებით ჟურნალისტური მასალის მომზადება და არჩევნებზე დაკვირვება. ეს მაშინ, როცა ორივე სუბიექტის გაცხადებული მიზანი არჩევნების ჩაშლაა.

რა თქმა უნდა, ამან საზოგადოებაში გააჩინა ლეგიტიმური ეჭვი, რომ საელჩოს მიზანი, შესაძლოა, არა თვითმმართველობის არჩევნების ჩატარებაში ხელის შეწყობა, არამედ არჩევნების საბოტაჟის მიზნის მქონე პირების ფინანსური გაძლიერება ყოფილიყო. მე მაშინ მოვუწოდე საელჩოს, რომ, ამ საკითხზე ეჭვების გასაფანტად, ყოფილიყო სრულად გამჭვირვალე და საზოგადოებისთვის აეხსნა, თუ როგორ აღმოჩნდა, რომ საელჩო პარტიული, რადიკალური ჯგუფების დაფინანსებას ცდილობდა და ასევე გაესაჯაროებინა, თუ ვის აფინანსებდა 2024 წლის არჩევნების პერიოდში.

ტრადიციულად, საელჩომ, ქართული საზოგადოების კითხვები და წუხილები უპასუხოდ დატოვა. სანაცვლოდ კი, ქართველი ხალხის მიმართ, მორიგი არამეგობრული განცხადება მივიღეთ“, – წერს პაპუაშვილი.

შვიდი არასამთავრობო ორგანიზაციისთვის საბანკო ანგარიშების გაყინვა გვაშფოთებს. ეს, შესაძლოა, პოლიტიკურად მოტივირებული იყოს, რომლის მიზანი ამ ორგანიზაციების გაჩუმებაა, – ამის შესახებ საქართველოში ბრიტანეთის საელჩო სოციალურ ქსელში წერს.

როგორც საელჩო აღნიშნავს, მოუწოდებს საქართველოს ხელისუფლებას, გააუქმოს რეპრესიული კანონმდებლობა, შეწყვიტოს თავდასხმა სამოქალაქო საზოგადოებაზე და დაიწყოს დიალოგი ყველა დაინტერესებულ მხარესთან კრიზისიდან გამოსავლის მოსაძებნად.

„დიდი ბრიტანეთი ღრმად შეშფოთებულია, რომ, საქართველოს გენერალური პროკურატურის მოთხოვნით, სავარაუდო საბოტაჟის შესახებ გამოძიების ფარგლებში საბანკო ანგარიშები გაეყინა შვიდ არასამთავრობო ორგანიზაციას. გვაშფოთებს ის ფაქტი, რომ ეს, შესაძლოა, იყოს მათი მხრიდან არა რაიმე უკანონო ქმედებაზე რეაგირება, არამედ პოლიტიკურად მოტივირებული გადაწყვეტილება, რომლის მიზანია აღნიშნული არასამთავრობო ორგანიზაციების გაჩუმება.

აღნიშნული არასამთავრობო ორგანიზაციების საქმიანობა მოიცავს თავისუფალი და სამართლიანი არჩევნების ხელშეწყობასა და ინფორმაციის თავისუფლებას, სამართლებრივი დახმარების გაწევას საქართველოს მოქალაქეებისთვის, ქალებისა და ბავშვების, შეზღუდული შესაძლებლობების მქონე პირებისა და ოჯახში ძალადობის მსხვერპლთა მხარდაჭერას. მათი დახურვა ზიანს მიაყენებს საქართველოს მოსახლეობას და კიდევ უფრო შეასუსტებს დემოკრატიული დაცვის მექანიზმების არსებობას და ანგარიშვალდებულებას ქვეყანაში.

ასევე, გვინდა, აღვნიშნოთ ევროპის საბჭოს არასამთავრობო ორგანიზაციების სამართლის ექსპერტთა საბჭოს ბოლო მოსაზრება, სადაც ნათქვამია, რომ ბოლო პერიოდში არასამთავრობო სექტორის შესახებ მიღებული კანონის განხორციელება „მძიმე და გაუმართლებელ ზიანს მიაყენებს საქართველოს სამოქალაქო საზოგადოებას“ და წინააღმდეგობაშია იმ მრავალ ვალდებულებასთან, რომელიც საქართველომ, როგორც ევროპის საბჭოს წევრმა სახელმწიფომ, იკისრა.

ჩვენ მოვუწოდებთ საქართველოს ხელისუფლებას, გააუქმოს რეპრესიული კანონმდებლობა, შეწყვიტოს თავდასხმა სამოქალაქო საზოგადოებაზე და დაიწყოს დიალოგი ყველა დაინტერესებულ მხარესთან ამ კრიზისიდან გამოსავლის მოსაძებნად“, – წერს ბრიტანეთის საელჩო.

ადგილობრივი არჩევნების დამკვირვებლების გლობალური ქსელი (GNDEM) კიდევ ერთხელ გმობს საქართველოს მთავრობის მიერ სამოქალაქო სივრცის დახურვის, ძირითადი თავისუფლებების შეზღუდვისა და მოქალაქე დამკვირვებლების საქმიანობისთვის ძირის გამოთხრის მუდმივ მცდელობებს, – ამის შესახებ აღნიშნულია განცხადებაში, რომელიც GNDEM-ის ვებგვერდზეა გამოქვეყნებული.

„პროკურატურის მოთხოვნით, თბილისის საქალაქო სასამართლოს მოსამართლემ მინიმუმ შვიდი არასამთავრობო ორგანიზაციის საბანკო ანგარიშები გაყინა, მათ შორის GNDEM-ის წევრისა და მოქალაქეთა სადამკვირვებლო ორგანიზაციის, სამართლიანი არჩევნებისა და დემოკრატიის საერთაშორისო საზოგადოების (ISFED). პროკურატურის ქმედებები წარმოადგენს სამოქალაქო საზოგადოების წინააღმდეგ მიმართულ ანგარიშსწორებას საზოგადოებრივი პროტესტის გამო, რომელიც დაიწყო 2024 წლის საპარლამენტო არჩევნების შემდეგ საქართველოს მთავრობის მიერ ევროკავშირში გაწევრიანების მოლაპარაკებების შეჩერების გადაწყვეტილების შემდეგ“, – აღნიშნულია განცხადებაში.

ორგანიზაციაში აცხადებენ, რომ საქართველოს პროკურატურის ქმედებები, ისევე როგორც საქართველოს მთავრობის სხვა ქმედებები, ზღუდავს ლეგიტიმურ საზოგადოებრივ დისკურსს და ძირს უთხრის დამოუკიდებელ სამოქალაქო ორგანიზაციებს, რითაც არღვევს საქართველოს კონსტიტუციის 17-ე და 22-ე მუხლებს, რომლებიც იცავდა მოქალაქეთა უფლებას, გამოთქვან საკუთარი აზრი და ასევე გაერთიანების თავისუფლებას.

GNDEM-ის მტკიცებით, ეს ქმედებები ასევე ეწინააღმდეგება ადამიანის უფლებათა საყოველთაო დეკლარაციის 19-ე და 20-ე მუხლებს და სამოქალაქო და პოლიტიკური უფლებების შესახებ საერთაშორისო კონვენციის (ICCPR) 19-ე და 22-ე მუხლებს, რომლის ხელმომწერი საქართველოცაა.

GNDEM-ი ასევე აღნიშნავს, რომ პროკურატურის ქმედებები ხორციელდება 2025 წლის 4 ოქტომბერს ადგილობრივი თვითმმართველობის არჩევნების წინ და ასევე მას შემდეგ, რაც ISFED-მა გააკეთა საჯარო განცხადებები, რომლებშიც ხაზი გაესვა, საარჩევნო კანონმდებლობაში შეტანილ ცვლილებებს, „რომელიც სარგებლის მომტანია მმართველი პარტიისთვის და რომ საქართველომ ვერ დააკმაყოფილა ვენეციის კომისიის სტანდარტები საარჩევნო საკითხებში კარგი პრაქტიკის შესახებ“.

ორგანიზაციის განცხადებით, ეს მოხდა მას შემდეგ, რაც საქართველოს მთავრობამ გადაწყვიტა, არ მოეწვია ევროპის უსაფრთხოებისა და თანამშრომლობის ორგანიზაციის (ეუთო) და დემოკრატიული ინსტიტუტებისა და ადამიანის უფლებების ოფისი (ოდირი) ადგილობრივი თვითმმართველობის არჩევნებზე დასაკვირვებლად.

„პროკურატურის ქმედება აშკარად ძირს უთხრის ადგილობრივი თვითმმართველობის მომავალი არჩევნების გამჭვირვალობასა და ანგარიშვალდებულებას. მოქალაქე დამკვირვებლები, მათ შორის ISFED-ი, ადამიანის უფლებათა დამცველების მდგომარეობის შესახებ გაეროს სპეციალური მომხსენებლისა და ვენეციის კომისიის მიერ აღიარებულები არიან ადამიანის უფლებათა დამცველებად, რომლებიც მოქალაქეთა სამოქალაქო და პოლიტიკური უფლებების დაცვას ემსახურებიან“, – აღნიშნულია განცხადებაში.

ორგანიზაციაში აცხადებენ, რომ სოლიდარობას უცხადებენ GNDEM-ის წევრებს საქართველოში და ყველა არაპარტიულ სამოქალაქო აქტორს, რომელთა აზრისა და გაერთიანების კონსტიტუციით გათვალისწინებული თავისუფლება საფრთხის ქვეშაა.

„ვაფასებთ ISFED-ის და სხვა დაზარალებული სამოქალაქო ორგანიზაციების გადაწყვეტილებებს, გააგრძელონ თავიანთი მისიის შესრულება ქართველი ხალხის სამსახურში, საქართველოს მთავრობის რეპრესიული ქმედებებისა და იმ პოტენციური რისკის მიუხედავად, რაც პირადად ემუქრებათ. მოვუწოდებთ საქართველოს პროკურატურას და სხვა ორგანოებს, შეწყვიტონ სამოქალაქო საზოგადოებაზე მუდმივი თავდასხმები, პატივი სცენ საქართველოს კონსტიტუციას და ადამიანის უფლებების საერთაშორისო ვალდებულებებს და შეასრულონ თავიანთი პასუხისმგებლობა, დაიცვან არჩევნების მოქალაქე დამკვირვებლები, როგორც ადამიანის უფლებების დამცველები, საერთაშორისო სამართლის შესაბამისად“, – აღნიშნულია განცხადებაში.

გაიმარჯვა საქართველომ, დამარცხდნენ თაღლითები, რომლებმაც ვითომ ანაკლიის პორტის აშენების თვალსაზრისით, პირიქით აქეთ მოატყუეს ჩვენი საზოგადოება. მოატყუეს სახელმწიფო, მას დაახარჯვინეს ათეულობით მილიონი, – განაცხადა პარლამენტის საპროცედურო საკითხთა კომიტეტის თავმჯდომარე დავით მათიკაშვილმა.

მისი თქმით, ჯაფარიძე-ხაზარაძემ თითის გამოშვერა სცადეს ხელისუფლების მისამართით თუმცა ყველა საარბიტრაჟო დავა წააგეს.

„ჯაფარიძე-ხაზარაძე ემტერებოდნენ საკუთარ ქვეყანას. მათ ბევრგან წამოიწყეს დავა საქართველოს წინააღმდეგ და აბსოლუტურად ყველგან დამარცხდნენ. გაიმარჯვა საქართველომ, დამარცხდა თაღლითების პარტია, დამარცხდნენ თაღლითები, რომლებმაც ვითომ ანაკლიის პორტის აშენების თვალსაზრისით, პირიქით აქეთ მოატყუეს ჩვენი საზოგადოება. მოატყუეს სახელმწიფო. მას დაახარჯვინეს ათეულობით მილიონი. 60 მილიონზეა საუბარი, რომელიც ჩვენმა ქვეყანამ დახარჯა ამ ყველაფერში. მიუხედავად იმისა, რომ ჩვენი ხელისუფლება იყო მუდმივად თანამშრომლობის რეჟიმში ამ ადამიანებთან, ძალიან ბევრჯერ გადაუწიეს მათ შესრულების ვადები, ყველანაირად სასათბურე პირობებში ამყოფებდნენ და ერთადერთი, რაც მათ უნდა გაეკეთებინათ საკუთარი ვალდებულების შესრულება იყო. მათ ეს ვალდებულებები რა თქმა უნდა არ შეასრულეს, მერე თითი გამოიშვირეს ჩვენი ქვეყნისკენ, ჩვენი ხელისუფლებისკენ და დაწყებული დავა საქართველოს წინააღმდეგ, ჩვენი მოქალაქეებისთვის ჯიბიდან, რომ სურდათ ამოეცალათ თანხები და მიეთვისებინათ აი, ასეთი დავები მათი სრული ფიასკოთი დასრულდა“, – განაცხადა დავით მათიკაშვილმა.