ივანიშვილმა სახალხოდ დაიწყო იმ ლეგენდების ნგრევა, რომლებსაც მთელი ცხოვრება აგებდა, – ამის შესახებ თანაინვესტირების ფონდის ყოფილმა ხელმძღვანელმა, ბრალდებულმა გიორგი ბაჩიაშვილმა განაცხადა, რომელსაც ბიძინა ივანიშვილის კუთვნილი თანხის მითვისებას ედავებიან.

ბაჩიაშვილის თქმით, ბიძინა ივანიშვილს ახალგაზრდებზე და თავისუფალ ხალხზე ძალადობა არ გამოუვა.

„მე მხარს ვუჭერ საქართველოს ევროპულ მომავალს და ვდგავარ ქართველ ახალგაზრდობასთან! ივანიშვილმა სახალხოდ დაიწყო იმ ლეგენდების ნგრევა, რომლებსაც მთელი ცხოვრება აგებდა. მან უღალატა ყველა იმ იდეალს და დაპირებას, რომლითაც იგი ხელისუფლებაში მოვიდა!

ის ძალადობს საჯარო მოხელეებზე, თუმცა, მათი უმრავლესობა არ უჭერს მხარს ივანიშვილის რუსულ გზას. სამწუხაროდ, ყველას არ აქვს იმის ძალა, რომ ეს ხმამაღლა გამოხატოს.

ძალადობს ბიზნესმენებზე! ორი დღის წინ, მათ ერთდროულად მოუწიათ, ერთი და იგივე შინაარსის ტექსტის ვარიაციების გავრცელება, თავისუფალი ადამიანები ასე არ იქცევიან!

ძალადობს იმ მოსახლეობაზე, რომელიც იძულებით და მოსყიდვით ჩამოიყვანა რეგიონებიდან და ასმენინა ოკუპანტების ხელით დაკრული ტაშის ფონოგრამა! მას არ გაუვა ძალადობა ახალგაზრდებზე და თავისუფალ ხალხზე! ამიტომაც, ცდილობს მათ დარბევას და მარგინალიზაციას!

ეს ყველაფერი ისეთივე შეუთავსებელია ევროპულ ღირებულებებთან, როგორც დიქტატურა – დემოკრატიასთან!!! ამას ადასტურებენ იმ ქვეყნების ლიდერები, რომელთა ელჩებსაც 2011-2012 წლებში ივანიშვილი თავად ჰპირდებოდა გასაოცარ დემოკრატიას, დღეს ისინი მართლაც ვერ მალავენ გაოცებას ივანიშვილის “აშენებული დემოკრატიით“.

90-იანი წლებიდან, დასავლეთის ხელშეწყობით და ძალისხმევით დაიწყო ჩვენი ქვეყნის აღმასვლა. სწორედ მათი პროგრამებით მოხდა ბევრი ჩვენი ახალგაზრდის განათლება და იმ ინსტიტუტების და რეფორმების შენება, რომლის ნარჩენებზეც დგას დღეს ივანიშვილი და ებრძვის ჩვენი ქვეყნის მომავალს!

მისი მმართველობა დეგრადაციის იმ საფეხურზეა, როდესაც მისი “გუნდის” ვერც ერთი წევრი ვერ ბედავს მისთვის სიმართლის თქმას! ის ცდილობს, რომ ყველა ძალით ჩასვას “ერთ ნავში” და კოლექტიური პასუხისმგებლობა აჰკიდოს, თითქოს, ბიძინას რუსული გზა – მათი არჩევანიცაა! არა რუსულ კანონს! არა ოკუპანტების დაკრულ ტაშს!“, – წერს ბაჩიაშვილი.

დედაქალაქის მერმა, კახა კალაძემ ჟურნალისტებს თავისუფალი პრესის მსოფლიო დღე მიულოცა და გუშინ მედიასაშუალების წარმომადგენელთან მომხდარ ინციდენტთან დაკავშირებით მედიის შეკითხვას უპასუხა.

კახა კალაძის თქმით, ჟურნალისტი არ უნდა აყენებდეს რესპონდენტს შეურაცხყოფას განსხვავებული მოსაზრებების მიუხედავად.

„დღეს არის პრესის საერთაშორისო დღე. პირველ რიგში, მინდა, მოგილოცოთ. თავისუფლება და დამოუკიდებლობა არ ნიშნავს, ადამიანს მიაყენო შეურაცხყოფა და უწოდო უტიფარი. ეს კატეგორიულად მიუღებელია. ჩვენ არ გვაქვს ის დამოკიდებულება, რომ ერთმანეთს ამ ტერმინოლოგიით მივმართოთ. შეიძლება, პოლიტიკოსი ვიყო, შეიძლება, განსხვავებული მოსაზრებები მქონდეს, მაგრამ არ გაქვთ უფლება, ელემენტარული ურთიერთობიდან გამომდინარე, შეურაცხყოფა მომაყენოთ ან მე, ან სხვა კონკრეტულ პოლიტიკოსს.

შეურაცხყოფა მომაყენონ და მე თავი დაგიხაროთ?! როდესაც ადამიანს ეუბნებით, რომ უტიფრად იტყუება, მე თქვენ არ გაკადრებთ ასეთ რამეს. შეიძლება, გვქონდეს განსხვავებული მოსაზრებები. რამდენჯერ ყოფილა, რომ „ტვ პირველთან“ შევსულვარ პოლემიკაში, მაგრამ არასდროს არ გვიკადრებია ერთმანეთისთვის მსგავსი შეურაცხყოფა. კიდევ ერთხელ ვიმეორებ, მე არავისთვის არასდროს მიკადრებია, თავს დავსხმოდი, შეურაცხყოფა მიმეყენებინა, ყოველთვის ვარ თავდაცვის რეჟიმში. ამიტომ, თუ იქნება ჩემ მიმართ შეურაცხყოფა, მერწმუნეთ, რომ იმავეს დაგიბრუნებთ“, – განაცხადა კახა კალაძემ.

საბოლოო ჯამში, ეს აქციები არის პოლიტიკური უმცირესობის მცდელობა, ძალადობრივი გზით უკვე მერამდენეჯერ შეძლოს წყლის ამღვრევა და ამღვრეულ წყალში თავისი ძალაუფლების თევზის დაჭერა, მაგრამ ქართველი ხალხი ამას აკვირდება მშვიდად და ბრძნულად, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც მან აღნიშნა, ყოველ ჯერზე, როდესაც ხდებოდა შეკრება რუსთაველის გამზირზე, სწორედ „ენჯეოს“ ხელმძღვანელები მოუწოდებდნენ შეკრებილ ხალხს, იმ აქტივობებისკენ, რაც აკრძალულია საქართველოს კანონმდებლობით.

„ამ ყველაფერში შემაშფოთებელია ის, რომ გარკვეული სიმბიოზია პარტიებისა და „ენჯეოებისა“, რომლებიც ორგანიზებას უწევენ ამ აქციებს. განსაკუთრებით შემაშფოთებელია, რომ, როგორც წესი, ზუსტად ენჯეო ლიდერები არიან, რომლებიც ამ აქციას აძლევენ ძალადობრივ ხასიათს. ჩვენ ვნახეთ, რომ ყოველ ჯერზე, როდესაც ხდებოდა შეკრება რუსთაველის გამზირზე, სწორედ „ენჯეოს“ ხელმძღვანელები მოუწოდებდნენ შეკრებილ ხალხს, ან პიკეტირება მოეხდინათ პარლამენტის, რაც აკრძალულია საქართველოს კანონმდებლობით, ან გადაადგილებულიყვნენ სხვადასხვა ქუჩების მიმართულებით, რაც, თავის მხრივ, იწვევდა გარკვეულ ექსცესებს. შესაბამისად, „ენჯეოების“ ლიდერების მოწოდებების საფუძველზე და შედეგად ხდებოდა ხოლმე ძალადობა. ამ კონტექსტშიც დასაფიქრებელია საელჩოების და დონორების დამოკიდებულება და განცხადებები. როდესაც, მათი „ენჯეოები“ სწორედაც რომ უწევენ ინსპირირებას ძალადობას და ამ დროს ხელს აფარებენ დონორები და საელჩოები ამ „ენჯეოებს“ და ნაცვლად იმისა, რომ შეაფასონ ძალადობრივი ხასიათი ამ აქციებისა, ფაქტობრივად, თეთრზე შავს ამბობენ და ცდილობენ, ყალბი ნარატივი დაამკვიდრონ, თითქოს ძალადობას არ ჰქონდა ადგილი. ესეც თავისთავად აჩენს კითხვის ნიშნებს, რა მოტივაციები დგას ასეთი განცხადებების უკან“, – განაცხადა შალვა პაპუაშვილმა.

ჩვენ თუ ვსაუბრობთ სტრატეგიულ პარტნიორობაზე, პრემიერ-მინისტრის ოფიციალური ვიზიტით ჩასვლა ვაშინგტონში დათქმებით არ არის სწორი დამოკიდებულება, – ამის შესახებ თბილისის მერმა, კახა კალაძემ განაცხადა, რითიც უპასუხა კითხვას, ხომ არ გადაიხედება საქართველოს აშშ-თან პარტნიორული ურთიერთობა აშშ-ის ელჩის განცხადების შემდეგ.

კახა კალაძის თქმით, საქართველოს ხელისუფლება ყოველთვის მზად არის პარტნიორობისა და მეგობრობისთვის, თუმცა ეს პროცესი უნდა იყოს ორმხრივი.

„არავისთან ურთიერთობის გაწყვეტა არ გვინდა, ჩვენ გვინდა სამართლიანი მიდგომები, ეს არის პრინციპულად მნიშვნელოვანი, ორმაგი სტანდარტი კატეგორიულად მიუღებელია. მზად ვართ მეგობრობისთვის, პარტნიორობისთვის და არა ერთხელ დაგვიდასტურებია, რომ საქართველო არის საიმედო პარტნიორი და მეგობარი ქვეყანა. ეს არის ჩვენი დამოკიდებულება, მაგრამ იგი ცალმხრივი ვერ იქნება, გვინდა, მეორე მხარისგანაც იგივე დავინახოთ და ვიგრძნოთ. დღეს არავინ ეწევა დასავლეთის დისკრედიტაციას და თუნდაც ამერიკის დისკრედიტაციას ისე, როგორც მსგავსი განცხადებები და ის კონკრეტული სამარცხვინო ევროპარლამენტარები, რა განცხადებებსაც აკეთებენ. ეს ძალიან მძიმეა საზოგადოებისთვის, რადგან ყველა ხედავს ორმაგ სტანდარტს. დღეს ხომ შეუძლებელია, რაღაცა დამალო. როდესაც სხვა ქვეყნისთვის რაღაც მისაღებია და შენ გიკრძალავენ ამას, ეს არ არის სწორი დამოკიდებულება. როდესაც თეთრზე გეუბნებიან, შავიაო, ძალიან მძიმეა ეს ყველაფერი და ხალხი სულელი არაა, ყველაფერს ხვდება, აანალიზებს და სწორი დასკვნებიც გამოაქვს.

ჩვენ არაფერს განსაკუთრებულს არ ვაკეთებთ, როდესაც აღნიშნულ კანონპროექტზე ვამბობთ, გვითხარით, რა გვაქვს პრობლემური და არ არის არგუმენტი, რატომ ეწინააღმდეგება ეს კანონი ევროპულ ღირებულებებს. მათ არგუმენტი არ აქვთ. არ უნდათ, მოხდეს გასაჯაროება იმ ფაქტების, თუ ვინ აფინანსებს ექსტრემიზმს, რევოლუციის მცდელობას და დაპირისპირებას. ერთი მხრივ, გვეუბნებიან, შეამცირე პოლარიზაციაო და, მეორე მხრივ, აფინანსებენ პოლარიზაციას ეს ფონდები, რაც არ არის სწორი და ლამაზი. ამიტომ ყველაფერი უნდა იყოს გამჭვირვალე და ხალხმა უნდა იცოდეს, ვინ არის მტერი და ვინ – მოყვარე. ჩვენთვის ყველაზე მნიშვნელოვანია საქართველო უპირველეს ყოვლისა, ქვეყნის ინტერესი, სუვერენიტეტის გაძლიერება და გარე გავლენის შემცირება. ამ ქვეყნის ბატონ-პატრონი არის მისი აღმატებულება ქართველი ხალხი“, – განაცხადა კახა კალაძემ.

საქართველოში აშშ-ის საელჩომ გუშინ გაავრცელა ელჩ რობინ დანიგანის განცხადება, სადაც აღნიშნულია : „ახლახან საქართველოს მთავრობის მაღალი თანამდებობის პირები მივიწვიეთ შეერთებული შტატების მაღალი თანამდებობის პირებთან სტრატეგიული პარტნიორობისა და აშშ-ის დახმარების შესახებ ნებისმიერი შეკითხვის განსახილველად. სამწუხაროდ, ქართულმა მხარემ არჩია, რომ უარი ეთქვა ამ მიწვევაზე“. აღნიშნულ განცხადებას გამოეხმაურა საქართველოს საგარეო საქმეთა სამინისტრო, სადაც განაცხადეს, რომ „პრემიერი აშშ-ში მიწვეულ იქნა დათქმით, რომ ვიზიტამდე დროებით შეჩერებულიყო კანონპროექტის განხილვა, დათქმით ვიზიტი არ შეესაბამება პარტნიორობის სულისკვეთებას“.

რუსეთის პრეზიდენტი ვლადიმირ პუტინი ჩინეთში ჩასვლას გეგმავს. როგორც Bloomberg-ი წერს, რუსეთის პრეზიდენტი ჩინეთში 15-16 მაისს ჩავა.

გამოცემის ცნობით, ეს ვიზიტი კიდევ ერთხელ ხაზს უსვამს ორ ქვეყანას შორის არსებული ურთიერთობების მზარდ მნიშვნელობას.

როგორც სააგენტოს კრემლთან დაახლოებულმა წყარომ განუცხადა, ვიზიტის თარიღი შეიძლება შეიცვალოს, თუმცა ნებისმიერ შემთხვევაში პუტინის ჩინეთი იქნება პირველი ქვეყანა, რომელსაც კრემლის ლიდერი მორიგი ვადით არჩევის შემდეგ ეწვევა.

აღსანიშნავია, რომ პუტინის ინაუგურაცია კრემლში 7 მაისს გაიმართება.

გუშინ გადაკეტეს გმირთა მოედანი. მათ ჰქონდათ გათვლა, რომ ამით ხელისუფლება დაზარალდება, მაგრამ ვერ მიხვდნენ იმას, რომ ქართული საზოგადოება ხვდება, სად არის ხელისუფლების ბრალეულობა და სად – არა, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილის თქმით, ამ ხალხს არაფერი ქართული არ აინტერესებს. მათ აინტერესებთ ერთადერთი რამ, თავიანთ პატრონებს დაუჯერონ და საქართველოს სუვერენიტეტი შესუსტდეს.

„პირდაპირ ეთერში ვნახეთ, რომ ხალხი მანქანებიდან გადმოვიდა, ზოგს ავადმყოფი მიჰყავდა, ზოგს საქმე ჰქონდა, იყო ფიზიკური შეხლა-შემოხლაც. ზოგი ამბობდა, რომ პოლიტიკა საერთოდ არ აინტერესებს და რატომ უნდა ჰქონდეს დისკომფორტი. რამდენიმე ასეულმა ადამიანმა მილიონ-ნახევრიან ქალაქს რატომ უნდა შეუქმნას პრობლემა, თან არ ეთანხმება ეს მილიონ-ნახევარი რამდენიმე ასეულ ადამიანს. ასეთი კოლაფსები, საზოგადოების შეურაცხყოფა და ზიანის მიყენება – ეს არის მათი მიზანი. მათ გათვლა ჰქონდათ, რომ ამით ხელისუფლება დაზარალდება. ხალხი ხელისუფლებას მოსთხოვს, რატომ გვიქმნი ჩვენ ამ პრობლემას, მაგრამ ვერ მიხვდნენ იმას, რომ ქართული საზოგადოება ხვდება, სად არის ხელისუფლების ბრალეულობა და სად – არა.

ასეულობით ახალგაზრდა როდესაც გადაკეტავს გმირთა მოედანს, რომელიც არის ერთ-ერთი საკვანძო გასასვლელი და ამით ასიათასობით ადამიანს პრობლემას შეუქმნის, ეს როგორ შეიძლება, ხელისუფლებას დაბრალდეს? ამდენი რესურსიც არ აქვთ, მიხვდნენ, რომ საკუთარ ხალხს არ უნდა დაუპირისპირდნენ. ეს დაპირისპირება კი პირდაპირ ეთერში ვნახეთ. ამ ხალხს არაფერი ქართული არ აინტერესებს. მათ აინტერესებთ ერთადერთი რამ, თავიანთ პატრონებს დაუჯერონ და საქართველოს სუვერენიტეტი შესუსტდეს“, – განაცხადა გურამ მაჭარაშვილმა.

მინდა, მივმართო დიპლომატებს, ჩვენი ქვეყნის აკრედიტებულ ელჩებს მეგობარ ქვეყნებში, თქვენ ხართ ქართველი ხალხის წარმომადგენლები მოკავშირე სახელმწიფოებში და არა ამ ხელისუფლების ან ბიძინა ივანიშვილის, ამიტომ სასწრაფოდ უნდა გამოხვიდეთ და აუხსნათ საქართველოს მოქალაქეებს, რატომ ანადგურებს ივანიშვილი და ეს ხელისუფლება ათწლეულების მანძილზე ნაშენებ მეგობრობას და დაუცველს ტოვებს საქართველოს, – ამის შესახებ „ლელოს“ ლიდერი მამუკა ხაზარაძის განცხადებაშია აღნიშნული.

ხაზარაძის თქმით, „ქვეყანაში მიმდინარე პროცესები და „ოცნების“ მიერ მეორე მოსმენით მიღებული „რუსული კანონი“ პირდაპირ საფრთხეს უქმნის საქართველოს ევროატლანტიკურ პერსპექტივას“.

„ამის შესახებ თქვენ ყველაზე კარგად ხართ ინფორმირებული ჩვენი სტრატეგიული პარტნიორებისგან, როგორც პირველწყარო. ქვეყნის დასავლური კურსის ფორმირებაში და განმტკიცებაში დიპლომატიური კორპუსის უდიდესი წვლილია, ისევე როგორც თითოეული თქვენგანის, როგორც ამ პროცესის უშუალო მონაწილეების.

დღეს ამ პროცესში უმნიშვნელოვანესია თქვენი ღია პოზიცია საკითხზე, რომელსაც არა მარტო ქვეყნის დასავლური ვექტორის ცვლილება მოაქვს, არამედ თქვენს მრავალწლიან შრომას პირდაპირ წყალში ყრის. ამ დროს სიჩუმე დანაშაულია საკუთარი ქვეყნისა და მომავალი თაობის წინაშე!

პოზიცია, რომ ჩვენ დიპლომატები ვართ და პოლიტიკურ განცხადებებს არ ვაკეთებთ, არ მიიღება. საკითხი ეხება ჩვენი ქვეყნის მომავალს!!!“ – აღნიშნავს მამუკა ხაზარაძე.