დღითიდღე საზოგადოება რწმუნდება, რომ ამ აქციებს უკან კონკრეტული პოლიტიკური ძალები დგანან, რადიკალური ფრთის წარმომადგენლები, რომლებიც ვერ ბედავენ რომ სააშკარაოზე გამოვიდნენ, – განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ, გივი მიქანაძემ.
„ეს არის პირველი აქციები, როდესაც არც ტრიბუნაა, არც მოთხოვნებია, არ მოწოდება, რაც კიდევ ერთხელ მიუთითებს იკმაზე, რომ ეს ადამიანები მოქმედებენ შენიღბულად“, – აღნიშნავს უმრავლესობის დეპუტატი.
არასამთავრობო ორგანიზაციების ცხელ ხაზზე ბოლო 3 საათში თბილისსა და ქუთაისში 7 პირის დაკავების და ჩხრეკის შესახებ შეტყობინება შევიდა. ამის შესახებ საიას თავმჯდომარე, ნონა ქურდოვანიძე სოციალურ ქსელში წერს.
მისი ინფორმაციით, მიმდინარეობს დადგენა, სად გადაიყვანეს დაკავებულები, რომელთა შორის ერთი სისხლის სამართლის კოდექსით არის დაკავებული.
“თითქოს რომ მშვიდი ღამეა, ადამიანების დევნა და ტერორი გრძელდება.
ბოლო 3 საათში თბილისსა და ქუთაისში 7 პირის დაკავების/ჩხრეკის შესახებ შეგვატყობინეს არასამთავრობო ორგანიზაციების ცხელ ხაზზე. მათ შორის, 1 – სისხლით არის დაკავებული.
ვცდილობთ გაგებას სად გადაიყვანეს”, – წერს ნონა ქურდოვანიძე “ფეისბუქზე”.
საქართველოს საგარეო საქმეთა მინისტრი მაკა ბოჭორიშვილი საქართველოში ევროკავშირის ელჩს, პაველ ჰერჩინსკის შეხვდა.
საგარეო უწყების პრესსამსახურის ცნობით, სამინისტროში გამართულ შეხვედრაზე საუბარი შეეხო საქართველოსა და ევროკავშირს შორის ურთიერთობების მნიშვნელოვან ასპექტებს.
„ხაზი გაესვა საქართველოს ხელისუფლებისთვის ევროკავშირში ინტეგრაციის საკითხის მნიშვნელობას და ევროკავშირის მხარესთან ამ მიმართულებით ურთიერთპატივისცემაზე დაფუძნებული ურთიერთობების საჭიროებას.
კიდევ ერთხელ აღნიშნა, რომ საქართველო ევროკავშირთან ნაკისრი ვალდებულებების შესრულების ერთგულია და მზადაა, იმუშაოს იმისთვის, რომ ქვეყანა მოემზადოს ევროკავშირის წევრობისთვის.
ხაზი გაესვა ბოლო პერიოდში ურთიერთობებში წარმოშობილი სირთულეების გადაჭრის და მიმდინარე პროცესების ობიექტური შეფასებების აუცილებლობას.
თავის მხრივ, ევროკავშირის ელჩმა დააფიქსირა შეშფოთება საქართველოში მიმდინარე მოვლენებთან დაკავშირებით.
ქართული მხარის მიერ გამოითქვა წუხილი, რომ არჩევნებთან დაკავშირებული პოლიტიკური სპეკულაციები გრძელდება და ევროპარლამენტის რეზოლუციით გაჟღერებული გზავნილები ხელს უწყობს ქვეყანაში ხელოვნური კრიზისის შექმნას 2020 წლის მსგავსად“, – ნათქვამია საგარეო საქმეთა სამინისტროს ინფორმაციაში.
მათივე ცნობით, ხაზი გაესვა მხარეებს შორის მნიშვნელოვან საკითხებზე დიალოგის საჭიროებას.
დღეს ევროკავშირის ელჩმა თქვა, რომ 16-17 არის ის რიცხვები, როცა ვიღაცებმა უნდა სცადონ საქართველოს დასჯა. გარკვეულწილად, ამის პრევენცია მოვახდინეთ იმ გადაწყვეტილებით, რაც ჩვენ გავაკეთეთ წინსწრებით, დავასწარით და მათ არეულობის რესურსი 100-ჯერ შევუმცირეთ, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
მდინარაძის თქმით, ოპოზიციის გარკვეული ნაწილის გეგმების პირველი ნაწილი უკვე დადასტურდა.
„ჩვენ თუ ახლა ტურბულენტობა სამი და ოთხი ბალის მივიღეთ, შეიძლება, ორჯერ მეტი ტურბულენტობა ყოფილიყო და ორჯერ მეტად მომზადებულები შეხვდებოდნენ ამ თარიღებს ის ადამიანები. გახარიამ აღიარა, რისთვის ემზადებოდნენ. ისინი ფიქრობდნენ, რომ ახალ წლამდე რაღაც უნდა გაეკეთებინათ ისეთი, რაც ხელისუფლებას ამოაყირავებდა. მნიშვნელოვანი რამ წამოსცდა, პირველი ფაზა უნდა დავამთავროთ ტრამპის ინაუგურაციამდეო. მეორე ფაზა რას ნიშნავს, უკვე კითხვა და კომენტარებიც კი ზედმეტია. მეორე ფაზა არის ომი, ქაოსი ამ ქვეყანაში, მათი ხელისუფლებაში დაბრუნება და უმალვე ომის დაწყება. ჩვენ თითქოს რაღაცებს ვიგონებთ და თავადვე წამოსცდებათ ხოლმე ეს ამბები. 16-17 დადასტურდა, ინაუგურაციამდე მათი გეგმების პირველი ნაწილი დადასტურდა, რაღა დარჩა? დარჩა კიდევ კითხვის ნიშნები? აღარ დარჩა. ყველასთვის ყველაფერი გასაგებია, ვინც კი შესაძლოა, ოდნავ მაინც ობიექტურად მოფიქრალი იყოს“, – განაცხადა მდინარაძემ.
საქართველოში ევროკავშირის ელჩმა, პაველ ჰერჩინსკიმ განაცხადა: „16 დეკემბერს ევროკავშირის საგარეო საქმეთა მინისტრები შეხვდებიან და განიხილავენ საქართველოს საკითხს. საქართველოზე კიდევ ერთხელ იმსჯელებენ მომდევნო კვირის ბოლოს ევროკავშირის სახელმწიფოთა მეთაურების დონეზე. ასე რომ, მოდით, ვნახოთ, რა მოხდება მომდევნო კვირაში“.
ჩვენ რომ რუსულ რეჟიმს ვებრძოდით, ეს ხალხი ივანიშვილს ამაგრებდა, ზოგმა დათვის ტყვიებიც გვესროლა, თვალებიც დაგვთხარა და ახლა აქეთ ვალს გვდებენ. იქნებ ახლა მაინც მოკეტოთ და პარტიულ კეკლუცობას მოეშვათ?! იქნებ ახლა მაინც ქვეყნის ინტერესებიდან ისაუბროთ და არა ვიწროპარტიული ბოღმებით?! – ამის შესახებ „ნაციონალური მოძრაობის“ წევრმა, ლევან ხაბეიშვილმა განაცხადა.
ხაბეიშვილის თქმით, „ნაციონალური მოძრაობის“ მხარდამჭერებს უწევთ მოთმენა იმ ადამიანების განცხადებების, რომლებიც „ისევ რუსული პროპაგანდის ენით ესაუბრებიან“.
„2012 წლიდან დღემდე, 12 წელია, რუსული რეჟიმი, მწამებელი ივანიშვილი „ნაციონალებს“ დევნის, აპატიმრებს, სცემს, სახლებში უვარდება, უწყობს პროვოკაციებს. ჩვენი 10 000-ზე მეტი მხარდამჭერი პროკურატურაში ატარეს, „ნაციონალური მოძრაობის“ ასობით წევრს წლები ციხეში გაატარებინეს, ათასობით ჩვენი მხარდამჭერი ადმინისტრაციული წესით მრავალჯერ დაუპატიმრებიათ, დაუჯარიმებიათ, ათასობით ადამიანს ანგარიშები დაუყადაღეს, ფიზიკურად გაუსწორდნენ, ქვეყნიდან ემიგრაციაში გააქციეს და მიუხედავად ამისა, ამ პარტიის მხარდამჭერებს, წევრებსა და გუნდს უკან არასდროს დაუხევია, არცერთი წამით არ ჩამოუშვია ხელები და 2012 წლის პირველ ოქტომბრიდან უკომპრომისო ბრძოლაშია რეჟიმის წინააღმდეგ“, – განაცხადა ხაბეიშვიილმა.
ლევან ხაბეიშვილის განცხადებით, „ნაციონალური მოძრაობის“ ნატანჯმა ამომრჩეველმა, მხარდამჭერმა უამრავი შეურაცხყოფა, დამცირება, ბულინგი გადაიტანა და მაინც ყველაზე მხნედ დგას ქვეყნის ინტერესების სადარაჯოზე“.
„ახლაც ყველაზე ღირსეულად და მოთმინებით იტანს უსამართლობას, თავმდაბლურად ატარებს ივანიშვილის სტილში ყველა ნასაუბრებს თუ ცილისწამებას. ცოტა უხერხულია, ორი დღეა, რომ ოპოზიციაში არიან და ორი დღეა, რომ რეჟიმს „დაეჯახნენ“, ასეთი „პოლიტიკოსებისგან“ „ნაციონალური მოძრაობის“ აუგად მოხსენიება. ჩვენ რომ რუსულ რეჟიმს ვებრძოდით, ეს ხალხი ივანიშვილს ამაგრებდა, მათი ხელშეწყობით მოვიდა ეს ქვეყანა აქამდე. ზოგმა დათვის ტყვიებიც გვესროლა, თვალებიც დაგვთხარა და ახლა აქეთ ვალს გვდებენ. იქნებ ახლა მაინც მოკეტოთ ცოტა ხნით და პარტიულ კეკლუცობას მოეშვათ?! იქნებ ახლა მაინც ქვეყნის ინტერესებიდან ისაუბროთ და არა ვიწროპარტიული ბოღმებით?! თავმდაბალი, ყველაფრის მნახველი ადამიანები არიან „ნაციონალები“ და ვამაყობ თითოეული ამ ადამიანით. ბოდიშს გიხდით მათ მაგივრად, ვინც ისევ რუსული პროპაგანდის ენით გესაუბრებათ და ისევ თქვენ გიწევთ თმენა და თავშეკავება. არასდროს დაგვიყენებია ჩვენი ინტერესი ქვეყნისაზე მაღლა, ჰოდა, ახლაც ასე გავაგრძელებთ მუხლჩაუხრელად ბრძოლას და შრომას. ისევ ჩვენ მოვითმენთ და ისევ საერთო, საქვეყნო საქმისთვის. გამხნევდით, ჩემო ღირსეულო თანამებრძოლებო“, – წერს ლევან ხაბეიშვილი სოციალურ ქსელში.
არლამენტი, 10 დეკემბერს, პარტია “ქართული ოცნების” საპატიო თავმჯდომარის ბიძინა ივანიშვილისთვის, პარტიის თავმჯდომარე ირაკლი ღარიბაშვილისა და პრეზიდენტის პოსტზე წარდგენილ მიხეილ ყაველაშვილისთვის სადეპუტატო უფლებამოსილების შეწყვეტის გადაწყვეტილებას მიიღებს.
საკითხს თავდაპირველად საპროცედურო საკითხთა და წესების კომიტეტი განიხილავს, რის შემდეგაც პლენარულ სხდომაზე კენჭისყრაზე გავა.
გარდა ამისა, პარლამენტის წევრობასთან შეუთავსებელი თანამდებობის დაკავების გამო, პარლამენტის დღის წესრიგშია
ირაკლი კობახიძის, მაკა ბოჭორიშვილის, ანრი ოხანაშვილის, დავით სონღულაშვილისა და მარიამ ქვრივიშვილისთვის სადეპუტატო უფლებამოსილების შეწყვეტის საკითხი.
ირაკლი კობახიძე კვლავ პრემიერ-მინისტრია, მაკა ბოჭორიშვილი საგარეო საქმეთა მინისტრის პოსტზე დაინიშნა, ანრი ოხანაშვილი იუსტიციის მინისტრი გახდა, დავით სონღულაშვილი გარემოს დაცვისა და სოფლის მეურნეობის მინისტრის თანამდებობაზე დაინიშნა, ხოლო მარიამ ქვრივიშვილი ეკონომიკისა და მდგრადი განვითარების მინისტრის მოადგილის თანამდებობა დაიკავა.
კუდის მოქნევის მორიგი ძალიან ცუდი მცდელობაა, ბლინკენი არის ის თანამდებობის პირი და ბიუროკრატი, რომელმაც რამდენიმე დღის წინ განაცხადა, რომ უკრაინამ უნდა დაწიოს ჯარში გასაწვევ პირთა ასაკი, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
მამუკა მდინარაძეს კითხვა დაუსვეს აშშ-ის საელჩოს განცხადებაზე, რომლის თანახმადაც, „ენტონი ბლინკენმა როგორც აღნიშნა, აშშ ემზადება, გამოიყენოს მათ ხელთ არსებული საშუალებები, მათ შორის, სანქციები“.
მდინარაძის თქმით, მმართველ პარტიას დამატებით არაფერი აქვს სასაუბრო ენტონი ბლინკენთან.
„მე ვეთანხმები ვიქტორ ორბანის დღევანდელ შეფასებას, რომ მათ უნდა შეწყვიტონ ჩარევა სხვა ქვეყნების შიდა საქმეებში, მით უმეტეს, ასეთი მავნებლური მოწოდებები, რომ უკრაინელებმა კიდევ უფრო ახალგაზრდა თაობის წარმომადგენლები შესწირონ ამ საშინელ ომს. ვუერთდებით ამ განწყობას და პათოსს. გვახსოვს, ბატონი ბლინკენის გახმოვანებით წინა წლებში, თვეებში მიღებული გადაწყვეტილებები სანქციებზე და მსგავს საკითხებზე. სწორედ ასეთი უსაფუძვლო, ყოველგვარი არგუმენტაციის გარეშე მიღებული გადაწყვეტილებები აქეზებს ქვეყნის შიგნით ძალადობის თითოეულ ფაქტს. როცა ასე ჰაერიდან მოიტან და აგენტურის მხარდასაჭერად იღებ მსგავს უსამართლო, უსაფუძვლო გადაწყვეტილებებს, უნდა ვიცოდეთ ყველამ, რომ სწორედ ასეთი გადაწყვეტილებები აქეზებს ძალადობას, მათ შორის, ბოლო დღეებში თბილისის ქუჩებში. გარდა იმისა, რომ ის არის წამსვლელი ხელისუფლების ერთ-ერთი ბიუროკრატი, მასთან იმიტომ არ გვაქვს დამატებით სალაპარაკო არაფერი, რომ ეს არის ადამიანი, რომელმაც რამდენიმე თვის წინ თავის თანამშრომლებს გამოუცხადა, კაცს – კაცი და ქალს ქალი არ დაუძახონ, ასეთ ხალხთან ჩვენ სალაპარაკო არაფერი გვაქვს. ამ საკითხთან ჩვენ გვაქვს ძალიან პრინციპული დამოკიდებულება“, – განაცხადა მდინარაძემ.
ამასთან, მამუკა მდინარაძის განცხადებით, ყველა უნდა ეცადოს, არ ჩაერიოს სხვა ქვეყნის შიდა საქმეებში.
„ყველას მოვუწოდებ, ვინც არ უნდა იყოს ეს ქვეყნის გარეთ, ნუ ერევიან ასე უხეშად ქვეყნის შიდა საქმეებში. ასეთი ჩარევა და შემდეგ შესაბამისი ელჩების მიერ გახმოვანებული იგივე პოზიცია, მათ შორის, ელჩი დანიგანის მიერ, პიროვნული პატივისცემის მიუხედავად, ასევე უხეშად ჩარევას ნიშნავს და ახალისებს ძალადობას. როცა ისინი მოძალადის კონტექსტში მოიხსენიებენ „ქართულ ოცნებას“, შევახსენებ, რომ მოძალადედ როცა მოიხსენიებენ „ქართულ ოცნებას“, კარგად უნდა გაიხსენონ, რომ მათი მსგავსი გადაწყვეტილებები და განცხადებები ახალისებს მათ მიერ მხარდაჭერილი პარტიების მიერ ძალადობის ორგანიზებას. კარგად ვნახეთ, ეს ხდებოდა მათი პარტიული ოფისებიდან. ეს კარგად უნდა გაითავისოს ასეთი განცხადების ყველა ავტორმა. ისიც უნდა გაითავისონ, რომ არა მხოლოდ წახალისება, ეს პარტიები მარტო მოძალადეები კი არ არიან, ძალადობის ინიციატორებიც არიან. მინდა, მოვუწოდო იმ ახალგაზრდებს, პარტიული აქტივის გარეთ, ვინც, შეიძლება, მართლა გულწრფელად რაღაცას აპროტესტებდეს, დიდი ბოდიში, მაგრამ ისინი მოგიხსენიებენ, როგორც სასარგებლო იდიოტებს. ეს არ არის ჩემი ტერმინი. ნუ გამოაყენებინებთ თავს. ნუ გახდებით იმ ძალადობრივი ფსიქოლოგიური წნეხის მსხვერპლი, რომლის მიხედვითაც ისინი გაჯერებენ, რომ გაიღვიძეთ ჩელიაბინსკში, გაჯერებენ, რომ 300-დან 400 ათასამდე ხმა გაყალბდა“, – განაცხადა მდინარაძემ.
2025 წლის თვითმმართველობის არჩევნები ჩატარდება იმ წესით, რა წესითაც ჩატარდა 2017 წლის თვითმმართველობის არჩევნები, – ამის შესახებ საპარლამენტო უმრავლესობის ლიდერმა, მამუკა მდინარაძემ უმრავლესობის სხდომის შემდეგ გამართულ ბრიფინგზე განაცხადა.
როგორც მდინარაძემ აღნიშნა, არცერთი პუნქტი არ იქნება 2017 წლის რეგულაციისგან განსხვავებული.
მამუკა მდინარაძემ განმარტა, რომ საქართველოს პარლამენტი მიმდინარე კვირაში იმსჯელებს 20-ზე მეტ საკითხზე, მათ შორის, საარჩევნო კოდექსზე.
„ამ კანონს როცა მივიღებთ მიმდინარე კვირაში დაჩქარებული წესით, 2025 წლის თვითმმართველობის არჩევნები ჩატარდება იმ წესით, ყველა ნორმის დამთხვევით, რა წესითაც ჩატარდა 2017 წლის ადგილობრივი თვითმმართველობის არჩევნები, მაჟორიტარების რაოდენობით, შესაბამისი პროპორციით, 4-პროცენტიანი ბარიერით და ა.შ. 2017 წელს რაც იყო, ყველა პუნქტი იქნება დაცული, არცერთი სხვა გადაწყვეტა არ იქნება“, – განაცხადა მამუკა მდინარაძემ.
პოლიციამ ბათუმში მომხდარი განზრახ მკვლელობა ცხელ კვალზე გახსნა, დაკავებულია 2 პირი. ამის შესახებ ინფორმაციას შინაგან საქმეთა სამინისტრო ავრცელებს.
კერძოდ, საქმე ეხება ბათუმში უცხო ქვეყნის 4 მოქალაქის მკვლელობას. უწყების ცნობით, დაკავებულებიც ასევე უცხო ქვეყნის მოქალაქეები არიან.
„შინაგან საქმე სამინისტროს აჭარის პოლიციისა და შიდა ქართლი პოლიციის დეპარტამენტების თანამშრომლებმა, ცხელ კვალზე, ერთობლივად ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, დამამძიმებელ გარემოებაში, ორი ან მეტი პირის მიმართ ჯგუფურად ჩადენილი განზრახ მკვლელობის ბრალდებით უცხო ქვეყნის ორი მოქალაქე დააკავეს.
დაკავებულები არიან: 1986 წელს დაბადებული ი.ჯ და 1985 წელს დაბადებული ბ. თ.
დანაშაული 20 წლამდე ან უვადო თავისუფლების აღკვეთას ითვალისწინებს.
გამოძიებით დადგინდა, რომ ბრალდებულებმა, მიმდინარე წლის 7 დეკემბერს, ბათუმში, შურისძიების მოტივით, დროებით საცხოვრებელ სახლში, ცეცხლსასროლი იარაღიდან გასროლით ჭრილობები მიაყენეს უცხო ქვეყნის ოთხ მოქალაქეს: 2000 წელს დაბადებული ფ.თ., -ს, 1997 წელს დაბადებული ვ.დ. -ს , 2004 წელს დაბადებული ჩ.ჩ -ს და 2005 წელს დაბადებულ ა.ს. – ს., რის შემდეგაც შემთხვევის ადგილიდან მიიმალნენ.
მიღებული ჭრილობების შედეგად, სამი პირი ადგილზე, ხოლო ერთ-ერთი მოგვიანებით, სამედიცინო დაწესებულებაში გარდაიცვალა.
ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად სამართალდამცველებმა ბრალდებულები თბილისი-სენაკი-ლესელიძის ცენტრალური მაგისტრალის შიდა ქართლის მონაკვეთზე, ავტომობილით გადაადგილებისას შეაჩერეს და ბრალდებულის სახით დააკავეს.
სამართალდამცველებმა ნივთმტკიცებად ამოიღეს სამი ცეცხლსასროლი იარაღი, ვაზნები და მჭიდი“, – ნათქვამია ინფორმაციაში.
ტელეკომპანია „იმედის“ თანამშრომლებზე ზეწოლა და ბულინგი რადიკალური ოპოზიციის, მათთან აფილირებული მედია და „ენჯეო“ ორგანიზაციების მხრიდან ყველანაირ ზღვარს სცდება, – ამის შესახებ ტელეკომპანია „იმედის“ განცხადებაშია ნათქვამი.
„ბოლო დროს სულ უფრო ხშირად ისმის მოწოდებები „ტელეიმედის“ სარედაქციო პოლიტიკაში ჩარევის შესახებ. სხვადასხვა ოპოზიციური ჯგუფი მოუწოდებს „იმედს“, ხშირად მუქარის ფორმითაც, რომ ტელეკომპანიამ სხვაგვარად წარმართოს თავისი ეთერი.
შეგახსენებთ, რომ „ტელეიმედი“ არის კერძო კომპანია, რომლის ერთ-ერთ მთავარ მიზანს წარმოადგენს ობიექტური სარედაქციო პოლიტიკა, და შესაბამისად, მაყურებლის მაღალი ნდობისა და რეიტინგის შენარჩუნება.
ტელეარხი ამ ამოცანას ზედმიწევნით კარგად ასრულებს. მაყურებლის მხრიდან მაღალი ნდობა განაპირობებს იმას, რომ ბოლო ათწლეულის განმავლობაში ტელეკომპანია „იმედი“ ქართული ტელესივრცის უპირობო ლიდერია. დღეს ჩვენი არხის რეიტინგი მომდევნო ოთხი არხის ჯამურ მაჩვენებელს აღემატება.
სწორედ მაღალი ნდობა და რეიტინგია ის მთავარი მიზეზი, რის გამოც ჩვენს ოპონენტებს ტელეკომპანია „იმედის“ ეთერში მოხვედრისა და გამოჩენის სურვილი ეზრდებათ. ეს ნდობა და რეიტინგი ასევე გამოწვეულია იმით, რომ ტელეკომპანია „იმედს“ აქვს დამოუკიდებელი სარედაქციო პოლიტიკა, რომლის ფარგლებში სწორედ ჩვენ ვწყვეტთ, ვის მოვიწვევთ და ამ მოცემულობის შეცვლას არ ვაპირებთ.
მიუხედავად ჩვენი კომპანიის მიმართ არაერთი მადისკრედიტირებელი, ცილისმწამებლური განცხადებისა და შეურაცხყოფის ფაქტებისა, ტელეკომპანია „იმედი“ იყო, არის და იქნება საქართველოს ევროპული მომავლის ერთგული. ჩვენ ვამაყობთ იმ როლით, რომელიც ვითამაშეთ საქართველოს ევროპისკენ მიმავალ გზაზე. მაშინაც, როცა ვაშუქებდით ევროპულ ღირებულებებს სრულად აცდენილი „ნაცმოძრაობის“ ავტორიტარული რეჟიმის დანაშაულებს თავისი მოქალაქეების წინააღმდეგ და ახლაც, როცა ჩვენს მაყურებელს ვაცნობდით ევროკავშირთან ასოცირების ხელშეკრულების, ვიზალიბერალიზაციის, თავისუფალი ვაჭრობისა და კანდიდატის სტატუსის მინიჭების ქვეყნისთვის უმნიშვნელოვანეს ისტორიულ პროცესს. დარწმუნებულები ვართ, რომ საქართველოს ევროკავშირში გაწევრიანების საკითხს საქართველოს მოსახლეობის უდიდესი ნაწილი ასევე ჩვენი ეთერიდან შეიტყობს.
აქვე „ტელეიმედი“ საქართველოში აკრედიტებულ დიპლომატიურ წარმომადგენლობებს მიმართავს, არ დატოვონ რეაგირების გარეშე „იმედის“ ჟურნალისტების წინააღმდეგ მიმდინარე მასშტაბური შეტევა, ბულინგი, შეურაცხყოფა და სიძულვილის ორგანიზებული კამპანია.
ტელეკომპანია „იმედის“ თანამშრომლებზე ზეწოლა და ბულინგი რადიკალური ოპოზიციის, მათთან აფილირებული მედია და NGO ორგანიზაციების მხრიდან ყველანაირ ზღვარს სცდება. არხის ჟურნალისტების დამცირების მცდელობა, უკიდურესად შეურაცხმყოფელი ლექსიკა, ზოგჯერ ფიზიკური ანგარიშსწორების მცდელობები, ქალაქის ცენტრალურ გამზირზე მიმდინარე აქციების გაშუქებისას ხელის შეშლა, სოციალურ ქსელებში იმიჯის შელახვის კამპანია და ჟურნალისტურ საქმიანობაში ხელის შეშლა კარგად ორგანიზებული ჯგუფების მხრიდან სხვა არაფერია, თუ არა საბჭოთა, ბოლშევიკური მეთოდებით განსხვავებულ აზრთან ბრძოლა. ამ ქცევას საერთო არაფერი აქვს არც დასავლურ დემოკრატიასთან და არც ცივილიზებულ სამყაროსთან“, – ნათქვამია ტელეკომპანია „იმედის“ განცხადებაში.
ბანდიტთა დაჯგუფებების მიერ მედიაზე თავდასხმა მიუღებელია – საით მიდიხარ საქართველო?, – ამის შესახებ საქართველოში გერმანიის ელჩი, პიტერ ფიშერი სოციალურ ქსელში წერს.
„რვა ელჩი „ტვ პირველის“ ჟურნალისტს მაკა ჩიხლაძესა და ოპერატორ გიორგი შეწირულს სოლიდარობის გამოსახატავად საავადმყოფოში ეწვია. ბანდიტთა დაჯგუფებების მიერ მედიასა და სხვებზე თავდასხმა და მათთვის ზიანის მიყენება მიუღებელია. გვითხრეს, რომ პოლიცია რამდენიმე მეტრში იყო და არ ჩარეულა. საით მიდიხარ, საქართველო?“, – წერს პიტერ ფიშერი.
ჩვენი გუნდის ყველა წევრი უერთდება და ადასტურებს საერთო გადაწყვეტილების სისწორეს, საქართველოს საპარლამენტო უმრავლესობის სახელით შემიძლია ვთქვა, რომ ყველა ძალიან მყარია თავის გადაწყვეტილებებში, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ უმრავლესობის სხდომის შემდეგ განაცხადა.
მისი თქმით, მმართველი პარტიის წევრები საერთო გადაწყვეტილებებს ეთანხმებიან.
„ჩვენი გუნდი არის ძალიან მყარი თავის გადაწყვეტილებებში, ყველამ ზუსტად იცის და ჩვენს მოქალაქეებსაც შეუძლიათ, ზუსტად იცოდნენ, რომ ამ გუნდის სიმყარე, სიმართლე საკუთარი სამშობლოს წინაშე განაპირობებს იმას, რომ ჩვენ, საბოლოო ჯამში, ისევე როგორც 16-20 დეკემბრის მოვლენები დავაზღვიეთ, დავაზღვევთ ყველა რისკს, რაც კი შეიძლება მოდიოდეს იმ ადამიანებისგან, პირთა ჯგუფისგან თუ სხვა ე.წ. პოლიტიკური პარტიებისგან. დღეს გახმოვანდა რამდენიმე დღის წინანდელი ამბავი, რომ, მათ შორის, „ნაცმოძრაობის“ ერთ-ერთი დანაყოფის ლიდერმა, გიორგი გახარიამაც საკუთარი პირით აღიარა, რომ ახალ წლამდე თუ არა, აშშ-ის პრეზიდენტის ინაუგურაციამდე მაინც უნდა მოასწრონ. მგონი, ერთი ფრაზა გამორჩა ყველას, პირველი ფაზის გადალახვა, მეორე ფაზაში რა იგულისხმება, ალბათ ამას ყველა ხვდება. ამაზე გვქონდა ბევრი მსჯელობა და გუნდის ყველა წევრი უერთდება და ადასტურებს საერთო გადაწყვეტილების სისწორეს. საქართველოს საპარლამენტო უმრავლესობის სახელით შემიძლია ვთქვა, რომ ყველა ძალიან მყარია თავის გადაწყვეტილებებში“, – განაცხადა მდინარაძემ.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge