დიდი ბრიტანეთის გაზეთ „ინდეფენდენთში“ (The Independent) დაბეჭდილია სტატია სათაურით: „ტრამპი კერძო საუბრებში აღტაცებას ვერ მალავდა უკრაინული დრონების „მაგარი“ შეტევის გამო, თუმცა შიშობს, რომ ამით რუსეთის მხრიდან ცეცხლის შეწყვეტა გართულდება“ (ავტორი – ენდრიუ ფაინბერგი, კორესპონდენტი ვაშინგტონში).
გთავაზობთ პუბლიკაციას მცირე შემოკლებით:
იყო დრო, როცა პრეზიდენტმა დონალდ ტრამპმა თავის უკრაინელ კოლეგას მკაცრად უთხრა, რომ რუსეთთან მრავალწლიანი ომისათვის ვოლოდიმირ ზელენსკის ხელში „კოზირები“ არ ჰქონდა, მაგრამ ახლა იგი ყველაზე მეტ ყურადღებას უთმობს იმას, თუ რა შეიძლება აღმოჩნდეს უკრაინელი ლიდერის ხელში.
რუსეთის რამდენიმე ავიაბაზაზე უკრაინული დრონების წარმატებული თავდასხმის გამო, დონალდ ტრამპი, როგორც იტყობინებიან, კმაყოფილი და აღტაცებული დარჩა კიევის შეტევის გაბედული და იმავდროულად თავზეხელაღებული ხასიათით. დრონები კალიის გუნდივით ირეოდნენ აეროდრომების თავზე და ზედიზედ აფეთქებდნენ ბირთვულრაკეტმზიდ შორი რადიუსით მოქმედ სტრატეგიულ ბომბდამშენებს.
ამერიკული გამოცემის Axios-ის ინფორმაციით, დონალდ ტრამპმა კერძო საუბრებში უკრაინული დრონების მიერ რუსული თვითმფრინავების განადგურების ფაქტი „ძლიერ“ და „მაგარ“ მოვლენად შეაფასა. პრეზიდენტის ერთ-ერთმა მრჩეველმა კი კიევის მიერ შემუშავებული ოპერაციაში გამოყენებული დრონების როლი შეადარა „პატარა ძაღლს ჩიუაუას, რომელიც თავისზე უფრო დიდ ძაღლს სერიოზულად ჯაბნის“.
უკრაინის ხელისუფლებამ ეროვნული დაზვერვის მიერ განხორციელებულ ოპერაციას „აბლაბუდა“ („ობობას ქსელი“) უწოდა, რომლის შედეგად, კიევის მონაცემებით, 40-ზე მეტი სტრატეგიული დანიშნულების თვითმფრინავი განადგურდა, რაც შორი მოქმედების ავიაციის მნიშვნელოვან ნაწილს შეადგენს.
ვოლოდიმირ ზელენსკიმ თავის განცხადებაში რუსეთის აეროდრომებზე შეტევის ოპერაცია ძალიან მაღალ დონეზე შეაფასა. როგორც ჩვენი გაზეთი წერდა, დონალდ ტრამპი, რომელიც ყველაფერზე სწრაფად აკეთებს ხოლმე კომენტარს, იმ დღეებში საეჭვოდ დუმდა და არაფერი უთქვამს, სანამ ვლადიმერ პუტინს ტელეფონით არ ელაპარაკა.
აშშ-ის პრეზიდენტთან დაახლოებული პირების ვარაუდით, საბჭოთა კავშირსა და აშშ-ის შორის მიმდინარე ცივი ომის დროინდელი მსოფლმხედველობის გავლენა დონალდ ტრამპში დიდი ხნის განმავლობაში იწვევდა იმის აღქმას, რომ რუსეთი ძლიერი სახელმწიფოა, ხოლო ვლადიმერ პუტინი ძლიერ პიროვნებას – „გამარჯვებულს და ძლევამოსილს“- წარმოადგენს, მისი გამონათქვამის თანახმად.
მაგრამ გასულ კვირას უკრაინელების წარმატებულმა შეტევამ, არ არის გამორიცხული, რომ დონალდ ტრამპს ვოლოდიმირ ზელენსკიზე წარმოდგენა შეუცვალა. ალბათ, ამის მიზეზი ისაა, რომ უკრაინის წარმატების გამო რუსეთის და მისი ლიდერი უკვე ნაკლებად ჰგავს „ძლევამოსილს და გამარჯვებულს“ და უფრო მეტად ემსგავსება ისეთ პიროვნებას, როგორიც დონალდ ტრამპს ამქვეყნად ყველაზე მეტად ეჯავრება – „წაგებულ ადამიანს“.
თუმცა, ამის მიუხედავად, დონალდ ტრამპი მაინც შეშფოთებულია იმით, რომ მისი ძალისხმევა ცეცხლის შეწყვეტაზე (ზავის დადებაზე) ჯერ-ჯერობით წარუმატებელია. არადა, იგი რუსეთ უკრაინის ომში მშვიდობის მიღწევას ამერიკელ ამომრჩევლებს (და არა მარტო მათ) თავისი პრეზიდენტობის პირველივე დღეს ჰპირდებოდა.
ერთ-ერთი წყაროს თქმით, რომელიც პრეზიდენტს უშუალოდ ეკონტაქტება, დონალდ ტრამპი შიშობს, რომ ვლადიმერ პუტინი მართლაც შეიშლება და რაღაც საშინელებას ჩაიდენს, რუსეთის ბომბდამშენი ავიაციის პარკისათვის მიყენებული დიდი და აუნაზღაურებელი ზარალის მიყენების გამო. კიევის მოქმედებამ სიტუაცია ძალიან სახიფათო ზღვრამდე მიიყვანა: დონალდ ტრამპი ფიქრობს, რომ ამგვარი გაბედული, მაგრამ იმავდროულად ძალზე სახიფათო და სარისკო მოქმედებებით ომი კიდევ დიდხანს გაგრძელდება. „ჩვენს პრეზიდენტს საომარი მოქმედებების სწრაფი შეწყვეტა სურს, ამიტომაც ყოველთვის იმედგაცრუებული რჩება, როცა მსგავსი მოვლენები ხდება“, – ამბობს წყარო.
მოამზადა სიმონ კილაძემ
წყრო:
