პარტია „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ გადაცემაში „იმედი LIVE“ განაცხადა, რომ თვითმმართველობის არჩევნებში ის ოპოზიციური პარტია მიიღებს მონაწილეობას, ვისაც რაღაც დავალებას და შესაბამის თანხას მიიღებს.

„ოპოზიციას ვინ ეკითხება თვითმმართველობის არჩევნებში მიიღებს თუ არა მონაწილეობას, რასაც დაავალებენ იმას გააკეთებენ. მათ ერთადერთი უფლება აქვთ, შეეკამათონ, თუ ფულს არ მისცემენ ასე მონაწილეობას როგორ მივიღებთო“, – აღნიშნა მამუკა მდინარაძემ.

გადაცემის წამყვანის კითხვაზე, დღევანდელი მოცემულობით ოპოზიციური პარტიებიდან ვინ მიიღებს თვითმმართველობის არჩევნებში მონაწილეობას, მამუკა მდინარაძემ უპასუხა: ის, ვინც რაღაც დავალებას მიიღებს და შესაბამის თანხას.

„ნაციონალური მოძრაობა“ დანაყოფ პარტიებსა და კოლეგა ოპოზიციონერებს თვითმმართველობის არჩევნების ბოიკოტისკენ მოუწოდებს. ოპოზიციაში აზრთა სხვაობაა. ნაწილი ირწმუნება, რომ მონაწილეობას არ იღებს 4 ოქტომბრის არჩევნებში. „ლელომ “კი პოზიცია შეარბილა.

შინაგან საქმეთა მინისტრის მოადგილე ალექსანდრე დარახველიძე სპეკულაციას უწოდებს გავრცელებულ ინფორმაციას, თითქოს 2025 წლის 17 აპრილს საქართველოს მთავრობის მიერ განხორციელებული ცვლილების შედეგად კონკრეტული ქვეყნის მოქალაქეებს საქართველოში უვიზოდ შემოსვლის უფლება მიეცათ.

შინაგან საქმეთა მინისტრის მოადგილე ცვლილებების მიზანს განმარტავს და აღნიშნავს, რომ მათი მიზანია არალეგალურ მიგრაციასთან ბრძოლის გამკაცრება და კონკრეტული ქვეყნის მოქალაქეებისთვის დამატებითი შეზღუდვების დაწესება.

„ინფორმაცია, რომ საქართველოს მთავრობის მიერ განხორციელებული ცვლილების შედეგად კონკრეტული ქვეყნის მოქალაქეებს საქართველოში უვიზოდ შემოსვლის უფლება მიეცათ, არის მტკნარი სიცრუე და სპეკულაცია. ცვლილებების არსი მდგომარეობს იმაში, რომ დაწესდა კონკრეტული ქვეყნების ჩამონათვალი, რომელთა მოქალაქეებს, იმ შემთხვევაში ,თუ აქვთ სპარსეთის ყურის ქვეყნების ვიზა ან ბინადრობა, ამ დოკუმენტზე უნდა იყოს მოქმედების ვადა 1 წელი ან მეტი. მხოლოდ ამ შემთხვევაში მიეცემათ მათ საქართველოში შემოსვლის უფლება და დარჩენის შესაძლებლობა. ცვლილებების განხორციელებამდე არ იყო განსაზღვრული კონკრეტული ვადა, პირიქით, შესაძლებელი იყო, რომ, მაგალითად, ერთკვირიანი ვიზით ან ბინადრობის მოწმობით შემოსულიყო, მაგალითად, ავღანეთის მოქალაქე და საქართველოში დარჩენილიყო. ცვლილებების მიზანს წარმოადგენს, რომ გამკაცრდეს მიდგომა კონკრეტული ქვეყნის მოქალაქეებთან მიმართებაში, ვინაიდან ფიქსირდებოდა შემთხვევები მათი მხრიდან თავშესაფრის მოთხოვნის და ქვეყანაში არალეგალურად დარჩენის. ამიტომ გვსურს, საზოგადოება დავარწმუნოთ, რომ ცვლილებების მიზანს წარმოადგენს არალეგალურ მიგრაციასთან ბრძოლის გამკაცრება და კონკრეტული ქვეყნების მოქალაქეებისთვის დამატებითი შეზღუდვების დაწესება“, – განაცხადა ალექსანდრე დარახველიძემ.

აღნიშნულთან დაკავშირებით შინაგან საქმეთა სამინისტრომ დღეს განცხადებაც გაავრცელა.

მოსალოდნელი იყო, რომ სალომე ზურაბიშვილი 26 მაისის თემას გამოიყენებდა იმ ამოცანის შესასრულებლად, რომელიც საკუთარი ხელმძღვანელების მხრიდან, დიდი ხანია, აქვს, – ამის შესახებ ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისივე თქმით, სალომე ზურაბიშვილს კვლავ სურს, დესტრუქციულ ძალებში ლიდერი იყოს, მათ შორის „ნაციონალური მოძრაობის“.

„მოსალოდნელი იყო, რომ სალომე ზურაბიშვილი 26 მაისის თემას გამოიყენებს იმ ამოცანის შესასრულებლად, რაც მას საკმაოდ დიდი ხანია, აქვს დაყენებული თავისი ხელმძღვანელების მხრიდან. იგი ამ შემთხვევაში მარიონეტია, ყოველთვის „დიფ სთეითის“ მარიონეტი იყო. თუკი გავაანალიზებთ იმ განცხადების უტიფრობის დონეს, რომელიც მან გააკეთა 26 მაისს პრეზიდენტობის პერიოდში, მთავარსარდლობის პერიოდში, ახალწვეულების წინაშე, უცხოელი სტუმრების, ომში დაღუპული გმირების ოჯახების წინაშე, უნდა ვიგულისხმოთ, საქართველოს წინააღმდეგ ეს ბრძოლა იქნება ერთ-ერთი მთავარი შემადგენელი ნაწილი იმ სტრატეგიისა, რომელიც უტიფარ ოპოზიციას ახასიათებს.

სალომე ზურაბიშვილს კვლავ უნდა ლიდერი იყოს ამ დესტრუქციულ ძალებში, მათ შორის „ნაციონალური მოძრაობის“ ლიდერობაც გადაწყვიტა. იგი ყველანაირად ეცდება, მისი სტრატეგია გაცილებით უფრო დამაზიანებელი იყოს, ვიდრე ნებისმიერი სხვა ე.წ. პოლიტიკური სუბიექტის მოსაზრებები, თუ როგორ შეიყვანონ ჩვენი ქვეყანა დესტაბილიზაციის შეუქცევად პროცესში. ეს არის მისი ამოცანა, მისი ხედვა, მისი შინაარსი და ეს განცხადებაც, რომელიც გააკეთა, რასაკვირველია, ამ მიზანს ემსახურება“, – განაცხადა ვოლსკიმ.

ცნობისთვის, საქართველოს ყოფილმა პრეზიდენტმა, სალომე ზურაბიშვილმა ბრიფინგზე განაცხადა, რომ საზოგადოების სხვადასხვა წარმომადგენელთან ერთად 26 მაისის მოსამზადებელი კომიტეტის შესაქმნელად მუშაობას იწყებს.

პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი აცხადებს, რომ ამერიკის შეერთებულ შტატებში საქართველოს ელჩი უახლოეს ხანებში ეყოლება. ამის შესახებ ამერიკის შეერთებულ შტატებში ვიზიტით მყოფმა ლევან დავითაშვილმა ტელეკომპანია „იმედის“ ეთერში პირდაპირი ჩართვისას განაცხადა.

„საქართველოს მხრიდან წარდგენილ კანდიდატებთან დაკავშირებით აშშ-ის ადმინისტრაციის მხრიდან არსებობს დადებითი პოზიციები, მიმდინარეობს სტანდარტული პროცედურები და აქედან გამომდინარე, ეს არ არის საკითხი, რომელიც ითხოვს ჩვენს ჩართულობას. ეს საკითხი პროცედურების შესაბამისად გადაწყდება და უახლოეს ხანებში ჩვენ გვეყოლება ამერიკის შეერთებულ შტატებში ელჩი, რაც, რა თქმა უნდა, ორმხრივ ურთიერთობებს კიდევ უფრო გააძლიერებს“, – განაცხადა პირველმა ვიცე-პრემიერმა.

რაც შეეხება საქართველოსა და ამერიკის შეერთებულ შტატებს შორის არსებულ ურთიერთობებს, როგორც ლევან დავითაშვილმა აღნიშნა, ორივე ქვეყნის ხელისუფლებას საკმაოდ რთული მემკვიდრეობა ერგო და, შესაბამისად, ქვეყნებს შორის სტრატეგიული თანამშრომლობა ახალი ფურცლიდან უნდა იქნეს დაწყებული.

„რა თქმა უნდა, წინა ადმინისტრაციის საქმიანობის ბოლო თვეებში ბევრი რამ გაუარესდა ჩვენს ურთიერთობებში, სტრატეგიული თანამშრომლობა ახალი ფურცლიდან უნდა დავიწყოთ. სტრატეგიული თანამშრომლობის აღდგენა ორივე ხელისუფლებისთვის, ვფიქრობ, ერთ-ერთი მთავარი ამოცანაა. ჩვენ ძალიან ბევრი კონკრეტული ახალი მიმართულება შეგვიძლია, შევიტანოთ დღის წესრიგში, რაც, რა თქმა უნდა, ხელსაყრელი უნდა იყოს ორივე ქვეყნისთვის – როგორც ამერიკის შეერთებული შტატებისთვის, ისე საქართველოსთვის“, – აღნიშნა პირველმა ვიცე-პრემიერმა.

კიდევ ერთი საკითხი, რომელზეც ლევან დავითაშვილმა ისაუბრა, ამერიკის შეერთებული შტატების წინა ადმინისტრაციის მიერ საქართველოს ხელისუფლების ზოგიერთი წარმომადგენლის მიმართ დაწესებული სანქციებია. ლევან დავითაშვილის შეფასებით, ეს  სრულიად უსაფუძვლოდ მოხდა და ამ კუთხით არსებული ვითარება უნდა შეიცვალოს.

„სახელმწიფო დეპარტამენტში საუბარი გვქონდა ზოგადად სანქციების აღსრულებაზე, საქართველო არის სანიმუშო ქვეყანა, აშშ-ის პარტნიორი სანქციების აღსრულების კუთხით. თუმცა, სანქციები, რომლებიც აბსოლუტურად უსაფუძვლოდ იქნა შემოღებული საქართველოს ხელისუფლების ზოგიერთი წარმომადგენლის მიმართ, რა თქმა უნდა, ერთ-ერთი დამაბრკოლებელი ფაქტორია ურთიერთობებში და, რა თქმა უნდა, ეს უნდა შეიცვალოს. გვესმის, რომ საქართველოს ხელისუფლებისთვის, ისევე როგორც ახალი ადმინისტრაციისთვის, მემკვიდრეობა საკმაოდ რთულია და ამას დრო დასჭირდება, მაგრამ მნიშვნელოვანია, რომ ჩვენ ვიწყებთ დიალოგს და ამას სჭირდება შესაბამისი პროცედურები იმ შემთხვევაშიც კი, თუ არსებობს პოლიტიკური ნება. რა თქმა უნდა, ჩვენ დავინახეთ, რომ არსებობს თანამშრომლობის, სტრატეგიული ურთიერთობების კიდევ უფრო გამყარების ნება და ეს ყველაფერი იმედს გვაძლევს, რომ ამერიკის შეერთებულ შტატებთან ურთიერთობებს კიდევ უფრო გავაღრმავებთ და გავაძლიერებთ“, – განაცხადა ლევან დავითაშვილმა.

პირველი ვიცე-პრემიერის, ეკონომიკისა და მდგრადი განვითარების მინისტრის, ლევან დავითაშვილის განცხადებით, ამერიკის შეერთებული შტატების ახალი საგარეო პოლიტიკა მთლიანად უკავშირდება ეკონომიკურ ინტერესებს და ამ ტიპის მიდგომები საქართველოსთვისაც რაციონალური და მისაღებია.

„ვფიქრობ, ეს წარმოადგენს ძალიან კარგ წინაპირობას, რათა ჩვენი თანამშრომლობა იყოს ეფექტიანი და მომავალში კიდევ უფრო გაღრმავდეს. ყველა შეხვედრა, რომელიც იმართება ამერიკის ახალ ადმინისტრაციასთან, თავისთავად, მოიცავს პოლიტიკურ ურთიერთობებს. პოლიტიკა და ეკონომიკა ამ შემთხვევაში მჭიდროდ არის დაკავშირებული, მათი გამიჯვნა, პრაქტიკულად, შეუძლებელია“, – აღნიშნა ლევან დავითაშვილმა.

მისივე თქმით, ამერიკის შეერთებული შტატებთან თანამშრომლობა გარკვეული მიმართულებებით განსაკუთრებით ხელსაყრელია და შეესაბამება საქართველოს ეროვნულ ინტერესებს. ლევან დავითაშვილის შეფასებით, ეს მიმართულებები ძალიან საინტერესოა და შესაბამისობაშია აშშ-ის ახალი ხელისუფლების ინტერესებთან.