ვლადიმერ პუტინი სულ უფრო თამამად ამწვავებს დაპირისპირებას და პროვოცირებს დასავლეთთან დრონების საშუალებით. არსებობს ეჭვი: რუსეთი ჯაშუშობს და ჩვენი გახლეჩა სურს. წერს გერმანული გამოცემა „BILD“.

სტატიის თანახმად, კანცლერი ფრიდრიხ მერცი უკვე საზოგადოებას აფრთხილებს: „ჩვენ ომში არ ვართ, მაგრამ მშვიდობაშიც აღარ ვიმყოფებით“.

მიუხედავად ამისა, წერს გამოცემა, 1400 გერმანული კომპანია კვლავაც აგრძელებს საქმიანობას ქვეყანაში, რომელსაც ომის წამომწყებად მიიჩნევენ. რატომ?

გერმანიის ეკონომიკური დელეგაციის მონაცემებით რუსეთში, საუბარია „გერმანული კომპანიების შვილობილ კომპანიებსა ან უმრავლესობის მფლობელობაზე“, გასულ წელს მიღებული შემოსავალი შეადგენდა დაახლოებით 20 მილიარდ ევროს.

BILD-მა ათეულობით მსხვილ კომპანიას მიმართა კითხვით: რატომ აგრძელებთ საქმიანობას რუსეთში? პასუხი მხოლოდ რამდენიმე კომპანიამ გასცა. მათი პოზიცია ერთმანეთის მსგავსია: ომი, რასაკვირველია „კატეგორიულად“ გახლავთ დაგმობილი და სანქციებიც სრულად სრულდება, თუმცა, საქმიანობის გაგრძელებისთვის არსებობს გარკვეული მიზეზები.

მიუხედავად რუსეთის მიერ წარმოებული ომისა და დასავლეთის სანქციების რეჟიმისა, რიგი გერმანული კომპანიები კვლავ აგრძელებენ ოპერირებას რუსეთში, რაც ისინი ამართლებენ სოციალური პასუხისმგებლობით და ჰუმანიტარულ მიზნებზე დაყრდნობით.

„Hochland“, რომელიც სასურსათო სექტორში ოპერირებს, საკუთარი რუსეთში ყოფნის გამართლებას თანამშრომლებისა და გრძელვადიანი პარტნიორების წინაშე ვალდებულებით ხსნის. „Beiersdorf“, რომელიც თავის მოვლის საშუალებებს Nivea-ს და Eucerin-ს აწარმოებს, ასევე, კომპანია „Metro“, მიუთითებენ თავიანთ პასუხისმგებლობაზე ადგილობრივი თანამშრომლებისა და მომხმარებლების წინაშე, მიუხედავად იმისა, რომ მათი შემოსავალი რუსულ ბაზარზე შემცირებულია.

ჯანდაცვის სექტორში მოქმედი კომპანიები, როგორიცაა B. Braun და Merck, აცხადებენ, რომ მათი საქმიანობა მხოლოდ აუცილებელ სამედიცინო სერვისებზეა ორიენტირებული, მათ შორის, ქრონიკული პაციენტების სიცოცხლისთვის მნიშვნელოვანი მკურნალობის უზრუნველყოფაზე.

ალექსანდრ ლუკაშენკო უკრაინელ კოლეგას რუსეთთან სწრაფად მოლაპარაკებას ურჩევს. ამ თემაზე ბელარუსის პრეზიდენტმა რუსული მედიისთვის მიცემულ ინტერვიუში ისაუბრა.

როგორც მან აღნიშნა, ბედნიერებას უკრაინას მხოლოდ სლავური სახელმწიფოები მოუტანენ, რასაც ვოლოდიმირ ზელენსკი უნდა მიხვდეს და მოლაპარაკების მაგიდას მიუჯდეს. ლუკაშენკოს აზრით, უკრაინის პრეზიდენტმა ეს სწრაფად უნდა გააკეთოს, რადგანაც რუსეთი ფრონტზე წინ მიიწევს.

„მინდა, ჩემი რჩევა შეისმინოს და მიხვდეს, რომ უკრაინის ტერიტორიაზე ბედნიერებას ვერავინ მოიტანს, გარდა სლავური სახელმწიფოებისა. ამიტომ, მოლაპარაკებების მაგიდას უნდა მიუჯდეს. სწრაფად უნდა იმოქმედოს, რადგან რუსეთი ფრონტზე წინ მიიწევს“, – განაცხადა ლუკაშენკომ.

რუსეთი უკრაინისთვის „ტომაჰავკის“ შორ მანძილზე მოქმედი რაკეტის შესაძლო მიწოდების საკითხით შეშფოთებულია, – ამის შესახებ კრემლის პრესმდივანი დიმიტრი პესკოვი აცხადებს.

დიმიტრი პესკოვის თქმით, „ტომაჰავკის“ გადაცემასთან დაკავშირებით კომენტარები ხშირად კეთდება, რასაც კრემლი ყურადღებით ისმენს და „სწავლობს“.

მისივე განცხადებით, იარაღის სერიოზულობის მიუხედავად, „ტომაჰავკებს“ ფრონტის ხაზზე ვითარების შეცვლა მაინც არ შეუძლია.

„ტომაჰავკის“ საკითხი დიდ შეშფოთებას იწვევს და პრეზიდენტმა პუტინმა ამის შესახებ უკვე ისაუბრა. ეს იარაღი განსაკუთრებულია, ის შეიძლება, იყოს ბირთვული ან არაბირთვული. აქვს მნიშვნელოვანი მოქმედების რადიუსი, სერიოზული იარაღია. თუმცა, ის ფრონტის ხაზზე არსებულ სიტუაციას ვერ შეცვლის“, – აცხადებს კრემლის პრესმდივანი.

პესკოვის თქმით, „დაძაბულობის ესკალაციის თვალსაზრისით, ყველა მხრიდან ძალიან დრამატული მომენტია“.

„რუსული მხარე აგრძელებს საუბარს იმაზე, რომ ჩვენ მზად ვართ მშვიდობიანი მოგვარებისთვის, ასევე გვესმის, რომ ტრამპი მუდმივად საუბრობს მოლაპარაკებების მაგიდასთან დაჯდომის აუცილებლობაზე და აქედან გამომდინარე გამოგვაქვს დასკვნა, რომ ის პოლიტიკურ ნებას ინარჩუნებს“, – აცხადებს დიმიტრი პესკოვი და აღნიშნავს, რომ აშშ-ის პრეზიდენტისგან განსხვავებით, ევროპასა და კიევს ამ მიმართულებით რაიმეს გაკეთების სურვილი არ აქვთ.

ჩინეთმა აშშ-ის პრეზიდენტის, დონალდ ტრამპის მიერ ჩინურ საქონელზე დაწესებულ ბოლო ტარიფებს თვალთმაქცური უწოდა. ჩინეთის ვაჭრობის სამინისტრომ განაცხადა, რომ იშვიათმიწა ელემენტებზე ექსპორტის კონტროლი აშშ-ის მიერ გასულ თვეში მადრიდში ორმხრივი სავაჭრო მოლაპარაკებების შემდეგ მიღებული ზომების სერიას მოჰყვა.

პეკინმა მაგალითად მოიყვანა ჩინური კომპანიების აშშ-ის სავაჭრო შავ სიაში დამატება და ვაშინგტონის მიერ ჩინეთთან დაკავშირებული გემებისთვის პორტის გადასახადის დაწესება.

„აშშ-ის ქმედებებმა მძიმე ზიანი მიაყენა ჩინეთის ინტერესებს და შეარყია ორმხრივი ეკონომიკური და სავაჭრო მოლაპარაკებების ატმოსფერო, ჩინეთი მტკიცედ ეწინააღმდეგება მათ. მაღალი ტარიფების განზრახ მუქარა ჩინეთთან ურთიერთობის სწორი გზა არ არის. ჩინეთის პოზიცია სავაჭრო ომთან დაკავშირებით თანმიმდევრულია: ჩვენ ეს არ გვინდა, მაგრამ არ გვეშინია მისი“, – ნათქვამია განცხადებაში.

ჩინეთი აცხადებს, რომ ექსპორტის კონტროლი ექსპორტის აკრძალვას არ ნიშნავს.

“ბრიუსელმა, შესაძლოა, წლის ბოლომდე არმია ქუჩებში გაიყვანოს”, – განაცხადა ბელგიის თავდაცვის მინისტრმა თეო ფრანკენმა Le Soir-თან ინტერვიუში.

თავდაცვის მინისტრი შეშფოთებას გამოთქვამს დედაქალაქში არსებული მდგომარეობის გაუარესებით.

„სიტუაცია დრამატული გახდა. როგორც უსაფრთხოების, ასევე პოლიტიკური და სოციალური თვალსაზრისით. იმის საპირისპიროდ, რასაც შეიძლება გაიგონებდეთ, მე ძალიან შეშფოთებული ვარ ჩვენი დედაქალაქის მდგომარეობის გაუარესებით“,– თქვა მან.

ფრანკენმა ხაზგასმით აღნიშნა, რომ ქუჩების უსაფრთხოება პოლიციის პასუხისმგებლობაა და არა სამხედროების. თუმცა, მან დასძინა, რომ ქვეყნის შინაგან საქმეთა მინისტრმა მიმართა მას ამ საკითხთან დაკავშირებით.

“შესაძლებელია თუ არა ჯარის ქუჩებში გაყვანა წლის ბოლომდე? მე არ მითქვამს „კი“, მაგრამ არც „უარი“, – თქვა ფრანკენმა.

თურქეთის პრეზიდენტმა, რეჯეფ თაიფ ერდოღანმა ღაზის სექტორში ჩასვლის სურვილი გამოთქვა. ქალაქ რიზეში გამართულ მმართველი პარტიის გაფართოებული საკონსულტაციო საბჭოს შეხვედრაზე სიტყვით გამოსვლისას, ერდოღანმა ისრაელს მოუწოდა, შეასრულოს ნაკისრი ვალდებულებები.

„ნება მომეცით, პირდაპირ და ცალსახად განვაცხადო: თურქეთი თურქეთზე დიდია. აქტიური საგარეო პოლიტიკით, პრინციპული პოზიციითა და დიპლომატიური გამოცდილებით, ჩვენი ქვეყანა ბოლო დროს მიმდინარე პროცესის ერთ-ერთ მამოძრავებელ ძალად იქცა. ჩვენმა პალესტინელმა ძმებმა, განსაკუთრებით კი „ჰამასმა“, გონივრული დამოკიდებულებით აჩვენეს, რომ ისინი მზად არიან მშვიდობისთვის. შესაბამისად, ორწლიანი ჩაგვრის, გენოციდის, ნგრევისა და სისასტიკის შემდეგ, ღაზის მცხოვრებლების სახეებზე პირველად ღიმილი გაჩნდა, თუმცა სუსტად. ჯერ მე წავალ ღაზაში, შემდეგ კი თქვენ. ვინც რას უნდა ამბობდეს, ჩვენთვის მისაღებია ყველა ძალისხმევა, ყველა ხელმოწერა და ყველა ნაბიჯი, რომელსაც ღაზის დაჩაგრული და დაზარალებული მოსახლეობისთვის შვება მოაქვს”, – განაცხადა რეჯეფ თაიფ ერდოღანმა.