საქართველოს პრეზიდენტმა მისცა შესაძლებლობა იმ პოლიტიკოსებს, რომლებსაც სურთ არჩევნებში მონაწილეობა, რომ არ იყოს საბაბებზე საუბარი, თითქოს არ ჰქონდათ შესაძლებლობა, საარჩევნო კამპანია ეწარმოებინათ, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

პაპუაშვილის თქმით, პრეზიდენტმა, პოლიტიკოსების სურვილის შემთხვევაში, მათი შეწყალების მზაობა გამოთქვა.

„მიხეილ ყაველაშვილის განცხადებაში იყო არგუმენტაცია ამასთან დაკავშირებით. ვხედავთ, რომ უკვე დაწყებულია თავდასხმა ადგილობრივი თვითმმართველობის არჩევნებზე. ვხედავთ, არის მცდელობა, ჩაიშალოს. მათ შორის იყო უცხოური დაფინანსების მცდელობები, რომ დაეფინანსებინა, მაგალითად, ბრიტანეთის საელჩოს ორგანიზაციები, რომლებსაც პირდაპირ თავიანთ მიზნად აქვთ გამოცხადებული არჩევნების ჩაშლა. შემდეგ სპეკულაციები რომ არ იყოს, პრეზიდენტის განმარტებით, მისცა შესაძლებლობა იმ პოლიტიკოსებს, რომლებსაც სურთ არჩევნებში მონაწილეობის მიღება. რომ არ იყოს საბაბებზე საუბარი, თითქოს არ ჰქონდათ შესაბამისი შესაძლებლობა, საარჩევნო კამპანია ეწარმოებინათ. თუკი აქვთ სურვილი, მათი შეწყალების მზაობა გამოთქვა“, – განაცხადა პაპუაშვილმა.

ამასთან, როგორც პაპუაშვილმა აღნიშნა, არის ადგილობრივი თვითმმართველობის არჩევნების ჩაშლის მცდელობები.

„ვთქვი, რომ იყო მცდელობა ბრიტანეთის საელჩოს მხრიდან, დაეფინანსებინათ ორაგნიზაციები, რომლებსაც პირდაპირ გაცხადებული მიზანი აქვთ, ჩაშლონ არჩევნები. ასევე, არიან ორანიზაციები – „საერთაშორისო გამჭვირვალობა“, ნინო ლომაჯარიას „ენჯეო“, „საფარი“, ბაია პატარაიას „ენჯეო“, რომლებიც ეს დღეები პირდაპირ საჯაროდ აცხადებენ, რომ არჩევნების ბოიკოტი და საბოტაჟი უნდა იყოს. შეგახსენებთ, ეს ორგანიზაციები პირდაპირ ფინანსდებიან ევროკავშირის საელჩოსგან. ასე რომ, ევროკავშირის საელჩო დღესაც აფინანსებას ორგანიზაციებს, რომლებსაც გაცხადებული აქვთ მიზანი, ჩაშალონ თვითმმართველობის არჩევნები. ეს სკანდალი იქნებოდა, ამას რომ არ იყოს შეჩვეული ქართული საზოგადოება, რომ ევროკავშირის საელჩოდან ფინანსდებიან ადამიანები, ორგანიზაციები, რომლებიც სიძულვილის, პროპაგანდის გავრცელებასთან ერთად, ახლა უკვე კონკრეტულად კონცენტრირებული არიან ადგილობრივი არჩევნების ჩაშლაზე. ამაზე ღიად და ხმამაღლა უნდა ვისაუბროთ, რომ ის „ენეჯეოები“, რომლებიც ცდილობენ და უნდათ, ჩაშალონ ადგილობრივი თვითმმართველობის არჩევნები, ფინანსდებიან ევროკავშირის საელჩოდან“, – განაცხადა შალვა პაპუაშვილმა.

თავად პრეზიდენტ ტრამპის მიერ პროპაგანდისტობაში მხილებული „რადიო თავისუფლება“ ავრცელებს გადამდგარი ელჩის ინტერვიუს. არც ერთი, არც მეორე ჩვენთვის საინტერესო არ არის, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილს კითხვა დაუსვეს „რადიო თავისუფლების“ მიერ გავრცელებულ აშშ-ის მოქმედ ელჩთან, რობინ დანიგანთან ჩაწერილი ინტერვიუს იმ ნაწილზე, სადაც დანიგანი აცხადებს, რომ „ქართული ოცნების“ ხელმძღვანელობამ მას გაუგზავნა პირადი წერილი ტრამპის ადმინისტრაციისთვის. რობინ დანიგანის თქმით, ეს წერილი „იყო მუქარის შემცველი, შეურაცხმყოფელი, არასერიოზული და უკიდურესად ცუდად იყო მიღებული ვაშინგტონში“.

შალვა პაპუაშვილის განცხადებით, „რადიო თავისუფლება“ თავად ტრამპის მიერ არის მხილებული, როგორც პროპაგანდისტული მედია, აქვს დაფინანსება შეწყვეტილი და ტრამპის სურვილია, საერთოდ დაიხუროს „რადიო თავისუფლება“, როგორც პროპაგანდისტული ინსტრუმენტი.

შალვა პაპუაშვილი ამბობს, რომ გადამდგარი ელჩის განცხადებებზე რაიმე კომენტარის გაკეთებას აზრი არ აქვს.

„შეგახსენებთ, რომ თავის დროზე „რადიო თავისუფლება“ შექმნა ცენტრალურმა სადაზვერვო სამსახურმა, სააგენტომ და მისი ბიუჯეტიდან ფარულად ფინანსდებოდა თავიდან. შემდეგ გარკვეული სხვა სქემები დალაგდა, თუმცა ეს არის ოფიციალურად პროპაგანდისტული მედია და მათი მხრიდან გადამდგარი ელჩის ინტერვიუს გავრცელებაზე ახლა ზედმეტ კომენტარს ვერ გავაკეთებ.

ჩვენ ორს შორის ვადამდე ვინ გადადგა, მგონი ცნობილია, ასე რომ, როგორც იტყვიან, ყველაფერი გასაგებია. ჩვენი ინტერესის სფერო არ არის, რომ გადამდგარი ელჩის ინტერვიუზე რაიმე კომენტარი ვაკეთო. გადამდგარი ელჩის განცხადებებზე რაიმე კომენტარის გაკეთებას აზრი არ აქვს და ჩვენი ინტერესის სფეროს არ წარმოადგენს. ჩვენს შორის ვადამდე ვინ გადადგა, მგონი, ყველა ხედავს, ასე რომ, ყველაფერი გასაგებია“, – განაცხადა შალვა პაპუაშვილმა.

„რადიო თავისუფლებამ“ აშშ-ის მოქმედ ელჩთან, რობინ დანიგანთან ჩაწერილი ინტერვიუს ნაწილი 6 ივლისს გაავრცელა. ინტერვიუში დანიგანი ასევე აცხადებს, რომ სურდა ბიძინა ივანიშვილთან პირისპირ შეხვედრა, რადგან ჰქონდა პასუხი აშშ-ის სახელმწიფო მდივნისგან, მარკო რუბიოსგან. მისივე თქმით, რუბიომ სთხოვა, ეს პასუხი ბიძინა ივანიშვილისთვის პირადად გადაეცა, თუმცა ივანიშვილისგან შეხვედრაზე უარი მიიღო.

დაინტერესებული მხარეები ეუთო-ს რეზოლუციას საარჩევნო ადმინისტრაციის დისკრედიტაციისა და ზოგადად საარჩევნო პროცესის დასაზიანებლად იყენებენ, – ამის შესახებ აღნიშნულია საქართველოს ცენტრალური საარჩევნო კომისიის განცხადებაში.

როგორც ცესკო-ს განცხადებაშია აღნიშნული, მიუხედავად იმისა, რომ არც ეუთო/ოდირ-ის მიერ პარლამენტის არჩევნებთან დაკავშირებით გავრცელებულ ანგარიშში და არც ეუთო-ს რეზოლუციაში საუბარი არ არის არჩევნების გაყალბებაზე, კონკრეტული პირები მედიის საშუალებით კვლავ აკეთებენ მანიპულაციურ განცხადებებს, თითქოს არჩევნები გაყალბდა და ამას ადასტურებს ეუთო-ს რეზოლუცია.

„ეუთო-ს რეზოლუციაში, ისევე როგორც ეუთო/ოდირ-ის დასკვნაში, საუბარია მხოლოდ  გარკვეული სახის დარღვევებზე და არა არჩევნების გაყალბებაზე. აქვე უნდა ითქვას, თუ ჩვენ გადავხედავთ სხვადასხვა ქვეყანაში ჩატარებული არჩევნების შესახებ გამოქვეყნებულ ანგარიშებს, ცხადად ვნახავთ, რომ დარღვევებზე/ხარვეზებზე საუბარი ყველგან გვხვდება, მაგრამ მნიშვნელოვანია, რომ ისინი არ ახდენდნენ გავლენას არჩევნების შედეგებზე. საქართველოში გამოვლენილ ხარვეზებს გავლენა არ მოუხდენია მთავარზე – ამომრჩევლის მიერ გაკეთებულ არჩევანზე და არჩევნების შედეგებზე. აღსანიშნავია, რომ საზოგადოებამ მედიის საშუალებით თავადაც ნახა ეუთო-ს გენერალური მდივნის განცხადება ეუთო-ს ასამბლეაზე, რომ მოსახლეობის ნება ასახულია არჩევნების შედეგში. ამასთან, აუცილებლად უნდა აღინიშნოს, რომ ეუთო-ს რეზოლუციაში არჩევნებთან დაკავშირებით ასახული მოსაზრებები ეწინააღმდეგება ეუთო/ოდირ-ის ანგარიშის მიგნებებს.

გვინდა, საზოგადოებას შევახსენოთ ეუთო/ოდირ-ის დასკვნა, რომლითაც არჩევნების დღეს საარჩევნო უბნების აბსოლუტურ უმრავლესობაში (90% და მეტი) საარჩევნო პროცესის მიმდინარეობა შეფასდა დადებითად. ხაზგასმულია, რომ საარჩევნო ელექტრონული აპარატების 99%-მა იმუშავა გამართულად, ხმის მთვლელი აპარატის შედეგები კი ემთხვეოდა ხელით დათვლილ შედეგებს. პოზიტიურად არის შეფასებული საარჩევნო ადმინისტრაციის გამჭვირვალობის პოლიტიკა და მის მიერ განხორციელებული მთელი რიგი საქმიანობები. ხაზგასმულია, რომ ამომრჩეველთა სიის ფორმირების პროცესი იყო ინკლუზიური და დამკვირვებელთა უმრავლესობას არ გამოუთქვამს მნიშვნელოვანი შენიშვნები საარჩევნო სიების სიზუსტესთან დაკავშირებით. აღნიშნულია, რომ არჩევნები იყო კონკურენტული და ცესკო-ს მხრიდან პარტიების რეგისტრაციის პროცესი ინკლუზიურად წარიმართა.

აღსანიშნავია, რომ ეუთო/ოდირ-ის დასკვნაში გამოთქმულია გარკვეული წუხილები და რეკომენდაციები საარჩევნო პროცესთან დაკავშირებულ რიგ საკითხებთან დაკავშირებით, როგორც ეს ძირითადად სხვადასხვა ქვეყნის შემთხვევაშიც გვხვდება, დამახასიათებელია საარჩევნო პრაქტიკისთვის და არცერთ შემთხვევაში არ წარმოადგენს არჩევნების ლეგიტიმურობის უგულებელყოფის საფუძველს, მით უმეტეს იმ ფონზე, როდესაც დასკვნაში არჩევნების გაყალბებაზე საუბარი არ არის.

ეს ყველაფერი კი კიდევ ერთხელ ადასტურებს, რომ კონკრეტული პოლიტიკოსები მხოლოდ საკუთარი პოლიტიკური დღის წესრიგიდან გამომდინარე მოქმედებენ, საკუთარი პოზიციების გასამყარებლად ეუთო-ს ანგარიშებით სპეკულაციას და საზოგადოების შეცდომაში შეყვანას ცდილობენ.

საზოგადოების შეცდომაში შეყვანას და საარჩევნო პროცესის დისკრედიტაციას ისახავს მიზნად რამდენიმე დღის წინ ნინო ლომჯარიას მიერ გაკეთებული განცხადებაც, რომლითაც ამტკიცებს, რომ 2024 წლის საპარლამენტო არჩევნები გაყალბდა. საზოგადოებას, გვინდა, შევახსენოთ, რომ ქალბატონი ლომჯარია აღნიშნულ არჩევნებს სადამკვირვებლო მისიის, „ჩემი ხმის“ სახელით აკვირდებოდა, რომელმაც არჩევნების შემდგომ არაერთი დეზინფორმაცია გაავრცელა.

მისიის წარმომადგენლები საზოგადოებას არწმუნებდნენ, რომ ამ არჩევნებზე მრავალჯერად ხმის მიცემას ჰქონდა ადგილი, თუმცა ამის დამადასტურებელი ვერანაირი მტკიცებულება ვერ წარმოადგინეს. როგორც სამართლებრივი, ისე საზოგადოებრივი პასუხისმგებლობა მოითხოვს, რომ ასეთ მძიმე ბრალდებებს თან ახლდეს დამაჯერებელი და გადამოწმებადი მტკიცებულებები, რასაც ამ შემთხვევაში არ ჰქონია ადგილი და ვერც ექნებოდა. შესაბამისად, ფაქტია, რომ მათი, როგორც სადამკვირვებლო მისიის ქმედება ცდება ობიექტური შეფასების ფარგლებს და ემსახურება არა საარჩევნო პროცესის გაუმჯობესებას, არამედ საზოგადოებრივ აზრზე ზემოქმედებას და დეზინფორმაციის გავრცელებას.

ცესკო კიდევ ერთხელ უსვამს ხაზს, რომ მზად არის ითანამშრომლოს ყველა იმ ორგანიზაციასთან, რომელიც საქმიანობს მიუკერძოებლად, კანონიერად და ობიექტურად. ამავდროულად, მკაცრად გმობს ყველა მცდელობას, რომელიც მიზნად ისახავს დემოკრატიული პროცესების მიზანმიმართულ დისკრედიტაციას  და არჩევნების შედეგების ლეგიტიმურობის ხელყოფას. საარჩევნო ადმინისტრაცია უპასუხოდ არ დატოვებს არცერთ უსაფუძვლო განცხადებას და საზოგადოებას მიაწვდის გადამოწმებულ და ობიექტურ ინფორმაციას“, – აღნიშნულია საქართველოს ცენტრალური საარჩევნო კომისიის განცხადებაში.

მიხეილ სააკაშვილი საერთოდ სხვა ქვეყნიდან ჩამოვიდა საკუთარი ფეხით ციხეში ჩასაჯდომად, იმიტომ რომ ეს ქვეყანა რუსეთში არ წასულიყო,- განაცხადა „ნაციონალური მოძრაობის“ ერთ-ერთმა ლიდერმა ეკა ხერხეულიძემ გადაცემაში “პოზიცია-LIVE”.

ხერხეულიძის თქმით, ყველა აღნიშნავს, რომ ოპოზიციის ლიდერები საკუთარი ფეხით წავიდნენ ციხეში და როგორი ვაჟკაცები არიან ისინი, ხოლო ამ დროს მიხეილ სააკაშვილმა აირჩია ჯოჯოხეთური გზა, სამი დღე და ღამე იმგზავრა ტრაილერში ჩაკეტილმა საკუთარი ქვეყნის გადასარჩენად და ისე წავიდა ციხეში.

„კიდევ გეუბნები, ის არ არის ჩემი ოჯახის წევრი, მე მინდა სწორი შეფასება, იმიტომ რომ გამოსავალი მალე ვიპოვო, ამ ქვეყანამ იპოვოს მალე. მიშა სააკაშვილი, ჯერ ეს ერთი არ არის ადამიანი, რომელთანაც ისე ახლოს იქნები, მეგობრული თვალსაზრისით გეუბნები, საჭირბოროტო, საყოველთაო საკითხებს შენს სასარგებლოდ გადაწყვეტს. არ აინტერესებს ამ ადამიანს, მასში ეს ხიბლი არ არის. მას ჰყავს საქმის პარტნიორები ქვეყნის შენების გზაზე, აკეთებს საქმეს ხარ მისი მოკავშირე, ხარ მისი მეგობარი. დაუშავებ ამ საქმეს რამეს, საერთოდ დაავიწყდება ოდესმე თუ გიცნობდა. თუ ვინმე მიხეილ სააკაშვილს იცნობს, მისი ფსიქოტიპი არის ასეთი. ამიტომ, მე რამე პერსონალური არ გამაჩნია, კიდევ გეუბნებით, ყველა აღნიშნავს, რომ: “ეს ადამიანები საკუთარი ფეხით წავიდნენ ციხეში და რა ვაჟკაცები არიან”. იმან [მიხეილ სააკაშვილმა] რა გზა გამოიარა?! – ტრაილერში ჩაკეტილი სამი დღე და ღამე. ტრაილერით შემოვიდა ყოფილი პრეზიდენტი, როდესაც წამოვიდა იყო იმ დიდი ქვეყნის პრეზიდენტის მრჩეველი. აირჩია ეს ჯოჯოხეთური გზა, შემოვიდა ქვეყანაში და რა იყო ეს ქვეყანა, ან უშველიდა ამ ქვეყანას და გადაარჩენდა გარუსებისგან, ან მოხვდებოდა ციხეში, ან მოკლავდნენ. მოხვდა ციხეში, საკუთარი ნებით გაიარა ეს გზა, ესეც კი გვემეტევა ვთქვათ, რომ თითქოს ექსტრადირება მოხდა მიხეილ სააკაშვილის ამ ხელისუფლებას გადმოსცა თითქოს რომელიმე ქვეყანამ”, – განაცხადა ეკა ხერხეულიძემ.

ძალიან მნიშვნელოვანია ჩინეთთან ეკონომიკური თანამშრომლობაც, ევროპასთან, ამერიკასთან პარტნიორობა ეკონომიკური თვალსაზრისით, ყველა ამ მიმართულებით გავაკეთებთ ყველაფერს იმისათვის, რომ კიდევ უფრო გავაძლიეროთ ჩვენი ქვეყნის ე.წ. დაკავშირებადობის ფუნქცია, – ამის შესახებ საქართველოს პრემიერ-მინისტრმა ირაკლი კობახიძემ „იმედის” ეთერში განაცხადა. 

როგორც მთავრობის მეთაურმა აღნიშნა, გაგრძელლდება სერიოზული ნაბიჯების გადადგმა იმისათვის, რომ მაქსიმალურად მოხდეს იმ პოტენციალის ათვისება, რომელიც აქვს ქვეყანას.

„ჩვენ ვაკავშირებდით დასავლეთსა და აღმოსავლეთს, ევროპას და აზიას, ამ კუთხით დღესაც ძალიან მნიშვნელოვანია ჩვენი როლი, თუმცა ჩვენი მთავარი ამოცანაა, რომ ეს როლი, კიდევ უფრო მეტად გავზარდოთ ჩვენი ქვეყნისთვის. ამისათვის იდება ძალიან დიდი ინვესტიციები, მათ შორის საგზაო ინფრასტრუქტურაში, რკინიგზაში, პორტებში, აეროპორტებში. გაგრძელლდება ამ მიმართულებით  სერიოზული ნაბიჯების გადადგმა იმისათვის, რომ მაქსიმალურად ავითვისოთ ის პოტენციალი, რომელიც აქვს ჩვენს ქვეყანას. ჩვენ ვაკავშირებთ შვიდ სახელმწიფოს ზღვასთან, შესაბამისად, ევროპასთან, დასავლეთთან და მაქსიმალურად უნდა ავითვისოთ შესაბამისი პოტენციალი, უნდა გავაღრმაოთ ამ ქვეყნებთან თანამშრომლობა. ძალიან მნიშვნელოვანია ამ კუთხით ჩინეთთან ეკონომიკური თანამშრომლობაც, ძალიან მნიშვნელოვანია ევროპასთან, ამერიკასთან პარტნიორობა ეკონომიკური თვალსაზრისით, ყველა ამ მიმართულებით გავაკეთებთ ყველაფერს იმისათვის, რომ კიდევ უფრო გავაძლიეროთ ჩვენი ქვეყნის ე.წ. დაკავშირებადობის ფუნქცია”, – განაცხადა ირაკლი კობახიძემ.