ვერ გეტყვით დღეს ვნახავთ თუ არა კონკრეტულ გადაწყვეტილებას, რადგან ამ წუთას გადაწყვეტილების მიმღები საქართველოს პრეზიდენტია – ჩემი პირადი პოზიციაა პარლამენტის დათხოვნა და ვადამდელი არჩევნები! სხვა გამოსავალს ვერ ვხედავ,- ამის შესახებ „კოალიცია ცვლილებისთვის“ ლიდერმა ნიკა გვარამიამ პრეზიდენტთან ოპოზიციის შეხვედრამდე ჟურნალისტებს განუცხადა.

მისი თქმით, დღეს სახალხო პროტესტის მიმართულებით არავის არაფერი სალაპარაკო არ აქვს, მაგრამ პოლიტიკოსებმა პოლიტიკური გადაწყვეტილებები უნდა მიიღონ.

„სახალხო პროტესტის მიმართულებით არავის არაფერი სალაპარაკო არ აქვს. დღეს რომ პოლიტიკოსებზე ლაპარაკობენ, ეს სამართლიანია, იქიდან გამომდინარე, თუ რა ჩანს. მაგრამ პოლიტიკოსები ბევრი საქმით არიან დაკავებულები და ყველაფერი არ ჩანს. სამაგიეროდ, შედეგებს ვხედავთ, მათ შორის სანქციების, არაღიარების და ა.შ. სახით. თუმცა საბაზისო მნიშვნელობა ყველა გადაწყვეტილებისთვის, რაც არსებობს და რაც კიდევ იქნება მიღებული, სახალხო პროტესტია, რადგან ძალაუფლება ხალხისაა და მას ეს ძალაუფლება უნდა დაუბრუნდეს. ხალხი ამ ძალაუფლებას იბრუნებს. რაც შეეხება პოლიტიკოსებს, პოლიტიკოსებმა პოლიტიკური გადაწყვეტილებები უნდა მიიღონ აუცილებლად. ეს არ ნიშნავს იმას, რომ სახალხო პროტესტზე დგომა ან ამის მხარდაჭერა ჩვენი, როგორც მოქალაქეების მხრიდან, საკმარისია. ვერ გეტყვით დღეს ვნახავთ თუ არა კონკრეტულ გადაწყვეტილებას იმიტომ, რომ ჩვენ, პოლიტიკური პარტიები ამ წუთას ამ გადაწყვეტილებას არ ვიღებთ. ამ წუთას გადაწყვეტილების მიმღები საქართველოს პრეზიდენტია.

ჩემთვის ერთი რამ ნათელია და ჩემი პირადი პოზიციაა – პარლამენტის დათხოვნა და ვადამდელი არჩევნები! სხვა გამოსავალს ვერ ვხედავ. ამაზე ვხედავ რეაქციას„ქართული ოცნების“, რომელიც აცხადებს, რომ ამის გამო ყველას დაიჭერს. „ქართული ოცნების“ რეაქციები ცხადყოფს, რისი ეშინიათ მათ რეალურად“, – განაცხადა ნიკა გვარამიამ.

სალომე ზურაბიშვილი გამოუვალ მდგომარეობაშია, ცდილობს, არჩევნების ჩანიშვნისთვის ახალი საფუძველი მოიფიქროს, ხვეწნა-მუდარით გამოდის, როგორმე იმ სიტუაციიდან გამოვიყვანოთ, რაშიც პატრონებმა ჩააგდეს, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

მისი თქმით, სალომე ზურაბიშვილს უნდა, საბჭო შექმნას, რევკომი აღადგინოს ან რეპრესიები აამოქმედოს, ოპოზიციის შედეგი იქნება ნული, რაც პოლიტიკური ნულები არიან, იგივე დარჩებიან.

„სალომე ზურაბიშვილი კონსტიტუციას ფეხქვეშ რომ თელავს, სამწუხაროდ, ეს ახალი არ არის, მაგრამ საზოგადოებას შევახსენებ, რომ არჩევნების დანიშვნას სამი საფუძველი აქვს: როცა საპარლამენტო ციკლის ოთხწლიანი ვადა გადის, პარლამენტი მთავრობას ორჯერ ნდობას არ უცხადებს და სასამართლოს მიერ არჩევნების ბათილად ცნობა ხდება. საზოგადოებამ კარგად იცის, ქვეყანაში ეს საფუძვლები არსებობს თუ არა. სალომე ზურაბიშვილი ახლა გამოუვალ მდგომარეობაშია და ხვეწნა-მუდარით გამოდის, როგორმე იმ სიტუაციიდან გამოვიყვანოთ, რაშიც პატრონებმა ჩააგდეს. ცდილობს, ახალი საფუძველი მოიფიქროს, რათა არჩევნები ჩაინიშნოს. ამ დავალების შესრულებაში არასოდეს დავეთანხმებით. უნდა, საბჭო შექმნას და უნდა, რევკომი აღადგინოს ან რეპრესიები აამოქმედოს, მათი შედეგი ნული იქნება, რაც პოლიტიკური ნულებიც არიან, იგივე დარჩებიან“, – განაცხადა არჩილ გორდულაძემ.

საუბარი ქვეყანაში არსებულ ვითომდა კრიზისზე სხვა არაფერია, თუ არა პარალელური რეალობის შექმნის მცდელობა რადიკალური ოპოზიციისგან. დღეს თუ ქვეყანაში რამე კრიზისია, ეს არის ოპოზიციაში, – ამის შესახებ თბილისის საკრებულოს თავმჯდომარის მოადგილემ, ზურაბ აბაშიძემ საკრებულოში მიმდინარე სხდომაზე განაცხადა, სადაც თბილისის მერმა, კახა კალაძემ წლიური ანგარიში წარადგინა.

ზურაბ აბაშიძის თქმით, დედაქალაქის მერმა ქალაქში განხორციელებულ უამრავ პროექტზე, მათ შორის, მასშტაბურ პროექტებზე ისაუბრა, რაც კიდევ ერთი დასტურია იმისა, რომ ქვეყანაში არანაირი კრიზისი არ არსებობს.

თბილისის საკრებულოს თავმჯდომარის მოადგილის განცხადებით, დედაქალაქის მერის მოხსენება იყო ძალიან შთამბეჭდავი და კონკრეტული, რისთვისაც ზურაბ აბაშიძემ კახა კალაძეს მადლობა გადაუხადა.

„მადლობას ვუხდი თბილისის მერს იმ განხორციელებული და მომავალში დაგეგმილი პროექტების გამო, რომელიც დედაქალაქისთვის სასიცოცხლოდ მნიშვნელოვანია. ეს პროექტები სახეზეა და ამას ყველა ხედავს. მათ კი ვისაც არ სურთ დანახვა, ვერაფერს ვუზამთ. დღეს ჩვენი ქვეყანა ისტორიულ გზაჯვარედინზე დგას. დღევანდელი ხელისუფლების პირობებში მაქსიმალურად დაცულია ქვეყნის სუვერენიტეტი და დამოუკიდებლობა. ეს შეუქცევადი პროცესია. დაპირისპირება კი იმიტომ ხდება, რომ როგორც ქვეყნის შიგნით, ისე ქვეყნის გარეთ არ უნდათ დამოუკიდებელი, სუვერენული, ძლიერი და ეკონომიკურად მდგრადი საქართველო, მაგრამ ეს შეუქცევადი პროცესია და საქართველო აუცილებლად მიაღწევს თავის მიზანს“, – განაცხადა ზურაბ აბაშიძემ.

თბილისის საკრებულოს თავმჯდომარის მოადგილე ვადამდელი არჩევნების დანიშვნის შესახებ ოპოზიციის მოთხოვნასაც გამოეხმაურა და განაცხადა, რომ საპარლამენტო არჩევნები 2028 წელს გაიმართება. მისივე თქმით, ახალი არჩევნების დანიშვნაზე საუბარი აბსურდია.

„მინდა, მივმართო ყველას, ვინც ახალი არჩევნების დანიშვნას ითხოვს. დაახლოებით ცხრა თვეში ადგილობრივი თვითმმართველობის არჩევნები გაიმართება. ოპოზიცია ხომ აცხადებს, რომ თითქოსდა მათ თბილისში გაიმარჯვეს. მიიღონ მონაწილეობა და ვნახავთ როგორ გაიმარჯვებენ. ამ არჩევნებსაც ჩვენ მოვუგებთ, რადგან ჩვენს უკან უამრავი გაკეთებული საქმე დგას“, – განაცხადა ზურაბ აბაშიძემ.

ქუჩაში პროტესტზე მნიშვნელოვანი არაფერია, სავსებით ცხადია, რომ ხალხისთვის (როგორც ხელისუფლების წყაროსთვის) წართმეული ხელისუფლება უნდა დაიბრუნოს მანვე მაგრამ, არ შეიძლება პოლიტიკურმა კლასმა საკუთარი თავი ფაქტიურად გაიუქმოს, – ამის შესახებ კოალიცია „ცვლილებებისთვის“ წევრი ნიკა გვარამია სოციალურ ქსელში წერს.

მისი თქმით, ოპოზიციას დასაკომპლექსებელი არაფერი სჭირს.

„არაფერი დასაკომპლექსებელი დღევანდელ ოპოზიციას არ სჭირს, პირიქით, ძალიანაც პირიქით. ვინც რაც არ უნდა თქვას, გინდა ქუჩაში მდგომმა და გინდა სახლში თუ კამერის წინ მჯდომმა. ჩვენ გვჭირდება მკაფიო პოლიტიკური გადაწყვეტილებები და არა ბუნდოვანი ემოციური ტექსტები, რომელიც გულის მოფხანის და (მაქსიმუმ) აპლოდისმენტების იქეთ არ მიდის. არაა ახლა დრო საკუთარი თავის მოწონების პროცესში, დროა პროცესის მოწონების საკუთარ თავში. სამშობლოს გადარჩენის დროა და არა აპლოდისმენტების. ბრძოლის დროა და არა პროცესით ტკბობის. რეჟიმი თავისით არ ჩამოიშლება, ის უნდა ჩამოშალო“, – წერს გვარამია.

ეუთო/იდირის დასკვნაში პირდაპირ თეთრზე შავით წერია, რომ არჩევნები იყო მრავალპარტიული, რომ ჩვენი ქვეყნის მოსახლეობას ჰქონდა შესაძლებლობა, გაეკეთებინა არჩევანი, პროცესი მიმდინარეობდა მშვიდ ვითარებაში, – ამის შესახებ დედაქალაქის მერმა, კახა კალაძემ მედიასთან საუბრისას განაცხადა.

კახა კალაძეს კითხვა დაუსვეს ესტონეთის საგარეო საქმეთა მინისტრის, მარგუს ცაჰკნას განცხადებაზე, რომ საქართველოს ხელისუფლებამ ეუთო/ოდირის რეკომენდაციები უნდა გაითვალისწინოს.

თბილისის მერის თქმით, საქართველოს ხელისუფლება გამოთქვამს მზადყოფნას, ორმხრივად ითანამშრომლოს ეუთო/ოდირის მხრიდან მოწოდებული რეკომენდაციების შესასრულებლად.

„არაფერი განსხვავებული იმისა, რაც იყო შუალედური დასკვნა, რა განცხადებებიც იყო გაკეთებული არჩევნების შემდეგ. რეკომენდაციები, რაც მოწოდებულია – აქ საუბარია იმაზე, რომ ეუთო/ოდირი აპირებს თანამშრომლობას არჩეულ ხელისუფლებასთან. ამავდროულად, ჩვენც გამოვთქვამთ მზაობას, ვითანამშრომლოთ და თუ რაიმე გასაუმჯობესებელია, ამ მიმართულებით მზად ვართ, ვიმუშაოთ“, – განაცხადა კახა კალაძემ.

ცენტრალური საარჩევნო კომისია 26 ოქტომბრის არჩევნებთან დაკავშირებით საქართველოს პრეზიდენტის, სალომე ზურაბიშვილის მიერ გავრცელებულ ბრალდებებს ეხმაურება, რომელიც ცესკო-ს განცხადებით, წარმოადგენს კონკრეტული პოლიტიკური ინტერესებით განპირობებული დეზინფორმაციული და მანიპულაციური კამპანიის გაგრძელებას.

ცენტრალური საარჩევნო კომისიის განცხადებაში ნათქვამია, რომ სალომე ზურაბიშვილის განცხადებები, თითქოს არჩევნები გაყალბდა, არ შედგა – არის აბსოლუტურად უარგუმენტო და ახდენს ფაქტობრივი გარემოებების პოლიტიკურად მოტივირებულ იგნორირებას.

„კიდევ ერთხელ ხაზგასმით აღვნიშნავთ, რომ არ არსებობს დადასტურებული ფაქტები და მტკიცებულებები იმისა, რომ პარლამენტის არჩევნებზე ადგილი ჰქონდა ისეთ დარღვევებს, რომელსაც შეეძლო არსებითი გავლენის მოხდენა ამ არჩევნების საბოლოო შედეგებზე. მიუხედავად ამისა, საქართველოს პრეზიდენტი, სამწუხაროდ, იმეორებს ზოგიერთი დაინტერესებული წარმომადგენლის პროპაგანდისტულ ნარატივს და ამით ადგილობრივ თუ საერთაშორისო დონეზე ცდილობს არჩევნებისა და, შესაბამისად, საარჩევნო ადმინისტრაციის დისკრედიტაციას, რითაც ხელს უწყობს ისედაც პოლარიზებულ გარემოში კიდევ უფრო მეტი დაძაბულობისშემოტანას.

მიუხედავად იმისა, რომ საარჩევნო პროცესში იყო გარკვეული შენიშვნები, ხარვეზები თუ წუხილები, აღსანიშნავია, რომ საარჩევნო ადმინისტრაციამ 26 ოქტომბრის არჩევნების ადმინისტრირება განახორციელამაღალ პროფესიულ დონეზე და კანონმდებლობის სრული დაცვით, რაც, როგორც მინიმუმ, დადასტურებულია ეუთო/ოდირის სადამკვირვებლო მისიის ახლახან გამოქვეყნებულ შეფასებაში.ასევე, ჩვენი მხრიდან გამოითქვა სრული მზაობა, საკუთარი კომპეტენციის ფარგლებში, განვიხილოთ და შესაძლებლობის ფარგლებში გავითვალისწინოთ ყველა რეკომენდაცია, რომელიც გამოითქვა საარჩევნო პროცესის გაუმჯობესების უზრუნველსაყოფად. სრულიად დარწმუნებული ვართ, რომ ახლა სწორედ მსგავსი პროცესის ინიცირების და ჩართულ მხარეებს შორის მშვიდ გარემოში მსჯელობის დროა და არა კიდევ უფრო მეტი სიმძაფრის შემოტანის მცდელობის.

გვინდა საზოგადოებას ამასთანავე შევახსენოთ, რომ 26 ოქტომბრის არჩევნების შედეგების გამოცხადების შემდეგ, „სავარაუდო გაყალბებასთან“ დაკავშირებით გავრცელებული განცხადებებიდანგამომდინარე, საარჩევნო ადმინისტრაციამ თავად მიმართა უფლებამოსილ უწყებას და მოითხოვა გამოძიების დაწყება გავრცელებული პრეტენზიების ობიექტურად შესაფასებლად. რამდენადაც საჯაროდ გავრცელებული ინფორმაციით ცნობილია, ამ დრომდე არავის წარუდგენია გახმოვანებული ბრალდებებისრაიმე არსებითი ან კონკრეტული მტკიცებულებები.

კიდევ ერთხელ მოვუწოდებთ პრეზიდენტს და ყველა დაინტერესებულ პირს, რომელიც აყენებს მსგავს ბრალდებებს, წარმოადგინონ შესაბამისი, საფუძვლიანი მტკიცებულებები ან თავი შეიკავონ უარგუმენტო/უსაფუძვლოდა საზოგადოების შეცდომაში შემყვანი განცხადებების გავრცელებისაგან, რომლებიც აზიანებს საზოგადოების ნდობას საარჩევნო პროცესის მიმართ.

საარჩევნო ადმინისტრაცია მტკიცედ რჩება გამჭვირვალობისა და ანგარიშვალდებულების სტანდარტის დამცველი. ნებისმიერ დეზინფორმაციას მოჰყვება ფაქტობრივი და ყოვლისმომცველი პასუხი, რათა უზრუნველყოფილი იყოს საზოგადოების ზუსტი ინფორმირება საარჩევნო პროცესის მთლიანობის შესახებ. მოვუწოდებთ ყველა დაინტერესებულ მხარეს, იმოქმედონ პასუხისმგებლობით და წვლილი შეიტანონ საქართველოს დემოკრატიული ინსტიტუტებისადმი ნდობის გაძლიერებაში და არა პირიქით დამსხვრევაში“, – ნათქვამია ცესკო-ს განცხადებაში.

მიხეილ სააკაშვილი ვერ აკეთებს იმას, რასაც 2004-2012 წლებში ასრულებდა და ახლა ადამიანებს მოუწოდებს, იძალადონ მათზე, ვისაც არ ეთანხმებიან, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

გორდულაძის თქმით, მიხეილ სააკაშვილი სხვადასხვა დანაშაულებრივი ქმედების გამოა პასუხისგებაში მიცემული და ჭკუას მაინც ვერ სწავლობს.

„ბოროტი, კლოუნი და ჯაშუში მიხეილ სააკაშვილი რუსული რეჟიმისთვის დამახასიათებელ ნარატივს ვერ გადაეჩვია და ვერ გამოვიდა „როზგიდან“, ჯოხით დამუქრებიდან და ძალადობიდან. ეს ადამიანი იმას ვერ აკეთებს, რასაც 2004-2012 წლებში ასრულებდა და ახლა ადამიანებს მოუწოდებს, იძალადონ მათზე, ვისაც არ ეთანხმებიან. მიუხედავად იმისა, რომ სხვადასხვა დანაშაულებრივი ქმედების გამო პასუხისგებაშია მიცემული, ჭკუას ვერ სწავლობს და გონს ვერ მოეგო. გონს ვერც მოეგება – როგორც ძაღლის კუდი არ გასწორდება, ისე ვერ შეიცვლის ზნეს“, – აღნიშნა არჩილ გორდულაძემ.

საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო პროცესზე დისტანციურად ჩართვისას განაცხადა: „თავს ნუ მოვიტყუებთ, ამ კრიმინალურ ბანდას ესმის მხოლოდ ჯოხის ენა, უფრო მეტი შეტევა, გაფიცვა, იმ ბიზნესების ბოიკოტი, რომელიც ძარცვავს ხალხს“.