როდესაც ევროპის დღეზე, ევროკავშირის მიერ მოწყობილ ღონისძიებაზე თავს ესხმიან მედიას, ეს აჩვენებს ევროკავშირის საელჩოს ღირებულებით კრახს, – განუცხადა პარლამენტის თავმჯდომარემ შალვა პაპუაშვილმა ჟურნალისტებს ბუდაპეშტში.

პაპუაშვილი ამ განცხადებით ტელეკომპანია „იმედის“ ჟურნალისტებისთვის პროფესიულ საქმიანობაში ხელის შეშლის ფაქტს გამოეხმაურა.

„როდესაც ევროპის დღეზე, ევროკავშირის მიერ მოწყობილ ღონისძიებაზე თავს ესხმიან მედიას, ეს აჩვენებს ევროკავშირის საელჩოს ღირებულებით კრახს, როდესაც ამ თავდასხმაზე რეაგირება არ ხდება. შეიძლება ექსცესები მოხდეს ყველგან, თუმცა როდესაც უჩუმდება ევროკავშირის საელჩო ჟურნალისტზე თავდასხმას, ეს აჩვენებს, რომ ის ამით ითმენს, თვალს ხუჭავს და რაც ყველაზე სამწუხაროა, ახალისებს ჟურნალისტებზე თავდასხმას.

მათ შორის ამ თავდასხმაში მონაწილეობდნენ ევროკავშირისგან დაფინანსებული ადამიანები. სამწუხარო ტენდენცია ჩამოყალიბდა ევროკავშირის საელჩოს მხრიდან, რომელიც იქცა როგორც სიძულვილის ენის, ისე რიგ შემთხვევაში, ძალადობის წამახალისებლად როდესაც მისი დაფინანსებული ადამიანები არიან ჩართული ძალადობაში, სიძულვილის ენაში, დეზინფორმაციის გავრცელებაში და ამაზე არათუ თვალს ხუჭავს, საერთოდ არ რეაგირებს, რაც საბოლოო ჯამში, ახალისებს ძალადობას და სიძულვილს“, – აღნიშნა პაპუაშვილმა.

ტელეკომპანია „იმედის“ გადამღებ ჯგუფს პროფესიულ საქმიანობაში ხელი შეუშალა კრემლის ბენეფიციარმა ელენე ხოშტარიამ. იმ დროს, როდესაც ჟურნალისტი ინტერვიუს წერდა, ელენე ხოშტარია მას მიეჭრა, მუშაობაში ხელი მიზანმიმართულად შეუშალა, რესპონდენტს კი საუბარი არ აცადა. ხოშტარიამ ჟურნალისტს რუსი უწოდა, „ქრონიკის“ კორესპოდენტმა კი მას შეახსენა, რომ რუსეთიდან თავად ფინანსდება.

საქართველოში, ქვეყნის დამოუკიდებლობის მანძილზე სიტყვისა და გამოხატვის თავისუფლება უმაღლეს ნიშნულზეა – ხდება შემოტევა იქ, რაც არის ჩვენი წარმატების გამორჩეული ნიშანი! – ამის შესახებ დღეს, „ქართული ოცნების“ დეპუტატმა დავით მათიკაშვილმა განაცხადა.

აღნიშნული განცხადებით მათიკაშვილი თავისუფალი პრესის მსოფლიო დღესთან დაკავშირებით ბრიტანეთის ელჩის გარეტ უორდის მიმართვას გამოეხმაურა, სადაც გარეტ უორდმა აღნიშნა, რომ დიდი ბრიტანეთი შეშფოთებულია ჟურნალისტების შეურაცხყოფის ფაქტებითა და ხელისუფლების მცდელობით, შეიზღუდოს თავისუფალი მედია და დაიხუროს სივრცე დებატებისთვის.

„ბრიტანეთის ელჩისგან ასეთი დამოკიდებულება ღიმილის მომგვრელია. ჩვენმა ქვეყანამ მედია საშუალებების მარეგულირებელ სივრცედ სწორედ ბრიტანული მოდელი – ე.წ. ბიბისი-ს მოდელი მიიღო.

საქართველოში, ქვეყნის დამოუკიდებლობის მანძილზე სიტყვისა და გამოხატვის თავისუფლება უმაღლეს ნიშნულზეა – ხდება შემოტევა იქ, რაც არის ჩვენი წარმატების გამორჩეული ნიშანი.

ის, რომ კონკრეტული ტელეკომპანიების ბულინგზე ევროპული ქვეყნების ელჩები არც რეაგირებენ, ხაზს უსვამს ორმაგ სტანდარტს, რაც ევროპის კონტინენტზეა“, – განაცხადა დავით მათიკაშვილმა.

დღესდღეობით, როდესაც ევროპა სერიოზული გამოწვევების წინაშე დგას, ფედერალიზმისა და ეროვნული სუვერენიტეტის თაობაზე დებატები კონცენტრირებული უნდა იყოს ინტეგრაციის სიკეთეების მაქსიმიზაციაზე და, ამავდროულად, წევრი ქვეყნების ავტონომიისა და ტრადიციების პატივისცემაზე, – ამის შესახებ საქართველოს პარლამენტის თავმჯდომარემ, შალვა პაპუაშვილმა ბუდაპეშტში, ევროკავშირის წევრი და პარტნიორი ქვეყნების პარლამენტების თავმჯდომარეების კონფერენციაზე სიტყვით გამოსვლისას განაცხადა.

როგორც შალვა პაპუაშვილმა აღნიშნა, სამწუხაროდ, ევროკავშირის ზოგიერთი სტრუქტურის მხრიდან ვხედავთ ტენდენციას, ხალხის მიერ არჩეულ პარლამენტს, ელაპარაკოს დირექტივებით.

პაპუაშვილის განცხადებით, საქართველო ევროკავშირში გაწევრიანების გზის ერთგულია.

„ევროპული კავშირის ცენტრალური სტრუქტურების ზედმეტმა გაძლიერებამ შესაძლოა, ხელი შეუშალოს ისეთი გადაწყვეტილებების მიღებას, რომლებიც საუკეთესოდ გამოხატავს თითოეული ქვეყნის უნიკალურ პოლიტიკურ, ეკონომიკურ და კულტურულ ასპექტებს. საქართველო ერთგულია ევროკავშირში გაწევრიანების გზის. მე წარმოვადგენ ხელისუფლებას, რომელმაც ყველაზე მეტი გააკეთა ევროკავშირში გაწევრიანების პროცესში საქართველოს წინსვლისთვის. ამავდროულად, პარლამენტის გადმოსახედიდან, ჩვენ ევროპული ინსტიტუტების მხრიდან გაუგებარი მოპყრობის მომსწრენი გავხდით. სამწუხაროდ, ევროკავშირის ზოგიერთი სტრუქტურის მხრიდან ვხედავთ ტენდენციას, ხალხის მიერ არჩეულ პარლამენტს, ელაპარაკოს დირექტივებით, დაუწესოს ვალდებულებები უფლებების მინიჭების გარეშე. ვალდებულებების ქონა ხმის უფლების გარეშე, განსაკუთრებით ევროკავშირის იმ ინსტიტუტებში, სადაც საქართველო ჯერჯერობით არ არის წარმოდგენილი, არ შეესაბამება დემოკრატიული პლურალიზმის პრინციპს, რომელზეც დგას ევროკავშირი. ევროკავშირის ცენტრალიზებული სტრუქტურა ზოგჯერ ისეთ პირობებს აწესებს, რომელზეც თავად ევროკავშირი ვერ თანხმდება. ამ პრაქტიკის ერთ-ერთ მაგალითს წარმოადგენდა საქართველოსადმი მოთხოვნა, შეექმნა მოსამართლეების კეთილსინდისიერების შემოწმების ექსტრაორდინალური სისტემა, რომელიც „ვეტინგის“ სახელითაა ცნობილი და უცხოელი აქტორების მიერ უნდა ყოფილიყო განხორციელებული. ეს სისტემა, დანერგვის შემთხვევაში, შეეწინააღმდეგებოდა დემოკრატიის მთავარ პრინციპს, რომლის მიხედვითაც ძალაუფლება ხალხისგან მომდინარეობს. გამოდიოდა, რომ ხელისუფლების მთლიანი შტო დაკომპლექტდებოდა უცხოელი აქტორების მიერ, რაც ეროვნული სუვერენიტეტის არსს ეწინააღმდეგება. მეეჭვება, რომ ევროკავშირის რომელიმე წევრი სახელმწიფო თავის სუვერენიტეტში ასეთ ჩარევას დაუშვებდა“, – განაცხადა პაპუაშვილმა.

მისი თქმით, ერი-სახელმწიფოების საზოგადოებაში, პატარა ქვეყნების ხმა ისევე უნდა ისმოდეს, როგორც სხვა დანარჩენის, რადგან სიმართლე მხოლოდ რაოდენობით არ იზომება.

„დემოკრატია გულისხმობს მსჯელობას და არა იძულებით თავსმოხვევას. კონსენსუსი უზრუნველყოფს გადაწყვეტილებების კოლექტიურად მიღებას, ყველა წევრი სახელმწიფოსა და პარტნიორის ინტერესებისა და გამოწვევების პატივისცემის საფუძველზე. ეს, ასევე, ნიშნავს ევროპას, სადაც გადაწყვეტილებები მიიღება არა მხოლოდ ცენტრალიზებულ ორგანოებში, რომლებიც პირდაპირი წესით არ არიან არჩეულნი, არამედ უფრო და უფრო ახლოს ხალხთან. ამ მხრივ, კარგი იქნებოდა, უფრო კრიტიკული თვალით შეგვეხედა მიმდინარე დისკუსიისთვის, რომელიც მიზნად ისახავს კონსენსუსზე დაფუძნებული გადაწყვეტილების მიღების პრინციპის შეცვლას უმრავლესობით გადაწყვეტილების მიღების პრინციპით. ერი-სახელმწიფოების საზოგადოებაში, პატარა ქვეყნების ხმა ისევე უნდა ისმოდეს, როგორც სხვა დანარჩენის, რადგან სიმართლე მხოლოდ რაოდენობით არ იზომება“, – აღნიშნა შალვა პაპუაშვილმა.

ევროპარლამენტი რჩება გაფართოების ერთ-ერთი ყველაზე ძლიერი მხარდამჭერი, სწორედ ამიტომ, ჩვენ პირველები გამოვედით საქართველოსთვის, მოლდოვისთვის და უკრაინისთვის კანდიდატის სტატუსის მინიჭების მოწოდებით და სწორედ ამიტომ განვაგრძობთ უკრაინის ევროპული მხარდაჭერისკენ მოწოდებებს თავისუფლებისთვის ამ ბრძოლაში, – ამის შესახებ ევროპარლამენტის თავმჯდომარემ, რობერტა მეცოლამ ბუდაპეშტში, ევროკავშირის წევრი და პარტნიორი ქვეყნების პარლამენტების თავმჯდომარეების კონფერენციაზე განაცხადა.

„ჩვენ ყველა ვთანხმდებით, რომ ევროკავშირი და ჩვენი პროექტი არ არის იდეალური. ბოლო-ბოლო, ეს არის მუდმივი მიმდინარე სამუშაო, თუმცა ეს უნდა იყოს ერთად მუშაობის სტიმული. და როგორც დემოკრატიულად არჩეული პარლამენტის წარმომადგენლებზე, ჩვენზეა დამოკიდებული ჩვენი საერთო კონტინენტის დღის წესრიგის შექმნა და ამბიციური მიზნების დასახვა როგორც ჩვენი ეროვნული კანონმდებლობებისთვის, ისე ევროპისთვის. სწორედ ამ მიზნით ევროპარლამენტი რჩება გაფართოების ერთ-ერთი ყველაზე ძლიერი მხარდამჭერი. სწორედ ამიტომ, ჩვენ პირველები გამოვედით საქართველოსთვის, მოლდოვისთვის და უკრაინისთვის კანდიდატის სტატუსის მინიჭების მოწოდებით და სწორედ ამიტომ ჩვენ განვაგრძობთ უკრაინის ევროპული მხარდაჭერისკენ მოწოდებებს თავისუფლებისთვის ამ ბრძოლაში. სწორედ ამიტომ, დღეს ჩვენ მხარს დავუჭერთ ყველაზე მკაფიო და ცალსახა დასკვნებს უკრაინასთან დაკავშირებით, იმის შესაბამისად, რაც ჩვენ ერთობლივად გავაკეთეთ ყველა ჩვენს დასკვნებში და ჩვენს შეხვედრებზე რუსეთის მიერ უკრაინაში შეჭრის შემდეგ“,- განაცხადა მეცოლამ.

„ხალხის ძალის“ აღმასრულებელი  მდივანი, გურამ მაჭარაშვილი სალომე სამადაშვილის განცხადებას ეხმაურება. მისი შეფასებით, ოპოზიციისთვის მთავარი ამოსავალი წერტილი არის უცხოური დაკვეთა და არა საკუთარი ქვეყნისა და მოქალაქეების ინტერესები.

“ის, რომ “ნაცმოძრაობისთვის” მთავარი სიტყვა ეკუთვნის ევროკავშირს და გლობალური ომის პარტიას, ეს არაერთხელ დაადასტურეს. უნდა ითქვას, რომ სულ რაღაც 2 დღის წინ, სააკაშვილმა პირდაპირ დაადასტურა, მთავარია, ამერიკაში რას გადაწყვეტენო და არა ის, რომ დავუშვათ საქართველოში რა პროცესები მიმდინარეობს მიმდინარეობს. მათი მზერა არის სულ უცხოეთში, სულ Deep state-ში, სულ გლობალური ომის პარტიაში, ევროკავშირში. ეს არის მოცემულობა. მათი მთავარი წყარო და ამოსავალი წერტილი არ არის ქართული საზოგადოება, არამედ არის უცხოეთი და მათი პატრონები.

რაც შეეხება თავად სამადაშვილს, არ მგონია, რომ ეს სერიოზული პიროვნება იყოს. მგონი, “ლელოშიც” არ აღიქვამენ სერიოზულად. დარწმუნებული ვარ, “ლელოს” ამომრჩეველმაც არ იცის, მაგალითად, სამადაშვილი ახლა რომელ პარტიას წარმოადგენს,” – აღნიშნა გურამ მაჭარაშვილმა.

ცნობისთვის, სალომე სამადაშვილმა ერთ-ერთ სატელევიზიო ინტერვიუში თქვა, რომ მოქალაქეების ნაწილი არჩევნების შედეგებს 2020 წელსაც აპროტესტებდა, თუმცა მაშინ ევროკავშირს სხვა განწყობები ჰქონდა, დღეს კი “ქართული ოცნების” დემოკრატიულ მანდატთან დაკავშირებით ევროკავშირში სხვა შეხედულებებია და ქვეყანაში ახალი საპარლამენტო არჩევნები უნდა დაინიშნოს.

მოახლოებულ თვითმმართველობის არჩევნებში ოპოზიციის მონაწილეობის შესახებ კონკრეტული კვლავ არაფერი თქმულა, თუმცა ოპოზიციის ნაწილი რეგიონებში პარტიულ შეკრებებს აქტიურად მართავს და სხვადასხვა სახელით ფუთავს. მაგალითად, „ლელოს“ წარმომადგენლები წალენჯიხის შემდეგ გუშინ ბათუმში ჩავიდნენ.

რატომ არ აკეთებს ოპოზიცია თვითმმართველობის არჩევნებში მონაწილეობის შესახებ საჯარო განცხადებებს – მმართველ გუნდში ამას გარე დირექტივებს უკავშირებენ.

„ოპოზიციური პარტიების ნაწილი უკვე ემზადება არჩევნებისთვის. ისინი მართავენ შეხვედრებს რეგიონებში, ტრენინგებს, სემინარებს და ა.შ. რეალურად ისინი ემზადებიან თვითმმართველობის არჩევნებისთვის, თუმცა ამის თქმას ხმამაღლა და დამაჯერებლად ჯერ ვერ ბედავენ, რადგან, როგორც ჩანს გარედან დავალება ბოლომდე არ აქვთ მიღებული.

ჩვენ უკვე ვემზადებით მეათე, საიუბილეო გამარჯვებისთვის. უახლოეს კვირებში უკვე დავიწყებთ საარჩევნო კამპანიას, ჩავალთ ყველა რეგიონში და დარწმუნებულები ვართ, რომ საქართველოს მოსახლეობა მხარს დაგვიჭერს სამოცდაოთხივე მუნიციპალიტეტში, – მიიჩნევს გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველი მოადგილე ვლადიმერ ბოჟაძე.

ადგილობრივი თვითმმართველობის არჩევნები საქართველოში ოქტომბერში გაიმართება.