სადაც სააკაშვილი და კოლექტიური „ნაცმოძრაობაა“, იქ კრიმინალური დანაშაულია, – ამის შესახებ „ქართული ოცნების“ წევრმა, რატი იონათამიშვილმა განაცხადა.

მისი თქმით, „ნაციონალური მოძრაობის“ დანაშაულია რეკეტი, კორუფცია და ყველა მძიმე, ორგანიზებული დანაშაულები.

„რა თქმა უნდა, ეს საქართველოში მათგან არავის უკვირს, მაგრამ თუ უკრაინაში განსხვავებული მოსაზრება იყო, ისინიც მიხვდებიან, სინამდვილეში რაშია საქმე. სააკაშვილთან და კოლექტიურ „ნაცმოძრაობასთან“ მეგობრობა ტოტალურ კრიმინალთან და ძალადობასთან მეგობრობას ნიშნავს“, – განაცხადა იონათამიშვილმა.

ხელისუფლებაში ვერც სააკაშვილი მოვა და ვერც კოლექტიური „ნაციონალური მოძრაობა“. ეს აგენტურა ხელისუფლებაში ვერასდროს მოვა. ამ ადამიანს ყველაზე მეტად რაც აწუხებს, იმას ააშკარავებს, – ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.

იონათამიშვილის თქმით, კოლექტიურ „ნაციონალურ მოძრაობას“ მცირე შანსი თუ მიეცემა, იმავეს გაიმეორებენ, უფრო დიდი მასშტაბებით.

„საზოგადოებამ ზუსტად იცის, რომ ესენი არიან ფაშისტური წარმონაქმნები, რომლებიც საკუთარ პოლიტიკას ძალადობით, დაშინებით, წამებით ახორციელებენ. საზოგადოებამ იცის, რომ პატარა შანსი თუ მიეცემათ, იმავეს გაიმეორებენ, ოღონდ უფრო დიდი და ტრაგიკული მასშტაბებით. ამიტომ ამ აგენტურას არასოდეს ექნება შესაძლებლობა, რომ მათ ხალხმა რაიმე დონის ხელისუფლება გადასცეს, პირიქით, მათ გასამართლება მოუწევთ“, – აღნიშნა რატი იონათამიშვილმა.

სადაც ქართული, კარგი საქმე კეთდება, იქ არის ჩემი ადგილი. მე კეთროვანი კი არ ვარ, ყველგან შემიძლია მისვლა, დასწრება, – ასე უპასუხა სახელმწიფო უსაფრთხოების სამსახურის ხელმძღვანელმა გრიგოლ ლილუაშვილმა ჟურნალისტის კითხვას, რას უკავშირდება ინფექციური ცენტრის ახალი შენობის გახსნაზე მისი ყოფნა.

ლილუაშვილმა განმარტა, რომ ეკონომიკური საბჭოს მოქმედი წევრია და ყველა ეკონომიკური საკითხის განხილვას ოფიციალურად ესწრება.

„კრიტიკული ინფრასტრუქტურის შემადგენელი ნაწილი როცა იხსნება, ეს არის ჩვენი პირდაპირი მოვალეობა. კოვიდის პერიოდში დაამტკიცა ამ ექიმების ჯგუფმა, ამ ინფრასტრუქტურამ, რომ ეს არის უპირველესი უსაფრთხოება უსაფრთხოების მიმართულებით, როდესაც პანდემია არის, როდესაც ქვეყანაში გაჭირვებაა ვირუსების მხრივ და ა.შ. მე გახლავართ ეკონომიკური საბჭოს მოქმედი წევრი, რომელიც აბსოლუტურად ყველა ეკონომიკური საკითხის განხილვას ვესწრები ღიად, ოფიციალურად. წინა დაკვირვებებიც მახსოვს თქვენი სასტუმროს გახსნაზე. სადაც ქართული, კარგი საქმე კეთდება, იქ არის ჩემი ადგილი. მე კეთროვანი კი არ ვარ, ყველგან შემიძლია მისვლა, დასწრება“,- განაცხადა ლილუაშვილმა.

ამასთან, სუს-ის უფროსმა განმარტა, რომ პოლიტიკაში ჩართვას არ აპირებს.

„არ ვაპირებ არანაირ პოლიტიკაში ჩართვას. ეს ბევრჯერ გითხარით და მოდით, ერთხელ და და სამუდამოდ ეს საკითხი ამოვწუროთ“, – აღნიშნა ლილუაშვილმა.

მისივე თქმით, პოლიტიკურ თანამდებობაზე ყოფნის სურვილი ან ინტერესი არ აქვს.

„არანაირად. პირიქით, მე პოლიტიკიდან წამოვედი, მიბრუნებას აღარ ვაპირებ“,- განაცხადა ლილუაშვილმა. მისივე თქმით, თუ მსგავსი შემოთავაზება იქნება ბიძინა ივანიშვილს მხრიდან, მადლობას გადაუხდის ნდობისთვის, მაგრამ უარს ეტყვის.

გამჭვირვალობის რეესტრში დღეისთვის რეგისტრირებულ ორგანიზაციათა რიცხვმა უკვე გადააჭარბა იმ ორგანიზაციების რიცხვს, რომლებიც „უცხოური გავლენის გამჭვირვალობის“ კანონს ასაჩივრებენ, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

მისი თქმით, დამატებით 300-ზე მეტი ორგანიზაციის სარეგისტრაციო განაცხადი ჯერ ისევ დამუშავების პროცესშია.

„გამჭვირვალობის რეესტრში დღეისთვის რეგისტრირებულ ორგანიზაციათა რიცხვმა (144 ორგანიზაცია) უკვე გადააჭარბა იმ ორგანიზაციების რიცხვს, რომლებიც „უცხოური გავლენის გამჭვირვალობის“ კანონს ასაჩივრებენ (136 ორგანიზაცია). დამატებით 300-ზე მეტი ორგანიზაციის სარეგისტრაციო განაცხადი ჯერ ისევ დამუშავების პროცესშია.

…და, თქვენ წარმოიდგინეთ, ყოველ დილით ისევ საქართველოს ლამაზ ქალაქებსა და სოფლებში ვიღვიძებთ,“ – წერს პაპუაშვილი.

ერთი არის სიყალბე და ვირტუალური სამყაროს შექმნა, რისი მცდელობაც აქვთ რეალურად, რაც იყო 2012 წლამდე. მაშინაც იგივე დამოკიდებულება იყო, იგივე მდგომარეობა იყო. ვირტუალური საქართველო შექმნეს და გარედან ჩვენი ქვეყნის მოსახლეობას ეუბნებოდნენ, რომ თურმე, სააკაშვილის სისხლიანი რეჟიმი იყო დემოკრატიის შუქურა. დღეს გვაქვს ქვეყანაში პირიქით სიტუაცია. ქვეყანაში გვაქვს სიტყვის და გამოხატვის თავისუფლება, ნამდვილი დემოკრატია.

ამ მოცემულობაზე გვეუბნებიან, რომ დემოკრატიის თვალსაზრისით უკან გადადგმული ნაბიჯები გვაქვს. ეს არის ძალიან დიდი სიყალბე, სიცრუე. ჩემზე პროევროპელი და პროამერიკელი მე არ ვიცი, რამდენი ადამიანი შეიძლება დადიოდეს ქვეყანაში, მაგრამ პირველი და უმნიშვნელოვანესი ჩემთვის არის ჩემი ქვეყანა. პირველი მე ვარ პროქართველი და ვატარებ პროქართულ პოლიტიკას. პატივს ვცემთ ჩვენ სტრატეგიულ პარტნიორობას, მაგრამ ამ ტიპის განცხადებები დამაზიანებელია ამ ურთიერთობებისთვის. აქაც დაგარწმუნებთ, რომ ყველაფერი დალაგდება, როდესაც არჩევნები დასრულდება და რუსეთ-უკრაინის ომის გადავა მილევად ფაზაში”, – ამბობს კახა კალაძე.

„ერთიანობა ნაციონალური მოძრაობის“ საარჩევნო პრესსპიკერმა, ლევან სანიკიძემ საზოგადოებას საქართველოს მესამე პრეზიდენტის, მიხეილ სააკაშვილის მიმართვა გააცნო.

მიხეილ სააკაშვილი საჯარო მოხელეებს მიმართავს და მოუწოდებს, 26 ოქტომბრის არჩევნების შემდეგ, მომავლისკენ გაიხედონ.

„მოგმართავთ, როგორც სახელმწიფო ინსტიტუტების შემქმნელი და ქართველი საჯარო მოხელეების ქომაგი. ივანიშვილი, რომელიც ანგრევს სახელმწიფოს გაშინებთ თქვენ, რომ ოპოზიციის მოსვლის შემთხვევაში გემუქრებათ რეპრესიები და სამსახურის დაკარგვა. ოლიგარქი, როგორც ყოველთვის, იტყუება. ახალი ხელისუფლების პირობებში არანაირი გამიზნული დათხოვნები არ იქნება, უფრო მეტიც, თქვენი ხელფასი მკვეთრად მოიმატებს და თქვენი სამსახური ბევრად უფრო პრესტიჟული გახდება, ეს ეხება პოლიციელებს, სამინისტროების და ადგილობრივი თვითმმართველობების, ააიპ/სსიპ-ის მუშაკებს, პედაგოგებს. ერთადერთი პირობა იქნება, არ წახვიდეთ თქვენი ხალხის წინააღმდეგ, არ შეასრულოთ არჩევნების მოპარვაზე გათვლილი ბრძანებები და პოლიციელების შემთხვევაში, არ დაღვაროთ სისხლი, არ შეასრულოთ ძალადობრივი, უკანონო ბრძანებები. მიუხედავად იმისა, რომ უკვე სამ წელიწადზე მეტია, რუსეთის უკანონო ტყვე ვარ საქართველოში, მეც კი არ გავბოროტებულვარ, პირიქით, თანაგრძნობაც კი გამაჩნია იმ ადამიანების მიმართ, ვისაც მთელი ეს დრო ჩემს მიმართ არაადამიანური, უკანონო ბრძანებების შესრულება უხდებოდა. 26 ოქტომბრის შემდეგ, ყველამ მომავალში უნდა გავიხედოთ და შევწყვიტოთ წარსულის ქექვა. ამ გადასვლაში თითოეული საჯარო მოხელის მონაწილეობა გადამწყვეტია!“, – ნათქვამია მიხეილ სააკაშვილის მიმართვაში.

ამასთან, საჯარო მოხელეების მიმართ განხორციელებულ წნეხზე ისაუბრა ლევან სანიკიძემაც.

მისი განცხადებით, ბოლო რამდენიმე დღის განმავლობაში ხელისუფლების მიერ ადმინისტრაციული რესურსის გამოყენებამ, დაშინებამ, მოსყიდვამ ზღვარგადასული ხასიათი მიიღო. „ამ ქვეყანაში სახელმწიფო ინსტიტუტების მშენებლობის და საჯარო მოხელეების როლის გაძლიერების შესახებ ყველაზე მეტი, რა თქმა უნდა, „ერთიანობა ნაციონალურ მოძრაობას” აქვს გაკეთებული. სწორედ ამ პარტიამ 2003 წლის „ვარდების რევოლუციის“ შემდეგ შეძლო და შექმნა საჯარო მოხელეთა ის ინსტიტუტი, რომლის ჩამოშლას ივანიშვილი ახლაც ცდილობს. ჩვენ კარგად გვესმის ის წნეხი, რომელსაც ჩვენი ძვირფასი საჯარო მოხელეები განიცდიან. ადამიანები, რომლებიც ყველაზე სწრაფად ამჩნევენ იმ ღალატის შედეგებს, რასაც ივანიშვილი ქართველი ხალხის და ქართული სახელმწიფოს წინააღმდეგ აკეთებს“, – განაცხადა ლევან სანიკიძემ

ინფორმაციას „ერთიანობა ნაციონალური მოძრაობა“ ავრცელებს.

თბილისის მერმა კახა კალაძემ საქართველოს პრემიერ-მინისტრთან, ირაკლი კობახიძესთან ერთად, საბურთალოს რაიონში, კერძოდ დიდ დიღომში მრავალფუნქციური ცენტრი გაიხსნა. ცენტრი სრულად არის აღჭურვილი და მზადაა მოქალაქეთა მისაღებად.

„დამოუკიდებელი საქართველოს ისტორიაში ამხელა პროექტი – მრავალფუნქციური სპორტული სივრცე არ განხორციელებულა. ამ მასშტაბის და მოცულობის პროექტი რეგიონშიც პირველია და ძალიან მიხარია, რომ ჩვენს დედაქალაქში, კონკრეტულად, დიდ დიღომში იქნება ეს სივრცე, რომელიც უკვე რამდენიმე დღეში მოემსახურება მოსახლეობას. პროექტის ფარგლებში გათვალისწინებულია ორი საცურაო აუზი, ორი საკალათბურთო მოედანი, ტანვარჯიშისთვის, კრივისთვის, ჭიდაობისთვის განკუთვნილი დარბაზები, მედიათეკა, კაფე-ბარი, დასასვენებელი სივრცეები, საუნები, მიწისქვეშა პარკინგი. 10 000-მდე ადამიანის მიღება შეეძლება აღნიშნულ ცენტრს ყოველთვიურად“, – განაცხადა კახა კალაძემ.

აქვე, მერმა მიმართა 60 წელს გადაცილებულ მოქალაქეებს, ისარგებლონ აღნიშნული ცენტრის სერვისებით, ვინაიდან ის ჩართული იქნება პროგრამაში, რომელიც ამ ასაკის ადამიანების უფასო მომსახურებას ითვალისწინებს.

ადგილზე ასევე იმყოფებოდნენ თბილისის მერიის წარმომადგენლები, საქართველოს პარლამენტისა და თბილისის საკრებულოს წევრები.

მრავალფუნქციურ ცენტრში იფუნქციონირებს დიდი და პატარა აუზები, ფიტნეს დარბაზი, მშრალი საუნა, კალათბურთის, ფრენბურთის, კრივის, ჭიდაობის, ძიუდოს და ტანვარჯიშის წრეები; ასევე შენობაში იქნება მედიათეკა, ხმის ჩამწერი სტუდია, სპორტული რეაბილიტაციის ცენტრი, მოსწავლე-ახალგაზრდობის ცენტრი და კაფე-ბარი. აღნიშნული პროექტის ჯამური ღირებულება შეადგენს 17 186 593 ლარს.

რადიკალური ოპოზიცია მაქსიმალურად შეეცდება, ქვეყანაში დაძაბულობა, დაპირისპირება, არეულობა შემოიტანოს, თუმცა ჩვენი შესაბამისი სამსახურები ყოველთვის მოწოდების სიმაღლეზე დგანან და ყველაფერს გააკეთებენ, რათა ქვეყანაში მშვიდობა შენარჩუნდეს,- ამის შესახებ „ქართული ოცნების“ გენერალურმა მდივანმა, დედაქალაქის მერმა, კახა კალაძემ ჟურნალისტებს განუცხადა, რითაც პოლიტიკურ წრეებთან დაკავშირებული ჯგუფების მიერ ფალსიფიცირებული ვიდეო და აუდიო ჩანაწერების შესაძლო გავრცელების თაობაზე სუს-ის განცხადებას გამოეხმაურა.

კალაძის თქმით, წინასაარჩევნო პერიოდი მშვიდ გარემოში მიმდინარეობს, რაც „რადიკალურ ოპოზიციას“ არ აწყობს.

„ხედავთ, არჩევნები როგორ ვითარებაში მიმდინარეობს. ეუთო/ოდირის დასკვნაც ვიხილეთ. რა თქმა უნდა, მისასალმებელია გარემოება, რაც ქვეყანაში გვაქვს და როგორი საარჩევნო კამპანიაც მიმდინარეობს – მშვიდი, სადაც ყველა პოლიტიკურ პარტიას აქვს კამპანიის ჩატარების შესაძლებლობა ყოველგვარი ექსცესების გარეშე მიმდინარეობს ეს ყველაფერი.

რა თქმა უნდა, ეს მოცემულობა რადიკალურ ოპოზიციას არ აწყობს. მაქსიმალურად შეეცდებიან, რომ ქვეყანაში დაძაბულობა, დაპირისპირება, არეულობა შემოიტანონ. თუმცა ჩვენი შესაბამისი სამსახურები ყოველთვის მოწოდების სიმაღლეზე დგანან. ყველაფერს გააკეთებენ, რათა ქვეყანაში მშვიდობა შენარჩუნდეს, ადამიანებს კამპანიის მშვიდ ვითარებაში ჩატარების შესაძლებლობა და არჩევანის გაკეთების შესაძლებლობა ჰქონდეთ. დარწმუნებული ვარ, ჩვენი ქვეყნის მოსახლეობა მიიღებს სწორ არჩევანს და ეს იქნება ის, რომ ქვეყანაში შენარჩუნებული იყოს სიმშვიდე და ქვეყანა ეკონომიკურად განვითარდეს“, – განაცხადა კახა კალაძემ.

ცნობისთვის, სახელმწიფო უსაფრთხოების სამსახურმა გაავრცელა განცხადება, სადაც ნათქვამია, რომ „მიღებული ინფორმაციით, პოლიტიკურ წრეებთან დაკავშირებული ჯგუფები, საქართველოში მოახლოებული საპარლამენტო არჩევნების წინა დღეებში, გეგმავენ ხელოვნური ინტელექტის და სხვა თანამედროვე ტექნოლოგიების მეშვეობით დამონტაჟებული, ფალსიფიცირებული ვიდეო და აუდიო ჩანაწერების გავრცელებას“.

სუს-ის ცნობით, „აღნიშნულ ყალბ ჩანაწერებში იქნება გამოყენებული საქართველოს ხელისუფლების წარმომადგენელთა ხმები და ვიდეო გამოსახულება. აღნიშნული ყალბი ინფორმაციის გავრცელების მიზანი არის ხელისუფლების შტოებს შორის დაპირისპირების გამოწვევა, აგრეთვე ხელისუფლებასა და მართლმადიდებლურ ეკლესიას შორის შუღლის ჩამოგდება და ხელისუფლებასა და დასავლელ პარტნიორებს შორის ურთიერთობის გაუარესება“.