ეს ადამიანები “სახლობანას” თამაშობენ,- ამის შესახებ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ განაცხადა, რითაც „ლელო-ძლიერი საქართველოს“ და პარტია „გახარია-საქართველოსთვის“ არჩევნებში მონაწილეობას გამოეხმაურა.

როგორც ბითაძემ ჟურნალისტებს განუცხადა, „ეს თვალნათლივ აჩვენებს იმას, რომ ეს არის უპრინციპო, არასერიოზული ადამიანების ერთობა”.

“ღრმად მრწამს, ისინი ძალიან ნანობენ, რომ საქართველოს პარლამენტში არ გამოიყენეს ის მანდატები, რომელიც ამომრჩეველმა მათ მიანიჭა, რაზეც არაერთი საერთაშორისო ორგანიზაცია საუბრობს. პრაქტიკულად, ვხედავთ, რომ 2-3 თვეში ერთხელ ცვლიან მიდგომებს, ახლა თითქოს ადგილობრივი თვითმმართველობის არჩევნებში მონაწილეობით გარკვეულ პროგრესს მიიღებენ, თუნდაც ამომრჩეველთან მიმართებით. ეს თვალნათლივ აჩვენებს იმას, რომ ეს არის უპრინციპო, არასერიოზული ადამიანების ერთობა, რომლებიც გარდა იმისა, რომ სულ რაღაც რამდენიმე თვის წინ „აბულინგებდნენ“ და შეურაცხყოფას აყენებდნენ ერთმანეთს, ახლა მათი ერთი ფლანგი აპირებს, რომ თვითმმართველობის არჩევნებში მიიღოს მონაწილეობა და საკრებულოებში წარმოდგენილი იყვნენ, ხოლო მეორე ნაწილი გაურკვეველია, რა აქციებს აანონსებს. საქართველოს მოსახლეობა უკვე ვეღარ არჩევს, ვინ ერთიანდება, ვინ იშლება, ვინ ვის ლანძღავს, ვინ აპირებს საკრებულოში შესვლას და ვის გული წყდება პარლამენტში არშესვლაზე. ჩვენ იმასაც ვხედავთ, რომ ძალიან ბევრი ე.წ. პოლიტიკოსი, რომლებიც ამ ვითომ ე.წ. პარტიების რიგებში იყვნენ, დღეს საერთოდ აღარ იძებნებიან. ყველაფერი კარგად არის! ეს ადამიანები კვლავ მწარედ დამარცხდებიან“, – განაცხადა ბითაძემ.

ვიზალიბერალიზაციის თემა არის ბოლო იარაღი, რომელიც ევროპელ ბიუროკრატებს საქართველოსა და ქართველი ხალხის წინააღმდეგ აქვთ ხელში. მანამდე იყო კანდიდატის სტატუსი, რევოლუციის მოწყობა სცადეს, არაფერი გამოუვიდათ, – ასე უპასუხა თბილისის მერმა, კახა კალაძემ ჟურნალისტების შეკითხვას, რომელიც ევროკავშირთან უვიზო რეჟიმის შესაძლო გაუქმებას ეხებოდა.

როგორც კალაძემ აღნიშნა, ის მოთხოვნები და მესიჯები, რაც იქნა გაჟღერებული, რომ საქართველომ ეს და ეს უნდა გააკეთოს, არაფერ კავშირში არაა ვიზალიბერალიზაციასა და იმ პროცესებთან, რომელიც ევროინტეგრაციასთან არის დაკავშირებული.

„ეს არ არის პირველი შემთხვევა, უამრავი ასეთი შემთხვევა გვახსოვს. ზოგადად ევროკავშირი იმ სიკეთეებს, რომელიც დაკავშირებულია ევროინტეგრაციის პროცესთან ბოლო თვეების განმავლობაში იყენებს ქართული სახელმწიფოს, ქართველი ხალხის წინააღმდეგ იარაღად. როცა მათი განცხადებები, რეზოლუციები გაჯერებულია ტყუილით, სიცრუით, რა თქმა უნდა, ამას არანაირი კავშირი არ აქვს ევროპასთან, ევროპულ მომავალთან და ევროინტეგრაციის პროცესთან. ეს არის სუფთა პოლიტიკური განცხადებები, პოლიტიკური პროცესი, რომელიც გაჯერებულია ტყუილითა და ცილისწამებით. რა თქმა უნდა, პასუხისმგებლობა ეკისრება იმ ზოგიერთ გაზულუქებულ ევროპელ ბიუროკრატს, რომელთა მესიჯები აბსოლუტურად ტყუილსა და სიცრუეზეა დაფუძნებული. ეს არის ბოლო იარაღი, რომელიც ევროპელ ბიუროკრატებს აქვთ ხელში საქართველოსა და ქართველი ხალხის წინააღმდეგ. თქვენ გახსოვთ მანამდე იყო კანდიდატის სტატუსი, არაფერი გამოუვიდათ. რევოლუციის მოწყობა სცადეს, რეალურად არაფერი გამოუვიდათ. მარტივი მესიჯი ჰქონდათ, ახლაც იმავეს იმეორებენ: „ჩვენ რა შუაში ვართ, აგერ საქართველოს ხელისუფლებას მოჰკითხეთ“. რეალობა მდგომარეობს იმაში, რომ საერთოდ ის მოთხოვნები და მესიჯები, რაც იქნა გაჟღერებული, რომ საქართველომ ეს და ეს უნდა გააკეთოს, არაფერ კავშირში არაა ვიზალიბერალიზაციასა და იმ პროცესებთან, რომელიც ევროინტეგრაციასთან არის დაკავშირებული. ეს არის უბრალოდ პოლიტიკური მოტივებით გაჟღერებული განცხადებები, რომელიც არის უსამართლო, ცილისმწამებლური და, რა თქმა უნდა, გაჯერებულია ტყუილებით. ეს არის დღევანდელი ევროპული ბიუროკრატია. ბოლო იარაღი რაც დარჩათ, ეს არის ვიზალიბერალიზაციის თემა. ამით მიდის შანტაჟი დღესაც. საერთოდ რა კავშირშია ის კანონები ვიზალიბერალიზაციის პროცესთან, რომელიც მიღებულია?! აქაც ორმაგი დამოკიდებულებაა. თვითონ იღებენ ასეთ კანონებს, თავიანთ ქვეყნებში მოქმედებს და თურმე საქართველოში არ შეიძლება. როგორ შეიძლება ქართულმა სახელმწიფომ ან თუნდაც ქართველმა ხალხმა იცოდეს საიდან შემოდის თანხები, შავი ფული, რომლითაც ფინანსდება პოლიტიკური პარტიები, ტელევიზიები, სახელმწიფო გადატრიალება?! თურმე ეს არ უნდა ვიცოდეთ და დანაშაულია. წარმოგიდგენიათ? ეს ნორმალური დამოკიდებულებაა?“- განაცხადა კალაძემ.

ხელისუფლება ვერ ჩამოაქციეს, სახელმწიფო ინტერესებს ბოლომდე ვიცავთ. ამ პროცესში შანტაჟის ერთ-ერთი იარაღია უვიზო მიმოსვლა, – ამის შესახებ პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ განაცხადა.

ზარქუას თქმით, ახლაც იგივე გრძელდება, რაც კანდიდატის სტატუსის შემთხვევაში იყო.

„გვეუბნებოდნენ, კანდიდატის სტატუსს არ მოგცემთო და დაგვიანებით, ერთი წლის შემდეგ მოგვცეს. შემდეგ დაიწყეს საუბარი, შეგიზღუდავთ უვიზო მიმოსვლასო, რასაც დამსახურებულად მივაღწიეთ. ახლაც იგივე გრძელდება. ვინაიდან ქვეყანა ვერ არიეს და ქართველი ხალხი „ქართულ ოცნებას“ უჭერს მხარს, ახლა ახალი შანტაჟი დაიწყეს – თურმე აგვისტოს ბოლომდე ნაბიჯები თუ არ გადაიდგა, შეიძლება, შეზღუდვა იყოს. რა არის ეს ნაბიჯები? თურმე გამჭვირვალობა უნდა გავაუქმოთ, ამერიკის ადმინისტრაციის მხრიდან ვნახეთ, რა სიგიჟეებს ჩადიოდნენ; მეორეა, ოჯახური ღირებულებების კანონი. ოპოზიციას მივმართავ – თანახმა არიან, რომ გეებს საშუალება მისცენ, შვილები აიყვანონ? სქესის გადაკეთება იყოს დაშვებული? გეებს ქორწინების საშუალება ჰქონდეთ? სკოლებსა და ბაღებში ლგბტ პროპაგანდა იყოს? თანახმა თუ არიან, გამოვიდნენ და ეს თქვან. მოსახლეობა ამბობს, არცერთი ნაბიჯით უკან არ დავიხიოთ. რანაირად აკავშირებენ უვიზო მიმოსვლას და ოჯახური ღირებულებების კანონს ერთმანეთთან? რა ბმაშია? ევროკომისიის კვლევაში კარგი მთავრობის თაობაზე საქართველო საუკეთესოებს შორის იყო, მათ შორის, ევროკავშირისა და ნატო-ს რამდენიმე ქვეყანას უსწრებს. რაღა უნდათ ჩვენთან? უნდათ, ის დამართონ საქართველოს, რაც საბერძნეთს დამართეს. უძველესი ქვეყანა აიძულეს, რომ უბედურებისთვის ხელი მოეწერა. საბერძნეთში გეიქორწინება არის დაშვებული. ამას ითხოვენ საქართველოსგან, უდიდესი ისტორიის მქონე, მართლმადიდებლური სახელმწიფოსგან. არ დავთმობთ, ბოლომდე ვიომებთ, რადგან ჩვენს ინტერესებშია მართლმადიდებლობის გაძლიერება და შენარჩუნება“, – განაცხადა ირაკლი ზარქუამ.