როდესაც მათ [უცხოელი პარტნიორების] შემთხვევაში უცხოური გავლენების შესახებ კანონმდებლობით ქვეყნების დაცვა კარგად არის უზრუნველყოფილი, ჩვენს შემთხვევაში ეს რატომ არის დემოკრატიისგან უკუსვლა, ამას ვერ ახსნის ვერანაირი საღი გონი, – განაცხადა „დღის ქრონიკაში“ პარლამენტის ვიცე-სპიკერმა ნინო წილოსანმა.

წამყვანმა მას ჰკითხა, რა არის ის საზოგადოებრივი სიკეთე, რომელიც ევროსტრუქტურებიდან კრიტიკას გადაწონის ბოლო დროს ხელისუფლების მიერ მიღებულ კანონებთან დაკავშირებით.

„როდესაც მათ [ევროპული ქვეყნების] შემთხვევაში უცხოური გავლენების შესახებ კანონმდებლობით ქვეყნების დაცვა კარგად არის უზრუნველყოფილი, ჩვენს შემთხვევაში ეს რატომ არის დემოკრატიისგან უკუსვლა, ამას ვერ ახსნის ვერანაირი საღი გონი. ან ოჯახური ღირებულებების დაცვა რატომ არის ანტიევროპული?!

განსაკუთრებით 2014 წლის შემდგომ მივდივართ ევროსტანდარტებით. ეს არის ასოცირების ხელშეკრულებიდან გამომდინარე სტანდარტები.

როდესაც მედიარეგულაციებს ვიღებდით, ვიხელმძღვანელეთ ბრიტანული სტანდარტით და ალბათ BBC ერეთ-ერთი საუკეთესო მაგალითია იმის, როგორი ეთიკური უნდა იყოს მედია და რომ არ უნდა გადაიქცეს დატერორების ინსტრუმენტად“, – აღნიშნა წილოსანმა

სიმართლეს არ შეესაბამება, რომ სანქციები უსარგებლოა. ვფიქრობ, ჩვენ უნდა მოვუწოდოთ წევრ ქვეყნებს, რომ რაც შეიძლება მალე დააწესონ სანქციები, განსაკუთრებით, მათ წინააღმდეგ, ვინც პასუხისმგებელია რეპრესიებსა და ყველაფერზე, რასაც ვხედავთ საქართველოში, – ამის შესახებ ევროპარლამენტარმა, რასა იუკნევიჩიენემ ევროპარლამენტის ადამიანის უფლებათა ქვეკომიტეტის რიგგარეშე სხდომაზე განაცხადა.

ამასთან, რასა იუკნევიჩიემ აღნიშნა, რომ კრიზისიდან გამოსავალი არის ახალი, სამართლიანი არჩევნები, სანქციები და სამოქალაქო საზოგადოების მხარდაჭერა.

„მივესალმებით ამ მამაც ადამიანებს, რომლებიც წარმოადგენენ ასობით ათას ადამიანს, რომლებიც თითქმის 200 დღეა, იბრძვიან ქუჩაში. ცივი ზამთრის დღეებში ისინი იდგნენ ქუჩაში და იბრძოდნენ საქართველოს ევროპული მომავლისთვის, აფრიალებდნენ ევროპულ დროშებს. ზოგჯერ მაქვს შეგრძნება, რომ ეს ადამიანები უფრო მეტად პროევროპელები არიან, ვიდრე ბევრი ევროპელი ევროკავშირში. შესაძლოა, ჩვენ მიჩვეული ვართ ჩვენს ყოველდღიურ დემოკრატიას და ვერ ვაცნობიერებთ, რამდენად მნიშვნელოვანია ეს ქართველი ხალხისთვის. თქვენ ხართ არაჩვეულებრივები, თქვენ ხართ გმირები ჩემთვის და ბევრი ევროპელისთვის მრავალ ევროპულ ქვეყანაში. თქვენი ვიზიტი ძალიან დროულია. ხვალ ჩვენ კენჭს ვუყრით ანგარიშს და ვიმედოვნებ, რომ მას დაამტკიცებენ, რადგან ყველა პოლიტიკური ჯგუფი მას მხარს უჭერს. თუმცა ვფიქრობ, რომ ჩვენ გვჭირდება ყოველ კვირა ამ ანგარიშის შესწორება, ახალი მტკიცებულების, რეჟიმის მიერ გადადგმული ახალი სასტიკი ნაბიჯების გამო. ყველა იმ ადამიანისგან, ვისთანაც შეხვედრა გვქონდა, იქნებოდა ეს პროევროპელი ქართველები, თუ ევროკავშირის ელჩები, იქმნებოდა საერთო შეგრძნება, ყოველ შემთხვევაში, ჩემი გაგებით, რომ სიტუაცია ყოველდღიურად უარესდება და ჩვენი შეხვედრების დროს რამდენჯერმე იყო ნახსენები ლუკაშენკოს რეჟიმი, რადგან ვითარება სულ უფრო უახლოვდება იმას, რაც საბოლოოდ მივიღეთ ბელარუსში, ნაბიჯ-ნაბიჯ მოძრაობს იგივე მიმართულებით. ყველა მათგანი ამბობდა, რომ საჭიროა სანქციები რეჟიმისთვის. სანქციები მუშაობს, სიმართლეს არ შეესაბამება, რომ სანქციები უსარგებლოა. ეს ძალიან მნიშვნელოვანია. ევროპარლამენტის მიერ მიღებულ ბოლო რეზოლუციაშიც კი ნახსენები იყო სახელები და მრავალი ადამიანისთვის ნამდვილად მნიშვნელოვანი ამის ცოდნა. ვფიქრობ, ჩვენ უნდა მოვუწოდოთ წევრ ქვეყნებს, რომ რაც შეიძლება მალე დააწესონ სანქციები, განსაკუთრებით, მათ წინააღმდეგ, ვინც პასუხისმგებელია რეპრესიებზე და ყველაფერზე, რასაც ვხედავთ ამ ქვეყანაში.

რაც შეეხება მედიის თავისუფლებას, ჩვენ ბოლო დღეებში მივიღეთ შეტყობინება, რომ ორი უკანასკნელი ძლიერი დამოუკიდებელი ტელეარხი, რომელიც ჯერ კიდევ განაგრძობს მაუწყებლობას, დახურვის პირას არის უახლოს დღეებში. ეს იქნება სიტყვის თავისუფლების დასასრული. მზია ამაღლობელი – ჩვენ გვსურდა მისი ციხეში მონახულება, ვითხოვეთ ნებართვა, თუმცა ნება არ დაგვრთეს. ეს მამაცი ჟურნალისტი გახდა საქართველოში დღეს დაპატიმრებულების სიმბოლო. ჩვენ უნდა გავუგზავნოთ მას ჩვენი სოლიდარობა. სამოქალაქო საზოგადოება დარჩენილია ყოველგვარი რესურსის გარეშე და იმ დროს, როდესაც ასევე USAID-ი გავიდა, ეს არის უზარმაზარი ზიანი ამ ქვეყნისთვის. რაც შეეხება სამომავლო ნაბიჯებს, ხვალ იქნება ანგარიში, ვფიქრობ, ჩვენ შევძლებთ გაერთიანებას, რომ გვქონდეს სასწრაფო რეზოლუცია მზია ამაღლობელთან დაკავშირებით შემდეგი პლენარული სესიისთვის, თუ სხვა ჯგუფები დათანხმდებიან. ვფიქრობ, დროა, გავაკეთოთ ეს. კრიზისიდან ერთადერთი გამოსავალი არის ახალი, სამართლიანი და თავისუფალი არჩევნები. მე სხვა გამოსავალს ვერ ვხედავ. მათრახი და თაფლაკვერი, რასაც ევროკომისია ითხოვს ამჟამინდელი რეჟიმისთვის, არ მუშაობს და საერთოდ არ იმუშავებს. მხოლოდ ახალი, სამართლიანი არჩევნები, სანქციები, სამოქალაქო საზოგადოების მხარდაჭერა“, – განაცხადა რასა იუკნევიჩიენემ.

სხდომაზე ევროპარლამენტის წევრებმა საქართველოში ევროპარლამენტის ადამიანის უფლებათა ქვეკომიტეტის მისიის შესახებ ისაუბრეს, რომელიც 26-28 მარტს შესრულდა.

ევროპარლამენტის ადამიანის უფლებათა ქვეკომიტეტის რიგგარეშე სხდომაზე ასევე სიტყვით გამოვიდნენ ლაშა ბუღაძე, ბექა ყორშია, ქეთი ქერაშვილი.

რა უნდა ვთქვა რადიკალურ ოპოზიციასთან დაკავშირებით? რასაც ვისმენთ, ამას ხომ გეუბნებოდით: უპრინციპოები, უთავმოყვარეოები, მრავალნაირი სტანდარტის მქონენი – ჯერ სად ხართ, თქვენ თქვენი ამომრჩეველი მოგიღებთ ბოლოს – ვინც აპამპულავეთ და გადააგდეთ ამდენი ხნის განმავლობაში. დარწმუნებული ვარ, ჩემი „ხაბეც“ აბობოქრდება და ის ცალკე მოგცემთ მერე „კანტროლკას“, – ამის შესახებ „ქართული ოცნების“ დეპუტატმა, ირაკლი ზარქუამ განაცხადა, რითაც თვითმმართველობის არჩევნებში ოპოზიციური პარტიების მონაწილეობის საკითხს გამოეხმაურა.

მისი თქმით, ოპოზიციურ პარტიებს პრინციპები არ აქვთ და რასაც დაუკვეთავენ ისე მოიქცევიან.

„ამათ სიტყვას რომ ფასი არ აქვს, ამას ხომ გიყვებოდით? 2020-ში თქვეს, რომ პარლამენტი არალეგიტიმურია და არ შემოვალთო, შემდეგ შემოვიდნენ და ძლივს გავაგდეთ. ამათ პრინციპი არ აქვთ – რასაც დაუკვეთავენ, ისე მოიქცევიან. თავიდან ამბობდნენ, რომ ადგილობრივ არჩევნებში მონაწილეობას არ მივიღებთო, წინააღმდეგობის პლატფორმას და სიგიჟეებს იგონებდნენ და ახლა მიხვდნენ, რომ საერთოდ რომ არ გაქრნენ ისე, როგორც „კარენოი“ „ნაცმოძრაობა“ გაქრა, მიიღეს გადაწყვეტილება, რომ ხაზი გადაუსვან ყველა აქამდე ნათქვამ არგუმენტს და თვითმმართველობის არჩევნებშიც მიიღონ მონაწილეობა. ეს ხელმოცარული დიპლომატი, სამადაშვილს ვგულისხმობ, ხომ იცით რატომ ვეძახი? ევროკავშირში წლების განმავლობაში რომ იყო ელჩი, როცა რუსეთი თავს დაგვესხა და ომი გაჩაღდა, ერთ ქვეყანასაც ვერ გააკეთებინა განცხადება და სანქცია ვერ დააწესებინა. ეს ქალი მერე აქ მორალს გვიკითხავდა. იგივე მისი ამორალური მორალის გაგრძელებაა, რომ არალეგიტიმურ არჩევნებში მონაწილეობას არ მივიღებო და ახლა რა შეიცვალა? სალო, რა შეიცვალა? იგივეა ცესკო, მმართველი პარტიაც ჩვენ ვართ, ირაკლი კობახიძეა პრემიერ-მინისტრი – რატომ იღებ მონაწილეობას ადგილობრივ არჩევნებში? რის იმედად? – საერთოდ რომ არ გაქრეთ? დაგიკვეთეს თქვენმა პატრონებმა? – ამიტომაც ხართ იქ, სადაც ხართ და ასე იქნებით, სანამ უცხო ქვეყნის დაკვეთის მოლოდინში იქნებით თქვენც, დანარჩენებიც, გახარიებიც, „წინააღმდეგობის პლატფორმის“ თვითმარქვია პრეზიდენტიც. ჯერ სად ხართ, თქვენ თქვენი ამომრჩეველი მოგიღებთ ბოლოს – ვინც აპამპულავეთ და გადააგდეთ ამდენი ხნის განმავლობაში. დარწმუნებული ვარ, ჩემი „ხაბეც“ აბობოქრდება და ის ცალკე მოგცემთ მერე „კანტროლკას“, – განაცხადა ზარქუამ.

ცნობისთვის, სალომე სამადაშვილმა გუშინ თვითმმართველობის არჩევნებში მონაწილეობის საკითხზე ასეთი განცხადება გააკეთა: „თუ შევარჩევთ წერტილებს, სადაც ხელისუფლება სუსტია, უკვე წააგო არჩევნები და ერთიანი ძალით დავარტყამთ, შესაძლოა, მივაყენოთ უფრო დიდი ზიანი, ვიდრე არ შესვლით პროცესში – მათ ვერავინ მისცემს ლეგიტიმაციას, ის რაც მკვდარია, თავიდან ვერ მოკვდება“, – აღნიშნა სამადაშვილმა ტელეკომპანია „პალიტრანიუსის“ გადაცემა „360 გრადუსში“.

საქართველოს ყოფილი პრეზიდენტის, სალომე ზურაბიშვილის განცხადებით, შვედეთის პრემიერისგან მიიღო წერილი, რომელშიც გამოთქმულია წუხილი დემოკრატიისა და ადამიანის უფლებების კუთხით საქართველოში არსებული მდგომარეობის შესახებ.

როგორც ზურაბიშვილმა დღევანდელ ბრიფინგზე აღნიშნა, შვედეთის მთავრობამ გადაწყვიტა, შეეწყვიტა „შვედეთის საერთაშორისო განვითარების თანამშრომლობის სააგენტოს“ (SIDA) ყველანაირი დახმარება საქართველოს მთავრობისთვის და შვედეთი გამოხატავს მზადყოფნას, დარჩეს დონორი სამოქალაქო საზოგადოებისთვის.

ამასთან, სალომე ზურაბიშვილი ამბობს, რომ კრიზისიდან გამოსავალი არის ახალი საპარლამენტო არჩევნები.

„მინდა, გაგაცნოთ შვედეთის პრემიერის წერილი, რომელიც მივიღე პერსონალურად, რომელიც გამოთქვამს ძალიან დიდ წუხილს იმის შესახებ, რა მდგომარეობაა დღეს საქართველოში დემოკრატიის და ადამიანის უფლებების კუთხით, რომ რეალურად, სამოქალაქო სივრცე არის ძალიან შეზღუდული და კიდევ უფრო იზღუდება და ეს რომ არ შეეფარდება არც ევროკავშირის ღირებულებებს და არც საქართველოს გზას ევროპისკენ. პასუხად, შვედეთის მთავრობამ მიიღო გადაწყვეტილება, რომ შეეწყვიტა შვედეთის სააგენტოს, „სიდას“, რომელიც ერთ-ერთი მთავარი დონორი იყო ამ ქვეყანაში, ყველანაირი დახმარება საქართველოს ე.წ. მთავრობისთვის, თუმცა შვედეთი გამოხატავს მზადყოფნას, დარჩეს მხარდამჭერი საქართველოს დემოკრატიული განვითარების და მისი ევროპული გზის, რომ დარჩეს როგორც დონორი, ოღონდ სამოქალაქო საზოგადოებისთვის და ამ კუთხით, ჩვენ ვაკვირდებითო დღევანდელ კანონმდებლობას, რომ გავიგოთ, რა ფორმით უნდა გავაგრძელოთ მხარდაჭერა საქართველოს სამოქალაქო საზოგადოებისა. ჩვენ, როგორც ევროპის სხვა ქვეყნები, გავაგრძელებთ ძალიან მკაფიო დაკვირვებას საქართველოს მდგომარეობისო, ვრჩებით როგორც დიდი მხარდამჭერი საქართველოს მოსახლეობის და მისი ევროპული გზის, მისი დემოკრატიული განვითარების და ველოდებით, რომ საქართველოს მთავრობამ მიიღოს აუცილებელი ნაბიჯები, რათა დასრულდეს კრიზისი და დაბრუნდეს ნდობა დემოკრატიული ინსტიტუტების. ჩვენ კარგად ვიცით, რომ კრიზისიდან გამოსვლა არის ერთი და მხოლოდ ერთი – ეს არის ახალი საპარლამენტო არჩევნები. არცერთ სხვა ფორმას, არცერთ სხვა არჩევნების ჩატარებას არ აქვს უნარი, რომ ქვეყანაში დაასრულოს არა ანტიდემოკრატიული რეჟიმი, ანტიამერიკული, როგორც ამერიკელებმაც თქვეს და ანტიევროპული, როგორც ამბობენ ევროპელები. ერთადერთი მშვიდობიანი გზა არის ახალი საპარლამენტო არჩევნები“, – განაცხადა სალომე ზურაბიშვილმა.

ამასთან, სალომე ზურაბიშვილმა აღნიშნა: „უცვლელია არჩევნების შესახებ „წინააღმდეგობის პლატფორმის“ ერთობლივი და ყველასთან შეთანხმებული პოზიცია – ჩვენ მოვითხოვთ საპარლამენტო არჩევნებს და თუ ოქტომბრამდე არ იქნება ჩანიშნული, მაშინ ვითხოვთ ერთობლივად – საპარლამენტო და ადგილობრივი არჩევნების ჩატარებას“.

ზურაბიშვილის განმარტებით, „ეს ორი მოთხოვნა, არჩევნების დანიშვნა და პოლიტპატიმრების გათავისუფლება, არ შეიცვლება“.

„ეს არჩევნები არ უნდა ჩატარდეს ივანიშვილის წესებით, ივანიშვილის და მისი სუს-ის კონტროლის ქვეშ. ამისთვის ჩვენ მოვამზადეთ სრულყოფილი დოკუმენტი, რომელიც ასახავს ჩვენს პოზიციებს და მოთხოვნებს როგორ უნდა ჩატარდეს ეს არჩევნები“, – განაცხადა სალომე ზურაბიშვილმა.

ოფიციალურად იხსნება და სრულფასოვან ფუნქციონირებას იწყებს თბილისის მშრალი პორტი, რეგიონში პირველი თანამედროვე სარკინიგზო საკონტეინერო და სატვირთო ტერმინალი, – ამის შესახებ საქართველოს პრემიერ-მინისტრმა, ირაკლი კობახიძემ თბილისის მშრალი პორტის გახსნის ღონისძიებაზე სიტყვით გამოსვლისას განაცხადა.

კობახიძის თქმით, ეს არის უმნიშვნელოვანესი სტრატეგიული ობიექტი, რომელიც საკვანძო როლს შეასრულებს კავკასიისა და ცენტრალური აზიის რეგიონის სავაჭრო ნაკადების გაძლიერებაში.

„თბილისის მშრალი პორტი 28.5 ჰექტარ ტერიტორიაზე სამ ფაზად შენდება; უკვე ამოქმედდა პირველი ფაზა, რაშიც ჩაიდო 21 მილიონი აშშ დოლარის ინვესტიცია და ამ პირველი ფაზის დასრულების შემდეგ შესაძლებელია წელიწადში 100 000 კონტეინერის დამუშავება. დარჩენილი ფაზების დასრულების შემდეგ მისი სიმძლავრე 200 000 კონტეინერამდე გაიზრდება. ეს არის უმნიშვნელოვანესი სტრატეგიული ობიექტი, რომელიც შეემატა ჩვენს ქვეყანას და ეს ობიექტი ჩვენს საზღვაო პორტებთან ერთად, როგორიც არის ფოთის, ბათუმის და შემდეგ უკვე ანაკლიის პორტები, საკვანძო როლს შეასრულებს კავკასიისა და ცენტრალური აზიის რეგიონის სავაჭრო ნაკადების გაძლიერებაში“, – განაცხადა პრემიერმა.

როგორც ირაკლი კობახიძემ აღნიშნა, ის არა მხოლოდ ქართულ პორტებს მოემსახურება, არამედ საერთაშორისო საზღვაო ხაზებისთვის საკონტეინერო ჰაბისა და დეპოს ფუნქციასაც შეასრულებს.

„ეს მნიშვნელოვნად გააუმჯობესებს კონტეინერების დამუშავებისა და გადაადგილების ოპერაციებს, განსაკუთრებით კი ჩინეთიდან და შორეული აღმოსავლეთიდან „შუა დერეფნის“ მეშვეობით გადაზიდული ტვირთებისთვის. მშრალი პორტის სტრატეგიული მდებარეობა – პირდაპირი წვდომა საერთაშორისო ავტომაგისტრალებთან, კავშირი ეროვნულ სარკინიგზო ქსელთან, სიახლოვე სომხეთისა და აზერბაიჯანის საზღვრებთან და თბილისის საერთაშორისო აეროპორტთან, მას რეგიონის ერთ-ერთ ყველაზე ეფექტურ ლოგისტიკურ ცენტრად აქცევს. მინდა, მადლობა გადავუხადო ინვესტორებს – „აბუ-დაბი პორტების ჯგუფს“, ჩვენს პარტნიორებს არაბთა გაერთიანებული საამიროებიდან, ასევე ნორვეგიულ „ვილჰელმსენ პორტ სერვისს“, ადგილობრივ კომპანია „ინვეკოს“, ყველა ინჟინერსა თუ მშენებელს, ვინც წვლილი შეიტანა ამ ძალიან მნიშვნელოვანი პროექტის განხორციელებაში. ეს პროექტი დიდი წინგადადგმული ნაბიჯია ჩვენი ქვეყნისთვის, მისი ეკონომიკური განვითარების გზაზე, რეგიონული ინფრასტრუქტურის განვითარებისთვის. ეს ყველაფერი კიდევ უფრო გააძლიერებს ჩვენი ქვეყნის დაკავშირებადობის და სატრანზიტო ფუნქციას, უზრუნველყოფს ჩვენი ქვეყნის გადაქცევას რეგიონის ჰაბად“, – განაცხადა პრემიერმა.

საჯარო სამსახურის და ანტიკორუფციულ კანონმდებლობაში შედის შესაბამისი ცვლილება, რომლის მიხედვითაც მრჩევლის ფუნქცია საჯარო სამსახურში იქნება არაანაზღაურებადი სამსახური, – განაცხადა საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა.

„თუკი პირი საჯარო სამსახურშია დასაქმებული, მხოლოდ ძირითად სამსახურთან მოუცდენლად შეეძლება იყოს მრჩეველი. ასევე შედის მეორე ცვლილება, რომ საჯარო სამსახურში ერთზე მეტი ანაზღაურებადი სამსახურის არსებობა დაუშვებელი იქნება. კონკრეტული რეგულაცია, რომელიც იქნა ინიციირებული, არის იმ გამოწვევებზე მორგებული და ადეკვატური, რომელიც არსებობს დღეს საჯარო სისტემაში“, – აღნიშნა დავით მათიკაშვილმა.

ცვლილებები შედის საჯარო სამსახურის შესახებ კანონში. მმართველი გუნდის მიერ ინიციირებული პროექტით საჯარო სამსახურში მრჩევლის პოზიცია ანაზღაურებადი აღარ იქნება. დღეს არსებული რედაქცია სახელმწიფო-პოლიტიკური თანამდებობის პირებისთვის ანაზღაურებადი მრჩევლის აყვანის შესაძლებლობას ითვალისწინებს, ცვლილებით კი მრჩევლის პოზიცია არაანაზღაურებადი საქმიანობა გახდება. გარდა ამისა, კანონპროექტის მიხედვით, ერთი და იგივე პირი საჯარო სამსახურში რამდენიმე ადგილას ვეღარ იმუშავებს.